|
|
 Re: دلوا كابس العتبة وختا النشال (Re: سمية الحسن طلحة)
|
يا ود شيقوق اسمعني اقول ليك كلام زول ود مدن ساكت
الأبل ما لماه معاها إلا شغل البيطرة.
الزُراق: بضم الزاي أظنه معني به الاسهال و هو
دلالة مرض و بذا يكون بعيدا عن معنى البيت. أنظر
إلا تساؤل الأخ بأن البعير لو عنده اسهال ما باقي
ليه بيوصل سيده.
الزراق: بفتح الزاي أظن المعني بها ذلك الإفراز
الذي في موخرة رأس البعير من تينك الغدتين.
أرجو تصحيحي إن كان اجتهادي خاطئا.
و سلام من جديد
| |
 
|
|
|
|
|
|
|
|
Re: دلوا كابس العتبة وختا النشال (Re: ابوعسل السيد احمد)
|
Quote: الزُراق: بضم الزاي أظنه معني به الاسهال و هو
دلالة مرض |
يا دكتور كيف حالك
نعم الزراق زى ما تفضلت دليل مرض ولكن ليس في جميع الحالات .
الزراق برضو دليل بدنة بالذات في بدايات الخريف وقت البهائم تشبع في الحدب والعزاز تلقى الحمير تتلافخ براها وتهنق والناس تصيح فك حمار ده من حمار ده وجمل ده من ناقة ده .
دى يا دكتور البدنة البتجيب الزراق ربنا يدوم علينا البدنة .
بت طلحة
نعم الموليتة
نعم السمسم
نعم الفول السوداني
نعم اللالوب
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
بت طلحة
نعم الموليتة
نعم السمسم
نعم الفول السوداني
نعم اللالوب
ــــــــــــــــــــــــ
يالطييييف
كمان جابت لها لالوب 1؟
سترك يارب
أنت عارف أن اللالوب دواء ناجع للمصابين بالإمساك ؟
( هو نحنا ناقصين ... )
ما قطعت مصاريننا بالضحك
زى ما قطعت مصارين الجمل دا بال....
الحمد لله طلع أبوعسل بيطرى
خليك معانا يادكتور محتاجين إستشارتك .
| |
|
|
|
|
|
|
|
|
|
Re: دلوا كابس العتبة وختا النشال (Re: Balla Musa)
|
Quote: عينك النخامة فى الجر
وشعرك الحنقوق الضكر
عليك الخلقك يا الطيب تمعن فى إبداع هذا الشاعر.
دا تعرف يستاهل يركبوه الجمل ابزراق دا عشان مسدارو لما يصل حبيبتو تقابلو يدها فوق نخرتا وترميهو فى طشت الغسيل. |
الله يمسخك يا بلة اخوى ده شنو
الحنقوق ده يا اخوانا باقي السعف بعد الضفيرة وهو ودائما بيطلعوهو من اطراف برعة السعف وببلوهو وبسوهو حبال وسلب - بس عيبه من ينشف ام طوطحيتو بتجيبك اربشى من فووووووق .
بت طلحة صاح للامساك
والقائمة المباركة سالفة الذكر من نفس الفصيلة
| |
|
|
|
|
|
|
|
|
|
Re: دلوا كابس العتبة وختا النشال (Re: gessan)
|
| Quote: ابو حريرة ما تبقوا وليدات الزول ده جملو ماصع ومن ضنبو بجدع في دوماتو هييييييييييييييع . |
الله يجازيك يا ود شيقوق آزول مالك داير تكحلها عميتها!! هاك اسمع دى وبعدين ورنى الجمل دا من دوماتو بجدع وين.
دوماتك كبن العرق دمسيسا
وعتراتك تلاقط للقرب من ميسا
كدى يا المقلد قوم وطاتك قيسا
يا مبروع بتول باكر مبيتنا نفيسا
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
صباح الخير للجميع
وللأستاذ الطيب شيقوق على وجه الخصوص ...
وعودا على بدء
تعرف يا شيخ الطيب الليلة ونستنا فوق الـ"زراق بفتح الزاي" بس ..
عاصى الفوقو جاه كامل الولاية النَيّّلْ
عقب كبشو..وبراهو على الجفيل اتحيّّْل
هجّام دِكَة الميزانها...بى الجيل ميّّلْ
مَصَعْ وإِتَاقَا.....والدُومَاتْ زراقن سيّّلْ
-------
| Quote: مَصَعْ وإِتَاقَا.....والدُومَاتْ زراقن سيّّلْ |
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
امسى التِدْرِى بى مصعي...وفرق توماتو
منع اللّسه ....والمَطْرُوح جمع فرقاتو
هَجَم السمحة..واصبح مِستقيم في رباطو
ظاهرات التعب طُوَفُو....وزَرَاقْ دوماتو
------------
نحن قبيل قلنا انو الزراق (بفتح الزاي والراء وسكون القاف) الذي يقصده الشاعر دليل تعب والفقرة الأخيرة من المربوع أعلاه تؤكد ما ذهبنا إليه..
يعني العرق ظاهر على "الطوف" ومفردها طافة وهي ما يوضع بين ظهر الجمل والمخلوفة يعني cushion أو Pad لتخفيف أثر الشديد على ظهر الجمل...
إذا الشاعر حصر دلائل التعب على جمله في العرق تحت "الطوف" والعرق النازف من دوماتو "وزراق دوماتو"..
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
| Quote: نحن قبيل قلنا انو الزراق (بفتح الزاي والراء وسكون القاف) الذي يقصده الشاعر دليل تعب |
شيخ أحمد ابحريرة
تحيات يقالدن دعاش روحك الطيبة
فى معرض التطاول على مقامكم دعنى أتمنى أن تبدل ماتحته خط من دليل تعب الى دليل مجهود مبذول. فالتعب هنا يقلل من مقدرة الجمل والمجهود يجلب العرق ونزيز الدومات المتل القطران وبما أن الجمل مأصل لايناله التعب رغم ذلك.
تحياتى مع طلب السماح
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
شيخنا/ بله ود موسى
أحييك بأجمل مما حييتنا به..
| Quote: فالتعب هنا يقلل من مقدرة الجمل والمجهود يجلب العرق ونزيز الدومات المتل القطران وبما أن الجمل مأصل لايناله التعب رغم ذلك. |
ونثمن حسك العالي بالمعاني ، وأعترف أنك قد تفوقت على الشاعر نفسه بهذه الملاحظة الذكية ونقدته نقد ربما عدى على "ود السميري" شيخ الشعراء البطانة ومصححهم ، سيما وأن كلمة تعب ذكرها الشاعر نفسه في المقتبش أدناه..
| Quote: ظاهرات التعب طُوَفُو....وزَرَاقْ دوماتو |
واتفق معك ان كلمة "مجهود" ألطف لوصف ما قامت به هذه الراحلة وكلمة "تعب" تقلل من شأنها الكثير..خاصة أنها تبعت هذا البيان:
Quote:
منع اللّسه ....والمَطْرُوح جمع فرقاتو
هَجَم السمحة..واصبح مِستقيم في رباطو
|
لكن دعنا نحسن الظن في شاعرنا...
فلو انه استعمل كلمة "مجهود" بدل "تعب" لاختل إذا الوزن وضاع الجِرس...على الرغم من أن الأخيرة تغمز من قناة أصالة الجمل ومقدراته على جمع فرقات الأرض المطروحة وسيره الحثيث دون لسة كرباج أو لكزة رجل..
كما أن عبارة أصبح مستقيم في رباطه الواردة في النص أعلاه دليل على أن الرحلة لم ترهقه بمعنى التعب ، وإلا لأصبح يتمرغ في شايتو وربما احتاج لطبيب بيطري جراء ما ذهب إليه استاذنا ود شيقوق في معرض تفسيره الشهير 
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
خـرت العاصي وتـّر فوق جرانواتواتـا
بَشّــت دُومتـو خَـرَبتــّو القـلادة شَتـَاتا
الدرعَـــا الوضِــيبا يغـلـِّب المشّـاطـة
بدنِيهو الماهو أفس حَدبَات قِيافتو تلاتـة
الشيخ عبد العزير
بَشّــت دُومتـو خَـرَبتــّو القـلادة شَتـَاتا
بشيش الدومات فى اللبل دليل الحرارة
يعنى الجمل البعرق بى دوماتو
حر ومحرق والعكش عند البشر ...
والله أعلم .
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
الاخت بت طلحة
هلا تكرمت بشرح ابيات الشيخ عبد العزيز هذه
آآآآآآآآآآه احمد اخوى مالك علينا انت
وكمان رافع اضنيهو يتلفت كبرياءا يمين وشمال . ولو كمان اخد لو دشرة بانفيه مع هزة راس تجنن عديل . وقطعا رسنو حبل عاشميق .
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
| Quote: ظاهرات التعب طُوَفُو....وزَرَاقْ دوماتو |
ظاهرات العرق طوفو....وزراق دوماتو
أو
ظاهرات المصيع طوفو...وزراق دوماتو
كدا ياشيخ أحمد تستقيم القافية والوزن والمعنى.
بس أنا كنت خايف أهبش الشاعر تأدبا لكن مادام إنت بديت شجعتنى.
فالشاعر الذى تحكمه القافية والوزن وتضطره أن يأتى بكلمة معناها أقل دا بكون فيه نضم من فحول شعراء ونقاد البطانة.
لكن فى ظنى أن كلمة تعب أتى بها الشاعر دلالة على العرق إذ أن التعب لايظهر فعليا ليبلل الطوف.وهذه فى حد ذاتها جميلة لدمج الفعل ونتيجته بطريقة لطيفة.
لذا أرى (ظاهرات المصيع) أبلغ من (ظاهرات العرق).
تحياتى ياودالنعيم والطيب شيقوق وبت طلحة وقيسان والجميع.
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
هَمك فاضي فى رُوبة الفُروع بِتنقِد
ونحن نهاتِى لا بنرقُد ولا بنرِقِد
الخلانى دون الناس بقيت متسقد
فرق العُنقُو باهى ودوفو مو متعقد
الاخوة الاكارم بله موسى وقيسان واب حريره وبت طلحة وود شيقوق وكل المتداخلين ، تحياتى بلا حدود.
الابيات لاحد الهمباته وهو جالس يتأمل جمله وهو على الحالة التى ذكرت ويتذكر ست ريدو التى طال غيابه عنها.
تسلموا جميعا.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: هَمك فاضي فى رُوبة الفُروع بِتنقِد
ونحن نهاتِى لا بنرقُد ولا بنرِقِد
الخلانى دون الناس بقيت متسقد
فرق العُنقُو باهى ودوفو مو متعقد |
Quote: اها زولنا ده هنا ظنى انو بيعمل باذدواجية المعايير غالبا يكون قاصد حبيبته ولكنك من السياق الظاهر ربما تفهمها حرصه على جمله من الحرامية خلاهو متوهط بعنقريبه جنبو ومساهر خوفا من سرقتو او ربما يكون قاصد سربتو مع جملو بالليل عشان يواصل تنقدو في روب الشدر .
وظنى بمقصد المحبوبة قد يرقى الى درجة اليقين لو قرينا البيت الاخير ( فرق العنقو ........) ودى قطع شك بيعنى محبوبتو لانو قاصد بلغة اولاد المدينة ( الرقبة قزاز خاتية العرق الشافك بالنيران حرق) |
الطيب ..سلامات كتيرة ياخي عليك ..وعلى المجموعة ..
انا والله - ما اكضب عليك - مرات قاعد احتار فيك ..
بتكون داير تشرح بيت بيتين ..وتمشي كويس وفجأة تجيب ليك شرح لي كلمة او بيت تقلب المعنى كلو ..وتغتِّس حجرو ..شوف هنا إنتا قلتا:
ولكنك من السياق الظاهر ربما تفهمها حرصه على جمله من الحرامية خلاهو متوهط بعنقريبه جنبو ومساهر خوفا من سرقتو
هسع عليك الله العبارة دي بتجي مع كلام زول همباتي ..همباتي يالطيب يا اخوي ..كيفن يكون خايف علي جملو؟؟
أفو ؟؟..حرامية معا الزول البحمي الناس الغمدة ..لا بنرقد لا بنرقِّد؟؟
الغريبة إنتا عاااارف انو الزول دا قاصد محبوبتو الحامياهو النوم وبقى زي السُقدة ..طيب جية الإحتمال الزي خوفو علي جملو دا داعيهو شنو؟؟
حتى ولو سبقتا الكلام دا بي كلمة "ربما"..لانو كلمة خايف علي جملو دي كبيرة ..كلمة "ربما" مااااا أظن بتغتيها ..
-ماني متاكد لاكين الكلام داأظنو قالو ود ضحوية -
- غايتو إن سمعك الهمباتي القال الكلام دا بيزعل من شرحك دا بالحيل وقطع شك بِخُت عينو علي جمالكم الفي الصعيد ..
علي اي حال انا ماني قاصد شي غير إننا في النهاية بنحاول نتونس ..او قول اننا بنهرب ..معاً الى عوالم بنحبها ونشتاقها ..عالم بننتمي ليهو ولي كلامو السمح..إنه عالم الدوبيت وكلام اهلنا..
لك مني وللجميع خالص التحايا ..
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: هسع عليك الله العبارة دي بتجي مع كلام زول همباتي ..همباتي يالطيب يا اخوي ..كيفن يكون خايف علي جملو؟؟
أفو ؟؟..حرامية معا الزول البحمي الناس الغمدة ..لا بنرقد لا بنرقِّد؟؟
|
الاخ قيسان
عاطر التحايا والود ، ثم الشكر قدر سيل الهواد عندما يسيل ويغرق العوالى على مرورك الهادف
نعم الأبيات قائلها الطيب ود ضحوية فى ختره من خترات همبتو. ومن هنا أضم صوتي لصوتك أن الهمباتى الذي جند نفسه لهذا الغرض لا يخاف أبداً بل ولا يعرف شيئاً اسمه الخوف أصلا.
أذكر أنى قرأت للطيب ود ضحويه وهو عائد من غاره من غاراته ومعه حركه من الإبل . فنزل في صالون من صوالين ذلك الزمان ، وكانت صاحبته فى غاية الجمال. فعندما امتد بالسامرين ليل الأنس ورقيص الفاتنة يلعب بالالباب ، وإذ بها فجأةُ تتوقف عن الرقيص وتهمس للطيب قائلة "يا خيرى العول هدا" يعنى قد وصل الفزع. فرد عليها قائلا ودون ان يلتفت :
ما يروعك فزع ناساً كتار منهدة
زوزى ونسفى اللاعند الفنايد ندا
يعجبك عوسنا وكتين الضراع يتمدا
عودى الرقصة عقبان السما الينقدا
اها عليك الله يا قيسان دا زولاً بخاف على جملو ينسرق؟؟ لا والذى طاف الحجيج ببيته.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: ما يروعك فزع ناساً كتار منهدة
زوزى ونسفى اللاعند الفنايد ندا
يعجبك عوسنا وكتين الضراع يتمدا
عودى الرقصة عقبان السما الينقدا |
هييييييييييييييع ود النعيم
فزع ناسا كتار منهدة دى بتذكرني وقت قيف البحر يجي متلهدم فيك
والابيات دى بتذكرني كلام شاعرنا القال
من قومة الجهل ما شلتي روب بدلتي
الحمد الله السلامة البى فريقنا قدلتي
برمة صلبك القطر الشحن تندلتي
نسفة صدرك المرض الملازي كبدتي
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: ما يروعك فزع ناساً كتار منهدة
زوزى ونسفى اللاعند الفنايد ندا
يعجبك عوسنا وكتين الضراع يتمدا
عودى الرقصة عقبان السما الينقدا |
ود النعيم عوافى
رايك شنو نعدل وزنة الشطر التانى :
زوزى ونسفى العند الفنايد ند
ثم الأخير:
عودى الرقصة عقبان السما اللنقد
وطبعا الدال الأخيرة مشددة فى كليهما:
طبعا أنا قطعت فى ود شيقوق فى الخاص. واعتقد أن مايكتبه هنا من شرح يقع فى خانة الهزل أو المزاح .
فى رأيى كلاهما لايصلح فى حضرة هؤلاء الأولياء من فحول الدوبيت رضى الله عنهم.
الونسة سمحة لكن محتاجة لمضايرة فى مثل هذه الأضرحة التى نسعى إليها حفاة.
تذكرت وأنا فى السودان وفى ليلة شعرية كان محى الدين فارس يلقى قصيدة (لا لن أحيد), وإذا بأحد الحضور يطلق ضحكة مدوية. توقف محى الدين فارس وعبر عن غضبه على المسرح معنفا ذلك الشخص ورفض مواصلة الليلة الشعرية.
أتمنى من ودشيقوق أن يونسنا بما يعرفه من شروحات ونقد ومقاربات لشعر هؤلاء الفحول فظنى أنه فحل فى هذا المجال ومنه نرجو الفائدة والتبرك فى ذات تنويخة.
تحباتى للجميع
| |
|
|
|
|
|
|
|
|
|
Re: دلوا كابس العتبة وختا النشال (Re: Balla Musa)
|
| Quote: أتمنى من ودشيقوق أن يونسنا بما يعرفه من شروحات ونقد ومقاربات لشعر هؤلاء الفحول فظنى أنه فحل فى هذا المجال ومنه نرجو الفائدة والتبرك فى ذات تنويخة. |
رسالتك الجميلة وصلت اخي البلة
| |
|
|
|
|
|
|
|
|
|
Re: دلوا كابس العتبة وختا النشال (Re: الطيب شيقوق)
|
Quote: فى رأيى كلاهما لايصلح فى حضرة هؤلاء الأولياء من فحول الدوبيت رضى الله عنهم.
الونسة سمحة لكن محتاجة لمضايرة فى مثل هذه الأضرحة التى نسعى إليها حفاة.
|
الاخ بله سلامات
نعم والله لمثل هؤلاء تجب الانحناءة، وأوافقك انه يجب ان توضع الامور فى موازينها الصحيحه لكى نرد الجميل لهؤلاء الفحول ولو بالنذر اليسير.
تحياتى بلا حدود.
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
حار....فرق المخرّّتْ عودو ماهو مزَاوَرْ
أبرد منو ...........سِم العقرب البِتْفَاوَرْ
الخلى الجُنَانْ ابى ينهدى .......ويتشاور
اصلو خدار، وكيف شرف الخدار بتجّاور ؟
---------------
الجنان بضم الجيم وفتح النون: يعني العقل
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
نؤكد متابعتنا بكل استمتاع و رغبة صادقة في
تعلم الكثير من أدب أهلنا في البطانة و بواديها.
عودا على موضوع ( الزُراق ) يا ود شيقوق
صاحب كتاب ( الشمار المدقوق ) و الرجل
الفصيح النابه، فإنه كما تفضلت يا أخي
بمجيئ موسم الأمطار و تحديدا فترة (الرشاش)
و العينات الأوليات للخريف تكتسي الأشجار خضرة
من بعد يباس و الأرض حشيشا من بعد محل. و
تلتهم البهائم هذه الخضرة الجديدة بنهم
مغيّرة طعامها الذي كان إما يابس الحشائش
أو ما خزنه أصحابها من عيش و دريش و ( خرم)
فتتغير على بيئة كروشها الأطعمة فيصيب بعضها
ذلك الأسهال. و أظنك قد أسميت ذلك البدنة.
كلامنا دا آلطيب أخوي كلام أفندية ساكت أو
(كلام بطرية). و إت عارف أهلك العرب ما بيقتنعوا
بكلام الحكماء إلا لامن تغلبهم الحيلة تب.
ـــــــــــــــــــــــــ
الخُرّم: في بعض الأنحاء هو ثمر شجرة الحراز
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
| Quote: والمحريب شهق فتح قزايز ريحتو |
الله الله الله
يا سلااااااااااام
ده الكلان البخلي الصورة ثلاثية الأبعاد وحية تسعى بين الناس... الما شم ريحة المحريب فعليا من هذا المقطع فليراجع طبيب الانف والإذن والحنجرة..
طبعا عمكم الشاعر عُكير الدامر ده موضوع تاني ...فصل براهو في مجلد شعر الدوبيت...
نباهة وتصوير وحس وجمال...
العندو قدرة الوصول إلى شعر عكير الدامر فليتحفنا به مشكورا..
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
كلامنا دا آلطيب أخوي كلام أفندية ساكت أو
(كلام بطرية). و إت عارف أهلك العرب ما بيقتنعوا
بكلام الحكماء إلا لامن تغلبهم الحيلة تب.
ـــــــــــــــ
الطبيب / أبوعسل
أهلنا العرب بقولوا ( أسأل مجرب ولآتسأل طبيب )
ويعتمدو التجربة والدراية الشخصية وما بسمعوا
كلام الأفندية أبدا وأصلا هى مابتمرض إلا تصيبا عين
لأنها مأصلة ومكلوفة صاح وأرضها عفية
وأصلهم ما بعرضوا بهايمن على طبيب يعنى لو كان
فى بطرى فى الحلة ممكن يتعالجوا عنده الناس ..
لكن بهايمن دى لاآآآلا .
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
نعم ..يا بت ود طلحة ..
الإشارة هنا لابد منها.. إلى ان اهل البطانة-مثل غيرهم من اهل البوادي- ومن خلال علاقتهم ببهائمهم -أنعامهم -
وفهمهم لها ولصفاتها وحالتها النفسية ..
نجدهم أطباء بيطريين من خلال الخبرة ..يجرون العمليات الجراحية الخفيفة منها والدقيقة ..ويفهمون الحالة النفسية
للحيوان ..ويخلقون العلاج المناسب لكل حالة مرضية ..فمثلاً عملية تقطير القُطران ..هو عملية معقدة جدا ..حيث يستخلصونه من عملية حرق "الحنظل" فيسخدمونه لعلاج بعض امراض الجلدية..كما انهم يجبرون المكسورة بعناية فائقة..ويعالجون المجروحة ..والمبطونة ..يستخدمون الشاي المُر علاجاً لرمد العيون _وللأطفال ايضاً-..يستخدمون النار والمراويد في الكي..والبليلة الحارة للوالدة عند ولادتها حتى تسقط "التبيعة"..يفطمون الصغير دون فرزه من أمه بعمل "الخُلال" حتى لايرضع امه -بالنسبة للماعز-....وغيره ..وغيره..
وكلها من أوجه مباصرة الحياة لحيوانهم الذي يعزونه ..وبالطبع هو جزء من حياتهم..
---------
أخونا ابو عسل سلامات ..
في ذاكرتي مشهد لعملية جراحية شهدتها في فريقنا ..وانا صغير..(وما زلت امازح بها صديقتي البيطرية)..
يوم قالوا بقرة "اللمين" "أرحمت" اي خرج رحمها -على ما اظن بعد الولادة؟؟- المهم ..خرج رحمها..
وأحتار اللمين وأهله والحزن بائن عليهم من ان يفقدوا البقرة ..
فإذا بالبصير عمنا "عبد الله" يأتي ..ويقوم بغسل الرحم أولاً بملح دافيء..ثم يقوم بخياطة الرحم ..مستخدماً
أشواك السيّال ..وبعض الأغصان الصغيرة ينجرها على هيئة دبوس ..فقام بخياطة الرحم ..ثم إرجاعه الى مكانه ..واوصى ببعض ترتيبات العناية ..
وبعد ايام عادت بقرة اللمين الى طبيعتها ..فتقاطر الجميع "يحمدلون" السلامة..
اقعدوا عافية
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: فإذا بالبصير عمنا "عبد الله" يأتي ..ويقوم بغسل الرحم أولاً بملح دافيء..ثم يقوم بخياطة الرحم ..مستخدماً
أشواك السيّال ..وبعض الأغصان الصغيرة ينجرها على هيئة دبوس ..فقام بخياطة الرحم ..ثم إرجاعه الى مكانه ..واوصى ببعض ترتيبات العناية ..
وبعد ايام عادت بقرة اللمين الى طبيعتها ..فتقاطر الجميع "يحمدلون" السلامة |
قيسان عشا الضيفان...
هذه بصارة وحكامة ومثلها ينسحب على البشر ...أدوات تستخدم على الانسان والحيوان بدون تعقيم ولا تتانوس ولا تلوث ولا خرابيط ..الله حافظ...وربك يجيب الصقط قدر الغطا..وعارف احوال عباده...
والحاجة ام الاختراع بقولوا
ودمتم جميعا
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
| Quote: العندو قدرة الوصول إلى شعر عكير الدامر فليتحفنا به مشكورا.. |
الاخ ابو حريره هاك واحده من عكير:
يا سامع دبيب النملة جوف العاتمه
يا كاشف الخفايا الفي الضماير كاتمه
بي جاه سيد الرسل الكرام أبو فاطمه
لطفك بي عكير يوم الدفن والخاتمه
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
| Quote: يا اهل المروه آناس انشلوا معاى الدلو دا لا برا |
أبشر آ ود النعيم هسع بجوك أخوان البنات أخوال فاطنة
هاك كلام الخال الشيخ عبد العزيز :ـ
نحن بنركب التيس الِبقرقِـر حـِسّـــو
ونحن جَمِيعـَــة الإِنَـفـَخ بنفِـشّــــــو
وريـلات المَعُـوز بالفارغـة ماتـتـفشـّو
كل طيراً بكوس نَـقدُو وبرك فوق عُشّو
نحن بنركب التيـس البسـولو صَريمَــة
نحن السُـلـّط الهيبـة هِـيلنـا قديـمــــة
نحـن أخـوان البَــرّمُـــولا بَريمَـــــة
نحـن دربنـا زلقيـبـة ومقابـل الشـيمـة
الشيخ عبد العزيز
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
Quote: نحن بنركب التيس الِبقرقِـر حـِسّـــو
ونحن جَمِيعـَــة الإِنَـفـَخ بنفِـشّــــــو
وريـلات المَعُـوز بالفارغـة ماتـتـفشـّو
كل طيراً بكوس نَـقدُو وبرك فوق عُشّو
|
يديك العافية يابت طلحة وحرم ياكى النجدة العند الضرورة وطلتك كل زول بدورا. واعجبتنى جدا الحكمة فى البيت الاخير وهى تطابق المثل "الطير بعيشو نقدو"
تحياتى بلا حدود
| |
|
|
|
|
|
|
|
|
|
Re: دلوا كابس العتبة وختا النشال (Re: Balla Musa)
|
| Quote: سلام يا أهلنا الحنان |
تسلم من كل بلاء يا ود موسى. وهاك من ود شورانى شويه:
لى ود البياخد المحفل الحى شوقو
حر عنافى ماهو فدين بغلب سوقو
اريت اب ضلعة كان مربوط وهمى علوقو
جملا بقلع الركاب وسرجو الفوقو
عليك الله يا دكتور بله انظر كيف اقتبس هذا الشاعر فى بيته الاخير قول امرئ القيس حين قال فى وصف فرسه:
يزل الغلام الخف عن صهواته * ويلوى باطراف العنيف المثقل
قل لى بربك كيف اهتدى هؤلاء الناس الى مثل هذه المعانى البديعة؟؟؟
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
يا خلى المعاى انا مرضى باكر دورو
نوسر بيا واتقست دروب دكتورو
ياأبومروة
مافـيـنـا البكُربُــوهــو ويقــول أحّـي
نحن بنركب العاصي ونضـرب الصـّي
نحن خصيمنا بنكيــدو ونخـلف الكـي
ونحن عُشقنا في السمحات مليحة الزّي
البشير ود النور
من قومة الجهل مَانِي الدِّنَي كارتوت
نجّاع كنت فوق ضهر المحارب السـوط
بحلف بى يميـن دايما بباســط يــوت
سايم دمّي عارف عُمري قاصدو الموت
ابراهيم ودقدور
| |
|
|
|
|
|
|
|
|
|
Re: دلوا كابس العتبة وختا النشال (Re: سمية الحسن طلحة)
|
الليل امسى والنعسان جرايدو يرحن
كبس الهم على السلط قلوبن يوحن
كضم الجرة سحار الغروب اتمحن
نعود سلمانه يا طه الظنون إن صحن
يا دكتور بله وينك؟؟؟
هذه الخواطر للشاعر الهمباتى الطيب ود ضحويه فى خترة من ختراته، وإن شاء الله سأورد فى هذا البوست كلام ود ضحويه مع الهمبته، بس ابقالى قريب.
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: gessan)
|
Quote: عسى ولعل تشفي غليلي من الشوق لتلك الطبيعة في ديار البطانة..بكل تفاصيلها ..
فبي حنين خاص ما زال "يتاورني "كلما جات السِيرة ..
|
جزاك الله خير الاخ قيسان . واحيى فيك هذه الروح الوثابة الى عبق التاريخ حاضره وماضيه.
وتشكر والله جزيل الشكر على هذه اللوحات البديعة التى جسدت كل شئ.
تحياتى بلا حدود وابقى اخى لنبقى نحن.
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: على احمد النعيم)
|
شكرا قيسان على هذا الإبداع
أتهمتك بأنك قد نمت تحت السيالة
فى إنتظار إيماءة بالعمة من أب حريرة
لتأتينا بجبنة وزنين فى دار ود الشلهمة
ولكنك فى حال ولا أجمل من ذلك
لك التحية .
ود النعيم سلام
أكرب زندك لاتغتس الدلو...
الخلانــــي بتقـلب بطبــق الوحـّة
حاكيــت الحراز بعد البــرق مالحّ
جنيبــة المِدرعـات أمّات نحاساً قحّ
سلبت دوفــة العيص أب جرايداً دحّ
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: على احمد النعيم)
|
Quote: ادينى رايك فى الكلام دا يا بت طلحة وهو للشاعر ود ضحويه:
|
ياسلام ياود النعيم
إنت ناوى تمرقنى من طورى ساكت
جبت كلام ود ضحوية البتور علينا الحسس
هشع كلمة يتشنف دى الشناف دا البعرفو لى منو هنا ؟
شنف أذنيه للسماع ...أى شنف فلان آذاننا بكذا ..
والشناف التشهير واللوم
واللشقى زى ماقال الشيخ عبد العزيز :
أشقا وسدرو مو غريقان بعد ما أتناطا
عرقوبو وحنوه دور قادف النواتة
والسمتانة دى كلاما برااهو
يتخنف : والله الكلمة دى مشتاقة أسمعا لى زمن
حبوبتى بت حمد النيل الله يرحمها كانت بتقول لينا
ما تخنفوا كلام الكبار ( الله يفتح عليك ياود النعيم )
تكوفتو : والله طريتنا المشاط دقاق ومكوفت ومكلق...
الله يطراك بالخير ... ما ريحتنا تب .
الولد البخاف من القبياة تلومو
بخلف ساقو فوق تيسا رقيق قدومو
أما جاب رضوة البهم المنقر فومو
وأما أتخامشن قدح الرماد حرومو
دا مو أياهو الولد البعناهو ود ضحوية ذاااتو .
وتسلم ياالأخو .
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: سمية الحسن طلحة)
|
Quote: نسيتى مبارك النوق الرتوع وشرابا
|
والله ما أروع هذا المشهد يا بت طلحة مشهد الرتوع والروى، حقيقة لقد رجع بى القهقرى وذكرنى ايام الرعية وحولك بهائمك متوسده ما لذ وطاب من نباتات الخريف الغضة، وتنهل من غدرانها وحفائرها المليئة بذلك الماء الذى يضرب لونه الى الحمره، انه وايم الله لمنظر بهيج.
جزاك الله خيرا بت طلحة وزيدينا عليك الله من هذه الروائع.
تحياتى بلا حدود
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: عبد الله عقيد)
|
Quote: أرجو ألا يتأرشف هذا البوست.. فهناك الكثير ليقال
وتحياتي لصحبك الرائعين في هذا البوست |
الاخ ود عقيد
تحياتى واطنان من الشكر والتقدير على مرورك الرائع. ولن يظل هذا البوست مرفوعا الا بوجودكم البهى واقلامكم المترعة بكل ما هو جميل.
تحياتى بلا حدود مع تكرار شكرى الجم.
| |
|
|
|
|
|
|
|
|
|
Re: ألبِـــل: دوبيـت ..سَـمَع.. ومحاولات شــوف .. (Re: الطيب شيقوق)
|
Quote: بعد اتفاضل الزهمول وسوطو جبك
جريك عنا وسرعك برق ونايبك كك
على ستي ام مرادة مني ابت تنفك
هجم كاضم وزي حاضن الحبارة برك
|
تسلم يا اب حريرة وتشكر على هذه الكنوز. وغوص عليك الله لا جوة وجيبلنا من المدفن.
_______________________
يا بت طلحة الحقى معاى احمد جاهو شيطان الغنا بعد ما نوى الرحيل وشما دعاش البطانة وقال بدق!!!
عليك الله يا بت طلحة اقيفى فوق الكلام القالو احمد دا وفصليهو لينا حتة حتة ودا بعد ما تدينا رايك فيهو.
تحياتى لكم جميعا
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: ود عقيد
كيفنك؟
ومرحبا بك في (دلو) ود النعيم وكنا قد افتقدناك فيه |
حباب شيخ العرب
والله ابنسطت من الدلو دا بسط شديد خلاص
ولقيتك انت بالذات متبحِّر في أشعار (فناني المفضل) ود شوراني
حاولت أجاريك بي بعض أشعارو لكين كل مرة الزمن يفلت مني..
بعدين يا شيخ العرب أنا قانِص ليكم بي (دلو) خاص بأسماء ألبِل عند وشوراني
ياخي الزول دا حيرني:
الضير، ود الحوري، ود المُرّة والشراد، ود المُرة والفايق، الفايق.. إلخ..
ديل أسماء جمل واحد ولّا جملين ولّا كل واحد براهو.. أفتونا يا أهل العلم
ومعاكم في الدلو الكابس العتبة وخِتا النشّال..
وجنا ود النعيم دا، علي الأيمان مكسب.. الله يخليهو ويخليكم كلكم..
| |
|
|
|
|
|
|
|
|
|
Re: دلوا كابس العتبة وختا النشال (Re: عبد الله عقيد)
|
Quote: ومعاكم في الدلو الكابس العتبة وخِتا النشّال..
|
مرحبا بك يا ود عقيد مرة ثانية وثالثة ورابعة حتى يمل الترحيب. ووجودك بيننا جد اضافة كبيرة جدا.
شكرا على مرورك الكريم.
وابقى اخى لنبقى.
تحياتى بلا حدود
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: أكل الصافي علاّك يا اب سناما رك
أبوك فارط الجدي الأخد الروينة وجك
على ست الصبا الدكانا قاطع اليك
رايف وفكفك الحسكة أم حديداً شك |
عليك الله يا علي شوف ود اب حريرة دا بجيب لينا في شنو..!!
كلام عجيب..
تعال يا الطيب اشرح لينا (الدكان القاطع اليك) دا..
"على ست الصبا الدكانا قاطع اليك"
ولّا بحرِّش عليك ابوبكر..
لك التجلّة
| |
|
|
|
|
|
|
|
|
|
Re: دلوا كابس العتبة وختا النشال (Re: على احمد النعيم)
|
Quote: اب صـلعة القُطابي الطار بعد ما رك
اســـرع منو فور هرع البروق لا شك
علي دكك الجنيب الراسي مك من مك
سوي مشي الهوا القالع بعد ما فك |
ود عقيد وود النعيم ، سمية الحسن ود شيقوق وبقية العقد الفريد
تحياتي لكم جميعا
وفاقدين صديقنا د.بله موسى صاحب الرؤية النقدية الثاقبة لينظر لنا في امر هذا البعير الذي حير الوصاف..
وفي راي أن الشاعر زاتو راسو ملان في كيفية وصفه. فبعد ان وصفه بالنسر
| Quote: اب صلعة القطابي الطار بعد ما ركّ |
غير رأيه ليقول لا ..بل هو اسرع.
| Quote: اســـرع منو فور هرع البروق لا شك |
بالمناسبة ايستطيع احدكم ان يقدر سرعة سحاب الصباح "الهرع" الذي يفور على الافق عقب ليلة ماطرة؟
ثم يأتي ليذكره بمقصدهما الذي ضربا له كبديهما وهو مضارب حبيبته الجميلة التي شبهها بالجنيبة اي المهرة الملكية المتوارث نسلها (مك من مك) ،
| Quote: علي دكك الجنيب الراسي مك من مك |
ويحثه بأن يزود سرعته بقدر الحافز الذي ينتظرهما
| Quote: سوي مشي الهواء القالع بعد ما فك |
...
شفت يا الطيب قوة عين هذا الشاعر وحسن ظنه بجمله؟ يطالبه بان يسرع كما يسرع الاعصار!!
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
هذه الجلسة سنكرسها للدلو ده لأنو اي بوست آخر دخلتو الليلة طمم بطني
افتكر ان ما يلي لود شوراني حسبما أذكر:
هجين الجرحو فتقنُّو البروق بي دعاشن
طفّر منعقل عارفني ليه مخـاشن
علي ست الجمال الحادق المو داشن
لوبع والجوالس رحّلن بي فراشهن
صوبوني ان كنت مخطئا
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: هجين الجرحو فتقنُّو البروق بي دعاشن
طفّر منعقل عارفني ليه مخـاشن
علي ست الجمال الحادق المو داشن
لوبع والجوالس رحّلن بي فراشهن |
جاءني احساس بان المربوع اعلاه ربما يعود لشيخ شعراء البطانة الشيخ/احمد ود عوض الكريم ود اب سن لأنه يحمل بعضا من بصماته.
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: الضير اللسان سوط العنج مو قالسو
فات نص المسافة وسرجو فكّ جوالسو
ناطح بي الغرامو فؤادي حسسه مسالسو
نفسو عفيفة مو مداين السعوب ومخالسو
|
الاخ ابو حريره
جزاك الله خيرا على هذه الروائع
ويا بت طلحة عووووووك الدلو انقلع وشال حجار السام معاهو!! وينك انتى
نفسو عفيفة مو مداين السعوب ومخالسو
كم هو رائع هذا المقطع ولله در الشاعر حيث اهتدى الى تصوير هذا المعنى البديع.
تسلم يا ابو حريره
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
Quote: إتجمع : بالغ فى الجرى وأصبح صغيراً وهذه حال البعير عند ما يسرع ، يكاد يلامس الارض بصدره.
|
يذكرنى هذا الوصف قول المتنبى فى رائعته التى يصف فيها الاسد:
ما زال يجمع نفسه فى زوره ** حتى حسبت العرض منه الطولا
شرح جميل يا ابو حريره ووافى
تحياتى
| |
|
|
|
|
|
|
|
|
|
Re: دلوا كابس العتبة وختا النشال (Re: Ahmed Yousif Abu Harira)
|
| Quote: نفسو عفيفة مو مداين السعوب ومخالسو |
يا سلام يا سلام
بالفعل رِفعة وسمو أخلاق ونظرة مثالية للجمال والعفّة..
إنت عارف يا اب حريرة، الشعراء ديل غالبيتهم يتّبعون هذا النظام القيمي الرفيع..
وإلا لما استطاعوا أن يفصحوا بهذا الوضوح عن مجالستهم ومؤانستهم للجميلات لدرجة
التصريح بأسمائهن وأماكنهن.
ثقتهم في أنفسهم، جعلتهم يثقون تماما أن الناس لن يخطأوا فهم مقاصدهم.
أنظر إلى صاحبك وصاحبي ود شوراني.. فهو يبدأ مسداره عادة بالصلاة..
صليت الصبح حاضر......
ضهر الجمعة صليتو...
....... وهكذا
ويختمه بالجلوس إلى فلانة
بل يختمه أحيانا بالصلاة أيضا.. وصلاة الصبح التي يؤديها بعد ليلة من المؤانسة
لا يحتاج بعدها إلا للوضوء..
أنظر (مسدار الضير)..
الكلام دا عايز ليهو متابعة
ولكم خالص التقدير
| |
|
|
|
|
|
|
| |
ابوعسل السيد احمد
الطيب شيقوق
Balla Musa
gessan
على احمد النعيم
Ahmed Yousif Abu Harira
عبد الله عقيد
فيس بوك
تويتر
انستقرام
يوتيوب
بنتيريست