|
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! (Re: Wasil Ali)
|
لقد كان الغرض من سفر مصطفي عثمان إسماعيل الي واشنطن ( مرافقا) للسيد دينق ألور هو وهم الحديث عن التطبيع بعد أن إستخدمت حكومة البشير كرت تعطيل بناء السفارة الأمريكية بالخرطوم و حجز حاويات تبع السفارة في ميناء بورتسودان . و بعد النقة الكثيرة عن التطبيع مقابل الإفراج عن الحاويات قال أحدهم في واشنطن بالطريقة الأمريكية لأحد هواة السياسة بالخرطوم من حكومة مصطفي إسماعيل : تعال لنتحدث في الأمر ... كم آند لت أص توك أباوت إت ......come and let us talk about it و نطط فرحا و هرول الي رؤسائه مبشرا لهم : الجماعة قالوا الرووب ..... و ضحك البشير حتي بانت نواجذه .... و إختار الطفل المعجزة ليقود حوار التطبيع مع واشنطن و وصاه ( أمشي مع الزول ده و ماتفارقو ... الحجل في الرجل ) .. و الزول ده المشار اليه هو السيد دينق ألور وزير الخارجية ... فهو يعرف كيف يلج من أبواب واشنطن المغلقة في وجه الإنقاذ .... و حزم الطفل المعجزة أمتعته بسعادة و هو يترنم: رايحين نطبّع ... رايحين نطبّع ...
و في واشنطن فوجئ مصطفي عثمان إسماعيل أن برنامج وزير الخارجية هو غير برنامجه ..... و عندما يصر علي الذهاب مع السيد دينق الور يفاجأ بمن يعترضه علي طريقة: يا زول إنت ماشي وين؟ .... فيقول لموظف الإستقبال بصوت مهزوز : أنا تبعو ... فيقول له الموظف بلهجة صارمة: لحظة من فضلك . و يحدق في شاشة كمبيوتر للحظة مقارنا ( الأوراق الثبوتية) و شاشة الكمبيوتر ... و يخطره بلهجة صارمة: أنت إسمك ليس واردا هنا لحضور هذا الإجتماع ... لكن يبدو أن مستر أكس يريد رؤيتك . و يتهلل وجه الطفل المعجزة ..... و يقول له الموظف المسؤول بلهجة صارمة لكن بديبلوماسية : تفضل معي من هنا .
و يجلس الطفل المعجزة قبالة مستر أكس منهمكا في إخراج فايلات و أوراق و دوسيهات و و ... و يبدأ الحديث: نحن مستعدين نفك ليكم الحاويات و نديكم ... و يقاطعه مستر إكس : لماذا أنتم مستمرون في قصف المدنيين بدارفور ؟؟؟ الطفل المعجزة : آ آ ... دي مشكلة بسيطة و حنحلها ... لكن السفينة الأولي الشايلة الحاويات نحن مستعدين بكرة ... مستر أكس : و كمان عينتو الجنجويدي موسي هلال في الحكومة و بكل قوة عين ؟!! الطفل المعجزة : إنت عارف كويس زي ما إتعين الليلة ممكن نفصلو بكرة بجرة قلم لكن الجماعة في الميناء قالو لي هم حضّروا ال ... مستر أكس : لماذا تجبرون الآلاف من مواطنيكم بدارفور علي النزوح بدلا من أن توفروا لهم الحماية .. أليسوا هم رعايا بلادكم ؟؟ الطفل المعجزة : طبعا طبعا هم رعايا إلّتنا ... حكاية دارفور دي حاجة بسيطة .. هي مشكلة نزاع قبلي ... و زي ما قال رئيسنا الحكاية كلها بدأت بسرقة جمل تصّور؟؟ .. هه ههه !!! ... لكن الشئ المهم هو التطبيع بينا و نحن مستعدين نعمل ليكم أي حاجة .. أي حاجة.. و كعربون كل الحاويات إلّتكم الفي الميناء ...... مستر أكس (مقاطعا): و كمان بقيتو تهاجمو قوات اليوناميد في دارفور ؟؟!! الطفل المعجزة : اليوناميد؟؟!! آآه .... اليوناميد داااك .... نحن اليونا ... مستر أكس : شوف يا دكتور إسماعيل .... إذا لم توقفوا حرق القري بدارفور و تشريد المدنيين و إذا لم يتم سلام بدارفور ... فإن أي كلام غير حل قضية دارفور سوف لن تجد من لديه أي شهية للحديث معكم عن التطبيع في هذه المدينة . الطفل المعجزة : لكن السفارة الجديدة الكبييييرة في الخرطوم ما هاماكم و أل ... مستر إكس : أنا آسف يا دكتور إسماعيل ... فلدي مواعيد إجتماع مهم جدا بعد خمسة دقائق . الطفل المعجزة: بس دقيقة .... السفينة قاعدين يفضو فيها و العتا ... مستر إكس: لو سمحت يا دكتور .
و مرت أيام و ليالي علي الطفل المعجزة بواشنطن علي نفس المنوال .... يخرج متأنقا و متأبطا حقيبة ( ديبلوماسية) مع السيد دينق ألور و في كل مرة يعترضه موظف و يدخله غرفة ما بها مستر من المساتير ... يبدأ حوار الطرشان و ينتهي ... بنفس الصورة ... و سمع ذات يوم الطفل المعجزة و هو خارجا من إجتماع من النوع إياه و هو يكاد ( يتفقع ) من الغضب و يتمتم : دارفور .. دارفور ... كرهونا حاجة إسمها دارفور .... هسي الواحد يرجع يقول لناس عمر و نافع و عبدالرحيم شنو؟؟!! ... و أعدوا لهم م .... و يلمح السيد ألور في بهو المبني ... و يدور الحوار التالي: الطفل المعجزة: إن شالله فتحت معاهم موضوع التطبيع الكلو مرة تقول لي أصبر ده ما وقتو ؟!! دينق ألور: الحقيقة في مواضيع كتيرة حساسة يا دكتور طرحت ... و في جماعة بخصوص التطبيع ده قالو : وي ويل ثنك أباوت إت .... يعني حنفكر في المسألة دي . الطفل المعجزة: إنت عارف كويس إنو جيّتي دي في الأساس عشان الموضوع ده وحدو .... هسي لما نرجع الخرطوم نقول ليهم شنو ؟ دينق ألور: نرجع ؟؟!! ... لا لا يا أخوي .... أي زول يرجع بدربو !! الطفل المعجزة: يعني إنت قاصد شنو ؟؟ ما حنرجع سوا ؟؟!! دينق ألور: لا لا ... أنا في الحقيقة ماخد إجازة لأيام و عاوز أودي الأولاد كاليفورنيا .... و بعد داك أرجع الخرطوم ... إنت من دربك ده أرجع طوالي الخرطوم ... لأنو الجماعة ديل ( الأمريكان) ما حيسمحو ليك بزيارة أي مدينة تانية بدون إجراءات معقدة .. الطفل المعجزة : خلاس خلاس أنا فهمت .... لكن لما أرجع الخرطوم أقول للجماعة هناك شنوووووو ؟ ... يعني ممكن أقول ... و بتفسير كلامك حكاية ثينك أباوت إت ... إنو في أخبار سارة بخصوص التطبيع .. دينق ألور : نعم ... ممكن .. الطفل المعجزة: أشطب حكاية أخبار سارة دي ... عبدالرحيم محمد حسين ندّمنا عليها .... لكن ممكن أنا أقول ليهم في مؤتمر صحفي: واشنطن ترسل مؤشرات إيجابية بخصوص التطبيع ... و التفاصيل جاية مع السيد وزير الخارجية دينق ألور . دينق ألور: أيوة ممكن ....
و الباقي معروف للجميع .
حتي نفته وزارة الخارجية الأمريكية علي لسان الناطق الرسمي بها .
|
|
|
|
|
|
|
العنوان |
الكاتب |
Date |
الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Wasil Ali | 02-26-08, 02:11 AM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-26-08, 05:40 AM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Wasil Ali | 02-26-08, 02:17 PM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamad Shamseldin | 02-26-08, 03:46 PM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-26-08, 04:35 PM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-27-08, 05:57 AM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-27-08, 04:05 PM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-27-08, 04:18 PM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 02-28-08, 09:23 AM |
Re: الخارجية الأمريكية تنفي ماذكره وزير الخارجية دينق الور عن جدول زمني لتطبيع العلاقات!!!! | Mohamed Suleiman | 03-08-08, 11:31 AM |
|
|
|