أرسل لنا (جيمي) مدير توزيع النكات السودانية في الولايات المتحدة الامريكية وبريطانيا نكتة سودانية قوية عن البعوض فقمنا بتعديلها في ورشة ود الدابي فطلعت على النحو الآتي: قال ليك الباعوض في السودان جنن الناس جن ومنعهم من النوم في الحيشان وحبسهم جوه الاوض داخل الناموسيات ومع كدا طول الليل قاعد ينوني ويعضعض في الناس!!! اها في واحد مسطول سمع انو باعوض الزمن دا اتطور وماشي مع عصر العولمة وعامل اشتراك في الفيس بوك والواتساب وبقى يشتغل بنظام القروبات ويعضي بالريموت كنترول!!! … مش زي باعوض زمان المتخلف داك الكان بعوضتين يرفعو الناموسية والتالتة تعضي ويقومو شاردين بي سرعة !!! المسطول قرب يجن لمن سمع انو الباعوض الكان زمان بسبب الملاريا بس ، الليلة اتطور وبقى يسبب مرض زيكا البصيب الزول ويخلي راسو اصغر من النبكة !!! المسطول قام مشى لي فكي وقال ليهو ياخي انا داير لي محاية قوية جداً تطرد الباعوض نهائي من الاوضة ومن الحوش كمان ، الفكي اداهو محاية جديدة لنج طلع تركيبتا من الموبايل بتاعو واخد قروشو!!! المسطول رجع بيتو رشا الاوضة والحوش بالمحاية وقام كتب لاصحابو على الفيس بوك: يا جماعة أنا الليلة نايم في الحوش ، تصبحـو على خير!!!! قال ليك أول ما المسطول طلع سريرو في الحـوش ورقـد لقى 47 باعوضـة عاملة ليهو لايك !!!!! فيصل الدابي/المحامي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة