|
Re: يوم المرأة العالمى ** والحبوبا هى الركازه.. (Re: bayan)
|
الاستاذ على الحلاوي
خاطرة
يمـّــة الســــرّة
أعاين فى عسـل عينيك أشـوف الدنيـا مـخضرّة وليدات يجرو .. يتراصو بحـداك بنيات يتدافرو .. كايسين رضـاك و إنتى باشّـة .. فى وجيهاتهم زى ملاك يصيحو بصوت مليان حـنان يا يمـّــة .. يا الســرّة ... تمسكيـهـم .. تحـضنيهـم .. تلـولـيهـم .. و توانسـيهم .. تعـالى .. إنتى وين أمـك فـاتت تعـوس كســرة و يـن أبـوك يـا جـنى ما عاد لى الليلة من بـرّة تســأليهم .. يمـّــة الســرّة كيف أمسـو أهلك الجـيران و الضيوف الـجوّة فى الديوان كيـف عشوهم إنتو يا حـبّان و حكـاويك .. ديما ما بتكمل بيها عاداتنا و تقاليدنا السمحة فيـهــم بتتأصــل ينومو فى حضنك الأطفال ما كليتى فرد يوم مـن كــتـرة الأحـمــال و لا شكيتى لى أمـّـو محـيمحيد .. الفى هدمك بال وســمحــة فيكى ... يا يمـّـة طـولــة البـال
* --- * --- * *-- * --- * * --- * * أعاين فى عســل عينيك أقــرأ الألم و الحـســــرة وحيـدة هناك وراء الدويوان تصـوطيلك فى مـوص كسـرة ما عــاد وليداتــك ... الليلة ينضمّـوا لى صـدرك و ما جنـك بنيـاتك ... يسـألو كـيف يكون أمرك من ما الشمـش وراء التريعة تضارى تشوفيهم يمـّــة ... ديلك الشفع .. لبيت الزينة تتجارى وليدهم جاهم من الغربة جابلهم كهـربة و تلفزيون يجيب الصورة بى كذا لون عشان و ليداتهم تتعلم و تتربى ما تـضيع ليـلها فى ســربة
* --- * --- * *-- * --- * * --- * * كيف يجو الجنوى يسمعو يمـّـة السـرّة شـــن بتـقـول فاطمة السمحة ما ماتت كمان خـليلهـا الغول و تمسـاحك داك .. يا يمـّـة ماعاد شــليل يكفيهـو أكـل بقيراتنا .. و غنيماتنا مخـزنا و الفـيـهــو و شقانا الفى الأرض غرسـناهو تـراك ياهــو راجـيهـو تـراك ياهــو راجـيهـو
|
|
|
|
|
|
|
|
|