زمان يا أخوانا كنت ظلامى (ضمه) ما يدخل رأسى كلام الناس المستنيرين حتى لو كان ذى العسل، أول ما أسمع لى مستنير بيتحدث طوالى أجهز نفسى عشان أقيف ضد كلامو داك وأطلعو ليه (فشوش) فى (فشوش)... مش سيدنا على (كرم الله وجهه) قال:- (الأنسأن عدو ما يجهل)؟؟ أها الحمد لله كت جاهل وأتحولت وأتبدلت وبقيت مستنير. هسه نقول لأخوانا الظلاميين (ديل) وأخواتنا الظلاميات (ديك) لما نقول ليكم (الشريعه) تب ما قصرت فى زمانا داك قبل 14 قرن وزياده وكانت عادله وحلت مشاكل الناس، منعت قتل (الموؤده) وأستعباد الأخرين وقننت موضوع (الرق) وسوتو كفاره من (الكفارات)، أها هسه نكون ظالمين لو حاولنا نطبقها فى زمانا ده زمن السفر بالبيوت والكلام بالخيوط، بدون تطوير يناسب حاجة الناس، والتطوير ده ما كلام وتنظير على طريقة (لقيط القطن) النلقاهو نافع تعمل بيهو والمابنفع نخليهو، المسأله ماها مزاج وشراب شاى فوق ضل العصر. صحى رجل مثل (الصادق المهدى) ده، كتر خيرو فيما يبذلو من جهد، ورغم أنه بيختلف عن نسيبو (الشيخ) (الدقسوه) حيرانو، لكن المسأله دائره شجاعه وده موضوع يمكن يكلف الزول (رقبتو) خصوصا ناس الأزهر والوهابيه ما بسكتو، وح يكفروا كل من يقول بيهو. المسأله عايزه تطوير للشريعه ديك وأجنهاد فيما فيه نص والعودة لى نصوص من القرآن كانت منسوخه، وهى أفضل وأنسب لعصرنا ده من النسختها والايات القرآنيه النزلت أول دى، ما نزلت عبث أو عشان نحفظها فى دولاب ونقفل عليها، وهى فى الأول والآخر كلها ما جايه من الله ، ولا موكدى؟؟ أها بغير كدى نكون كضابين أو منافقين نقول الشريعه صالحه لكل زمان ومكان، لكن نعمل بى غيرها، الشريعه الجد جد القديمه ديك ما فيها (مره) تمرق تمد رأسها للشارع لى تعليم ولا لى عمل، وما مسموح ليها تسافر براها دون محرم حتى كان للحج والعمره، وحتى كان كبيره ما فى زولا بعاين ليها خلك من السفر للندوات والمؤتمرات والقعاد فوق الفتادق السمحه، زمان الفقها قالوا (المره) عندها خرجتين من بيت أبوها لى بيت راجلها ومن بيت راجلها للقبر، غير كده تعتبر ناشز يدخلوها (بيت الطاعه) وداك بيت أخير منو (بيوت الأشباح) الله يسامحنا كنا عارفين دربها والبسوهو فى (المعارضين) مسلمين ومسيحيين وساكتين صامين خشمنها فاكرين أى عمل من أجل أنتصار الشريعه مباح ، حتى كان عذبو الناس وقتلوهم. هسه أنا ما فى شئ هدانى ورجعنى لى درب الحق الا بعد المصالحه مع (الأخو قرنق) وسماعى لى كلامو الحلو من أجل السودان كلو، زمان كنا بنقول عليهو (متمرد ، كافر، مسيحى، خارج)!! وما فى طريقه الزول يسمع لى كلامو الا بالدس. هو كان ده كلو فيهو كيفن يبقى نأئب رئيس فى بلد يطبق الشريعه؟؟؟ وهسه كمان شايف (نسوان الكويت) لبسن أزرق ودائرات حقوقن كامله، أها الرجال فى (برلمانهم) داك كان وقفوا مع الشريعه مافى طريقه يدوهن الحبه، لكن كان حكموا عقولهم ووقفوا مع الدين الأسلامى السمح ورجعوا لى قرآن مكه، قرآن الأصول يلقوا مخرج ويحلو المسأله بدون تدخل من (بوش) وغيرو. أصلو جاهز أى حته فيها ظلم يرسل رجالو، واصلو ربنا بينصر المظلومين بى ظالمين يسلطهم على من ظلمهم... (بس)، وفى أمانة الله ورعايتو أترككم واستودعكم.
(عدل بواسطة تاج السر حسن on 03-08-2005, 06:06 AM) (عدل بواسطة تاج السر حسن on 03-09-2005, 11:12 PM)
العنوان
الكاتب
Date
تخيلت نفسى ذلك الشيخ الذى يقدم برنامج (الدين النصيحه)، بعد تخليه (عن الظلام) .. يوم المرأه!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة