|
Re: جغجغة .. وأخواتها ... (Re: ibrahim fadlalla)
|
حمحمة
حمامة باضت فوق بيضا نامت حنين كلاما سجع حمامة حماها حامي من نوما قامت تحك تحاحي للإيدو مخلب فحيحو .. صاحي كديس ومجرم كمان هو جارا خطير مخرب قاتل .. مسلسل مانياك .. يزعل عشان عشاه يبيع جناه عشان عشاه جاها غاير كديس وأجرب حمامة طارت لفوق .. وركت تشيل جناها وتخت جناحا بكل بسالة فاقت خيالو وكمان خيالا عشان بكرة يا ما يتم مناها وتشوف هناها بفراخها .. تسعد حمامة طارت لي فوق وغارت وكديسة فرت لبعيد هناك تلحس جراحا لحسة لحسة لفوق تعاين مرة عينك ومرة خلسة حمامة بيضا حارسة بيضا حمامة ساكت حمامة شرسة
14/6/2007م
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
أيها المارون بصمت .. أتركوا خلفكم .. وقع خطاكم أثرا..يدلنا عليكم ولا تجمعوا ما تساقط خلفكم من زفرات.. أنفاسكم.. أو لعناتكم... دعوها تنبت أزهارا( أو أشواكاً )لا يهم إطلاقا .. في رحاب الحوش الكبير ...هنالك قرب المزيرة الندية ...
| |
|
|
|
|
|
|
Re: جغجغة .. وأخواتها ... (Re: د.محمد حسن)
|
مجرد شبه .. لأ .. ما في علاقة يا د. محمد الحسن مع أي من النجاجيش .. ربما تشابه عليك الإحتشاش ...
مرحب بيك .. ضيف .. نضيف .. وظريف ...وشكرا على وقتك المستقطع .. دام لك ودي وتقديري
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
**** *** ** *
مواسيرك تحت زيرك تسقي الموية لغيرك وين مويتك .. وين زيتك.. وين بيتك.. وين جازك.. وإنجازك.. وجزولينك.. وبنزينك..
واللة بس كدة .. ابنت واجزت .. لكن جغه واحده لا تكفي..
جغ ..جارح جغ .. يصارح للوديع و سارح في سماهو .. طيرة بين سحاب .. وقارح أحلامو .. خضرة مخضرة و طريرة
هذا المقطع ياصديقى جميل ..
ولنا عودة
* ** *** ****
| |
|
|
|
|
|
|
Re: جغجغة .. وأخواتها ... (Re: sumah)
|
أستاذي الأنيق .. سمعة ...أشكر مرورك الرشيق .. وأشكر كلمات الإطراء في حق قولي المتواضع ... وسأسعد دوما بزياراتك ...وإن تقاطعت خطوط حوارك مع خطوطي ... فخط الود يبقى دوما .. ممدود..
لك الود والتقدير ...وعودك محمود..
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
كشكشة كشة.. كشة كشة.. للفات كشة .. كشة سبعة كشات **** والحلم النابت زي برعم في كواكب نائية .. منسية مزروعة بالحب الأخضر مرصوفة قواقع فضية طيورها حروف ..بتتغنى دروبها .. قناطر مبنية زي قوس النور ..تتلالا مكسية غلالة وردية *** والشافعة الشويفعونة طلعت في الشارع لاهية مفتونة في إيد لعبة وفي التانية أقوالا شافعة مسيكينة لاهية .. في حالا **** كش .. كشة كشة .. مجنونة كشة شالت الفرحة في عيونا قليبها في ...وجعة ودموعها.. جراية في ليلة .. ضواية قميرها .. قمرية تغريدو .. سحابة مزروعة حنية هوامة في سماها خلابة .. سحرية مسكونة بالروعة واللوعة .. في لوعة من نورها .. مبهورة بي نورها .. مسقية **** كشة خلت .. الشافعة مدهوشة بالدهشة مسكونة كشة جابت الحزن في عيونا كشة..كشة كشة .. كشات كش ..أبوكي .. أبوكي ما إنكش كش ..أبوكي .. أبوكي بس فات .... كشَ .. حزن كشَ .. ألم كشَ مغص كشَ..عفن كشَ .. حلم كش .. وهم كشْ .. ملك كشْ .. مات
20/ 6/2007م
| |
|
|
|
|
|
|
Re: جغجغة .. وأخواتها ... (Re: ALGARADABI)
|
الله لا جاب رحمة الله وحرمنا منك يا ابوعندليب الجاية خليها فسفسه حتى ينتظم العقد قبل الاكتمال
دردرة ... حمحمة ... جغجغة ... كشكشة ....... فتأتي فسفسة
لك التحية وبختك أصبح القردابي من معجبيك وأنا بعرفو عجبو صعب
خالد محجوب
| |
|
|
|
|
|
|
Re: جغجغة .. وأخواتها ... (Re: فيصل محمد خليل)
|
فيصل حبابك عشرة ...ياخي الحكاية شغل عديل كدة ..يعني ممكن تعين ليك سكرتيرة عشان تقعد كل ربع ساعة تعمل لك فوق ..فوق .. شكرا على الطلة و الرصة بتاعة الإبتسامات دي ..حنوزعها على الوليدات... ودي وتقديري
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
نازل لي وين يا أبو الشباب .. ما لسة بدري !!!
انا ما فاهمة اى حاجة لكن عجبنى شديد وخلانى افك التكشيرة المن الصباح دى وما حاخليهو ينزل كلما اقراهوا اكتب ليهوا فوووق اها ان شاء الله مبسوط تحياتى يا ظريف ام وضاح
| |
|
|
|
|
|
|
Re: جغجغة .. وأخواتها ... (Re: essam&amal)
|
الأخ المحترم / إبراهيم
تحياتى و تقديرى ،
عذراً للترحيب المتأخر بكم ، فى البدء ظننتك إبراهيم فضل الله (ود المعاصر) أو صاحب الفخامة كما يسميه كبر و كبارنا هناك . و أخيراً عرفت من تكون ؟ ألف مرحب بيك فى المنبر إضافة جديدة ، و لمسة فنانة . و لى عودة للقراءة فقد مررت للتحية و الترحيب .
مودتى .
| |
|
|
|
|
|
|
Re: جغجغة .. وأخواتها ... (Re: عبدالرحمن عزّاز)
|
Quote: عذراً للترحيب المتأخر بكم |
المحترم..عبد الرحمن عزاز..عذرا على هبوطي الإضطراري في حوشكم .. دون إعلان أو إنذار ..أهو برضو الوقعة لامن تجي .. بردلب كدة تلقى نفسك مصنقر تتلفت يمين وشمال .. ما عارف نفسك وين ...طيب ده بخسوس إعتذاري مقابل إعتذارك اللطيف ... وبعدين المثل " الما سوداني " بيقول : ( أخيرا.. أفضل من أبداً ) ..والذي تمت سودنتو كالتالي : ( متأخر أخير من كلوكلو) ...يعني ترحيبك تمام في وقتو... صاحب الفخامة ... عهدي به لقاء عابر قبل سنوات خمس .. في الخرطوم وكان يتحدث العربية ..المزينة بالكلمات الإنجليزية الفخيمة ...أهو عادة ... كبر ... صديقي وأخي ... لكن ( كباركم الهناك ) .. دي ما وقعت لي لسة ممكن لامن تجي صادي ...تساعدني عشان أدخل الصورة في البرواز..معليش يعني الذاكرة بقت تركن كتير .. أها العمر روح والواحد لازم يعمل " فرمتة" وتقسيم كامل لهارد ديسكو..بعدين كويس إنت بعد نقرة .. نقرتين .. قدرت تتعرف على بطاقتي الشخصية وتفرزني من سميي .. صاحب الفخامة...عليك أمان الله أخوك لي هسه ينقر ويجلي..يعني بس لو كنت مركب صورة تاني غير حقة وليد دارفور دي .. كان نقشتك..طايرة.. شكرا على مرورك اللطيف ... وأرجو أن تعود دائما ..فذكرياتي في مدينة الجبال ...عروس أبوحبل ..منعشة...
ودي وتقديري ...مزيج بمزاج
| |
|
|
|
|
|
|
Re: جغجغة .. وأخواتها ... (Re: essam&amal)
|
شكرا ..أم وضاح ..على الدفرة ..وعلى تعليقك الظريف اللطيف ... ..أرجو أن تكوني قد وجدت في الخرمجة الهنا دي .. ما يدعوك للمرور والزيارة ..مرة بعد مرة ...فالحوش ..حوشكم ... وباب ذاتو..ماعندو...
ودي وتقديري ...مزيج بمزاج
| |
|
|
|
|
|
|
Re: جغجغة .. وأخواتها ... (Re: essam&amal)
|
أم وضاح .. يا وفية .. شكرا على الدفرة الظريفة ..بعدين البوست هنا بقي يتزحلق عديل كدة ... يعني رمشة عين .. يكون زاغ بين الصفوف بعدين تقعد في الطريقة التلمك فيهو ... ممتن للطافتك ... اتمني المزيد من الدفرات ...والمساعدة على الطفو يعني كلما يتيسر المرور ...أهلا بيك ...وسهلا ...
ودي وتقديري ...مزيج بمزاج
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
دبدبة...
دخلت كلبة تحت الـ "قبة" نبحت نبحة هجمت هجمة كجمت كجمة كفتت لقمة سايغة وسهلة وزاغت .. زوغة وراغت .. روغة بعيد في الغابة ....... والجمعة الغفرة من نيلو ..لفراتو ودجلة تبحلق ساكت...هبلة وساكتة... صمت الموتى
****
دخلت قطة بمشية ونطة وشايلة الشنطة ونجرررت نجرررة وكشرت ناباً شديد اللهجة وخمشت خمشة سريعة في رمشة وبانت دهشة في عيون الطفلة .... هربت قطة بسرعة وجفلة وغابت... وحشة في غابة دهشة ...... والجمعة الغفرة من نيلو ..لفراتو ودجلة تبحلق ساكت...هبلة وساكتة... صمت الموتى
**** دخل .. الدابي بشيش بيدابي بين الرجلين يعافر وينابي مد... لسانو طويل مشقوق صريح في بيانو سريع الرد أليم إمعانو وقف الوقفة هزة .. ورجفة داور ..و لف لسع لسعة لمع لمعة بريق شمعة في ليلة وضلمة عدمانة النجمة ترك وجعة وألم فجعة رشف رشفة .... زحف زحفة وفتح بيرق يرفرف .. طرحة وغاب في لمحة جوة الغابة.. ....... والجمعة الغفرة من نيلو ..لفراتو ودجلة تبحلق ساكت...هبلة وساكتة... صمت الموتى ****
دخلت دبة بي سردبة كبيرة ..وجبة شايلة مخالب سنينة وصلبة نكتت نكتة شديدة وكعبة حفرت حفرة غريقة وضلمة شمت شمة كرفت ريحة ...... رمة .. طريحة دفينة فـ هموما تساسق يوما ورا لقمة وشربة ودوا الشربة وحق المدرسة وعداد الكهربة والموية الغبشة برويحة التربة وراحة البال في رقادا ونوما وليلا.. قصير أسود .. داكن يفوت في لحظة بين هجعة وفزعة تروح الروح في شربة موية والجتة العفنة مرمية .. تفوح زي " موموية " بلا تحنيط ..... جريمة صريحة وأدلة فصيحة وفاعل .. الفعلة زولاً عادي كان .. في الماضي بسيط في زيو وكلامو ومشيو سبهلل ساكت شغيلاً أغبش جالس وساكت لكنو إتغول وصبح غول مهاب القول قبيح ومخيف وفي زمن غفلة تصيد .. غفلة ولبس تاج السلطة بالملك اتحلى وبقي سلطان الحلة يأمر وينهى ويبرطع.. مهلا لا هو المستعجل لا ناوي يغادر لي جحرو الأول بعد ما استحلى حلاوة الصولة وحلا لو النوم وسط الجوقة قام إتنحنح تجشأ وقحقح شوية إتململ وضع بيضة كبيرة وبيضا عليها عريضة منحوتة .. فريضة صك الحكم المطلق للألف الجاية حكراً.. تام ..لآل " قريضة " .... بنى لو قبة ولبس لو جبة كان بدلة بي كرفتة كان قميص فضفاض طويل وعقلة كان قفطان كان مشى .. أم فكو كدة عريان .. ما هماه .. إيش هماه ما فرقت .. الحبة ونصب نفسو على خلايق الله سلطان لزمانو ومن بعدو .. وليداتو .. وبنياتو والبقر والخرفان عقب .. كمان لي آخر الزمان ...... انفجعت ..دبة قرات الصك.. شافت غمة شافت شوفة وخافت خوفة ضرطت دبة طرضة نصيحة جابت ريحة عفنة وقيحة قامت .. صوفا .... هربت دبة دخلت غابة كبيرة فسيحة ...... والجمعة الغفرة من نيلو ..لفراتو ودجلة تبحلق ساكت...هبلة وساكتة... صمت الموتى
6/6/2007م
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
رب جغجغة يضيق لها قلب الفتى ذرعاً، وعند الله منها المخرجُ
جغجغت ولما استحكمت جغجغاتها فرجت، ومن شدة جغجغتها كنت وكنت أظنها لا تفرجُ
الزويل ابراهيم ما زلنا في انتظار فسفسة
لك تحياتي
خالد
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
فوق ....
إبراهيم / ياود حى الملكية ( نبز ناس الجيش) قيل ، أن جورج برناردشو قد دعى ( بضم الدال) لتقديم الجوائز للمتخرجين من الكلية الحربية ، فنادوا على الأول ، عمل أضان الحامل طرشا ، الثانى ، شرحو فى النهاية جمع كل الجوائز و سلمها للطيش ! و لما سئل ... رد عليهم لأنه الأقرب للحياة المدنية .... تعرف ياقريبى .... سنحكى كثيراً ، عن حيكم ، و شبابه الأجلاء سنحكى عن الراحل فقيد الشباب / نزار محى الدين جلاب ( أستاذى) و بقية العقد الفريد .... كبارنا يا حبيب ... ( كثر هم ) و أنت فى معيتهم ، فلا تتواضع أكثر ! نلتقى عبر المنبر أو عبر أستاذى الصديق كبّر....
عبدالرحمن عزّاز / أقوز غرب
________________________________________ ما تقول لى ماعندك ذكريات هناك ؟
محبتى و كل الوّد ؛؛؛؛
| |
|
|
|
|
|
|
Re: جغجغة .. وأخواتها ... (Re: عبدالرحمن عزّاز)
|
العزيز ..عزاز..قلت فأبنت...نعم ..ذكرياتي لما تزل طرية ..كرؤوس العشب النابت..تحت الأزيار..وأنت قد زدت السقي..رشقة ماء ..تحمل عبق الذكريات..في عروس الجبال..وخورها العريق..يسوق الماء..شلالا ..تهتز له أرجائها..عجبت..لأمرها..وبدا لي ..في وقت مضى ..أن الجبال تعاضد بعضها البعض ..أيحس الجبل بنمل الجفاف ..الزاحف في حلق..أخيه الجبل..الرابض على مسيرة ..خريف أو خريفين؟؟...فماء أبو حبل ..كثيرا ما رأيته بأم عيني ..يحمل القرابين ..من جبال بعيدة..لا أعلم من أيها فهي تسعة وتسعون..كما تقول الأسطورة..ولكنه يحمل الماء ..والأشجار والأبقار..هدية ..مقدمة..غير ممنونة...وكذلك أهلها الطيبون..جبلوا على الكرم ..والعطاء..وسماقة الإحساس... فهي مدينة أحببتها..بصدق.. وفي مجاذبة أخرى..لأطراف الحديث الطاعم..يكون للكلام عن المدنية فسحة.. رحيبة..بتقدير العلي القدير... ودي وتقديري...مزيج بمزاج...
| |
|
|
|
|
|
|
Re: جغجغة .. وأخواتها ... (Re: القلب النابض)
|
Quote: لهذا البوست المكشكش |
شكرا على المرور اللطيف..الكشكشة...لزوم الدردشة.. والفضفضة..والخروج من دوامة التلتلة..والبلبلة.. بعيدا عن السمسرة..والشمشمرة...يعني بإختصار كدة لزم القرقرة..
كشكرة...ودي وتقديري ...مزيج بمزاج..
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
شنشنة
شنو ..وشان شنو شنو الشال فرح شوم في الدواخل أينع ..وشال .. **** شنو الزرع في حوش الحلم شتيلة هم ... مقطوعةمن حقول العدم.. وشيع شباب قلب شفيف في ميعة صباهو قبل يومو ..قبال **** شنو البيشرح قليب صبح ..شحيح..إنشادو..مقلال وهو الكان طبعو هشوش .. و ..بشوش وهو الكان خيرو هطال.. **** شنو التاني يوقد شموع الفرح شعشاعة جوة في الوجدان مزامير طرب ... تزيح العتمة من الخاطر وتهدهد البال.. **** شنو يرجع حالي لي حالو و يسعد فالي.. شنو..البيسعد الفال؟؟
25/6/2007م
| |
|
|
|
|
|
|
Re: جغجغة .. وأخواتها ... (Re: ibrahim fadlalla)
|
وسوسة... ساسة..سياسة فسادة..في سادة رياسة..أساسا رصاصة.. خساسة مساسا... نجاسة سياسة ..تعاسة **** ساسة ..سياسة كويسة ..كواسة كياسة .. لي ناسا لياسة.. لي راسا سلاسة..لطافة هتافا.. سخافة لي سادة ..سيادة **** ساسة سياسة تعيسة ..تعاسة لغاوي.. شراسة.. سليطة..سياطها فظاظة ..غلاظة سقامة .. ذمامة وساخة ..قمامة لئامة..سجامة صرامة..حراسة سياسة.. دواسا *** ساسة ..سياسة سليلة ..دسايس دسيسة .. سلالة سرورها..شعارها صراخك.. سرورها سرورك..شرورها شرورك..شعورك شعورها..صرامة بلادة..سماكة سفاهة ..وضاعة بياخة...نياخة تجارة ..نخاسة ساسة ..سياسة كويسة ..لناسا ساسة ..سياسة تعيسة ..تعاسة
| |
|
|
|
|
|
|
|