طلعت القمرة - مسلسل أون لاين

مرحبا Guest
اخر زيارك لك: 05-30-2024, 03:48 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة د.بشري الفاضل(Bushra Elfadil)
نسخة قابلة للطباعة من الموضوع   ارسل الموضوع لصديق   اقرا المشاركات فى صورة مستقيمة « | »
اقرا احدث مداخلة فى هذا الموضوع »
08-12-2010, 03:13 PM

Bushra Elfadil
<aBushra Elfadil
تاريخ التسجيل: 06-05-2002
مجموع المشاركات: 5252

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
طلعت القمرة - مسلسل أون لاين

    كتبت مسلسل طلعت القمرة قبل أكثر من سنتين واشتركت به في مسابقة لقناة تلفزيونية سودانية لكنه للأسف لم يفز. وأرسلته لعدد من الأصدقاء المشتغلين بالدراما والإبداع فيها تمثيلاً وكتابة واخراجاً. ولأن الزمن يمضي والاستفتاء على الابواب والشخصية الرئيسية في هذا العمل اسمها أروب رأيت أن تشاركوني الاطلاع عليه كأصدقاء وزملاء وقراء وكتاب ومبدعين في مجالات أخرى.أرجو المساعدة عن طريق النقد الموجع او الإشارة بوقف نشر الحلقات وهي 30 حلقة حتى لا ازحم المنبر بعمل ملتبس كهذا ؛ ومتناقضة حتى الآن الانطباعات حوله.و سأختصر الحوار ما أمكن.
    تقديم:
    زمن المسلسل أواخر الثمانينات حتى مطلع الألفية






    الفكرة العامة:
    يناقش المسلسل التسامح بين مختلف فئات المجتمع؛ المتغيرات الجديدة في المجتمع السوداني ؛ وقضايا أخرى مثل مشكلة الفقر والعطالة ومشكلة العنف الأسري في الحياة السودانية.






    1- الخيط الرئيسي للمسلسل( داليا وأروب)
    داليا خليل امدرمانية بنت طبيب, أمها أستاذة جامعية هي الدكتورة إنصاف عبد الحميد . تسكن في حي راقِ بأم درمان. أروب ابن ضابط صف من الجنوب ولد في الخرطوم يسكن في حي بأطراف العاصمة (الحاج يوسف).أروب جنوبي مسلم مهندم وعلى ملامحه وسامة واضحة . داليا الأمدرمانية ذات الأصول النوبية الشمالية المنسية تتعرف على أروب ويصبح زميل دراستها في مصر لمدة ست سنوات تتطور فيها علاقتهما إلى حد الزواج.لم تقبل داليا بعلاقة الحب في البداية لكن حين قبلت بها وقفت في طريق جميع الرافضين كالصخرة . اعترضت أمها الأستاذة الجامعية و اعترض الأب بشدة لكن قبلت الأم فيما بعد على مضض واعترض أعمام وأخوال داليا وكافة أهلها .كان هناك اعتراض من جانب أهل أروب أيضاً لكنه أقل . صوت هذا الاعتراض لم يصل لأهل داليا. مناقشة مجمل حالات الرفض بحجج مختلفة يشكل لحمة الخيط الرئيسي للمسلسل ومع ذلك فالزواج يتم للتأكيد على قوة شكيمة الاجيال الجديدة في المجتمع السوداني. الزواج يتم عندما يكونان بالصف الرابع . يقضيان سنتين بالزقازيق وهما في غاية السعادة. أحياناً تحصل مشاكل بينهما كما في كل أسرة لكن وقبل الزواج كان لديهما عهد أطلقا عليه مسمى ( العهد الأسمراني ).اقترحت داليا الاسم حيث كانا يستمعان إلى أغنية أسمر جميل للكاشف .داليا رأت أن يتم تغيير الاسم من أجل الوفاء للزقازيق وعبدالحليم حافظ.
    يقضي العهد الأسمراني بأن لا يشير أي من الطرفين لا من بعيد أو قريب على الاختلاف القبلي أو العرقي بينهما متى ما نشبت مشكلة عائلية وأن يعالجا المشكلة في حدود أنها مشكلة أسرية فقط.
    في القاهرة داليا تصد بلطف ابن خالتها الذي حاول التودد إليها ويبدو أنه أعلن الحب عليها ولذا فيما بعد لم يتقبل زواجها من أوروب .
    كمال خالد زوج مريم وقف ضد الزواج منذ البداية وكانت حجته بأنه زواج غير متكافيء وأخيراً صار يجاهر باختلاف الاعراق كما كان يقول لوالد داليا.
    مريم خالة داليا لزمت الصمت تجاه الزواج .لم تقل إنها ضد ولا مع . لم تكن تخاف زوجها لكنها كانت تخاف من داليا وأختها انصاف .مريم دائما كانت تعتقد أن اختها انصاف المندفعة سياسياً هي السبب وراء التطرف في قرارات داليا. والد أروب ضابط صف كان قد اسلم و مات في الحرب بالجنوب مع القوات الصديقة .أروب معترض على حرب الحكومة في الجنوب لكنه مؤيد في الخفاء لحملة السلاح(المتمردين) في الجنوب .داليا لديها موقفها أيضاً الرافض للحرب دون تأييد لحملة السلاح . في هذا الخيط يظهر الطلبة الذين يدرسون بالزقاريق بمصر مع داليا وأروب وهم زملاء الدراسة في البدء وأصدقاء فيما بعد يوسف عبد الباقي من
    الجزيرة (ودنفير)، سليمان من سنار، أنجيلا من جوبا. الماحي من القضارف، عبد اللطيف شريف من كسلا، عثمان تاج السر من منطقة شندي
    نتعرف في المسلسل على عدة خيوط ثانوية:



    2 - خيط باسبار من شرق السودان
    وهو شاب باحث عن عمل دون جدوى طوال حلقات المسلسل.تساعده في نهاية المسلسل الطالبة داليا للعمل في عيادة والدها الأخصائي.



    3- خيط البحث عن طه
    وطه مراهق من شمال السودان خرج من بيت أهله ولم يعد .تبحث عنه أمه الحاجة عاشة طوال المسلسل.تجده في آخر المسلسل بمساعدة أورب في سوق كونجا- كونجي بجوبا





    4- خيط القريتين (أم جداول وودنفير)
    قريتا أم جداول وودنفير بالجزيرة -الاسمان متخيلان. أم جداول أكبر من ودنفير وخدماتها أكثر- نتعرف من خلالهماعلى حياة الناس في قرى المشروع وفي القرى السودانية .وفيهما شخصيات هناء الطيب عبدالكريم شابة جميلة يتنافس عليها شبان المنطقة وتدرس بآداب بجامعة الخرطوم تقوم بدور تنويري في القرية. وجبارة وهو شخصية من ذوي الحالات الخاصة يطلق عليه الأطفال (قفة) (بمعنى سلة سعف)؛ لكن بمودة وهو في المسلسل للكشف عن شخصية هناء التي يتنافس على خطبتها شباب القرية وفي النهاية يقترب منها عاصم شقيق داليا طالب المعمار ، الذي يلتقيها في الجامعة فهي طالبة بقسم أمه، ويتزوجها .وشخصية وليد في ودنفير ووالده عوض الجزار وأمه آسيا وشخصيات أخرى من القريتين.




    -5 خيط ابراهيم هارون الشهير بإبراهيم بطيخ
    وهو شيخ جاء من منطقة ######س في الحدود بين دارفور وتشاد جاء للجزيرة منذ كان شاباً للعمل في لقيط القطن والعمليات الزراعية الأخرى في البداية كان إبراهيم يسكن في بيوت القصب وسط الحواشات البور قرب الحواشات المزروعة وفي منتصف المسلسل أصبح ابراهيم يسكن في كمبو الترعة الذي هو من بيوت مبنية من الطين فوق الترعة وتوجد الكثير من مثل هذه الكنابي بالجزيرة مثل كمبو طويل بالقرب من قريتي زنقاحة وقنطرة ودالبر بالجزيرة في الواقع. في المسلسل نشير إلى اسم هذا الكمبو باسم كمبو الترعة .ظل ابراهيم هارون بالجزيرة دون أن يعود.نصوره في حالة علاقة دائمة مع البطيخ في المسلسل نازلاً به من بصات الجزيرة أو وهو يشتريه من سوق الصباح أمام الجزارة في قرية أم جداول وأحياناً يذهب له في قرية ودنفير على بعد ثلاث كيلومترات .وأحيانا إلى سوق المدينة عرب وسوق الحصاحيصا وسوق ودرعية .في آخر المسلسل يجدون ابراهيم بطيخ ميتاً قرب مسجد بالحصاحيصا.
    اللغة العامية في المسلسل حاولنا رصدها حسب المناطق في الجزيرة يتكلمون مثل عامية أمدرمان تقريباً إلا في بعض الكلمات وفي بعض الأصوات وتصورات أغلب الكتابات الدرامية عن لغة أبناء القرى خاطئة في نظرنا. يجب في المسلسل مراجعة لغة باسبار البداويت (البجاوي أو الهدندوي) مع مختص في عامية البداويت.و مراجعة عامية إبراهيم هارون عندما جاء أول مرة من دارفور مع مختص في عامية أهل دارفور أما عامية الشمالية فلغة الكاتب وكذلك لغة الجزيرة لأن أهله من المنطقتين.




    اسم المسلسل (طلعت القمرة) مستوحى من مطلع اغنية سودانية كانت تذاع ضمن برنامج (من ربوع السودان) في الستينات والسبعينات .الاغنية شهيرة وتقول كلماتها
    طلعت القمرة (تقرأ القمرا بمد طويل )
    الخير يا عشانا تودينا لي اهلنا
    بسألوك مننا
    أقترح أن تكون موسيقى إفتتاح المسلسل من هذه الأغنية بآلات حديثة مع صوت حنان النيل إن تعذر وجود صوت مغنيها الأصلي مدني صالح.








    الحلقة الأولى
    الخيط الرئيسي للمسلسل ( داليا وأروب) ، المشهد الأول
    خارجي/نهار
    المكان مكتب الخطوط السودانية بوسط الخرطوم
    الزمان أواخر الثمانينات
    الوقت منتصف النهار
    (يلتقي كل من داليا وأروب ويوسف وسليمان وهم لا يتعارفون في مكتب الخطوط السودانية في أواخر الثمانينات بالخرطوم كي يشتروا تذاكر للسفر للقاهرة).
    داليا (في منتصف الصف وسط الزحام تتعرض لدفرة مفاجئة من أحدهم ويقع منها جواز السفر ومحفظتها على الأرض تلتفت لترى أقرب الواقفين منها في الصف هو أروب شاب من جنوب السودان): يا خينا بتدافر مالك ؟رميت حاجاتي!
    أروب (يتكلم بلهجة الخرطوم المولود فيها): معليش يا شابة زي ما شايفا الزحمة.
    داليا (بامتعاض): كان ممكن تتمالك نفسك شوية .
    أروب: إنتي بتفتكري أنا قاصد واللا شنو؟ كدي عايني شوفي الناس ديل بيدافروا كيف!(تنظر داليا وتقتنع وتبتسم وهي تهز رأسها).
    (لكن يتدخل يوسف عبدالباقي مخاطباً داليا التي لا يعرفها وهو يرمق أروب بنظرة غامضة)
    يوسف: دا عامل معاك مشكلة واللا شنو؟
    داليا: لا أبداً بسيطة دفرني لكن اعتذر.
    أروب: مخاطبا يوسف عبدالباقي: إنت يا خينا مالك ؟
    يوسف عبدالباقي: كلو ولا تقول لي يا خينا.
    أروب : (وقد ادرك مرامي يوسف عبدالباقي الخفية) الله الله الله ! إنت حالتك متأخرة خالص !
    (تتدخل داليا في النقاش وتقول كلاماً بتسلسل منطقي لإقناع يوسف بأن تدخله في غير محله نترك هذا لارتجال الممثلة)
    داليا: يا اخوانا عشان ما أكون السبب في شكلة بيناتكم أرجوكم كل واحد فيكم يسكت من التاني.
    ( لحظة صمت. يتقدم ثلاثتهم وكل يبحث في أوراقه الثبوتية ويستلمون تذاكرهم واحداً واحداً . عند الخروج يصبحون أربعة داليا ، أروب ، يوسف عبدالباقي وسليمان الشاب القادم من سنار . يتعارفون يبدأ خطوة التعارف بينهم سليمان)
    (قطع)











    الخيط الرئيسي(داليا أروب) ، المشهد الثاني
    خارجي/نهار
    سليمان : إزيكم يا شباب شايفكم بتعرفوا بعض من كلامكم في الصف . أنا سليمان منصور من سنار .ماشي أدرس في الزقازيق بمصر.
    داليا : مرحب أنا داليا خليل برضو مسافرة ادرس هناك
    أروب : اهلاً يا شاب أنا اروب دينق وأنا كمان
    يوسف عبدالباقي : والله دي صدفة غريبة .انا يوسف عبدالباقي من الجزيرة..نحن ما كنا بنعرف بعض لولا دفرة أروب لي داليا. الظاهر إنها دفرة وراها بركة. انا كمان ماشي الزقازيق للدراسة.
    أروب : ناوي تدرس شنو هناك يا سليمان؟
    سليمان : قانون .
    أروب: وانت يا يوسف ؟
    يوسف :هندسة
    اروب : وإنت يا داليا؟
    داليا: طب
    أروب: وانا ماشي أدرس طب كمان .حصلت على منحة.
    يوسف عبدالباقي : والله دي صدفة غريبة كلنا ماشين الزقازيق.لكن ليه الأربعة للزقازيق؟
    سليمان : الظاهر لما أدونا التذاكر كانو راصين كل ناس جامعة جنب نبعض.
    دليا: طلبة الزقازيق كتار وطلعت لستتم في اليومين ديل مع بعض عشان كدا.
    (الشباب الأربعة يودعون بعضهم البعض على أمل التعارف أكثر في الزقازيق ويحاولون التنسيق للسفر سوياً).
    داليا: اوكي يا شباب .أنا في الحقيقة جايز أمشي قدامكم مسافرة بكرة عشان أمي وأبوي سافروا قبلي لمصر .أشوفكم في الزقازيق.
    أروب : أمك وأبوك؟(يوسف وسليمان وداليا جميعاً يبتسمون)
    (تحركت داليا مبتسمة لم ترد على سؤال أروب المندهش كمن لم تسمع.
    تتابعها الكاميرا بضع خطوات تبدو داليا رصينة في مشيتها وجميلة وهي ترتدي ثياباً مودرن دون حرج. بعض المارة يتلفتون تجاهها دون كلام. تقف داليا في شارع الجمهورية قبل أن تأخذ سيارة تاكسي لحيهم الفاخر. على المخرج اختيار حي يمكن أن يسكنه طبيب هو والد داليا وزوجته أستاذة جامعية هي أم داليا علماً بأن محمد خليل جد داليا لأبيها تاجر جملة بأم رمان وصاحب أراضي زراعية واسعة بالقضارف ومصنع).
    يوسف ( مخاطباً أروب ضاحكا بعد ذهاب داليا ً) :مالك مندهش ؟ ما ظاهر عليها من شكلها وملابسها تطلع بت منو؟
    سليمان : تلقاها بت واحد من تجار اليومين ديل المليانين قروش .
    أروب : لكن ما باين عليها من ملامحها إنو أبوها من جماعة الهبروا ملوا. دي بت عيونها مليانة وشايفا كتير .
    يوسف: (مخاطباً أروب) تعال يا شاب إنت من وين .ملامحك ملامح دينكاوي عديل وكلامك فصيح تقول مولود في البطانة واللا جدك الحردلو؟
    سليمان: (مخاطباً يوسف) خلاص فاتت البت اللقطة دي قبلت علي أخونا؟
    أروب: في الحقيقة وعشان أريحكم أجيكم من الآخر. أنا من مواليد الخرطوم دي . أبوي كان عسكري ضابط صف ومات في الحرب مع قوات الحكومة قبل حوالي سنة. الحكومة عشان كدا وفرت لي الفرصة دي أمشي أقرأ في مصر.في الحقيقة الفضل بعد الله في منحتي دي يعود للدكتور محمد طلبة عويضة مدير جامعة الزقازيق.
    سليمان :وماش تقرأ طب؟
    أروب: أيوة
    يوسف : بختك يا عبد.
    (يضحك أروب ويوسف وسليمان ويفترقون.تتابع الكاميرا بسرعة كل واحد منهم لوسيلة مواصلاته والحي الذي يقصده أروب يذهب لحي طرفي بضواحي الخرطوم بحري الحاج يوسف ، سليمان يذهب لبيت خالهم بجبرة ، يوسف يذهب لداخلية جامعة الخرطوم حيث صديقه وابن منطقتهم بالجزيرة ياسر عوض الجيد)
    (قطع)









    الخيط الرئيسي(داليا وأروب) ، المشهد الثالث
    خارجي/نهار
    (يلتقي ياسر عوض الجيد ويوسف عبدالباقي وهناء عبدالكريم ، أبناء قريتي أم جداول وودنفير بالجزيرة ، في كافتيريا بجامعة الخرطوم بمنطقة النشاط القديمة ومعهم بدور سيد احمد من الخرطوم الصحافة بنت فراشة وبائعة كسرة والدها متوفي وعاصم خليل شقيق داليا خليل وهو موجود هنا بسبب هناء.تعرف على هناء في منزل والديه بأم درمان، حيث تجيء هناء أيام الخميس أحياناً بدعوة من والدة عاصم الدكتورة إنصاف لمساعدتها في البيت في بحث علمي . هناء طالبة الدكتورة إنصاف بقسم اللغة الانجليزية بجامعة الخرطوم.هناء مـتأثرة بآراء الدكتورة إنصاف حول مسألة حقوق المرأة . لذا فهي عضوة جمعية حقوق المرأة بالجامعة. تدرس بالسنة الثالثة فيما بعد في الفصول المتقدمة تصبح رئيسة الجمعية).
    ياسر : (يعرف يوسف بعاصم):عاصم (يشير إليه ) نهائي معمار ، يوسف (يشير إليه) من حلة جنب حلتنا في الجزيرة ماشي يدرس في مصر.
    عاصم : برلوم ؟ مرحب أبو الشباب .اتشرفنا.
    يوسف : تقول شنو اتأخرت في الدراسة بسبب ظروف خاصة.(يسلم على عاصم) أهلاً مرحب . شرف كبير.
    بدور حامد:(لهناء) يوسف من حلتكم مش؟
    هناء :لا من ودنفير.
    عاصم (مخاطباً هناء) داليا شقيقتي حتمشي تدرس هناك.
    يوسف: داليا؟ يكون دي البت اللاقيتا في مكتب سودانير قبيل؟ اسمها داليا برضو.
    عاصم (لا يسمعه مواصلاً الحديث مع هناء) تجوا الليلة إنتي وبدور وياسر ويوسف بمناسبة زيارتو دي نروح حفل معهد الموسيقى والمسرح ؟
    هناء : لو وافقوا ياسر وبدور ليه لأ؟
    ياسر : تعالوا بينا نروح.
    بدور : الليلة ما بقدر عندي (اسيه ( essay تسليمها بعد يومين لسة ما عملت فيها حاجة. بالمسا حأمشي المكتبة.
    هناء : كل ما ياسر يقترح عليك حاجة تتعللي .إنت حكايتك شنو؟ يا شباب حنمشي الحفل .(مخاطبة الجميع) يا شباب بدور دي خلوها علىْ المسا بجيبا ليكم بي مكتبتها.
    ياسر : خلاص نتلاقى في آخر المين رود .
    هناء : الليلة البرجزة الجديدة الطلعت عليك شنو دي كمان يا ياسر ؟
    عاصم : يا اخوانا أنا عازمكم بارد بمناسبة التعارف مع يوسف.
    (يتحرك عاصم تجاه الكاونتر بالكافتيريا (
    ياسر: (مخاطباً عاصم ) استنا يا أبو الشباب نعمل شيرينج sharing سوا يتجه معه تجاه الكاونتر بالكافتيريا.
    (قطع)











    الخيط الرئيسي (أروب وداليا)، المشهد الرابع
    خارجي/نهار
    يوسف: (مخاطباً هناء وبدور):عاصم باين عليهو زول ظريف.هو من وين؟
    بدور: من أم درمان (ترمق هناء بنظرة ماكرة وتستطرد) الله يهنيهو.
    يوسف (لا يحرز مغزى كلامها مخاطباً هناء): ناس ناصر شيخ الدين ما قاعدين يجوكم بي جاي من الإسلامية؟
    هناء: بجو طوالي.كل أولاد وبنات حلتنا وحلتكم في الجامعات بجونا.
    يوسف : حلتكم طلبتها كتيرين شن جاب طلبة ودنفير لي طلبة أم جداول.
    بدور: إنت يا يوسف من أم جداول ؟
    يوسف : لا من ودنفير.
    بدور :وبتعرف هناء وياسر من وين؟
    يوسف : ودنفير كلها تلاتة كيلو من أم جداول. حلال الجزيرة قريبات من بعض وثانياً أنا قريب هناء و بعرف ياسر من الثانوي قرينا سوا بس هو قرا قدامنا كتير.
    بدور: قريت مع ياسر؟ في مدرسة السني؟
    يوسف: أيوة .(مستطرداً) إنتي بتعرفي مدرسة ياسر ؟
    هناء (تتدخل وهي ترمق بدور مبتسمة على خفيف ) تعرف مدرستو وبس؟
    يوسف : قصدك حكايتا معاه أكبر
    بدور : (تخاطب هناء معاتبة) : يا هناء
    هناء : (تصمت وهي تكتم ضحكة( .
    (يحضر عاصم وياسر بالمشروبات ويتحرك خمستهم تجاه إحدى الطاولات البعيدة تجيء أصواتهم من بعيد وعندما يتحركون يكون عاصم بالقرب من هناء ويوسف بالقرب من بدور أما يوسف فلا يلاحظ ذلك ويتحرك مرة نحو اليمين ومرة نحو اليسار وهو يبدو من بعيد كمن يسأل).
    (قطع )











    الخيط الرئيسي(داليا وأروب)، المشهد الخامس
    داخلي/نهار
    المكان مطار القاهرة صالة الوصول
    الزمان التاسعة صباحاً بتوقيت مصر
    وصول داليا خليل . خالتها مريم وخالد ابن خالتها يستقبلانها بالمطار .تخرج داليا ويسلمان عليها بالأحضان وتذهب معهما. تسكن خالتها مريم في حي المهندسين؛ كمال خالد زوج مريم يعمل في جامعة الدول العربية ولدهما خالد طالب بالجامعة الأمريكية. السيارة التي يقودها سائق مصري تنطلق بهم إلى المهندسين
    مريم :إزيك يا داليا ليك وحشة.
    داليا: أهلاً يا خالة والله مشتاقة ليكم.
    مريم: أمك وأبوك راحوا أسكندرية قبل يومين .
    داليا: آي كلموني بالتلفون
    مريم : قالوا كان عايزين ينتظروك لكن إجازة أمك قربت تخلص. قالوا ليك أول ما تكملي إجراءات التسجيل للجامعة تلحقيهم هناك.خالد ممكن يوصلك. (تومي لخالد ولدها(
    داليا: شكرا.ما يحتاج.خالد يكون مزنوق لي روحو في القراية المابتنتهي دي.
    خالد: (يضحك) تعرفي يا داليا أنا مستعد أوصلك على طول وأي خدمة
    داليا: (تنظر إليه ضاحكة ): شكراً ما بتقصر.
    (تنطلق العربة مخترقة شوارع القاهرة وخالد يصف لها الأماكن والمعالم وتتدخل مريم أمه بين الحين والحين وكل ذلك يدور في مشهد صامت خلف زجاج العربة إلى أن تتوقف العربة أمام فيلا بالمهندسين حيث يترجل الجميع عنها ويدخلون الي الفيلا.(
    (قطع)









    الخيط الرئيسي ( داليا وأروب( ، المشهد السادس
    داخلي/ليل
    داليا في منزل خالتها . الوقت عصر .يعود كمال خالد زوج الخالة الذي يعمل بجامعة الدول العربية من العمل . يعلم من زوجته بوصول داليا تخرج داليا لدى سماعها حركته لتسلم.تجتمع الأسرة كلها في الصالة مريم الخالة وكمال خالد زوجها وخالد ولدهما ورندا وريم طفلتان بنتاهما في الثانية عشرة والتاسعة على التوالي. يسلم كمال على داليا.
    كمال (مخاطباً داليا): إزيك يا أمورة . بقيتي كبيرة ، ما شاء الله.
    مريم: داليا كبرت صحيح .ما عادت الطفلة الشقية الزمان .بقت رزينة وحكيمة زي الناس الكبار.كل حاجة تتعامل معاها بي عقلها .لاحظتا دا فيها من زيارتنا للخرطوم
    كمال: متين لاحظتي ؟ما قلتي لي؟
    مريم : العيد الفت ما خليناك إنت وخالد هنا وسافرنا الخرطوم نسيت؟
    خالد: أيوة يا بوي.
    كمال : ما عارفكم سافرتوا وقلتوا لي داليا جاية مصر عشان تدرس ، لكن ما قلتوا لي طفلة أمبارح دي بقت عروسة (داليا وخالتها تضحكان .خالد يتحرك حركة مفاجئة).
    كمال (مخاطباً داليا): حتقري شنو في الزقاريق؟
    داليا :طب.
    كمال: أيوا .البت طالعا لأبوها.(مخاطباً لها من جديد) طب شنو يا داليا؟ ما كفاية أبوك مودر يومو كلو في العيادة بعد المستشفى.مهنة متعبة ومشاكلها كتيرة . ما كان أحسن ليك تجي تقري لغات في الجامعة الأمريكية وتسكني معانا في البيت؟
    داليا: لكن قبلوني في الزقازيق .
    كمال : الوسيلة الخلت ناس أبوك يجيبوك بيها تقري طب في الزقازيق ممكن نحولك نحن بيها للجامعة الأمريكية. زقازيق شنو وداردر شنو .إنتي لسه صفيرة على الغربة.
    داليا:أسة يا عم كمال ما قلت أنا كبرت؟
    (يضحكون)
    داليا: والله يا عم كمال مافي طريقة. الفرص لي قراية طب موجودة في جامعة الزقازيق وفي جامعات تانية قليلة بالنسبة للطلبة السودانيين زي جامعة طنطا لكن ما لقينا فرصة لي جامعة القاهرة ولا اسكندرية.
    مريم : افتكر يا كمال نحولا نحن وبعدين نكلم ناس خليل انصاف أختي.
    داليا: الجامعة الأمريكية فيها طب؟
    خالد: لا.لا طب لا صيدلة . فيها كليات تانية .
    كمال: التحويل قبل التسجيل في الجامعة ما ممكن . كدي بالأول سجلي في الزقازيق بعدين نشوف. لكن في الأول يا داليا النشوف رأيك أنتي شنو يمكن تكون عندك دريبات مع واحد جايي معاك الزقازيق.
    داليا : تبتسم .لا في واحد ولاشي يا عم كمال .إنت قايل جيلنا دا بخجل من الكلامات الزي دي .أسال خالد ولدك دا (مخاطبة خالد) نحن يا خالد صريحين مش؟ مازي ناس عم كمال أبوك وبابا خليل ناس الحقيبة ديل.
    كمال : لا نحن جيل أكتوبر مابعد الحقيبة لكن بنحب غنا الحقيبة صحيح داك غنا مليان ما زي غنا فنانينكم الشباب الطلع جديد دا الواحد تلقاهو جاري قبال الآلات والموسيقى تجري وراه سنة ما تحصلو.
    خالد: يا داليا ناس أبوي ديل خليهم ديل دقة قديمة.
    (يضحكون جميعاً)
    مريم :أنا كلمت ندا عبدالرحيم بت حلتنا في أم درمان . هي بتعرف داليا لكن شافتا صغيرة ندا بتقرا في صيدلة وهي طالبة نهائية أظنها في سنة خامسة .ندا قالت لي في التلفون داليا ممكن تسكن معاها ولكن عشان ما تحس بي غربة بينها وبين بنات دفعتها قلت ليها فتشي ليها شقة قريب من الجامعة وما بعيد من كلية الطب ممكن تسكن فيها مع زميلاتها بنات دفعتها.
    كمال: عال.عال.طيب اخليكم تتونسو .
    داليا: اتفضل يا عم كمال إنت جايي من الشغل تعبان.
    (كمال خالد ينهض)
    (قطع)











    البحث عن طه ، المشهد الأول
    داخلي/ليل
    (الوقت ليل داخل حجرة في بيت بلا كهرباء به حوش واسع مفروش بالرمل في فنائه نخلة عجوز وغنمايتين في حظيرة مجاورة مسورة بجريد الدوم هو مأوى محمد خير وزوجته وإبنهما في قرية تمري)
    عاشة: حومّد خير ..حومّد خير.. باكر ما تقوم تروح لي مروي تشوف أخيان طه في مدرستو؟
    محمد خير (والد طه مخاطباً عاشة زوجته بلهجة الشايقية): يا ولية والله جننتينا في روحنا دي.الوليد وين طاير . يكمن مشى لي واحد من الجنون المطاليق الحايمين معاهو يبارو الطاب من ضل لي ضل وروح معاهو لي بلدن . طه ماك عارفاهو مصيوب باكر . بيجي.
    عاشة: يا يا با وين يجي. طه وليدي يمكن غرق في البحر واللا شالو تمساح. اسع دحين ليهو يومين مافي ضمة إنت يا راجل السجم القاعد لها شنو؟ أريتك يا يمة أبو السواد.
    محمد خير:يا مرة كفى كفنك برش ، ساوي لسانك الزفر دا، اصلك معروفة إن كان قعدتي تتكومي وإن كان نضمتي تتلومي.طه دا ود الليلي؟ ما خلاص بقى راجل.بيجي قت لك الله إن قال خير.
    عاشة(مخاطبة نفسها): يا يمة هييي. يا سيدي الحسن الجد يا عاشمن ما بترد يبقي وليدي طه، شيخ سليم، ودعتو في أمين الوداعة اللا يديها لا يبضع فيها .كرم كرم حنضل وسط الجرم. .(تغير لهجتها الحادة مخاطبة زوجها) حمّد خير(تنطق الحاء بالضم والميم مشددة)حمد خير نشدتك بي الله تقوم تشوف الوليد.خوفي عليهو راقد لي في تمرة قلبي. قوم قوووم هيي ما تقووم لا فوق ـأتر الولد دا . حمّّد خير (تقصد محمد خير) حمّد خير .
    (قطع)






    القريتان- قرية ام جداول ، المشهد الأول
    خارجي /نهار
    (بص يأتي من مدينة مدني مخترقاً قرية أم جداول شاقاً لها إلى نصفين تظهر كما في قرى الجزيرة البيوت المبني معظمها من الطوب الأحمر لكن حيشانها مبنية بإهمال في القرية مدارس ودكاكين وطاحونة البص يتوقف وتخرج منه شابة في فترة مابعد الظهر وتتجه نحو بيت يختلف في مبناه الجميل عن البيوت المجاورة).
    (طفلة صغيرة تشاهد الشابة وتصيح جارية )
    الطفلة: ماما ماما .. هناء جات .اهونديك نازلة من البص
    (تسمع امرأة داخل أحد الحيشان وتمد رأسها من فوق الحوش امرأة شابة مليحة هي زهراء والدة هناء).
    (قطع)



    القريتان – قرية أم جداول ، المشهد الثاني:
    (تخرج هناء من البص تحمل كيساً وشنطة يد. وتتجه نحو بيتهم حيث المرأة المشرئبة عبر السور وحيث الطفلة التي كانت تصيح جارية.)
    (ينحني حاج عبدالكريم نحو قصبة في الطريق يحملها في يده وهو يقبل على بيت ولده الطيب المعلم الموجود في الخرطوم حيث وصلت هناء للتو وفي طريقها لدخول الحوش )
    (قطع)









    باسبار يبحث عن عمل ، المشهد الأول
    خارجي /نهار
    (صباحاً في بيت ناس باسبار مع أمه ويظهر اخوته يلعبون ولا يدرسون بمدرسة المنظر خارج بيت الهدندوة الذي هو من البروش ويكون مقوساً ومائلاً في اتجاه الريح واسمه "البدايقو" ).
    هدية أم باسبار : باسبار ما تسافر مكان بعيد. (تهاميم )( تنطق تهم يم بفتح الهاء وقصر الألف وسكون الميم وفتح الياء وسكون الميم على التوالي) وهي بلدة صغيرة معناها الموية المرة ) كفاية روح لي تهاميم عشان ما تكون بعيد من هوموقر .
    باسبار: انا قلت مسمار أمشي
    أم باسبار : خلاس مسمار امشي .برضو ما بعيدة لكن بورتسودان ما تمشي يا ولدي .هناك العربات كتيرة وأنا بخاف عليك. إنت صغير لمن كنت أوشيك همد( هومّد) ما شفت براك من بورتسودان ما رجع .عربية ضربتو ومات. وبعدين في كجر كتير هناك.
    باسبار : ما تخافي على يا ديتون(وتعني يا والدة بالهدندوية) .
    (يحمل باسبار مخلايته وعصاته ويضع (فديك تنيا) وتعني الأشياء الأربعة وهي ضرورية عند السفر لكل هدندوي . في المسلسل نكتفي بأن يحمل باسبار معه العصا والمخلاية وتكون السكين في الحزام "كمره " مخفية تحت ملابسه. يودع باسبار أخوانه ووالدته ويخرج. والد باسبار المريض يتحرك لوداعه ببطء )
    باونين والد باسبار: يا ولد تسافر بي السلامة. ما تقطع الأخبار.مع السلامة مع السلامة . ( عندما يودعه الوالد ينظر في عينيه طويلاً نظرة ساهمة. والدة باسبار تخرج معه إلى خارج القرية تاركة أطفالها بالمنزل وباسبار يكرر الحاحه عليها بالعودة. وعندما تعود يتأمل فيها طويلاً ينظر في جسمها الناحل وتخنقه العبرة وتنتقل الكاميرا لها حيث تخنقها العبرة ايضاً وتمشي نحو البيت وهي تتمتم وتنتقل الكاميرا للأطفال الذين أصبحوا واجمين وحزينين فقد تعودوا على باسبار شقيقهم الأكبر الذي كان يحميهم كوالدهم.باسبار في العشرينات من عمره).
    ( قطع)








    ابراهيم بطيخ ، المشهد الأول
    خارجي /ليل
    أحد شباب قرية أم جداول : يا ابراهيم إنت لمن كنت بنجوس جيث لي أم جداول دي من بلدكم ######س طوالي والا غشيت حتة؟
    ابراهيم بطيخ: غشيت حلال كتيرة أول جيت المسلمية لقيتا كبيرة زي زالنجي وواحد ؛ وشغل ما فيها بعدين باريت الحلال دي كلها التبوب ونجرو وودرحمة وغشيت ودمطر بعدين مشيت ودالبر لقيت عرباتها كتيرة وبجيبو بتيخ الزمن داك باللواري ومنقة من الجنوب .باريت الحلال من حلة لي حلة لمن صادفت الحاج عبدالكريم دا يوم جايي من سوق ودرعية . كنت في الخلا حقيقة قلبي ارتاح لي ونستو وكلامو معاي .سألت منو ناسي قالوا لي دا مزارع صادق كلمتو واحدة ما بغش ..أول ما موسم لقيط القطن الجديد قرب طوالي جيتو في أم جداول
    شاب آخر: يا ابراهيم إنت حلتكم في دارفور اسمها ######س ؟
    الشاب الاول : كُلبًس ما كِلبِِس
    شاب آخر: عشرين سنة تسألوا فيهو .ما قال ليكم جا من ######س و######س دي سودانية ما تشادية.نطق ماقادرين تنطقوها وبرضوا تقولوا بلدنا بلد واحدة؟
    إبراهيم : حتى المحلات الما ######س في دارفور إنتو أساميها ما تعرفوها:كدي قولو نالا
    شاب: نيالا:
    إبراهيم بطيخ : ما اسمها نيالا . اسمها نالا
    الشاب الاول : نالا نالا النون معطشة.
    ابراهيم : معطشة يعني شنو؟
    الشاب الاول : يعني عطشانا. (يضحكون)
    (قطع)











    ابراهيم بطيخ ، المشهد الثاني
    خارجي /ليل
    الوقت مع مغرب الشمس
    (إبراهيم مع حاج عبقدالكريم المزارع . يقفان في مدخل حوش منزل حاج عبدالكريم يبدوان كمن يواصلان الحديث ).
    ابراهيم:: قطن في ناحية أب عشرين كتير لقيطو داير ليهو جماعة معانا نحن تلاتة بس .
    حاج عبدالكريم: حاج عبدالباقي ود دفع الله في حلة ود نفير معاهو ناس لقاط من جماعتكم تراني من دربي دا ماشي عليهم بشوف كان حواشة حاج عبدالباقي قفلت بجيبن ليكم
    ابراهيم: كمان نحن دايرن ويكة وبصل عشان الويكة كملت .
    حاج عبدالكريم : قبل يومين الأمين ولدي ما جاب ليكم الويكة والبصل والشرموط؟
    إبراهيم: آي لكن جابا شوية .
    حاج عبدالكريم : أمشو خلاص بجيبن ليكن لكن خلو لقيطكم نضيف.
    إبراهيم بطيخ – المشهد الثالث
    خارجي/ليل
    الوقت: بعد الغروب مباشرة
    (حاج عبدالكريم يتوجه بحماره نحو قرية ودنفير التي تبعد ثلاثة كيلومترات عن أم جداول في درب جلب مزيد من العمال (لقاط القطن) لحواشته. حاج عبدالكريم يدخل ودنفير حاج عبدالكريم يخرج من ودنفير )
    (قطع)




    # اسم منطقة إبراهيم المظلل هنا في النص لورود حروف الكاف واللام والباء فيه على التوالي هو (كـــلــبــس
    ك ل ب س ). اسم إبراهيم بطيخ ينطق في قريتي أم جداول وود نفير (إبراهيم بتّيخ)
    نهاية الحلقة الاولى

    (عدل بواسطة Bushra Elfadil on 08-20-2010, 12:20 PM)
    (عدل بواسطة Bushra Elfadil on 08-20-2010, 12:44 PM)
    (عدل بواسطة Bushra Elfadil on 08-23-2010, 07:37 AM)
                  

العنوان الكاتب Date
طلعت القمرة - مسلسل أون لاين Bushra Elfadil08-12-10, 03:13 PM
  Re: طلعت القمرة - مسلسل أون لاين محمد المرتضى حامد08-12-10, 03:21 PM
    Re: طلعت القمرة - مسلسل أون لاين Bushra Elfadil08-12-10, 03:30 PM
      Re: طلعت القمرة - مسلسل أون لاين سلمى الشيخ سلامة08-12-10, 09:24 PM
        Re: طلعت القمرة - مسلسل أون لاين هشام كمال08-12-10, 09:53 PM
          Re: طلعت القمرة - مسلسل أون لاين Bushra Elfadil08-13-10, 00:37 AM
        Re: طلعت القمرة - مسلسل أون لاين Bushra Elfadil08-13-10, 00:23 AM
          Re: طلعت القمرة - مسلسل أون لاين سلمى الشيخ سلامة08-13-10, 00:42 AM
            Re: طلعت القمرة - مسلسل أون لاين Bushra Elfadil08-13-10, 05:44 AM
              Re: طلعت القمرة - مسلسل أون لاين سلمى الشيخ سلامة08-13-10, 05:58 AM
                Re: طلعت القمرة - مسلسل أون لاين هشام كمال08-13-10, 07:45 AM
                  Re: طلعت القمرة - مسلسل أون لاين فيصل محمد خليل08-13-10, 08:15 AM
                    Re: طلعت القمرة - مسلسل أون لاين Bushra Elfadil08-13-10, 09:13 AM
                      Re: طلعت القمرة - مسلسل أون لاين Bushra Elfadil08-13-10, 09:19 AM
                        Re: طلعت القمرة - مسلسل أون لاين Abdlaziz Eisa08-13-10, 11:04 AM
                          Re: طلعت القمرة - مسلسل أون لاين Bushra Elfadil08-13-10, 12:50 PM
                            Re: طلعت القمرة - مسلسل أون لاين Bushra Elfadil08-13-10, 01:05 PM
                              Re: طلعت القمرة - مسلسل أون لاين Bushra Elfadil08-13-10, 01:27 PM
                                Re: طلعت القمرة - مسلسل أون لاين Bushra Elfadil08-13-10, 01:53 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                  Re: طلعت القمرة - مسلسل أون لاين Bushra Elfadil08-13-10, 02:27 PM
                                    Re: طلعت القمرة - مسلسل أون لاين Abdlaziz Eisa08-13-10, 03:29 PM
                                      Re: طلعت القمرة - مسلسل أون لاين خدر08-13-10, 05:00 PM
                                        Re: طلعت القمرة - مسلسل أون لاين Bushra Elfadil08-13-10, 07:47 PM
                                          Re: طلعت القمرة - مسلسل أون لاين Bushra Elfadil08-13-10, 07:50 PM
                                            Re: طلعت القمرة - مسلسل أون لاين Bushra Elfadil08-13-10, 07:55 PM
                                              Re: طلعت القمرة - مسلسل أون لاين Bushra Elfadil08-14-10, 09:53 AM
                                                Re: طلعت القمرة - مسلسل أون لاين Bushra Elfadil08-14-10, 10:12 AM
                                                  Re: طلعت القمرة - مسلسل أون لاين محمد المرتضى حامد08-14-10, 11:16 AM
                                                    Re: طلعت القمرة - مسلسل أون لاين Bushra Elfadil08-14-10, 11:54 AM
                                                      Re: طلعت القمرة - مسلسل أون لاين محمد المرتضى حامد08-14-10, 12:06 PM
                                                        Re: طلعت القمرة - مسلسل أون لاين Bushra Elfadil08-14-10, 08:32 PM
                                                          Re: طلعت القمرة - مسلسل أون لاين محمد المرتضى حامد08-14-10, 11:11 PM
                                                            Re: طلعت القمرة - مسلسل أون لاين Bushra Elfadil08-15-10, 08:10 AM
                                                              Re: طلعت القمرة - مسلسل أون لاين Bushra Elfadil08-15-10, 02:39 PM
                                                                Re: طلعت القمرة - مسلسل أون لاين Bushra Elfadil08-15-10, 02:42 PM
                                                                  Re: طلعت القمرة - مسلسل أون لاين Bushra Elfadil08-15-10, 02:51 PM
                                                                    Re: طلعت القمرة - مسلسل أون لاين Bushra Elfadil08-16-10, 08:16 AM
                                                                      Re: طلعت القمرة - مسلسل أون لاين Bushra Elfadil08-16-10, 08:18 AM
                                                                        Re: طلعت القمرة - مسلسل أون لاين Bushra Elfadil08-16-10, 04:48 PM
                                                                          Re: طلعت القمرة - مسلسل أون لاين Safa Fagiri08-16-10, 05:53 PM
                                                                            Re: طلعت القمرة - مسلسل أون لاين Bushra Elfadil08-16-10, 11:37 PM
                                                                              Re: طلعت القمرة - مسلسل أون لاين Bushra Elfadil08-17-10, 11:35 AM
                                                                                Re: طلعت القمرة - مسلسل أون لاين Bushra Elfadil08-17-10, 12:07 PM
                                                                                Re: طلعت القمرة - مسلسل أون لاين Bushra Elfadil08-17-10, 12:09 PM
                                                                                  Re: طلعت القمرة - مسلسل أون لاين Bushra Elfadil08-18-10, 11:53 AM
                                                                                    Re: طلعت القمرة - مسلسل أون لاين Bushra Elfadil08-18-10, 11:59 AM
                                                                                      Re: طلعت القمرة - مسلسل أون لاين Bushra Elfadil08-18-10, 12:04 PM
                                                                                        Re: طلعت القمرة - مسلسل أون لاين Bushra Elfadil08-19-10, 09:44 PM
  Re: طلعت القمرة - مسلسل أون لاين Bushra Elfadil08-20-10, 12:27 PM
    Re: طلعت القمرة - مسلسل أون لاين Sidgi Kaballo08-20-10, 02:34 PM
      Re: طلعت القمرة - مسلسل أون لاين Bushra Elfadil08-20-10, 03:00 PM
        Re: طلعت القمرة - مسلسل أون لاين Bushra Elfadil08-21-10, 08:24 PM
    Re: طلعت القمرة - مسلسل أون لاين Bushra Elfadil08-22-10, 02:06 PM
      Re: طلعت القمرة - مسلسل أون لاين Bushra Elfadil08-22-10, 02:13 PM
        Re: طلعت القمرة - مسلسل أون لاين Bushra Elfadil08-22-10, 02:22 PM
          Re: طلعت القمرة - مسلسل أون لاين Bushra Elfadil08-22-10, 09:52 PM
            Re: طلعت القمرة - مسلسل أون لاين Bushra Elfadil08-23-10, 07:52 AM
              Re: طلعت القمرة - مسلسل أون لاين dardiri satti08-23-10, 10:24 AM
                Re: طلعت القمرة - مسلسل أون لاين Bushra Elfadil08-23-10, 01:00 PM
                  Re: طلعت القمرة - مسلسل أون لاين Bushra Elfadil08-24-10, 01:15 AM
            Re: طلعت القمرة - مسلسل أون لاين طيفور08-26-10, 11:16 PM
  Re: طلعت القمرة - مسلسل أون لاين محمد الكامل عبد الحليم08-24-10, 01:02 PM
    Re: طلعت القمرة - مسلسل أون لاين Bushra Elfadil08-24-10, 02:06 PM
      Re: طلعت القمرة - مسلسل أون لاين Bushra Elfadil08-24-10, 11:35 PM
        Re: طلعت القمرة - مسلسل أون لاين Abdlaziz Eisa08-24-10, 11:47 PM
          Re: طلعت القمرة - مسلسل أون لاين Bushra Elfadil08-26-10, 01:07 AM
            Re: طلعت القمرة - مسلسل أون لاين Bushra Elfadil08-27-10, 04:35 AM
              Re: طلعت القمرة - مسلسل أون لاين عصام دهب08-27-10, 03:20 PM
                Re: طلعت القمرة - مسلسل أون لاين Bushra Elfadil08-27-10, 04:20 PM
                  Re: طلعت القمرة - مسلسل أون لاين عصام دهب08-27-10, 04:33 PM
                Re: طلعت القمرة - مسلسل أون لاين Abdlaziz Eisa08-27-10, 05:47 PM
                  Re: طلعت القمرة - مسلسل أون لاين Bushra Elfadil08-27-10, 07:32 PM
                    Re: طلعت القمرة - مسلسل أون لاين Bushra Elfadil08-28-10, 09:20 PM
                      Re: طلعت القمرة - مسلسل أون لاين Bushra Elfadil08-29-10, 09:31 AM
                        Re: طلعت القمرة - مسلسل أون لاين Bushra Elfadil08-29-10, 07:50 PM
                          Re: طلعت القمرة - مسلسل أون لاين Bushra Elfadil08-29-10, 08:01 PM
                            Re: طلعت القمرة - مسلسل أون لاين Bushra Elfadil08-30-10, 01:57 PM
                              Re: طلعت القمرة - مسلسل أون لاين Bushra Elfadil08-31-10, 08:21 AM
                                Re: طلعت القمرة - مسلسل أون لاين Bushra Elfadil08-31-10, 10:23 AM
                                  Re: طلعت القمرة - مسلسل أون لاين Bushra Elfadil08-31-10, 08:01 PM
                                    Re: طلعت القمرة - مسلسل أون لاين Bushra Elfadil09-01-10, 11:19 AM
                                      Re: طلعت القمرة - مسلسل أون لاين Bushra Elfadil09-01-10, 11:26 AM
                                        Re: طلعت القمرة - مسلسل أون لاين Bushra Elfadil09-01-10, 02:46 PM
                                          Re: طلعت القمرة - مسلسل أون لاين Bushra Elfadil09-02-10, 01:33 AM
                                            Re: طلعت القمرة - مسلسل أون لاين Bushra Elfadil09-02-10, 01:48 AM
                                              Re: طلعت القمرة - مسلسل أون لاين Mohamed Abdelgaleel09-02-10, 12:50 PM
                                                Re: طلعت القمرة - مسلسل أون لاين Bushra Elfadil09-02-10, 02:22 PM
                                                  Re: طلعت القمرة - مسلسل أون لاين Bushra Elfadil09-03-10, 01:06 PM
                                                    Re: طلعت القمرة - مسلسل أون لاين Bushra Elfadil09-05-10, 02:45 PM


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de