|
|
 Re: طلعت القمرة - مسلسل أون لاين (Re: Bushra Elfadil)
|
B] الحلقة الثلاثون الأخيرة[/B
البحث عن طه ، المشهد 49
داخلي/ليل
( الزوجان ياسر وبدور يعزمان الدكتور أروب و الدكتورة داليا(الزوجين الحديثين ) والمهندس عاصم والأستاذة هناء (الزوجين) في بيتهم بالصحافة على العشاء . بدور تنشغل في إعداد العشاء وتدخل هناء وداليا لمساعدتها )
تخرج بدور لتسلم على القادمين وتسلم داليا على ياسر ويعدن ثلاثتهن للمطبخ)
هناء : الشباب ديل عاملين فيها أجيال جديدة ساكت في الهوا مما نجيب حكاية المطبخ دي تسمع كلمات الانثوية تتطاير من فمهم.
بدور : ياسر بقول شنو؟ ما تخليك فيمينيست للحد دا يا بدور داليا: اليومين ديل بينظروا عن الجندر .
(بالخارج)
ياسر : إزيك يا دكتور اروب . طولنا ما شفناكم .
أروب : إزيك يا ياسر. كيف عاملين كويسين؟
ياسر : الله يخليك.( يلتفت لعاصم ) كيفك يا باشمهندس
عاصم : أهو غايتو الدنيا دوارة .لكن البلد حالتا صعبة.
ياسر : انا في الحقيقة جمعتكم الليلة قلت تساعدونا أنا وبدور . بدور عندها حبوبة مش مباشرة لكن حبوبة باللفة. اسمها عاشة عندها ولد كبير
عاصم : طه ؟
ياسر : ايوة طه يمكن إنت بدور كلمتك عنو .
عاصم : ابدأً كلمتني هناء من أيام الجامعة . لي اسه ما لموا فيهو ؟
أروب : راح ؟
ياسر : مخاطبا اروب .أيوة خرج ولم يعد .خرج ولم يعد حتى الآن .يمكن أسة راحت لي سبعة سنوات .كلمناكم عنو وكت يا أروب كنتو في القاهرة الولد من عمرو 17 سنة راح ما اتلقى ليهو أثر .بدور ما خلت الإذاعة ولا الجرايد .شباب حيهم في الصحافة هنا ما قصروا.أولاد مربع خمستاشر وعشرين والمربعات التانية الجنب بيت ناس بدور وزعوا صوروا في كل احياء الخرطوم وبعضهم وصل الصور لمدني وبورسودان. الخلاني أطلب منكم الكلام دا إنو في واحد في جنوبي يا أروب ساكن الكلاكلة قال شاف الولد دا من صغير في سوق كانجو كانجو في جوبا بيبيع سجاير .
الكلام اكدوا عسكري في المدفعية في أم درمان يا عاصم .العسكري حتى قال إنو شافو قريب سنة ستة وتسعين القريبة دي. وقال إنو اتكلم معاهو وقال عرف إنو اسمو طه محمد أحمد.
عاصم : لكن انتو ولدكم اسمو كدا؟
ياسر : ولدنا اسمو طه محمد خير لكن دا ما اشكال ما ممكن يكون غير اسمو.
(تدخل بدور وداليا وهناء ويطلبن من أزواجهن المساعدة في حمل صينية الأكل لوضعها على تربيزة السفرة )
بدور : خلاص جا دوركم يا شباب التحلل الأصغر.
داليا: التحلل من الإلتزامات النظرية .
هناء : عاصم بقول ايه: المراة صنو الرجل وهو شريكها في كل شيء.
( يعدون المائدة ويقبلون على الطعام مع القفشات)
اروب : الله يا بدور على السمك البلطي دا.السمك دا خلي بالك جيناتي بتناديني ليهو.
عاصم : إنتو في الحقيقة يا أروب اهلكم ما ناس سمك. سمك وفواكه بالله لو الجنوب فيهو تنمية مع أنواع الغذاء دا والجو دا ما كان بقى جنة السودان؟
أروب : جنة السودان وين مع الدودة الغينية :
ياسر : وذبابة التسي تسي دي خلي بالك أفظع من ملاريتنا في الجزيرة
هناء : وما تنسى البلهارسيا في الجزيرة يا ياسر
أروب : والسل في الشرق . الملاريا دي خلي بالكم هي البتوحد السودانيين مش الدين ولا اللغة . الملاريا في الغرب من الجنينة لي ######س لي الفاشر لي نيالا لي زالنجي وفي نرتتي وقلول ومرتجلو وكل مناطق جبل مرة السياحية ذاتها.
عاصم: الملاريا ما هدي في أم درمان والخرطوم وبحري .الملاريا بالضبط هي البتوحد السودانيين والغريبة لو قطعت البحر دا ومشيت السعودية تلقى ما في ملاريا .آي هناك في بعوضة لكن مافي ملاريا.في واحد جارنا شغال في جنوب المملكة في مستشفى قال في الجنوب الملاريا موجودة لكن حالات فردية .
هناء : مصر دي ما عاجباك هناك الملاريا مافي .أسه لو في ملاريا زي حقتنا دي ما كان مدينة هائلة زي القاهرة دي جاها بلاء
بدور : ملاريا، في الشمالية ؛ ملاريا في الشرق ، اقول ليكم شنقلو طوبايا تلقو تحتها ملاريايا
أروب : ملاريايا ولا خيارررررارايا؟(محاكياً عادل إمام) (يضحكون)
(قطع)
البحث عن طه ، مشهد 50
خارجي /صباح
(اروب من المستشفى حيث يعمل يتصل ببدور المحامية حيث تعمل )
اروب : صباح الخير يا بدر السما في صفاك
بدور : أهلاً صباح الخير يا آر . شنو الطلة الصباحية دي ؟
أروب: جايي أبشرك قريبك دا يمكن لمينا فيهو
بدور : (تصرخ) يا الله يا الله دا خبر مفرح شديد بالجد؟ كدي اقيف. اقيف النمشي انادي ليك ياسر.
أروب : كدي اقيفي إنتي استني شوية .عندي صاحبي شغال في جامعة جوبا قال الشبه كبير بين الزول الفي الصورة والزول الفي سوق في جوبا. افتكر نحن يا بدور قبل ما نذيع الخبر احسن نتلاقى اناوداليا وإنتي ا وياسر ونفكر نعمل شنو.
بدور : خلاص تعالوا الليلة اتغدوا معانا.
اروب : هي شغلة هي ؟ الإسبوع الفات ما اتعشينا معاكم عشا وأسه غدا؟ تعالوا انتو على الغدا وأنا بكلم داليا. بنجيب غدا من السوق عشان كلنا شغالين.
بدور: وهو كذلك أنا حاكلم ياسر
اروب : أنا ياسر ضربتا ليهو قبلك ما لقيتو في مكتبو.
بدور : عارفاك تقليدي الرجال عندكم دايماً تكلموهم بالمسائل المهمة أولاً.
(يضحكان)
أروب : أها - مع السلامة
بدور : طيب يا أروب .
(قطع)
البحث عن طه ، مشهد 51
داخلي/نهار
في شقة أروب وداليا.تجتمع الأسرتان للغداء
داليا: عاصم وهناء سافروا الجزيرة .اهل هناء عندهم وفاة .
بدور : آي ماتت ليها واحدة قريبتها عرفنا منها بالتلفون ونحن جايين عليكم.قالوا طالعين على السوق الشعبي.
ياسر : أنا برضو بمشي للفاتحة دي بكرة .
اروب : كنت داير اسألك عارف إنك من حلة هناء في الجزيرة حلة أم أم
داليا: أم درمان.
أروب : (يضحك)
ياسر : أم جداول
أروب : أيوة أم جداول انا لازم حلتكم دي أشوفا
داليا : إسمها حلو شديد بعكس بعض قرى السودان التانية : أم مرفعينات أم بعوضة أم فطيسة أم شكلة
بدور : ام شكلة ؟
داليا: آي ما سمعتي بيها ولو في نشرة الوفيات؟
أروب : نجي لي موضوعنا.فيكتور ودا صاحبي القلت ليكم عليهو في جوبا قال إنو الشخص الشافو امس القريبا دي هو طه الفي الصورة لكن كبير شوية .
بدور : ما طبعاً كبر. طه مما طلع من حلتم في الشمالية يمكن اسة يكون ليهو سبعة سنوات.
ياسر : الشابفو انا وفكرنا فيهو أنا وبدور إنو نمشي انا وحاجة عاشة وأروب ممكن يوصف لينا بدقة مكان عمل وسكن فيكتور صاحبو .لكن حاجة عاشة لازم تمش عشان الأم ما بتغبى جناها ولو كبر وبدور دي عينا نية قالت شافت طه مرتين في حياتا مرة في تمري ومرة في الخرطوم لمان جاهم مع امه في الصحافة.
بدور: لمن جونا في الصحافة هو وأبوه وأمه كان شافع صغير لكن لما شفتو في تمري كان في الثانوي العام. لكن لو شفتو بعرفو .أنا شايفا مافي داعي الحاجة تروح معانا.
داليا: الشايفاهو انا تخلو أروب بالأول يمشي براهو لو لقى صعوبات هناك يتصل بيكم.
ياسر : هو اروب ذاتو جوبا بي عينو قبال دا ما شافا .تعرفي يا داليا بعلك دا تايوان ساهي .نمشي انا وهو وبلا ش بدور .
بدور : والله ذكرتوني قصة المرفعين والخروف والكليقة.
داليا: الكليقة يعني شنو؟
أروب : دي يا داليا صبقتيني على السؤال عنها .
ياسر : الكليقة ربطة القصب البيستعملوه كعلف للبهايم .غالباً تكون ناشفة ومن قصب الذرة.
بدور : ناس أهل ابوي في تمري بقولوا ليها الورتابة.
ياسر : للكوليقة؟
بدور: آي .
اروب : وقصة الخروف والمرفعين والكوليقة شنو؟
بدور : (تحكيها. تترك هذه الجزيئة للمخرج إن رغب في تطويل الحوار)(يضحكون)
داليا: اسمعوا يا شباب أنا قايلا أحسن يمشي أروب في الأول . ولو مصرين خلاف كدا خلوه يمشي هو وحاجة عاشة عشان إنتو قايلين التذاكر لي جوبا بي كم ؟والطيارات لي هناك اليومين دي في تلتلة يمكن ما نلقى حجز لينا كلنا.
ياسر : صحيح مافي داعي نمشي كلنا كورجة.
اروب : كورج’ يعني شنو؟
ياسر : يا داليا راجلك دا دايرني ابقى ليه معلم عربي؟
بدور : آي ما إنت عربي .
ياسر : عربي يعني شنو؟
داليا: راجلك يعني شنو؟
أروب : اسه ما اتفقنا . رأيكم شنو؟
داليا : تمشي إنت يا أروب وحاجة عاشة .
ياسر : والله لازم امشي معاكم .
بدور : خلاص تمشو التلاتة وانا وداليا علينا نجهز لي سفركم.
أروب : وانا التذاكر على
ياسر : يا أروب ما قلنا شيرنج.
أروب : لا حرّّم
بدور : يا داليا راجلك دا جن.
داليا: شنو يا اروب قلت شنو؟
(يضحكون)
ياسر : الغنم دي جنت والله شنو .والله دي اول مرة في حياتي اشوف لي فيها دينكاوي يحلف حرام.
داليا: وعامل لي فيها مثقف كمان.
(قطع)
البحث عن طه ، مشهد 52
داخلي/نهار
في الطائرة المتجهة إلى جوبا صباحاً باكراً
( أروب وياسر يقودان حاجة عاشة إلى مقعدها داخل الطائرة .يجلسانها في المقعد الداخلي وإلى جوارها ياسر ويجلس أروب قرب النافذة بعد أن استأذن ياسر)
اًروب: يا ياسر عن إذنك عايز أشوف جوبا من الجو.
ياسر : جداً . جداً . ( مخطباً حاجة عاشة ) : اتفضلي أقعدي ياحاجة أقعدي هنا.
حاجة عاشة : إنت الفضيل.
(لحظات صمت)
ياسر (لأروب): أسه كان خليتنا جبنا معانا وزير الداخلية ست الحبايب مالو؟
أروب : وانت كان خليتني جبت معاي ست الهبايب مالو؟
ياسر : الهبايب؟
أروب : قصدي الحبايب .نطقتها كدا ساكت عشان اتمرن على عربي جوبا انا ما جنوبي ما على كيفي يا خي ؟
ياسر : خلاص مما بقينا ماشين لي جوبا دار تتمرفع علي؟
أروب : شوف الحاجة دي نايمة ما تبقى رقبتا متكية واللا حاجة.
ياسر : يا حاجة أديك تاكلي جبت ليك معاي بسكويت
حاجة عاشة : انتو يا مية تتباركو .لكن انا جنس حاجة ما بختها في خشمي ان كان مالميت في ولدي.
ياسر : (لأروب ) : زولتك دي خلي بالك داخلة في اضراب عن الطعام .خايف في جوبا نلاقي مايكروفونات وكاميرات الاذاعات العالمية.
أروب: (يضحك ضحكة خفيفة) ها ها. (يخرج من حقيبته قارورة (زجاجة) مشروب مانجو ويناوله لياسر ): هاك أديها تشرب العصير دا.
ياسر : يا سلام يا أروب .إنت كل حاجة مستعد ليها.
أروب : دا ما مني أنا .من ست الهبايب.
ياسر : تاني ؟
أروب : إنت مندكورو مجنون واللا شنو . كلام بتا أنا ما تارف .انا ما ماشي جوبا بقول ليك.
(يضحكان بفرقعة عالية بينما تشرب حاجة عاشة من العصير رشفة وهي تقول)
حاجة عاشة : إن شا الله يا وليداتي تتباركو.
ثم تغفو من جديد وتنام تنتقل الكاميرا لوجهها المكدود المتعب)
( سرعان ما يسري الكرى في أربع أعين أخرى مسهدة هي عينا أروب وعينا ياسر . تنتقل الكاميرا لوصف حالة السهاد)
(قطع)
البحث عن طه ، مشهد 53
خارجي/نهار
( ياسر واروب والحاجة عاشة يخرجان من صالة المطار يستقبلهم فيكتور بسيارة حكومية ويركبون العربة في الطريق إلى وسط المدينة. الحاجة عاشة تدخل في النوم من جديد)
أروب : يا فيكتور مندوكورو قالوا عايزين ينزلوا في فندق عشان حاجة عاشة دي ( يشير إليها) عربي جوبا دا والله إلا بي ترجمان حتى تفهموا وبعدين حيكون عندها مشكلة التعود على الطعام هنا .
فيكتور : كنت قايل نوديكم بيت .وكمان هنا كسرة في.كان حاجة عايزة ملاه ويكة كمان في .
ياسر: كسرة شنو دي زولة قراصة ساهي . نحن يا فيكتور حننزل في فندق معليش .
اروب : ايوة افتكر كدا عشان نقوم بعد داك نشوف طريقة سموث smooth نلمها في ولدها.
ياسر : طريقة سهلة مافي دي والله اول ما تشوفو انا خايف تجيها سقطة قلبية.أفتكر احسن طريقة نقوم نحكي ليها قصة جيتو لي هنا من أسة شوية شوية.
أروب : قلت لي يا فيكتور هو طه دا عرس هنا؟
فيكتور : أيوة المعلومة دي عرفتها قبل يومين بس زي ما قلت ليك بالتلفون . وعندو ولد كمان عمرو تلاتة سنين كدا. زوجتو شغالة ممرضة في مستشفى جوبا.
اروب : ممرضة؟
ياسر: (يضحك) خلاص يا اروب مما قال ليك ممرضة اتذكرت مهنتك و قلت تستفيد من الممرضة دي كيف؟ (يضحك) الأسد دايماً بشوف فريستو مش في شكل حيوان لكن كتلة لحم.
أروب : (يضحك)
(يصلون إلى فندق في جوبا. ينزل اروب أولاً ويوقظ ويساعد حاجة عاشة على النزول ويقودها معه ياسر وقد بلغ بها التعب مداه إلى داخل الفندق) ياسر : تعرف يا اروب الحاجة دي يكون دا أول فندق تدخلو في حياتها.
أروب : نحن ذاتنا قايلنا دخلنا فنادق كتير .
(يتحركون إلى الداخل بعد اجراءات استقبال الفندق. فيكتور يودعهم .يحجزون للحاجة غرفة لحاله اوياسر يوضح لها طريقة استعمال الحمام)
ياسر : (لأروب) : فيكتور حيجينا بعدين .
أروب : أيوة بعد الساعة أربعة.وقبل جيته بي ساعة ساعتين أنا حامرق اتعرف على جوبا العمري ما شفتها دي تجي معاي؟ (يخرجان)
( قطع)
البحث عن طه، مشهد 54
خارجي /نهار
فيكتور وأروب وياسر وحاجة عاشة يقتربون من دكان طه. دكان صغير للخردوات.توابل وغيرها من البضائع خارج الدكان).
فيكتور : لطه (السلام عليكم)
طه: وعليكم ال ( يهم برد السلام فيفاجأ بوالدته حاجة عاشة التي لم ينس وجهها طوال هذه السنين أما الحاجة عاشة التي الجمتها المفاجأة فقد ارتمت في حضنه وهي تبكي )
حاجة عاشة : اللااااااه(الله ممدودة) يا وليدي بقيت كبير .واشريري يا وليدي وامغستي وامغستي واااامغستي (تبكي) (الللاه يا وليدي)
طه: العبرة تخنقه فيبكي هو أيضاً .
أروب ( لياسر ) افتكر بعد كدا ما في دليل احسن من دا.
ياسر : ايوة الببان بالعمل . دا قلب الأم يا خينا في زيو؟
( تصور الكاميرا سلام طه لامه وبكاء أمه وسلامها وسلام أروب له وسلام ياسر . يتقدم طه بهم نحو بيته وقد نسي دكانه مفتوحا. يرجع ياسر خطوات لتفقد مفاتيح الدكان فيقفاجأ بجار طه التاجر الجنوبي يقوم بالواجب بالشروع في قف الدكانً)
التاجر جار طه: لياسر .خليى انا بقفل الدكان
ياسر : (ينظر فيه ملياً ثم يقول) : شكراً شكراً
(قطع)
البحث عن طه ، المشهد 55
جوبا
خارجي /نهار
(في الطريق إلى بيت طه بالقرب من دكانه حاجة عاشة تنهار ويحملها كل من أروب وياسر ؛ طه يضع يديه فوق راسه ويبكي بنشيج مر ويسير أمامهم في اضطراب واضح )
أروب : لطه شدي حيلك .دي امك ترى هادي لقيتا حية .أحمد ربك .أنا أمي وشها ما بتذكروا ماتت وأنا رضيع.
(طه يواصل البكاء.الحاجة عاشة تفيق من إغماءة وتدخل في أخرى وبين كل واحدة والتانية تصيح): طه ياكا طه وليدي واكتلتي واكتلتي طه... طه ..( تنظر لياسر وأورب) واشريري يا الحبان طه وليدي لقيتو (تصيح باعلى صوتها ) - واحلالي انا واحلالي
تقترب من ولدها: طه.. طه.. طه..واشريري أنا يا وليدي .وامغسة أمك. تعال لي هنا اللشمك (لأشمك).طه.. طه .. انت وينك يا طه
(قطع)
البحث عن طه ، مشهد 56
داخلي/نهار
داخل بيت طه
حاجة عاشة: ( تقترب من ولد طه أمه جنوبية من جوبا تعمل ممرضة .وصلت مهرولة لدى سماعها بخبر وصول أهل طه. تقترب حاجة عاشة وهي ممسكة بطه من يده لا تفكها وتنظر في الولد سهمانة ثم تأخذه وتضمه إليها دون أن تعرف عنه شبئاً).
أروب : (يقترب من زوجة طه) : تعرفي يا ...
زوجة طه: أنا اسمي ميري طه بقول لي مريم
أروب : تعرفي يا مريم دي عاشة أم طه وما دايرين من الأول نقول ليها عندو ولد وزوجة خليهو طه براهو يقول ليها بعدين. طه كان سافر منهم ليهو سنين مارجع وانت عارفا.
زوجة طه : عارفا كيف ؟ طه قال ابوهو وامو ماتوا من هو صغير .طه ما قال أهلو في شمالية قال من بورتسودان. .
(تدخل حاجة عاشة وهي ممسكة بطه لازالت ويقول طه لزوجته والحاجة لازالت ممسكة به): مريم تعالي سلمي على أمي دي
زوجة طه: أهلاً يا أمي .اهلاً
طه: أي يا يمة الولد الشميتيهو قبل شوية دا محمد خير ولدي ودي مريم مرتي
حاجة عاشة : مرتك؟
طه : أيوة؟
حاجة عاشة : وداك قلت ولدك؟
طه : أيوة
حاجة عاشة : واكتلتي وا كتلتي وامغستي.نان مالك ما كلمتني قلت دار أعرس قايل بابا ليك والله هن دار تعرسلك خواجيي ما كنت بابالك يا ود حشاي .وينو الولد قلت سميته منو؟
طه: محمد خير
حاجة عاشة : بس (بكسر الباء وسكون السين) نان يا وليدي إنت اصلك الاسامي كملت ما لقيت غير قشرون دا؟ما بتطرا دقوا ليكا؟ الطششك من البلد بلاهو منو؟
ياسر : يا حاجة سماه على والدو
حاجة عاشة: عارفاهو على ابوهو . بس بس.(بكسر الباء وتسكين السين).
(تبكي حاجة عاشة وتبكي وهي ممسكة بطه وتحتار زوجة طه فيما تفعل وتقوم على المطبخ لعمل شيء لضيوف زوجها)
أروب : لحاجة عاشة : يا حاجة كدي تعالي اقعدي في العنقريب دا
ياسر : كدي فكي ولدك طه دا خليهو يجمع شوية
حاجة عاشة : لالا تاني والله ما بفكو إلا ان كان في تمري!
(تبكي وهي تقول) : واكتلتي انا واحلالي.
(قطع)
البحث عن طه ، المشهد 57
خارجي /نهار
(أروب وياسر يفلحان في فك طه من يد أمه التي نامت بعد الغداء في بيت طه بجوبا .أروب يمسك بكتف طه ويدعوه للخارج يخرجان ومعهما ياسر بينما تنشغل زوجة طه بولدها والمطبخ لغسيل العدة)
أروب : (لطه) إنت ما قلت لي يا طه حكايتك شنو؟ مالك عذبت أهلك ديل ؟
ياسر : الشي حكايتك شنو؟ قلب ما فيك؟ شايف والدتك دي بقت تعبانة كيف راسها مرق بي وراك.
طه: والله تقولو شنو؟ لما أبوي كان بدقني بالقرجةوبي جريد النخل ضرب ناس ما نصاح وزملاي في المدرسة يضحكوا على في تمري ، الدنيا ضلمت في عيني بالأول قلت اقع في البحر انتحر وانتهي من الدنيا لكن تاني فكرت في السفر .
اروب : فكرت في السفر اها طيب ليه ما رجعت بعد زعلتك راحت؟ ليه ما راسلتهم؟
طه: الزعلة راحت وين؟.سنة كاملة ما كنت عازف روحي وين؟ .مشيت الدمازين وكوستي وملكال وواو ومريدي ما خليت محل وكنت الزمن داك بلفها.
أروب : تلفها يعني شنو؟
ياسر : صاحبك كان زول سجارة .وتاريك سمعت بأنو الجنوب همبريب وجيت .
طه: والله كل حاجة جربتها سكر وبنقو وماكنت عارف روحي وين واللا أهلي وين. قبل سنتين بس تبت من المخدرات . والله ساعدتني مريم دي أخوها كان صاحبي في السوق .في الحقيقة مريم قامت بي دور أكبر من أخوها.
أروب : طيب ليه ما قالت ليك تمشي تشوف أهلك.
طه: خدعتها قلت ليها أهلي في الشرق وأمي وأبوي ماتوا.
ياسر : ماتوا؟
طه: أيوة (يضع يديه فوق وجهه ويبكي)
(قطع)
البحث عن طه ، المشهد 58
خارجي /صباح
(امام بيت طه في جوبا .أروب و ياسر يحملان حقائبهما ويضعانها داخل سيارة فيكتور)
أروب (لفيكتور): شكراً يا فيكتور .شكراً ليك كتير أهو شايف طلع ياهو. نحن دلوقت بنسافر مع طه وأمه وبعد داك نفكر في طريقا ننقل ماري تجي تعمل في الشمال .
فيكتور : ليه ما ممكن طه يمشي يزور أهلو ويجي تاني راجع.
ياسر : يجي راجع وين الحاجة دي فكرك تاني بتخليهو .اأة خش جوة شوفا ما سكاه من إيدو كيف .
(تخرج حاجة عاشة ممسكة بطه ومعها زوجة طه وولده )
ياسر : (لمريم ) زي ما اتفقنا يا ميري طه حيسافر معانا وبعيدن انتو تجو لما يكلم الأهل هناك بي زواجوا عشان يفهموا وكدا.
مريم :أول هو كان قال لي أهلو حيين أنا كنت بسرقوا منهم ؟
حاجة عاشة :نحن ما كنا ميتين لكن الميت هو .إن كان فيهو قلب كان جا.
اروب : يا حاجة خلاص شكلة البارح كملتيها معاهو وطه غلطان غلطان مرق منكم دون خبر وكضب على مرتو.
ياسر : يا حاجة دحين دي مرتو ودا ولدو.أهو إنت بقيتي حبوبة لا ايدك لا كراعك.بتقبليهم يمشو مع طه للي أمري
حاجة عاشة : عسقي ما باباهو .وأمه دان إن دارت تجي في تمري تعيش معانا حبابا إلا هني في البلد الكتر دي تاني لا.
ميري: خالة آاسة(عاشة) دي بتقول شنو؟
ياسر: قالت تمشوا تعيشوا معاها في الشمال.
ميري: أسة ما نمشي يمشي هو وبعدين يجي لو داير يسوقنا.
حاجة عاشة: والله طه سوالو أولاد في بلدن كتر.
فيكتور : بلد كتر ايه يا حاجة كلو ما دا سودان.
حاجة عاشة : آآآآ؟
ياسر : كدي اسه النشوف دكان طه نخلي مع منو؟
طه: أخو المرة في .هو مسافر هسة وأول ما يجي مريم تديهو المفاتيح. (ينادي طه مريم للداخل)
(قطع)
البحث عن طه ، مشهد 59
داخلي / نهار
جوبا، صباح
(طه يودع مريم ويصيها عشرة على الولد ويقول لها بانه سيزور أهله ويعود . يمنحها بعض النقود )
ميري : وتمري دي وين يا طه؟ والله دي مشكلة
طه (ينادي ياسر ) : تعال بالله يا ياسر وصف ليها تمري دي يسافروا ليها كيف والله انا شابفا في راسي أسه طشاش- طشاش.
ياسر : أنا بكتب لي ميري بيتنا في الصحافة مربع 24 وبرسم ليها خريطتو وبكتب رقم تلفوني وتلفون بيت خالتي رقية أم بدور .بيت ناس المرحوم سيد أحمد أبو بدور ما بتتذكروا؟
طه : كيف ما بتذكروا هو بالله سيد احمد مات؟ وبدور بدو كيف ما بتذكرا أنا عمها
ياسر : وانا زوجها ( طه يتفرس فيه محتاراً)
ياسر : بدور قالت أبوها مات بعد سنة ولا سنتين مما طفشت إنت. . أمك كانت مرة مسافرة ورجعت البلد لقتك طفشت.
( يدخل أروب وحاجة عاشة )
أروب : خلاص يا ياسر اكتب التلفونات والعناوين لي ميري وما تنسى تكتب تلفوني وتلفون داليا .(يخاطب ميري ) أول ما نصل بنديك تلفون بواسطة فيكتور دا .يا حاجة ودعي مرة ولدك وحفيدك ا.
(تقترب حاجة عاشة من حفيدها وتقبله وتضمه إليها وترفعه وتشمه وهي تقول) حاجة عاشة : أها ودعتك الما بيديك ولا يبضع فيك وامصاريني وا شريري يا يمة.(تخرج. تخرج ماري وراءها ويخرج الجميع)
(يبقون لدقائق أمام باب القطية .ومن بعد يركب فيكتور ليقود العربة ويركب ياسر وأروب بالخلف بينما تركب حاجة عاشة في المقعد الامامي مع السائق وهي ممسكة بيد طه ولدها .وتلوح ماري وولدها إليهم )
محمد خير ولد طه : اأبوي إنت ماشي وين؟ أبوي إنت ماشي وين؟ يبكي.(عمره ثلاث سنوات تحمله امه والعبرة تخنقهما.).
(قطع)
البحث عن طه ، مشهد 60
داخلي/نهار
(طه وأمه وأروب وياسر في الطائرة)
(جميع الأشخاص أعلاه في لقطة أخرى في مطار الخرطوم)
( في المطار تستقبلهم بدور وداليا وهناء وعاصم ونفر من اهالي تمري بالخرطوم وشباب من حي الصحافة)
تنزل الحاجة عاشة وتعانق بدور وتبكي .جميع المستقبلين يتفرسون في طه بعضهم باستهجان وبعضهم يهز رأسه . تتطيب داليا وبدور خاطر حاجة عاشة وينطلقون على منزل سيد احمد بالصحافة.
في منزل سيد احمد يجيء بعض سكان الحي وبعض اهل تمري بالخرطوم بالخرفان وتقام وليمة يلحون على اروب وداليا كي يحضروها
ياسر : افتكر يا اروب أسبوعك دا راح أقعد أقعد طمبجا والجماعة ديل ضابحين كرامة ما بخلوكم إنت وداليا تفوتو .
بدور : إنت يا اروب مش عايز ليك كرامة عايز ليك تكريم .
داليا: آر ما يستحق تكريم بيستحق تك .
(اروب لا يسمع بقية الكلام يخرج من الغرفة )
ياسر : إذا كان قلتي كدا إذن هو بيستحق تك وريم.
داليا ريم دي شنو كمان؟ جابا من جوبا معاهو واللا شنو؟
ياسر : ما عارف غايتو لكن بعد شهر حتضرب ليهو تلفون(أروب يعود وياسر يواصل الحديث مخاطباً إياه) : مش كدا يا اروب ميري مش حتتصل عليك بعد شهر
أورب : صحيح وأن شا الله نقدر نقنع الناس ديل بالعرس.
داليا: ووب ناس شنو كمان؟
بدور : سجمي سجمي إنتو مشيتو لي عمار ولا خراب .
اروب : خراب شنو؟ أسه ما كنتو بتتكلموا عن التكريم
داليا : التكريم واللا ريم
( ياسر يحكي تفاصيل قصة ميري ).
(يضحكون)
(قطع)
البحث عن طه ، المشهد 61
خارجي / صباح
(حاجة عاشة تمسك طه من يده قرب بصات الشمالية السجانة أو ام درمان ، وهم في طريقهم إلى تمري . يسافر معها كل من أم بدور وياسر زوج بدور حيث ان بدور حامل في شهرها الخامس)
طه : (مخاطباً امه) : خلاص يا يمة عليك الله فكيني قايلاني داير أقوم شارد .
رقيا ام بدور : فكيه خلاص يا حاجة يدو بقت ما بجري فيها الدم من مسكتك ليها.
حاجة عاشة : افكو والله قولت أفكو . والله تاني ايدي دي ما أفكها منو إلا ان كان في بنطون تمري.
(ياسر يذهب ليشتري زوادة السفر ويعود محملاً بمعلبات ومياه غازية ومياه شرب)
(لقطة للبص في الطريق الجديد لتمري )
طه: الزلط دا عملوهو متين.
أحد الركاب : علموهو متين ؟ أنت يا خوي طلعت من السجن؟
ياسر : أخوي دا كان مسافر يا اخينا)
(صورة من بعيد ينزلون في محطة في منتصف الطريق )
أم بدور لياسر : قلت ليك قبيل لكن ما سمعتني بقت في كافتيريات مافي داعي للزوادة
ياسر : بدور أمس قالت لي اشتريها.
رقية : بدور سافرت لي تمري وهي طفلة بتعرف شنو لي تمري كمان؟
(صورة من بعيد للبص وهو ينطلق نحو تمري)
(وصول لتمري.أحدهم يرى حاجة عاشة في الغرب قبل العبور بالبنطون فيسرع لإخبار بقية ركاب البنطون بوصول الحاجة عاشة وولدها طه الغائب . ينطلق الخبر إلى تمري قبل وصول البنطون بواسطة العابرين قبل البنطون بالرفاص و بمركب صغيرة يقال لها الفلوكة)
(قطع)
البحث عن طه، مشهد 62
خارجي /نهار
(داخل بنطون تمري)
(هرج مرج كل الركاب يعرفون الحاجة عاشة وبعضهم يعرف بدور ناس الفريق. جاءوا يتفرسون في طه وبعضهم تشكك فظن أن الولد الغائب هو ياسر . بعد التاكد من طه بعد ان سلم عليه بعضهم جاءوا داخل البنطون زرافات زرافات حيث الحاجة عاشة )
أحد الركاب : حاجة عاشة جيدن جيتو بركة الولد الجمع.
إحدى الراكيات: حاجة عاشة نعلك طيبة في عضيتمك دي سلامة ولدك بالوصول.
إحدى الراكبات: حاجة عاشة حمدللا على السلامة . كيفنك يا طه الحمدلله الرجعت البلد.
أحد الركاب : حاجة عاشة بركة يا يمة. برجوع ولدك .
إحدى الراكبات: بركة يا يمة اللقيتوهو وجيتو طيبين وسالمين .(تلتفت لرقية) انتي دحين ما أم بدور بت سيد احمد:
رقية : (وهي ليست من مواطنات تمري ) : آي.
راكبة : توسوس لجارتها : يا يمة ناس الصعيد ديل كلامن برة (آي) قالت مالا ما بتعرف تقول أيي ؟
الراكبة الأخرى ترد عليها: أيي صح كلامن كتر.
(قطع )
البحث عن طه ، مشهد 63
(تمري كلها شيباً وشباباً رجالاً ونساءً تخرج إلى المشرع لمقابلة حاجة عاشة العائدة بطه .زغاريد شمالية وهي تختلف عن زغاريد وسط السودان. يمكن للمخرج عمل مهرجان لفنون الشمال هنا دفوف . زغاريد صياح رجال )
رقية ( لياسر ): شوف الحلة دي جات متكسرة كدي كيفن الكلمن منو بي جيت أم طه وولدا ؟
ياسر : ناس الرفاص ديلاك (يشير إلى رفاص في عرض البحر).
- حاجة عاشة ابيشري(أبشري ) بالحيل. أبيشري .
- حاجة عاشة بركة يا يمة عجبني ليك إن شا الله يباركولو يوم عرسو
( ياسر يضحك لدى سماعه الجملة الأخيرة ).
فجأة يظهر وسط الجموع وبعد تعب بسبب التدافع محمد خير زوج عاشة
(تصور الكاميرا لقطة كلوز أب حيث يرتمي طه فوق كتف والده ويبكي بصوت أجش عال يبكي ويبكي . ثم يبكيان. تصور الكاميرا الدموع في عيني العشرات من المستقبلين ويتحرك الركب).
(قطع)
البحث عن طه – مشهد 64
بعد مشهد البنطون
خارجي / ثاني يوم مساء في منزل محمد خير
(جموع تمري جاءت لحفل كبير بالطمبور بعد أن كانوا نهاراً في وليمة غداء كرامة وسلامة.يتحدثون عن الكرامة وعن طه)
أحد شباب تمري: طه اتغير كتير سمن وصحتو بقت سمحي
شاب تاني: صاحبك قالوا عرسلو واحدي هناك صحي؟
الأول : القال منو تسمع الإشاعات دي .كان عرس كان جا كاريها معاهو.
في ركن آخر من الحفل (قبل بدء الفنان.الفنان بدأ يدوزن الطمبور )
واحدة : انتن يا خواتي الولد دا منو الجا معا خالتي عاشة ورقية دا؟
الثانية : دا ما راجل بدور
الثالثة : نان ما قالوا بدور عرستلها واحد من الصعيد .
الأولى : ما ياهو دا.
الثالثة مرة اخرى : نان مالو متلبس كدا وسمح كدي ما قالوا عربي؟
الثانية : ( تسنتت ) انتي من زمن الكلامات دي؟
(ينتهي المشهد بي حفل موسيقي الطمبور يتخير فيه المخرج أغنيات العودة. ترقص قيه بعض شابات الحي .ويرقص ياسر بفرح مع الشباب .تدخل حاجة عاشة وتهز وسط الشباب وهي تصيح )
حاجة عاشة : أبيشروا بالخير .أبيشروا بالخير.
(يتلاشى صوت المغني في الحفل شيئاً فشيئاً ولقطة لمحمد خير من بعيد وهو جالس ساهماً لا يدري هل يضحك أم يبكي)
(قطع)
البحث عن طه، مشهد 65
( بعد اسبوع من عودة ياسر وأم بدور للخرطوم يتلقون هاتفاً من تمري.صاحب الدكان يقول لياسر): يا ياسر حاجة عاشة تعيشوا انتو.
ياسر عبر الهاتف : لاحول ولا قوة إلا بالله!
(بدور الحامل وأروب وياسر وأم بدور ودالياواروب يسافرون كلهم بالطائرة هذه المرة المطارقريب في مروي لا يبعد كثيراً عن تمري .يصلون ويقومون بالعزاء .أهل تمري يتدافعون لتحية أروب الذي جاء للعزاء العزاء وشكره على دوره في إعادة طه. تمري تبكي حاجة عاشة بحرقة ويعلو صوت طه جموع الباكين ويحزن عليها محمد خير)
(قطع)
البحث عن طه، المشهد 66 الأخير
خارجي/صباح بعد شهرين من وفاة والدته
(طه يشاهد قرب الباصات بعد أن عبر بالبنطون)
حاج عبدالرحيم أحد كبار تمري : وين يا ولد يا مسخوت تاني رايح.أمك عذبتها ووصلتها تربتا كما دان داير تلحقها أبوك؟
طه: يا حاج ما تتكلم كلام حار كدي يجرحنا ساهي أنا اتفقت مع أبوي عندي مصالح هناك وعائلة في جوبا أمشي أقضيها وأجيب اولادي واجي صاد.
(في هذه اللحظة يظهر محمد خير من لفة في دكان مجاور وهو يحمل كيس )
طه: ( لحاج عبدالرحيم) : يا حاج أهو دا أبوي اسألوا.
محمد خير : طه ما بقى رضي خلاص .أنا عافي منو وأمو بقت عافي منو قبال تروح للدار الآخرة. هناك سوالو دكان ومرة ماشي يجيبها يجي.أنا قتلوا عديلا عليك إن بقى ما جا كمان خترو.
طه: كيف ما أجي يا والد؟ داك كان شغل جهل .
محمد خير : الكيس دا فيهو حلاوة لي الولد.
طه: لي محمد خير؟
حاج عبدالرحيم : هو عندو ولد هناك؟
محمد خير: وسما على أبوه كمان
حاج عبدالرحيم : لا خلاص عديلا تب.
طه: (يودعهم وهو يقول): المرة حامل إن شا الله تكون بي عاشة .أول ما تلد ببيع دكاني هناك وأجي ليك يابا لا تشيل هم ) .
محمد خير : أمش يا ولدي عافي منك إن شا الله ربنا يفتحها عليك وتمشي وتجي بالسلامة.
طه : يودع حاج عبدالرحيم ثم يقالد والده . ويذهب عنه دامع العينين.
السائق : (يقول بينما طه مشغول بشحن نصف جوال بلح) : أي.. روح دميعاتك امك ما شافتا منك جيت تشتتا حسة يا منافق.ولد مسخوت.
(نهاية خيط البحث عن طه)
(قطع)
الخيط الرئيسي ( داليا وأروب) ، المشهد 107
داخلي /ليل
مستشفى خاص بالخرطوم
)داليا تضع مولودها الأول فتجتمع الأسرة المقاطعة وتقرر المجيء إلى المستشفى لتهنئة داليا وأروب ومسامحة داليا ومن الحاج يوسف يجيء أهل أورب لتهنئة أروب ولمسامحته.الأهل الذين جاءوا للمسامحة بالخارج شماليون وجنوبيون يجلسون في حالة اشتبك وطن واحد أما بالداخل فيوجد جيمس الذي لم يقاطع الزواج وانصاف. ويسأل جيمس)جيمس: ماقلتو لي الولد سميتو منو؟
أروب: سميناهو على
جيمس : الله يعني بت تا(بتاع) مندكورو دا قال لازم يكون الاسم شمالي؟
داليا : لا ابداً يا عم جبمس الاسم دا اختارو أروب.
جيمس: اختارو أروب؟
أروب: فعلاً يا خال انا سميتو على عبداللطيف مرة واحدة على عبداللطيف أروب دينق .
انصاف: والله اخترتو اسم حلو
جيمس : كدا معليش.اسم بتاع بطل بتاعنا. يضحكون (تنطلق زغاريد ويفرح معهم بعض العاملين بالمستشفى وبعض الممرضات. ينتهي المسلسل على صوت زغرودة يتم تاليف مقطع موسيقي يجاريها)
(قطع)
الخيط الرئيسي (داليا واروب) ، المشهد 108
السماية داخلي/نهار
(داليا واروب يقررون إقامة وليمة ضخمة (سماية) مولودهما يتم فيها جمع أهل الطرفين وأصدقائهم. الوليمة تجيء في مطلع الالفيةفي شقة اروب وداليا
بالصافية ببحري).
داليا: إنت يا أروب تعزم ناس بيتنا وأنا ناس بيتكم.
اروب جميل. وإنتي تعزمي الأولاد من أصحابنا في الزقازيق والخرطوم وأنا البنات.
داليا: ليه؟
اروب : (يضحك) يتصل على الجوال : أروب ألو زينب؟ اسه صوتك دا جايين من حلفا؟ من حلفا؟ باله شوف الموبايلات بقت تقرب المسافات وكثيراً كيف؟ يا زينوبة إن شا الله عافية واهلك إزيكهم؟ في الحقيقة إحناء وداليا جانا ولد.الله يبارك فيكحنسمية على عبداللطيفآي آي وبالمناسبة دي عايزين نجمع كل اصحابنا ناس الزقازيق بالله يا زينب ما تقولي حلفا بعيدة .لو عايزة حنرسل ليك تذكرة لكن عارفنك بتتعززي بس لا زم حضورك أديك داليا آي آي .
داليا: ( تتصل) : الو سليمان؟
ألو يوسف ؟
ألو عبداللطيف شريف .عثمان تاج السر ، معز بدوي ، الماحي،
أروب : يتصل: الو نجلاء؟ الو اروى؟ ألو أنجيلا؟
يعزمون أهل اروب وأهل داليا والاصدقاء فيجيئون جميعاً في اليوم الموعود . تصدح بصوت خافت في الشقة أغنية نحن ابناؤك في الحزن النبيل الوطنية ويدعون شاعرها مبارك بشير الذي يسكن بالجوار وحين ياتي المقطع الذي يذكر فيه اسم عبداللطيف يعتلي اروب منصة الوقت ويقول: سلام يا اهل ويا اصحاب.يسرنا ان نعزمكم داليا وانا في هذا اليوم بمناسبة قدوم ولدنا على عبداللطيف.
أحد الضيوف: حتسموهو إسم مركب؟
اروب: ايوة إسم مركب على عبداللطيف اروب دينق .
الضيف : عظيم عظيم. تستمر الوليمة والغناء وعندما يخرج أروب ليودع الضيوف يناوله محمد خليل جد داليا مفتاحاً وهو يقول: شكراً يا بني غن شا الله دائماً في الافراح. دا (يناوله المفتاح) عشان خاطر البطل.
أروب : (يحاول أن يرد على الحاج محمد خليل تشير إليه داليا من الداخل بالا يفعل) (وعندما يجيء بعد ان يودع الحاج والمفتاح لا يزال في يده تقول له داليا) : الحاج كان بيزعل وصوتو يرتفع ونحن في الصالون معانا زملانا لسة .جدي كل حفيد بيهدي ليه عربية.
اروب : لكن دا ما حفيدو دا ما ولد حفيدته؟ داليا : آي صحي والله.
آروب : شوفي يا داليا: أنا العربية بقبلا هدية وبسوقا لكن برد تمنا بالاقساط لمن ابقى أخصائي آد الدنيا.
يدخل على اصحابه حيث يجتمعون بعد ذهاب الضيوف صورة مصغرة من مجتمع الزقازيق. لكن سليمان اروى تلفنا من استراليا وزينب جاءت مع زوجها المهندس الشفيع وشقيقتها فافا حيث زوجها كان في الخرطوم وفافا جاءت مع زينب من حلفا
تعلو الموسيقى من الساوند سيستم. نحن ابناؤك..
(قطع)
داليا واروب
المشهد الأخير خارجي/ليل
( مغ دخول الليل يظهر القمر فيذهب الجميع إلى رمال الشاطي ببحري قرب منطقة حلة حمد ويحتفلون جميعاً وهم يغنون (أغنية طلعت القمرة )
في منتصف الدائرة والأصدقاء يغنون تضع هنا وبدور قفة وتقول هناء : قفة هو الاسم "العنيف" الأطلقوه أطفال حلتنا على واحد من ذوي الحاجات الخاصة إسمو جبارة .عندو مشاكل في النمو وتشوهات. وهو البذكرنا أنا وبدور وياسر ويوسف بالأغنية دي وبالنماسبة قالوا أغنية طلعت القمرة دي مؤلفاها في الأربعينات مرة من فداسي الحليماب. انا ما عارفة اسمها لكن لقبها ( الشاي) . وبغنيها كان في الربوع الفنان مدني صالح من أم درمان.والله اعلم .
بدور: هناء جهجهت الكلام عشان منفعلة بي حضوركم الرائع دا لكن نحن عايزين الليلة نملا القفة دي قروش نرعى بيها حالة جبارة ومايدفع إلا زول شغال.بالمناسبة جبارة كان بغني الأغنية دي لهناء.
هناء : امشي ما شفتيهو قال ليك شنو لما جيتي إنتي؟
الجميع يغنون نفس الأغنية عندما تجيء داليا التي تصل لموقع الحفل متأخرة حيث كانت منشغلة برضيعها تظهر داليا وهي مقبلةعليهم جميلة وبصحة إمرأة خارجة حديثاً من سرير الولادة. اصبحت داليا تسمع الأنغام وتحتار في غناء الكورس الجماعي لهده الأغنية وما أن تقترب من الجمع حتى يشير الجمع إلى القفة وتنظر داليا في داخلها وتظن أن المال مجموع لهم فترفض بالإشارة والأغنية مستمرة وينتهي المشهد بتبرع داليا بمبلغ كبير من المال أما أروب فيخلع ساعته الفاخرة ويتبعه الجميع بخلع ساعات وسلاسل وذهب… )
(قطع)
B] نهاية الحلقة الثلاثين الأخيرة
نهاية المسلسل
|
|
 
|
|
|
|
|
| العنوان |
الكاتب |
Date |
| طلعت القمرة - مسلسل أون لاين | Bushra Elfadil | 08-12-10, 03:13 PM |
| Re: طلعت القمرة - مسلسل أون لاين | محمد المرتضى حامد | 08-12-10, 03:21 PM |
| Re: طلعت القمرة - مسلسل أون لاين | Bushra Elfadil | 08-12-10, 03:30 PM |
| Re: طلعت القمرة - مسلسل أون لاين | سلمى الشيخ سلامة | 08-12-10, 09:24 PM |
| Re: طلعت القمرة - مسلسل أون لاين | هشام كمال | 08-12-10, 09:53 PM |
| Re: طلعت القمرة - مسلسل أون لاين | Bushra Elfadil | 08-13-10, 00:37 AM |
| Re: طلعت القمرة - مسلسل أون لاين | Bushra Elfadil | 08-13-10, 00:23 AM |
| Re: طلعت القمرة - مسلسل أون لاين | سلمى الشيخ سلامة | 08-13-10, 00:42 AM |
| Re: طلعت القمرة - مسلسل أون لاين | Bushra Elfadil | 08-13-10, 05:44 AM |
| Re: طلعت القمرة - مسلسل أون لاين | سلمى الشيخ سلامة | 08-13-10, 05:58 AM |
| Re: طلعت القمرة - مسلسل أون لاين | هشام كمال | 08-13-10, 07:45 AM |
| Re: طلعت القمرة - مسلسل أون لاين | فيصل محمد خليل | 08-13-10, 08:15 AM |
| Re: طلعت القمرة - مسلسل أون لاين | Bushra Elfadil | 08-13-10, 09:13 AM |
| Re: طلعت القمرة - مسلسل أون لاين | Bushra Elfadil | 08-13-10, 09:19 AM |
| Re: طلعت القمرة - مسلسل أون لاين | Abdlaziz Eisa | 08-13-10, 11:04 AM |
| Re: طلعت القمرة - مسلسل أون لاين | Bushra Elfadil | 08-13-10, 12:50 PM |
| Re: طلعت القمرة - مسلسل أون لاين | Bushra Elfadil | 08-13-10, 01:05 PM |
| Re: طلعت القمرة - مسلسل أون لاين | Bushra Elfadil | 08-13-10, 01:27 PM |
| Re: طلعت القمرة - مسلسل أون لاين | Bushra Elfadil | 08-13-10, 01:53 PM |
| Re: طلعت القمرة - مسلسل أون لاين | Bushra Elfadil | 08-13-10, 02:27 PM |
| Re: طلعت القمرة - مسلسل أون لاين | Bushra Elfadil | 08-13-10, 02:27 PM |
| Re: طلعت القمرة - مسلسل أون لاين | Abdlaziz Eisa | 08-13-10, 03:29 PM |
| Re: طلعت القمرة - مسلسل أون لاين | خدر | 08-13-10, 05:00 PM |
| Re: طلعت القمرة - مسلسل أون لاين | Bushra Elfadil | 08-13-10, 07:47 PM |
| Re: طلعت القمرة - مسلسل أون لاين | Bushra Elfadil | 08-13-10, 07:50 PM |
| Re: طلعت القمرة - مسلسل أون لاين | Bushra Elfadil | 08-13-10, 07:55 PM |
| Re: طلعت القمرة - مسلسل أون لاين | Bushra Elfadil | 08-14-10, 09:53 AM |
| Re: طلعت القمرة - مسلسل أون لاين | Bushra Elfadil | 08-14-10, 10:12 AM |
| Re: طلعت القمرة - مسلسل أون لاين | محمد المرتضى حامد | 08-14-10, 11:16 AM |
| Re: طلعت القمرة - مسلسل أون لاين | Bushra Elfadil | 08-14-10, 11:54 AM |
| Re: طلعت القمرة - مسلسل أون لاين | محمد المرتضى حامد | 08-14-10, 12:06 PM |
| Re: طلعت القمرة - مسلسل أون لاين | Bushra Elfadil | 08-14-10, 08:32 PM |
| Re: طلعت القمرة - مسلسل أون لاين | محمد المرتضى حامد | 08-14-10, 11:11 PM |
| Re: طلعت القمرة - مسلسل أون لاين | Bushra Elfadil | 08-15-10, 08:10 AM |
| Re: طلعت القمرة - مسلسل أون لاين | Bushra Elfadil | 08-15-10, 02:39 PM |
| Re: طلعت القمرة - مسلسل أون لاين | Bushra Elfadil | 08-15-10, 02:42 PM |
| Re: طلعت القمرة - مسلسل أون لاين | Bushra Elfadil | 08-15-10, 02:51 PM |
| Re: طلعت القمرة - مسلسل أون لاين | Bushra Elfadil | 08-16-10, 08:16 AM |
| Re: طلعت القمرة - مسلسل أون لاين | Bushra Elfadil | 08-16-10, 08:18 AM |
| Re: طلعت القمرة - مسلسل أون لاين | Bushra Elfadil | 08-16-10, 04:48 PM |
| Re: طلعت القمرة - مسلسل أون لاين | Safa Fagiri | 08-16-10, 05:53 PM |
| Re: طلعت القمرة - مسلسل أون لاين | Bushra Elfadil | 08-16-10, 11:37 PM |
| Re: طلعت القمرة - مسلسل أون لاين | Bushra Elfadil | 08-17-10, 11:35 AM |
| Re: طلعت القمرة - مسلسل أون لاين | Bushra Elfadil | 08-17-10, 12:07 PM |
| Re: طلعت القمرة - مسلسل أون لاين | Bushra Elfadil | 08-17-10, 12:09 PM |
| Re: طلعت القمرة - مسلسل أون لاين | Bushra Elfadil | 08-18-10, 11:53 AM |
| Re: طلعت القمرة - مسلسل أون لاين | Bushra Elfadil | 08-18-10, 11:59 AM |
| Re: طلعت القمرة - مسلسل أون لاين | Bushra Elfadil | 08-18-10, 12:04 PM |
| Re: طلعت القمرة - مسلسل أون لاين | Bushra Elfadil | 08-19-10, 09:44 PM |
| Re: طلعت القمرة - مسلسل أون لاين | Bushra Elfadil | 08-20-10, 12:27 PM |
| Re: طلعت القمرة - مسلسل أون لاين | Sidgi Kaballo | 08-20-10, 02:34 PM |
| Re: طلعت القمرة - مسلسل أون لاين | Bushra Elfadil | 08-20-10, 03:00 PM |
| Re: طلعت القمرة - مسلسل أون لاين | Bushra Elfadil | 08-21-10, 08:24 PM |
| Re: طلعت القمرة - مسلسل أون لاين | Bushra Elfadil | 08-22-10, 02:06 PM |
| Re: طلعت القمرة - مسلسل أون لاين | Bushra Elfadil | 08-22-10, 02:13 PM |
| Re: طلعت القمرة - مسلسل أون لاين | Bushra Elfadil | 08-22-10, 02:22 PM |
| Re: طلعت القمرة - مسلسل أون لاين | Bushra Elfadil | 08-22-10, 09:52 PM |
| Re: طلعت القمرة - مسلسل أون لاين | Bushra Elfadil | 08-23-10, 07:52 AM |
| Re: طلعت القمرة - مسلسل أون لاين | dardiri satti | 08-23-10, 10:24 AM |
| Re: طلعت القمرة - مسلسل أون لاين | Bushra Elfadil | 08-23-10, 01:00 PM |
| Re: طلعت القمرة - مسلسل أون لاين | Bushra Elfadil | 08-24-10, 01:15 AM |
| Re: طلعت القمرة - مسلسل أون لاين | طيفور | 08-26-10, 11:16 PM |
| Re: طلعت القمرة - مسلسل أون لاين | محمد الكامل عبد الحليم | 08-24-10, 01:02 PM |
| Re: طلعت القمرة - مسلسل أون لاين | Bushra Elfadil | 08-24-10, 02:06 PM |
| Re: طلعت القمرة - مسلسل أون لاين | Bushra Elfadil | 08-24-10, 11:35 PM |
| Re: طلعت القمرة - مسلسل أون لاين | Abdlaziz Eisa | 08-24-10, 11:47 PM |
| Re: طلعت القمرة - مسلسل أون لاين | Bushra Elfadil | 08-26-10, 01:07 AM |
| Re: طلعت القمرة - مسلسل أون لاين | Bushra Elfadil | 08-27-10, 04:35 AM |
| Re: طلعت القمرة - مسلسل أون لاين | عصام دهب | 08-27-10, 03:20 PM |
| Re: طلعت القمرة - مسلسل أون لاين | Bushra Elfadil | 08-27-10, 04:20 PM |
| Re: طلعت القمرة - مسلسل أون لاين | عصام دهب | 08-27-10, 04:33 PM |
| Re: طلعت القمرة - مسلسل أون لاين | Abdlaziz Eisa | 08-27-10, 05:47 PM |
| Re: طلعت القمرة - مسلسل أون لاين | Bushra Elfadil | 08-27-10, 07:32 PM |
| Re: طلعت القمرة - مسلسل أون لاين | Bushra Elfadil | 08-28-10, 09:20 PM |
| Re: طلعت القمرة - مسلسل أون لاين | Bushra Elfadil | 08-29-10, 09:31 AM |
| Re: طلعت القمرة - مسلسل أون لاين | Bushra Elfadil | 08-29-10, 07:50 PM |
| Re: طلعت القمرة - مسلسل أون لاين | Bushra Elfadil | 08-29-10, 08:01 PM |
| Re: طلعت القمرة - مسلسل أون لاين | Bushra Elfadil | 08-30-10, 01:57 PM |
| Re: طلعت القمرة - مسلسل أون لاين | Bushra Elfadil | 08-31-10, 08:21 AM |
| Re: طلعت القمرة - مسلسل أون لاين | Bushra Elfadil | 08-31-10, 10:23 AM |
| Re: طلعت القمرة - مسلسل أون لاين | Bushra Elfadil | 08-31-10, 08:01 PM |
| Re: طلعت القمرة - مسلسل أون لاين | Bushra Elfadil | 09-01-10, 11:19 AM |
| Re: طلعت القمرة - مسلسل أون لاين | Bushra Elfadil | 09-01-10, 11:26 AM |
| Re: طلعت القمرة - مسلسل أون لاين | Bushra Elfadil | 09-01-10, 02:46 PM |
| Re: طلعت القمرة - مسلسل أون لاين | Bushra Elfadil | 09-02-10, 01:33 AM |
| Re: طلعت القمرة - مسلسل أون لاين | Bushra Elfadil | 09-02-10, 01:48 AM |
| Re: طلعت القمرة - مسلسل أون لاين | Mohamed Abdelgaleel | 09-02-10, 12:50 PM |
| Re: طلعت القمرة - مسلسل أون لاين | Bushra Elfadil | 09-02-10, 02:22 PM |
| Re: طلعت القمرة - مسلسل أون لاين | Bushra Elfadil | 09-03-10, 01:06 PM |
| Re: طلعت القمرة - مسلسل أون لاين | Bushra Elfadil | 09-05-10, 02:45 PM |
|
| |
Bushra Elfadil
فيس بوك
تويتر
انستقرام
يوتيوب
بنتيريست