|
|
|
 Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: عدلان أحمد عبدالعزيز)
|
نواصل يا الخواض :
وما عرفنا نشيف
بلدك كككيف.....
نار الواقود ...الداف والقيف
سحر الدباى المتطارف
مجموع الطين والموية
ومكان الزاد فى الصوت المتخالف
لامن يصلك سعدى
ولامن يملاك لود عينك وحدة يصلك ناقص
يصلك مو ضيف
بلدك كككيف
جهوية ام سام
ياعمة ريف ياالرومة عصر والدنيا ضلام
ياصومة ريق فى ريق
ياسرحة حس يتام فى ضيق
مالنا ومال العيبة
مالنا ومال اللبق المقشور
الحرز ان بات للسد.... مو سد لديمة
السد تكليف
بلدك كككيف؟
شبرية وزمة صقرية ونمة صنانها يهد الجابرة
وتحرق ... ماك مهموم
ياولد النحيب الحى لى وين
ويابت الغيوم الماطرة فوق الرى ....كككيف
ويادنيا بتقيفى معاى ...ولا أقيف معاك على...
...........................
نواصل...
| |
 
|
|
|
|
|
|
|
|
Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: Elkhawad)
|
عدلان
شكرا ً لهذا الشعر..
سمعته طازجا من صوت صاحبه في ود سلفاب في زيارتي الاخيرة للسودان, حين ذهبنا هناك للمشاركة في ليلة تذكيرا لمصطفي سيد أحمد وأذهلتني بمفردته الجميلة المختلفة تماما والاداء المسرحي الجميل الذي به يؤدي القصيدة..إنه ربما هو الشكل الجديد من " مسرحة القصيدة"..وبعد إنتهاء الليلة تعانقنا فوجدته شابا حييا ً متسودنا ً..
ما يفرح إنه إضافة لتجارب القدال وحميد.......وله خصوصيته التي ستجعل منه مبدعا ً ذا أسم كبير في القريب العاجل.
| |
|
|
|
|
|
|
|
|
 Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: عدلان أحمد عبدالعزيز)
|
الأعـزاء محمد عبد الله شريف، noha_g، Elkhawad، Salwa Seyam ، معتز تروتسكى..
خالص التحايا.. يتجمل البوست بمروركم والحـب.
الأعـزاء سفيان بشير نابرى، وصلاح شعيب..
سلام ومحبة.. ياليت محمد عبيد الفاضلابي يلقى ليهو فَرقّـة يزورنا بي هنا لأنو "عبا فينا الحـب.. عِبيِّـاً مو ساهل" ونريد أن نركبه بالشكر.. شوفة!
العزيزة سالي (فو حمر)، تحية وتقدير..
تدهشينني يا بت أخوي.. وأكثر من ذلك تبثين في الطمأنينة.. حضرتِ يافعة لبلاد الفرنجة ومع ذلك تمتلكين ناصية اللغة وشيطان التعبير وكل يوم تثبتين أن أجمل الأطفال قادمين ساعة فساعة.. تزيدين من سيوف خطّـاب ومريم، الطوال.. طـولا..
بورك فيك.
لكم الرياحين..
عدلان.
| |
|
|
|
|
|
|
|
|
|
Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: عدلان أحمد عبدالعزيز)
|
عدلان عبد العزيز ..
الصديق الذي اقراء له جل مشاركاته ..
تحية ليك ولضيوف بوستك ده ...
زول ده كلمتو ليك يجي من كم (طاشر يوم) الا لقيتو ليك كان ضارب
العالي (اديس الجميلة) واتحاوم فيها تمام التمام وحدثو عن انتظارك
ليهو عن (قفيك لا اترو) وكلمني انو نسي (الباص ويرد) حقو وغلبو يتزكرو
ليهو فترة طويلة .
المهم يا ود عبد العزيز هو بقريك السلام ولكل السالو عنو وقراء كلامك ده
وبسلم عليكم نفر نفر وقال الخطوة كان انعدلت تب جايكم ولا ندمان .
| |
|
|
|
|
|
|
|
|
|
Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: Elkhawad)
|
الطندية
محكومه بالاعدام شنق
قاضيها من نسج الخيال
شنّاقه ................ من ناقه وحصان
الطندبه الموزونه من قوس الفنون
الشاتيه صيف
الناصحه فى دعو النبات
رمق التوافيد البحد رص الدفين المنطلق
هيكل زمام السر تحدثبو المعابد والعيون
شرفة تلاوين الرسوم
للموضه والغصن المحّسن والبكاء
ما فيشه فى سقف البيوت
تلقاها فى
سقف القصايد....طندبه
اشكالها فى يوم القصاص:
لون الرصاص ما....
ذى تلاوين السنابل
والحبل... مبروم من اليافها الغزيره
وجمله من ناسها بتنق
سألونا: وين المحكمه؟
وشنو القضيه المولمه المرفوعه ضد المتهم؟
النيل رفض مرقت مياءهو على الارض
أبت السحابات النزول
نقصة فصول العام فصل
اتلمت الجهله وبكت عين البهايم وسرّبت فينا الحنين
جّلينا من حكماً قديم
ووقعنا فى حكماً اليم
اشمعنى ما بدت المداوس منم هنا ؟
اتلم فى اللون الغناء
وجواب دموع الغايبه بسأل عن ...
مزاد لوحه وطبق
ما....
كلنا الودران وواقف جوّه فيك
مستنى جيتك رسمى
شان
يتوزع............. السيف والدرق
لا اكلنا يوم
لا نمنا كوم
لا صحوه لا اتلمينا قوم
لا شفنا ضوء لا ضلمه شان نعرف نحوم
القاضى والجلاد
مكّتف فينا سرساراً يصوم من السكوت
من صباحاتنا البيض
الفاق كتل فينا النفس
الخايف المندس يحرّش فى الضياع
حاحا ويشّرك للضماير فى البيوت
ود ال............
حنود
ما أظن مظالمنا بتفوت
عن كل عقلاً جّل فى التفكير يسوط
وما أظن بكاء البنّوت
بيجرح فينا احساساً يموت
اتندل الهم فى الهموم
واتبشكر الليل السموم
واتلفّح الشارع الوجوم
نّبه النباه وضوء
ضوءت الشمس الهجوم
اتفتّحن بيبان محاكم الطندبه
وخّشت الناس النقاش
حّضروا الورق البدين القصه والنهج الغريب
حضّرنا نحنا عصينا ياخ
قنالا : عيب
جهّزوا القاضى البرتب للقصاص
جهّزنا حالنا
وشلنا فى جوانا ساس
قنالا: يا ام المحاكم كضبى
وسيبى الاصول فى حالها
ما تهبشيلنا زول
الطندبه المتهمه بى عدم التكاثر والشتول
قطعت لسانها الاغنيات
والمحكمه
اتهزّت تحوم جوانا ما لقت الثبات
الطندبه الزهد المخّمر من رحاب النافله
لى ارث التعادى على المعادى المحزنه
ماسوس خفوت الجدعه
يتلقّف تفاهات الشهاوى الواهنه فى عصمت خراب
نفس المحاصيل التنيص
لى كشة الندى واليباس
شن دلّ ديل ؟ قصبونا لى دّق النحاس
بندق على عكس الكلام
واللحن ساعة يبقى خاص
الطندبه الموعوده بى دعوة خلاص
ميدان بنات الحله فركه
وقطعه قبلانه الدواس
بندوس تحت ما يدوسوا فوق
المحكمه المصنوعه طوق للعامه فرّتاكا الدباس
جّل الكضب نهج الكضب
شيخ منصر الراكوبه
طّق من الزعل
فى المحكمه
اتطاير ورق
كل المعانى السمحه والوسخانه..طق طق طق طق طق طقطق سريرك يابلد
خّلى السبق
خير الدراويش اليفيض
مكتوب زياده على الصفق
والباقى من سعر الذوات
قّلايه فى فصل المحاور والجنين
انسانى ما دّمع براو
وحيات غناك فنان مجّرتق بى غناو
قدّامى ذى خلّاك وراو
ما سكتين,,
1- سكة مراسل وانتفاض
2- وسكة محاسنا العراض
غشّاشه يا نسل الجراد
كل الوفود
الشارده من سخن النزيف
تلقانا كيف؟
ما نحل رباط المشنقه
وقلبت بقت غنّايه
غنّت لينا غنيات الفكاك المطلقه
الطير عقد عزمو ورفس
معنى المناصب
طلّقه.....
قلع الهدوم الخدره جدّعها فى المسيد
يا سيدنا هوى؟
يا حى وحى
يا حى وسيد
قنالوا جّدعها فى الجريد
قال لينا خلوها بتبيض
الطندبه الزرع الخصيب
بت موعد الشهر البصارع للوساع
غنية انابيب الشعاع
ارتاحى
حرّقنا المكان
كسّرنا فيو المطرقه
دلّينا من سدرك..... سوأل الازمه شقّنا المروق
وحلينا حبل المشنقه
دّلينا من سدرك سوأل الازمه
شققنا المروق
وحلّينا
حبل المشنقه
مع شديد احترامى لكم
محمد
عبيد
الفاضلابى
6-7- 2004م
مشاركه للمهندس .. عثمان في الارشيف
| |
|
|
|
|
|
|
|
|
|
Re: الشاعر الفاضـلابي؛ خيزران الفـرنجـة.. ابــداآآع بلا حــدووود. (Re: عدلان أحمد عبدالعزيز)
|
اهو يا عدلان قبضنا علي الراجل
وهسي بكتب ليك بالخبرية دي من حسابو عديل كده
يلا اخليكم معاهو تاخدو وتدو المهم هو كسلان ومهمل
وما قاعد يهتم بالحاجات دي كتير ...
عليك السلام وعلي كل الجمع الجميل ,,
-سفيان نابرى-
الاخ الفاضل الجميل /
عدلان عبد العزيز
تحياتي وسلامي
كل الاخوات/ة المتداخلون لكم جميل التقدير والاحترام
اسعتموني جداً بما تكرمتم به علي من اشادة وتقدير انا ممتن لكم احبائي
واهو خبريتكم دي رجعتنا نكتب في سودانيز ودي ماساهلة منكم
سفيان بشير كان ليو الفضل الكبير فى هذا التواصل جانى وكلمنى سفيان من اقرب الناس لى.... واقرب الى القلب... له جزيل الشكر... وهو رجل من الرجال البدعمونا فى البلد...
بس يا ود عدلان جبت الكلام ده من وين بالصوت ومسجل انا ذاتى ده ما عندى!!!
والعجيبة كمان يا ود عدلان الناس البتصلح وتغالط انو كدي ما كدي ديل !!!
شكيت محنكم تتغالطو وكلكم صااااح !!!
انا هسي حاسي اني عايز اتوهط في نصكم واي زول يحكي لي حكوتو واسمعه بدم روحي
ولو اي زول اتكرم علي ببوسه بدوب فيكم ...
احبكم
بسال من كل الاخوه/ات القديمين معان من بدايات البورد وسفيان هو الذكرنى الباص ويرد
عايز اعرف كل الاخبار عنهن/هم ابتداء من بكري ابو بكر لحدود بتوا منار الجديده
وانت يا بكرى انا مشتاق ليك جدا انا كنت بره البلد... اعفو لى الانقطاع
اخى الكبير الفنان حبيب الشعب \ صلاح شعيب اذيك وكيف مشيت بدون القاك... وسلوي والخواض ونهوية وعبير خيري ياسلام عليكم وعلي طيبكم وجمالكم ياسلام عليكم ياناس
وياعبير اضربي ياخ نسمع صوتك ...
ود عدلان التني راجيهو منك ومنهم ومنهن وانا زول سمع وبحب اعرف عن القصص والتاريخ والحكايات والمجتمع وبعد داك كان في نضم بينتم .
اقوليكم حاجة انا ولا قادر اقيف من الكتابة ليكم لكن اهو بديت الليلة معاكم وتاني ما اظن ترتاحوا ...
في كل منافي الله الواسعه كونوا بخير ...
| |
|
|
|
|
|
|
| |
noha_g
سفيان بشير نابرى
fohamer
معتز تروتسكى
صلاح شعيب
Faisal Salih
فيس بوك
تويتر
انستقرام
يوتيوب
بنتيريست