|
Re: الكهرباء..والكتاحة ..والملاريا ..ونقص العلاج ..وتدني التعليم ..هل تمنع عودة مغتربي الخارج ؟ (Re: Adil Al Badawi)
|
الاخ عادل والاخت الهام ..والزوار تحية طيبة .. لا زلنا ندور كالساقية ..نحكي ونتأمل ونسمع قصص الاخرين .. ولازلت ياعادل البدوي تضحكني حينا ..وتوجعني حينا اخر .. ورغم ذلك ..قناعاتي ان الاغتراب الان لم يعد مجديا ..و لم يعد (جاذبا) تخيل الان النقص الكبير في الاطباء الاختصاصيين في السودان حتى ان الانباء تقول انه قد يتم التعاقدمع اطباء اجانب ..بينما في هذه المدينة الصغيرة التي اعيش فيها الان ثلاثة من الاخصائيين السودانيين فقط ..اعرف ان واحد منهم فقط له عمارة كاملة بالخرطوم .. ويقضي جزء كبير من اجازته السنوية في بريطانيا.. تخيل كم الناس بحاجة لهذا الاختصاصي الكبير الان بالسودان (وبحقوا) ياعادل بالقروش ما بالمجان ..مقابلة الاختصاصي في اليوم في السودان تكلف 50 الف جنيه بس للطلة .. تخيل ان يقال لك ان ولاية كاملة لا يوجد بها اي اخصائي ..تخيل ان مساعد الطبيب اصبح طبيب في بعض الولايات ..والاطباء السودانيين تمتلي بهم مستشفيات الخليج والمملكة المتحدة ..قد يكون للحكومة دور كبير في ذلك وعدم الاستقرار دور ؟..لكن الاوضاع الان تتغير في السودان ..قد افتح بوستا بخصوص ذلك لكن صراحة الواحد محبط من الكثير ..ولي عودة ...
| |
|
|
|
|
|
|
Re: الكهرباء..والكتاحة ..والملاريا ..ونقص العلاج ..وتدني التعليم ..هل تمنع عودة مغتربي الخارج ؟ (Re: luai)
|
.
Quote: تخيل الان النقص الكبير في الاطباء الاختصاصيين في السودان حتى ان الانباء تقول انه قد يتم التعاقدمع اطباء اجانب ..بينما في هذه المدينة الصغيرة التي اعيش فيها الان ثلاثة من الاخصائيين السودانيين فقط ..اعرف ان واحد منهم فقط له عمارة كاملة بالخرطوم ..ويقضي جزء كبير من اجازته السنوية في بريطانيا.. تخيل كم الناس بحاجة لهذا الاختصاصي الكبير الان بالسودان (وبحقوا) ياعادل بالقروش ما بالمجان ..مقابلة الاختصاصي في اليوم في السودان تكلف 50 الف جنيه بس للطلة .. |
سلامات يا لؤي و نصف عام جميل و حلو للبورد/الوطن .. القاريء و الأعضاء أنا طبعآ لا أعرف الطبيب الذي تحكي عنه لكن مؤكد أن لديه مشكلة أخرى غير المال..فلا تحدثنا عن عمارته و ثمن الكشف فقط! ممكن يكون جابوا ليهو شافع طيرة يرأسـو.. ممكن يكون جابوا ليهوا ضحايا تعذيب ليعالجهم فعافت نفسه المهنة.. يعني الحكاية ليست فقط المال..الدكاترة ديل عندهم حاجة اسمها Job Satisfaction تعني لهم الكثير. لك تقديري..و أمنياتي و دعواتي بتيسير العودة (الطوعية) لنا..
.
| |
|
|
|
|
|
|
Re: الكهرباء..والكتاحة ..والملاريا ..ونقص العلاج ..وتدني التعليم ..هل تمنع عودة مغتربي الخارج ؟ (Re: الطيب بشير)
|
الاخوة/ات الاعزاء وصاحب البوست الكريم لؤى:
حقيقة هذا من أجمل البوستات التى قرأت، وحسناتم نقله للنصف التانى من2006 وكل عام
وانتم بخير.
1- الكهرباء الغالية وكمان بتقطع والملاريا وتدنى التعليم، أسباب كافية لعدم عودة مغتربى الخارج- طوعا واختيارا طبعا-أضف الى ذلك سوء نوايا العصابة/الدولة المبيتة للانقضاض على آخر حق انسانى لانسان السودان مطلوب توفيره من الدولة المسئولة عنه وهو:توفير الماء الصالح للشرب، طبعا العصابة الحاكمة بعد أن تأكدت من استكانة ورضوخ الشعب لكل أحكامها القراقوشية، قررت استيراد وتركيب عدادات الدفع المقدم للمياه والماعاجبه يشرب من البحر،وبرضو وغصبا عنه حيركبوا ليه العداد قدام بيته.الحاجات المذكورة دى كلها أساسيات الحياة ومضمنة فى وثائق حقوق الانسان،وهى من أولويات أى حكومة محترمة ومسئولة أمام الله تعالى وأمام شعبها.طبعانعمةالأمن مفقودة تماما فى سودان الانقاذ، رغم انك لم تذكرهافى العنوان( هو العنوان يشيل شنو ويخلى شنو؟!!) 2- بعد الأساسيات وحقوق الانسان، نجى للشطارة والتجارة والبزنس فى السودان وطبعا الاخوة القبلى وضحوا وبالأدلة الدامغة أن شطارة وفلاحة ومقدرات المغترب لن تسعفه لتحقيق النجاح ما لم يضمن له ضهرا انقاذيا قويافى السودان، أو يكون له مال قارون لتغطية بند الرشاوى والبلاوى الراجياه من ضرائب ودمغات وغرائب مما تجود به قرائح موظفى الانقاذ الا من رحم ربى. 3- نجى للوظائف العامة والجماعة قبلى ما قصروا وورونا البيها والعليها والحساب ولديا لؤى ولدى. 4- أهاالنقطة دى نتكلم فيها عن المغايس الاتخصصت فيها الحكومة لتطفيش كل من تسول له نفسه بالرجوع لمملكتهاالسودان وهى نفسها المغايس الطفشت سودانيين كتار( لحدى ما سووا ليهم قهوة فى نيكاراغوا!!) ودى بدت بالاحالة للصالح العام وفتوى الولاء قبل الكفاءة والتى دمرت الخدمة المدنية وطفشت الكفاءات الوطنية.حكت لى استاذة جامعية أن سبب اغترابهاكان تعيين أحد طلبتهارئيسا لها( حسب الفتوى:الولاء قبل الكفاءة)والذى لم يكتف بذلك المنصب الذى لا يستحقه بل تعداه الى مضايقة أستاذته التى تكبره علما وسناضاربا عرض الحائط بقول الشاعر: قف للمعلم وفه التبجيلا..بأساليب صبيانية حقيرة لمنعها من استخدام كمبيوتر الكلية!! وقصة الطبيب الاستاذ الجامعى الذى قام بعض طلبته بمهمة تعذيبه فى بيوت الأشباح لاثبات الولاء للعصابة الحاكمة. فكيف سينسى هؤلاء ماجرى لهم فى وطنهم حتى يفكروا فى العودة الطوعيةللسودان والحال ياهو ذاتو الحال؟!!! طبيب مغترب عاد الى السودان بطوعه واختياره،طلب ابنه من ادارة الجامعة تخفيض الرسوم الى مقدار رسوم طلبة الداخل( الأهلهم غير مغتربين)فكان رد الادارة عليه:لن يتم تخفيض رسومك الا بعد سنة من عودة ابيك حتى نضمن حق الجامعة مما عاد به من حصيلة الغربة؟!!! 5-الدولة/ العصابة، ما عندها مانع تدفع رواتب كبيرة وبالدولار للاطباء وغيرهم من الاختصاصيين، أماالاطباء الاختصاصيين العائدين من المغتربين توريهم الويل وسهر الليل؟!!
Quote: تخيل الان النقص الكبير في الاطباء الاختصاصيين في السودان حتى ان الانباء تقول *انه قد يتم التعاقدمع اطباء اجانب .. |
طبعا المغايس كتيرة وقالوا: ايش جبرك على المر؟ قال: الأمر منه، الغربة مرة مافى شك، لكن دعونا نفكر فى كيفية اصلاح الحال واعادة الوطن المسلوب من العصابة/ الدولةقبل دعوةالمغتربين للعودة الى براثن الذئاب، ودة طبعا داير مجهود كبير وتعاون للخروج من المأزق. * والمأزق الأكبر كيف ستقنع أولادك الذين ولدوا وتربوا فى بلاد تحترم مواطنيها وتقوم بمسئولياتها تجاههم، بأن السودان هو وطن من أصله؟!! فدعونا نهيىء لهم الوطن قبل اعادة توطينهم. تحياتى
| |
|
|
|
|
|
|
Re: الكهرباء..والكتاحة ..والملاريا ..ونقص العلاج ..وتدني التعليم ..هل تمنع عودة مغتربي الخارج ؟ (Re: luai)
|
سلامات و الله انا جيت نهائي بالفهم انو ما مشكلة و اخشوشنوا فان انعم لا تدوم اليوم يوم 21 من يوليو العظيم و مافي ماهية جات دا يقولوا عليهو شنو انسوا الكتاحة بنربط عيونا انسو السخانة بنزرع نيمة انسو الملاريا المههوقني و القرض و النيم علاجنا نبقي في حق الملاح و البنزين و الله الناس دي فاتحة بيوت و ماهية ليوم 20 مافي الا ..................... انا علي روحي بس و غالبني السودان ترجع ليك زول عندوا عيال و متطلبات و نظام مجاملات مرهق و الله اخير ليكم برة انشاء الله تشاد انا شربت المقلب و باقية في البطلعني انشاء الله هنولولو سلام
| |
|
|
|
|
|
|
|