|
|
 Re: دلوا كابس العتبة وختا النشال (Re: عبد الله عقيد)
|
Quote: يا بت طلحة الحقى معاى احمد جاهو شيطان الغنا بعد ما نوى الرحيل وشما دعاش البطانة وقال بدق!!!
عليك الله يا بت طلحة اقيفى فوق الكلام القالو احمد دا وفصليهو لينا حتة حتة ودا بعد ما تدينا رايك |
ود النعيم آخوي شيطان الشعر دا وكت يجى بس أزاخرو ليهو من الدرب
الكلام دا أصلو مو دايرلو تفصيل ، عليك الله نحن هسع كان فصلنا للناس شن الفايدة لو ماكان عندهم الحس بالشي دا ، الكلام دا بحسوهو ما بشرحوه وجنس الغنا دا مابدور الناس البشرحولن .
متل حكاية زولن بريد بهايمو بالحيل ، مرضت بقرتن ليهو.. حبسا وقعد ، بعدين جاهو البطري قال ليهو : ياعم البقرة دي حتموت أحسن تضبحا تستفيد من اللحمة ...
عمنا عاين للبطري قوووي وفال ليهو : أنا بقرتي دى ذااتا الزول اللابس البنطلون مابتريدو ، دحين أبعد من وشها.
وأنا بيني وبينكم كلام ناس الإعلام البقولوا الدوبيت دا لو ماشرحوه بروح وبنتهي ما داخل لي فى راسي
أصلا مفروض فهم الناس يسمو لمستوى الدوبيت مش الدوبيت ينزل لفهمهم اللهم إلا إذا أختلفت اللغة .
| Quote: بت طلحة عووووووك الدلو انقلع وشال حجار السام معاهو!! وينك انتى |
أنا خيتك إت ... نكحل لك البير بمسدار عبدالله ودالشريقاوى :ـ
مسدار :ـــ عبدالله ود الشريقاوي
خبارو العادي أصبح بصرو غازّو شمال
أخاف هفـّالو بُريب الضري الوقـّال
رايهوبن جمالو طبيعي ماهو دلال
إت بتواغلو يا أب لبـّة القفاك وشـّال
شرع رسنو هبر قيدو البشيل مطـّامن
عارفو بماسي دوّار البعيد حوامن
هيا ياكاسر السجن الطلع غير ضامن
وصلني أنـّصدق للقلوب أحلامن
نوّختو وجدع رسنو أنعرص واتجوجا
مو رغـّاي هجين الوخّرن قرقوجا
على مسيكة البيقلب فوق قماقمة الموجة
قرض سِمع أم زرازير المحارب اللوجة
عقب صهريجو لى ضرع المسافات ناوي
قطع المصرف أسـّولب جنى الشلكاوي
هجين الخدّو يخفى مصفصف التبراوي
قالي عشاك بـُليحاً صبيتو مناوي
عَقَب ترّاسو شاف ترعة فرح قدّامو
إعمل في مخاماة القِمِح عزّامو
اللطباعو محمودة وقلال عُشامو
يا الليل غادي أصلا ً مابشوف حوّامو
عَقَب القنطرة والميجر أدّى شمالو
أشتت برا الضـُهري الرزم وبـّالو
هجيني مشنّق الديك ها النفر حلالو
قبض الدرب وقلـّدت الحَبيل وشـّالو
طلع الكبري شافلو صقيع ونالن سدّر
ضريري القنـّة لى جمع الفوافي أتحضّر
قالي فطيمة النطر السحاب البدّر
ضروري الليلة بنماسيها لا تتكدّر
قطع إيد المجيد لفخ البويضاء يمينو
عاني الفرقو كاتلنا وبلانا حنينو
ظُبي العُنّس الرَدّد مكافي عسينو
وطاتن دغلة ياالليل باقية بينك وبينو
سادر صيّو عتمر شارد الكيعان
ساند الطافة غالق ساسو مو هزلان
هجين العودو ألين من فريع البان
زاع بى نالو والبادوب نفا نفيان
عَقب رد الكباري الشوح كِسِب باكريتو
شقق نالو وادّاعى ونفض شوشيتو
بعيد الحادق المنقرضة فوقو دنيتو
جمالو عجيب وسابلة على الردف قادريتو
هجين أم درعتين أدا القريعا شمالو
بسوى تِصوصِو السِمع البعد ملالو
جبنو مرادي قُت من المغار أرتالو
خَرَت رسنو ورحل كلو وقطع شبّالو
وخر غردو ديك ربد المنع كرباجو
ناشر الخوة فوق فِقرو ومِزَرق عاجو
ضَرَع البونة بالشقاق عدل مُدهاجو
عنا لى قيصر الروم البيلمع تاجو
هجين الدُرع قليعات العفاية شرفِِّن
نسايم سافلو تيس غنم أم هشيمة كرفن
حشيم المجلس الكل الأمور عارفن
بينك وبينو فرقاتن بعاد صَرِفِّن
كرب باصورو قت ياعالم الأسرار
فوق سِمع المدك اللي النقيب هبّار
على أم لهجن معرجن وتاوى مو نوبار
مره/ن يزوع نعام ومره/ن جناح طيار
عقيد العُنّس الردد مكافي محيلو
في وادي أب قنافد بدري سيتلو مقيلو
سبيطة دنقلي القطّم محنّة نخيلو
عسى ياربي بعد الطول يلاقي عزيلو
عَقب روم العنج والمندرة المسمية
قطع السكة جافل من رزيز عربية
ياقارح التيوس اددوّرن شعلية
ضرورى مبيتنا في قصر أم حنانة عشية
قطع وادي أب جراد تيس الرواين الشوح
براوة عليهو شال فال الخلا المطروح
بى مصعيك وطوفان الحَمَل قوم نوح
وصِّلني أب حسايسن مني أبت ماتروح
جا باري الدويحي يرِف وشايل راسو
عصرن بدري قبل الليل يجيهو دماسو
براوة عليهو تيس قنة الطوال يباسو
ضِمِن مرواح عفيفن مانِدِم جلاسو
فك الدرب وفاقر بالدَهس من حينو
دنّاي البعيد لفخ البُرُص لا يمينو
جافل من جضيض كورو الخلت بى رطينو
عاني لى قايد الحامية الموقا بريمو
طارنلو العُقد بسراع بيدني بعيدتن
تقول قارِح مِدرتاتن نَوَن بصعيدتِن
وصِّلني المِطوِل في الضماير ريدتن
عسى الأمياق يعودن تاني لي غُميدتِّن
نزل فوق عقدة أب ريحان يعايط كورو
إسوِّي مواغل أب قنفة الحزم دردورو
قال ليا النقيب مابخشى من عتمورو
مبيتي الليلة في سوح البيقدح نورو
قطع الإيد وحجّار أم متيلة بدالو
قدُر ماهجرتو يطمح بي ويزيد في فعالو
فطيمة الردّن النقع المِعَسِّن نالو
عفيفة ونذرة مابتدي الرزية مجالو
مع القمبارة وخّرهِن عقيد الريل
بعوم بي سدرو عاني سبيطة القنديل
ربيع القامة ياالعاصي المشيكَ جفيل
بينك وبينو فضّل في المسافة قليل
القليل الفضل في المسافة دا عليك أمان الله يقطع الشراشيف بالرحيح ، عقب بجي بتمو ليكم بإذن الله .
| |
 
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: وصِّلني المِطوِل في الضماير ريدتن
عسى الأمياق يعودن تاني لي غُميدتِّن
|
ربنا يكرمك يا بت طلحة ويعلى مقدارك
والله لقد الجمت الالسن عن شكرك واثلجت الصدور بذكر هذه الروائع .
اتفق معك ان الشرح قد يفقد المعنى ولكنه مهم جدا فى بعض المقاطع.
شكرى لك بلا حدود بت طلحة وربنا يديم عليك نعمة الصحة والعافية انت ةالاسرة الكريمة.
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
بينك وبينو فضّل في المسافة قليل
يا بت طلحة سلام
قلتي القليل مو قليل؟
الزول دا بيتشرّف وبيطمّن في جملو.. بيتحيّل عليو ساي
ياالعاصي المشيكَ جفيل
الطيب شيقوق.. أنت ركبت العاصي المشيهو جفّيل..
وشاهدت (التفحيط) بالسيارات عند أثرياء الخليج..
باقيلك الشغلة دي مي شغلة (تفحيط)..؟
لكم التحايا
| |
|
|
|
|
|
|
|
|
|
Re: دلوا كابس العتبة وختا النشال (Re: omer almahi)
|
ود العقيد
Quote: الطيب شيقوق.. أنت ركبت العاصي المشيهو جفّيل..
وشاهدت (التفحيط) بالسيارات عند أثرياء الخليج..
باقيلك الشغلة دي مي شغلة (تفحيط)..؟ |
اتسود ختوتك مالك آآآآآآآآزول على كلما آخد لي جفلة من المنبر البقت وطاطو ما بتور الا السعد والبييض والدرعية تاااااااااانى مولع جواى لهيب ذكريات الماضى الجميل مالك ؟؟؟؟؟؟؟؟؟.
وحياتك يا ود عقيد ركبت الاصهب الما خمج وخلفت كراع في كراع وماسك الرسن والذمام والعراقي والسروال الطويييييل والسديري والطاقية في الهامة وهاك يا الكربته وهاك يا الخبة وبعد ما طالت المسافات العاصي المشيهو جفيل طلق رجليه ورفع اضنيه لفوووووووق وبقى يتلفت يمين وشمال وانا بالى بس في دوماتو البخرن سااااااااااااى .
آآآآآآآآآآآآه ود العقيد من ايام زمان
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: اتفق معك ان الشرح قد يفقد المعنى ولكنه مهم جدا فى بعض المقاطع.
|
ودالنعيم سلام عليكم عشان قولتك مهم جدا ندى صورة عامة لكل مربوع
ود عقيد
الزول بطمن فى جملو زي ماقلت ودايما الناس ديل بحبو ملاقات الصعاب فى درب المحبوب والطريق يكون وعر والرحلة طويلة ( وطاتن دغلة ياالليل راقدة بينك وبينو )
خبارو العادي أصبح بصرو غازّو شمال
أخاف هفـّالو بُرّيب الضِّري الوقـّال
رايهوبن جمالو طبيعي ماهو دلال
إت بتواغلو يا أب لبـّة القفاك وشـّال
العادى : جمله، وهنا يتساءل الشاعر لماذا ينظر جمله جهة الشمال ؟ ثم يجيب : أخاف هفالو : أى ربما تذكر بريب الضرى الوقال : البريب ينبت فى الخلا ولكن بريبة الشاعر فى الضرا والكجر، وقال وموقل من المقل : جمال النظرة : ( موقل متل المها )
شرع رسنو هبر قيدو البشيل مطـّامن
عارفو بماسي دوّار البعيد حوّامن
هيا ياكاسر السجن الطلع غير ضامن
وصلني أنـّصدِّق للقلوب أحلامن
يصف جملو البشيل بإطمئنان إنه سوف يمسى عند ديار المحبوبة البعيدة ، ويصفه بسرعة الهارب من السجن ( مجنونا فكوا من قيد )
نوّختو وجدع رسنو أنعرص واتجوجا
مو رغـّاي هجين الوخّرن قرقوجا
على مسيكة البيقلب فوق قماقمة الموجة
قرض سِمع أم زرازير المحارب اللوجة
نوختو : أناخ البعير أى جعله يبرك على الأرض ، أنعرص : من العرصة وهى الساحة جمعها عرصات بعنى أنه مرغ صدره وأتوهط فى الوطا ، وأتجوجا : تبوبح ومد عنقه لأعلي وعدل جلسته ( دليل الوجاهة ) ويصفه بإنه ليس كثير الرغاء ، وإنه سريع ولايحتاج لضرب بالسوط في سيره للمحبوبة التى وصفها بالمسيكة تصغير لكلمة مسك والذى يستخرج من التمساح .
عقب صهريجو لى ضرع المسافات ناوي
قطع المصرف أسـّولب جنى الشلكاوي
هجين الخدّو يخفى مصفصف التبراوي
قالي عشاك بـُليحن صبيتو مناوي
هنا يبدأ الرحلة من بعد الصهريج وجمله ينوى قطع المسافات ليصل محبوبه الذى وصف خده بأنه يخفى الدهب المصفصف عشاء ويكون العشاء الذى يتعشى به كما هو واضح المعنى ( بليحن سبيطو مناوى ) ( ودالشريقاوي يستخدم كلمة هجين وعادة يستخدم الشعراء كلمة هجيم ، أي الذى يهجم مثل قولهم ( هجام فريق أم زين )
عَقَب ترّاسو شاف ترعة فرح قدّامو
إعمل في مخاماة القِمِح عزّامو
اللطباعو محمودة وقلال عُشامو
يا الليل غادي أصلا ً مابشوف حوّامو
هنا مواصلة الرحلة ووصف دقيق لمعالم الطريق وسير الجمل السريع جدا يخامى مخاماة ، ويصف محبوبته بالعفة ( قلال عشامو ) وأن المسافة بعيدة بنه وبينها ..
ياالليل غادى ياود عقيد
نتوقف هنا لنعطيكم بقية المسدار :
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
سافل البقعة قارح الرّيل طلعلو علاوي
شاف سوح أب لسانا ً بالقبيح مابعاوي
ظبية الهمد الخلتني نومي سهاوي
جميلتن فرضة مابتحتاج دلال وكساوي
شرّاط العتامير البعيد مُرحالا
قطع الليد وعقب الدونكي والسيالة
الجابرني واتعابك بقيت أسخالا
أنس الليل مع الماتسارخت جُهالا
براوا عليهو تقيس قـُنّ أب قفاين دكـّن
وصل بريبة النقعة أم رواينن جكـّن
عاشقي الريدو في معلق ضميري مركـّن
سرق البركة عندو وراح منافسو يتـُكن
خلاس ياود النعيم هنا الدلو وصل وبرك تج عند المحبوبة ، باقي المسدار كلام تانى بيناتن ماليهو علاقة بى دلوك ...
والسلام عليكم .
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
| Quote: مو رغـّاي هجين الوخّرن قرقوجا |
اظنه نفس المعنى الذى عناه الشاعر حيث يقول " عند البركة قط ما حسس الجيران"
الله عليك يا بت طلحة وربنا يخليك ويعليك. واقلعيلنا الدلو مرة تانى بعد بركانو لانو والله زول غيرك بقدر ينشلو لا برة مافى.
حقا لقد اضفت الكثير الكثير لله درك بعد هذا الشرح الوافى. واسمحى لى ان اقول:
ولو كان النساء كبت طلحة * لفضلت النساء على الرجال
فماالتأنيث لاسم الشمس عيب * ولا التذكير فخـــــراً للهلال
ولا غرو فى ذلك لانك من آل بيت ختو المكارم كوم.
تحياتى اختى بلا حدود
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote:
شكرى لك بلا حدود بت طلحة وربنا يديم عليك نعمة الصحة والعافية انت ةالاسرة الكريمة. |
الأخ أحمد ودالنعيم أنت تقوم بعمل كبير ولاخير فينا إن لم نعاونك فيه ولا شكر على واجب ، فجمع هذا التراث القيم من واجبنا
دعواتكم الصالحات هى غايتنا ، سأغيب عنكم لبعض الوقت ( لزوم الإجازة فى السودان ) والحي بعود ، لوبقينا حيين بنرجع ليكم بالكتير الوفير من بلد الخير بإذن الله
وأعفوا مننا وعافيين منكم .
| |
|
|
|
|
|
|
|
|
|
Re: دلوا كابس العتبة وختا النشال (Re: ود شندي)
|
| Quote: من مأثورات حاج الفاضل ود الصديق |
يا عمدة عليك الله لو حافظ اشعار الوالد حاج الفاضل نزلها لينا فى بوست.
وبعدين ياخى الدلو دا ينشل ليهو سنين فى المياه العذبة دى تجينا الحين بعد البير قطت!!! يلا كحلها معانا باقى نحن عطيش بلحيل.
متى السفر ان شاء الله.
تحياتى وسلم على الجماعة كلهم.
اخوك ود النعيم.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: سأغيب عنكم لبعض الوقت ( لزوم الإجازة فى السودان ) والحي بعود ، لوبقينا حيين بنرجع ليكم بالكتير الوفير من بلد الخير بإذن الله
وأعفوا مننا وعافيين منكم . |
صحبتكم السلامة في الذهاب وفي الاياب
وعفو العافية
وإلى ان نلقاكم قريبا باذن الله
بلغوا عنا التحيات
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: لوبقينا حيين بنرجع ليكم بالكتير الوفير من بلد الخير بإذن الله
|
بت طلحة سلامات
نتمنى لك عطلة سعيدة بين الاهل والاحباب وعودا حميدا ان شاء الله وفى معيتك الكثير الوفير كما وعدتى.
صحبتك السلامة فى حلك وترحالك وحتى نلتقى.
ولك التحية اجلها.
| |
|
|
|
|
|
|
|
|
|
Re: دلوا كابس العتبة وختا النشال (Re: ود شندي)
|
Quote: كفاك والا اكيلك تاني
|
يا ود شندى الله يجازيك اتارى انت الموية تحت التبن !!! وطيب ما كان تظهر من زمان؟! انا عارف انو جرابك ملان شديد دحين عليك الله ابهلوا لينا وكيل البوست دا لا من يدفق.
عاطر التحايا
| |
|
|
|
|
|
|
|
|
|
Re: دلوا كابس العتبة وختا النشال (Re: ود شندي)
|
Quote: ألا اجد في جعبتك فيدو كيب خاص (حاج ام قله ، بت النعيم)
|
ديل ناس جنة يا عماد، والله اذكر انه عندما اتتها الوفاة كان حاج ام قلة عند راسها يدعو لها ويهز فى راسه ويقول "هلا هلا" ذاكرا لمحاسن تلك السيدة الله يرحمها.
ديا ناس يا عمدة لن يتكرروا ولن يتكرر زمانهم.
عمدة انت والله ما شاء الله ذاكرتك ملانة من تلك التواريخ والجلسات ولمة كرموش الله يرحمه مع رفيق دربه الصندوق وتلك الحكاوى والمغالطات التى لا تنتهى.
انها جد تحف اتمنى ان لا يغدر بها الزمن ويطويها غبار النسيان.
وعليك الله كلم السر حاج الفاضل وسلم عليهو او ارسل لى تلفونه واساله اذا كان حافظ شئ من اشعار الوالد حاج ام قلة. لانو يا عماد الكلام دا مفروض يوثق لانو ما فى حد بيقدر يقولو تانى. وانظر معى الى ما قاله حاج الفاضل عندما مر بود جاد الله زمن المشروع الكبير داك والبابور التانجى عندما تعطل والفول المصرى كان وحم ، مر حاج الفاضل بالمجرور وصادف صاحب المشروع واقف متحيرا لانو اسبير البابور الا يجيبوهو من بريطانيا فسلم عليه ولم يرد عليه السلام. رجع حاج الفاضل بحمارته ووقف تجاهه وقال:
سلام اخو ام بخورا شاف
اختا الضلة والكلمة التجيب اضعاف
اصلو الشويه ما بملى جوع الهاف
والضايق الكتير ما برضى بالقضاف
ان مالت عليك الحزمة بالاطراف
اتكلا فوق عجل ام بطيحة الناف
ود جاد الله ام قورا بسوق حداف
كم فاتت الوف حت دى عليها التنضاف
فطيب خاطر الرجل وشاركه محنته.
عاطر التحايا وشكرا على مرورك الكريم واسمعنا عن اخبارك ياخى واخبار الجماعة المعاك.
| |
|
|
|
|
|
|
| |
على احمد النعيم
عبد الله عقيد
omer almahi
الطيب شيقوق
ود شندي
Ahmed Yousif Abu Harira
فيس بوك
تويتر
انستقرام
يوتيوب
بنتيريست