|
|
 Re: صالون الابداع بهيئة شؤون الانصار .... كلمة الاميرة ايمان الخواض (Re: عمر عبد الله فضل المولى)
|
بسم الله الرحمن الرحيم
مذكرة سعيد البوم
في كون (أم در) ليست (ود حامد) (1)
تعال يا حبيبنا يللاك قوم
نلف بقعتنا لي الخرطوم
وفي المقرن نقيف ونشهــّــد النيل الشهودو حتوم
سقيناه من وريدنا الغالي من أجسادنا صار مردوم
شهد ست البنات أم سيف
وشهد الققرة شهقت كيف
وناس الققرة دقوا القيف
وفي هدامه غرقو عموم
نشهدو عاد.. يشوفو خطاب سعيد البوم
ويضحك في زمن مأزوم
مذكرة قال.. عشا البايتات بداها اليوم
مسطرة بي قلم متروم
كلام اعرج، لسان مقروم
وفي النية التسوق الضر تقودها سموم
تقول نتصدى للانقاذ وفيها تعوم
تقول نصلح مشينا الشاذ وفي السيات تخوض من ساسا للقدوم
مذكرة من بنات افكار ابو العفين
وِحِل في زرة واتمحن: مذكرة كم مذكرة كيف مذكرة وين!
نتر نهزر جريواتو الكتار لابدين:
تكيفريينكم فضحونا ما نصبوه كمينا زين
عقب ودونا في واديا بعيد لخونا فيه بالطين
فلت زولكم، عرف في اللفة من قولكم
وليه الوطني عايم يومي في ضجة ونباح وأنين؟
اردموا الأمة بي واحدة اتخليهم قبل دايشين
يلفوا الحبل في النابل.. يخلطوا القمرة باب قرشين
يزغللوا عين، ويدقسوا دقسة ما ضاقوها في البرين ولا البحرين
على أمرو استجدوا طريق مغتغت بي تبن خادع
وجرجروا فيه من كل لون، غشيم.. ومغفلا نافع
بدور يجتث لي التمكين، ويسلم دقنو لي نافع
يمش في طريق يقع في غريق..ولي مذكرتو سار رافع
عجب..يا نيل
وتعرف.. وانت فينا جليل
سقانا المولى من دنك
طهارة يد.. ومن فنك
نشيد نشابو شال منك
بسالة مثيلا عاد معدوم
بهرنا عدونا شان ساخين عمرنا مسوم
وفي مبدانا نتسبل نقع بالكوم
وبالشلكاية نضرب صرة المكسيم
حزم بولادا يتمنّع على التقسيم
بتشهد لينا حرب النهر
وتشهد لينا وقفة حر
وتشهد لينا جوهر در
وتشهد بي نضالنا ولوف
وتشهد بي نضافة الجوف
وتشهد بي نضمنا جروف
على الباطل يكون محذوف
وتشهد نورنا بق حروف
وتشهد لي زمن منتوف
وتشهد.. بالصدق معروف:
عجيبة فعال سعيد البوم
صبح في يوم وقال الليلة هو الحداث
سمى المولى واتحمدل وفورا داس:
طعام واحد كفانا خلاص
عدس بندور.. نريد بصلا مكشن خاص
خلاص، اتدلى يا ابو سلوم
كفانا المن والسلوى بندور التوم
وهرّ معاه الف موهوم، وفاه معدوم
أريتك يا حبيب الناس، إذا أحسنت لي جرقاس
صحي البرميل اذا فضوه صاح تم تم
صحي الفيه البخور بنشم
صحي التبع الهوام في جحرهن بنرم
صحي اليختا الصراط لجلج لحن قوله ويحق الذم
وتشهد لينا.. يا نيلا سقيناه وسقانا النم
سعيد البوم كلامه الفوق هو ما المعلوم
بدورلو غريض.. وغرضه انشا الله ما متموم
وناس الأمة فاهمين دور سعيد البوم
وباكر يشرب ام دلدوم
يعضي صباعه غيظ.. يحرق في نار الشوم
نار اب زينب الموقودة في الوعد القبيل مجزوم
ربنا قادها في وش العدو الراصد حداها يحوم
فراشو الخاتي كل ما يقربا يولّع يقع مفحوم
وامر المهدي يفشا يزيد ألق ويدوم
وعد.. يا ناس سعيد البوم
وباكر بينا.. بل توا يبيــّـن قول ابو ام كلثوم
يعود نافع كسير مألوم، يخيب فال ناس سعيد البوم
وياخدو دروس.. مسطرة في البوادي الصم
قبيل الفاتو في درب البويم من جم
وآخرتا.. يا طوير الشوم تكون فوق كم؟
يساءلوا الجرب إن فالح بقول حرّم
أمور (ود حامد) (1) التغبانا نحن لزم
انحنا القبة والطابية وحداة القوم
ونحن السطروا السودان نشيد ودموم
ونحن الشدنا ساس العز ولي بوابتو حراسا الختاهم نوم
ونحن الراتب الطهّر علوق الدنيا من جوفنا
ونحن الما تبعنا كذوب ولا بستنى في طوفنا
ونحن الحارة صاحبتنا وعديم خوفنا
ونحن الفي الجمر سايرين وعاقدين ديمة لطروفنا
ونحن الفي العدم باينين وإذا غيثنا انهمر شوفنا
ونحن ركابنا في الله.. نذرنا الروح ما نتدلى
حملنا الراية في الجلة
وجهادنا المدني لي الله
ولي وطنا حبيب ما بنرضى ينذلّ
وطينا الجمرة فوق الدبرة ما اتوحوحنا، ما اتزحزحنا، ما اترحرحنا
قاصدين ميسنا ما همانا قرّب.. طال
دربنا نقصو.. ما همانا هما كال
وما بنشرب نهر نافع مع الجهال
وما بننترّ من الصادق اصلو محال
وباكر ننسج الضي الخيوتو تقال
وتحكي الدنيا حكواتنا، ويروح زبد الخموم ولموم
وينسوا الناس.. سعيد البوم
(1) قرية ود حامد المذكورة في روايات المرحوم الطيب صالح، والإشارة إلى رواية بندر شاه التي فيها أفلح سعيد البوم بمقدراته المتواضعة عبر طرق ملتوية أن يزيح الزعيم المجرب والرصين محجوب
|
|
 
|
|
|
|
|
| |
عمر عبد الله فضل المولى
فيس بوك
تويتر
انستقرام
يوتيوب
بنتيريست