الى جازلوت.......شمعة لحين عودتكم المنتظرة

Quote: اليكم هذا ( النص) من انصاص مابعد الخنفشارية: ملحوظة هامة : ليس هنالك اى خطأ فى ترقيم النصوص فلا تنشغلوا/ ن بعدم تسلسلها حيث ان التسلسل ليس من خصائص الخنفشارية اصلا. (3) الشارع اطول من احزان المدعوكين فى الحواشة الشارع مليان دياشة وعواميد نور مطفية وناس تتجارى ورا معاشة واحد شايل سرواله الناصل ومقشاشة وواحد واقف يبرم فى شنب الامباشى وجماعة بفرفرو تحت الكماشة وسكران ماهاميهو الحاصل واقف فى الخط الفاصل مابين الزمة وسيد السروال الناصل وبشاغل فى بنية ملفلفة زى قرطاس السكر الجوع اتدفق من عينيهو قزاز النضارة اتكسر تلميذ شايل كتبو ف سرج العجلة الورانى دقش البت الزى قرطاس السكر وقع اتكسر (9) ما طلحة براهو الكسر الجرة واحد شايل اخلاقو ف صرة وواحد شايل اخلاقو ف شنطة مستفة بى دولارات جايبها من برة وواحد شايل اخلاقو ف ستيانة بتو وواحد نسى اخلاقو ف رف الحمام شال شوالو وسافر جدة وواحد ماكانت عندو الفرصة عشان يعمل اخلاق بى مليم حتى (2) الزول الشايل اخلاقو ف ستيانة بتو ساق الولد الدقش البت الزى قرطاس السكر وداهو التمنة..الضبطية..المركز..سميها حسب كمية اخلاقك الضابط كانت بايته معاهو السكرة وبشرب فى القهوة المرة دخل الزول الشايل اخلاقو ف صرة وبكورك - ياناس ..ياعالم .. نشلونى.. اخلاقى اتنشات. (6) طنّـت ضبانة معلقة فى شرك العنكب جوة الزنزانة قرقر واحد مقبوض فى قصة جبخانة وماجبخانة ضحكت واحدة هناية وست انداية وقالت - يادوووب اتنشلت ؟ واحد مقبوض فى جناية اتجار بالقصّـر قاليهو تستاهل شايل اخلاقك وحايم فى السوق عميان مـنّ البنك او البوسطة؟ واحد زمّـتو سوسته ساق الولد الدقش البت الزى قرطاس السكر وداهو الشفخانة.. المستشفى.. عيادة.. تسميها حسب مفهومك للمادية( الدجلية) وموقفك التاريخى من الخصخصة والاستثمار الرأسى. يازول.. قول الدكتور تاوق جوة دماغ الولد المفتوح للعامة وشخبط فى الورقة القدامو كلام بالسنسكريتية الفصحى وقال للشافع.. - عندك قرحة ولازمك عملية استئصال كلية سليمة والمشترى جاهز.. ودولاراتو تناهز خمسين فى المية مقدم وتلتاشر بعد العملية. الود ضّــربها فى مخو.. - والباقى؟؟ - باقى شنو كمان.. حقى وحق المستشفى خمستاشر وزكاة الفطر تمانية وزكاة الانعام وتبرع لبناء مسجد تانى جوار المستشفى خلاص.. مية المية حنسوى العملية اذا وافقت..اذا ماوافقت القانون واضح والواضح مافاضح (1) الود قام جارى ($) سكّــوهو تلاتة تمرجية وبوليس حركة وسمسارين والناظر (10 اوعك تسألنى عن الناظر دة منو ومن وين ودخل كيفن اهو ناظر لاقيتو ف نص القصة حليو وقيافة وقندف وما مشغول بحكاية دوران الماهية من الجيب للغيب عندو مصادر سرية وواصل لى اقصى حدود التموين اذن مامهم نسأل عن اصلو وفصلو وجاى من وين (3 مكرر) الناظر قال زهجان من ازعاج الشفع فى المدرسة والمدرسة بس حوش ومكيتب مامعروش وقطاطى بروش يازول تووش الشافع دخل المدرسة تلبوا ستة تمرجية وراهو الكانو تلاتة استثمرهم الناظر فى مشروع خيرى مرابحة يمكن اصبحوا ستة بفضل الله وفضل الدعوات المبروكات من جمهرة القايمين الليل جزو منو عبادة وجزءا عادة حراسة كبرى ودوريات (أ) الفات الفات قال وانا مالى طلع طوالى والهون ضرب السَّــل فون والزول السافر جدة شوالو انقدَّ والبت الزى قرطاس السكر طلعت حامل وفى شهرها العاشر والعرقى الشربو الضابط كان داشر والسكران لسع واقف فى الخط الفاصل والصورة بقت مهزوزة ضبابية مكهربة والشارع اطول من احزان المهزومين فى الحواشة ومليان دياشة وعواميد نور مطفية وناس تتجارى ورا معاشة ........................... ............................. .............................

Quote: هاكم دى من ابداعات مابعد الخنفشارية الحديسة البحر يتم جزاير الوردة لما الموج حسر اكمامو فات قدامو لى ندامو حاضن بالتلاتة حرامو ياشاقينا يانديهو بت السكلبت فينا انفرد شلال مآقينا انتماءاتنا التتاوق لينا من جوانا تضحك مننا وتمرق لسانها وحتى لما الليل برد والبارق السارق حرد نزل العشق دقانا والمستورة فى حيشانها كان مرقت تقش عريانه والطيارة جات مليانه افرنجين وافرنجات ويا كمرات ونضارات وبالزردية يا( بر) عمتك لبنية حمد النيل وفينا الفات ومن ابعنجة لى شمبات ومن بيت التكب اهاتها فى قدح المرق فى قلبو يتفصد عرق عميانة والراتب فرق ناولينى شاى يا بت اخوى خلى الندلدل عمتى ونلحق بواقى الكحة كان تنجينا من صمة خشمنا اتلبست فينا ويبس ريقنا ودفق شلال دمومنا النازلة زى جدول مرق من البحر ناشف وخلى السمكة تتلفت ممحنه مننا وفينا ولا دما نكفر بيهوغلطاتنا ولا دمعات تغطينا

Quote: اهداء خاص الى الصديق هوب فل عله يجينا مارق لى برة - لاتكابس حيا وميت. خاطبته اللقية بت التومة وهو يقاوم ملك الموت, ويعافر ويدافر ويزافر مثل زواج وحل فى رمال المعيشة. والناس من حوله يمسكون باطرافه ويلزمونها الجابرة حتى لايموت مكرفسا, كما قال ود دوليب, الامام وهو يشرح للحاضرين والحاضرات بما فيهم ملك الموت نفسه: - الزول لابد ان يموت مستقيما. قال ادم جبر الخواطر: - ولا الضالين امين... ضرط ضرطة كبيرة شُمت عفنتها فى غرفة تاج السر اللولية, واخرج استه شريطا رفيعا لالون له كما الماء, رغم تماسكه... كما الدودة, فى التواءه...كما الوعود الانتخابية والبيان رقم واحد, لا اول له ولا اخر. ازاله عبد النبى الطباخ بيده والقى به الى الارض. بينما تصاعدت احتجاجات اللولية على مثل هذه المساخر. وتاج السر قد سمى باللولية لانه كان معتقدا فى الظار, وتحديدا ظار الحبش وخواجة ارض الصين, لهذا اشتهر بنظافته النوعية واناقته النسبية وحبه الجم للعطور والبخور. خرج ادم جبر الخواطر من الغرفة تاركا الباب مفتوحا كفخذى عروس غافلة, انهمك عريسها للتو فى افتضاض بكارتها, فدخل نوح الله جابو يدمدم كعادته بما لا اذن سمعت ولا عقل فهم, كانه وسط طقوس عشق سرية وضعت كل الاحتمالات فى سلة واحدة وما الفرج الا من عند الله. انقطعت الكهرباء فجأة فأصبحت الغرفة مثل بيت اشباح انقاذى لاتملك فيه سوى ان تستنفر ماتملك ومالا تملك من حواس, متوقعا ضربة تأتيك من بين يديك ومن خلفك ومن كل حواليك, وامسك حتى ملك الموت عن معافرته مستنفرا هو الآخر حواسه الملائكية يتلمس بها دامس ظلام الغرفة. انهمك موسى العبد فى سلسلة طويلة من سعال, ظن الناس ان نفسه سينقطع بانقطاعها, ثم عاد لمعافرته ومدافرته ومزافرته مرة اخرى بعد ان تلمس ملك الموت طريقه اليه فى ذلك الدامس , وراحت الايدى تتلمس هى الاخرى طريقها الى اطرافه منقضة عليها فى محاولة لاماتته باستقامة حتى دخلت اللقية عليهم بفانوس تكسرت زجاجته وارتخت شعلته وكثر دخانه وتشبحت اضاءته. وتتالت ضرطات موسى العبد, خافتة, ولكن متوالية كمقاومة يائسة من اطراف انقلاب مدحور. فجأة همد جسده وارتخت عضلاته فارتخت عضلاتهم بدورها وصاح ود دوليب بصوت جاء كمخبز الامانة المجاور, آلى وخالى من اى نفع: - انا لله وانا اليه راجعون... وسرعان ماامتلأت الغرفة بحشد ممن كانوا يتناثرون مثل الخراء اليابس فى تلك الخرابة, وتعالت همهمات ودمدمات ونهنهات ...حتى باغتهم الصوت المألوف : - اشرب... وخيم صمت مغتاظ.. - مامات !! - لاحول ولاقوة الا بالله.. - معجزة ألهية.. - يعنى ربنا يترك كل الخلق ويسوى معجزته فى موسى العبد ؟! - يضع سره فى اسود خلقه. - ونصرانى.. - يضع سره فى اكفر خلقه. - وما عنده قرش واحد.. - يضع سره فى افلس خلقه. - اشرب ياناس.. صاح موسى العبد بصوت اوهنته كثرة المعافرة وطول الضراط واشياء اخر. - الحقوه بشربة.. - سبحان الله.. - الحقوه بكباية عرقى.. ياخوانى صاح اللولية وهو يمسك بطرف القميص الساكوبيس الناصع البياض مثل ضمير مستتر تقديره لا احد, والمنسدل جزئيا على جسده العنكوليبى , مثل ملاءة انحسرت بفعل فاعل عن همزة الوصل بينها وبين المرتبة فأفصحت وأبانت عن ارجل السرير المخروطة بعناية وكشفت عن متاع قديم اخفاه اصحاب الدار عن اعين الزائرين , وارتعش مابين فخذى اللقية. فقد ود دوليب صبره وحلمه ونسى الدرس والصلاة تنهى عن الفحشاء والمنكر وكل شئ كان يعظ به الناس, فمنذ اسبوع وهم تركوا اشغالهم وتحلقوا حول العبد يساعدوه على الموت باستقامة وهاهو قد اضاع كل مجهوداتهم سدى ولايريد ان يموت !وافلتت من محجريه نظرة ضلت طريقها الى فخذى اللقية المنفرجين قليلا بفعل رداءة المقعد ( مقعد الغرفة وليس مقعد اللقية لذا وجب التنويه ) ورغم خفوت الضوء الا ان اللقية بحسها الجنسى العالى احست ببصره ينهش مابين الفخذين وتبسمت راضية, واخذت تفكر رغم غرابة الموقف فى آلة ود دوليب الاسطورية, ممنية نفسها بليلية اخرى تحته وصدره يرزم مثل خور ابى عنجة فى أوج الخريف, غير ان ود دوليب سرعان ما انقض على موسى العبد وجثم على صدره المعلول وراح يخنق بيديه الغليظتين العنق النحيل حتى تدلى لسان العبد Quote: نصف متر خارج فمه المفتوح كنقاش رياضى فى مواصلات عامة, وخرجت كرتان سوداوان صغيرتان من مكمن ما فى اسفل جبهته ادرك نوح بعد زمن طويل انهما بؤبوءا عينيه فصاح فى الامام - استغفر يازول.. لاتقتله.. - قتله الله ..العبد الزنيم - الله وفره وانت تريد قتله! - اذا عجز ملك الموت عن قبض روحه سأفعل انا نيابة عنه. خرجت انا من الغرفة ولم اعد اعرف ماحدث بعد ذلك. وكل ماسمعته وعرفته ليس سوى اقوال وافادات الشهود وسنوافيكم بكل ذلك فى حينه. والسلام عليكم منعم الجزولى هل هناك ابداعا اجمل من هذا؟!!! أصدقونى القول! منعم يا ايها العزيز اننا نحفل بك ونحتاج اضافاتك وكتاباتك فهلا وهلا؟