|
Re: 12/08/2006-12/08/2007 .......... عــامٌ كامـل و أنا خارج السودان (Re: Abubaker Ahmed)
|
Quote: والله يا غباشي انت راجل طيب |
مرحب د. أبوبكر احنا خلينا بس للحاجات الذي دي .... و الله انا عارف لما بديت في البوست ده الناس حتعاين لي و تقول : هي يا دة .... سنة الشوية دي ؟ لكن ما تقول علي سيد جرسة
Quote: ذكرتني و احد صاحبي كنتا بتكلم معاهو اول ما جيت بريطانيا قلتا ليهو الغربه صعبةقال لي اصلها دي اول 15 سنة كدي !!!! فيا اخوي شد حيلك بس |
ده كلامك .... و الله الشعلانية شكلها جرت و الشافني السنة الجاية زي الوقت ده (كان ربنا حيانا) كتبت ليكم بوست بعنوان "عـامان و أنا خارج السودان " بيكون ما كضب تسلم يا دكتور
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
يا سلام يا غباشي ياصديقي كل سنة وانت موفور الجمال والقيم وبالله يا غباشي الفصاحة دي كلها ويادوبك سنة بس ياخ احنا الغربة جرت في الشرايين والاوردة والقاعدة الاساسية بقت غربة وما عداها زيارة الي الوطن وكما الضيوف وكل مرة ترجع راجع ومادي بوذك اربعة امتار ونص وعارف يا غباشي السنة الاولي فعلا هي سنة الحنين والشوق والفرفرة وكل مرة بتقول انا راجع يا ناس ولكن تتمدد الايام وتتغلغل الغربة والايام تجري والشجن يكبر والحزن ... ... طيلة سنيني التي شارفت العقد من الزمان لم يحن قلبي وارغب في الرجوع الي البلد بمثل هذه القوي الا في هذه الايام ولو سمعت انو صحبك كيكي جاري ليهو ترافيرس في حقول ووديان الوطن صدق طوالي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عبدالكريم الامين احمد)
|
Quote: وبالله يا غباشي الفصاحة دي كلها ويادوبك سنة بس ياخ احنا الغربة جرت في الشرايين والاوردة والقاعدة الاساسية بقت غربة |
أهلا بكيكي ... أستاذي العزيز تقول شنو بس يا صاحبي ... فنحن قد فطمنا على البقاء في السودان و لم تتبادر إلينا فكرة الخروج الا لغرض الدراسة لكن يا الحبيب الدنيا دي طلعت أكبر مما توقعت أن تكون .... فالتجربة و التعرف الى كل ما هو جديد هو ما يحفزني لمواصلة البحث عن آخرهـا (لو عندها نهاية ) لذلك أعترف لك يا صديقي بأن داء الغربة قد استشرى وبات على الاستعداد لاستقبل أشقاء جدد لذلك العام الذي مـرَّ إذا ما تسهَّـل الأمر
Quote: وعارف يا غباشي السنة الاولي فعلا هي سنة الحنين والشوق والفرفرة وكل مرة بتقول انا راجع يا ناس ولكن تتمدد الايام وتتغلغل الغربة والايام تجري والشجن يكبر والحزن ... |
الفرفرة دي يا كيكي اسألني منها تب .. و ستجدني من المجيبين بإذن الله و ان كنت قد تكتمت عليها و لم أشعر بها أحداً عارف ياكيكي دايما البداية صعبة و العجب في اللحظات القاسية و المرة و انت سيد العارفين .... الجقلبة بتكون كتيرة خلاص لكن العصرة دايماً بتنجض الزول و كان ما كسرتو ... بتقويهو
Quote: طيلة سنيني التي شارفت العقد من الزمان لم يحن قلبي وارغب في الرجوع الي البلد بمثل هذه القوي الا في هذه الايام ولو سمعت انو صحبك كيكي جاري ليهو ترافيرس في حقول ووديان الوطن صدق طوالي |
و الله الرجعة لابد منها و إن طال السفر بس ناخد فرصتنا كويس و نعرف ولو جزء بسيط كيف الدنيا ماشة و الناس عايشة حينها ستجدني يا صديقي جارِّي ترافيرس من الطرف التاني لنفس الوادي عشان نقفل في نقطة واحدة ياحبيب و ان شاء الله خطأ القفل حيكون 0.000001 متر كيكي دائماً أسعد بك و بالتحدث اليك فكن قريباً
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Abubaker Ahmed)
|
Quote: ديل بالذات المفروض ما يتكلمو خاااالص عن التعليم بره البلد ! |
عفواً .. بس كلامك من أي ناحية ؟؟
على حسب فهمي لكلامك "ان كثير من الهنود يتغربون طلباً للعلم خارج بلادهم "..
ربما ذلك بسبب كثافة السكان.. ففي كل 6 أشخاص في العالم يوجد بينهم واحد هندي فلا غرابة أن يكون مثلاً في أي جامعة أميريكية أو بريطانية على الأقل 10 أو 20هندي .. و هؤلاء بطبيعة الحال ممن يتكفلون بتحمل تكاليف الدراسة و المعيشة.. أما الإنسان الهندي البسيط فهو يعتقد أن الهند هي أفقر بلاد الله على وجه الأرض و يستغرب من وفود الأجانب إليها لطلب العلم.. فهم يعتقدون أن بلادنا مثل أوروبا أو مثل الخليج على أقل تقدير .. أما لو كانو عارفين بلدنا على حقيقتها ما عارف كانو حيعاملونا كيف ؟؟
عارف لما كانوا يسألونا عن قيمة عملتنا كنا بقطع أي رقم من راسنا المهم يكون أكبر من الروبية الهندية !!
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Alsa7afa_30)
|
Quote: عارف لما كانوا يسألونا عن قيمة عملتنا كنا بقطع أي رقم من راسنا المهم يكون أكبر من الروبية الهندية !! |
دي زكرتني يا حسام لما كنت في مصر سنة 2002 كنا بنساهر بالمصريين لما يسالونا عن الجنيه السوداني ... أخوك طوالي كان بيقول ليهم انو الشافع البيقرا في الإبتدائي الإبتدائي بياخد يوميا مصروف 1000 جنيه صاحبك طوالي كان بيخت يدينو في راسو من الإستغراب
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Alsa7afa_30)
|
Quote: سلام يا باش مهندس ..
من أول سنة بديت الجرسة ؟؟ طيب لو كان تعليمك الجامعي و الفوق الجامعي في الغربة كنت حتعمل شنو؟؟ |
أ.د حسام أو الصحافة 30 كما يحلو لك و لاهل الصحافة أن ينادوك بها و الله يا حسام الجرسة كانت حاصلة طوال الأربعة شهور الأولى و بما انو المدة المقررة قصيرة نسبيا و أضف إلى ذلك انها جات على كـِبَــر نوعا ما يعني الواحد طلع و هو عندو خبرة في الحياة , بس النقلة كانت كبيرة خالص و الناس مختلفين توتالي لكن طيبين و في حالهم , كان في كبكة و ملاوزات في الأول , لكن الغرض الأساسي الطلعنا عشانو دائما نصب عينيَّ و هذا ما سهل في إمتصاص تلك الجرسة التي ذكرت أما بخصوص تجربة التعليم الجامعي فقد عايشتها من خلال أخي الأكبر و خالي الذان درسا مثلك بالهند ولكن من سنين خلت ... كم حمدت الله بأن وفقني للدراسة الجامعية بالسودان ...
Quote: الله يصلح حال التعليم في بلدنا و ما نتطر نمشي نفتش هنا و هناك.. |
هذا ما أتمناه يا صديقي ,و إلى ان يتم ذلك نحن في حاجة الى هولاء الناس الرائعين , اسأل نفسي كثيرا لماذا لا يستفيد أهل التعليم من هؤلاء الناس فلديهم أفكار مطورة و لهم من الخبرة العلمية ما يجعلنا نستفيد و نحن في بلداننا وهذا يكفينا عناء السفر و (الجرسة المزعومة بتاعت أخوك ) ... قد تكون أمنياتي و أمنياتك وردية و لكنا لا نملك سواها Quote: عارف الهنود كانو بدخلوني في حتات ضيقة بسؤالهم Why did you come to study here?? Why don't you study in your country |
هنا طوالي الإجابة المباشرة و بدون تردد Because I like movies of Amitabh Bachchan I am sure it is a satisfactory answer for the Indians. Isn't it? أسعدني مرورك يا راقي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
انت مصـر ؟؟ يازول أنا لا دكتور ولا حاجة .. ما تلصق فينا تهم ساكت لكن النية في .. شوف لينا طريقة في karolinska Institute
Quote: Because I like movies of Amitabh Bachchan |
عارف ما كان قدامنا إلا نشكر في بلدهم و التعليم عندهم متطور و كده ... بس فعلاً دي حقيقة عرفناها فيما بعد .. ياخي أي ولاية عندها مقومات دولة قائمة بذاتها ... مثلاً أي ولاية فيها مطار دولي (بعض الولايات فيها أكثر من مطار دولي) ,,, تقدر تسافر لأوروبا أو أميريكا مباشرة من أي ولاية .... بس مشكلتهم انهم كتااااااار ..
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: fadlabi)
|
Quote: يا غباشي يا فردة طلعت برلوووووم
يا ود بطل جرسة الموضوع ده ما بدا لسع |
فاضلابي الرائع وفي رواية أخرى أبو النسب مشتاقين و الله ... يا أخوي هي كلها قدر كيف عشان نتجرس ليها .... لكن بيني و بينك قلت أتزكر ارشيف جرسة الربع الأول للسنة الأولى عشان تزبط مع المنبر ده تسلم يا أبو مدينة و تحياتي لمدينة و المدن المجاورة
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Ashraf el-Halabi)
|
Quote: قال لي "لا لا لا لا ... برد كيرونا داك (طعمو برا) |
أبو الشوش يا لذيذ طبعا كيرونا دي أول حتة بتتلج وآخر حتة التلج فيها بيسيح ...... الناس بتمشي تتزحلق على الجليد بتاعها ... لكن أخوك طبعا إتزحلق في قلب استوكهولم و كفي نفسه شر الزيادة في المصاريف و عناء السفر بس اليوم داك ربك ستر على الـ laptop لأني كنت شايلو معاي في الشنطة أما كمان في الصيف الشمس ما بتغيب إلا لمدة ساعة أو أقل , و في الـ mid-summer الشمس بتكون قاعدة اليوم كلو يا مــان زيها و زي آيسلانده و بالجد كلو إلا حكاية الشمس الما بتغيب دي لأنو اخوك كان متعباهو شديد ساعتين الغروب بتاعت استوكهولم دي .... أنا بعد مرات بقول انو الشتاء أرحم مودتي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عامر تيتاوى)
|
Quote: غباشى الحنين اوعى تبقى زى خالك والسنوات تشتغل فيك مسح ضوئى مجرد الاحساس بمرور الزمن يعنى القلب لسه مامات ربنا يوفقك وتحقق اهدافك |
خالي الجميل عامر تيتاوي أخشى أن أكون قد بدأت السير في نفس الخطى التي قد حـذَّرتني منها فبالرغم من كل هذا الحنين أشعر بأن لي الرغبة في المكوث من أجل تلك الأهداف التي تمنيتها لي فأنا و كما أسلفتُ أودُّ استنفذ كل فرصي في حدود المتاح و المتناول ليس أكثر مع الإحتفاظ بحيوية القلب و قوة نبضه وتفادي الماسح الضوئي* حينئذٍ ستجدني مع صديقي كيكي في حلقة ترافيرس واحدة (واقعين تسطير في الوديان ) سلمت من كل شر فقد زدت المكان عبقاً بمرورك
ــــــــــــــــــــــــــ * بذكر الماسح الضوئي ضحكت و استرجعت تلك اللحظات الجميلة التي كنت أقضيها معك عند كل عودة لك الى السودان و التي عادةً ما يصاحبها اطلاق لعدة أسماء و مصطلحات و تشبيهات من باب الدعابة و المزاح . و ما إسم غباشي هذا إلا و احد من تلكم الدعابات و يحوز على امتيازه الخال العزيز علاء الدين لا تقلق فحتما سنعود مرة أخرى فالمزيد من الدعابات و المسميات تنتظرنا ... أتمنى أن تكون العودة سريعة .. رداً على تساؤلات سامي المغربي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: يسرى معتصم)
|
Quote: ليك 360 يوم من البلد |
حبيبنا أبو الياء 365 يوم يوم ينطح يوم إنت عارف الخمسة يوم النقصتهم ديل كانوا أصعب أيام لمذيد من الدقة 365 يوم 8760 ساعـة 525600 دقيقة 31536000 ثانية الأرقام أعلاه صالحة حتي يوم 12/08/2007 الساعة الخامسة مساءاً بتوقيت السودان الليلة أخوك بقى في سنة تانية و الله يستر بس السلم التعليمي ما يتغير و تبقى في زيادات تسلم يا عزيزي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: omar altom)
|
Quote: انت من النوع القطع التزكرة ماشي وجاي؟؟؟ احتفظ بالنصف الآخر لارشيفك الخاص. |
عـمـر التوم .. إزيك يا ود حلتنا كلامك صاح , فعلا قطعت التذكرة ماشي و جاي , تذكرة المشية طبعا قضت نحبها و ظلت تذكرة العودة منتظرة , وقبل أن يحول عليها الحول قمت بإرجاعها جواً الى السودان لإجراء بعض المعالجات و من ثم تمديد صلاحيتها لفترة أطول. الغريب في الأمر انها لم تكن فكرتي و لكن الوالد سَلَّمه الله أصر على بأن تكون التذكرة ذهاب و عودة. يبدو أنه كان يظن بانني سأولى ألأدبار عائدا إلى السودان Quote: لك كل التوفيق وبعد جرستك دي ما ح نرضي باقل من PHD . وانت اهل لها. |
تشكر يا بو عمير بس لو لقيتوني قاعد أبكي ليكم هنا إتذكروا البوست ده كويس مودتي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: nabielo)
|
يا سلاااام مدحت فريقنتود عديييييل مسكاقمي ياااخيQuote: وحقول ليك بعد كم سنة اذا امد الله فى اعمارنا كم كاس عالم وانت بر السودان يا غباشى واعرف مدى عشقك لكرة القدم |
ربنا يحينا يا حبيب , بس انت صعبتها شديد بي كم كاس عالم دي إحنا عندنا الخمسة سنين بتساوي نصف قرن حسب مقياس غباشي , طالما بقت فيها كاسات عالم كمان شكلنا حنشوف لينا حاجة تشبه الجنيه الجديد عشان الأصفار و كدة يوم 19 قرَّب يا حبيب و دايرين نتسدا في الحلب ما زي المرة الفاتت يستنكحونا بأقوان أونطة ساكت الأيام دي وين أنت ؟ رسل لي رقم تلفونك في المسنجر تحياتي لك و للدكتور نبيل
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
الأحد 13/08/2006 الساعة التاسعة و الربع بتوقيت إستوكهولم حطت بي الطائرة في final destination بعد رحلة شاقة إستمرت ما يقارب الـ 14 ساعة تخللتها ساعتان من التوقف جئت إلى بلاد غريبة لا أعرف فيها أحداً .... و لأني لا أعرف فيها أحداً فقد أكملت يومي بالمطار و ذلك لعلمي بأن اليوم عطلة نهاية الإسبوع و فيه لن أستطيع مقابلة مسئول السكن لإستلام مفاتيح غرفتي التي سأقيم فيها كانت لحظات عجيبة .. لا أعرف إن كنت فرحا أو قلقا ًفي ذلك الوقت فقد اصبح الأمر واقعاً و لا مناص منه و هأنذا و قد تحقق لي ما أنشده منذ سنوات . أيقنت بأنني أمام تحدٍ من نوع آخر ولكن هذه المرة من أجل البقاء فأبواب الدنيا أشرعت لي و جاءت الفرصة بعد مخاض عسير و لكنه صحي
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
الاخ الـحـبيـب الـحـبوب، غـباشـي،
الـتـحـية والسـلام والتهـنئـة لك بـخـروجـك قبل عـام مـن " بيـت الأشـباح" الكـبيـر ، متمنـآ لك النجـاح والتوفيـق في دراسـتك العليا ،
وماترجـع للسـودان بعـد حـصـولك علي الشـهادة العـليا لانـهـم في الخـرطوم حـيقـولو ليـك "الـولاء قبـل الكـفاءة!!!".
طبعآ نتـمني من اللـه تعالي انو الـجـماعة ديل اللـه " يـخـفس " بيـهم سابع ارض ونرجـع كلنا نبني سـودانا بالكفاءات والخـبرات.
مـلحـوظة، انت "مـتـجـرس" علي سـنة واحـدة غياب من السـودان، امال انا اقول شـنو ولي 21 سـنة
غياب بالكامل من الـسودان الحـضاري!!!!
لك مـودتـي.
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: بكري الصايغ)
|
أستاذنا بكري الصايغ البوست نوَّر بمرورك و ألف شكر Quote: وماترجـع للسـودان بعـد حـصـولك علي الشـهادة العـليا لانـهـم في الخـرطوم حـيقـولو ليـك "الـولاء قبـل الكـفاءة!!!". |
أتمنى ان تنتهى هذه الظاهرة التي باتت سائدة و أضرت كثيرا بقطاع العمل العام و الخاص. شخصيا مررت بنفس التجربة على مستوى القطاع الخاص و نلنا ما نلنا من التهميش في ظل وجود من لا يفقهون شيئا من المرضى النفسيين .... تلك مرحلة قد تم تجاوزها و أملي كبير فيما سيأتي . نأمل أن ينصلح الحال في بلادنا و نسعد معا في وطن يسع الجميع لكن الأمـل في أن أعود بعد الإنتهاء من الدراسة و ليس لدي مطلب سوى أن آخذ الفرصة الكاملة, حينها ستجدني انا و كيكي و كل المغردين خارج السرب في في مختلف المجالات حاملين السودان على أعناقناQuote: مـلحـوظة، انت "مـتـجـرس" علي سـنة واحـدة غياب من السـودان، امال انا اقول شـنو ولي 21 سـنة |
أخجلتم تواضعنا و أنا أخشى أن أصل لربع الرقم الذي ذكرته ... أن شاء الله سنلتقي قريبا تسلم أستاذ بكري
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عبدالرحمن عزّاز)
|
يا أعـــز الناس
Quote: فى القولد إلتقيت بالصديق .... أنعم به من فاضل صديق |
عليه رحمة الله Quote: أبكى فى أول يوم من كل عيد / الفطر ، الضحية ، و صدق أن العشرة سنوات الأولى ياحبيب هى الأصعب و لكنك ستتعود حتماً .... وفقك الله و أضاء طريقك ... |
تخيل يا أبو عابدة لقيت نفسي مع ناس فطاحلة في الغربة ناس أبو عشرة و عشرين و تلاتين .... لكن الله غالب وبمناسبة الأعياد , أول عيد فطر كان بعد شهرين بس مما وصلت البلد دي و كان عندي إمتحان في أول يوم !!! شفت المحن دي كانت كيف؟ الوقت لا عرفت أبكي و لا أقـرا و حكاية العشرة سنين دي بقت واردة بعد الأرقام الشفتها هنا تسلم و ان شاء الله دايمـاً تكون مرتاح مساء و صباح ( ولك حق الإمتياز في استخدام هذه العبارة )
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
أمضيت أربعاً و عشرين ساعة بمطار (Arlanda) باستوكهولم مترقبا يوم الإثنين ليعلن انقضاء العطلة و مزاولة العمل في استوكهولم مثلها مثل باقي الدول الغربية وذلك ليتسني لي الذهاب لمكتب السكن من أجل استلام مفتاح غرفتي التى كم كنت أتوق الوصول اليها لأريح جسدي المتعب منذ يومان. كان كل شئ كما كان موصوفا لي في رسالة الـ (coordinator) التي أمدني فيها برابط يحوي الوصف الكامل للوصول لمباني الجامعة ومن ثم مكتب السكن. ركبت البص من المطار متوجها للمحطة الرئيسية لأستغل الـ (underground) إلى ( Tekniska högskolan) المحطة التي تحمل نفس اسم الجامعة .
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
غباشي كل عام وانت بخير وزي ما قالوا لك الجماعه اصعب عام هو الاول وكيكي وصفه بكلام جيمل
Quote: وعارف يا غباشي السنة الاولي فعلا هي سنة الحنين والشوق والفرفرة وكل مرة بتقول انا راجع يا ناس ولكن تتمدد الايام وتتغلغل الغربة والايام تجري والشجن يكبر والحزن ...
|
لكن ستتعود وللاسف حتى لا تطيق العيش في السودان..تشتاقه وما تقدر عليه,ربك يهون.
اما كلام زي ده من كيكي فهي اعراض معروفه امسها ما بعد الاجازه...
Quote: طيلة سنيني التي شارفت العقد من الزمان لم يحن قلبي وارغب في الرجوع الي البلد بمثل هذه القوي الا في هذه الايام ولو سمعت انو صحبك كيكي جاري ليهو ترافيرس في حقول ووديان الوطن صدق طوالي |
هضربه بتعدي يا كيكي بعد شهر كمان.
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Tragie Mustafa)
|
مرحب بأم حازم و الله البداية كانت صعبة لكن الواحد قطعها في مصارينو باعتبار الهدف الأسمى و الغرض الأساسي
Quote: لكن ستتعود وللاسف حتى لا تطيق العيش في السودان..تشتاقه وما تقدر عليه,ربك يهون. |
هذا ما أخشاه يا تراجي , فالناس هنا منظمين و الحياة سهلة من حيث الإحتياجات و لطالما حلم مثلي من أبناء شعبي بحياة كريمة و سهلة بعيداً عن (التلتلة) التي نتعَّرض لها في أبسط الأشياء, ناهيك أكبرها. ولكنه السودان وطني بحلوه و مره. سعيد بمرورك تراجي و صادق تمنياتي لك و أبنائك
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
Quote: Re: 12/08/2006-12/08/2007 .......... عــامٌ كامـل و أنا خارج السودان |
بس!!! ... و الله يا ولدنــا إنت جرسة ... ياااخ البشوف فصاحتك في المنبر .. يفتكر إنت مغترب من زمن المرتزقة دخلوا الخرطــوم ... و زي ما قال ليك كيكي أوزون ... و قرض علي كــدة ...
يا حبيبنا ربنا يوفقك في حياتك العلمية و العملية و يرجعك سالماً لأهلك إذا بتريد (على قول جورج القرداحي) ....
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
Quote: مـنـو ؟؟ هيثم الــقــــوز؟؟؟؟ ياااخ الحفل نوَّر ,, أقصد البوست نوَّر و الله يا حبيب انت شكلك عاينت لديناصورات الغربة أبان عشرينات و تلاتينات ديل, عشان كدة بتتريق على ( الوحيدو ) بتاعي ده , مش كدة؟؟ بعدين يا حبيبو اذا كان ( سمـعة المعلم )ما استحمل الغربة و جااكم راجع عدييييل , أنا ما لي حق أتجرس؟ |
و الله يا ولدنا أستوكهولم منورة بوجودك ... و أنت أهل لذلك .. و تحياتي للشباب ديل لو بتعرفهم صفي الدين و حسن عطية و جدو مهدي و خالد العرضي و الفاتح شلف عضو معانا في المنبر و هو(أبومهند) و تحياتي لسوباجو و خالد الطيب ... يا حبيبو جانا راجع وين المعلم سمعة ... أنا زاااطوو زيك كدة مغتربين من سنة تسعين دراسة و عمل .. ما تقوم تطلعني زي الديناصورات ديل ... و بعد شوية حا أنزل لي بوست و حا تشوف بقاسي الغربة كيف .. بس تعال بهناك...
Quote: إستفسار : سامي المغربي ده كيف معاك؟ |
سمسم دة حبيبنا ياااخ ... و قريبات دي كان معانا بجاي ... لكن ماقابلتو ... و عشان كدة أحبك و أحب سامي و أحب محمد بابكر كمان .... أها رأيك شنو....
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Haytham Abdulaziz)
|
Quote: أنا زاااطوو زيك كدة مغتربين من سنة تسعين دراسة و عمل .. ما تقوم تطلعني زي الديناصورات ديل .. |
يا معلييييييييييييييم ! انت طلعت ديناصور ليهو ضل من الفئة النادرة و ترتيبك في القائمة بعد بكري الصائغ و قبل حيدر حسن ... و التصنيف ده ما نهائي لأنو الزعيم حيدر قاسم شكلو خارط واحد فيكم , و يتربع على رأس القائمة العميد عمر عبد السلام
Quote: و عشان كدة أحبك و أحب سامي و أحب محمد بابكر كمان .... أها رأيك شنو.... |
الراي خلص و الفهم كِمِل يا ود القوز و مرحبا بك ديناصوراً مُـحِباً للبرالمة و إن شاء الله نزورك قريب في بوستك المرتقب و إعتبر تحياتك وصلت لحبايبنا الفي السويد إنت تأمر أمر. تسلم يا حبيبو
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
Quote: يا معلييييييييييييييم ! انت طلعت ديناصور ليهو ضل من الفئة النادرة و ترتيبك في القائمة بعد بكري الصائغ و قبل حيدر حسن ... و التصنيف ده ما نهائي لأنو الزعيم حيدر قاسم شكلو خارط واحد فيكم , و يتربع على رأس القائمة العميد عمر عبد السلام |
ياااخ حرااام عليك ياااخ .... انا ود صغير بالنسبة لي مغتربين سنة سبعين ديل .. أها ديل زمان كانو بغنوا ليهم كدة ***مغص يا مغص يا العزابة بس *** تموتو مغص يا العزابة *** ***نحنا ما دايرين يا العزابة *** إلا مغتربين يا العزابة ***
***من سنة سبعين***
و الأمثلة كثيرة هنا زي هشام يازول ... و بشاشا و حيدر قاسم و حيدر حسن ... و تحت تحت كدة كمان تمبس و نوبي
فتك بعافية...
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
خرجت من رصيف الـ underground أجرجر حقيبتي ألممتلئة عن آخرها, أول ما لفت نظري قبل مغادرة الرصيف هو السلالم المتحركة الطويلة جداً ! لم أرى مثها من قبل . خرجت إلى سطح الأرض فإذا بي أري نفس المنظر الذي كنت أراه دوما من خلال موقع الجامعة على الإنترنيت, ياله من منظر !! لا أصدق نفسي , أنا الان أمام المبني الرئيسي الذي يحمل شعار الـ KTH. سعادتي لا توصف , ما هذا ؟ هل أحلم ؟ أم أنه الواقع ؟ ما أجملها من لحظات أنستني عناء السفر و جعلتني أسرح قليلاً و أنا اسال نفسي : ثم ماذا بعد هذا ؟ فكل العقبات التي تخطيتها ليست الا مقدمات لعقبات و صعاب أخرى قادمة في الطريق و يجب علىّ ان أحتاط لها منذ الآن, سألت الله ان يوفقني ثم توجهت بعدها إلى مكتب السكن الذي كنت أراه من مكاني
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
الأخ الــحـبيب الـحـبوب، غـباشـي، تـحـية طـيبـة، مـتابع معاك كتاباتك وردود الاخـوات والأخـوة، وبـصـراحـة متابع البوسـت لانو فيـه جـزء من ذكريات عـشـتها زيك تـمام.
في عام 1966 " التاريـخ صـحـيـح " خـرجـت من السـودان للدراسـة بالاتـحاد السـوفيتي ووصـلت مـوسـكو في اغسـطـس " يعـني زي الشـهر قبل 41 عامآ" وكنا مـجـموعة طـلاب غادرنا في نفس اليوم وعـلي نفس الطيارة ". بالطبع قابلونا اهـلنا الروس واسـتقبلونا وكمان شـالوا لينا الشـنـط!! " مـش زيك تقول وتكتب جـريت شـنطتي وطلعت السلم المتحـرك!!"، وصـلنا للداخلية لقينا الطـلاب السـودانيين القـدامي كانوا مـجـهزين لينا الغـداء وكان من بيـن الـحـضور الاخ فاروق كـدودة " وماصـدق كـدودة ولقي ليـه واحـد رطاني من حـلفا حـتي اعـترته فـرحـه شـديـدة وهاك ياونسـة يالرطانة للصـباح". كان عـدد السودانيين وقتها بالاتحاد السوفيتي " 1966 " حـوالي 400 طالب موزعييـن علي مـدن شـتي وبـحـسب التخـصصـات. الـمهم ماشـعرت اصـلآ بالغربة ولابالـحـنيـن للبلـد " ماهـم ناس البلـد كلهم كانوا هـنا". قـعـدت خـمسة سـنوات قـعـدة واحـدة مازرت فيها السـودان. ولكن في ايام اجازات الصـيف كنا بنسافر زيارات للسـودانيين في باقي دول المعسكر الأشـتراكي علي حـساب منظمات "الشـبيبة العالمية " "واتـحـاد الشباب العالمـي". طوال مـدة دراسـتي زرت كل البلاد الأشـتراكية في اوروبا وتعـرفنا علي عادات وتقالـيـد اهلهـا. الـدراسة في الاتحاد السـوفيتي كانت مكثفة وكثيرة و13 ساعة يوميآ بجانب الواجبات المنزلية وهـي امـور تنسـيك هـموم الأغتـراب والـحـنيـن. رجـعت للسـودان عام 1971 "عام الانقلاب العسـكري يوليو 1971 " ولقيـت الذل والهـوان بسـبب قـدومي من روسـيا والدراسـة بـها. فـي عام 1985 اوفـدتـني الـحـكومة لالـمانيا الشـرقية للحـصـول علي الـدكـتوراة، وماان خـلصـت الـدراسـة وحـصـلت علي الدكتوراة حـتي وقع الانـقلاب العسـكري في عام 1989 "وباقي الفيـلم معـروف احـالة للصالح العام وقبل وصـولي للسـودان، ولاننـي لسـت من اهـل الولاء قبل كل شـئ !!!. وبقيـت في المانيا ومنـذ عام 1989 وحـتي اليوم، واللـه يـجـازي الكان السـبب".
واصـل، انا متابع معاك ,,,,, ذكـرياتـي!
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: بكري الصايغ)
|
Quote: وبـصـراحـة متابع البوسـت لانو فيـه جـزء من ذكريات عـشـتها زيك تـمام |
مـرحب دكتور بكري ما أروع قلمك , حقيقة أمتعتني بسردك الجميل, وبكل المقايييس أجدني بعيدا بسنوات ضوئية عن المقارنة بك يكفيك أنك نعمت برفقاء في السفر و وجدت من يستقبلك عند وصولك فهذا شعور بالطمأنينة كل أملى أن نلتقي سويا في أرض الوطن ... أو قبل ذلك
Quote: واصـل، انا متابع معاك ,,,,, ذكـرياتـي |
و أنا سعيد بذلك , دمت بألف خير د.بكري
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
دخلت مكتب السكن و استقبلتني موظفة السكن بإبتسامة مشرقة كالعادة فهذه الإبتسامة إعتدتُ عليها منذ ان ركبت الطائرة فكل المضيفات و المضيفين يستقبلونك بتلك الإبتسامة!. بدأت تسلمني بعض المستندات المتعلقة بالغرفة و بعض الإرشادات و .. و .. بعد ذلك تسلمت المفتاح وودعتها متجها إلى غرفتي. كانت معاناة أخرى و هي الوصول لغرفتي فقد, لم يكن وصف الموظفة دقيقا كما أن السكن لكم بائنا من الناحية التي أتيت بها حسب الوصف الذي أذكر انها قد اعطتني ثلاث مقترحات للوصول لمبني السكن. عانيت جدا و أنا أجرجر تلك الحقيبة المثقلة بمؤونة ايام الغربة الأولي , بت أدور حول مبنى السكن و أنا لا استطيع رؤيته حتى قابلت أحد الطلبة السويديين فسألته عسى أن يدلني أو أجد منه ما يسهل على البحث. أدهشني عندما اريته بعض الأوراق التي تسلمتها من المكتب فقام بالإتصال بهم و تحدث معهم لمدة و بعد ذلك أشار إلي بأن نتجه نحو مبنى كبير و جميل مشترك بين جامعة استوكهولم و جامعتي حيث يشمل كليات Physics, Astronomy and Biotechnology و أخبرني بأن مبني السكن بجوار ذلك المبنى وفي لفتة رائعة قام بمساعدتي في حمل الحقيبة من الناحية الأخرى فتقاسمنا حملها لمسافة ليست بالقصيرة, أثناء ذلك صرنا تعرفناو تحدثنا كثيرا حتى وصلنا كنت مندهشا فيه لدرجة انني صرت عاجزا أن أشكره أما هو فقد كان الأمر بالنسبة له عاديا وفيما بعد تأكد لدي ذلك فالسويديون طيبون الى أبعد الحدود وان كانوا لا يتحدثون كثيرا ولكنهم لا يتوانوا في مساعدة الآخرين متى ما طلب منهم ذلك , ودعته على امل ان التقيه مرة أخرى بعد ذلك وجدت نفسي أمام مبنى السكن الذي لم يكن كما توقعته. كان المبني على شاكلة المباني المؤقتة Carvans بعد ذلك اطلقنا عليه The Container لم يكن فاخرا و لكنه كان مثاليا لأبعد الحدود من الناحية النفسية حيث أنه كان قريبا جدا من الجامعة كما أنه مخصص فقط للطلاب الجدد و هذا ما يجعله مثاليا, ففي اوقات الإمتحانات يكون الجميع مشغولاً بالإستذكار و الإجتهاد. يتكون المبني من طابقين يحوي كل منهما تقريبا40 طالباً ففي طابقنا كانت هناك عدة جنسيات كان اللصينيين الغلبة حيث ان عددهم كان كبيرا, ايضا طلاب من بولندا , تايلاند, أرمينيا, باكستان , ملدوفا, أريتريا.
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عادل جبارة)
|
اخي الاصغر غباشي هكذاهي سنين الغربة تبدا باول ثلاثة شهور وفيها تكون الاشياء دائما مبعثرة تصاب بمتلازمة تتمني لو ترجع سريعا او تصرخ ياابوزيد ليتك ماغزيت فبعد انتهاء مدة العدة لطلاقك من العاصفة المثلثة سيهدا روعك وتتعود علي تلك الديار الجديدة فاما عودا حميدا مستـطاب واما لا عودة او عودات متقطعة وحتما ستزداد مداها بين كل زيارة واخري معتمدة علي التراجيديا التي تصاحب زيارتك.
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Dr.Saeed Zakarya Saeed)
|
غباشى سلام وكل سنة وأنت طيب
السنة دى حمت فيها أوربا أكتر مننا .. وفطيتنا يعنى لسة بتتفسح
ده لسة إسمو الشوق للوطن
الغربة تبدأ بعد خمسة سنين زى ما قال ليك علاء الدين الخمسة الأولى إسمها (سرقتو السكينة) الخمسة التانية الغربة
زيادة من كدة تكون زول ساكت . ودى مرحلة فقد الهوية
كان قعدت محل قاعد أو حتى كان رجعت البلد ما بتسمع بالقولوا السودان بقى حر ولا بقى وسخان أو بقى ما بنطاق أو حتى كان قالوا بقى سمح
بتكلموا عليه زى بلد تانية
ولما يرجعوا محل ما كانوا يرجعوا أجانب حتى كان عندهم جوازات البلد زول والسلام
فكيتا فيك .. معليش أنا من الحالة التالتة
وعليكم السلام
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: رأفت ميلاد)
|
Quote: الغربة تبدأ بعد خمسة سنين |
العزيز رأفت ميلاد أو زي ما بيقولوا أهلنا الدناقلة .. أصعب سنين الغربة هم الـــ 15 سنة الأولى و الله يا رأفت على إيدك الشغلانية دي بدت تطلع خارج نطاق السيطرة !!!!! و الواحد بقى خايف يغمض عين و يفتحها يلقى نفسو قعد ليهو كم طاااشر سنة خصوصاً و الزمن بيمشي سرعة كان في البلد القاعدين فيها دي و للا في واحدة تانية من أخواتها ... و بعد داك نبقى في مرحلة فقدان الهوية ... (بالله هي شكلها كيف؟)
Quote: السنة دى حمت فيها أوربا أكتر مننا .. وفطيتنا |
أبداً و الله لكن زي ما انت عارف ( شوقي بدري ) بيسافر بالزول عبر الأثير و الأزمان فتارة يلف بيك في حواري أم درمان و أزقتها و أسواقها و أخرى يحلق بك في سماء أوربا و يتنقل بك من بلد لأخر فتنسى مكانك الذي تجلس فيه, كم تمنيت أن تكون معنا في تلك الأيام الروائع و كم أتمنى شخصياً أن تعود ولو لساعة واحدة فشوقي له سحر أخاذ ليس لنا غنى عنه Quote: ده لسة إسمو الشوق للوطن |
نعمل شنو يا رأفت ما دا السودان الإتولدنا و إتربينا فيهو أهلنا كلنا قاعدين هناك و جزء كبير من أصحابنا ... أفتكر بعد كدا الواحد معذور في البيعمل فيهو دا .. بشرط حال البلد ينصلح و الأمور تبقى تمام عشان برضو تكون في حالة بتاعة رضا
Quote: فكيتا فيك .. معليش |
هو بالله كلامك الفوق ده كلو فكة ؟؟؟؟؟؟ أها عشان حركاتك أنا قررت أجرب مرحلة فقدان الهوية بالمناسبة ما وريتنا ... انت من الفئة التالتة (أ) و للا (ب) ؟ تسلم يا رأفت و كل سنة و انت طيب
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: Dr.Saeed Zakarya Saeed)
|
Quote: هكذاهي سنين الغربة تبدا باول ثلاثة شهور وفيها تكون الاشياء دائما مبعثرة تصاب بمتلازمة تتمني لو ترجع سريعا او تصرخ ياابوزيد ليتك ماغزيت |
مرحب بعودتك د.سعيد و رمضان كريم أصبت في وصفك الدقيق لنوازع الغربة و مراحلها فأنا واحد ممن صاحوا بأبي زيد في البداية و لكني تراجعت عن هذا بعد أن تزكرت بأن أبا زيد لم يكن الطريق ممهداً له في هذا الغزو .... فلاقى ما لاقى حتى وصل إلى تلك النقطة ... و منها كانت الموازنة مابين مرراة العودة بخفي حُنيٌن و الصبر القليل ( كثيراً )... و الحمد لله .... أبوزيد الآن أحسن كثيرا من السابق, الشئ الذي يجعلني أمتدحه قائلاً بالعامية ( بركة يا أبو زيد ... أنك غزيت ) نورت البوست يا دكتور زيدنا من الطلة فلديك أيضاً تجربة مماثلة نستطيع الإستفادة منها مودتي لا تنقطع
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عادل جبارة)
|
Quote: أتمنى لك كل التوفيق وأسأل الله أن يعيدك سالما غانما تحمل عدة العلم والمعرفة |
يا سلاااام ... أهلاً بـ (أبو آية) وأنت تقص الشريط مففتحاً البوست في مرحلة ما بعد الأرشفة ولكم أنتظرتك كي تدلو بدلوك سابقاً و هاأنت الآن لم و لن تخيب ظني أبداً ..... من ناحيتي فما أرجوه في الأول هو الإنتهاء مما أنا فيه و من ثم أينما كُـتب الرزق فسنسعى إليه طالما أنه موجود في مناكب هذه الأرض ... ولكنها النفس ..ً يُشق عليهاأحيانــا أنتظر منك الكثير يا عادل فتجربتكم ثرة في هذا المجال شكراً عادل فأنتم عزوتنا التى نعتز بها أيما إعتزاز تحياتي لك و لكل أهل الرياض
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
Quote: يا سلاااام ... أهلاً بـ (أبو آية) وأنت تقص الشريط مففتحاً البوست في مرحلة ما بعد الأرشفة ولكم أنتظرتك كي تدلو بدلوك سابقاً و هاأنت الآن لم و لن تخيب ظني أبداً ..... |
الأخ الأصغر غباشي كلماتك تهز المشاعر وتغمر النفس محنة وإلفة .. وأقولها بصدق وتجرد وفي هذا الشهر الفضيل المبارك أنني مذ عرفتك من خلال هذا المنبر قد تحيزت لكفاحك من أجل نيل الدرجات العلى من العلم والمعرفة وتوسمت فيك أخا لم تلده أمي ولكني أرى فيه من صفات البر والعطف على الوالدين الشيئ الكثير ... سيرعاك الله بعنايته ويوفقك لما تصبو إليه طالما كان ديدنك البر والسعي لرضى الله والوالدين وأنت في هذه السن الغضة ... دعواتي لك بالتوفيق والسداد ،،،
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: عادل جبارة)
|
Quote: أنني مذ عرفتك من خلال هذا المنبر قد تحيزت لكفاحك من أجل نيل الدرجات العلى من العلم والمعرفة وتوسمت فيك أخا لم تلده أمي ولكني أرى فيه من صفات البر والعطف على الوالدين الشيئ الكثير |
شكراً عادل, حقيقةً هذه المرة أجد نفسي عاجزاً عن مجاراتك و لكن كل ما أستطيع قوله رداً على ما كتبته لي هو ( نفس الشعور ) ألف شكر يا عادل و إن شاء الله نتلاقى قريب في حلتنا
| |
|
|
|
|
|
|
Re: 12/08/2006-12/08/2007 .......... عــامٌ كامـل و أنا خارج السودان (Re: غباشي)
|
Quote: أها ده العيد التالت و الحسَّـابة بتحسب ..... |
عارف يا غباشي ده أول عيد لي مع أسرتي من سنة 2000 ..
لا زلت أتذكر أول عيد مر علينا و نحن في الولايات المتحدة (الهندية) .. كنا في حالة ما يعلم بيها إلا الله .. و السناير يشيلو و يتريقوا علينا ..
الله يعينك .. و ان شاء الله العيد الجاي في الصحافة .. قول آميييينن
كل سنة و انت طيب ..
| |
|
|
|
|
|
|
|