|
|
 Re: يا سلام من إلهام ( سوما ) ( وإلهام ) (Re: Raja)
|
رحمابى يا بحرا اخضرت شواطئه بابداع متوارث من اجداده . جذوره صوفيه ، غناه نوبه وحوليه ، حجاه طيبه وحنيه ، اصالته حره بدويه ، طباعه حلاويه ،
لك مليون تحيه وتحيه ..
احترت كثيرا وانا احاول ان ارد على سطر واحد من تعابيرك المتفرده .. متفرد بيها انت وحدك .. بتشبهك ، منتميه ليك ، كضاب البقول بقدر يجاريك ولا يشاركك حتة من ابداعك المسكون بيه انت ومسكون بيك هو .. توأمك الحنين ، لا بفارقك ولا بتقدر تهجره ، رغم زحمتك ورغم ظروف الغربه العجيبه الاتحكمت فينا ، وبعدتنا بمن نحب .. لكن حتى فى شجنك جمال محكر فى كل زوايا لوحاتك الفنيه ، وفى روعة قلمك الحروف تتهاداى كالحسان ، وفى هدوءك وسكونك سر كنوزك المخفيه حول جدار صمتك الملفح روعه وابداع ..
لا استطيع ..حقيقة لا استطيع ان اوفيك حقك ولا استطيع ان اوصفك يا ابن اهلى الذى افخر به وسط الجموع باثرها .. اقف كوقفة مهيره وباعلى صوتى ازغرد لارضى التى انجبتك ..نعم ازغرد حتى تعانق دمعتى فرحتى ويندمج صوتى بعبرات الفرحه التى لا يصفها الا الموقف نفسه .. القومه ليك يا رحمابى ..
****
ضيفنا المقدام .. الحنين ود الحنان
مصطفى السنى هذا الصوت المشبع بكل الحنين .مروى من رحيق لم يسبقه عليه احد
مصطفى الانسان الفنان .. انسان بانسانيته المعروف بيها.. وفنان بكل ما تحمل هذه الكلمه من معانى نبيله واصيله .. سفير للاغنيه و الكلمه السودانيه بكل جداره .. نعتز ونفخر به وهو يطربنا بحنجرته الحنون .. عندما يغنى لأبو داؤد تزداد الدهشه ؛ وللكاشف يعانق الطرب السماء ، وللحقيبه تتسمر الفرحه والغبطه فى الدواخل ...وعندما يغنى للراحل المقيم مصطفى والحزن النبيل تكاد دقات قلبك تسابق الايقاع
وحين يقف مع نفسه والحانه لا تملك الا ان تقول ربى يحفظك ويرعاك يا ود ملوك النيل..
آخر حفلاته فى مسرح مسقط دنت منى وبكل حنيه ام قصى الانسانه الوديعه .. صاحبة المشاعر والاحاسيس المرهفه وهمست بكل رقة سوما مصطفى الليله بحتاج بخور ..وتحصين .. كادت دمعه تفضحنى امام الجميع .. تمتمت فى سرى ربى يحفظك ويغطيك ويعليك فى المابيك .. قاااااااااادر يا كريم ..
مصطفى ربنا يسعدك قدر سعادتك لينا وان شاء الله البنتمناه ليك يجيك يا حنين ...
***
الدكتور الانسان احمد محجوب (طراوه) هذا الانسان المسكون بعشق البلد وابداعه المتدفق .. هذا المتفانى يعطى ... ثم يعطى ... بلا مقابل ، ولا انتظار لكلمة ثناء او مدح .. فرحته تتمثل فى نجاح جهوده المقدره تماما .. وجوده بيننا مشرق كالشمس .. وحين مغادرته ارض عمان . تذبل كل الازهار وكل الفراشات ترحل بعيده تاركه خلفها فراغ تركه هذا الانسان برحيله . نسعد كثيرا لكل نجاحاته فى دروبه العلميه .. وداخلنا بعض الانانيه لوجوده بيننا .. انانية ام لا تستطيع ان تفارق فلذة كبدها رغم انه مستقبل عمر رسمته بامنياتها ودعواتها المتواصله ..
دكتور احمد ايها النقى كاللؤلؤ ..ايها الذهب الذى لا يصدا ابدا رغم تقلبات الاجواء البشريه .. ايها العتيق كعتق فننا السودانى الاصيل ..لك التجله والتقدير ..
لك الانحناءة لكل عمل متميز تتفانى فيه .. ولك فرحة بلد ودعوات اهل ايها الصافى الابيض...
****
الهام كنتى قمة فى الروعه والجمال ، رغم انى حضرت البروفات النهائيه واستمعت اليك عدة مرات ، لكن ولله الحق .. كأنى اسمعك لاول مره .. طربت مع الجمهور وسعدت للغايه بان اعتلى خشبة المسرح بصحبتك انتى والكوكبه الرائعه من الشباب ..
كنتى وما زلت خير مشجع لى .. اهنىء نفسى بك قبل كل شىء .. ويافرحتى بيك يا ام جعفر ويافرحتنا بيكم يا طه والهام وقبلكم جعفر .. ربنا يحفظكم ويغطيكم ويعمر عشرتنا بيكم ..
***
ابو جهينه سلام يا دخرينا
ونحن سعيدين جدا بوجودك معنا فى هذا البوست ..وكانك بيننا فى تلك الليله التى لا تنسى ابدا ..تسلم يا عميق المشاعر..
***
الحبيبه تماضر
كنا فاقدنك حقيقه والله .. وجود ام قصى حولنا كنا بنشوفك من خلال حبها ليك وودك وحنينك ليها .. تحاياك وصلتنا .. تسلمى يا بنيه من وسط الاهل .. لو عطرتى سمانا برضو انتى بى زياره خاطفه .وشرفتينا بوجودك وسطنا ..بنحلق فى سماء الحب والفرح معا ..
لكى التحايا والشوق الدافر يا تماضر ..
*****
الحبيبه ايمان .. الشوق ليك كيمان ..
تسلمى يا غاليه على الطله ..وشكرا على تعبيرك الندى..
****
رجاء يا كريمه .. راجيه الله يديك قدر سماحتك يا حنينه
تسلمى يا ست البنيات وشرفتينا بى طلتك..
***
رحمابى دحن يا خوى الليله ديك مى كانت فاقده الزول السمح داك ؟
يعلم الله يا البدرى فقدناك وكانت ناقصة بلاك
والجايات اكتر يا خوى
وكدى حاول فى يوم الجمعه دى تجينى بى جاى ..
ان شاء الله فى لمه كبيره بى ود السنى ..ويا ريت تشرفنا
والتفاصيل بتجيك فى بكانك على قولك
|
|
 
|
|
|
|
|
| العنوان |
الكاتب |
Date |
 يا سلام من إلهام ( سوما ) ( وإلهام ) | AlRa7mabi | 12-13-04, 01:15 PM |
| Re: يا سلام من إلهام ( سوما ) ( وإلهام ) | إيمان أحمد | 12-13-04, 01:24 PM |
| Re: يا سلام من إلهام ( سوما ) ( وإلهام ) | AlRa7mabi | 12-13-04, 01:33 PM |
| Re: يا سلام من إلهام ( سوما ) ( وإلهام ) | ابو جهينة | 12-13-04, 10:23 PM |
| Re: يا سلام من إلهام ( سوما ) ( وإلهام ) | TahaElham | 12-14-04, 05:20 AM |
| Re: يا سلام من إلهام ( سوما ) ( وإلهام ) | Tumadir | 12-14-04, 05:34 AM |
| Re: يا سلام من إلهام ( سوما ) ( وإلهام ) | TahaElham | 12-14-04, 06:00 AM |
 Re: يا سلام من إلهام ( سوما ) ( وإلهام ) | Raja | 12-14-04, 06:02 PM |
| Re: يا سلام من إلهام ( سوما ) ( وإلهام ) | soma | 12-14-04, 08:22 PM |
| Re: يا سلام من إلهام ( سوما ) ( وإلهام ) | عشة بت فاطنة | 12-15-04, 10:30 AM |
|
| |
فيس بوك
تويتر
انستقرام
يوتيوب
بنتيريست