Quote: لا حظوا أننا في مرحلة تنفيذ إتفاقية سلام يتحول بموجبها السودان إلى بلد علماني كامل رغم محاولات مسئولينا نفي ذلك .. ولاحظوا أن الجنوبيين (الطرف الثاني من الإتفاقية) يحبون تناول لحوم القرود !! فهل سنمنعهم من ذلك إذا ما ارادوا إنشاء مصنع بقلب العاصمة لتجهيز تلكم اللحوم للجنوبيين بالخرطوم أم سنتعايش مع الفكرة ؟؟!!
الكلام دا جد جد يا جماعة
ما قلنا ما عائزين سياسة
11-14-2010, 05:04 AM
اشرف السر
اشرف السر
تاريخ التسجيل: 12-06-2003
مجموع المشاركات: 1563
العسكري جا طالع من جوة ... كالعادة شايل الجريو من إضنينو وبي وراهو ما شي حامد ..
الضابط : يا سيد .. سيف دا داير يتنازل عن البلاغ ..! حامد : الجد شنو ؟! سيف : يا حامد يا خي نحن في حلة واحدة وما في داعي للمشاكل .. حامد : هسي المشاكل عاملا منو ؟ أنا ولا إنت ؟! علي : يا جماعة خلاص باركوها .. حامد : زي ما قلت ليك أنا خمسة وسبعين جنيه ما بدفعا ليك لو كسرت رقبتك ..! سيف : يا خي ما تحمد الله إني طلعتك من الحراسة ؟! الضابط : يا جماعة بطلوا النقة الفارغة دي وإنتهوا لينا من الموضوع .. حامد : الزول دا أنا بديهو تلتين جنيه بس .. دايرا دايرا .. ما دايرا تواصل في الاجراءات عادي ..! الضابط : ما في إجراءات .. الزول دا مشى المستشفى وما ثبت إنو مضروب أو مجروح ..! سيف : يا مولانا أنا ما قلت ليك الدكتور دا ما بيعرف حاجة ..! العسكري : يا سعادتك الود دا أدخلو الحراسة ؟! الضابط : ليه عمل شنو ؟! العسكري : الود دا مصر يقول ليك يا مولانا وإنت حذرتو من كدة كم مرة ما سمعتو هسي ولا شنو ؟! الضابط : يا زول أنا كم مرة قلت ليك ما تقول لي مولانا ؟! أرميك في الحراسة هسي ؟! سيف : والله ما قصدت يا سعادتك ؟! العسكري : يا زول إنت قاصد ودا عدم إحترام للضابط وللقسم دا .. سيف : معليش يا جماعة دي أخر مرة ..! الضابط : هسي بتقبل بي التلتين دي ولا لا ..! سيف : قبلان بيها يا مولـ .. قصدي يا سعادتك ..!
الضابط : خلاص أديها ليو وشيلو جريووكم دا من هنا ..! حامد : خلاص نصل البيت بديها ليو .. سيف : يا سعادتك أنا داير قروشي هسع دي هنا دا ..! حامد : ما شايل معاي قروش هنا .. المحفظة والحاجات كلها وداهم حسن البيت جبيل .. علي : ما مشكلة بمشي البيت بجيب القروش وأجي .. حامد : الدنيا طايرة يا سيف ولا ثقة ما في ..! سيف : إنت زول ما مضمون يا حامد لو كنت داير تديني قروشي كان أديتني ليها من الاول ..! الضابط : يا جماعة بطلو النقة الفارغة وخلصونا ..!!
علي مشى البيت وجاب قروش ... حامد ادى سيف قروشو .. حسن قبض الجريو .. الجماعة دايرين يمشو العسكري وقفم ..
العسكري : دقيقة يا جماعة ماشين وين ؟! حامد : في شنو تاني ؟! العسكري : شنو في شنو ؟ وينو حق اللبن ؟! حامد : إنت والد ولا شنو ؟ يا تو لبن دا ؟! العسكري : اللبن الجبتو للجريو وكبيتو ليهو قدامك داك .. نسيتو ولا شنو ؟! حامد : ما مشكة تاخد حقو طوالي .. داير كم ؟! العسكري : وما تنسى كمان إني كنت في خدمة الجريو الفترة الفاتت دي كلها .. أطلعو من الحراسة وأدخلو الحراسة واجيب ليهو الموية واللبن والاكل ..
حامد : ما قصرت مع الجريو ..
حامد دخل يدو في جيبو وقطع في العسكري عشرين جنيه ..
العسكري : ما قصرت معانا والله .. والقسم بيرحب بيك وبي الجريو في أي وكت .. حامد : مشكور كتير ..
الجماعة طلعوا من القسم .. سيف شال قروشو .. حسن شال جريووهو .. أولاد الحلة مبسوطين الكابوس دا إنتهى .. سيف رفض يسلم علي علي او يتكلم معاهو .. حامد دور عربيتو إتخارج ..!
وبي كدة تكون القصة إنتهت مش ؟!!
لا لا يا شباب .. هولد أون بليس ..!!
المداخلة الجاية فيها نهاية القصة .. نهاية مختلفة تماما ...
لو بتحبونا تابعونا ....
11-15-2010, 04:25 PM
محمد الامين احمد
محمد الامين احمد
تاريخ التسجيل: 08-28-2004
مجموع المشاركات: 5124
عشان تعرفو أنو جريونا دا مسيكين وما وصلنا معاهو المرحلة دي :
Quote: معركة بين ######ين في سوريا تتسبب بمقتل شخص وجرح آخرين لقي شخص حتفه بطلق ناري وأصيب خمسة آخرون في مشاجرة جماعية في قرية عكوبر السورية، شمالي غرب دمشق، بين مجموعة من رعاة الأغنام وحراس إحدى المداجن بسبب عراك بين ######ين.
وسبب المشاجرة التي وقعت الأربعاء الماضي يعود الى أن العراك بين ال######ين استدعى من أحد الرعاة ضرب ###### المدجنة، مما دفع عمال المدجنة للدفاع عن ######هم.
ونشب عراك بالأيدي تغلب فيه عمال المدجنة على الرعاة الذين طلبوا النجدة من ذويهم من بلدة رنكوس الحدودية، فهب أهالي القرية للدفاع عن رعاتهم و######هم، ووصلت تعزيزات تقدر بحوالى 20 رجلا مدججين بأسلحة نارية.
وأضافت المصادر ان حراس المدجنة، الذين ينحدرون من منطقة المالكية في محافظة الحسكة شمالي شرق سوريا، طلبوا النجدة من حراس المداجن الأخرى لنصرة أبناء منطقتهم و######هم، ونشبت المعركة وأطلق احد الرعاة النار على عمال المداجن وقتل الشاب فواز الحسين (32 عاماً) على الفور وجرح 5 آخرون.
ونقل شهود عيان أن السلطات المختصة قامت بتطويق المنطقة وإلقاء القبض على حوالى 30 شخصا، بينما تم إسعاف 5 جرحى وهم من عمال المداجن الى مستشفى في منطقة صيدنايا ومستشفى ابن النفيس في مدينة دمشق.
هنا برضو يا جماعة المشهد حا ينقسم لي إتنين حصلو في نفس الوكت بعد ما الجماعة رجعوا من القسم .. المشهد الاول في بيت ناس حامد وحا نشوف النقاش الداير بين حامد وعلي وحسن ... والمشهد التاني في النادي وجماعة النادي لكن كدي هسي نشوف ناس حامد وعلي ..
علي : حمدلا على السلامة يا حامد .. حامد : الله يسلمك الجريو : هيو .. هيو .. هيو
حامد : يا ود حسن تعال زح الجريو دا من هنا قبال ما أجدعو برة !! حسن : دقيقة بس ..
حسن شال الجريو ربطو في الركن وأداهو كيس لبن وجا راجع ..
حامد : دا شنو الموضوع الفارغ الورطتوني فيهو دا ؟! علي : القصة إتطورت بي سرعة لكن دا كلو من سيف . حامد : أنا متأكد صحبك سيف دا ما نصيح .. هسي في داعي للفضائح دي ؟ علي : سيف أصلو من زمان عكليتة كدة . حامد : الزول دا ما براهو أكيد بيكون في واحد من ناس النادي محرشو علي ..! علي : لا والله ما في أي زول .. الجماعة ديل أنا عارفم كويس . حامد : طيب شنو المشكلة في الولد دا ؟! دا كلو عشان الجريو دا ؟! الجريو : هيو .. هيو .. هيو .. علي : سيف أساسا بيتو إتسرق قبل كدة وقال داير الجريو عشان يربيهو ويحرس ليهو البيت .. حامد : ما يجيب كـلب زي الناس الجريو دا لحدي ما يكبر ويشد حيلو الحرامية يكونوا كملو بيتو عديل ..! علي : سيف زول مسكين بس مشكلتو بعد مرات ما بيفكر كويس ..! حامد : طيب سيف خليهو إنت يا حسن الجريو دا جبتو لينا لي شنو ؟! حسن : أنا جبتو أربيهو وبرضو لمن يكبر يحرس لينا البيت .. حامد : في زول قال ليك البيت داير حراسة ؟ ولا حصل شفت حرامي تلب لينا فيهو ؟ حسن : لا لا ما حصل .. حامد : طيب مالك مدخلنا في المشاكل دي كلها ؟! حسن : يا حامد الجريو بتاعي وأنا جبتو وتعبان فيهو دايرني أخليهو بي سهولة كدة لي سيف ؟! علي : إنت ما تمشي تجيب ليك واحد تاني ؟! حسن : ما يمشي هو ليه أمشي أنا ؟ إنت سبب المشاكل دي كلها كمان داير تتكلم ؟! علي : يا ود إتكلم كويس . حامد : شنو يتكلم كويس ؟ ما كلامو صاح إنت من الأول أديت الجريو لي سيف بدون ما تشاور حسن لييه ؟! علي : يا جماعة قلنا ليكم والله العظيم ما عارفو بتاع حسن ..! بعلم بالغيب أنا ؟!! حامد : خلاص قفلو الموضوع دا علي كدة .. جبتوا لينا مشاكل ساي ... الجريو : هيو .. هيو ... هيو ...
11-23-2010, 04:46 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
سيف : شنو بتعاينوا لي كدا ؟! مالكم في شنو ؟! ما في حاجة يا مان مالك متحسس ..! سيف : كلكم بتعاينوا لي كدة تقول كاتل فيكم واحد .. صراحة يا سيف إنت زول عكليتة ساي !! سيف : كيف الكلام دا ؟: يا خي حاجة ما حقتك ما ترجعا لي سيدا .. شنو عامل ليك شكلة وقسم ونقة في الفاضي ؟ّ! سيف : إنت بالذات ما تتكلم .. أنا زول فردتك يضربوني قدامك وما تخش معاي ؟! منو دا .. ؟! أنا بس لو ما عامل حساب لي علي أطير ليك في حامد دا جوز لامن يعرف حاجة ؟!
سيف : وعلي دا وينو ؟ أنا زاتي عندي معاهو حساب تاني .. يمسكني لي أخوهو عشان أخوهو يضربني ؟!! قلنا ليك دا ما حصل ما تتلوم مع علي ساي ..! الزول النبذوهو : هسي يا جماعة موضوع الجريو دا إنتهى .. إنتو نسيتو الزول النبذنا ولا شنو ؟!
ما نسيناهو أها هسي نعمل شنو ؟! أنا متأكد دا حسن وبقول نفتح فيهو بلاغ ؟! تااااااني ؟!! ما بلاغ فيهو هو .. في صاحب الرقم لانو لو الشريحة دي مسجلة أكيد حا نجيب الزول صاحبا ..! يا جماعة جلونا من الموضوع دا ..! هسي لو طلع حسن هو صاحب الشريحة تعملوا شنو ؟!
شنو نعمل شنو ؟! البلد دي ما فيها قانون ولا شنو ؟! يا جماعة ما تنسوا حسن دا أخو حامد ؟ أنحنا هسي ما صدقنا إنتهينا من موضوع الجريو كمان دايرين تدخلونا فيلم جديد ؟! سيف : إنت حامد دا كاسر عينك ؟ّ شنو بتخاف منو كدا ؟ّ عشان عندو قروش ولا شنو ؟! أيوة عشان عندو قروش ؟ أمال النادي دا الحا يبنيهو ليك منو ؟!. فكر لي قدام يا مان وخليك تفتيحة ..!! سيف : يا خي نادينا دا برانا بنتمو .. والزول النبذنا دا أصلو ما نخليهو .. إنتو يا جماعة ما تعملوا حساب لي علي دا ؟ الزول دا مش صاحبنا برضو ؟ يعني شنو ؟ يعني حتى لو طلع أخوهو هو النبذنا ما حا نقدر نعمل ليهو حاجة عشان خاطر علي .. سيف : يا زول علي دا أنا رميت طوبتو ولو طلع حسن هو النبذنا أصلو ما نخليهو .. هسي يا جماعة خلونا في موضوع بكرة .. مفروض حامد يدينا خمسة مليون نحفر بيها البير .. الأجواء دي مناسبة ولا نأجل المشية شوية ؟! أي تأخير ما في صالحنا .. عايزين نخلص سرعة من الموضوع دا ..! خلاص بكرة بعد المغرب نمشي ليهو لكن سيف دا ما يبارينا ؟! سيف : شنو ؟! الكلام واضح إنت زول متشاكل معاو ودخلتو الحراسة كمان داير تمشي تشيل منو قروش ؟! . سيف : يا زول ما ماشي معاكم إنشالله ما يدوكم قروش زاتو .. يا خي الجلدة دا خمسة وسبعين جنيه إستكترا فيني دايرنو يديكم خمسة مليون ؟! إنت كمان قاعد تبالغ شنو خمسة وسبعين جنيه دي ؟! سيف : يا زول انت ما عارف حاجة أسكت ساكت .. يا خي أنا جايب للجريو دا كم كيس لبن ؟! كم كيس صابون بدرة ؟! بمشي الجزارة بجيب ليهو لحم وشحم بي كم ؟! يا خي الجريو دا لمن شلتو من حسن كان عامل كيف كيف .. وهسي شوفوا عامل كيف .. فرق السما والأرض .. تقول لي خمسة وسبعين جنيه كتيرة ..!
أهنداك علي جاي ..! سيف : الزول دا لو فتح خشمو معاي بديهو بنية في ديـ....و !! ماعندك معاو شريعة ..! علي : كيف يا شباب ؟! الشباب : تمام والله .. قعمز ..!! أخوك إنشالله ما يكون زعلان لحدي هسي ..! علي : أبدا والله ما عندو معاكم مشكلة .. هو بس زعلان من سيف دا ..! سيف : يا زول ما تجيب سيرتي في خشمك دا ..!: علي : شنو فاير كدة وهايج كدة ؟! هسي في واحد سألك ؟! سيف : يا زول أسكت مني ؟! علي : شنو أسكت منك ؟ عامل لي فيها راجل ولا شنو ؟! سيف : أقوم عليك هسي أوريك رجالتي ؟! علي : لا لا ما تقوم .. رجالتك شفتها لمن إتشاكلت مع حامد ؟!
سيف طوالي نط وعلي نط فيهو والبنية دورت ..!
أمسك سيف دا .... جر علي دا كدة .. يا جماعة زحو من بعض .. سيف : ما في زول يمسكني كلو كلو .. علي : الليلة بوريك ليو يا سيف .. مش داير كدة الليلة القسم زاتو ما يحلك مني ؟؟!
سيف وعلي مشتبكين كل واحد خانق التاني ... كربون.. بنية.. معيط شعر .. شلاليت تحت الحزام .. أم دلدوم .. كفوف .. طبز عيون .. رمي في الواطة .. دردقة .. مكابسة للطوب .. وأولاد الحلة بيحاولوا يحجزوهم بي صعوبة فكوهم من بعض ..
سيف : والله يا علي إلا تاباني .. بس تبقى راجل وما الم فيك مُطرف ..! علي : هسي ما لميت فيني وريني رجالتك ..! يا جماعة باركوها .. سيف : ليك يوم يا علي عشان تعرف رجالتي كويس ..! علي : يا ها رجالتك القاعد تعملا مع الجريو ولا حاجة تانية ؟! سيف : قصدك شنو يعني ؟ يا خي فكني يا د ......ـــن إنت ؟!! يا خي ما فاكيك .. يا سيف عليك الله روق ..! علي : يا خي فكو النشوف رجالتو دي حدها وين ؟!
الجماعة زحوهم من بعد وإتفرتقوا وكل واحد مشى بيتم والنفوس إتشحنت ..
وطبعاً الأمور ماشة من سيئ لأسواء وما بتبشر بي خير ..
11-23-2010, 04:53 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
غايتو قدر ما أقرأ الحوار الخاص بي سيف و الشخوص المعاهو طوالي يخطر في بالي فرقة الأصدقاء و خاااااصة الزول الدكتور الرائع......معليش نسيت إسمو لكنه كبسووووووور
11-24-2010, 01:33 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
علي : يا حامد أولاد النادي دايرنك برة ..! حامد : دخلم الصالون بجيهم هسي ..!
علي دخل الشباب الصالون .. طبعا كلهم جو إلا سيف ..
الجماعة قاعدين في الصالون سمع إضنينم الجريو صوتو جاييهم من جوة (هيو ..هيو ..هيو)
الزول النبذوهو : يا علي أوع تكون كلمت حامد إنك إتضاربت مع سيف ؟! علي : ما كلمتو ياخ قايلني عوير أنا ..! حامد : السلام عليكم يا شباب . الشباب : وعليكم السلام كيف أحوالك ؟! حامد : تمام التمام : أها الشغل ماشي كيف ؟ والله كويس هسي حديد السور ثبتناهو وضربناهو بوهية .. حتى ركبنا جزء من اللمبات وبنينا أوضة صغيرة كدة نخزن فيها الكراسي والحاجات .. غايتو ماشين كويس والحمد لله ..!
حامد : هسي المهم البير عشان ندخل الموية ونعمل الحمامات والوضاية ..! طبعا دي أهم حاجة .. حامد : الشركة المشيتو ليها ديك قالت ليكم بي كم بيعملو البير والسب تانك ؟! قالوا بيعملو السب تنك جاهز في الموقع بي ستة مليون .. والبير بيعملوهو بي خمسة مليون ..! حامد : إنتو لو جبتو حفارين يعملوا البير بالطريقة البلدية مالو ؟! والله الشركة دي تركية وبتعمل أبار بي طريقة حديثة .. يعني ولا بيحفرو بير زاتو .. بيجو بي عربيتم ويدخلو في الأرض نظام مواسير لحدي ما الماسورة التحت تصل العين تحت .. وطبعا كدة أضمن عشان ما زول يقع لينا في البير ولا حاجة بالأضافة طبعا للسرعة ..! حامد : بالنسبة لي توصيل الموية والكهربا دي ما مشكلة ...لو البير والسب تانك إتعملو الباقي كلو ساهل .. الزول النبذوهو : أكيد ..
حامد : وين سيف ..؟ ما شايفوا معاكم لييه ؟؟! ما كان بيجي طوالي مالو الليلة ؟! والله سيف ما قابلناهو الليلة ..!! حامد :الود دا ما داير أشوفو معاكم تاني لا هنا لا في النادي ؟! لا لا هو هنا تاني ما بيجي ؟! حامد : والنادي برضو ما بيجي ؟! النادي هو بيجي لكن ما كتير ..! حامد : لا كتير لا شوية .. النادي دا عايزين فيهو ناس محترمين ويجوهو أسر وعوائل وناس الحلة يلقوا فيهو حتة ظريفة يقيلو فيها ويعملوا فيها مناسباتم .. زي سيف دا ما أشوفوا بي هناك ..!! لكن يا حامد سيف دا معانا من الأول وشغال معانا كويس كيف نقدر نمنعو يجي ؟! حامد : تمنعوهو كدة .. تتصرفو معاهو .. سيف دا ما مقبول نهائي من جانبي ..! الزول النبذوهو : طيب هسي نقول ليهو شنو يعني ؟! حامد : دي مشكلتكم ما مشكلتي .. أنا ما داير أشوفوا هناك ..! علي : يا حامد خليهو يجي .. الزول دا زعلان على تصرفو معاك .. سيف دا زول طيب خليهو يجي ..!
الوكت دا حسن أخوهم الصغير جا داخل وسمع أخر الكلام ..
11-25-2010, 04:41 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
حسن : طيب شنو ؟! الزول دا أمبارح مش إتضاربتو مع بعض لمن حجزوكم ؟!
كلام حسن في اللحظة دي بالذات بقى زي القنبلة ..!! نسف ليك اي حاجة ... مش زي القنبلة .. قنبلة عديييل كدة ..
الجماعة كلهم صننننننننننن صنو ..
الناس دي صانة قريب الدقيقة ؟!
حامد : بتقول شنو يا حسن ..!! حسن : هسسسع دي في واحد صحبي كلمني في الموبايل وكان حاضر الشكلة الحصلت أمبارح ..! حامد : الكلام دا حصل يا علي ؟! علي بتوتر : ما كانت شكلة كدة يقولوا عليها .. والناس حجزونا سرعة ؟! حسن : سرعة شنو ؟! قال إتشاكلتو وكمان كان في فليع حُجار وضرب شديد جوة وبرة النادي كمان ..!! تقول لي ما شكلة يقولوا عليها ..!! الشكلة اليقولوا عليها دي كيفنها لو ما كدة ؟!
علي : انت كذاب وصحبك كذاب .. كلام زي دا ما حصل ..! حسن : ما كذاب ولو داير تتأكد أنا مسجل المكالمة .. أسمعك ليها هسي ؟!!
يا خي الوكت دا ما عارف أوصف ليكم شعور علي .. رقد ملوخية ..
غايتو حالتو بقت زي حالة سيف لمن حسن قال سجل ليهو المكالمة النبذو فيها ديك ..!..
وطبعا ما ننسى إنو زي المرة الفاتت برضو .. ما كان في تسجيل لي مكالمة ولا من يحزنون .. بس حسن التفتيحة كالعادة لعب على أعصاب علي الدقوسة ونجح في كدة ..
والظاهر إنو حسن متعود يشهر سلاح إدعاء تسجيل المكالمات دا طوالي لمن يجي يثبت وجهة نظرو .. وطواالي خصومو بيبلعوا كلامم ناشف بدون ما يتأكدوا لو فعلا في تسجيل ولا لا ..!!
علي : يا ود خش جوة .. إنت الجابك هنا شنو ؟! حامد : دقيقة يا علي .. ما تجوط في الود دا .. تعال يا حسن أحكي لي ..صحبك دا قال ليك شنو ؟!
حسن قرب ليك من أضان حامد وحتا ليهو الشمار السمعو كلو بي ضبانتو من طق طق لي سلام عليكم .. وبي هنا علي وأولاد الحلة عرقم بلل قمصانم مع إنو الصالون عامل زي تلاجة الموز من شدة البرد بتاع مكيف الإسبلت الـ 30 وحدة ..!!!
حامد : ليه ما حكيت لي الكلام دا يا علي .! علي : ما شفتو حاجة مهمة تتحكي ..!! حامد : وسبب الشكلة في شنو ؟! علي : سيف مفتكرني أنا مسكتك ليهو وإنت ضربتو في شكلتكم الاخيرة ..! حامد لي أولاد الحلة : وبعد دا تقولوا لي عايزين سيف في النادي ..! الزول النبذوهو : دا براهو ودا براهو يا حامد ما نجوط المواضيع ؟!
حامد : إنت بالذات أكبر جواط للمواضيع ..! المرة الفاتت الناس بتتكلم في موضوع الجريو إنت جيت لخبطتنا بي موضوع الزول النبذك في الموبايل وجطت لينا المواضيع ..! النبذوهو : أنا ما جطت أي مواضيع أنا أساسا ما عندي علم بي موضوع الجريو وجيت عشان أشوف الزول النبذني منو ؟! حامد : وهسي إنت لقيتو ..! النبذوهو : لسع ... لكن من بكرة حا أمشي أفتح بلاغ في رقم الشريحة لحدي ما نشوف حا نصل لي منو ..!! حامد : هسي شوفوا لينا حل لي حكاية سيف دي ..! الزول دا أنا ما دايرو في النادي رايكم شنو ؟!! أمشو إتشاوروا وبعد داك أدوني كلامكم ..! علي : جدا نشوف البيحصل شنو ؟! وبالنسبة لي قروش البير ؟! حامد : هسي ما شايل معاي قروش خلوا الموضوع دا لحدي بكرة وبالمرة نشوف قراركم .. بكرة نتقابل هنا بعد المغرب .. كلام تمام ..!!
الجماعة : تمام ..
الجماعة إتخارجو من البيت وماشين على النادي يتكلمو ويتناقشوا في التطورات الجديدة دي .. الرسالة الرسلا ليهم حامد وصلت تماما ..
يا سيف يا النادي .. وأولاد الحلة عليهم يختاروا واحد .. يا النادي يا سيف ..!!
11-25-2010, 10:00 PM
ابراهيم بقال سراج
ابراهيم بقال سراج
تاريخ التسجيل: 10-12-2005
مجموع المشاركات: 10842
الجماعة وهم طالعين من حامد وماشين على النادي ينقرطوا ويتكلموا ... واحد منهم طلع كيس تمباك مااكن وأدى الجماعة يسفوا ويتفوا ..
النبذوهو داك : غايتو الليلة يحلها الشربكا ..! الشربكا منو قصدك ؟ سيف ولا الجريو ؟! النبذوهو : الإتنين ..!! هسي نتصرف كيف يا أخوانا ؟! يا علي رايك شنو إنت ؟! علي : والله راسي ضارب عدييل كدة .. ما عارف نسوي شنو ؟! هسي كمان لو كلمنا سيف بالحصل يقوم يهيج زيادة حقو ما نكلمو ..! النبذوهو : كيف يعني ما نكلمو ؟! لا زم يعرف عشان نقدر نشوف حل للمشكلة دي ..!
علي : الزول دا لا داير إتكلم معاهو لا دايرو يتكلم معاي .. من هسي بوريكم عشان نكون واضحين ..! النبذوهو : إنت يا علي حسن أخوك دا مالو بتاع فتن كدة ؟! مش أدوهو الجريو بتاعو ؟! تاني مالو معانا؟! علي : حسن دا زعلان لسع من سيف وجرجرتو ليهو في قصة الجريو ..! دا منو الوراهو قصة الشكلة من الأساس ؟! علي : دا سؤال دا ؟! ما الحلة كلها شافت الحصل ؟ أي زول ممكن يوريهو ؟! النبذوهو : بعدين تعال هنا .. حسن دا شغال في كبانية ؟! شنو كل شوية والتانية كاسر عين واحد فينا بي تسجيل المكالمات ؟! المرة الفاتت مسكا ذلة لي سيف والمرة دي مسكا ذلة ليك إنت .. دا حالتك أخوهو .. المرة الجاية الدور علي منو ؟! علي : حسن دا جلونا منو هسي بعرف إتحاسب معاهو لمن أرجع البيت ..! النبذوهو : أهنداك سيف قااااعد في النادي .. الله يستر بس ..! علي : الزول دا لو فتح خشمو معاي ما بخليهو .. ..!! النبذوهو : ما عندك معاو شريعة ..!!
الجماعة تووووشك جو منقشطين جوة النادي ..!!
سيف : مالكم شايلين الهم كدة زي التقول في واحد كاسر عينكم كلكم ؟! النبذوهو : واحد زي منو مثلا ؟! سيف : إنت عارف قصدي .. الجيتو منو دا .. أها إنشالله طلعتو منو بي فائدة .. علي : بطل شغل المطاعنات دا وإتكلم عدييل ..! سيف : يا زول ما تتكلم معاي .. هسي أنا سألتك ؟! علي : شنو شغل النساوين دا ؟ .. ما تقول حامد عدييل .. خايف مالك ؟! سيف : أنا خايف ؟! من منو ؟ أمبارح ما طقتقطك هنا لمن جريت تكابس الطوب ؟! علي : انا كابست الطوب ؟! قايلني زيك يا باطل .. تعضي زي البنات ؟! سيف : أقوم عليك هسي أوريك العض الما بتعرفو ؟!
النبذوهو : يا شباب دقيقة .. أنحن ما ناقصنكم بالله .. يا سيف إنت ما داير تعرف الحصل شنو في بيت حامد ؟! سيف : الحصل شنو يعني ؟! النبذوهو : الحصل إنو حسن كلم حامد بالشكلة البينك وبين علي .. وحامد هاج وزعل وقال ما دايرك في النادي دا ؟!
سيف : شنو ؟؟!! هو كان نادي أبوهو ؟؟! علي : يا زول الدخل أبوهو هنا شنو ؟ إتكلم عدل أحسن ليك ؟! سيف : يعني حامد داير يطردني من النادي عشان دقيت أخوهو ؟ يلقاها عغند الغافل دي ..! علي : دقيت منو إنت ؟! يا هو الدق البي لسانك ولا ساي ؟!
يا جماعة كدي خلونا نتفاهم ..! سيف : يا زول ما في تفاهم ودا ما كلام حامد.. علي دا هو الحرش حامد يعمل كدة .. أها أنا من النادي دا ما بزح .. ساكن فيهو سكنة عدييل كدة ..!! علي : انا حرشتو ليك ؟!! أنا مالي ومالك جيت النادي ولا ماجيت ؟! النبذوهو : يا سيف علي ما عندو دخل بالموضوع دا أنحن حاضرين الكلام ..! سيف : شنو حاضرين الكلام ؟! يعني كنتو بايتين معاهم من امبارح ؟! شوف ما هو واحد من إتنين يا علي هو الحرشو يا كمان حسن ..!
حسن ما عندو بينا شغلة ولا بيجي النادي زاتو ..!! سيف : أها إنتو رايكم شنو ؟! النبذوهو : أنحن راسنا ضارب هسي .. لأنو الظاهر حامد ما حا يتم لينا النادي إلا نقول ليهو إنت ما حاتجي .. وطبعا ما بنقدر نقول ليك ما تجي ..! سيف : جيب لي الكلام من الأخر .. إنت داير تقول شنو ؟! النبذوهو : أنا صراحة رايي النادي نتمو برانا ما دام حامد من اولا كدة داير يتحكم فينا ..! علي : انت جنيت ؟ ما بنقدر نتمو برانا ولا حاجة أقل حاجة دايرين زي عشرين مليون تاني عشان النادي يقولوا عليهو نادي .. من وين نجيبا دي ..!
يا جماعة أنا عندي إقتراح ..!! قول إقتراحك ؟! أنا شايف المسألة مسألة زعل وبتتحل مع الزمن .. يعني بي كل بساطة سيف ما يجي داخل الناديتاني ؟! سيف : شنو ؟؟!! والله بجي داخل جو ديـ .....ك زاتو ..!! دقيقة يا خي خليني اكمل كلامي ...! شنو داير تنط لي في حلقي طوالي ؟! سيف : طيب قول ..! سيف ما يجي النادي في فترة الشغل . الوكت دا يكون النادي إتعمل .. بي مرور الزمن بتكون النفوس إتطايبت وحامد هدا شوية .. نقوم كدة نفتح ليهو موضوع سيف .. وأنا متاكد للوكت داك حامد بيكون ما عندو مشكلة ..! علي : دا أحسن حل ..! سيف : أحسن حل لي منو ؟! خلاص لقيت ليك فرصة تخارجني من النادي أنت وأخوانك ؟! والله لو جا شنو وشنو ما أخليهو ليكم ؟! فاكرين روحكم منو إنتو ؟! علي : يا زول ما في زول هنا دايرك زاتو فاكر روحك منو إنت ؟؟! الكلام دا في مصلحة الحلة .. يعني عشانك النادي ما يقوم ولا شنو ؟! النبذوهو : دقيقة يا علي .. سيف معاو حق .. كيف يعني ما يجي النادي ؟! عشان اخوك يعني عندو قروش داير يفرض علينا طريقتو ؟! علي : غايتو الإقتراح دا أحسن حل .. وأحسن منو ما في وأنا لي قدام أضمن ليكم حامد ما عندو مشكلة وبيرجع سيف ؟! سيف : شنو يرجعني دي ؟ كان معرسني وطلقني ولا الفهم شنو ؟! وهسي بعد ما أخلي النادي أمشي وين يعني ؟! علي : شوف ليك شغلة تانية ..أو شوف ليك جريو ربيهو أشغل بيهو وكتك ؟! سيف : شنو ؟! قصدك شنو ؟ خليك راجل وإتكلم عديل ..! النبذوهو : أنا ضد اي زول يفرض علينا شروطو .. أنا مع سيف ... مش حامد أخوك دا يا علي ؟ دا يا هو طرفنا منو والنادي بنتمو برانا ؟! علي : يا زول إتكلم عن نفسك ..!! إنتو يا شباب رايكم شنو ؟!
أكتر من تسعة تنفار قاعدين وراسم ضارب ..!! الجماعة إنقسمو .. واحدين مع إقتراح سيف يمشي يخلي النادي لحدي ما الأمور تهدا .. واحدين مع سيف ما يخلي النادي حتى لو حامد ما اداهم قروش .... الباقيين رايم ما واضح بيلفو ويدورو في الكلام ..
سيف : أقول ليكم حاجة .. مش أنا ساكن براي ؟! النادي دا نخليهو عدييل كدة ,, النادي يتحول في بيتي هناك .. الحوش كبير وواسع والغرف مريحة .. نشيل الكراسي والطرابيز والبروش ونمشي هناك ..! النبذوهو : إقتراح كويس جدا .. ومالو ؟! علي : ما عندي مشكلة ؟! سيف : شنو ما عندك مشكلة ؟؟! إنت بالذات ما أشوفك بي هناك ..! قايلين روحكم براكم بتعرفو تطردو ولا شنو ؟! أصلو ما أشوفك حايم بي هناك ؟! إعتبر روحك مطرود مقدمًا ..!! النبذوهو : دا كلام شنو يا سيف ؟ شنو بقت علينا حكاية حلب التور دي ؟ طيب هسي ما حلينا أي مشكلة ؟! علي : يا زول ما في واحد جاييك زاتو ؟! أها أقول ليك حاجة ؟ أنا زاتي غيرت رايي .. النادي دا ما يتحول أي حتة .. نقعد نتمو إنشالله بعد مليون سنة ..!
يا علي دقيقة ما تركب راسك انت كمان ؟! سيف : يا زول علي دا ما يبارينا زاتو .. خليهو يقعد هنا براهو زي الكـلب ..! علي : زي الكـلـب ولا زي الجريو ؟!
سيف طوالي نط وعلي نط فيهو والبنية دورت ..!
أمسك سيف دا .... جر علي دا كدة .. يا جماعة زحو من بعض .. سيف : ما في زول يمسكني كلو كلو .. علي : الليلة بوريك ليو يا سيف .. مش داير كدة الليلة ما في شي بيحلك مني ؟؟!
سيف وعلي مشتبكين كل واحد خانق التاني ... كربون.. بنية.. معيط شعر .. شلاليت تحت الحزام .. أم دلدوم .. كفوف .. طبز عيون .. رمي في الواطة .. دردقة .. مكابسة للطوب .. وأولاد الحلة بيحاولوا يحجزوهم بي صعوبة فكوهم من بعض ..
سيف : والله يا علي إلا تاباني .. بس تبقى راجل وما الم فيك مُطرف ..! علي : هسي ما لميت فيني وريني رجالتك ..! يا جماعة باركوها .. سيف : ليك يوم يا علي عشان تعرف رجالتي كويس ..! علي : يا ها رجالتك القاعد تعملا مع الجريو ولا حاجة تانية ؟! سيف : قصدك شنو يعني ؟ يا خي فكني يا د ......ـــن إنت ؟!! يا خي ما فاكيك .. يا سيف عليك الله روق ..! علي : يا خي فكو النشوف رجالتو دي حدها وين ؟!
الجماعة زحوهم من بعض وإتفرتقوا وكل واحد مشى بيتم والنفوس إتشحنت ..
11-27-2010, 03:54 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
هسي المشكلة ما في الشكلة دي .. المشكلة إنو حسن اخو علي جا ماري بالصدفة قدام النادي وكت الشكلة وصور الفلم كلو ..!!
مش زماان في الصفحة الاولى قلت ليكم القدر دا يوم بيكتل ليهو زول ؟!
حسن كان ماشي الدكان يجيب لبن الجريو والبُنية دورت قدامو .. يعني المرة دي ما في زول حكا ليهو ولا عندو تسجيل لي أي مكالمة .. ودي براها كرامة وسلامة .. وحقو ناس النادي يفرحو لي دي براها ..! حسن لبت في حتة غميصة وإتفرج على كل القصة وعطل مشيهو للدكان قريب النص ساعة .. والجريو بي هناك جعان ونعسان و و س خ ا ن وشغال يعمل (هيو .. هيو .. هيو)
11-27-2010, 04:26 PM
waleed dawash
waleed dawash
تاريخ التسجيل: 06-04-2007
مجموع المشاركات: 1541
Quote: سيف : شنو يرجعني دي ؟ كان معرسني وطلقني ولا الفهم شنو ؟!
Quote: سيف : أحسن حل لي منو ؟! خلاص لقيت ليك فرصة تخارجني من النادي أنت وأخوانك ؟! والله لو جا شنو وشنو ما أخليهو ليكم ؟! فاكرين روحكم منو إنتو ؟!
Quote: شنو ما عندك مشكلة ؟؟! إنت بالذات ما أشوفك بي هناك ..! قايلين روحكم براكم بتعرفو تطردو ولا شنو ؟! أصلو ما أشوفك حايم بي هناك ؟! إعتبر روحك مطرود مقدمًا ..!!
حلوة مطرود مقدما دي هههههههه
11-27-2010, 05:29 PM
النذير حجازي
النذير حجازي
تاريخ التسجيل: 05-10-2006
مجموع المشاركات: 7162
ملاحظة يا ناذر: ليه كل الشخصيات في هذه الرواية لديهم أسماء ما عدا الزول النبزوهو؟! من المفترض أن تنجر له اسم وللأ شنو؟! فما الحكمة في ذلك؟ إلا أنك أنت الشخص المقصود.
11-27-2010, 08:54 PM
ابراهيم بقال سراج
ابراهيم بقال سراج
تاريخ التسجيل: 10-12-2005
مجموع المشاركات: 10842
Quote: ملاحظة يا ناذر: ليه كل الشخصيات في هذه الرواية لديهم أسماء ما عدا الزول النبزوهو؟! من المفترض أن تنجر له اسم وللأ شنو؟! فما الحكمة في ذلك؟ إلا أنك أنت الشخص المقصود.
منو القال ليك ؟!!
أساسا هو إسمو كدة .. إسمو بالكامل (الزول النبذوهو خلف الله محمد جمعة) ....ههههههههه
يا النذير .. أنا من الأول عارف القصة دي حا تطول وحرصت جدا ما أكتر في الأسامي عسشان الناس المتابعة ما يروح ليها الشخصيات .. هسي أنا متأكد تماما الناس القرت القصة عارفة تماما حامد وعلي وحسن وسيف وضعهم شنو في القصة حتى لو إنقطعوا عن المنبر كم يوم .. لكن لو كترت ليكم الاسامي الشغلة بتجوط ..
يا مان وقف التخمين في وضعيتي في القصة لحدي ما تنتهي القصة وننزلا مسابقة ههههههه
11-28-2010, 06:58 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
علي جا راجع البيت زهجان وقرفان من الوضع .. بقى كل ما يمشي النادي يشتبك مع صحبو سيف ويتضاربو .. جا داخل البيت وخاتي في راسو أخوهو حسن والفتنة العملا وما عارف انو حسن شاف الشكلة جبيل ..
علي كشف يرة البيت لقى عربية حامد ما في طوالي دخل على البيت .. الجريو شاف علي دور هيو .. هيو .. هيو .. علي نهر الجريو المسكين قهمو .. قبل ما علي يمش أوضة حسن عاين للجريو والجريو عاين ليهو .. فكر ينتقم من حسن يشيل الجريو يجدعو برة او يوديهو مرة تانية لي سيف .. لكم في أخر لحظة غير رايو ..
علي : يا ود أنا ما بنادي فيك ؟! ما تقول ايوة ؟! حسن : أيوة ؟! علي : عامل فيها مسيخ يعني ؟! حسن : ما سمعتك قلت ليك أها داير شنو ؟! علي : إنت شنو حركاتك دي ؟ تمشي تنقل قوالات لي حامد بي الشكلة ؟! حسن : مش دا الحصل ؟ شنو تغش حامد تقول ليهو سيف طيب وهو بيضارب فيك ؟! علي : إنت الدخلك شنو أساسا في الموضوع ؟ مش الجريو بتاعك شلتو ؟ تاني مالك معانا ؟! حسن : سيف دا أنا ما بخليهو .. كم يوم جهجهني في الموضوع دا ؟! علي : وكمان شنو حركات تسجيل المكالمات القاعد تعملا اليومين دي ؟! حسن : ما لازم أعمل كدة عشان الكلام ما تنكروهو إنت أو سيف ؟! علي : يا زول ما عندك معانا شريعة وتاني ما أشوفك داخل في مواضيعنا دي ..! حسن : شنو هو الما بتشوفني ..؟ ما عندي معاكم شغلة .. لكن سيف دا أنا ما بخليهو كلو كلو .! علي : حا تعمل ليهو شنو يعني ؟! دا تهديد ولا شنو ؟! حسن :أيوة تهديد أنا بعرف أسوي ليهو شنو .. بس خلي حامد يجي .! علي : شنو حامد يجي دي .. داير تنقل ليهو شنو كمان ؟! حسن : إنت عارف أنا حا أقول ليهو شنو ؟! حا أحكي ليهو الحصل في النادي جبيل ..!
علي إتوتر لكن كضب الشينة وسأل حسن بي توتر ولهجتو إتغيرت ..!
علي : حصل شنو تاني كمان ؟! حسن شكلتكم التانية .. قايلني ما عارفا ولا شنو ؟!
علي رقد سلطة وقرب يبكي وبقى على التحانيس ..
علي : الوراك منو المرة دي ؟! كدي سمعني التسجيل ..! حسن : ما في أي تسجيل .. شفتكم بي عيني المرة دي .. علي : عليك الله يا حسن ما تكلم حامد بالموضوع دا يقوم يفرتق النادي مرة واحدة ..! حسن : يا زول ما تحنسني .. أنا لا زم أكلمو عشان يتصرف مع سيف دا الكل يوم داير يشاكل ..! علي : يا ود قلت ليك ما توريهو .. مش سيف دا أنا با خد ليك حقك منو . حسن : حا تعمل ليهو شنو يعني ؟! أنا بوري حامد يقفلو في السجن عشان يتأدب ..! علي : أنا بعرف إتصرف معاو .. أهم حاجة حامد ما يعرف .. إتفقنا ؟! حسن يا زول ما إتفقنا ولا حاجة .. مش أنا قلت ليك سيف دا ما بخليهو ؟! علي : يعني داير تضرني عشان تصفي حسابك مع سيف ؟
الوكت دا الجريو دور هيو ..هيو ..هيو .. الباب فتح وفي زول جاي داخل .. علي بيحنس في حسن ما يوري حامد وحسن مستمتع بي تحنيس أخوهو ليهو .. الوكت دا حامد جا داخل ..
حامد : في شنو ؟ مالكم ؟ اللماكم شنو هنا الليلة جمب بعض كدة ؟! علي بي سرعة : ما في حاجة .. جيت لي حسن أديهو وصية بتاعت واحد صحبو ..! حامد : ومالك كابي عرق كدة في البرد دا ؟! علي : كنت جاكي مع الشباب قبل شوية .. حسن : يا حامد في حاجة داير أقولا ليك ..! حامد : قول ..
الوكت دا علي بقى يعفص كراع حسن عشان ما يتكلم وحسن مستمتع تماما ..
حسن : جبيل جا عوض الشغال معاك بسأل منك وختى ليك الدفتر داك ..! حامد : مالو ما ضرب لي تلفون ؟! حسن : ضرب ليك لكن تلفونك كان مقفول وقال بكرة تاني بيمر عليك .. حامد : أوكي .. في حاجة تانية ؟
قبل ما حسن يتكلم علي نط :
علي : ناس عبد الحليم قالو ليك ما تنس العقد يوم التلاتاء بعد صلاة العصر ..! حامد : أي والله ذكرتني خلاص بمشي ليهم .. حسن : في موضوع تاني داير أقولو ليك ..!
الوكت دا عفيص علي لي حسن بقى شلاليت عديل وحسن مواصل داير يتكلم..
قبل ما يبدأ محمد حسين من برا نادى حامد .. حسن قال لي حامد .. خلاص أمشي لي أبوي وانا بجيك بعدين ..
حامد مشى لي أبوهو وبي هنا علي عرقو جرى وحمد ربنا على التوقيت ..
علي بي صوت إنكساري : عليك الله يا حسن ياخي ما توري حامد .. أنا مش أخوك ؟! حسن : يا دوب عرفتني أخوك .؟! من زمان تنهرني وتجوط فيني وكمان واقف مع سيف في موضوع الجريو ؟! علي : والله ما حصل يا حسن يا خ ؟! كيف يعني أقيف مع الغريب ضد اخوي ؟! حسن : وقفت معاو ودي ما دايرا كلام ..عشان كدة أنا لا زم أكلم حامد بالشكلة دي ..
حسن عمل فيها داير يقوم من الكرسي .. علي مسكو من يدو وداير يبكي عديل ..
علي : عليك دينك وإيمانك ما توريهو يا حسن كدة بتضرني أنا وبتضر النادي كلو ؟! حسن : ما بوريهو لكن على شرط .. علي : كل شروطك قولا انا قبلان بيها .. حسن : ما تتدخل تاني نهائي بيني وبين سيف في الموضوع دا ولا أي موضوع لي قدام .. فهمت ؟! علي : أيوة فهمت تاني في حاجة ؟! حسن : أيوة ..أمشي الدكان جيب ليك كيسين لبن للجريو عشان أنا ما قادر وما عندي قروش وتعال أديهم ليهو ؟! علي : أنا أمشي أجيب لبن للجريو ؟! إنت قليل أدب ولا شنو ؟ كيف ترسلني أنا ؟! حسن : يا زول قلت ليك أمشي جيب ليهو اللبن وكمان أغشى معاك المطعم جيب ليهو بواقي أكل ولا أنا بمشي بوري حامد قصة الشكلة ..!
علي رقد جرجير ..!!
علي : خلاص خلاص .. أنا ماشي لكن أوع أجي القاك كلمتو ..! حسن : إنت لسع قاعد ؟؟!
علي سرعة جا طالع من اوضة حسن .. وهو ماشي لي برة الجريو جاهو جاري هيو ..هيو.. هيو .. حامد فكر يضرب الجريو شلوت يكتلو لكن إتذكر تهديد حسن .. طلع برة مشى على الدكان .. في الطريق قابل الزول النبذوهو ..
النبذوهو سأل علي : ماشي وين يا مان ؟ علي : ماشي الدكان .. أرح معاي .. النبذوهو : عندك شنو في الدكان ؟!.. علي : ماشي أجيب لي شوية حاجات لأنو أنا الليلة عينوني في الخدمة .. النبذوهو : في خدمة البيت ؟ علي بي سرعة : في خدمة الجريو ..!!
حامد جا داخل .. طبعا بحكم وضعو الإجتماعي في الحلة .. إحترامات ووجاهات شديدة .. بعد شوية بقوهو وكيل العريس .. العقد إنتهى والجماعة قعدوا للمرطبات على أنغام فرقة (أولاد المنزل) بتاعت المديح .. حامد جمبو كمية من الجلاكيم بيتكلموا في مواضيع متفرقة .. واحد منهم فتح موضوع النادي ..
جلكيم 1 : يا حامد موضوع النادي ماشي كيف ؟! حامد : والله ما بطال شايف أولاد الحلة ما مقصرين فيهو .. جلكيم 2 : لكن يا حامد النادي دا كنت تديهو لي مقاول ينفذوا .. دا شغل كتير على الأولاد ديل .. حامد : والله ما كتير عليهم وبالمرة ينشغلوا بدل اللمة قدام البقالات وتحت العواميد .. جلكيم 1 : والله أنا شايف الأولاد ديل مشاكلم كترت في بعض وأنحن والله ما بنقدر على التلتلة معاهم .. جلكيم 3 : وقبل كم يوم كمان إتشاكلوا مع بعضم جوة وبرة النادي .. جلكيم 2 : هي شكلة عادية ؟؟! .. قالوا واحد فيهم فاتح راس رفيقو بي حديدة لمن ودوهو المستشفى ..! حامد : ما حصلت حاجة زي دي .. كانت شكلة بسيطة وأنا حليتا ليهم .. جلكيم 2 : هي لكن نبقى في شكل الاولاد ديل كل يوم ؟! ديل كدة حا يجيبوا لينا السمعة ساكت ..! حامد : متين كل يوم ؟؟!! كانت مرة واحدة بس ..!! جلكيم 2 : كان كدة إنت ما عارف حاجة .. الجماعة ديل عملوا شكلة تانية غير ديك واظن أمبارح عندهم شكلة برضو ..! حامد : المتشاكل فيها منو ومنو ؟؟! جلكيم 2 : والله ما عارف لكن ود فور بتاع الدكان الفاتح على النادي هو الحكى لي ..! جلكيم 1 : أهنداك ود فور .. ود فور ؟ ود فور ؟ تعال دقيقة عليك الله ..!!
ود فور بتاع الدكان جاهم بي مركوبو الأحمر وطاقيتو الخضرراء ..!!
ود فور : السلام عليكم ..!@ الجلاكين : عليكم السلام أقعد إتفضل ..! جلكين 1 : يا ود فور عليك الله احكي لي حامد بي الشكلة ..! ود فور : الاولى ولا التانية ؟! حامد : يعني حصلت شكلتين ورا بعض ؟! الأولى منو ومنو والتانية منو ومنو ..!! ود فور : إنت ما عارف ولا شنو ؟ الإتنين بين علي أخوك وسيف ..!! حامد : يا زول متأكد ؟؟؟! ود فور : كيف ما متأكد يعني .! يا خي في الشكلة التانية الجماعة ديل كشحوا لي قدرة الفول .. وكسروا لي كم قزازة بيبسي ..! حامد : لكن أنا ما عرفت .. أنا وروني بالشكلة الاولى بس ..! ود فور : اسأل علي أخوك وهو بيوريك ..! جلكيم 2 : بي صراحة يا حامد بالطريقة دي حتى لو النادي إنتهى ما بينقعد .. لا زم تقعد الأولاد ديل تشوف ليهم حل ..! حامد : أنا ما قايل الموضوع وصل كدة ..! ود فور : وحا يصل أكعب من كدة لأنو في الشكلة التانية سيف قال لي علي حا أجيب معاي ساطور المرة الجاية ؟! حامد : يا زول ؟! ود فور : وعلي ما قصر قال بيجيب معاهو جُقدي كمان ..!! جلكين 3 : دا موضوع خطير زي ما إنت سامع يا علي .. الجماعة ديل حايرتكبو جريمة في بعض بعدين نقول يا ريت ويا ريت ..! حامد : لا لا دا موضوع ما بينسكت عليو .. كدة الليلة بحسمو ..!
حامد قام إستأذن من الجماعة ومشى على عربيتو يغلي من الزعل ..
كييييييييييييييف علي ما يوريهو بي الشكلة دي ...!!
ويا علي جاك نفر ..!!
12-04-2010, 11:29 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
علي جا داخل البيت شايل لبن الجريو كالعادة الجريو مما شافو دور .. هيو .. هيو ..هيو كيييييف ما يوهوه.. ما الجريو نقش إنو علي دا هو المعين في خدمتو الأيامات دي .. صنقر قدام الجريو كب ليهو اللبن والجريو بدا يشرب ويهوزز في ضنيبو ...
في اللحظة دي حامد جا داخل ..
حامد : بتعمل شنو يا علي ؟! علي : بدي الجريو لبنو ؟! حامد : وليه يعني ؟! حسن وينو ؟! علي : حسن مرق مشوار وكلفني بي الشغلانية دي ..! حامد : ومن متين إنت بتسمع كلام حسن ولا بتحب الجريوات ..
علي إتلعثم ..
علي : لا لا ما كدة .. بس أنا خفت الجريو يموت ولا حاجة ..
حامد بقى يكشف لي علي بي نظرة شك طوييييلة .. في حاجة هنا حامد ما فاهما .. وعلي مرتبك من نظرات حامد ..
حامد : متين أخر مرة إتشاكلتو في النادي ؟!
علي إتدربك ..!
علي : كيف يعني ؟! حامد : السؤال دا ما واضح ؟! علي : إتشاكلنا المرة الفاتت ديك وإنت عارف .! حامد : إنت بتكذب علي منو يا علي ؟!
الوكت دا علي إنهار .. عرف إنو حامد عارف الشكلة وما داير ينكر زي المرة الفاتت بعدين يبقى منظرو شين ..!
علي : إتشاكلنا مرة تانية أنا وسيف لكن شكلة بسيطة ..! حامد : بسيطة لي درجة كشحتو قدرة ود فور وكسرتو قزايز بيبسيهو مش ؟..! علي : ما كدة بس في اثناء بيحجزونا واحد لزانا على القدرة وقامت إنكشحت ..ًًَََ حامد : وبرضو لزوكم على القزايز قامت إتكشحت فوق يدينكم وإستعملتوها مش ؟!
علي بقى يشيل ويرص في الكلام الما مفهوم ..
حامد : أنا بكرة بعرف إتصرف في الموضوع دا .. إنتو الواحد ما يعاملكم زي الناس كلو كلو ؟! والنادي دا أنا بكرة بحسم امرو ..
حامد دخل جوة البيت خلى علي خشمو ملح ملح .. علي أول حاجة عملا ضرب لي حسن لقاهو برة البيت .. قال ليهو تجيني هسسسع دي ..!!
الجريو : هيو .. هيو .. هيو ..!!
علي عاين للجريو وحمر ليهو .. شالو وجمبغو جوة اللبن بتاعو قرب يغرقو فيهو .. بقاو جريو باللبن ..! وبعد داك جدع الجريو في الركن وشال باقي اللبن كباهو في راس الجريو المسكين .. والجريو إستغرب من تغير المعاملة الفندقية ودور بي صوت مختلف شوية .. هيييو .. هيييو .. هيييو ..!!
علي طلع إنتظر حسن قدام البيت وحسن جاييهو من هناك ..!!
حسن : أديت الجريو لبنو ؟! علي : بلا لبن بلا د...ـن معاك أنحنا إتفقنا علي شنو ؟! حسن : شنو قصدك ما كلامنا كان واضح ؟! علي : أنا مش قلت ليك ما تكلم حامد بالشكلة ؟! حسن : والله ما كلمتو ؟! منو القال ليك هو عرف ؟! علي : داير تستهبل علي ولا شنو ؟! حسن : والله العظيم ما كلمتو بيكون ..!!
قبل ما حسن يتم كلامو علي رصاهو كف .. وحسن ما قصر لصق في علي بنية .. والشكلة دورت قدام البيت والجريو شغال .. هيو .. هيو .. هيو ...
خبت .. كفيت .. خنق .. دلاديم لحدي ما جا عمك محمد حسين مارق .!!!
يا أولاد دا شنو .. فكو يا علي .. زح يا ود حسن ...
شافوا ابوهم طوالي فكو بعض وأبوهم نادى حامد .. قعدوا يبرروا الحصل محمد حسين قبل لي حامد وقال ليهو : أول حاجة جريو الشوم دا ما داير أشوفوا في البيت دا شيلو أرميهو برة يا حامد ..
الجريو شاف حامد جاي عليهو دور هيو هيو هيو .. زي الداير يقول والله دا ما أنا ..
علي وأخوهو وأبوهم دخلو جوة ... حامد شال الجريو دخلو في كيس نايلو ومشى دور العربية .. وهو في الطريق ماشي شاف سيف قاعد قدام بيتم .. في حفرة متوسطة قدام البيت مليانة موية .. حامد دخل بي لستك عربيتو جو الحفرة .. جُممبُلُغ الموية الوسـخـانة إنكشحت في سيف .. طبعا حامد قصد يعمل المغرزة دي .. سيف هاج وسب لي حامدكل أنواع السباب المعروفة والما معروفة .. حامد ما قصر نزل من العربية ونط في سيف والشكلة دورت .. أولاد النادي كانو جو بيت سيف .. سمعو الجوطة جو طالعين برة شافوا الشكلة قعدوا يحجزوا .. فكوهم بعد تعب .. سيف قعد يكورك قال ماشي القسم يفتح بلاغ عشان كشحوهو بالموية .. حامد دور عربيتو ومشى على دكان ود فور الجمب النادي ..
حامد : تعال يا ود فور !!.. ود فور : إتفضل يا حامد داير شنو ؟! حامد : شيل الجريو دا اربطو جمبك هناك وهاك دي خمسين جنيه أديهو لبن كل يوم ..! ود فور : الجريو دا حا يجيب لي المشاكل يا حامد وأنا ما داير مشاكل ..! حامد : الجريو دا أنحن ما دايرنو !! .. بقى بتاعك إنت وأنا أديتك قروش إعاشتو . مشاكل شنو تاني .! ود فور : طيب ممكن أديهو لي ود خالتي يشيلو معاو بيتم في الفتيحاب ؟! حامد : قلت ليك إنت حر .. وديهو الفتيحاب .. وديهو القفيلاب .. دي بقت ما شغلتي ...
ود فور طبق الخمسين جنيه و شال الجريو جوة الدكان جاب ليهو حبل وربطو من رقبتو .. عاين كدة لقى ما في حتة يربطوا فيها .. دخل جوة النادي ربطو في كراع شيالة المزيرة .. ومشى يجيب ليهو لبن من التلاجة ..
الوكت دا ناس النادي جو داخلين .. طبعا سيف ما معاهم لأنو مشى القسم يفتح بلاغ .. وعلي برضو ما معاهم قاعد في البيت لأنو أبوهو حماهو هو وحسن يطلعوا ..
الجماعة شافو الجريو مربوط ومدور هيو هيو هيو ...!
النبذوهو : دا جريو منو يا جماعة . ما يكون دا جريو حسن داك ؟! والله ما عارفينو هو ولا ما هو ؟! .. النبذوهو : والجابو هنا شنو ؟! أنحنا مالنا يا خي !! ارح ندور الوست ..!!
الجماعة قلبوا الطربيزة وطلعوا الفردة وبدوا في الوست والخرخرة وسف الصعوط ..!!..!!!
بعد شوية شافو ود فور جا داخل النادي شايل لبن وصحن قديم .. ود فور خت الصحن قدام الجريو وكبا ليهو اللبن .. الجريو فرحان برجوع الخدمات الفندقية الحليبية بعد ما كشحوا ليهو اللبن جبيل فوق راسو وعطنوهو فيهو .. ود فور ملى الزير موية على غير عادتو ورش الأرض حول الزير ..
طبعا أولاد النادي إستغربو..!!
النبذوهو : يا ود فور دا جريوك ؟! ود فور : أي بتاعي ؟! النبذوهو : من وين جبتو ؟! ود فور : جبتو محل ما جبتو .. اي حاجة مضايقاك ؟! وإنت فاضي لي تربية الجريوات ؟! ود فور : ما فاضي .. لكن أعمل شنو ما دام عينوني في الخدمة هنا ؟! النبذوهو : عينوك في خدمة النادي ؟! ود فور بي سرعة : في خدمة الجريو ..!!
تاني يوم من الصباح حامد من البيت ضرب لي ناس الشركة بتاعتو بتاعت الترحيلات ..
حامد : ألو ؟! جعفر معاي ..!! جعفر : ايوة جعفر .. معاي منو ؟! حامد : شنو معاي منو دي ؟ إنت الرقم ما ظاهر عندك ولا شنو ؟! جعفر : أهلا حامد معليش الشاشة بتاعتي طفت أمبارح ..! حامد : وين إنت هسي ؟! جعفر : متحركين ما شين نجيب السيراميك بتاع شركة الهيثماوي ديك نوديهو ليهم ..! حامد : خليك من شركة الهيثماوي والكلام دا .. إنت معاكم كم عربية ؟! جعفر : عربيتين دفار جامبو ؟! حامد : معاك عمال .! جعفر : أيوة في ..! حامد أسمع كلامي دا كويس .. أضرب الشركة وخليعم يرسلوا ليك عربيتين تاني ومعاهم العمال ..! جعفر : لكن يا حامد العربيتين العندنا بيكفوا ..! حامد : أسمع كلامي يا خ؟! أنا المشغلك ولا إنت المشغلني ؟! جعفر : إنت المشغلك ..! حامد : شنو ؟! جعفر : قصدي إنت المشغلني ؟! حامد : تجيب الاربعة دفارات دي وتجي ورا بيتنا هنا .. في حاجات دايرين نرفعا ..! جعفر : والسيراميك بتاع الـ ..... حامد : يا زول إنت مشغلك ولا أنا مشغلني ؟! جعفر : شنو ؟! حامد : قصدي أنا مشغلك ولا إنت مشغلني ؟! جعفر : أنا مشغلني حامد : شنو ؟! جعفر :قصدي إنت مشغلني ؟! حامد : خلاص سيب الفي يدك دا وتعالوا محل ما قلت ليك لمن تصل أضرب لي وأنا منتظركم هناك ..! جعفر : أوكي نص ساعة بنكون عندك ..
الدفارات غيرت إتجاها ومشت على حلة ناس حامد .. طبعا الدنيا صباح والنادي فاضي ما فيهو غير الجريو تحت المزيرة وود فور في دكانو مرة مرة بيجي يتاوق على الجريو ..
بعد شوية الأربعة دفارت جو وقفو قدام النادي ... ضربو لي حامد حامد جاهم ..
حامد : أسمعوا الكلام دا .. اي حاجة هنا قدامكم أرفعوها ودوها المخزن ما تخلوا اي شي ..! جعفر : يعني نفرتك الحديد والسور برضو ؟! حامد : يا خي مالك داير تجنني إنت كمان ؟!! قلت ليك اي حاجة .. يلا أبدو أنا مستنيكم ..
العمال هجموا على النادي بالكواريك والطواري والمرزبات .. بدو أول حاجة يفرتكوا في السور ويرفعوا الحديد في الدفارات .. إنتهوا قبلوا على الطرابيز والكراسي .. رفعوها برضو .. في عواميد في النص مثبتة فيها اللمبات قلعوها ورفعوها .. في طوب وزنك وأسمنت في الكورنر .. كلو رفعوهو ..
نشفوا الحتة نشاف .. ما فاضل ليهم إلا يرفعو ود فور وقدرة فولو ..!
الجماعة ديل في ساعتين دمروا شغل شهرين بتاعين أولاد الحلة ..
جعفر : يا حامد خلاص إنتهينا ما فضل إلا المزيرة دي والجريو دا ..! الجريو : هيو .. هيو ..هيو ...!! حامد : يا ود فور .. يا ود فور ..!!
ود فور الكان بيكشف للحاصل جا جاري ..
ود فور : أيوة يا حامد ؟! حامد : المزيرة دي تبعك إنت ولا جابوها أولاد الحلة ؟! ود فور : جابوها أولاد الحلة يا حامد ؟! حامد : أرفعا معاي ولا أخليها ليك ؟! ود فور : لا لا خليها بتنفعني ..! حامد : بتنفعك في شنو ؟! ما أهنديك عندك هناك واحدة .! ود فور : في الحقيقة هي بتنفع الجريو دا لأني رابطو فيها وبيكون بعيد من الزبائن ..! الجريو : هيو ..هيو .. هيو .. حامد : خلاص حا أخليها .. بس أنا ما داير أولاد الحلة يتلموا هنا تاني ..! ود فور : بعد ما إنت شلعتها ليهم خلا تاني القاعدين ليها شنو ؟!
حامد أدى تعليمات والعربات دورت وهو زاتو دور إتخارج ..!
الميدان رجع خلا زي الأول ما فيهو إلا المزيرة والجريو تحتا يوهوه .. هيو .. هيو .. هيو ..!!
المغرب جا وأولاد الحلة جاييين على النادي يتغالطوا في وست امبارح .. شايلين معاهم حفاظة موية وفردة وست وأربعة أكياس صوط دبل قبينة ..!!
دخلو الميدان أول الشارع .. كشفوا للميدان ..
الله .. دخلنا الشارع غلط ولا شنو ؟! النبذوهو : مالو الشارع زي الماياهو كدة ؟! لا لا يا هو زاتو أهندك دكان ود فور والمزيرة .. النادي اختفى ولا شنو ..!!
مشوا على ود فور :
النبذوهو : ود فور ! النادي إتسرق ولا شنو ؟! ود فور : إتسرق كيف يعني ؟! يعني جو حرامية فرتكو الحديد وسرقوا الحاجات ولا شنو ؟! ود فور : إنتو ما عارفين يعني ولا شنو ؟! ما عارفين والله .. البلدية جات أزالتو ولا شنو ؟! ود فور : لا ما البلدية .. حامد هو الأزالو ..!! النبذوهو : يا زول دا كلام شنو ؟!! ود فور: دا الحصل ..! وليه يعني حامد عمل كدة ؟! ود فور : إنت بتسألني مالك ؟ أسألوا نفسكم ..!! طيب هسي ما خلى أي حاجة هنا ؟! ود فور : اللهههههههههه يا خي ذكرتني ..! النبذوهو : أها ..! ود فور : البرش الختيتوهو عندي أمبارح حامد ما شالو ..! النبذوهو : كدي طلعوا لينا نقعد فيهو نشوف الحاصل شنو ؟!
النبذوهو : يا اخوانا الحاصل شنو ؟! والله دي قصة غريبة حامد بي نفسو يضيع تعبنا كدة ؟!. النبذوهو : معناها الموضوع إتطور بين سيف وعلي وحسن .! طيب نحن ذنبنا شنو ؟! النبذوهو : كدي النضرب لي علي ..!!
ضربو لي علي .. علي تلفونو مقفول .. ضربو لي سيف لقوهو في النيابة بيرفع عريضة ضد حامد ضربو لي حسن سبا ليهم ونبذم وشتمم كلهم ..!
سفوا صعوط وإتكلو على بعض بيعاينو في الجريو ..!! الجريو بيعاين ليهم.. مرة يشرب في اللبن ومرة ياخد نفس يشبكم ليك .. هيو ..هيو .. هيو ..!!
وهم يسفوا ويتفوا في التمباك بدون أي كلام ..
الجريو خلص لبنو وقعد على كرعينو الورا ودور ليك فيهم :
Quote: حسن عاين للجريو وحمر ليهو .. شالو وجمبغو جوة اللبن بتاعو قرب يغرقو فيهو .. بقاو جريو باللبن ..! وبعد داك جدع الجريو في الركن وشال باقي اللبن كباهو في راس الجريو المسكين .. والجريو إستغرب من تغير المعاملة الفندقية ودور بي صوت مختلف شوية .. هيييو .. هيييو .. هيييو ..!!
12-05-2010, 02:58 PM
ابوبكر قسومة
ابوبكر قسومة
تاريخ التسجيل: 11-19-2010
مجموع المشاركات: 437
ناذر الخليفة,سرد ممتع حد الدهشة, بتعرف للقص والرص تمام, باين عليك زول بتستلم الونسات في بيوت البكاء والاعراس. لكن يا خوي من خلال سردك للحكاية باين عليك واحد من الجلاكين (الجلاكيم) - شايفك مرة قلتها جلكين ومرة جلكيم- اللي كانوا في بيت العقد ...وكان مابخاف الكضب ...انت الجلكين (الجلكيم) اللي وصل خبر الشكلة الحصلت في النادي لي حامد زاتووو.
12-05-2010, 03:21 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: يااخوي انتهت كيفن يعني نعمل شنو يعني بعد دة يالله بسرررررررررررررررراع انجر لينا واحدة تاني
انت ممكن تكون اخو حامد علي
غايتو القصة الواقعية إنتهت ..
لكن للضمان ختيت كم إشارة عشان تكون مفتاحية لو في جزء تاني منجور ..
ما تنسوا القصة إنتهت وسيف لسع في القسم قدام الضابط اللئيم داك والعسكري الما قبلان بالوضع .. وإنو الإشكالية ما إتحلت بين سيف وعلي .. وإنو النادي إتشلع وما معروف مصيرو شنو ..!!!
غايتو لو ربنا أد العمر إنشاء الله بنكتب جزء تاني .!
12-05-2010, 03:28 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الف شكر يا ناذر استمتعنا بالقصة بس ما كان تغير اسلوب السرد الذي بدأت به كان واضح فيهو العفوية و البساطة في السرد بس الظاهر اشتهار القصة اثر فيك فقلت تحبك الموضوع شوية هههههه
نتمي ليك التوفيق مع اولاد بمبة و اعمل حسابك ما ياكلوك حنك ساكت
تحياتي
12-05-2010, 03:29 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: انت عارف انا كده مصدقك تماما انو وقائع القصة دي حقيقية لانو ود فور فعلا بكون قالا جقدي حتي لو سمعا بمصطلح اخر... وكونك سمعت الكلمة بالحرف من ود فور
يا زول أنا ما سمعت حاجة .. ولا أااااااا قصدك أنا حامد ..!!
12-05-2010, 04:04 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: الف شكر يا ناذر استمتعنا بالقصة بس ما كان تغير اسلوب السرد الذي بدأت به كان واضح فيهو العفوية و البساطة في السرد بس الظاهر اشتهار القصة اثر فيك فقلت تحبك الموضوع شوية هههههه
الاسلوب الأول كان بيعتمد عللى السرد أكتر من كتابة الحوارات .. زي هسي لمن شرحت حامد دخل بي عربيتو في الموية كشح بيها سيف وإتضارب معاهو .. دي كتبتها من غير حوار ..
لكن صراحة الاثر فيني مش إشتهار القصة .. الأثر فيني إستعجال الجماعة لتكملة القصة ودي عملت لي ضغوط شديدة ..
لكن الحمد له وصلنا للنهاية بي سلام ..
مشكور على الملاحيظ ..!!
12-05-2010, 04:06 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: مفروض أولاد الحلة يفتحوا في حامد بلاغ في تشليع النادي
المشكلة إنو دا ما حصل على أرض الواقع .. أنا حاولت بقدر الأمكان أخلي القصة في إطارا الواقعي .. لكن لو جات فكرة جزء تاني فأكيد أولاد الحلة مفروض فيهو يفتحو بلاغ في حامد .. أي نعم النادي إتعمل بي قروشو .. لكن أولاد الحلة بذلوا فيهو مجهود جبار ..!
تحياتي ناذر، بعد غياب اثنين وعشرين سنة من السودان حكاية الجريو دي حيرتني جدا، الظاهر الشعب السوداني الأنا بعرفوا انقرض وحل محله شعب جديد، لأنو آخر ناس خليتهم في السودان قبل ما أطلع منو كان أكيد واحد فيهم من أولاد الحلال أدى الجريو ده عكاز على راسو ورماهو في الكوشة عقابا له على تسببه في مشاكل بين الجيران، الشعب السوداني الإنقرض لم يكن أبدا يتبارى أفراده في تدليل جريو تسبب في كل هذه المشاكل بهذا الشكل، فكيف أصبحت الكلاب محبوبة في هذا الشكل في السودان، طبعا أقول هذا الكلام من واقع إنه كان عندنا سلسلة من الكلاب التي كان إطعامها يوميا واحد من هواياتي المفضلة أيام الطفولة ولكن للأسف هلك جلها بعكاكيز الغاضبين أو عجلات سيارات المسرعين، ولم تسلم حتى فططنا المسكينة من تلك العكاكيز! ياناس الحاصل شنو في بلدكم دي؟ ( وجه مندهش)!
الحكاية الجاية لازم تكون بطلتها كديسة صغيرة حفاظا على التوازن بين الكلاب والقطط! ياخي شاعرات الحماسة والفروسية عندنا يشبهو الزول الشجاع بالتمساح، شوف الكديسة دي هرشت التمساح كيف، تقول لي جريو:
12-05-2010, 06:35 PM
ابراهيم بقال سراج
ابراهيم بقال سراج
تاريخ التسجيل: 10-12-2005
مجموع المشاركات: 10842
الحبيب الحبوب ناذر وصلت وين في التفاوض مع شركات النشر في طباعة الكتاب.. وبعدين القصة انتهت ولا لسع؟ واذا انت عاوز مساعدة في اختيار نهاية سعيدة أو نهاية مأساوية للقصة ، فأنا جاهزة لتقديم المساعدة وعندي ليك نهاية ممكن تخلي كل اعضاء المنبر العام يبكوا بصوت عالي .. بس الثمن 25 % من الربح المتوقع من بيع الكتاب!!!
12-06-2010, 11:56 PM
ساميه حامد
ساميه حامد
تاريخ التسجيل: 07-24-2010
مجموع المشاركات: 1567
Quote: تحياتي ناذر، بعد غياب اثنين وعشرين سنة من السودان حكاية الجريو دي حيرتني جدا، الظاهر الشعب السوداني الأنا بعرفوا انقرض وحل محله شعب جديد، لأنو آخر ناس خليتهم في السودان قبل ما أطلع منو كان أكيد واحد فيهم من أولاد الحلال أدى الجريو ده عكاز على راسو ورماهو في الكوشة عقابا له على تسببه في مشاكل بين الجيران، الشعب السوداني الإنقرض لم يكن أبدا يتبارى أفراده في تدليل جريو تسبب في كل هذه المشاكل بهذا الشكل، فكيف أصبحت الكلاب محبوبة في هذا الشكل في السودان، طبعا أقول هذا الكلام من واقع إنه كان عندنا سلسلة من الكلاب التي كان إطعامها يوميا واحد من هواياتي المفضلة أيام الطفولة ولكن للأسف هلك جلها بعكاكيز الغاضبين أو عجلات سيارات المسرعين، ولم تسلم حتى فططنا المسكينة من تلك العكاكيز! ياناس الحاصل شنو في بلدكم دي؟ ( وجه مندهش)!
والله يا محمد عثمان ما كل الناس بتحب الجريوات والكلاب .. بس دي صدفة حصلت والقدر لعب فيها دور كبير وكتل ليهو نادي ..!!
Quote: الحكاية الجاية لازم تكون بطلتها كديسة صغيرة حفاظا على التوازن بين الكلاب والقطط! ياخي شاعرات الحماسة والفروسية عندنا يشبهو الزول الشجاع بالتمساح، شوف الكديسة دي هرشت التمساح كيف، تقول لي جريو:
غايتو عمنا الكروكودايل دا إلا كان مرضعاهو نعجة ..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة