|
|
 نداء للاعضاء فى امــريكا.. (خطيبتى)جاياكم باللوترى...افيدونى بالله عليكم
|
الاخوه الكرام با لمنبر الحر ..
الاخوه اعضاء البورد بالولايات المتحدة..
انا ححكليكم قصتى االمشربكه دى عايز الراى السديد
..وبالمناسبه فى اعضاء فى البورد ده بيعرفونى معرفه شخصيه ومتابعين الموضوع من اولو وكانو زملاء فى الجامعه وهم الان معاى برضو فى المملكه..
وياريت لو كل الناس الفى امريكا وكل من عندو معلومه مايبخل على بيها لانها ممكن تفيدنى جدا ... ولو سمحتو عايز ردود جاده وتساعدنى فى الوضع الانا لقيت نفسى فيهو ده ... وانا متحير وما عارف اتصرف كيف .. ولى اول مره فى حياتى احس انى محتاج لى نصيحه صادقه من شخص(مابيعرفنى) لانو البيعرفك ممكن يجاملك او ممكن ما يقسى عليك فى النصيحه او حتى ممكن يكون ليهو غرض فى نفسو .. المهم انا حاحكى ليكم الموضوع من اولو وانتو احكمو وادونى رايكم اللى انا حاعتمد عليهو فى معالجة الموقف ده ...
يلا خليكم معاى بى كل انتباهكم .. ورركزو معاى ... خاصة الناس الفى امريكا زى ماقلت..
فى اثناء دراستى فى الجامعه وانا فى السنه الاخيره ,(وانا كنت عايش قصة حب مع زميله فى الجامعه ,رايت انها انسانه مميزه وقررت ارتبط بيها ,, طبعا بعد ما اتخرج واجى بلد الغربه واكون نفسى و..و..و..البرنامج المعتاد بتاع الناس المغتربين) .. جات فى يدى فورم بتاعة لوترى( هجره للولايات المتحده الامريكيه ) وطبعا انا قدمت وقدمت لى كل واحد بعرفو ..(الزملاء بالجامعه.. الاهل والاصدقاء..حتى اولاد الحله) .ومن ضمنهم قدمت لى زولتى دى .. المهم قدمنا ونسينا الموضوع على اساس انو شى بيعتمد على الحظ.. واتخرجنا انا والبنيه . وسافرت للغربه واشتغلت .. وبعد ما قضيت خمسه شهور فى الغربه .. اتصل بى واحد قريبنا من امريكا وقال لي فلانه شالوها فى اللوترى (طبعا فلانه دى تبقى زولتى)..والوكت داك كنا اتخطبنا لى بعض .. المهم اتصلت عليها وشاورتها فى الموضوع باعتبار انو الموضوع ماكان جادى لحدى اللحظه ديك ..المهم اتفقنا انها تبدا الاجراءات(مع ملاحظة انو اهلها كانو رافضين فى البدايه سفر بتهم براها لى امريكا) واتوكلنا على الله ...(وبينى وبينكم للحظه ديك انا كنت مفتكر الموضوع حيطرشق فى اي لحظه اثناء الاجراءات.)المهم اجراءاتها مشت تماام وطبعا كنت متابع معاها ولى مدة 8 شهور الموضوع ده ...لحدى ما امس اتصلت على وفاجاتنى بانو ناس السفاره خلاص ادوها التاشيره !!!!!!!
والله ماعرفت ابكى ولا اضحك ... قدر ما كنت متعشم انها تسافر ويبقى لينا حلل من الوضع المزرى ده ..قدر ما خايف من المجهول.. الحتمشى تلقاهو هناك..
وطبعا الناس يعجبوك فى المواضيع الزى دى ..واحد يقول ليك والله امريكا دى تتبهدلو فيها ..وواحد يقول ليك احسن ليكم تخليكم زى ماكنتم على برنامجكم القديم ..وواحدين يقولو ليك امريكا دى بلد الاحلام ..المهم انا ماعارف اعمل شنو ..هل اخليها تسافر (براها) لانى ما بقدر اسافر معاها بحكم قوانين الللوترى زاتو ..ولو سافرت براها الحيحصل ليها شنو ..وهى بنت والنوع المسيكين داك. فى بلد زى امريكا ... ولا نبطل الموضوع من اصلو .. مع مراعاة انو نحنا ضيعنا كتير من المال والوقت وراء موضوع السفر ده .. ونحنا بالمناسبه خريجين 2002 ..يعنى يادوووب يا هادى ..لسه لغاية ما اشتغل وامشى اتزوجها عيييييك يحلك وانتو عارفين ظروف البلد الاسمها سعوديه ..
غير انى ظروفى العائليه صعبه الى حد ما ...وهى كذلك ..يعنى اذا سافرت وانا لحقتها ممكن نحل مشاكل اسرنا كمان ( ده لو ربنا وفقنا هناك)
المهم انا عاوز الشوره منكم .. خاصة الاعضاء المقيمين فى امريكا..على اساس انهم يورونى الاوضاع هناك خاصة لى ناس اللوترى.. والحيحصل ليها شنو هناك لمن توصل ... ولا بتشوفو انو الموضوع ماجايب حقو واخير نبطلو ..
وانا سامع انو العرب بيتهانو هناك وبتفتشو فى المطارات بى صوره مستفزه ..وانهم بتمنعو من الحجاب و ..و حاجات كتيره كده تخوف الواحد ...وانا بى صراحه باقى على زولتى دى .يعنى ممكن ابطل موضوع السفر من اساسو اذا انتو وصلتو لى صوره مخيفه زى دى عن امريكا ...
انا والله حيران حقيقى.. ورونى الحاصل ...عايز اعرف كل شى قبل ما البنت تمشى تخش المعمعه دى .. وبعدين نبقى فى ياااااااااااااااريت..
وكلامى عن الاعضاء الفى امريكا ما بيعنى انى ماعاوز شورة بقية الاعضاء ..لانى وجدت فى البعض رجاحة عقل واتزان وتحليل منطقى للمواضيع.. فيا ريت ما تبخلو على اخوكم بالراى
المهم
انا معتمد على ردودكم اعتماد تام ..خاصة زى ماقلت وكررت ناس امريـــــــــكا
وعايز اعرف حاجه مهمه ..وهو موضوع العقد وما ادراك ما العقد ..وعايز اقول للناس الفى امريكا حاجه(خاصة اذا كانو مشو باللوترى) ..اننا متفقين نعمل عقد زواج قبل ما تسافر وبعد داك هى تطلب زوجها ..هل ده ممكن ؟؟ ولا هى ترجع بعد ما تسافر عشان نعمل العقد ..ولا شنو الحاصل ..
حقيقه انا راسى عاوز يطق ... وطبعا بتمنى انو اى زول ماعندو ماهو مهم ومفيد مايجى يفنجط لينا هنا ..
وفى نفس الوقت برحب بى اى كلمه ممكن تشجع الواحد على التراجع من الموضوع او المضئ فيهو لحدى النهايه ولحدى ما نمشى نشوف امريكا دى..
وفى نقطه مهمه ماقلتها وهى انو البت دى عندها واحد قريبها هناك ممكن يهتم بيها لحدى ما انا الحقا( لو امكن انى الحقا) ..
اخوكـــــــم
الحيراااااااان بالجد ...
ملحوظه : لحجتى الشديده للراي عرضت الموضوع فى اكتر من موقع
____ التوقيع ____
فالتــــكن ياعـام ...عــام الانتـــصار
بالحـــبيبه ... وبالصـــديقه... وبالوطـــن...
بالـــذى يهـــواه قلبى .....فالتكــن ياعـام ضـد الانكســـــــار
|
|
 
|
|
|
|
|
| |
samo
فيس بوك
تويتر
انستقرام
يوتيوب
بنتيريست