الكهرباء..والكتاحة ..والملاريا ..ونقص العلاج ..وتدني التعليم ..هل تمنع عودة مغتربي الخارج ؟

Quote: نجيء لما تروم من دولارات من "جرَّاء" العمل في كنف المنظَّمات ونقول: منو البضمن ليك آخوي، وسط ضبابية السودان دي، إنو ما يلم فيهن بشير وألا مشير يطردهن عن بكرة مانحيهن ويخلي كنفهن كنيفاً ضبانو ينوني.

..ناس المنظمات ديل بيجيبوا ليهوا هواء بااااارد هو كايس دبارة تسـد بابو..بعدين يا فردة أنا بجوازي الأمريكي دة لو مقلبوني السبت بمرق الأحـد..و برجع بلاد الكفر و الفسوق و العصيان حيث يحترم الإنسان و لا يهان..أنا شايف انو الموضوع بيستاهل المحاولة، لكن زي ما قلت ليك أنا متحامي بالأمريكان الأقرب لي من حبل مشنقة الأخوان..بروح السودان للوظيفة الما خمج..أي عنكبة شنكبة بنقز تاني يوم ميامي طوالي.

Quote: رعايا الدولة السودانية ممن حصلوا على شهادات وربَّما جنسيات أمريكية وأوروبية، أدقشوا الخليج المرفَّه* دا فإنَّ لكم ما سألتم.

و الله يا عادل دي بحثناها لكن العروض المتاحة كلها أخير منها ميامي!
القروش بتاعة المدارس الأوروبية و الأمريكية في الخليج بتمحّـق الراتب..و كمان في بلد زي الدوحة الإيجارات غالية..لازم الخبتة تكون تقيلة شوية..ع شان أنا عندي طفل و نـص ..لووول هسع يجو الجندريات يبلعوني قولي..أنا قاصد انو البنت عمرها أربعة شهور لكن دربها علي القراية طبعآ..أها..المدارس الحكومية هنا مقنعة جدآ..و تقوم بتعليم أولادنا تعليمآ رائعآ..أها..أم بشير لأنها كانت مدرّسـة في السودان فإن ابني من القلائل المولودين هنا و بيكتبوا عربي و بيتكلموا بالدارجي السوداني..الوضع دة ممكن يستمر..و أنا أتنازل عن رغباتي في العيش بمجتمع يشبه حاجاتي (من أجل أبنائي)..و نشوف دبارة لمشاغلات بنت الجيران لبشير..و بعدين ياخ هو ودّ أخوك دة لو بيكتفي بي قدّوم قدومين و يمسح خشمو أنا ما حايشو ..لوووول ...لكن أنا عاوز ليهو حياة متوازن يختار فيها هو حاجاتو بدل دقديق البيبان دة..
عادل
و الله كلها صعبة
أديني سنتين أتم دكتوراة الجن دي و بعد داك يمكن علي عثمان تقع بيهو طيارة
و لآّ البشير يدقش شاحنة نظافة
من يدري؟

.