تأسيسُ الكوشرثيا: الأمثالُ السِّرْيَّة "2"

Quote: القدامك دا نقل وتدوين لحجا وأمثال وقصص ومقالات الناس، ما كلامي أنا ذاتو، كلامي هو المصطلح والمسارات دي ذاتها للجمع والقرايات لبعض ما جمعته، لو شايف إنو السودانوية عملت كدا، جيب وورينا، ما يبقى انفشاشة ساكت وسَداد كما يتلفّق ويُنْجَر. إنت قايل ناس زين العابدين ديل، كانوا فاضين من التنظير –الهواوي- عن الهُويّة، عشان يعرفوا الثقافة السودانية دي ذاتها، في تولاها قالت شنو، وألا "بؤرتها" الإنسانية دي شنو؟ الثقافة لها "بؤرة" ولا جنس إثني بمعنى مُنْطَلَقي بَدْئي لها، في رؤيتي، فجنسها البَّدئي هو الإنسان شمولاً، وفقط، وتنوعها هذا هو أنماط تفكير إنساني وخبراتي وجغرافي لا أكثر. ما أُسمّيه بـ"الآصاص التفاعلية" للثقافة، وهي نقيضٌ لـ"الآصاص الجذرية" الإثنوغرافية للثقافة، لأنَّ جذرها هو الإنسان في شموليته. وقلت في بوست الليركس، إنَّو الهوية إيشو "وجودي" لا "إنساني" من ناحية السياسة، أمَّا من ناحية العلوم والفلسفة فهل، في أنثى وألا جناياً ليها ماشين يعرِّفوا الإنسان أيَّاً يكن، بأكتر من الكائن القدامنا دا!؟ والياهو ذاتو كان أحمر وألا أصفر وألا أسود أو بنفسجي، وكان بنضم عربي وألا دينكاوي وألا هولندي، وألا لاوندي، وإن بقى يهودي وألا مسلم وألا كافر، الساكن في أوستراليا وألا آسيا وألا إفريقيا.. إلخ (وكلّ الكلام الببره دا)، ياهو الإنسان، وهُويته المعرفية وفي كتب العلوم و(الكلام البي جُوَّه) حيث الكبد هي الكبد، والدماغ هو الدماغ، والقلب هو القلب، وتكتلو الطلقة وتأتي به الولادة، ياهو الإنسان. هُويته الصغرى، أو السياسية، يعني بتاعة الانتماء، بذلك تصبح إيشو "وجودي" وليس "إنساني"، وهي بذلك تقع ضمن حقوق التعبير البتخصّو وتريحو عن نفسه اللهي (بالأصل) إنسان زيو وزي غيرو، إن شاء الله يقول هُويتي أنتمي لأم غيردون، مخيّر. كل المطلوب منو ما يلخبط لينا الدستور العلماني دا، ويحترم ما يجاوره من هويات اختارها آخرون أو ناسبتهم، فالإنسانية، أو الهُوية الحاسمة، جَبر قسري، ولكن الهُويّة الصغرى، السياسية، اختيار. فالهُويّة هذه، أنا عندي اتحسمت مع براهين داروين ومنذ أقاصيص آدم وحواء، وكلنا هُويتنا المنتهى هي إنسان، وقلت عن الهُوية الصغرى، بتاعة السياسة والانتماء هذه، بالحرف، لا تختلف عن مسألة تفضيلي للحقيبة أو أغاني مصطفى سيد أحمد. والسوداني الشايف روحو الماني ذاتو ما في زولاً ساعلو، بس ما يقل أدبه في الدولة العلمانية من المنطلق دا، وما ح يجي يوم أكتب عن الهوية سطر أكتر أو أقل. إلا كان يجي علم تاني يثبت لينا إنو في ناس جدهم آدم، وآخرون أولاد الله. فاختراع نحن أولاد الله دا، قايلنوا هين وألا أسطوري ساكت، دا اختراع فلسفي ابن فتلة لتأسيس هوية مختلفة لجماعة ما، عن أصل هوية الإنسان الواحدة هذه، التي تؤدي إلى مسألة العدالة والمساواة الواحدة برضو. اختراع نحن أولاد الله، الذي ذكر في القرآن وباقي الكتب الدينية التي سبقته، اختراع لتزوير الهوية إثنياً، من قبل النصارى واليهود. زيو وزي اختراع نحن خير أمة أخرجت للناس لتزوير الهوية ثقافيا، من قبل المسلمين. دي جنس السواطة الغرقانة فيها السودانوية لقنقونها! داير إنت بس عشان اتأخروا في الرد عليك تكبها لي فوق ضهري وتمشي تنوم!؟ عفيت منّك والله! إنت يعني قايلني مهموم خالص من حكاية اللطش، أبداً وحاتك، ياهو قدر قدرتك في ترتيب أبواب الأمور "البتفاجئ" كما قلت، نسوي شنو!؟ ختامه، الهُويّة "إنسان" ورضي الله عن داروين والأديان كذلك، إذ توافقه عبر قصة آدم وحواء. دايرين استقرار من جميعه، أعملوا دولة علمانية وانتهى الكلام. والعندو مُروّة بدل يهدرها في نقاش الهُوية الهي إنسان وما ح يطلع ليها ابتكار غير إنسان، مُرُّوتو دي اللي يشتغل بيها على تلقيط وقراءة الثقافات السودانية المشتتة دي، ويردمها في "مكتبة وطنية"، وفي المنتهى اسمها ثقافة إنسانية، و"آصاص تفاعلية" لبؤرة الكوشرثيا من الثقافة الإنسانية جمعاء، وما اسمها هُوية ليكم. هويتكم هي الإنسان، ولو صادف جاكم زول من البرازيل وألا السويد وأكل كسرة وملاح معاكم لخمس سنوات أو ما يتفق عليه، يبقى سوداني زيو زيكم مش لو عيونه خضر وشعره أشهب، والثقافة دي، المردومة في المكتبة الوطنية، تمثله زي ما بتمثلكم، لأنها ثقافة الإنسان. الكلام دا مكتوب هنا برضو بالهينو والبطَّاح الكبير، هل قرأتَه أو صادفَك؟ عشان تااني تجي تسألني عن القشرانوية بتاعتك دي!؟