طلعت القمرة - مسلسل أون لاين

مرحبا Guest
اخر زيارك لك: 05-30-2024, 06:52 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة د.بشري الفاضل(Bushra Elfadil)
نسخة قابلة للطباعة من الموضوع   ارسل الموضوع لصديق   اقرا المشاركات فى صورة مستقيمة « | »
اقرا احدث مداخلة فى هذا الموضوع »
08-23-2010, 07:52 AM

Bushra Elfadil
<aBushra Elfadil
تاريخ التسجيل: 06-05-2002
مجموع المشاركات: 5252

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: طلعت القمرة - مسلسل أون لاين (Re: Bushra Elfadil)




    الحلقة الثالثة عشرة


    الخيط الرئيسي(داليا وأروب)، المشهد 46
    خارجي /مساء
    (اروب يلتقي بداليا العائدة نهاراً من القاهرة جاءت تبحث عنه في مباني الكلية وجاء يبحث عنها التقيا حسب الموعد يلتقيان ويسلمان على بعضهما البعض )
    أروب : ليك وحشة .مشتاقين يا دال
    داليا: بالأكتر يا آروب. مواعيدك تمام زي (فليس فوق) البطل بتاع كتاب Round the World in Eighty Days حول العالم في ثمانين يوماًً
    أورب: ذكرتيني الكتاب دا الناس القبلنا كان بقروهو في المدرسة الوسطى.
    داليا: قصدك المتوسطة
    أروب: لا الوسطى زمان.
    داليا: إنت من زمن الوسطى زمان؟
    أروب: ( يضحك)( ويغير الحديث ) وكيف بالله القاهرة كانت معاك؟ ناس خالتك وعمك كمال إزيهم ؟
    داليا: اسكت ساهي خليها سفرتي دي. ناس خالتي كويسين إلا لكن خالد وراني حاجات عجيبة وسط السودانيين وأصحابم المصريين الشباب في القاهرة.
    اروب : كيف بالله شوقتيني ؟
    داليا:: ديل زي العايشين في أروبا.كان شفتا اللبس كيف والرقيص كيف!(تحكي له وأروب يستمع)
    (تلتقط الكاميرا صورتهما من قريب ثم تبتعد شيئاً فشيئاً عنهما . ولا زالا يتحدثان وسط ضحكات أورب التي ينتهي بها المشهد).
    (قطع)









    الخيط الرئيسي (أروب وداليا)، المشهد 47
    داخلي/ليل
    في الزقازيق
    (داليا وزميلتيها زينب ونجلاء بالشقة)
    داليا: لما كنت في القاهرة خالد ود خالتي أعلن علي الحب
    زينب : على طول كدة بدون سابق إنذار
    نجلاء: وإنتي ؟
    داليا: أنا شنو؟ هو كان مرتبك ماقدر يقول لي كدا إلا في اللحظات الأخيرة ، وأنا جاية جاي . فرملته طبعاً ؛ وجيت حاسة بأني أحرجتو.
    زينب: لا أحرجتيهو ولا حاجة هو الحب دا لعب؟ ما علاقة بين إتنين.
    داليا: القاله لي خالد دا ما الهاميني الخايفا منو إنو هنا أروب يقوم يعلن على مصيبة كمان شايفاهو من قبل سفري للقاهرة مضطرب، يلف ويجي بالكلام.وبطل يقول لي دالية بقى بس ينادينييا دال .
    نجلاء:دال!... دال.. هيي.. هيي.. هيي! (نداء تحذيري بالعامية السودانية)
    زينب: لكن أروب شاب ظريف وما أظنه يخلط بين الصداقة والحب.
    نجلاء : هو في صداقة بين الأولاد والبنات بلاهي ما تسيبونا. (لداليا) يا بت هيي ثبيتيهو.فضيها سيرة بلا لمة. أروب شنو كمان؟
    داليا: تصدقو أروب زول تمام وخايفا يقرب مني أكتر يلقا الصدود يقوم ينجرح والله خايفا عليهو من الإحراج أكتر من خوفي على خالد.
    زينب: يمكن بتحبيهو.
    نجلاء: يا زينب! حب شنو كمان؟
    داليا: لو كنت بحبو كنت قلت ليكم. بس هو عزيز على كصديق وخايفا افقدوا لو وقفتو عند حدو.
    زينب : كلميهو بي صراحة.
    داليا: نشوف
    نجلاء: كلميهو بكرة دي.احسميه.ما تخلي يعشم.
    داليا: نشوف
    (قطع)













    الخيط الرئيسي (داليا واروب)، المشهد 48
    داخلي/نهار
    في مباني كلية الطب
    (اروب يقابل داليا حسب الموعد ويذهبان للكافتيريا)
    أروب : كيف أصبحت يا دال.
    داليا: كويسة. أمس في حاجة ما حكيتا ليك من رحلة القاهرة؟
    أروب : حاجة شنو دي إن شاء الله خير ؟
    داليا : ما كانو دايرين يعلنوا على الحب !
    اروب : كانوا ؟ إعلان جماعي واللا شنو؟
    داليا: خالد ود خالتي مريم في آخر لحظات وأنا جاية على هنا.
    أروب : والله خالد خطير على أطراف تانية.
    داليا : اطراف تانية زي منو؟
    أروب : زي منو دي النقولا ليك اسة والله ما خايف منها اليحصل يحصل أصلو ظروفي دائماً معقدة ؛ يا داليا أنا بشعر من جواي إنو بحبك؟
    (ينظر إليها فيجدها وقد وضعت يديها على وجهها)
    اروب : داليا قلت شنو ؟ قلت شنو؟ معليش فاجأتك وعارف إنو حب عسير الهضم .حب ربما يكون من جانب واحد .زي حب خالد ود خالتك. أصلك إنتي بتتحبي لي كل زول يعرفك. لو كان صدمتك أنا آسف .ولو ماكان كدا يمكن ما يودي للنهاية الطبيعية لأي حب بين بت وولد. إنتي عارفا انا مين أنا عارف حجم الرفض الحيقابلني.
    داليا: شوف يا اروب زي ما إنت كنت شجاع وأعلنت علاقتك بي أهو أنا عايزة أكون قريبة في شجاعتي منك وأقولك ليك أنا عايزة العلاقة بينا تكون صداقة زي ما كانت السنتين دي كلها.صداقة وبس يا أروب . فل ستوب.وبعدين بالجد بالجد أنا ما بعرف الحب بين البت والولد دا ذاتو شنو!
    (يقفز أروب من الكنبة ويتفوه بالعبارة الدينكاوية الشهيرة(
    أروب: وه ! في زول بت واللا ولد ما يفكر في الزواج وتكوين أسرة؟ ليه إنتي قديسة؟
    داليا: إنت صديق عزيز يا أروب وأنا بعتز بي صداقتك.
    أروب: بس؟
    داليا: (تبكي) وهي تقول للأسف بس .أنا في قلبي مافي حاجة تانية أرجوك تفهمني يا أروب(تنزل دمعتان على خدها).
    (أروب يخرج منديل ورق ويناولها له ويقول لها)
    أروب: معليش أسة الناس جاية رايحة ما تبكي نتكلم في الموضوع دا مرة تانية.
    داليا: معليش يا اروب أرجوك الموضوع دا ما تفتحوا معاي مرة تانية.وأتمنى كلامي دا ما يؤثر على صداقتنا المتينة.
    أروب: متينة؟ متينة أيوة نعم لكن ماشة لي وين؟
    داليا: أروب أرجوك تفهمني.
    (يقفان ويتحركان على طول الكافتيريا ومن ثم الشارع المؤدي لشقة داليا وهما في حالة صمت تام).
    أروب : مع السلامة يا داليا
    داليا: مع السلامة يا أروب
    (قطع)











    القريتان – قرية أم جداول ، المشهد 19
    داخلي/نهار
    ( في بيت عبدالكريم جد هناء بام جداول. هناء وبدور تدخلان وتستقبلهما حاجة فاطمة حبوبة هناء وتسلم عليهما وتذهب لتكرم وفادتهما )
    هناء : (تنط برشاقة كرياضية هي تقول لجدتها): حبوبة عليك الله تقعدي انا بسوى الشاي لي بدور .
    حاجة فاطمة: يا بتي استريحي إنتن جيتن من الحر تعبانات.
    بدور : نحن ما تعبانات يا حاجة .(تقول لهناء): هنو بالله كباية موية بس مافي داعي لحاجة تانية.
    (فجاة يسمع صوت فتح لباب الحوش الخارجي (بجر سلكة ) تجيء علوية خالة هناء من بيتها للسلام على هناء وكي تتفقد حاجة فاطمة تسلم علوية على بدور وتسأل) علوية : لكن هناء وينا؟
    (تأتي هناء من داخل المطبخ وهي تحمل كوبي شاي.تذهب حبوبة فاطمة إلى داخل البيت مستأذنة)
    حبوبة فاطمة : النصلي العصر وأجيكن.
    علوية : إزيك يا هنوية إزيك إزيك . شديدة؟
    هناء :أهلاً خالتي علوية . الله يسلمك الله .شديدة.تشير إلى صاحبتها دي بدور صاحبتي القلت ليك عليها زمان.
    علوية : أهلن سلمت عليها دي القلتي لي أهلا ساكنين جنبكم في أم درمان؟
    هناء : لا ديك اسمها داليا برضو صاحبتنا الاتنين. لكن دي بدور .القمرة.
    علوية : أهلاً يا بدور القمرة يا بتي. الله يعافيك.(تلتفت لهناء) إنتي قايلة عرفت بي جيتكن كيف؟ ما كلمني قفة . جاني يجري من نزلتكن من البص ويقول : خالتي علوية البشارة ..البشارة هناء جاااات.عارفا كلامو داك والله في الأول ما فرزت كلامو وبالأول ظنيتكم كلكم رجعتو الحلة .قتا يا خواني أسه ناس زهرا ديل ما مشو الخرطوم كنت داير امشي ليكم في بيتكم اسأل من الحاصل شنو أول ما تحركت قفة قال لي هناء معاها بت غريبة مشت لي بيت ناس حاج عبدالكريم .تراني جيت بي هنا.بركة يا بتي الجيتي تشوفي حبوبتك .صحي كانت متحسسة عافية منك يا بتي الجيتي تفقديها.(هناء تنظر لبدور وتتخاطبان بالعيون)
    بدور: قفة دا منو؟
    هناء : (تضحك) قفة دا راجل لذيذ .هو المذيع بتاع أم جداول .أول زول يوصل أخبار وصول المغتربين لي أهلهم ويحصل على الفيها النصيب لكن كمان بقى يدخل مع وصول المغتربين أي زول يجي الحلا يكون طول منها حتة لو جاء من مدني القريبة دي.
    علوية: قفة ما بريد أخبار زول في الحلة زي اخبار هناء .أول ما تجي يغني ليها. باقي عاجباه بي الحيل
    بدور : يغني ليها؟ يقول شنو؟
    هناء : تحاكيه : طلعت القمرة .الخير يا عشانا تودينا لي هنا. (تضحكان)
    ( قطع)











    القريتان – قرية أم جداول، المشهد 20
    خارجي / ليل
    ( تذهب علوية لبيتهم لكنها تدعو بدور وهناء لزيارتهما غداً .تقول لها هناء إنهما ستـأتيان المغرب لانهما بالنهار ستذهبان لودنفير لزيارة عمتها لتأتايان للمبيت في أم جداول لتسافران من هنا للخرطوم توافق الخالة علوية .)
    علوية (تكمل شرب كوب الشاي) أها ودعتكم الله بكرة بنرجاكم بي شاي المغرب .هيثم ولدي في الحلة بكلمو بي جيتك وصاحبتك يا هناء.(تذهب علوية للداخل لتتفقد حبوبة هناء وتودعها): مع السلامة يا خالتي فاطمة سلمي على عمي عبدالكريم لما يجي .مع السلامة مع السلامة (تخرج مخاطبة هناء وبدور مرة أخرى ): ودعتكم الله.
    البحث عن طه ، مشهد 17
    خارجي/نهار
    بدور في الجامعة (مع ياسر عوض الجيد)
    ياسر : امبارح رحتي وين افتش ليك في أركان النقاش كلها مالقيتك .ما قلتي كان محاضرة واحدة وتبقي فاضية؟
    بدور : مشيت بيتنا .عندنا مرة كبيرة قريبتنا جات من الشمالية عندها مشكلة.
    ياسر : مشكلة؟
    بدور : ولدها رايح من مدة.ولدها الوحيد. كان شفتا حالتها تحنن.والله ما عارفة أعمل ليها شنو؟
    ياسر : ولدها طفل؟
    بدور: عمرو سبعطاشر سنة . ولدتو بعد يمكن حصلت أربعين سنة بعد كم ولدة .والولدتهم كلهم جو ميتين .طه دا جا بعد قربوا ييأسوا من الولادة خلاص .
    ياسر : وراح كيف؟
    بدور: والله ناس البلد بيقولوا أبوه صعب. كان بدقو من هو طفل حتى أمو بيضربها .
    ياسر : والله دي حالة دي.
    بدور : يا ياسر مالك بتعين لي كدا؟ هو انا الرحت ولا ولد حاجة عاشة؟
    ياسر: لا يا بدور .بعاين في وجه القمر بدر البدور
    بدور: الله الله ؟دي مساعدتك لي ياياسر
    ياسر : إنت تقدري تعملي شنو في الحالة دي؟ يفكر بصوت مسموع : نعمل ايه نعمل ايه؟ طيب عندي ليك رأي ايه رايك نروح نعمل إعلان عنو في الإذاعة .
    بدور : والله دي فكرة جميلة يا أبو الأفكار.
    ياسر : أها جينا للسخرية بتاعتك دي؟
    (قطع)










    البحث عن طه ، مشهد 18
    خارجي/نهار
    (بدور سيد احمد وياسر عوض الجيد يذهبان لأم درمان للإعلان عن غياب طه محمد خير).
    ياسر : اسرعي يابدور نحصل قبل نهاية يوم العمل
    بدور : حنحصل .أسة ما بطالبونا بي بطاقات تثبت علاقتنا بالرايح؟
    ياسر : والله فعلاً يمكن ما نقدر نعمل الإعلان بالطريقة الحافة دي.
    بدور : والمصيبة حبوبة عاشة جاية ماعندها ولا حاجة بتثبت إنها أمو
    ياسر : نوع حبوباتنا ديل زي حبوبتك عشة دي
    بدور: عاشة
    ياسر : عاشة .كلو عند العرب صابون (مستدركاً): نحن في الجزيرة بنقول لي عائشة عشة(مواصلاً) نوع حبوباتنا الزي عاشة ديل أوراق ثبوتية توري إنهم سودانيين مافي غير الشلوخ.
    بدور: بس كان عندها باسبورت الحج
    (يدخلان حوش الإذاعة وبعد أقل من نصف ساعة يخرجان)
    بدور : والله لو ما صاحبك منير دا ما كان عملوا لينا الاعلان تعهدو هو المرقنا من الورطة.
    ياسر : أي حاجة منيرة دائماً جميلة وراقية مش كدا ؟ينظر إليها مبتسماً.
    بدور : دي مقبولة منك طالما فيها تورية.
    ياسر : ولو قمت اسه جنب حوش الاذاعة دي وبمناسبة الإذاعة اشتريت ليك شريط يابدور القلعة بتقبليه هدية مني ؟
    بدور :الهدية طبعاً يا ياسر مقبولة .لكن ما لقيت من غنا ود الامين إلا الغنية دي؟ قصدك شنو يعني؟
    ياسر : قاصد ايه كان قصدك ايه
    (قطع)











    باسبار يبحث عن عمل ، مشهد 29
    خارجي/نهار
    (داليا وهي في الإجازة بالخرطوم تخرج من بيتهم مع باسبار بسيارة فخمة يقودها سائق.تخرج داليا مع باسبار من السيارة) داليا: دايرين نشتري ليك ملابس عشان لما تشتغل مع أبوي في العيادة تكون ملابسك نضيفة كويس؟
    باسبار: شكراً يا بت لكن والله دا كتير .انتي الله يبارك فيك.لكن انا كرامة ما ندور شغل ندور.
    داليا: خلاص بعدين لما تشتغل رجع القروش.أسة أرح الدكان حق الملابس أهو داك في الزاوية يلا بينا عليهو(داليا تذهب مع باسبار للسوق بأم درمان وتدخل أحد المتاجر وتشتري له قماش وتذهب للترزي وتطلب منه ان يخيط ثياباً لباسبار على مزاجه باسبار يتناقش مع الترزي الترزي ينظر لباسبار وداليا ويستغرب.داليا وباسبار يخرجان )
    (قطع)
    باسبار يبحث عن عمل، مشهد 30
    داخلي/ليل
    باسبار في عيادة دكتور خليل والد داليا ينظف
    (قطع)



    باسبار يبحث عن عمل، مشهد 31
    داخلي/نهار
    ( داليا تعطي باسبار قروش وتدخله فصل محو الأمية في نادي العمال بالخرطوم يشاهد باسبار وهو يتهجأ )
    (قطع)


    باسبار يبحث عن عمل، مشهد32
    خارجي/نهار
    (باسبار يسكن مع جماعة من شرق السودان بمعرفة السواق.داليا تودعه وتقول له)
    داليا: لو عاوز أي حاجة تعال قول لي.
    باسبار:تاني حاجة ما ندور. الله يبارك فيك يا داليا.
    (قطع)




    باسباريبحث عن عمل ، مشهد 33
    داخلي/ليل
    (موظف الاستقبال في عيادة د. خليل لا يستلطف باسبار)
    موظف الإستقبال : شوف يا باسبار .نحن عندنا عامل نضافة بجي مرتين في الأسبوع ينضف العيادات ديل كلهن .عيادتنا وعيادة دكتور سمير والدكتورة ناهد وكل العيادات الفي المجمع .إنت جابتك داليا بت دكتور خليل هنا وأهو دا قاعد تمامة عدد تلمع في الترابيز .منو القال ليك الترابيز دايرة تلميع؟ دكتور خليل ما داير يحرج بتو عشان كدا إنت قوم قول ليها ما داير شغل بي كدا نحن بنرفدك.
    باسبار : أنا ذاتو سهر ما نقدر صدري تعبان شوية .خلاص نخلص الشهر نكلم الدكتور شغل زي دا ماندور .
    موظف الإستقبال : تخلص الشهر شنو .أس’ الليلة لما يجي كلمو. أنا بديك تلفون داليا بتو كلمها هي في الأول
    باسبار: أنا بمشي ليها في البيت بتاع دكتور ابوها
    (قطع)



    إبراهيم بطيخ ، مشهد 24
    خارجي/نهار
    (إبراهيم بطيخ في الملجة بمدني بعد أن ودع داود وأصحابه وحاج الطيب في أم جداول )
    إبراهيم بطيخ : لصاحب البصل ما تشوفني تقول بقيت شيخ كبير شوال البصل دا بقدر نرفعوا حالاً حالاً في اللوري (يحمل الشوال ويحمله داخل اللوري الأوستن)
    صاحب البصل بعد أن يشاهد عمل إبراهيم : ترى ما عندك عوجة يا هارون.
    إبراهيم : إبراهيم هارون.
    (يشاهد إبراهيم يتحرك في الملجة بنشاط. آخر اليوم يشاهد إبراهيم قرب لوري في الملجة يجلس في ظله وهو يأكل في شرائح كبيرة للبطيخ).
    (قطع)


    نهاية الحلقة الثالثة عشرة
                  

العنوان الكاتب Date
طلعت القمرة - مسلسل أون لاين Bushra Elfadil08-12-10, 03:13 PM
  Re: طلعت القمرة - مسلسل أون لاين محمد المرتضى حامد08-12-10, 03:21 PM
    Re: طلعت القمرة - مسلسل أون لاين Bushra Elfadil08-12-10, 03:30 PM
      Re: طلعت القمرة - مسلسل أون لاين سلمى الشيخ سلامة08-12-10, 09:24 PM
        Re: طلعت القمرة - مسلسل أون لاين هشام كمال08-12-10, 09:53 PM
          Re: طلعت القمرة - مسلسل أون لاين Bushra Elfadil08-13-10, 00:37 AM
        Re: طلعت القمرة - مسلسل أون لاين Bushra Elfadil08-13-10, 00:23 AM
          Re: طلعت القمرة - مسلسل أون لاين سلمى الشيخ سلامة08-13-10, 00:42 AM
            Re: طلعت القمرة - مسلسل أون لاين Bushra Elfadil08-13-10, 05:44 AM
              Re: طلعت القمرة - مسلسل أون لاين سلمى الشيخ سلامة08-13-10, 05:58 AM
                Re: طلعت القمرة - مسلسل أون لاين هشام كمال08-13-10, 07:45 AM
                  Re: طلعت القمرة - مسلسل أون لاين فيصل محمد خليل08-13-10, 08:15 AM
                    Re: طلعت القمرة - مسلسل أون لاين Bushra Elfadil08-13-10, 09:13 AM
                      Re: طلعت القمرة - مسلسل أون لاين Bushra Elfadil08-13-10, 09:19 AM
                        Re: طلعت القمرة - مسلسل أون لاين Abdlaziz Eisa08-13-10, 11:04 AM
                          Re: طلعت القمرة - مسلسل أون لاين Bushra Elfadil08-13-10, 12:50 PM
                            Re: طلعت القمرة - مسلسل أون لاين Bushra Elfadil08-13-10, 01:05 PM
                              Re: طلعت القمرة - مسلسل أون لاين Bushra Elfadil08-13-10, 01:27 PM
                                Re: طلعت القمرة - مسلسل أون لاين Bushra Elfadil08-13-10, 01:53 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                    Re: طلعت القمرة - مسلسل أون لاين Abdlaziz Eisa08-13-10, 03:29 PM
                                      Re: طلعت القمرة - مسلسل أون لاين خدر08-13-10, 05:00 PM
                                        Re: طلعت القمرة - مسلسل أون لاين Bushra Elfadil08-13-10, 07:47 PM
                                          Re: طلعت القمرة - مسلسل أون لاين Bushra Elfadil08-13-10, 07:50 PM
                                            Re: طلعت القمرة - مسلسل أون لاين Bushra Elfadil08-13-10, 07:55 PM
                                              Re: طلعت القمرة - مسلسل أون لاين Bushra Elfadil08-14-10, 09:53 AM
                                                Re: طلعت القمرة - مسلسل أون لاين Bushra Elfadil08-14-10, 10:12 AM
                                                  Re: طلعت القمرة - مسلسل أون لاين محمد المرتضى حامد08-14-10, 11:16 AM
                                                    Re: طلعت القمرة - مسلسل أون لاين Bushra Elfadil08-14-10, 11:54 AM
                                                      Re: طلعت القمرة - مسلسل أون لاين محمد المرتضى حامد08-14-10, 12:06 PM
                                                        Re: طلعت القمرة - مسلسل أون لاين Bushra Elfadil08-14-10, 08:32 PM
                                                          Re: طلعت القمرة - مسلسل أون لاين محمد المرتضى حامد08-14-10, 11:11 PM
                                                            Re: طلعت القمرة - مسلسل أون لاين Bushra Elfadil08-15-10, 08:10 AM
                                                              Re: طلعت القمرة - مسلسل أون لاين Bushra Elfadil08-15-10, 02:39 PM
                                                                Re: طلعت القمرة - مسلسل أون لاين Bushra Elfadil08-15-10, 02:42 PM
                                                                  Re: طلعت القمرة - مسلسل أون لاين Bushra Elfadil08-15-10, 02:51 PM
                                                                    Re: طلعت القمرة - مسلسل أون لاين Bushra Elfadil08-16-10, 08:16 AM
                                                                      Re: طلعت القمرة - مسلسل أون لاين Bushra Elfadil08-16-10, 08:18 AM
                                                                        Re: طلعت القمرة - مسلسل أون لاين Bushra Elfadil08-16-10, 04:48 PM
                                                                          Re: طلعت القمرة - مسلسل أون لاين Safa Fagiri08-16-10, 05:53 PM
                                                                            Re: طلعت القمرة - مسلسل أون لاين Bushra Elfadil08-16-10, 11:37 PM
                                                                              Re: طلعت القمرة - مسلسل أون لاين Bushra Elfadil08-17-10, 11:35 AM
                                                                                Re: طلعت القمرة - مسلسل أون لاين Bushra Elfadil08-17-10, 12:07 PM
                                                                                Re: طلعت القمرة - مسلسل أون لاين Bushra Elfadil08-17-10, 12:09 PM
                                                                                  Re: طلعت القمرة - مسلسل أون لاين Bushra Elfadil08-18-10, 11:53 AM
                                                                                    Re: طلعت القمرة - مسلسل أون لاين Bushra Elfadil08-18-10, 11:59 AM
                                                                                      Re: طلعت القمرة - مسلسل أون لاين Bushra Elfadil08-18-10, 12:04 PM
                                                                                        Re: طلعت القمرة - مسلسل أون لاين Bushra Elfadil08-19-10, 09:44 PM
  Re: طلعت القمرة - مسلسل أون لاين Bushra Elfadil08-20-10, 12:27 PM
    Re: طلعت القمرة - مسلسل أون لاين Sidgi Kaballo08-20-10, 02:34 PM
      Re: طلعت القمرة - مسلسل أون لاين Bushra Elfadil08-20-10, 03:00 PM
        Re: طلعت القمرة - مسلسل أون لاين Bushra Elfadil08-21-10, 08:24 PM
    Re: طلعت القمرة - مسلسل أون لاين Bushra Elfadil08-22-10, 02:06 PM
      Re: طلعت القمرة - مسلسل أون لاين Bushra Elfadil08-22-10, 02:13 PM
        Re: طلعت القمرة - مسلسل أون لاين Bushra Elfadil08-22-10, 02:22 PM
          Re: طلعت القمرة - مسلسل أون لاين Bushra Elfadil08-22-10, 09:52 PM
            Re: طلعت القمرة - مسلسل أون لاين Bushra Elfadil08-23-10, 07:52 AM
              Re: طلعت القمرة - مسلسل أون لاين dardiri satti08-23-10, 10:24 AM
                Re: طلعت القمرة - مسلسل أون لاين Bushra Elfadil08-23-10, 01:00 PM
                  Re: طلعت القمرة - مسلسل أون لاين Bushra Elfadil08-24-10, 01:15 AM
            Re: طلعت القمرة - مسلسل أون لاين طيفور08-26-10, 11:16 PM
  Re: طلعت القمرة - مسلسل أون لاين محمد الكامل عبد الحليم08-24-10, 01:02 PM
    Re: طلعت القمرة - مسلسل أون لاين Bushra Elfadil08-24-10, 02:06 PM
      Re: طلعت القمرة - مسلسل أون لاين Bushra Elfadil08-24-10, 11:35 PM
        Re: طلعت القمرة - مسلسل أون لاين Abdlaziz Eisa08-24-10, 11:47 PM
          Re: طلعت القمرة - مسلسل أون لاين Bushra Elfadil08-26-10, 01:07 AM
            Re: طلعت القمرة - مسلسل أون لاين Bushra Elfadil08-27-10, 04:35 AM
              Re: طلعت القمرة - مسلسل أون لاين عصام دهب08-27-10, 03:20 PM
                Re: طلعت القمرة - مسلسل أون لاين Bushra Elfadil08-27-10, 04:20 PM
                  Re: طلعت القمرة - مسلسل أون لاين عصام دهب08-27-10, 04:33 PM
                Re: طلعت القمرة - مسلسل أون لاين Abdlaziz Eisa08-27-10, 05:47 PM
                  Re: طلعت القمرة - مسلسل أون لاين Bushra Elfadil08-27-10, 07:32 PM
                    Re: طلعت القمرة - مسلسل أون لاين Bushra Elfadil08-28-10, 09:20 PM
                      Re: طلعت القمرة - مسلسل أون لاين Bushra Elfadil08-29-10, 09:31 AM
                        Re: طلعت القمرة - مسلسل أون لاين Bushra Elfadil08-29-10, 07:50 PM
                          Re: طلعت القمرة - مسلسل أون لاين Bushra Elfadil08-29-10, 08:01 PM
                            Re: طلعت القمرة - مسلسل أون لاين Bushra Elfadil08-30-10, 01:57 PM
                              Re: طلعت القمرة - مسلسل أون لاين Bushra Elfadil08-31-10, 08:21 AM
                                Re: طلعت القمرة - مسلسل أون لاين Bushra Elfadil08-31-10, 10:23 AM
                                  Re: طلعت القمرة - مسلسل أون لاين Bushra Elfadil08-31-10, 08:01 PM
                                    Re: طلعت القمرة - مسلسل أون لاين Bushra Elfadil09-01-10, 11:19 AM
                                      Re: طلعت القمرة - مسلسل أون لاين Bushra Elfadil09-01-10, 11:26 AM
                                        Re: طلعت القمرة - مسلسل أون لاين Bushra Elfadil09-01-10, 02:46 PM
                                          Re: طلعت القمرة - مسلسل أون لاين Bushra Elfadil09-02-10, 01:33 AM
                                            Re: طلعت القمرة - مسلسل أون لاين Bushra Elfadil09-02-10, 01:48 AM
                                              Re: طلعت القمرة - مسلسل أون لاين Mohamed Abdelgaleel09-02-10, 12:50 PM
                                                Re: طلعت القمرة - مسلسل أون لاين Bushra Elfadil09-02-10, 02:22 PM
                                                  Re: طلعت القمرة - مسلسل أون لاين Bushra Elfadil09-03-10, 01:06 PM
                                                    Re: طلعت القمرة - مسلسل أون لاين Bushra Elfadil09-05-10, 02:45 PM


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de