طلعت القمرة - مسلسل أون لاين

مرحبا Guest
اخر زيارك لك: 05-30-2024, 01:09 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة د.بشري الفاضل(Bushra Elfadil)
نسخة قابلة للطباعة من الموضوع   ارسل الموضوع لصديق   اقرا المشاركات فى صورة مستقيمة « | »
اقرا احدث مداخلة فى هذا الموضوع »
08-22-2010, 09:52 PM

Bushra Elfadil
<aBushra Elfadil
تاريخ التسجيل: 06-05-2002
مجموع المشاركات: 5252

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: طلعت القمرة - مسلسل أون لاين (Re: Bushra Elfadil)

    الحلقة الثانية عشرة

    الخيط الرئيسي ( داليا وأروب)، المشهد 43
    خارجي /نهار
    (خالد يودع داليا وهم في الطريق للباصات المكيفة.خالد يتشجع ويفاتح داليا)
    خالد: تعرفي يا داليا بصراحة كدا أنا بقت عندي ميول تجاهك.من زمان حاسي بيها لكن إتأكدت في جيتك دي.أوعى اكون فاجأتك.إنت رأيك شنو؟
    داليا: (مرتبكة) :آ . يا خالد ما هدا نحن أصحاب وأنا بت خالتك .عايز شنو أكتر من كدا؟
    خالد : أصحاب دي مفروغ منها لكن كمان ما تكون عقبة أمام تطور علاقتنا.
    داليا : علاقة شنو ؟ بصراحة بصراحة ؟ أنا شايفاك زي أخوي.
    خالد: (يصمت؛ وينقر على عجلة القيادة) . كدا إنت بتصعبي الحكاية؛ على العموم الكلام دا نخليهو أسة نتكلم فيهو في جيتك الجاية.حتجي القاهرة متين؟
    داليا : (وهي لازالت مندهشة) : والله ما عارفا لكن اظنو تاني ما حأجي إلا لما اكون ناوية امشي على السودان .بكلمك بالتلفون بالميعاد وزي ما قلت ليك ناوين نسافر أنا واصحابي وصاحباتي سوا.
    خالد:إذن حأفكر أسافر معاكم.فعلاً ليه لا؟ أسافر معاكم.بكلم بابا وماما.
    (قطع)






    الخيط الرئيسي(داليا واروب)، المشهد 44
    خارجي/ نهار
    في مطعم وقت الغداء
    (أروب ويوسف عبدالباقي في مطعم بالزقازيق)
    أروب: يا ريت سليمان كان جا معانا .
    يوسف : سليمان اليومين دي عندو دريبات.
    أروب : صاحبك وقع وين؟ ما كلمني .
    يوسف : يكلمك ليه؟ وانت كنت كلمتو ولا كلمتني انا؟
    أروب : أنا؟
    يوسف : أيوة إنت. قايلنا غبيانين؟
    أروب : قصدك شنو يعني؟ يا يوسف انت عارف أنا ما بدس عليك ولا على سليمان حاجة. لو قصدك عندي علاقة مثلاً كان كلمتك بيها.
    يوسف: يعني يا اروب عايز تقول لي ما عندك علاقة مع ... مع .....
    اروب : مع منو؟
    يوسف : اقول؟.. أقول ؟ مع داليا.
    أروب: يا خي حرام عليك. والله يا يوسف لوكان الحب بيكون بي علاقة من جانب واحد ممكن تقول البيناتنا وداليا علاقة حب . لكن زي ما إنت شايف أنا كل ما اقرب منها واقول شبكت القاها ليك ما جايبا خبر. داليا ما بتحبني يا يوسف واظنها ما بتعرف حاجة اسمها حب من أساسو. ومن ناحية تانية يا يوسف وانت سيد المفهومية علاقة زول زيي كدى أروب يعني (الجنوبي،الدينكاوي دا) مع بت زي داليا الشمالية بتكون علاقة حساسة شوية ولازم عشان تكون ناجحة تجي من الطرف الآخر.
    يوسف : من داليا يعني؟
    أروب : أيوة
    يوسف : أسألني انا عربي الجزيرة دا زي ما بتقول لي داليا لم تتغاظ مني .أهلنا اهل فراسة وفي الشايفو انا داليا دي بتحبك يا أروب . بختك يا سيد.
    أروب : من خشمك ولي السما.
    يوسف : ما بقولوها كدي .قول من خشمك ولي باب السما.
    أروب :هاها هااااه (يضحك)ويكررها : قصدي زي ما قلت إنت من خشمك ولي باب السما. تصدق يا يوسف أنا الحتة الوحيدة البنكشف فيها إني اتعلمت لغة وثقافة ما حقتي هي الأمثال السودانية دي؟
    يوسف : الله هو دا انت البتنادي بي سودان واحد بعد دعوات الانفصال العديدة دي تجي تقول ثقافة ما حقتك؟
    اروب : لا لا دا ما قصدي .إنت يا يوسف ما تخمني ساهي . لازم تعترف إنو في ثقافات متنوعة في السودان .أنا من انصار الوحدة لكن الوحدة دي في التنوع.
    يوسف: لكن الثقافة العربية دي ثقافتك يا أروب أهو دا إنت بتفهم فيها أكتر مني .
    أروب : يا يوسف أكتر منك كيف؟ سيب التواضع مرض السودانيين دا. أنا كل مرة بقول ليك صحي أنا اتولدت في الخرطوم واتعلمت كلامها زي اهلها لكن لما أدخل في الغريق في الثقافة السودانية البي العربية زي الامثال وتاريخها خصوصاً امثال العامية بنكشف بالجد.
    يوسف : أسة يا اروب إنتو بالله عندكم أمثال الجنوب في الجنوب؟ تصدق أنا ما بعرف ولا مثل جنوبي؟ .
    أروب :مافي حاجة إسمها مثل جنوبي. زي الكتلة الواحدة في الجنوب . الجنوب فيهو قبائل كتيرة وأهلنا في الشمال بعرفو الدينكا والنوير والشلك بس لكن المتخصصين زي البروفيسور الراحل محمد عمر بشير الله يرحمه يعددوا ليك عشرات القبائل. لو كنت تعني ثقافة أهلي انا قصدك أمثال الدينكا؟راقدة بالهبل؛ لكن ما قلت ليك ما بعرف أتكلم دينكاوي؛ واتربيت في وسط تاني مع أهلي الفي الحاج يوسف .البعيد فيهم من العربي بيتكلم بي عربي جوبا بس.والدتي اتوفت وأنا طفل صغير .
    يوسف: كان عمرك كم بالله لما ماتت؟
    أروب:تلاتة سنين .
    يوسف: الله يرحمها خلتك صغير .شوف يا أروب .إنت دينكاوي واللا شلكاوي واللا نويراوي كلو عندي واحد والله ما شايف فيك غير سوداني أخو اخوان.
    أروب : تعرف يا يوسف دي مشاعري تجاهك وتجاه داليا وسليمان وتجاه اصحابي في الحاج يوسف وفي الثانوي وفي أم درمان والخرطوم وهنا في الزقازيق .(يبتسم) وتعرف اسه أنا شايف فيك شنو؟
    يوسف : شنو؟
    أروب: شايف فيك سوداني جيعان (يضحكان). تعال نأكل ياخ إنت عايز تأكلنا نقة ولا شنو الليلة؟يلا قولي لي نأكل شنو أنا عازمك.
    يوسف : لا أنا عازمك .نحتفل بمناسبة صراحتك وحبكانتك دي .بختك.
    أروب : لا أنا مصر على العزومة.(ينادي الجرسون): تعال بالله جيب لينا طلباتنا
    (يقترب الجرسون من طاولة أروب ويوسف).
    يوسف : لا حرم أنا العازمك.كدي قول لي تأكل شنو؟
    أروب : عايز تأكد لي كلام داليا إنك عربي جزيرة ؟ شنو حرم دي؟
    يوسف: خلاص يا أروب خليها على المرة دي (يوسف يكرر للجرسون ما يقوله أروب ويطلب هو ؛ ويبتعد الجرسون لإعداد قائمة الطلبات)
    أروب: وانت يا يوسف ما قلت لي بين كل الشباب في الزقازيق البعرفم شايفك ما بتقرب من أي واحدة بي كلام دقاق ولو بهمسة.
    يوسف: أنا ست الحبايب المالكا قلبي بت في الجزيرة.
    اروب : من حلتكم؟ اسمها شنو هي؟
    يوسف: أيوة من حلتنا ودنفير طالبة.
    أروب: إنت مخلص يا يوسف.
    يوسف: عايزني غير كدا ألعب على حبلين؛ واجهجه بتين؟
    أروب: إنت عارف كتيرين بعملوا كدا.
    يوسف: أنا غايتو ما بعرف حاجة زي دي.
    (قطع)







    الخيط الرئيسي(داليا وأروب) ، المشهد 45
    خارجي/نهار
    (سليمان وأروى في كنبة بكلية حقوق حيث تدرس أورى)
    سليمان: أورى جبريل .أروى جبريل .اسمك حلو زي أسامي الممثلات.
    أورى : دا اسمي الحقيقي لكن الممثلات بختاروا ليهن الأسماء عشان الشهرة.الواحدة تلقى اسمها طويل سلبة يجوا المخرجين وناس السينما يقصقصوه ليك خصوصاً في الأفلام العربية .
    سليمان: إنتي الظاهر أبوك مخرج سينمائي .
    اروى : أنا؟ فعلاً أبوي مخرج لكن ما بتاع فنون هو مخرج أموال.أبوي شغال محاسب في المالية.
    سليمان : يعني انتي ما عندكم مشكلة مع الإعانات وكدا.
    أروى: في دي أخير إنتو .كل صاحباتي قايلني غنيانة لكن في الواقع أنا أول ما تجيني الإعانة تكمل.
    سليمان (يغير الموضوع): تجي يا أروى نمشي الليلة السينما؟
    أروى : دي بمناسبة الإخراج وأسامي الممثلات واللا شنو؟
    سليمان : في فيلم جميل عاجبنا أنا ويوسف وأروب وداليا .داليا اتأخرت في القاهرة .لو ما جات الليلة حنمشي بدونا.
    أروى : أصحابك ديل ظريفين .ممكن أمشي معاكم بس خليني اشوف صاحباتي وواجباتي وبكلمك المسا.
    (ينهضان)
    سليمان : الليلة انا سعيد بالجلسة الحلوة دي معاك يا أروى
    أروى : وأنا الأسعد.
    (قطع)








    القريتان –أم جداول، المشهد17
    خارجي/نهار
    (هناء تجيء لبيت ناس بدور سيد أحمد في الصحافة إتفقتا وبدور للذهاب اليوم الخميس لأم جداول قرية هناء لحسم مسألة خطوبة وليد لهناء)
    هناء : (تدخل بيت ناس بدور وتستقبلها بدور)إزيكم يا خالتو رقية .
    بدور : أهلاً يا هنو . رقية وين ما لسة في المدرسة.
    هناء : ونمش كيف وما نقول ليها.
    بدور : فتحت اضانا للسفرة الخطيرة دي من أمس .
    هناء : وقالت شنو ؟
    بدور : تقول شنو وافقت طبعاً. إنت عارفا رقية ما أمي بس لكن كمان صاحبتي. اسة قلت ننتظر أخواتي يجو نغديهم ونكسح.
    هناء: لكن إذا اتأخرنا بنلقا باصات الحلة في مدني فاتنا.
    بدور: نركب تاكسي على حساب عاصم السفرة دي مش عشان خاطرو .
    هناء والله فكرة.ايه رايك نضرب ليهو نجمركو؟
    بدور : يا بت هيي كلو ولا المعاملات المادية مع المحبين .
    هناء : خلاص نجي نخلصا من ياسر تبعك دا؟
    بدور : بنفكر في طريقة نجيب بيها مشوار التاكسي وتذاكرنا.لكن أسه طبعاً من خزينة بت تاجر سوق ام درمان الصاعد عمو الطيب.
    (تغير الحديث مع هناء)أعمل ليك فطور متأخر واللا غدا بدري؟
    هناء : والله ما عايزة حاجة ممكن كباية موية.
    بدور: خلاص شاي .شاي .
    هناء : ياللا ادبغينا بيهو في النهار الحار دا.
    بدور : عصير طيب.
    هناء : لا شاي بالنعناع.
    (تأتي أخوات هناء فتعد لهم "رشوشة" على عجل والشاي وتساعدهما في تغيير ملابسهن .قبل ان تتحرك هناء وبدور تأتي رقية وتسلم على هناء بمودة.وتقول لها)
    رقية : بدور دي أمانة في رقبتك يا هناء ما تمشي تلقى همبريب الجزيرة دي وتقعد تنطلق.تجن تقولن لي بي كل الحاصل. قالت دايرات تمشن تشوفن حبوبتك يا هناء إن شا الله ما عندها عوجة؟
    هناء : لا لا حاجة فاطمة كويسة كانت عيانا الأسبوع الفات وقلتا أمشي أشوفا.معليش يا خالتي أستلف منك بدور يومين.
    رقية : قولي تريحيني من نقتها يومين .
    ( يضحكن)
    ( تودعان رقية أم بدور والبنيات وتخرجان نحو السوق الشعبي . تستأجران تاكسياً لزوم العجلة .منظر لهما داخل بص سياحي متجه لمدني . منظر لهما في الكاملين . منظر في موقف بصات الخرطوم بمدني .الشوق الشعبي خارج مدني. منظر لهما تستاجران عربة أجرة لقرية أم جداول)
    ( قطع )






    القريتان (أم جداول)، المشهد 18
    خارجي/نهار
    (بدور تصل مع هناء لقرية أم جداول .وتعجبها القرية )
    بدور : الله .حلتكم دي روعة يا هناء . ريف انجليزي بس.
    هناء : إنت الريف الانجليزي شفتي وين؟
    بدور :افلام السينما ما كفاية؟
    هناء : استني خلي الواطا تمسي وتجيك البعوضة.(تستدرك ) لكن يا بت ما أخوفك ساكت . بيتنا فيهو ناموسيات. نجي نفتحوا بعد نشيل المفتاح من ناس جدي وناخدها معانا.بيتنا كمان فيهو نملية لكن ناس جدي عبدالكريم ما بخلونا نبيت فيهو انا وإنتي برانا.
    بدور : وناس جدك ما عندهم ناموسيات؟
    هناء : ناس جدي عبدالكريم ما بحبوا الناموسيات. وإن كان لي حبوبة فاطمة قهي زولة زيت سمسم ساه لو جبتي ليها كريم نيفيا ولا فازلين تقول ليك ابعدي اللواغيس دي مني.
    بدور : فعلاً الناس الكبار عندهم مقاومة لي كل جديد. في مرة في تمري أمي حكت لي عنها ما بتشرب الشاي بالسكر .تشربو بالبلح والرطب
    هناء : ومالو احسن حاجة .عجوة معطونة في عسل.
    بدور : نفسي اشوف الكنار والترعة الحكيتي لي عنهم والمزارع .القناة هنا زي قناة بيكة المرينا بيها؟ في بيكة كانت لما شفت القنال لما مرينا فوق الكوبري الموية رهيبة.بحر بس .
    هناء : قنال السويس؟ نحن هنا بنقول ليه كنار بيكا وكنار أم جداول . صحي كنار ام جداول ما قدر كنار بيكا لكن ما صغير برضو ومويتو طول السنة جارية إلا ايام الصيف مرات بتنقطع شوية.المزارع هنا اسمها الحواشات.إنتي يا بدور من الخرطوم ما مرقتي ؟ ناس الخرطوم ما بعرفوا إلا الريف الحواليها وحتى دا بعرفوهو طشاش طشاش وبتخيلوا كل باقي القرى السودانية التانية زيو.
    بدور : خرطوم شنو؟ والله اسة تخليني اقول ليها"قشرون" زي ما بتقول حبوبة عاشة للحاجات المكجناها.
    هناء : إنتي ما مولودة في الخرطوم؟
    بدور : مولودا في الخرطوم لكن كل زول من أهلي مولود في بلد.أمي مولودة واتربت في بورتسودان .أصولن القديمة من الشمالية لكن ما عاشت في الخرطوم إلا لما اتزوجت وأبوي جا من تمري .
    بدور : يعني أمك وأبوك ما بيناتم قرابة؟
    بدور : قرابة وين مافي حاجة بتلمهم.وإنتي حسة ابوك قريب أمك؟
    هناء : يعني بتلمهم القبيلة الكبيرة.نحن خوالدة.
    بدور : الخوالدة ديل فرع من ياتو قبيلة؟بشوف ناس حلتكم حمر حمرواللا فيكم عرق من الحلب؟
    هناء : بطلي التقريعة في أهلي وإنت جيتي الليلة وسطهم.واللا أسة اقوم انده ليك فرسان القبيلة.
    بدور : عليك الله يا هناء يا خالدية إنت بتحسي بي نزعة قبلية.
    هناء : أبداً ابداً.
    بدور : وانا كمان.
    هناء : خلاص تعالي نحتفل بسودانيتنا في أم جداول .
    بدور : تعالي
    هناء : يلا بينا يا قمرة نوديك تسلمي على حبوبة فاطمة وجدي عبدالكريم.بعداك لو الواطا ما أمست نمشي بعند الشارع القدام بيتهم لمشوار تاني
    بدور : الشارع القدام بيت منو؟ بيت منو؟
    هناء : يعني عاملا لي فيها غبيانة؟
    بدور: (بفرح ) الله بي كدا تكون أم جداول أم الدنيا فيها أجمل حبيبة وأجمل حبيب .
    هناء : اجمل حبيبة عبارة اشكرك عليها وعرفناها خلاص لكن اجمل حبيب منو؟
    بدور : يعني عاملا ليفيها غبيانة؟ ما عارفاهو؟
    هناء : ياسر ؟
    بدور : لا عاصم.
    (قطع)









    البحث عن طه ، مشهد 15
    خارجي/نهار
    (حاجة عاشة تقوم حال خروج رقيةوبدور من البيت بالخروج لوحدها وتمسح حي الصحافة)
    حاج عاشة تخاطب صاحب بقالة: يا وليدي ما شفت ليك وليداً أخضر رهيفوني اسمه طه؟
    صاحب البقالة : ولدك؟
    حاجة عاشة : أيي.
    صاحب البقالة : مالو راح واللا شنو؟
    عاشة :مرق من بيتنا في بلدن يقولولا تمري في الشماليي .
    صاحب البقالة: تمري بعرفا بلد المرحوم سيدأحمد.
    عاشة : هي نان يا وليدي سيد أحمد دا الله يرحمو ما ولد أختي.
    صاحب البقالة : ولد أختك؟ الله يرحمه ويغفر ليهو .الله يرحمو ويغفر ليهو. كان راجل طيب.
    عاشة: (تتحرك بهدف الابتعاد عن صاحب البقالة نحو محطة سؤال أخرى عن ولدها الضائع.صاحب البقالة ينظر إليها في ظهرها بأسى .عاشة في منتصف الخمسينات)
    صاحب البقالة : (يناديها كي ترجع فتلتفت إليه وهي واقفة) : با حاجة كدا بتتعبي ساكت وما بتلقيهو البلد دي الخرطوم كرش فيل كبيرة خلاص .أخير ترجعي البيت وأنا بالمسا بجي لي رقية ونشوف طريقة مع أهل الخير في الحي نفتش ليهو كيف .
    عاشة : سمح يالحبيب .أنتو يا يمة تتباركو.(ترجع)
    (قطع)








    باسبار يبحث عن عمل ، مشهد 27
    داخلي/ليل
    داليا وأمها وحدهما:
    أنصاف عبدالحميد: يا داليا الولد دا صادفتيهو وين جبتيهو كدا عاملا روحك المسيحية دي؟
    داليا: مسيحية ولا اسلامية ما ياها الروح الغرستوها فينا إنت وبابا وجيلكم دا .يا جيل اكتوبر(تغني : ولسة بنهتف يا اكتوبر لما يهل .التقى جيل البطولات بجيل التضحيات.وتتحرك وترقص برشاقة)
    انصاف : كدي اقيفي اقيفي وناوية تساعديه كيف وانت جيتي اجازة وراجعة؟
    داليا: قلت نشوف أبوي كدا يمكن نباصر ليه فرقة في العيادة.
    إنصاف: العيادة؟
    داليا: ايوة لو قلت لي بابا يشغلوا ينضف ليهو عيدتو الما مرتبة دي ما اظنوا يرفض .
    إنصاف: هو زولك الجبتيهو دا مرتب لمان يرتب ليهو عيادة؟
    داليا : بكرة بقبض مرتبو الأول وحتشوفيهو كيف يترتب ويبقى مرطب؟
    انصاف: دا شنو الكلام الكلو رطب رطب رطب دا؟ يا بت إنتي شاعرة؟
    داليا: ياريت.
    (قطع )




    باسبار يبحث عن عمل ، مشهد 28
    داخلي/ليل
    دكتور خليل والد داليا: يا داليا مشاكل السودان ما بحلوها بالطريقة دي .
    داليا : يا بابا يعني ناس الشرق ديل عندكم حالة ذهنية؟
    د.خليل :حالة ذهنية؟ إنتو الكلام دا بتجيبوهو من وين ؟والله آه من اركان النقاش مش كدا؟
    داليا: والله يا بابا حالتو تحنن كدي عليك الله ناديهو وشوفو كيف وبالاول بالله عليك يا بابا تشكف ليهو كشف عام عشان خاطري يا بابا.
    دكتور خليل : دي ما حلول فردية يا دال؟ يا إنصاف إنصاف تعالي شوفي بتك مصلحة العالم دي!( يجيئه صوت انصاف وهي تضحك من الداخل)
    انصاف: خلاص المرة دي يا خليل شغل ليها دا كمان عشان ما تتكسف وهي راجعا لي جامعتها .
    دكتور خليل: (يلتفت نحو داليا) ولو عاصم أخوك جانا بي طلب تاني شرحو نعمل معاه ايه؟
    داليا : دي حالة افتراضية يا أبوي .
    دكتور خليل : حالة افتراضية؟ إنتو الكلام دا بتجيبوهو من وين؟ والله آه أركان النقاش.
    (قطع)







    إبراهيم بطيخ ، المشهد23
    داخلي/ليل
    إبراهيم (يسلم على جماعة من جماعتهم جاءوا حديثاً للعمل بالجزيرة ويقول لهم ) : الجزيرة دي كان زمان دحين وين الشغل فيها؟ المزارعين بقوا ما عندهم قروش والحواشات كلها ديون .
    أحد الشباب القادم حديثاً : جيت نسلم على عمي اساغة هنا . البلد هناك بقى صعب .عيش مافي . المطر ما جا والبهايم كلها ماتت.
    إبراهيم بطيخ:لا حول ولاقوة إلا بالله. ( مخاطباً داود) باكر يا داود أخيي تروح معاهم لي ود نفير عند حاج التوم قالوا عندو حش في حواشة العيش وانا بمشي لي أم جداول لي حاج عبدالكريم اخليهو يشغلهم معاهو في حش الجنينة التجارب .(ملتفتاً للشباب ) إنتو جيتو في الخريف مافي غير الحش ولما يطلع حش القطن كمان تلقوا شغل لكن الجزيرة دي بقى قروش ما فيها والله انا قايل حقو تمشو الخرتوم ساي زي ما عملو ناس آدم وإدريس وذكريا الجونا هنا السنة الفاتت.
    (قطع)


    نهاية الحلقة الثانية عشرة
                  

العنوان الكاتب Date
طلعت القمرة - مسلسل أون لاين Bushra Elfadil08-12-10, 03:13 PM
  Re: طلعت القمرة - مسلسل أون لاين محمد المرتضى حامد08-12-10, 03:21 PM
    Re: طلعت القمرة - مسلسل أون لاين Bushra Elfadil08-12-10, 03:30 PM
      Re: طلعت القمرة - مسلسل أون لاين سلمى الشيخ سلامة08-12-10, 09:24 PM
        Re: طلعت القمرة - مسلسل أون لاين هشام كمال08-12-10, 09:53 PM
          Re: طلعت القمرة - مسلسل أون لاين Bushra Elfadil08-13-10, 00:37 AM
        Re: طلعت القمرة - مسلسل أون لاين Bushra Elfadil08-13-10, 00:23 AM
          Re: طلعت القمرة - مسلسل أون لاين سلمى الشيخ سلامة08-13-10, 00:42 AM
            Re: طلعت القمرة - مسلسل أون لاين Bushra Elfadil08-13-10, 05:44 AM
              Re: طلعت القمرة - مسلسل أون لاين سلمى الشيخ سلامة08-13-10, 05:58 AM
                Re: طلعت القمرة - مسلسل أون لاين هشام كمال08-13-10, 07:45 AM
                  Re: طلعت القمرة - مسلسل أون لاين فيصل محمد خليل08-13-10, 08:15 AM
                    Re: طلعت القمرة - مسلسل أون لاين Bushra Elfadil08-13-10, 09:13 AM
                      Re: طلعت القمرة - مسلسل أون لاين Bushra Elfadil08-13-10, 09:19 AM
                        Re: طلعت القمرة - مسلسل أون لاين Abdlaziz Eisa08-13-10, 11:04 AM
                          Re: طلعت القمرة - مسلسل أون لاين Bushra Elfadil08-13-10, 12:50 PM
                            Re: طلعت القمرة - مسلسل أون لاين Bushra Elfadil08-13-10, 01:05 PM
                              Re: طلعت القمرة - مسلسل أون لاين Bushra Elfadil08-13-10, 01:27 PM
                                Re: طلعت القمرة - مسلسل أون لاين Bushra Elfadil08-13-10, 01:53 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                    Re: طلعت القمرة - مسلسل أون لاين Abdlaziz Eisa08-13-10, 03:29 PM
                                      Re: طلعت القمرة - مسلسل أون لاين خدر08-13-10, 05:00 PM
                                        Re: طلعت القمرة - مسلسل أون لاين Bushra Elfadil08-13-10, 07:47 PM
                                          Re: طلعت القمرة - مسلسل أون لاين Bushra Elfadil08-13-10, 07:50 PM
                                            Re: طلعت القمرة - مسلسل أون لاين Bushra Elfadil08-13-10, 07:55 PM
                                              Re: طلعت القمرة - مسلسل أون لاين Bushra Elfadil08-14-10, 09:53 AM
                                                Re: طلعت القمرة - مسلسل أون لاين Bushra Elfadil08-14-10, 10:12 AM
                                                  Re: طلعت القمرة - مسلسل أون لاين محمد المرتضى حامد08-14-10, 11:16 AM
                                                    Re: طلعت القمرة - مسلسل أون لاين Bushra Elfadil08-14-10, 11:54 AM
                                                      Re: طلعت القمرة - مسلسل أون لاين محمد المرتضى حامد08-14-10, 12:06 PM
                                                        Re: طلعت القمرة - مسلسل أون لاين Bushra Elfadil08-14-10, 08:32 PM
                                                          Re: طلعت القمرة - مسلسل أون لاين محمد المرتضى حامد08-14-10, 11:11 PM
                                                            Re: طلعت القمرة - مسلسل أون لاين Bushra Elfadil08-15-10, 08:10 AM
                                                              Re: طلعت القمرة - مسلسل أون لاين Bushra Elfadil08-15-10, 02:39 PM
                                                                Re: طلعت القمرة - مسلسل أون لاين Bushra Elfadil08-15-10, 02:42 PM
                                                                  Re: طلعت القمرة - مسلسل أون لاين Bushra Elfadil08-15-10, 02:51 PM
                                                                    Re: طلعت القمرة - مسلسل أون لاين Bushra Elfadil08-16-10, 08:16 AM
                                                                      Re: طلعت القمرة - مسلسل أون لاين Bushra Elfadil08-16-10, 08:18 AM
                                                                        Re: طلعت القمرة - مسلسل أون لاين Bushra Elfadil08-16-10, 04:48 PM
                                                                          Re: طلعت القمرة - مسلسل أون لاين Safa Fagiri08-16-10, 05:53 PM
                                                                            Re: طلعت القمرة - مسلسل أون لاين Bushra Elfadil08-16-10, 11:37 PM
                                                                              Re: طلعت القمرة - مسلسل أون لاين Bushra Elfadil08-17-10, 11:35 AM
                                                                                Re: طلعت القمرة - مسلسل أون لاين Bushra Elfadil08-17-10, 12:07 PM
                                                                                Re: طلعت القمرة - مسلسل أون لاين Bushra Elfadil08-17-10, 12:09 PM
                                                                                  Re: طلعت القمرة - مسلسل أون لاين Bushra Elfadil08-18-10, 11:53 AM
                                                                                    Re: طلعت القمرة - مسلسل أون لاين Bushra Elfadil08-18-10, 11:59 AM
                                                                                      Re: طلعت القمرة - مسلسل أون لاين Bushra Elfadil08-18-10, 12:04 PM
                                                                                        Re: طلعت القمرة - مسلسل أون لاين Bushra Elfadil08-19-10, 09:44 PM
  Re: طلعت القمرة - مسلسل أون لاين Bushra Elfadil08-20-10, 12:27 PM
    Re: طلعت القمرة - مسلسل أون لاين Sidgi Kaballo08-20-10, 02:34 PM
      Re: طلعت القمرة - مسلسل أون لاين Bushra Elfadil08-20-10, 03:00 PM
        Re: طلعت القمرة - مسلسل أون لاين Bushra Elfadil08-21-10, 08:24 PM
    Re: طلعت القمرة - مسلسل أون لاين Bushra Elfadil08-22-10, 02:06 PM
      Re: طلعت القمرة - مسلسل أون لاين Bushra Elfadil08-22-10, 02:13 PM
        Re: طلعت القمرة - مسلسل أون لاين Bushra Elfadil08-22-10, 02:22 PM
          Re: طلعت القمرة - مسلسل أون لاين Bushra Elfadil08-22-10, 09:52 PM
            Re: طلعت القمرة - مسلسل أون لاين Bushra Elfadil08-23-10, 07:52 AM
              Re: طلعت القمرة - مسلسل أون لاين dardiri satti08-23-10, 10:24 AM
                Re: طلعت القمرة - مسلسل أون لاين Bushra Elfadil08-23-10, 01:00 PM
                  Re: طلعت القمرة - مسلسل أون لاين Bushra Elfadil08-24-10, 01:15 AM
            Re: طلعت القمرة - مسلسل أون لاين طيفور08-26-10, 11:16 PM
  Re: طلعت القمرة - مسلسل أون لاين محمد الكامل عبد الحليم08-24-10, 01:02 PM
    Re: طلعت القمرة - مسلسل أون لاين Bushra Elfadil08-24-10, 02:06 PM
      Re: طلعت القمرة - مسلسل أون لاين Bushra Elfadil08-24-10, 11:35 PM
        Re: طلعت القمرة - مسلسل أون لاين Abdlaziz Eisa08-24-10, 11:47 PM
          Re: طلعت القمرة - مسلسل أون لاين Bushra Elfadil08-26-10, 01:07 AM
            Re: طلعت القمرة - مسلسل أون لاين Bushra Elfadil08-27-10, 04:35 AM
              Re: طلعت القمرة - مسلسل أون لاين عصام دهب08-27-10, 03:20 PM
                Re: طلعت القمرة - مسلسل أون لاين Bushra Elfadil08-27-10, 04:20 PM
                  Re: طلعت القمرة - مسلسل أون لاين عصام دهب08-27-10, 04:33 PM
                Re: طلعت القمرة - مسلسل أون لاين Abdlaziz Eisa08-27-10, 05:47 PM
                  Re: طلعت القمرة - مسلسل أون لاين Bushra Elfadil08-27-10, 07:32 PM
                    Re: طلعت القمرة - مسلسل أون لاين Bushra Elfadil08-28-10, 09:20 PM
                      Re: طلعت القمرة - مسلسل أون لاين Bushra Elfadil08-29-10, 09:31 AM
                        Re: طلعت القمرة - مسلسل أون لاين Bushra Elfadil08-29-10, 07:50 PM
                          Re: طلعت القمرة - مسلسل أون لاين Bushra Elfadil08-29-10, 08:01 PM
                            Re: طلعت القمرة - مسلسل أون لاين Bushra Elfadil08-30-10, 01:57 PM
                              Re: طلعت القمرة - مسلسل أون لاين Bushra Elfadil08-31-10, 08:21 AM
                                Re: طلعت القمرة - مسلسل أون لاين Bushra Elfadil08-31-10, 10:23 AM
                                  Re: طلعت القمرة - مسلسل أون لاين Bushra Elfadil08-31-10, 08:01 PM
                                    Re: طلعت القمرة - مسلسل أون لاين Bushra Elfadil09-01-10, 11:19 AM
                                      Re: طلعت القمرة - مسلسل أون لاين Bushra Elfadil09-01-10, 11:26 AM
                                        Re: طلعت القمرة - مسلسل أون لاين Bushra Elfadil09-01-10, 02:46 PM
                                          Re: طلعت القمرة - مسلسل أون لاين Bushra Elfadil09-02-10, 01:33 AM
                                            Re: طلعت القمرة - مسلسل أون لاين Bushra Elfadil09-02-10, 01:48 AM
                                              Re: طلعت القمرة - مسلسل أون لاين Mohamed Abdelgaleel09-02-10, 12:50 PM
                                                Re: طلعت القمرة - مسلسل أون لاين Bushra Elfadil09-02-10, 02:22 PM
                                                  Re: طلعت القمرة - مسلسل أون لاين Bushra Elfadil09-03-10, 01:06 PM
                                                    Re: طلعت القمرة - مسلسل أون لاين Bushra Elfadil09-05-10, 02:45 PM


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de