|
|
 Re: مظاهرات السودان: قصة نمارق ابنة مدينة الح� (Re: Yasir Elsharif)
|
من زاوية أخرى..
........
وانا بشرب في شاي الصباح قلت اخد لي جولة اخبارية سريعة..
على BBC العربية صادفت شاشة سوداء لبداية فلم وثائقي يبد انو عن الثورة..
على الشاشه السوداء اتكتب: ( بدأت ثورة السودان في ديسمبر/ كانون الاول، وكانت في البداية مكونة من ناس عاديون)..
عاديون !! ..
الحمد لله أخيرا قيض لي فلم افرز بيه الناس العاديون من الما عاديون ..
بقيت مركز على فرصتي التاريخية الاحتمال ما تتكرر تاني دي..
في اول لقطتين ظهرت بت دكتوره اسمها نمارق..
يا ربي نمارق دي عاديون ولا ما عاديون!!
اتضح انها دكتورة كانت مشاركة في الاعتصام وفي شغل الاطباء..
واتضح انها من عطبره وعشان تشارك في الثورة قالت لاهلها انها اشتغلت في عيادة جامعة الخرطوم..
واتضح انها تلفونها ابيض طويل وبتتكلم بال(چا) والحواجب وادائها التعبيري شاعري شويه شايل من القاء ريحة البن حبه ..
واتضح انها ابوها الله يديه العافية معارض قديم وصامد..
اثناء ال(اتضح) دي كانت لقطات الثورة والشاشات السوداء العليها كتابة سطرية واحده توضح خط سير الثورة، كانت بتظهر قصيرة وسريعة زي الشولة بين كل (اتضح) و (اتضح)..
ثم اتضح انها عندها صاحبة خدورية برعمة لطيفة وانفعالها صادق دمعت لما جات سيرة دارفور بطريقة مؤثرة، كانت بتتكلم بتعسيم كده بعرفوا زي جوع بطني، مكس كده بتاع معتادي الفكر والدورات التدريبية اللازم يكون فيها جندر جندر على الأقل..
يا ربي صاحبتها الخدورية دي عاديون ولا ما عاديون!!
ثم اتضح انو صاحبتها الرافقتها بعد داك في الكم لقطه الفضلو لحدي فض الاعتصام، اتضح انها بتعزف فلوت، ومشت معاها عطبرة لما جات توري ابوها وامها بالواضح وتقنعهم انها ماشة تشارك الثوار في القيادة، وعزفت لى ابوها فلوت آخر فايبريشن وحزن..
ثم اتضح من لقطة سبقت استئذانها ابوها وامها انو ابوها اصلا كان شايفها في كم لايفات وناقش الحاصل لكن بالرغم من كده كان اثناء ما بتوري فيه وشو واجم زي الما كان عارفها، وامها مبتسمه الا ضحكه وبتعاين ليها باعجاب أم شديد، فجأة قلبت جادة جدا ورافضة دت وقالت ايها نحن حريصين عليك وكده..
يا ربي ابوها وامها ديل عاديون ولا ما عاديون!!
اثناء ما سارح بفكر في منو العاديون والما عاديون لقيت د. نمارق قاعده هي وصاحبتها الخدورية في الواطه وبتكتب بى قلم شيني كبير على نص فرخ ورق: (حو رريييه سا لااااام عا داااااله)، الكلام ده شكلو في مدخل ممر في جامعة الخرطوم غالبا او مستشفى العيون لأنو في طوب انقليز ما غريب على، وكان في زي منور كده في المدخل قاعد فيه زول لابس جلابية وسديري وطاقية وشنبو مربى بإهمال وعينو محدره وخالف رجلو بطريقة ما تقدر تقول عليها فاضحه لأنو لابس سروال في شكل سربادوق ما بتفرزو من الجلابية الطبعا لا بيضا ولا مكوية..
يا ربي الزول القاعد في المنور ده عاديون ولا ما عاديون!!
ثم اتضح انو نمارق شالت نص فرخ الورق الكتبته ومشت وقفت بيه في نص حته ما مفهومة سوق ولا شارع ساي ولا زريبة حطب ولا شنو، غايتو كانت مليانه بى كم زول زي الكان قاعد خالف رجلو في المنور داك، على شفع على شباب صغار.. ديل كلهم كانو واقفين وراها -ما قنا- في شكل هلال، وواحد فيهم طالع في حاجه ما عرفتها شنو، كارو، لستك، في زول مديه شنكل ما مهم، المهمه نمارق.. كانت واقفه على غرار الوقفات الاحتجاجية وشغاله شغل توعي الكاميرا، ايوه الكاميرا لأنو الناس الواقفين وراها واضح انهم موعيين قبل كده بدليل انو كل عباره تقولها كانوا بهتفوا: (الله أكبر الله أكبر)، الما كانت واعية هي الكاميرا والحمد لله بعد الوقفة دي وعت..
يا ربي الكاميرا دي عاديون ولا ما عاديون!!
في لقطتين تلاته فاتوني لأنو مرتي اتكلمت زي 20 ثانية عن المكسرات الاكتشفتها في البسكويت لخمتني.. يبدو انو مرتي ما اتوعت مع الكاميرا الفاتت باهمية نمارق، بسمللاي اهمية الثورة..
يا ربي مرتي دي عاديون ولا ما عاديون!!
المهم بعد فقت من عشرينية مكسرات البسكويت جات لقطات من فض الاعتصام تورت الحزن، نور الله يغشى الشهداء جميعا، والدم قصادو الدم ما نقبل الدية والدم قصادو الدم ولو حتى مدنية، دي حاجه ما راحت ولا بتروح والمحاكمة والمخاسبة بدءا من تقويض النظام الدستوري 1989م ولحدي هسه والمستقبل لازم لازم تحصل والا حنستمر في مسلسل الجرائم الإنسانية والاقتصادية والسياسية والتخريب الوطني العبثي لى يوم الدين، لازم يعرف أي زول مسبقا انو ده ليه عواقب وخيمة تصل حد الإعدام..
الفلم الوثأئقي عن دكتورة نمارق، بسمللاي الثورة، انتهي وما شكلو جابو سيرة العاديون الكانت الثورة مكونة منهم في البداية قبل ما يظهروا الما عاديون.. لكن بالرغم من ده أنا ما طلعت من الفلم ساي، على الأقل عرفت انو نمارق (وصاحبتها إحتمال برضو) تبع الما عاديون لأنهم ظهروا مباشرة بعد ما عاديون كانون الأول الاولين وواصلو بلا انقطاع لحدي يوم المجزرة المشؤوم..
امشوا بلا عاديون بلا ما عاديون بلا ازياء بلا استعلاء بلا تمثيل شكسبيري معاكم.. ده ملمح من التناقض الاجتماعي الطبقي والفئوي الاساس البستغلوه الجنجكوزس والانقلابيين من قبلهم في السيطرة على ثروة وسلطة البلد !!
حتظل السيطرة دي قائمة ما قام الاستعلاء، وما دام الجهل بالتناقضات وإدارتها بصورة تقودنا باتجاه المستقبل..
ويبقى السؤال الأهم بالنسبة لي في اللحظة دي: (يا ربي أنا عاديون ولا ما عاديون!!).
دكتور/ أسيل الأمين
|
|
  
|
|
|
|
|
| العنوان |
الكاتب |
Date |
 مظاهرات السودان: قصة نمارق ابنة مدينة الحديد والنار.. فيديو BBC | Yasir Elsharif | 07-12-19, 07:17 AM |
| Re: مظاهرات السودان: قصة نمارق ابنة مدينة الح� | Yasir Elsharif | 07-12-19, 07:52 AM |
| Re: مظاهرات السودان: قصة نمارق ابنة مدينة الح� | Yasir Elsharif | 07-12-19, 11:53 AM |
| Re: مظاهرات السودان: قصة نمارق ابنة مدينة الح� | Yasir Elsharif | 07-12-19, 12:42 PM |
| Re: مظاهرات السودان: قصة نمارق ابنة مدينة الح� | ombadda | 07-12-19, 12:44 PM |
| Re: مظاهرات السودان: قصة نمارق ابنة مدينة الح� | AMNA MUKHTAR | 07-15-19, 10:24 AM |
| Re: مظاهرات السودان: قصة نمارق ابنة مدينة الح� | Yasir Elsharif | 07-15-19, 12:37 PM |
| Re: مظاهرات السودان: قصة نمارق ابنة مدينة الح� | AMNA MUKHTAR | 07-15-19, 01:57 PM |
| Re: مظاهرات السودان: قصة نمارق ابنة مدينة الح� | Yasir Elsharif | 07-15-19, 04:16 PM |
| Re: مظاهرات السودان: قصة نمارق ابنة مدينة الح� | مدثر صديق | 07-17-19, 12:16 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
AMNA MUKHTAR
فيس بوك
تويتر
انستقرام
يوتيوب
بنتيريست