|
|
|
 Re: انفلونزا الطيور فى الغنا السودانى (Re: khaleel)
|
العزيز خليل
سؤالك فى محلو انا شخصيا ما شفت نوارس فى الاماكن التى زرتها فى السودان ولكن ياخليل
ربما النوارس تبقى حلما فقط فى غنانا وقد عبر عن ذلك الشاعر ابو ذر الغفارى فى كلمات الاغنية
التى تغنى بها الراحل مصطفى سيد احمد :
فى عيونك
ضجة الشوق والهواجس
ريحة الموج البنحلم فيهو
بجية النوارس
فهى اذن ياعزيزى خليل مجرد حلم وهذا يؤكد منطقية السؤال الذى طرحته ..عن نوارس السودان التى
ينتظر شاعرنا حلم مجيئها مع موج البحر
| |
 
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
عامر العزيز سلامات
اتابع مداخلتك الاستثنائية حول ادمان شعراء الاغنية عندنا للطيور حتى تلك الموجودة في خيالاتهم كالنوارس واسمح لي عامر ان الفت انتباهك الى القصيدة ذات الشحنة العالية من الشاعرية والمتفجرات والتي كتبها هاشم صديق وانا اعني قصيد انفولنزا الصقور
| |
|
|
|
|
|
|
|
|
|
Re: انفلونزا الطيور فى الغنا السودانى (Re: محمد خالد ابونورة)
|
عزيزى محمد خالد ابو نورة
ليتك لو عرضت لنا القليل من ( انفلونزا الصقور )
واذ نعود الى الطيور والبلابل الصداحة نمضى عبر التاريخ الجمالى فى ثنايا اغنية عثمان
الشفيع ابن شندى الجميلة
الزهور والورد
شتلوها جوه قلبى
عشان حبيبى
تذكارو ديمة عندى
ترك ( حمامة ) تنبينى بى هياما
تقول لى اصبر فى العجلة الندامة
***********
ابو نورة ارجوا ان تعود مرة اخرى متابطا بعض الطيور ولو من تلك النوارس التى تعيش فى
اخيلتناو تضج بها ضفاف القارة العجوز
سلام ياصاحبى
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
الجمعة فى شمبات
عنوان عريض لشاعرية تلك الضاحية المليئة بالجمال وسحر الطبيعة والافق الاخضر
وقد تفجرت قريحة شاعرنا الكبير عبيد عبد الرحمن وهو يصف تلك اللحظات الجميلة الاثيرة
وابدعها غناء الفنان المتفرد ابراهيم الكاشف
يقول :
تحت فيحاء الخميلة
كنا و( الاطيار ) تغنى
ترقص ( الاطيار ) تمنى
بيننا اوجه جميلة
كلما ( العصفور ) يغرد
والنسيم يهفو ويبرد
تزدهى الاقمار تورد
واحده صاحية واحده وسنى
واحده فاترة فاتنة حسنه
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
النعام ادم
.. فنان ينظم الكلام ويلحن الجمل ويغرد بصوته المتفرد وقد تغنى كثيرا بالطيور
بمعظم انواعها وصنوفها ويكفى ان اسمه ( النعام ) يحلق بنا فى سماوات الطيور ولا يلجا ابدا
الى دفن راسه فى الرمال مثلما يفعل النعام سيد الاسم
لقد كان هذا الفنان العملاق يمثل نسيجا لوحده ومحطة لايمكنك الا ان تتوقف عندها لتستمع الى
الكلمة المدهشة والنغمة المنعشة .. الطمبور بين يديه يطرب فلا يبقى كما جرت العادة على صدره
فقط وانما يرقص زاحفا حتى الى رقبته وعلى راسه وجنبه .. الم اقل لكم ان النعام متفرد
اليوم وعبر اغنيته الغرام التى هى من كلماته والحانه وغنائه ننتقى مكان الطيور فى الابيات
التالية :
الغرام ياناس الغرام
جننى انا يا سلام
*********************
انتى ظبية وفى بواديك
الطيور شادية تغنى ليك
واى انا المازيانى عينيك
وحارقانى انا ياسلام
*********************
الغرام ياناس الغرام
جننى ياسلام
| |
|
|
|
|
|
|
|
|
|
Re: انفلونزا الطيور فى الغنا السودانى (Re: حسن البشاري)
|
العالم النحرير حسن البشارى
مرورك هنا يزرع فى نفسى فرحة خاصة طبعا يا ابوعلى قاموس الطيور فى الغنا السودانى يحمل
الكثير من التفاصيل الرائعة والمدهشة
طبعا ياالبشارى لدينا شاعر سودانى شاب لا يقف بك عند حد الدهشة وياخذك الى دهاليز الذهول
انه عاطف خيرى الذى قدم لنا تلك القصيدة الرائعة ( شهيق ) والتى ابدعها غناءالراحل مصطفى
سيد احمد فزادها جمالا والقا بنيلها وارضها ونخليها وعتمورها وغاباتها وايضا عصافيرها
عندمايقول
لحظة طار عصفور من صدرك
رتب فينا احساس بالالفة
ودوزن عصب الزمن الاشتر
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
الفنان على اللحو لم يترك الصقور فى حالها وهو يتغنى باغنيته الجميلة ( جبار الكسور )
وفيها :
ميزان الدهب يااب كفة راجحة
(صقر ) الخلا سهام عينيك جارحة
ابواب مسكنك ليلا ونهار فاتحة
القلوب بين ايديك بيقروا ليها الفاتحة
ياجبار الكسور
| |
|
|
|
|
|
|
|
|
|
Re: انفلونزا الطيور فى الغنا السودانى (Re: khaleel)
|
خليل ياعزيز
لم يتطرق احد الى الشيخ سيرو وكانت فى الخاطر
فرع البان انتكى
ميل فى النيل حكى
دوب الليلة دا الشافا وادركا
تغنى ليك ( القمارى )
يالسيل الفى النقعة جارى
ياالتمساح العشارى
بتقلبوا وتجينا جارى
دوب الليلة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
مقطع من مسدار ابو السرة لمحمد طه القدال وعقد الجلاد
الشم خوخت بردن ليالى الحرة
والبراق برق من منه جاب القرة
شوف عينى ( الصقير ) بجناحو كفت الفرة
تلقاها ام خدود الليلة مرقت برة
***
شن القغدة يابو السرة
فى ضل العمارات ام كمرة برة
ضقنا الحنضل اليانكى وبلعنا المرة
كملت كوتة التمباك صقعنا الجرة
وكت اتقفلت شقيش قبل بالمرة
نرمى امرنا فى بلد المعانى الحرة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
اخي عامر
من اروع واجمل البوستات واصل
ولاننسي شاعرنا محمد بشير عتيق في ياحبيبي عرج بي وميل غناء كرومة
اما الطيور عاشقة الزهور في هناء وسرور
من طيبة تستنشق رياح وتغني اغنية الصباح
ياحبيبي سيب الاستحا متع مناظرك سرحا
شاهد الطبيعة ومسرحا وشدو البلابل في الضحا
تخريمة تم تحوير بعض الامثال المعروفة مثال
الحسنة في الملعون زي الانفلونزا في الطيور
ولنا عودة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Mutwali Malik)
|
Mutwali Malik
اشكرك اخى العزيز على مرورك الانيق والعرض الجميل الممتع
اما عن طيور الحقيبة فهناك العديد من فضاءات الطيور والتى سوف نعرض لها تباعا
واتمنى ان تكون حاضرا معنا
وسنعرج الى كلمات طائرية خفيفة الظل فى القمر بوبا للعملاقين اسماعيل حسن ووردى
*****
القديما .. قديم ( الحمام ) ياملايكة تشيلى السلام
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
حبيبنا عامر،
متابعون بشغف الابداع المتجدد (يوماتي) .. وهاك رائعة الراحلة منى الخير، التي صاغها الخالد فينا اسماعيل حسن.
يا قمريــة
عشان هواك حبيت
قمرية فوق الدوح
تغني للعشاق
الحب بدال النوح
وترسل الأشواق
من قلبهاالمجروح
عشان هواك انته
يادنيا من ألحان
صمت الهوى صوتك
صرفتها الأحزان
بقيت حياتي إنتا
سكبتا فيا حنان
من ثغرك البسام
عرفت أفراحي
علمتني ما الحب
يا سعدي يا راحي
ياواهب الآمال
بددت أتراحي
عشان هواك أنتا
شديت يا صاحي
عشان هواك
حبيت زهور وحمام
حملتها الأشواق
من قلبي ليك كلام
وديعة زي طبعك
في الروض تغني دوام
حنينة زي قلبك
يا ملهم الأنغام
عشان هواك أنتا
بقيت دوام بسام
عشان هواك حبيت
قمرية فوق الدوح
تغني للعشاق
الحب بدال النوح
وترسل الأشواق
من قلبهاالمجروح
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Rakoba)
|
المبدع راكوبة
قصيدة جميلة ورائعة الى الحد البعيد لم اتامل فى هذه الكلمات من قبل ويكفى انها للعملاق
اسماعيل حسن
***
اللون الخمرى
الليلة
الخد الزهرى
الليلة
عصفور الجنة الغرد وغنى
انا ليهو بنادى جوة فؤادى
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
عتيق مع عثمان حسين في ذكري
اتذكري يوم كنا مجتمعين سوي في خصيب مرتعنا واتمتعنا بي طهر الهوي
اتذكري بين افاويق الزهور اتذكري بين اغاريد الطيور
نحن اتعادلنا واتبادلنا اقداح السرور
في صفا الانس والحبور بينا كم احتفت بدور
وكوكب السعد راح يدور
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
عتيق - لحن عبدالرحمن الريح - غناء كرومة - رونق الصبح البديع
في رونق الصبح البديع قول ياحمام اسمعني الحان الربيع
قول ياحمام حي الغمام انا لي فبك شوق واهتمام
اسمعني من شدوك صدا هاه الربيع اقبل بدا
وعلي الرياض مرت يدا وشاها بي قطر الندي
في رونق الصبح البديع
صحت الورود في كل روض واتبسم الزهر الوديع
هاهي الطبيعة الكون تحلا بمنظرا للعالمين سفرت باجلا مظاهرا
الروضة تغري لناظرا اطياره عاشقة ازاهرا
هي والنسيم في مناظرا تظهر حقائق وجوهرا
هي نزهة لي كل من يري هي حكمة بل هي اية من صنع البديع
انا ياحمام لي فيك مرام اصبحنا سيان في الغرام
كونك محب وهواك طريف تتعشق الروض الوريف
وانا لي حبيب ناعم ظريف حاذق اديب مترف عفيف
اسالني عن تصويره كيف هو زهره في الجنس اللطيف
بالاختصار هو حسنو صار فوق للجميع
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Mutwali Malik)
|
يردد الناس من قصيدة انا ياطير للمبدع عبيد عبد الرحمن والتى ابدعها غناء العبقرى الكاشف
مقاطع المطلع ولكن هناك مقاطع اخرى جميلة منها
ياريت كنت زيك *** لو يجدى التمنى
حبيبى يكون معاى *** فى الاشجار نقيل
وبالاغصان نميل *** فى خفة جناحك
وحرية صراحك *** فى الافنن نغنى
انا ياطير مقيد *** بقيود اثقلتنى
وانت طليق ولاهى *** وليك فى الروض ملاهى
****
****
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
عذرا
فى واحدة من القصائد الجميلة فى الغنا السودانى المحلق فى فضاءات الطيور اختلط على
الامر فنسبت قصيدة ( فراش القاش ) التى يتغنى بها ( العندليب الاسمر ) زيدان ابراهيم
للشاعر الكبير اسحق الحلنقى وقد صححنى الاخ المحب للكلمات الجميلة والفن ( خليل )
واشار الى ان كلمات فراش القاش لشاعرنا المرهف عبد الوهاب هلاوى فله العتبى وهو من
زملائى القدامى عندما كان يحرر الملف الثقافى فى جريدة الاسبوع فى الثمانينيات برفقة
الشاعر المبدع عبد العظيم اكول وكان هناك ايضا شاعر النوارس لمصطفى سيد احمد حبيبنا
ابو ذر الغفارى واذكر انه فى تلكم الايام ان قرا على عبد الوهاب هلاوى احدى قصائده
الخفيفة رشيقة الكلمة وبساطة الصورة وعمق المعنى وقد سجلتها فى احدى كراساتى ورغم اننى
لم اسمع احد وقد تغنى بها لحنا الا انها مازالت فى خاطرى وقد توسطها ( الطير والعصافير )
ايضا حالها كحال معظم كلمات الاغانى السودانية واذكر منها :
سبتنى صاح
لكين معليش
سبتنى صاح
لكين معليش
لسهه الموية بتنقط
من الماسورة
وفوق السور
بترك عصفورة
ولسه الشفع
فى حلتنا مما تصبح
بلعبوا كورة
وسبتنى صاح
لكين معليش
عذرا شاعرنا الجميل عبد الوهاب هلاوى واتمنى ان تكون الذاكرة قد اسعفتنى هذه المرة ولم
تفعل معى مثلما فعل فراش القاش .. وباكر بعود القاش ترجع عيونوحنان
وتطير تداعب الموج بجناح نسيم رياش
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
اذكري ايام صفانا
النهر لينا اقترب والطيور تسجع طرب
عاملة موسيقة قرب
ونحنا صار مجلسنا عامر تيتاوي
في مرح في نشوة في غبطة وسرور
كنا داخل روضة مافيش حد سوانا
غير ان القمري يهتف بي هوانا
من اغاريد فنه يسمعنا اسطوانة
تعرف ياخي عامر نحن السودانيين في الاشعار نتفوق علي كل العرب ولكن لاادري ماسبب محليتنا هذه ودي كانت تخريمة شوية عن موضوعك
لك ودي
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Mutwali Malik)
|
عزيزى
Mutwali Malik
لك شكرى وتقديرى معك كل الحق فيما ذهبت اليه وفى اعتقادى ان اشكالية المحلية ناتجة فى
الاساس من قصور الظل الاعلامى لمجمل الفنون السودانية ولعل الدليل على ذلك ان منتوجنا
الثقافى والادبى الذى وصل الى الاخرين حظى بمكانته المتميزة وعلى سبيل المثال قصيدة
الشاعر السودانى الهادى ادم ( اغدا القاك ) والتى تغنت بها ام كلثوم سيدة الغناء العربى
وكوكب الشرق فذاع صيتها وصارت من اجمل اغانى ام كلثوم ورغم ذلك فان كلمات الهادى ادم
لم تصل الى ام كلثوم بل هى التى سعت اليها عندما زارت الخرطوم فى العام 1967 ضمن
الحفلات التى اقامتها فى جولة عربية بعد حرب يونيو 67 او ما يعرف بالنكسة وقد عثرت
ام كلثوم على كلمات اغدا القاك فى ديوان شعرى للهادى ادم فاعجبتها الكلمات واختارتها
لتغنيها وقد لاقت الاغنية رواجا كبيرا .. ولو لم تزر ام كلثوم الخرطوم لبقيت القصيدة
الرائعة فى اضابير الكتب نسيا منسيا كمثيلاتها من القصائد السودانية التى تزخر بكم
هائل من الجماليات وعمق الكلمات والثقافة العالية تاريخيا وجغرافيا وانسانيا
الموضوع طويل ياصديقى واشكرك على اثارته فهو على جانب كبير من الاهمية وسنعود اليه
فى مرات قادمة .. ولكن قبل ان نمضى الى خط النهاية نعود على الى عالم الطيور وفضاءاتها
فى الاغنية السودانية وهذه المرة مع شاعرنا الكبير محمد عبد الله الامى فى قصيدته الرائعة
اسمعنى نشيدك :
اسمعنى نشيدك
ورينى كمان فى الفن تجديدك
ياحمام الدوح
اسالنى افيدك
عن حالى البى واحسبنى شهيدك
ولهى مابفيدك
ابقالى رسول او خذنى فى ايدك
اترك تهديك
اسمعنى درر واظب ترديدك
وين القى نديدك
ياجالى الهم زيد شجوى وازيدك
عقب تغريدك
ياساجع الدوح خلينى اريدك
واصل لى بريدك
والبس روحى ياحمام فى وريدك
لاتخشى هجيرك
سافر ياحمام مولاك يجيرك
سارع فى سيرك
لو لى جناح انا كنت وزيرك
رحماك فى صعيدك
اندب حظى وادنو لبعيدك
يوم عيدى وعيدك
يوم الايام لديارى تعيدك
ياحمام الدوح
اسمعنى نشيدك
***
كم من الجمال وروعة الكلمة ودقة الوصف وسلاسة التعبير ... كمية من الجمال والابداع الشاعرى
لكم المودة والتقدير والمحبة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
اخي عامر لك كل الود
كمان ماننسي اخونا الديك في شعرالحقيبة مثال
ياخي اهديك اوعي من ديك هم اعاديك ختام ياروحي اهديك
تحيات حبي وسلامي وجواهر شعري وكلامي
مثال اخر
ومااحلي ديك مناظر فيها البيان تجلي
بين مسفرات اهله ونخبة عرب اجلة
كذلك العندليب في شعر الحقيبة مثال
في الروضة ماء الطل دفق الزهر والورد اتفق
واحد بياض والثاني زي لون الشفق
بين خضرة او انوار صفق العندليب غني وصفق
حرك شعور المستمع خلي المحب يزري الدمع
| |
|
|
|
|
|
|
|
|
|
Re: انفلونزا الطيور فى الغنا السودانى (Re: طارق جبريل)
|
Mutwali Malik
ماتنسى فى الليلة ديك
راكوبة الحبيب
تصدق بقينا نخاف من ديك العدة
طارق جبريل
نحلق هذه المرة مع الفنان النور الجيلانى فى اغنيته ياوداد طبعا طوالى اتذكرت الهلال والوداد
وناخذ منها جزءا يسيرا فى عوالم الطيور :
دبلة شنو البدلتى بيها هواى انا
ياروعة ياخدر المشاعر
ياوداد مليون سنة
حليلى كان كلمات هواك
فى القمرة قلبى مدونة
فى جناح طيور ناوية الرحيل
وعلى النخيل ضامة الجنا
انا دنيا ما بتعرف بلاك
غيرك حياتى ما ممكنة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
اخي عامر لك كل الود
طبعا اخوك من الناس البحبو الحمام خالص وخاصة الشوربة
والحقيبة كذلك لم تترك الحمام في اشعارها
اذكريني ياحمامة كلما ساجع ترنم بي هواي وحب جمالك
اذكريني ياحمامة كل ماهطلت غمامة في مسائي او في صباحك
وفي غدوك او في رواحك
كذلك في السلام ياروحي ماغني الحمام بين غصونه وما نسيم الصبح هب
كل ليل ارعي الكواكب باهتمام في التعلل بين عسي وعل ورب
مثال اخر
الحمامي وناح حمامي عشان ياحبيبي مافقدت زمامي
مافقدت زمامي وجيت جلست امامي
ودمت
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Mutwali Malik)
|
وهاك حاجة قديمة من خليل أفندي فرح
طير الودي
يا طير الوِدي نزَّاح تسابق الشاردة
بتجوب الفضا وتثكل ثكيل الفارده
نياتك سلام ما حارة عينك بارده
ميال للطبيعة والهبيبة البارده
أنيس الرياض ما بتخفى عنك شارده
ويكيِّف غريدك زي دموع الحارده
جفّال من حبايبك وما بتشيقك عارده
والنيل بيك تآنس والصحاري الجارده
قول لي ما وراءك يا عصام بالواحدة
عاطفتك كريمة وبالخبير ما جاحدة
لا زال النخيل في توتي مادي الشاحده
وشمبات لسه ترفل في نعيمة وجاحده
كنانة آمون مشغولة قايدة وشايدة
من ولدانه بي تلك القصور الشايدة
هديك الفلايك وديك (لوتس) و(عاندة)
وداك عاشق مدلل وديك حبيبة معاندة
ناس الأم حنان وإن مني متعوا الرايده
ما حسبو لي أنا وما أظنوا فيَ الفايده
زينتي وشينني عاد إياها فوقن عايده
والأيام ظروف صايدة وتكون ما صايده
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Rakoba)
|
ومع شعراء الحقيبة كمان..
سيد عبد العزيز - غنا القمري
غنى القمرى على الغصون
ذكرنى الدر المصون
فريد عصرو الما متلو شى
قمرنا الليك متربصون
الغصن البزرى الغصون
ملاك محروس داخل الحصون
وشمس الكون تشبه وشى
قاسى سماع لحنو الحنون
عظيم كالمال حلو كالبنون
بى ريقو يداوى الجنون
شعاع محيو العين تختشى
جميل مثله ما أظن يكون
حياء ورقة وعفة وسكون
يا البدر الليه قلبى كون
فى حسن الكون ما خلى شى
جميل خلقة ومتجلى لون
تخافو يذوب من تيه لون
معاطفه دلال يتمايلون
عوم الوز تقليد مشى
هواى فى هواك ذات العيون
الفاترة اللافتة العيون
عين سحرك تسبى العيون
يا الرو الباسم وشى
ليك عالى العالم يهون
يا الرشا اللدن المهون
مناظرك فيك يتنزهون
يا البطران من ما نشى
----
نغمات القمري لعمر البنا
***************
جننى نغمات القمرى وخلنى محتار فى امرى
ذكرنى الحبو ضيع عمرى
الفى شوفتو صحاى وخمرى
الفى وصلو طبى و ثمرى
المن البعدو ولع جمرى
هالكنى وما جايب خبرى
اصبح جسمى زى خصرك مبرى
انا ليه ما احبك يا جميل بالجبرى
ما دام من لونك صفا لون التبرى
افرحنى بنظره يا بدرى
يا ابوبسمه حنينه تشرح صدرى
ليلة لقياك يا نفيس الدر
عندى اعظم من ليلة القدر
ادركنى يا غزال البر
انا فاقد عقلى ومنامى وصبرى
من صغرى بحبك لى نهاية كبرى
شوفتك يا روحى لجروحى بتبرى
محبوبى فى هذا القطر
لا يوجد حسنو وعفافو الفطرى
لو مر نسيمو ليل حامل العطر
يحيى الارواح الاضحت فى خطرى
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
الاخ الرائع صديق حمدتو مازال ينقب عن الجمال ويستدعى الابداع المعبا فى قنانى الغنا السودانى
صديق صديقى المرجعى يطل من جديد عبر مساحات الطيور والعصافير محلقا فى فضاءات النغم الاصيل
فالى مداخلة صديق حمدتو :
Quote: عدنا يا عامر تيتاوي وما أحلى العودة مع حسين بازرعة وعثمان حسين في "أنت لي" والتي أشتهرت باسم "عاهدتني" ونتمنى أن نكون دوما حافظين لعهد هذا البوست "الواحة في عزّ الهجير"
عاهدتني إنك تكون مخلص في بعدي وحلفت يا ناسي تصون عهدك وعهدي
عاهدتني ترسل بدمع الشوق خطابي مع كل نسمة من البلد تطفي عذابي
وحلفت تسأل كل طائر عن مآبي لكن نسيت عهدك ووعدك في غيابي
وتتبدل الأيام يا ناسي وتصطفيني أصفح عن الماضي وأسامحك وطول سنيني
أصلو الهوى دائي ودنياي وديني
وهذا هو عهد حسين بازرعة في أغانيه يحمل على الحبيب في بداية الأغنية ولكنه دائماً ما ينتهي بمسامحة الحبيب والصفح عنه :
كمثال أيضا أغنية "شجن"
تصبح حياتي نغم وعشنا يبتسم وتعود مراكب ريدنا لبر الآمان
"وأغنية قصتنا"
هل تصدق تنتهي قصة يا أجمل حقيقة
نحن عشناها بدموعنا وبالضنى في كل دقيقة
لم تزل قصتنا قصة حب أقوى من الحقيقة
ولعلنا نعود لهذا الموضوع بمزيد من التفصيل متى ما أتاح لنا عامر تيتاوي درباً كهذا لنخوض فيه
ونطرب حد الثمالة مع الجابري أومع عمار السنوسي عندما يشدو أيهما برائعة أبو آمنة حامد "ما نسيناك"
ما نسيناك جاي تعمل أيه معانا بعد ما بدلتنا
ما سقيناك أحلى ما في عمرنا من عواطف وما لقيناك
قلبي غافر ليك ذنوبك سيبو بس تنشف جراحو
والحنين العاش لحبك كيف بتّ تسخر من نواحو
سيبو مرة يغسل أحزانو والأمل يشرق صباحو
وكيف يطير لعشو عصفور منكسر مكسور جناحو
|
| |
|
|
|
|
|
|
|
|
|
Re: انفلونزا الطيور فى الغنا السودانى (Re: khaleel)
|
العزيز خليل
الليل نسيمو عليل والليل كلامو جميل .. وطويل
وسنتواصل مع الليل بعد ان نصطاد اخر طائر فى سماء الاغنية السودانية ***
مع ابوعركى
فى عن حبيبتى بقول لكم
الحمامات الحزينة قامت ادتا من حنانا
وكانت اول مرة فى عمر المدينة تنوم حزينة
تحى محبوبتى الحنينة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
انا ما معيون لسيد عبد العزيز وغناها كرومة
انا ما معيون
ازاى ودواى خدود وعيون
ياناس انا ما معيون
حليف امالى وعيونى عيون
دائى عظيم ودواى مصيون
سامى بعيد عن العيون
وانا عقلى بقاله رقيب وعيون
اغنى عليها وابدى فنون
افوق ( الساجعة ) حنان وجنون
اامل ليها الما مظنون
وسيف هجرانا على مسنون
***
الى ان يقول شاعرنا العظيم فى المقطع الاخير
ليها سلامى بعد ما يصون
عاشق حب قمر محصون
وبعد ما غنى ( الطير ) فى غصون
يبقالا سمير وسرير وحصون
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
غنى الرائع سابق عصره ابراهيم الكاشف من كلمات عبيد عبد الرحمن :
حليل زمن الصبا الماضى
حليل زهر الحياة الزاهر
حليل زمن الحبيب راضى
حليل زمن الهوى طاهر
حليله الابلج الباسم
حليله الكاحل الناير
حليل قمر السما القاسم
لياليه وصبح داير
اه لو اه تفيد مجروح
والمثل اللقديم ساير
رهاب ماحصلوا الجارى
سماك ما بحصلوا ( الطاير
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
قصيدة هواك وهواى للشاعر الامى وغناها اولاد الموردة فيها ايضا فضاء اخر للطيور وسنعرض
بعض الابيات :
هواك وهواى بى جاروا
سبن افكارى نظراتك
احب تعطف تزيل وجدى
احب كل البحب ذاتك
*****
تلك هى استهلالية القصيدة والان نتحول الى مايخص الطيور فى القصيدة فى البيتين الاخيرين
من تلك القصيدة الرائعة والطويلة الجميلة
اسرت فؤادى ياضامر
ودمعى خضاب فى كفاتك
زيد يادمعى فى سيلك
وزيد ياصدرى زفراتك
حبيبك ودعك راحل
زيد ياطرفى عبراتك
( حمام الايك ) حن مرة
تعال اسمعنى نبراتك
طريت ام در مقر املى
زمانى كفاى عباراتك
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
وين يا حبيب!!
ما عارف الأنفلونزا أصابت دي ولاّ لسّة!!
(عاطف خيري/ عقد الجلاد)
قصد الطيور النور
بى إسمو تتسمى
لو شفتو فى الضلمة
طاير نطق كلمة
للطير حزن سرى
للطير حبر سرى
ومحل ما يسرى معراج
ومحضر ضو
ضد كل خفاش طار
سمم عليهو الجو.
سلام لكل طائر مرتحل يلقط الحبّ قربك.
| |
|
|
|
|
|
|
|
|
|
Re: انفلونزا الطيور فى الغنا السودانى (Re: محمد السر)
|
تيتاوي انا قلت اكتب لينا عن الليل لانها انفلونزا الطيور تمت محاصرتها
في عز اليل
ساعة النسمة ترتاح
علي هدب الدغش وتنوم
انا مساهر
انا والليل ومر جفاك مساهرين
نحكي للافلاك مساهرين
لا خلصت حكاوينا ولا لقينا البداوينا
| |
|
|
|
|
|
|
|
|
|
Re: انفلونزا الطيور فى الغنا السودانى (Re: khaleel)
|
العزيز جدا خلو
اشكرك على موال الليل الجميل وسنواصل لكن فى بوست منفرد خلال الايام القادمة
ورغم ذلك اؤكد لك ان انفلونزا الطيور لازالت بقية منها تحلق فى الفضاء واليك
لوكنت تبعد فى زحل
او يوم بقيت قمرة فى سماك
لابد يوم ليك اصل واشرب براى
عسل ( النحل ) واشرب براى منك دواى
جسمى انتحل كيف العمل
حن ياطبيب واكشف على
شوف الدموع ماليات عينى
شكرا صديقى خليل والليل جاييك
العزيز ودحلتنا محمد السر
هذه القصيدة الرائعة للمبدع عاطف خيرى لم تصب ولكنها عانت قليلا من اعراض الانفلونزا التى
طالت شقيقتها ( شهيق ) وكانت على الابواب شكرا ياود السر
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
بعض المشاهد من سيناريو البحث عن اليابسة لعاطف خيرى
ياهدهد هنا مرت
مراكب نوح محملة بالبخور
وقعت من الهدهد بلد
نهبوها واتقسموا الحدود
ومرت مراكب نوح محملة بالطيور
واقف مع نوح الغراب
ينضم وياشر فى اتجاه
باقى الطيور يتوسوسو
الا الحمام اتوضا مارق للصلاة
***
وفى مقطع اخر
الطواويس شارة قمصانا
المزركشة فى الضحى
الزرازير بى عراريقا
الغبشة جات على
***
مقطع اخر
الهدهد تميمة الموت
معلق فى بيوت الناس .. نعش
مين يوصف للنحل ريق الحبيبة
وحبة القمح التقوم فوق محفضة
حبوبة فى الزمن اللئيم
مين يوصف بيتنا لى هدهد يتيم
***
مقطع اخر
الطواويس شارة قمصانا
المزركشة فى الضحى
الزرازير بى عراريقا
الغبشا جات على
| |
|
|
|
|
|
|
|
|
|
Re: انفلونزا الطيور فى الغنا السودانى (Re: khaleel)
|
خليل معاك فى انفلونزا الثعابين
فى اغنية ديمة فى العشاق للفنان الكبير حسن خليفة العطبراوى هناك مقطع يقول
انت ياقلبى ديمة نارك حية
وانت يا قلبى ديمة باقى ضحية
ليه مسهر عينى ليلى والصبحية
جسمى اه يتقلب من لدغة الحية
سنعود الى الطيور ففى احدى الاغنيات التى كان يتغنى بها الراحل رضان زايد فى الحفلات اغنية
يا بلال على سنة سنتين شوية الى ان تاتى انفلونزا الطيور فى المقطع الذى يقول فيه ياريت
ابقى طيرة ويردد طيرة طيرة طيرة طيرة
انفلونزا مؤكدة
| |
|
|
|
|
|
|
|
|
|
Re: انفلونزا الطيور فى الغنا السودانى (Re: طارق جبريل)
|
عزيزى طارق جبريل
ما الهلال بالخمسة برضو ( انفلونزا طيور ) لكن عشان خاطرك ياجميل سنعود الى عالم فضاءات
الطيور فى الغنا السودانى من خلال رائعة الفنان الكبير حسن خليفة العطبراوى والتى تغنى بها
ايضا الراحل مصطفى سيد احمد ( فى الاسى ضاعت سنينى )
ونختار منها اعشاش الطيور فى الابيات التالية :
ايها البلبل
خذ انشودة العشاق عنى
وتعلم كيف تحى للهوى
العذرى منى
بيتها فى القلب مهجور
ولكنى اغنى
نحن يابلبل كاسان
من الحب ملئنا
ونحن شريان جريحان
التقينا فهنئنا
فى مجال الحسن يابلبل
ها نحن التقينا
ما علينا ان ملانا
الكون سحرا ما علينا
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
يتغنى ( العندليب ) الاسمر زيدان ابراهيم باغنيته الجميلة ( وسط الزهور)
وفيها :
وسط الزهور متصور
وجهو الصبوح ومنور
رقة وحنان كاسيهو
زى القمر مدور
الى ان يقول :
هز الكيان بى (هديلو )
وسحر العيون بكحيلو
ثم يقول :
فوق الغصون يا (حمامة )
شوق العيون قداما
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
يغرد البلبل عبد الرحمن عبد الله فى اغنيته الجميلة جدى الريل
جدى الريل ابو قزيمة
تعال نتمشى فى الغيمة
ما غيمة ريد تكب فى رهيد
شواطيهو الخضر ديمة
نصارحك لا نخاف انسان
وننسى الماضى والاحزان
تلاقى ( القمرى ) لابس الطوق
يغنى يفرح الوجدان
يفر جنحيهو زى توبا
يغرد للزهور نشوان
| |
|
|
|
|
|
|
|
|
|
Re: انفلونزا الطيور فى الغنا السودانى (Re: عامر تيتاوى)
|
اخي عامر لك التحية
نرجع للحقيبة مرة اخري ومع كرومة وعتيق في مابنسي ليلة كنا
انابي غرامك ياحبيبي دمعي انفجر انا بي غناك ايقظت سكان الشجر
كذلك في عجبا حبي ساكن قلبي
في الحب فقت ابناء جنسي كيف انا ابقي عندك منسي
يازهرة خيالي وانسي ليك غنت بلابل حسي
في الامي زدت هيامي شلت منامي دمعي الهامي
يتفجر غلبني وقوفه
| |
|
|
|
|
|
|
|
|
|
Re: انفلونزا الطيور فى الغنا السودانى (Re: Mutwali Malik)
|
الاخ العزيز
Mutwali Malik
لك التحية والود
واؤكد لك ان جماليات غناء الحقيبة لا مثيل لها من صور شعرية موغلة فى الجمال وسنفرد مساحات
للحقيبة وفضاءات الطيور فيها ولكننى الان اود التعليق على احدى المساهمات التى تناول فيها
الاعزاء المتداخلون اغنية محمد كرم الله الشهيرة والجميلة ( حتى الطيف رحل خلانى ) وقد ورد
فى سياق كلمات الاغنية حتى (الطير) رحل خلانى ما طيب لى خاطر- بسبب انفلونزا الطيور- والصحيح
حتى الطيف رحل خلانى
ما طيب لى خاطر
لا تقول لى هى كدى استنانى
امشى واجيك باكر
يبقى انا ما الم فيك
تانى مين عارف المصاير
اما الابيات التى تحتفى بالطيور كعادة الاغنيات السودانية فهى تتمثل فى البيت التالى
الليلة شوف بستانى
ده الكان باش وناضر
من حر السموم بيعانى
طيرو يفر يهاجر
وين حتى الطيف رحل
خلانى ما طيب لى خاطر
يعنى برضو الطيور موجودة فى هذا الفضاء الطمبورى الجميل
دام الود بيننا محلقين فى سماوات الطيور مع اجمل الكلمات فى مجال الاغنية السودانية
| |
|
|
|
|
|
|
| |
khaleel
عامر تيتاوى
محمد خالد ابونورة
حسن البشاري
Mutwali Malik
Rakoba
طارق جبريل
فيس بوك
تويتر
انستقرام
يوتيوب
بنتيريست