|
أمثال سودانية جديدة لم تسمع بها من قبل !!
|
جلست مع صديقى مرة فنظر الي فى تمعن وقال بلهجة جادة هذه المرة , ترى لماذا لا تكون لناأمثال سودانية جديدة غير تلك الأمثال والأقوال التى عفى على أغلبها الزمن , ومعظمها أخذ من دول أخرى وتمت ( سودنته) ( وقولبته ) حتى تواكب لمسات الحياة عندنا فقلت له : كما تعلم أن الأمثال تأتى من أناس عركوا الحياة وعركتهم من امرأة عجوز خبرت عالم النساء والرجال أو رجل أوتي حكمة أو صبية أعطاها الله فطنة يجهلها الجميع أو طفل له عين ثاقبة أنعم بها الله عليه وأيضا هناك المجانين , وكما قيل خذوا الحكمة من أفواه المجانين وما أكثر مدعي الجن والجنون فى زماننا هذا . فقال : كل ما ذكرته صحيح ومثل هؤلاء موجودون أو متواجدون بيننا فلماذا لا تتجدد أمثالنا أو بعبارة أخرى نأتى بأمثال جديدة تصدر من حياتنا المعاصرة؟ كنت أعلم أن صديقى هذا من فئة المجانين أحيانا . فقلت له : هل عندك أمثال جديدة يمكن أن تضيفها الى الأمثال الحالية؟ فقال فى حماس نعم فقلت هات ما عندك فقال : ** المطره لامن تنزل ما بتشاور بيوت الطين فقلت هازئا : ياخى ده مثل ولا ليمونه ! فقال فى اصرار طيب أسمع هذاأيضا فقلت ماذا أهو من النوع الخطير فقال : ** الخميره تصحى الدقيق فضحكت حتى دمعت عيناى وقلت له : هذه ليست أمثال فقال فى جد ظاهر : هذه أمثال ويمكنك أن تتمعن فيها وتعقد مقارنة بينها وبين الأمثال الموجودة عندنا الآن وبعضها قد عفى عليه الزمن حتى أصبحت غير صالحة البته ولكننا لا زلنا متمسكون بها رغم كل شىء , وأمطرنى بعدها بعدة أمثال أذكر منها : ** اذا عرسوا خطيبتك يبقى العيب فى نسيبتك ** الشطة اذا حرقتك ما بتشرب مويه مغليه ** الحكومه تعصر والمعارضه تحلب والبلد محزون ** الزول النضيف ملابسوا ممكن تكون وسخانه ** الجارى من عمايلوا ما بتلفت لى ورا ** اذا خنقتك الكلمات أحيانا تساعدك الدموع ** الراكب فى الجبل أسنانو مابتشاف ** بت الجيران ما بتشاف جمالها الا بعد العرس فكرت فيما قال صديقى ووجدت أن أمثاله ربما تكون فعلا جديدة وصالحة وتؤدى الهدف منها , ويمكننا أيضا أن نضيف عليها , وكل منا يدلى بدلوه بمثل جديد من تأليفه حتى نكون ذخيرة جديدة من الأمثال السودانية , فما رأيكم ؟!
|
|
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
التقيت وصديقى بالأمس ووجدته واجما فقلت ما بك ؟ فأجاب : لقد رأيت شخصا يقسو على حماره فى الطريق ولا يزال يضربه ويشتمه برغم الحمل الثقيل الذى يحمله حتى وقع الحمار من الثقلين ( الحمل والضرب ) فقلت أهذا هو سبب حزنك ؟ فقال : نعم , ألا تراه سببا وجيها ؟ قلت فى سرعة كلا انه كذلك , هون عليك ياصديقى وأردفت قائلا : ماذا لديك اليوم من أمثال ؟ فقال بحزن :
** القلب القاسى تخاف منو الحجاره ** عين الأعور غاليه ** السحابة اليتيمة مابتكون بيضا ** البكر لو بقى عوير .. شوفو البعدو ** فسوة الامام تحرج المأموم ! ** بسامة الدهب .. ابتسامتها مزيفه ** أكل الحرام مابزيد الطول ** الدخله ما بتخوف كل البنات ** القعاد مع الخواجات مابغير اللون ** خرا الحصان مابعفن العربجى
| |
|
|
|
|
|
|
Re: أمثال سودانية جديدة لم تسمع بها من قبل !! (Re: abuguta)
|
الأخ العزيز / أبو قوته تشكر على المرور الجميل . وعندما جلست الى صديقى وذكرت له هذين المثلين الجديدين اللذين ألفتهماأنت وذكرتهما لى فى مداخلتك , قال صديقى استاذن لى منه لأدخل بعضا من التعديلات عليهما مع احتفاظه بكافة الحقوق الأدبية , فقلت : ماذا وضعت من تعديلات فقال : أفضل أن يكون المثلان هكذا :
** قعاد النيت الكتير .. يخلى مرتك تدفق فيك العصير ** لو غبت عن المنتدى .. تمسكنى لواية ندى !! فقلت له هذه التعديلات تبدو جيدة ولكن ماهى قصة هذه الندى و( لوايتها) وأنا أعلم أن المثل جديد (طازه) وأن صديقى أدخل التعديلات لتوه , فبدأ صديقى فى سرد قصة ( لواية) ندى قائلا : ندى طالبة مدمنة على النيت , مسكنهافى العمارات شارع 61 قبالة ( نادى فتيات العمارات ) وبما أنها وأسرتها قد قدموا من الخليج بعد سنوات طويلة من الاغتراب , فمن الطبيعى اذن أن يكون لها صديقات كثر , ولا يحلو لها شىء بعد عودتهم من الخليج الى أرض الوطن سوى الجلوس أمام الحاسوب لساعات طوال والاتصال بصديقاتها وأصدقاءها عبر المسنجر وتبادل النكات والقفشات , واذا أرادت الأسرة الخروج لزيارة الأهل والأقارب تتعلل ندى بأنها مصابة (بلوايه) وتتظاهر بالألم , وعندما تطلب منها والدتها الذهاب الى الطبيب ترفض ذلك وتجيب بأنها عابرة فيتركونها ويمضوا الى وجهتهم وتجلس هى على المقعد الوثير أمام الحاسوب لتمارس علتها المفضلة . انتهى صديقى من سرد روايته المحبوكة وقد أعجبت بطريقة سرده وخياله الخصب وشكرته على التوضيح والتفسير .
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
وأضاف صديقى أمثال أخرى جديدة قائلا :
** اذا ضحكت يوم الخميس كتير .. القيامة ممكن تكون الجمعة ** جرح شهر العسل نسيانو صعب ** الكلام السمح يشرق السفيه ** الجات قسمتا ماتقولو انتظروا الكبيره تعرس ** الأحمق اذا زعل يتكحل بالشطه ** المصران الأعور عميان ** بكى الجزارين فى العصريه .. يجوع الفقرا ** اذا بلعك الحوت المقابضه مابتحلك ** الصاقعه لامن تضرب .. الدخول تحت العناقريب حلال للحلفاوين ** الصقر مابرجع الكتكوت لأمو
| |
|
|
|
|
|
|
Re: أمثال سودانية جديدة لم تسمع بها من قبل !! (Re: ديامي)
|
الأخ / ديامى شكرا على المرور , ندى المقصوده أكيد ما ( ندى القلعة) ولا واحده من المنتدى , دى واحده تانيه خالص حتى بالأماره اسمها ( ندى الطيب قمر الأنبياء محجوب سعيد) وملقبه ب ( ندى آيسكريم ) لأنها تشبه الآيس كريم قبل الأكل . رأيك شنو ؟!
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
وفى جلسة عابرة أضاف صديقى عشرة أمثال أخرى .
** عض المنابر مابجيب دم ** المرايه المكسوره تقسم الوش ** حنين الشوايقه ماطلع ليهم بترول ** الدهب المسروق مابجيب تمنو ** العنقريب اذا اتقلب بطنو تبقى ضهر ** نار القصب يضحكا الهوا ** أدروب كان أباك مايعزمك جبنه ** دروب الخير ماعايزه سؤال ** كباية الشاى البارده زى الفول بعد اللحمه ** آخر الشهر وشو واحد
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
Quote: ** الموبايل لامن يرن ما بهمو انت تسوى فى شنو ** الميكانيكية شوفة العربات الجديده تزعلم ** أبو تلاته عيون لسه ما اتولد ** مافى زول بضحك اذا قالوا ليهو أمك ماتت ** طول النعامة مابديا الحق تتاوق بالحيط ** المره التمشى سريع يدا طاعمه ** الشغال جنب النار الشمس مابتحرقو ** السمكه لامن تمسكا السناره يحرم عليها الضحك ** اذا ماجيت بى رضاك ياود الحلال يحصل ليك الحصل ليى ابراهيم بلال |
تحياتي يا أخ عبد الماجد
بالمناسبة أمس كنت بحكي لواحد صديقي عن أمثالك القاطعها من راسك دي.. والله أنا مبسوط منك جداً وكذلك من أمثالك الطازجة وعجيبة لازم نحن نحاول نتمرد على الأشياء المقولبة إن أمكن ذلك ليه الأمثال تكون متوارثة وقديمة ومسلم بها إذا كانت صاح أم خطأ؟ من الضروري أن تكون هنالك أمثال مواكبة وجديدة إنت بديت هذا التمرد ونتمنى أن يستمر شوف الأمثال الفوق دي ، بالتأكيد كلها صحيحة ومسبوكة بعناية وأنا كذلك متكيّف جداً من يونس ود الدكيم تعرف ليه؟ لأنو كان خاتي عينو على الملكة فكتوريا ، ما قال دي ملكة وكده لماالمهدي قال ليها لو آمنت بتعاليم المهدية وأسلمت (ممكن) نعرسك ليونس ود الدكيم.. شفت كيف يا اخي والله ده كلام جميل جداً بتكيّف كذلك لواحد يكون لابس أصفر نص النهار والناس مغتاظة منو استمر في هذا الإبداع وأنا بحاول أشاركك لو لقيت طريقة على العموم .. تقبل هذه الإشادة مني وربنا يعينك ويوسع مواعينك.. فتك بالعافية والسلامة
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
ذهبت لزيارة صديقى فى العيد فلم يبخل على بعيدية من أمثاله قائلا :
** حرب المنابر أى زول يقدر عليها ** الحكومه كان شربت أول تعطش المعارضه ** سلة السكين .. طلة المسدس تضحكا ** سمك بورتسودان .. ريحتو ما تتشم فى المورده ** حبة العنب ماتتبلع وحبة الزبيب ماتتخلع ** الزمن ما يغشوا الا الفرح ** حداشر نفر فى البيت مايكونوا فريق كوره ** العين لو ماشافت الشوك .. الرجل تعيط ** أم درمان خطواتا للجامع بقت كتيره ** الفرح أوزعو والهم أشيلو براى
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
قبل أن تنتهى فرحة العيد أهدانى صديقى أمثال أخرى :
** رمضان والعيد لمتم صعبه ** شد البطن يخنق المصارين ** اللسان الزفر اذا اتقطع برضو ريحتو تتشم ** اذا عايز تعرف منو الحرامى .. أضحك بلا سبب ** الليمون والشطه حاقدين على الأم فتفت ** درس العصر ينتهى قبل المغرب ** السخانه والبروده اتلمت فى الملاريا ** اذا عجبك شنبك .. عاين الشنبات هناك ** الرسن ماينقص قوة الحصان ** ما سمعنا بى جعلى انتحر
| |
|
|
|
|
|
|
Re: أمثال سودانية جديدة لم تسمع بها من قبل !! (Re: saadeldin abdelrahman)
|
الأخ / سعدالدين وقبل أن يعود صديقى اليك بعد طنطنته وهز كتفيه مر بى قائلا :
** الذاكره صفحات تتقلب بسرعه فى الوجع ** دخان السيجاره مابمرق بالعادم ** الملابس مابتغطى العريان والضحك ماعشا الضيفان ** شكل القرون يجنن المساطيل ** حفلات المغرب .. آذان العشامايتسمع فيها ** العازف عن الكلام .. عزفومابتسمع ** البحر كان عجز ماببقى ترعه ** يالناس الكاملين .. الناقص منو ؟! ** ال الله ماجابو .. يقيف هناك ** يتغير معنى الابتسام اذا كانت الأسنان سوداء
| |
|
|
|
|
|
|
Re: أمثال سودانية جديدة لم تسمع بها من قبل !! (Re: فرح)
|
الأخ العزيز / فرح كل عام وأنتم بخير , عارف مثلك ده لامن قراو صحبى ( بعد اذنك يعنى ) أدخل بعض التعديلات وأصبح المثل هكذا : قشرة اللاب توب أحسن من المركوب ولا رأيك شنو ياأستاذ ؟ تشكر على المرور الجميل وواصل معنا.
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
عشرة أمثال أخرى من صديقى :
** رفس الحكومة يجيب ليها النطح .. ونطح المعارضة مابنفع معاو الا الرفس ** الحكومه اذا عزمتك .. ماتاكل معاها ** سلالم المطره مابطلعك السما ** أمك اذا قالت ليك انتا ماجناى .. عايزه تأكد انك جناها ** اللسان اذا طال مابحك العين ** كاس المعارضه اذا وقع مابتكسر ** الجمرة فى كسلا مابتحرق الواطيها ** البطاريه مابتضوى قفاها ** اذا بت مع الحراميه ماتصحى بالليل ** لو شقيت لسان الرباطاب .. تلقاهو حامل
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
أمثلة أخرى من أمثال صديقى :
** مابتخدر كسلا ... لو ما عندها جناحين ** الجارى من الشيطان يلقى الله ** مافى زول يحب الفوز بى كاس الملاريا ** اذا قست الدموع .. العين تحمر ** سوء الحظ .. تكسب اللوترى والحكومه تمنعك من السفر ** الماشى بى رجلينو خطواتو محسوبه ** رسالة البنوت فى المنتديات .. دايما تصل مقلوبه ** البرىْء برضو بتسجن بالقانون ** العندو ضنب قعاد الكرسى يضايقو ** الأطفال ملح البيت والكبار .. مويتو
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
عشرة أمثال أخرى :
** الحكومه اذا مسكها اسهال مابتقدر تفكو الا فى المعارضه ** باروكة المعارضه ماجابت ليها وزارة الطاقة ** النحس .. هو اليركب مع الزرقاوى فى طائره واحده ** الليل لو طال الهم كبير ** عائشه لامن قالت أنا فلاتيه .. صوتا ما اتغير ** كترة السفر تسلب الهويه ** المره الطويله تخجل الرجال القصار ** البلد لما تبكى .. شد الضراع للحنان ** مرض الحاسوب ما بعادى ** مؤخرة القرد ماتتباس
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
تحديث لمثل قديم محدث قبل فترة : Befor: إذا غلبك سدها وسِّع قدها After: إذا غلبك سدها قد جنبها Now: إذا غلبك سدها في الأول إتأكد إنو مافي زول شايفك حتين بعد داك قول ليها طلقانة بالتلاتة
صيانة لأمثال حديثة: Before: الحكومه تعصر والمعارضه تحلب والبلد محزون! After: الحكومه تعصر والمعارضه تحلب و اللتنين متأكدين مية المية إنو الطلعوا روحو دا تيس!!
Before: المصران الأعور عميان After: المصران الأعور معفي من الخدمة الإلزامية!!
تحديث لمثل قديم: Befor: عينك في الفيل تطعن في ضلو!! After: عينك في الفيل! تطعن في حقن الملاريا!!
أمثال حُدِّثت بواسطة حنكوش (رفض ذكر اسمه، عشان الأجر ما ينقص وكِدا): Befor: الشقي يلقى العضم في الفشفاش After: الشقي يلقى العضم في الـ skeleton
Before:الطيش عند الله بِعيش After: الطيش ما بِعرف يقول: WAW.. زي الحناكيش
Before: الحسود لا يسود After: الحسود لابس ساعة في إيدو الشمال!!
يا عبد الماجد .. مثل فرح بتاع: لاب توب لا بجيب الحجار دا عجب الحنكوش جداً وقال ياريت ما تعدلوه.
بعدين قال ليك أمسك في عمو صديق الموج دا قوي .
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد موسى)
|
تحياتي لجميع المتداخلين
تحديث لي المثل: القديم:التسويهو كريت تلقاهو في جلده الجديد:إتمسحت بي ديانا ونست أضانا
و... القديم:الناس في شنوا والحسانية في شنوا الجديد: ...ركز...(حقوق النقل محفوظة لي ناذر)
و.. القديم:المال تلتوا ولا كتلتوا الجديد:إتمسح البوست إذن أنا موجود
و.. القديم:جنن تعرفو ولاجنن مابتعرفو الجديد:جيب لي معاك 3310 (حشرتين حشرة).
و.. القديم:ضل الدليب بجدع بعيد...... الجديد:تحويشة المسكين لي جهاز المغتربين
| |
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
الأعزاء محمد السيد ديامى محمد السر لكم التحية على هذه الحداثة والتحديث فلنواصل معا , وهاهى عشرة أمثال أخرى :
** البكا قدام البحر ما بطلع السمك ** حتى العميان بشوف الابتسامه الصادقه ** جنا السبع شهور مابتولد فى بيضه ** الموبايل لو مافيهو رصيد مابخف وزنو ** طول الحكومه مابتعرف الا بعرض المعارضه ** اذا عجزت الحكومه الرقيص يغلبا ** الحكومه اذا عرضت البلد للبيع .. المعارضه مابتقدر تشترى ** الحكومه اذا سرقت عمرك .. المعارضه مابترجعو ** مابشوت ضفارى الا الاتعتر بالكوره ** الواقع من السما .. ترحيب الأرض بيو يكون حار جدا
| |
|
|
|
|
|
|
Re: أمثال سودانية جديدة لم تسمع بها من قبل !! (Re: عبدالماجد فرح يوسف)
|
توما وماجد.. محاولة مكشوفة لتمرير أجندة خفية عبر البوست.
Quote: يا جماعة مرتي دي قاصدة شنو؟؟ |
أرجوك يا ماجد ما تشخصن أو تأسرِن المواضيع
إصالة عن نصري ونيالةٌ عن زملائي بالفاشر أعلن عن سعادتنا بانضمام قلميكما لورشة: (الإخلاص للأمثال.. نجر واستعدال). وبهذه المناسبة وتضامناً مع ماجد أهديكما هذا المثل بعد استعداله: Before: المرة كان بقت فاس ما بتقطع الراس. After: الحركة كان بقت فاس ما بتاخد وزارة الجاز.
| |
|
|
|
|
|
|
Re: أمثال سودانية جديدة لم تسمع بها من قبل !! (Re: محمد السر)
|
Quote: رجاءا ألا تنقطعى حتى لو باطلاله صغيره , تحياتى . |
كلام السيد المدير أوحى للزملاء في قسم الاستعدال بنجر هذا التحديث: Before: كترة الطلة بتمسِّخ خلق الله. After:كترة الطلة بتمسِّك ولدا السغيِّر لي نعمات عشان تقدر تسوط الحلَّة. وطبعاً تسعدنا طلت توما
| |
|
|
|
|
|
|
Re: أمثال سودانية جديدة لم تسمع بها من قبل !! (Re: هاشم نوريت)
|
الأخ عبد الماجد شكرا على الخيال الابداعى الجميل المثل الاخطر: هو طول الحكومه مابتعرف الا بعرض المعارضه غير أن صاحبك ، وأعتقد أننى أعرفه أرسل لى عبر الايميل هذين المثلين الما ضاق وجع الضرس يقول الصداع حار كان داير تكتر زوار بوستك صلّح العنوان
| |
|
|
|
|
|
|
|