والله كويس يا د. بيان ياهو الفضل

Quote: يوم من الايام زماااااااااان قمت بالاجتهاد في بحث .. انفقت ساعات واستشارات وايام الى ان اكتمل.. سلمته قبل المواعيد بيومين.. اعطيت عليه درجة عالية.. اسعدتني جزاء لعمل بذل فيه زمن خرافي.. حضرت فرحة لجماعة من الزملاء رد احدهم بكل بساطة " بس عشان سمحة" مادت الدنيا تحت قدمي هذا الزميل لم يقرا ما كتبته مثل رجال البورد يحكمون عن غائب.. ذهبت الى نافورة في المعهد جسلت اقلب بصري في السماء وروحي تصرخ وتصرخ.. اتى هو مارا بالنافورة قال: نجاة محمود ازيك؟ انفجرت باكية.. بكل دهشة صرخ الى الى الى مالك؟ واردف بحركة مسرحية اشهد يا الله انا فقط قلت لها ازيك؟ وجلس قربي من جيب قميصه المتسخ دائما اخرج لدهشتي منديل نظيف وقال لي خذيه والله نضيف مغسل ومكوي اها قصتك شنو؟ حكيت له القصة هز راسه وقال لي تعرفي يا زولة اول مرة الاحظ انك سمحة.. لانه دائما بشوفك زولة ذكية جدا ودا الانطباع البتديني ليه. لكن لوبكيتي من جنس دا ياهو الطال بكاك وانا حاسي بيك قلت ليه كيف تحس بي هل انت امرأة وذاتك انت سكران طوالي قال لي ضاحكا" اها شوفتي السكران دا اصلو ما بيكضب انت زولة ذكية وفاهمة وعندك اهتمامات ما تشتغلي باي راجل يقوليك غير كدا.. سمحة شينة دا موضوع مختلف..من انك مرأة انصحك ما تشتغلي بزول اعملي العايزاه..ولازم كمان انت في عالم رجال تكوني قوية وما تنكسري..وما تبكي.. اتعلمي تردي في الساعة ما تلعقي جراحك بعيدا قاليك عشان سمحة تربيها معاه لسما شتمك تشتميه اتافه عليك تتافيه عليه بعداك اي زول بيمسك دربو.. ومشى خلاني اللهم ارحمه كان استاذ ا عظيما ومناصرا للمرأة ومن يومها صارت نصيحته حلقة في اضاني.. في هذا العالم الذكوري لا مكان للنساء الذكيات.. المنجزات