|
مصيبة العافية بت نورين
|
((الى أمهات السودان القابضات على جمرة حرقة الحشا))
اسمي العافية.. ساكنة امبده وعندى تمانية ابوهم فاتهم متل الطير..شالو الشقا والضيم خلاهم امانة ..اتحزمت واتلزمت على همى .. قلت االعافية.. تقبلى وين فى الزمن الضيم .. تقبلى وين فى الزمن الشين وراك تمانية.. اياكى يمة ويابة...وكتين الناس الشقيانين السهرانين شايلين الليل يتراوحوا لى بيوتهم كسرتى بتمرق..اشيل السوق على باب اللة.. عليك يااللة تكبر بلة ..تجبر صالح.. يشيلوا معاى هم الستة..............
فرهد بلة شوية وشفت عيونو..دخل ومرق مع الجنيات سقتو مشيت لى جاد السيد سيد الطاحونة..قلت لو بلة امانة روحك..ماعندى بلاهو يشيل الشيلة.. خليهو حداك ..يشيل ويخت اياهو جناك..........
يجينى المغرب جيعان واغيبش يحننى ..شايل لى مدرسة اخوانو حق اليومية..فرحنا وقلنا خلاص تقول اتوظف...........................
ويوم اتأخر بلة..قلبى نقر الجنا مو سالم.. اصلى بخاف الكشة..قلت االعافية اصبري شوية.. ابعدي الشينة.. صبري كمل جريت الشارع.. وقفت شوية.. اجرجرت على الطاحونة.. عارفاها بتقفل خمسة.. جادالسيد مصنقر بره.. قلت لو وووب ااجادالسيد وين بله.. باقي بخاف الكشه.. قام جاد السيد واتلملمو ناس الحلة...... جرينا النقطة.. جرينا الشرطة.. نقبل وين ااناس الشرطة.. نسأل مين.. لقينا الناس كارات كارات زي الطير.. نقبل وين ونسأل مين.. كمين كمين مفقودين......
وقف الضابط جمب الباب.. جريتلو سألتو.. _ وين بله؟؟؟ _ بله مين ياحاجه؟؟؟ _ بله وليدي الكبير.. أعاين لي الله وليهو.. _ اسمو بالكامل ياحاجة؟؟؟ _ بله عبدالحبار سماعين.. _ (يقلب ورقة بيده).. ده راح الجهاد اللواء 13 كتيبة المغيرات صبحا.. _ (منهارة).. جهاد مع مين.. جهاد ضد مين..جهاد لمتين؟؟ بتلفحو بله عيون اماتو.. ملاح اخواتو.. طبيق اخوانو وبله يتيم...............
أنبح ليل ونهار زي الطير وعارفه الطير كان شالو جناهو تب مابنوم.. أقوقي الليل وأقوقي نهار وحمالتي عليك ياالله تفرج الحال.. اليوم في اليوم وبله بعيد مامعروف وين.. وغيرو كتير.. حالنا سجم.. ويومنا عدم.. وليلنا ندم....
يوما أسود زي الليل جوني بنات نايرات لابسات.. فتحت الباب .. _ حباب الضيف. _ زغردي ياأم بله.. _ بله رجع..ّّ؟؟؟؟؟؟؟؟ _ بله شهيد..
طرت هناك وقعت بعيد.. صرخ البيت.. صرخ الجار.. صرخ الطير.. مت حييت.. مت حييت.. مت حييت.. ألفين مرة.. شهيد لي منو.. شهيد لي شنو.. وقفت قويت وقلت...أمرقن بره.. ماهو شهيدكن بله.... بله شهيد أخواتو.. شهيد الطلبة الضاعو مهاهو.. شهيدي.. شهيد المسؤولية الشالا صغير.. شهيد البلد الطيب وخير.. بكره بفرهد بله مع أخوانو وتطلعو أنتو جماعة الغفلة..
بعد يومين جوني جماعة سمان ونضاف.. شايلين سكر وزيت.. ومية ألف على التربيزة.. صالح واقف بره يعاين.. جاهم داخل.. حفيان بي لباسو.. وقال لي رئيسهم أطلع بره.. ضحك الابله وعاين لي.. قلت لو بره.. صالح ماهو صغير.. صالح راجل وأرجل منك.. وصالح في الكتاب يابنية.. قلت لو بره وشيل حاجاتك.. واخجل.. ده تمن بله؟؟.. جزمة بله أشرف منك ومن الجابك.. ياوسخان ياتاجر الدين.. فقرانين ااي لكننا شرفاء وقلبنا ثمين..
قويت يابنية.. قويت وقويت.. فهمت وعيت.. حليل العافية ست الكسرة الغافلة الطيبة.. فرطنا كتير.. غفلنا كتير.. دفعنا جنانا التمن الغالي.. شالو جنانا مابنسكت.. حرقو حشانا.. مابنسكت.. في الزنزانة.. مابنسكت.. بالجبخانة.. مابنسكت.. مليون دانة.. مابنسكت.. مابنسكت..
سؤال خارج النص... هل فوضت العافية بت نورين أحدا للعفو-باسمها- عن قتلة ابنها ؟؟
|
|
|
|
|
|
|
العنوان |
الكاتب |
Date |
مصيبة العافية بت نورين | مريم الطيب | 01-06-04, 08:36 AM |
Re: مصيبة العافية بت نورين | ودقاسم | 01-06-04, 08:52 AM |
Re: مصيبة العافية بت نورين | hanouf56 | 01-06-04, 08:55 AM |
Re: مصيبة العافية بت نورين | Nasr | 01-06-04, 09:26 AM |
Re: مصيبة العافية بت نورين | دورنقاس | 01-06-04, 09:42 AM |
Re: مصيبة العافية بت نورين | Nasr | 01-06-04, 09:37 AM |
Re: مصيبة العافية بت نورين | أبو ساندرا | 01-06-04, 10:11 AM |
Re: مصيبة العافية بت نورين | Abureesh | 01-06-04, 10:37 AM |
Re: مصيبة العافية بت نورين | maia | 01-06-04, 10:26 AM |
Re: مصيبة العافية بت نورين | AlRa7mabi | 01-06-04, 03:15 PM |
Re: مصيبة العافية بت نورين | مريم الطيب | 01-06-04, 05:47 PM |
Re: مصيبة العافية بت نورين | بدرالدين شنا | 01-06-04, 07:30 PM |
Re: مصيبة العافية بت نورين | مريم الطيب | 01-07-04, 02:02 AM |
Re: مصيبة العافية بت نورين | bayan | 01-07-04, 04:28 AM |
Re: مصيبة العافية بت نورين | بدرالدين شنا | 01-07-04, 07:16 AM |
Re: مصيبة العافية بت نورين | مريم الطيب | 01-10-04, 05:22 AM |
Re: مصيبة العافية بت نورين | الطيب بشير | 01-12-04, 01:59 AM |
Re: مصيبة العافية بت نورين | Mandela | 01-12-04, 02:56 AM |
Re: مصيبة العافية بت نورين | مريم الطيب | 01-12-04, 03:48 PM |
Re: مصيبة العافية بت نورين | Mutwakil Mahmoud | 01-14-04, 03:32 AM |
Re: مصيبة العافية بت نورين | مريم الطيب | 01-14-04, 09:26 AM |
Re: مصيبة العافية بت نورين | عشة بت فاطنة | 01-14-04, 09:39 AM |
مريوم | توما | 01-25-04, 03:28 AM |
Re: مريوم | مريم الطيب | 01-25-04, 03:53 AM |
|
|
|