بيـان رقـم واحـد: كاركتير

Quote: الدكتورة المحترمة بيان خالص التحايا لشخصكم الكريم وبعد في مسيرة الاربعاء الفاشلة ذات المتين نفر نصحتينا يا دكتورة وقلتي الناس ح تموت فطيس ساكت وحكيتي قصة زوجة الشهيد التي عانت من الفاقة والفلس حتى الفواتير ما قدرت تدفعها المهم يا دكتورة كانت خلاصة كلامك إنو الكيزان بقو زي الرماد ( كان شلوهو ما بنشال وكان خلوهو سكن الدار ) ويا ريت لو وقفتي لحدي هنا وبس لكنك لفحتي توبك ولم تتركي بوست عن المسيرة إلا ودخلتيهو يا ناس بكتلوكن يا ناس بسوو ليكم يا ناس يا ناس ساعتها سألت نفسي يا ربي الدكتورة دي نعمل ليها شنو ? تعرفي أنا فكرت أحرش ليك صاحبي التكاسي ( هشام هباني ) أصلو داك طالع للربا والتلافي لكن رأفة بك عدلت عن هذه المغامرة ولكن بذل النصايح وتوزيعها بالمجاني كدا ليست حكرا عليك يا دكتوره فالدين النصيحة ولا أنا غلطان نصيحتي ليك يا دكتوره يا ريت لو تحصري نفسك في الصراع مع الخواض وجماعتو ونحن في الجبهة دي ما عندنا معاك مشكلة طبعا إنتي زولة عندها دكتوراة في النقد الأدبي وماجستير في تعليم اللغة العربية للأعاجم وعندك كمان كتاب تحت النشر ونتمنى له أن يصبح ( فوق النشر ) على كدا مؤهلاتك دي تخليك تتحدي الخواض وبشرى الفاضل وعجب الفيا وحسن موسى زاتو كمان عليه نرجو منك عدم إستحقارنا وتبخيس تطلعاتنا في أن نعيش في وطن ديمقراطي حر خالي من الكيزان والهوس الديني وحاجات كتيره إنتي عارفاها ونحن عارفنها عشان كدا بقول ليك موضوع القوات الأممية أطلعي منو لسببين الأول :في حالة المواجهة العسكرية طبعا سيسقط شهداء وكما حدث لزوجة الشهيد التي تعرفينها سيحدث لهن ذات الشي سيواجهن العسر في دفع فواتير العلاج وفواتير الكهرباء ومصاريف المدارس وإرتفاع الأسعار الخ والثاني :سيتضاعف عدد أعدائك في المنبر أضعافا وسينضم أعداء جدد من أبناء دارفور دا غير ناس خالد كودي وبشاشا وناس تانيين وختاما نتمنى لك التوفيق في حروبك الأدبية ونقول اللهم أحمي بيان من الحاسدين والمفترين والناس الما عندهم دكتوراة