"الجيش جيش السودان .. االجيش ما جيش كيزان" .. او أي سلطان .. والا ياهو السلطان يا جماعه؟!
من الاسئله البتلح كل ما يرتكب الجيش السوداني فظائع في اهل البلد انو ده جيش شنو بالظبط!!
رجعت لنشره قديمه من سلسله الدراسات الافريقية والاسيوية عن اصل ودور قوات دفاع السودان كما صنعها الاستعمار .. غطى د. أحمد العوض محمد في المقدمة البدايات في زمن محمد علي 1821 مرورا بالخديوي في 1880 والمشاركه في قمع الثورة المهدية .. وركز الكاتب في الفصول على فترة الحكم الثنائي مرورا بثورة 1924 حتي الاستقلال .. حقيقي مرجع مفيد لفهم العلاقه مع مصر و تركيبة الجيش والتيارات الفكريه الفيهو والادوار اللعبها (داخليا وخارجيا) وعملية السودنه بعد الحرب العالمية التانيه ..
فيا شباب طلعت بالملخص ده بهدف النقاش والاستفاده من معلوماتكم/ن والتحليلات الممكن تساعدنا في السؤال الفوق:
الفكره الاساسيه الاتكون بيها الجيش السوداني هي حماية المستعمر من الثورات الداخليه ومن اي تهديد لحدود مستعمراته ولتحقيق طموحات التمدد الاستعماري، مثلا:
― غاية محمد علي من تكوين اول جيش حديث في السودان كانت الاستقلال من الإمبراطورية العثمانيه وإنشاء إمبراطورية مصريه ― استخدام الجنود السودانيين كمرتزقه في 1863 لصالح ماكسيميلان (حليف نابليون) في المكسيك واثناء الحرب العالميه الاولي في شرق افريقيا وفلسطين ― ثلث القوات التي حاربت الخليفه كانت من الفرق السودانيه الكونتها الحكومه البريطانيه بين 1882 – 1889 وحارب كل الثورات القامت في العشرين سنه الأولى من الحكم الثنائي ومن اكبر انتصاراتهم في الفترة ديك كانت ضم دارفور تحت التاج البريطاني ― حجم الجيش و التدريب مربوط باحتياجات الامبراطوريه في فرض السلطه داخليا (مثلا هدف عملية السودنه الاولي لتبديل المصريين كان تقليص تاثير الأفكار الوطنيه على الضباط السودانيين وتزامن مع قفل المدرسة الحربيه بعد 1924) وطبعا خارجيا (مثلا التوسع في 1938 للحوجه لقوات تعمل في جبهة الشرق في مواجهة التهديد الإيطالي واغلقت المدرسه بنهاية الحرب العالمية التانيه) ― من اكبر المحن الواجهت السودانيين بعد ابعاد المصريين عند تكوين قوات دفاع السودان كان تبديل الولاء من خديوي مصر لملك بريطانيا (التعملو كريت تلقاهو في جلدها)
هل تغيرت فكره الجيش للوجود بعد الاستقلال؟
سياسات التجنيد استندت على خلق عدم توازن إثني بالتركيز على المناطق النائيه و الأقليات القبليه المعزوله (حتي لا يترددوا في قمع الانتفاضات الشعبيه المحليه) ونوعية المجند اعتمدت على وضع المنطقه الفيها القوه العسكريه (درجة التعليم):
― في الشرق كان التركيز على قبائل البني عامر والفور والبرقو بفكره انهم مزارعين وما عندهم علاقات مع المجموعات الأخرى الموجوده في المنطقه ― القوات الهندسيه كانت من نصيب الشمال لحوجه المجال لدرجه اعلى من التعليم واختاروا القبائل "المحاربه" حسب تقديرهم بالتحديد الشايقيه ― في الوسط قوات الجمال تكونت من النوبه والشايقيه مع ممارسة سياسة المناطق المقفوله لمنع الاختلاط بينهم ― في الغرب تجنب الانجليز القبائل المعروفه بميولهم للمهديه مثلا بني هلبه وبعد 1924 تعمدو تقليل اعداد الجُندوا "بالغلط" ― تكرر المشهد في الجنوب بتجنب التجنيد من اكبر القبائل في المنطقه، الدينكا والنوير وبعد 1924 تركز التجنيد من الاسر المعروفه بولائها للانجليز ― من البدايه كان في تكوين الجيش فكره وجود قوات محدوده نظاميه وأخرى اكبر غير نظاميه، من الأسباب كانت تقليل التكلفه نسبه لامتيازات الفرد النظامي وبرضه لحفظ مستوى القوات لتكون ابعد من جيش واقرب لشرطه، وبعد 1924 أضيفت للأسباب ابعاد العناصر الشاركت في الثورة ― تمركزت القوات النظاميه على الخط النيلي وتوزعت الغير نظاميه في مناطق الشرق والغرب
هل تغيرت سياسه التجنيد وتركيبه الجيش؟ مش القبائل والمناطق لكن الفكره والفهم الورا السياسه!
من ملاحظات الكاتب عن اثر حياة الجيش على طريقة الجياشه في التعاطي مع السياسه انو لمن يكونوا في السلطه جل اهتمامهم يكون على الأوامر مش الحوار وبحرفية القانون بدل الدعم الشعبي
― عزل الجياشه من المدنيين ساعد على انتاج فروقات قيميه واخلاقيه بين المجموعتين وبالتالي المنظور في التعاطي مع الأمور .. يعني بيقدروا يقولوا للسلطه (ثوره نقمعها ليك .. اعتصام نفضو ليك) ― خلق العزل و الامتيازات المختلفه بين الضباط والعساكر تراتبيه طبقيه وسلطويه من مظاهره التناقض البيعيشه من هم في اسفل السلم بين الأوامر والطاعه مع خلفيتهم ووضعهم الاجتماعي
كيف هسي؟ لسه في اختلاف في القيم بين العسكر والمدنيين وفي حته التناقض العاشه العسكر التعبان؟
بالنسبه للادوار، بشكل عام تمحور دور القوات الانجليزيه في حمايه انفسهم والحد من التمرد داخل القوات السودانيه ومساعدتها في دورها الأساسي (ان دعت الحاجه الملحه) في قمع الشعب
― عتاد و تدريب القوات السودانيه كان هدفه الأساسي انتاج شرطه مسلحه تقيل اكتر من جيش بالمفهوم السائد وكده كانت ملائمه لدورها الرئيس (امن داخلي) وحجم القوات ظلت صغيره حتي 1937 (لمن احتاجوا لجبهه قويه في الشرق) ― لا علاقه لقوات دفاع السوداني بالإستخبارات العسكريه ومخزن المعلومات والتحليلات وإنتاج الخرط وكان دورهم المعلوماتي محصور في مد الانجليز بالحاصل على الصعيدين السياسي والقبلي ― سياسه القمع تمثلت في الحسم الكامل لاي زول يرفع راسه ولو تعددت الأسباب. ذكر الكاتب امثله مجازر في 1926 في جبل جلود وتيمين (لمقتل المك الموالي للانجليز) وبين 1927 – 1928 في مناطق النوير ( مره لمقتل الحاكم الإنجليزي لشرق بحر الغزال واخرين ومره تانيه لحسم مقاومه واحد من شيخ كجور تمرد على السلطه بوسائل سلمية ― اهميه موقع السودان بالنسبه للحد من التمدد الإيطالي حدد خطه تمركز القوات في الخرطوم، عطبرة وبورتسودان وربط اتصالاتها بالقاهره ونيروبي
هل تبدلت المواقع وثبتت الأدوار؟
بعد الحرب العالمية التانيه ومشاركات القوات السودانيه خارج وعلى حدود السودان ، اعادهم الانجليز لدورهم الاصلي لحفظ الامن الداخلي وقَلص حجم القوات لاقل من 10 الف في 1947 ولي اقل من 5 الف في 1954 مع نمو الحس الوطني في البلد
― ما اتغيرت المناهج كتير عند إعادة افتتاح الكليه الحربيه في 1948 من لمن كانت مدرسه حربيه في 1935 ― بداية السودنه كانت بتعيين الاميرلاي المقبول في 1954 بعد الاتفاق السياسي في 1953 ― في فتره وجيزه تم تصعيد وتدريب سريع لملئ الرتب العليا وزياده حجم القوات لحوالي 7 الاف في 1955 ― من الوظائف الصعبت سودنتها سريع كانت فنيي الراديو في سلاح الاشاره
ما هو انتاج الجيش من مؤسساته الصناعيه والجامعيه وجل الدخل القومي؟
حسب د. أحمد، افرزت المنظومه العسكريه الخلفها الانجليز تيارات فكريه مختلفه اثرت في تطور الجيش بعد الاستقلال
― التيار التقليدي ممثل في الفضلو من الأجيال الأولي في القوات الكانت جزء من الجيش المصري و، مثل الجيل ده الجنرال عبود (خريج 1918) وعبد الله خليل (1910) – اول رئيس وزراء . الفضلو لانو في الفتره 1924 - 1935 ادار الانجليز القوات السودانيه بمساعده عدد بسيط من الضباط الموالين للنظام كان من مميزاتهم انهم مختلفين في البنيه الفكريه من ثوار 1924، تربيه خواجات وما مهتمين بلعب دور سياسي ― تيار الضباط الاحرار في أوساط الضباط الصغار المرتبط بعبد الناصر ، هنا خوف التقليديين منهم جاب لينا الانقلاب الأول في 1958 ― زي ما عارفين بدا الفريق عبود عهده بوقف النشاط السياسي وحل الأحزاب والرجوع للسياسه الانجليزيه في الاستعانه بالتيار المحافظ في المجتمع من زعامات قبليه وادارات محليه. دور تنظيم الضباط الاحرار كان ليهو دور في انحياز الجيش في ثورة 1964 ― ذكر د. أحمد تيار تالت (الثوري) بدا مع استيعاب خريجي الثانويات في التدريب للعسكريه بعد 1948، جزء جاء بافكار وميول وخبره سياسيه من العمل الطلابي وجزء اقرب للاحرار ومتاثر بانقلاب عبد الناصر في 1952 ― ختم الدكتور كتابه بنقاط مهمه كتيره لكن أهمها في رايي:
الصناعه الاستعماريه للجيش (كمسيطر على ومنتج للعنف) ابعدو عن مركز الحركه الوطنيه وربطوا تماما بالسلطه
سياسات التجنيد (قبايل، اسر، طبقه اجتماعيه، مدى الاهتمام بالسياسه) وارتباط الجيش الشديد بالعمليه السياسيه في المستعمرات عموما خلف في دولنا تركيبه جيوش اثرت على الحال بعد الاستقلال (ولليله بالعايشنو في السودان وكمان بعد التركيبه الخلفها استعمار الإنقاذ).
في ختام البوست ومعليش لطوله، اهو حنسأل والا السؤال ممنوع: متين يلتفت جيشنا للادوار المعروفه للجيوش؟ ماهي الحوجه حاليا لاستيعاب عناصر غير نظاميه وتقنينها بحرفيه القوانين؟ هل يعيد النظر في مناهجه البتخليهو ينتج أفكار زي قصف قرى وقتل مواطنين وفض إعتصام ؟ والاهم من ده كله متين حيحدد ولائه؟
تفكيك الاستعمار مطلوب في كل المؤسسات القوميه خصوصا انو عمليات السودنه كانت شكليه .. لكن الخلل البنيوي في المنظومه العسكريه طبيعي يكون من اخطرها لانها مؤسسه عندها سلاح وناس متدربين على التصويب على الداخل والوطني (طبعا من غير تعميم) .. فمن مميزات الدوله المدنيه انو البحوث زي حقت د. أحمد حتلقى اهتمام من مؤسسات الدوله وتساهم نتائجها في تغيير السياسات وإصلاح الخطأ والتطوير المستمر في المؤسسات .. برضه كلام عجيب زي حق جنرال المجلس الإنقلابي القال قاطع النت عشان "اشاعاتنا" ما بيحصل .. إنقلاب قال!
ما اظننا محتاجين ننقل اشاعات لانو شفنا بعيونا العملتوهو في جنوب السودان وفي ودارفور وجبال النوبه والنيل الأزرق ومن مشاركاتكم الخارجيه في اليمن .. ده اسمه ولاء بره الشبكه القوميه!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست