الايحاء في ( عصر ) العولمة

Quote: اما الاباحي زي ده : أما ناسنا ناس وبقينا في ونسة وضحك لا من قسمنا الليل وقسمة الليل دي تلقاها يا دوبك الساعة بقت حداشر ، وحداشر اليومين ديل تكون يا دوب استعديت عشان تقعد تنتظر أخبار الساعة واحدة بتاعة قناة الجزيرة فالايحاء بقى صعب جدا والمعوقات كثيرة منها: فضائيا : السما مليان تكنولوجيا يعني الايحاء عشان ينزل يتضاير جنس مضايرة شي اقمار صناعية للتلفزيونات والقنوات الفضائية ، وشي اقمار تجسس وشي اقمار لي حاجات نحن ما عارفينها ، واذا الايحاء قدر يتخارج من الاقمار الصناعية وما شابهها ودخل في المجال الارضي يا ويله، شي صوريخ ارض جو ، شي طائرات اشكال والوان منها الشبح ومنها غيره ، طائرات شحن، طائرات عمودية ( يا حليل عمود الغدا)، طائرات خاصة ( عقبالك يا محمد يا ود حسن) ينزل شوية عمارا ت، ناطحات سحاب ( لمن هو ذاته الايحاء بقى يغني : نطلأ كايرو أمارات فوق – مثلما نطقتها المغنية الامهرية) ينزل الإيحاء شوية يلقى عربات اشكال والوان زي ما تدور يعني لو قدر الايحاء يوصلك سالم، قبال ما يخليك تكتب يقول ليك عليك الله كدي اديني موية ابل ريقي.

Quote: طبعا لو نزل ليك وانت في السودان بكون خايف وقلبه مقطوع من الرسوم الكتيرة والضرايب . يعني مثلا اتخيل انه ايحاء زايغ في الطريق السريع تقابله نقطة تفتيش يتم بينهم الحوار التالي اسمع يا اخينا انت ماشي وين انا ايحاء كتابة ماشي للشيخ محمد حسن طيب دفعت الرسوم رسوم شنو رسوم العبور لكن انا معفي الاعفاء عندنا الا تجنيد اجباري وبرضو بقروش طيب اعمل شنو يا تدفع يا نحبسك انا ما بتحبس ليه ما بتتحبس انت شكلك ما حتفهمني المطلوب شنو تدفع او تملُص يازول أملُص كيف ما عيب عليك ويتذكر قصة ( أركب العربي ) ما تملص هدومك يا غشيم تملص جيبك ما عندي جيب زاتو يعني ماشي ميطي اها بي قدرة قادر يقنع بتاع المليص ويتخارج منو. يصل قدام يقولوا ليه ضريبة ، يتخارج من الضريبة يقولو ا ليه زكاة ، يقول ليهم يا جماعة انا ما تميت حول ، يقولوا ليه حنتمه ليك نحن . المهم يصلك الايحاء في حالة يرثي لها وأول بيت شعر يديك ليه : ( كلااااااااااااااااااااام يا عوض دكااااام)

ما أظن بعد الزرزرة دي يقدر يقول كلام يا عوض دكام ...
أكيد حيقول : ورا مؤمَّن ... أرموا قدام ... الرمية ال تاخد أجل الزول الماشي أوحي ليهو دة.

Quote: ده لو الإيحاء لقاك فاضي لكن في الغالب بتكون عندك مليون مشكلة ادناها مثلا تكون اجتهدت جدا انك تنوم العيال بدري عشان تدخل الغابة أو الخرابة كما يحلو للسيد وزير الري أن يسميها ، فإذا جاك الإيحاء في مثل هذه الحالة، بصراحة ، يكون إيحاء ما عنده دم.

الإيحاء أصلو عديم دم و ذوق ... و الدليل أرخميدس الذي إنطلق ميطي من الحمام ...
يا ربي ممكن زول يمرق ميطي لو جاهو إيحاء و يقعد قدام الكيبورد و يقول : وجدتها وجدتها ؟

Quote: وفي الظروف العادية بجيك وانت سايق العربية او قاعد في المكتب بين الاذان والصلاة (لانو ده الوقت الوحيد البتكون فاضي) فبجيك بمفردات العصر: حبيبي مسمس لي (Missed call)و انا اضرب ليك أو انت رسل لي ايميلاتي (E mail) والصور العندي شيلها

و مسمستَ ليها ؟ آه منك يا مسْماس
رجع ليها البورتريهات حقتها

Quote: وفي حالة العتاب رسلت ليك اجمل مسج من نوكيا ردك ما وصل زعلانة ولا رصيدك كمل؟

بالله زول داير يعاتب يرسل مسج ؟ ياخي أركب أمشي ليها ...

Quote: ونفتح الباب للنقاش

الباب دة ندخل منو بإيحاء ولا بدون ؟ حدد

وين إنت يا زول ؟؟؟ أسمعنا صوتك

دمتم و تحياتي لأم العيال و العيال و خصوصاً التومة التي أحب