|
|
|
 Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: النذير حجازي)
|
Quote: عندي ملاحظة صغيرة حول هذا البوست
تعرف يا ناذر عدد القراء الآن أكثر
من ثمانية آلآف قارىء، وقول بالميت
كدا ح يكونوا عشرة آلآف قارىء، وتخيل
يا ناذر لو كان هذا البوست رواية مطبوعة
وسعرهابالميت 10 دولارات أمريكية وأضرب عشرة
في عشرة آلف ح تطلع بـ 100 ألف دولار
عليك الله ما أحسن ليك من شغل المغالق؟
وتتفرغ للكتابة وتعمل ضحاكات كويسة.
|
آآآآآآآآآآآمنت بالله يا النذير لكن ما لقيتك بتحسبها طائرة لوول
يا زول ما تجهجه لينا ناذر ده
ما صدقنا انه رجع وبدأ يواصل
لينا يومين نحاحي فيهو زي الجريو عشان يقعد في الجابرة دي ويتم لينا الحكاية
تجي انت ناطي ليك بي فكرة زي دي
هسة كان كمان حرن وقال خلاص الحلقة الاخيرة تلقوها في الكتاب
نعمل شنو نحن ؟
نجي نعضيك في صنقورك ده ولا شن نسو ؟؟
عارف لو كان حوار ناذر ده في روم في البالتولك
كنت مشيت اتقنعت وبقيت آدمن وجيت شوتك طواااااااااااالي برة
ده لوما اديتك رد ضدوت وخليتك تتفرج وما تقدر تفرفر زاتو
وانت عارفني ما بعرف ابقى آدمن
قبل كده اجارك الله عملتها مره واحدة وشت روحي لووووووووول
وتالني ما كررتها تب
النذير كيفنك واقعد رايق النبي فيك
ناذر فترنا مع المساسقة في حلتكم
حفظناها شارع شارع وزقاق زقاق
سيد الدكان زاتو زهج مننا
كمل ياخ كمل الله يرضى عليك
| |
 
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: اسماء الجنيد)
|
Quote: آآآآآآآآآآآمنت بالله يا النذير لكن ما لقيتك بتحسبها طائرة لوول
يا زول ما تجهجه لينا ناذر ده
ما صدقنا انه رجع وبدأ يواصل
لينا يومين نحاحي فيهو زي الجريو عشان يقعد في الجابرة دي ويتم لينا الحكاية
تجي انت ناطي ليك بي فكرة زي دي
هسة كان كمان حرن وقال خلاص الحلقة الاخيرة تلقوها في الكتاب
نعمل شنو نحن ؟
نجي نعضيك في صنقورك ده ولا شن نسو ؟؟
عارف لو كان حوار ناذر ده في روم في البالتولك
كنت مشيت اتقنعت وبقيت آدمن وجيت شوتك طواااااااااااالي برة
ده لوما اديتك رد ضدوت وخليتك تتفرج وما تقدر تفرفر زاتو
وانت عارفني ما بعرف ابقى آدمن
قبل كده اجارك الله عملتها مره واحدة وشت روحي لووووووووول
وتالني ما كررتها تب
النذير كيفنك واقعد رايق النبي فيك |
لوووووووووووووول@ شاعرتنا العزيزة سوما
كيفيك يا غالية وكيف أولادك وشوقنا بحور
طيب يا سوما إنت كدا أديتي ناذر فكرة
تانية، واللي هي إنو تكون تتمة الباقي بعد
طباعة الرواية لوول
وبالمناسبة البوست دا برضو ح يكون ورطة
لي ناذر، لأنو تاني بي دي ما بنقبل منو
إلا حكاية تانية من حلتهم، وعمل أكبر
من كدا.
تحياتي ليك يا ملكة
| |
|
|
|
|
|
|
|
|
 Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: فدياس نجم الدين)
|
ناذر غايتو قصاص جنس قص و رص هو..لووووول
مبالغة عديل كده
"وبالنسبة لعدد القراء قالوا 800 وحاجة انا غايتو بكونوا
400 منهم ديل كلمتهم انا، والناس الما عندهم نت طبعت ليهم القصة
و معذبنى ادينا الباقى ..تميها لينا ..مجهجهنى ليك زى ما انت مجهجه الناس دى"
يعنى بعدين ما تنسانى من حق الدعاية والاعلان..سمح
اها اما انت منو فى القصة دى انت بتكون واحد من ديل:
Quote: ناصر و فضل الله أصدقاء لـ علي وسيف الدين
بالإضافة لشخوص أخرى متفرقة غير مهم ذكرها |
- ناصر
- فضل الله
- شخوص اخرى غير مهم ذكرهم ..لووول
انا برجح فضل الله لانك اتفضل وحكيت لينا لقصة ..لووول
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: النذير حجازي)
|
انت ياناذر بتكرهني ليه ياخ؟
ياخ انا مافترت ياخ.... كل دقيقة اخش النت وادخل البوست
ده اقول يمكن تكون جيت تتم القصة.... القى الحال ياهو
نفس الحال ... ياخي عذبتننا ..
والله انا كرهت المسلسلات عشان التطويل ده
ولو ما المسلسل كاااااارب مابقعد ليه لو ادوني قروش..
انا الجابني هنا شنو ؟
تخريمه
ـــــــــــــــــــــــ
اخوي وقريبي لقو ليهم ###### بوليسي ضال
جابوه البيت على اساس انو يبيعوه ...
بعد يومين لقيتهم ليك الاتنين ممحنين وحاير بيهم الدليل
- مالكم؟
- ال###### ده ..
- مالو؟
- ياخي امبارح متعشي باسطه
والليله كيلو شيه وضان كمان..
- اها
-اها شنو ..نحن متعشيين بوش
والليله سلطة طماطم.
ياخ (الجريويين) ديل تاريهم مكلفين خلاص
| |
|
|
|
|
|
|
|
|
|
جريو ..!!! (Re: ناذر محمد الخليفة)
|
!!!!!!!!!
| Quote: Re: ماليزيا تنعي ابن اخت هشام ملاسي والبوردابي حسين ملاسي .. واتحاد الطلاب بماليزيا يحتسب ... ص |
يا جماعة العنوان دا الجابو شنو في مداخلاتكم ؟؟!!
الرجاء تعديل عناوين المداخلات بدءا من ديامي وإنت نازل ..!!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: Amany Elamin)
|
سلام إدريس ...
| Quote: بالنسبة لشخصيتك أشار الضابط عندما أخبروه عن حامد .. مش الراجل بتاع المغلق (والجريدة) .. وانت معروف إنك راجل صحفي مع عملك في مجال البناء .. قربت أجزم إنك تكون حامد .. لولا إشارتك إنك ذهبت للنادي لتتفقد مراحل البناء .. هنا جهجهت باكاتي تماماً .. عليه وفي الغالب الأعم إنك الراجل الذي تلقى الشتائم في النادي من الشريحة اللحقت غنم زهره .. |
تحليلك بيدل إنك متابع القصة تماما يا إدريس ورابط الامور مع بعض ..
الحتة دي بالذات فايتة على ناس كتار هنا ودا أكبر دليل إني ما حامد ..
وبي كدة إنت إنضميت للجماعة البيقولو أنا الزول النبذوهو ..
نشوف في النهاية ..
تسلم ..
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: Amany Elamin)
|
الأخ ناذر ,
طالما المسألة ماشة تجوط , نحن كمان ندلوا بدلونا.فقد اقترح الأخ فدياس الأقتراح الآتى :Quote:
بهناك إقترحت على القاص ناذر محاوله إضافه الجنس اللطيف
عشان العمليه تتسبك وكده
رأيكم دام فضلكم |
انا معاك فى الأقتراح يافدياس وياحبذا لو عملناهو فيلم سودانى مصرى هندى بأنتاج خليجى ويكون فيه رقص شرقى (ارشح نجوى فؤآد لو مازالت حية) وكمطاشر اغنية كدة ولابأس من زيادة الآكشن وفى النهاية الجريو يطلع اخو سيف فى الرضاع (عشان القفلة تكون هندية).
وانا متأكد ياناذر ده حيكون اول فيلم سودانى يفوز (بالشلوت) الذهبى بمهرجان (كان).
والى الأمام اخى ناذر ولمزيد من النجاحات .
قصرت معاك ؟
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: ناذر محمد الخليفة)
|
أولاد الحلة طبعاً منظرم بايخ بوخ شديد زي علي صاحب سيف وأخو حامد ..
لمن فشلوا في إقناع سيف يتنازل من البلاغ في القسم وحامد دخل الحراسة .. جو راجعين مقطورين النادي يفكروا يعملو شنو .. طبعا في النهاية الموضوع بيصلم بيصلم .. لأنو سيف واحد منهم ولأنو في واحد تاني إتهم حسن إنو نبذوا في التلفون .. وهسي الموضوع إتطور تطور سريع وحامد في الحراسة وسيف ماشي المستشفى يجيب أورنيك ..
الجماعة وصلو النادي جرو الكراسي وطلعو التمباك سفوا وبدو يتناقشوا :
هسي يا أخوانا نعمل شنو في المصيبة دي ؟!
مصيبة شنو ؟ نحن ما عندنا علاقة بالحاصل ؟!
كييف ما عندنا علاقة ؟ إنتو نسيتو سيف دا مننا وفينا ؟!
ويعني شنو ؟ ما علي برضو مننا وفينا ؟!
إنتو يا شباب ليه مستهونين بالموضوع دا كدة ؟
النادي الما تمة نادي دا لحدي هسي مش كلو فضلة خير حامد ؟!
أي نعم ما قلنا حاجة لكن نحن بيدنا نسوي شنو ؟!
كيف نسوي شنو !! كان ممكن من الاول نحسم الموضوع مع سيف وعلى ويادار ما دخلك شر ..!
نحسمو كيف يعني ؟
ما دام سيف دا داير جريو كان من الأول نجيب ليهو جريوتاني من الغفير وخلاص !!
لكن يا خي سيف ركب راسو وكمان حسن اخو حامد ركب راسو برضو .. يعني حتى لو جبنا جريو تاني ما كان واحد فيهم بيشيلو ..!
أنا إتخايل لي أكبر غلط إنو مشينا مع سيف وعلي بيت ناس حامد .. ما مفروض كلو كلو نحن نظهر في الصورة ؟!
يعني دايرني ما أمشي كيف ؟ إنت لو سمعت النبذ النبذوني دا والله لو بيتم في مدني تمشي ليهو ..!
يا خي حامد لمن جا طالع أول مرة .. شفتو سمعنا كلام فارغ كيف ؟ وبي صراحة ليو حق ؟!
اي والله طلعنا كلنا فارغين جايين كلنا مبارين جريو ..!
يا جماعة أفهموني .. انا مشيت هناك ما عشان جريو .. أنا مشيت عشان إتأكد النبذني دا حسن ولا ما حسن ..!
هسي حامد دا لو زعل وما جاب لينا باقي الحاجات القال بيجيبا نعمل شنو يعني ؟!
هو باقي الحاجات شنو ؟!
فضل نبني الحمام والكفتيريا ونزرع نجيلة هناك وبرضو سيراميك للوضاية ..!
بس ؟!
بس شنو !! الفاضل كتير .. بوابة للسور وبوهية للحديد المربط دا ولازم كمان نحفر البير والسب تنك .. الشغلة ما هينة ..!
يا جماعة أنا بقول أنحن نتصل بي سيف نقنعوا يتنازل عن البلاغ وعن الجريو زاتو .. الزول دا جاب لينا الهوا ياخ ..!!
يا شباب أنا كمان الموضوع دا ما بخليهو علي كدة .. بكرة من الصباح بمشي النيابة بفتح بلاغ في النمرة الجاني منها النبذ ..
عليك الله اسكت ياخ إنت كمان .. الناس في شنو وإنت في شنو ؟!
واحد طلع تلفونو .. ضرب لي سيف .. سيف ما بيرد .. ضربو لي علي .. علي برضو ما بيرد ..
في الأخر قنعوا والشغل زاتو طلع من نفسهم ..
واحد خاتي ليهو كيس صعوط دبل قبينة قدامم ..
الجماعة يسفوا ويتفو . يسفوا ويتفوا وكل واحد بيدعو ربنا يجيب العواقب سليمة والموضوع ينتهي علي خير ....!!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: د.امام الصديق عبد المعطى)
|
سلام يا داليا وعفاف
بالمناسبة عند الشباب أمثال وأقوال مأثورة عن
التمباك، مثلاً لو واحد قال لواحد تاني: جيب سفة
التاني: ياخي في عمارة بزبلوها؟!
ولزمن طويل كنا نعتقد بأن التمباك والسعوط هي
عادة سودانية بحتة وخصوصاً عند الشينين، لكن
وجدنا أن الخواجات نفسهم بسفوا رجال ونساء
والتمباك ليس عادة سودانية بحته كما كنا
نعتقد، وبالمناسبة كلمة "سعوط" كلمة عربية
فصحى.
بمناسبة التمباك، كان عندنا صاحبنا "فردتنا"
اسمو طه حسين ما بسف سعوط، لكنو شين ودشن، المهم، كل ما
نكون ماشين في الشارع الشباب بسألوه: لو سمحت سفة يا أبو الشباب
فكان دائماً رد صديقنا طه حسين: والله يا جماعة أنا ما بسف شنا ساي بس 
المهم صاحبنا طه حسين لمن الحكاية دي بقت
بتكرر يومياً أكثر من عشرة مرات، إتخيلوا عمل
شنو؟!
بقي بمشي السوق بشتري سعوط، وما بسفو، بدي
أي زول يشحدو سفة.
تحياتي للجميع
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: داليا حافظ)
|
سيف َدخَلْ ليك الدكتور في المستشفى فلم غريب جدا ..!!
الدكتور : إنت مضروب وين ؟!
سيف : يا دكتور أنا مضروب في كل حتة إنت ما شايف ولا شنو ؟!
الدكتور : ما شيف حاجة والله !! هو الحصل شنو بالضبط ؟!
سيف : الحصل إنو صاحبي أداني جريو .. الجريو بتاع أخوهو الصغير .. قام الجريو قصدي أخوهو ...
الدكتور : دقيقة دقيقة ..! إنت داير تحكي لي قصة حياتك ولا شنو ؟! جيب الكلام من الاخر وقول لي الشكلة حصلت كيف ؟!
سيف : ما أنا داير أوريك إنت قاطعتني ..!!
الدكتور : يا خي !! ما داير أعرف سبب المشكلة .. داير أعرف الشكلة حصلت كيف وإتضاربتو بي شنو عشان أحدد أفحصك من وين ؟!
سيف : الزول دا أول حاجة أداني كف .. والمرة البعدا خنقني ورماني في الواطة وأخوهو مسكني ليهو وهو أداني شلوتين في بطني ..! حتى شوف محل الشلوتين في بطني ظاهر كيف ..!!
سيف رفع قميصو للدكتور ..!!
الدكتور : يا زول ما شايف حاجة هنا .. كدي تعال قريب ..!
سيف : كيف يعني ما شايف حاجة؟! يا خي أهندا أثر الشلوت لمن إنطبع عديل .. ودي أثار الجزمة الكان لابسا ..!
الدكتور : يا ود إنت ما نصيح ولا شنو ؟! كدي قرب لي وشك دا ..!
سيف : شفت يا دكتور محل الكف يا هو ظااهر .. وعاين لي حلقي محل خنقني .. يا خي دا شرط لي حنجرتي عديل كدة وقفل لي النفاسات ..!
الدكتور : قفل ليك شنو ؟!
سيف : النفاسات يا دكتور .. يعني محل التنفس وكدة ..!
الدكتور : وإنت هسي ما قادر تتنفس يعني ؟!
سيف : بقدر لكن بعد تعب .. أنا شاعر إنو نفسي بقى ما بيطلع وينزل زي الاول ..!
الدكتور .. كدي شيل نفس .. نزل نفس .. شيل نفس .. نزل نفس ..!! يا زول ما عندك عوجة ونفاساتك البتقول عليها دي شغالة زي الكمبرسون .!
سيف : دا كلام شنو يا دكتور ؟! يا خي ما قادر إتنفس بي صورة طبيعية . أعمل موجات صوتية للحنجرة دي شوفا من جوة أمكن برة ما ظاهرة !
الدكتور : موجات صوتية شنو البيعملوها لللحنجرة ...! حنجرة ولا رحم دا البيعملو ليهو موجات صوتية ..! ما في أي علاقة بين دي ودي .!
سيف : كيف يعني ما في علاقة .. اكيد في علاقة ..!
الدكتور: وضحا لي ..!
سيف : مش الحنجرة فيها حبال صوتية ..!
الدكتور : أيوة فيها ..!!
سيف : وطيب ؟!
الدكتور : هو شنو هو الطيب .. إنت داير تضيع لي وكتي ساي ..! إنت نصيح وما عندك حاجة ..
سيف : طيب خليها الحنجرة شوف لي راسي دا أنا برضو مضروب فيهو ..!
الدكتور : تعال قريب .. مضروب وين ..!
سيف : ايوا هنا دا محل مسكت .!
الدكتور : ما في أي أثر لي ضربة أو كدمة هنا ..!
سيف :كيف يعني : يا خي الزول دا أداني شلوت في نص راسي لمن شعرت بي إرتجاج وهسي كمان فاقد ذاكرة برضو ..!
الدكتور : شلوت عدييل كدة .. وإنت كنت مدنقر ليهو لي شنو ؟! وكمان فاقد ذاكرة قلت لي ..!!
سيف : أيوة يا دكتور يا خي في حاجات كتيرة طارت من راسي مع الشلوت ..
الدكتور : يا زول إنت مستهبل وما عندك حاجة وما في شي بقدر أسويهو ليك ..!
سيف : كيف ما في شي تسويهو لي ..! سوي لي أشعة مقطعية للراس دا ..!
الدكتور : رقبتك بالتقطعا !! يا ود ما تضيع زمنا ساي ..!
سيف : يا خي الراس دا خليناهو شوف لي عيوني كويس ..!
الدكتور عيونك مالا كمان ؟!
سيف : الزول دا أداني كف في وشي لا من النضارة دي طارت ..!
الدكتور : كدي تعال قريب اشوف عيونك دي ..!
سيف : شفتها بقت حمرا كيف ؟! يا خي أنا ما شايف أي حاجة .. عميت عديل ..!!
الدكتور : عيونك ما حمرا ولا حاجة .. وما فيها أثر لي أي ضربة ..!
سيف : كيف الكلام دا ؟! يا خي أنا بعد ما لبست النضارة مرة تانية شفت طشاشا طشاش .. الضربة نقصت من نظري كمية من البتاعات ..!
الدكتور : بتاعات شنو ؟!
سيف : البتاعات البيحسبوا بيها النظر دي ؟ بتسموها شنو إنتو ؟!
الدكتور : يا زول إنت نصيح ما عندك حاجة .. لو شاكي في حاجة نعمل ليك كشف نظر للعيون ونقارنا مع النظارة ..!
سيف : أخيرا قررت تعمل حاجة مفيدة .. طيب منتظر شنو ؟! ما تعمل الكشف دا ..!
الدكتور : إلا تجينا بكرة .. أخصائي العيون ما جا الليلة ..!
سيف : يا خي أعملو إنتا دا .. أمال شايل البطارية دي وبتعاين في عيوني من الصباح قي شنو لامن جهرتنا بيها ..!
الدكتور : حاول أفهم يا ولد .. كشف النظر العملتو ليك دا أسـ جنرال .. لكن كشف النظر داك تخصصي .. فهمت ؟!
سيف : يا دكتور عليك الله أكتب لي أي حاجة بس كدة .. أنابكرة ما داير أجي تاني ..!
الدكتور : أكضب يعني ..! إتبلى على زول بالكذب في مشكلة ما بتخصني وما عارفا ..!
سيف : أنا بحكيها ليك الحصل إنو صاحبي أداني جريو .. الجريو بتاع أخوهو الصغير .. قام الجريو قصدي أخوهو ...
الدكتور في اللحظة دي مش سب لي سيف بس ..
سب لي سيف وللجريو وللشكلة وللمستشفى ولي أخصائي العيون الماجا اليوم داك .. وللعيون زاتا ..
الدكتور إتشنج ونط في سيف داير يخنقو ويعمل ليهو جروح وكسور جد جد لكن سيف زاغ في أخر لحظة وفك البيرك ..!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: اسماء الجنيد)
|
الأخ الفنان الظريف ناذر والله القصة ظريفة وبعدين انت كتبت | Quote: ومدغلب وماااكن مقابل خمسة جنيهات |
طبعا قصة بيع الجريوات دي أنا ما وقعت لي في راسي إلا بعد ما اشتغلت مع الكوريين في بورتسودان والله يا ناذر دة في سنة 87 ما خلو ليك جريو حايم وبعدين ما كفتهم الجريوات بتاعة بورتسودان بيجيبوا معاهم جريوات تعبئة ومجففة وريحتها يا ناذر تقول يا لطيف ، دة حالتو خاتنها في تلاجة بعيد بتاعة جريوات ... وطبعا بعد جو الصينين واليابانيين حقو كل واحد يبقى عشرة على جيرواتو وكل ######ة تمسك قوي في جريواتها وتسيب الحوامة الكثيرة بتاعة كلاب السودان دي وكل سنة والجريوات طيبين ... خلينا نشوف خروف ما نقوم نضحي بجريو السنة دي... قصدي جريو خروف يعني " حمل"
مع خالص مودتي
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين .. (Re: انور الطيب)
|
أنور
Quote: ... وطبعا بعد جو الصينين واليابانيين حقو كل واحد يبقى عشرة على جيرواتو وكل ######ة تمسك قوي في جريواتها وتسيب الحوامة الكثيرة بتاعة كلاب السودان دي وكل سنة والجريوات طيبين ... خلينا نشوف خروف ما نقوم نضحي بجريو السنة دي... قصدي جريو خروف يعني " حمل"
|
ههههههههه
كدي أقرا الغقتباسات التحت دي والبوست المصاحب :
Quote: قبل عدة اعوام كنت في زيارة لأحد أصدقائي في حي بانت الذي كان به عددا من الصينيين يقيمون به ، وفي أثناء حديثنا دخل علينا أحد أصدقاء صديقي ذاك وكان في عجلة من امره وطلب من صديقي الذهاب معه بعربته لمكان قريب ودون تردد ذهبنا معه وفي خارج المنزل وجدناه يحمل كرتونة بها عدد خمسة جراء صغيرة !! فإندهشنا وسألناه ماذا يريد أن يفعل بها ؟! ولكنه كان متعجلا وطلب منا فقط الذهاب معه ومن ثم توجهنا نحو إحدي المنازل وهناك كان بعض الصينيين في إنتظاره ودلفنا جميعا داخل حوش المنزل وأخرج لهم بضاعته الثمينة فقلبها الصينيين يمينا وشمالا وتبادلوا الجراء فيما بينهم وهم يتفحصونها بدقة (بالضبط كمن بريد شراء خروف عندنا) .. وبعد ان رطنوا بلغتهم وبدأ عليهم الرضا أخرج أحدهم مبلغ خمسين ألف جنيه وسلمها لذلك الشخص (بواقع عشرة ألف للجرو) !! مع العلم أن تلك الجراء الصغيرة لا تكفي حتى لإشباع أحدهم ولا تكفي ولا حتى لعمل (حلة شية) تكفيهم جميعا .. فإذا كانت أسعار الجراء بهذا الإرتفاع فكم سيكون سعر ###### بالغ (تني) أو (جذعة) إذا ما قارنا ذلك بالخراف !!..
|
Quote: طبعا كان ذلك قبل عدة اعوام ولكن تطورت هذه المهنة الان بعيدا عن أعين السلطات (أو ربما تكتفي السلطات فقط بغض طرفها عنها طالما لا يوجد شكوى رسمية تفيد بفقدان ######) !! والان بات في حكم المؤكد أن تطور هذه المهنة ذهب ابعد من ذلك وأصبح يتم تجهيز تلك اللحوم بكاملها داخل المنازل من الذبح وحتى تقسيم وتقطيع اللحم حسب الطلب ، وربما هنالك من يطلب كوارع أو مرارة أو أم فتفت ###### !! وربما يصار جلد ال###### للدباغة لعمل المراكيب أو الشنط النسائية !! من يدري المهم ان العائد المجز من تلك المهنة يجعل كل شئ قابلا للحدوث والإمكانية ..
الشركة التي أعمل بها تمتلك مستودعا للبضاعة بمنطقة الإسطبلات بالخرطوم كان حوشه يعج بما لا يقل عن دستتين من الكلاب في مختلف الأعمار (قطيع صغير مقارنة بالخراف) !! جئت للمستودع في إحدى الأيامات بعد إنقطاع ليس بالطويل فلفت نظري عدم وجود ولا حتى جرو واحد !! وعندما سألت الخفير تردد في الإجابة أولا وبعد حدتي معه أخبرني ان الكلاب بعضها هرب والبعض الأخر قام بطرده من المستودع لأنه صار متسخا بسبب الكلاب !!!
وطبعا هناك سر كبير وراء إختفاء الكلاب من عدد من الاحياء وبالذات التي بها اسواق شعبية مثل سوق عبد المنعم في الخرطوم حيث شاهدت بأم عيني عددا من المشردين يقومون بالقبض على الكلاب وتحميلها في عربة أمجاد ينطلق بها سائقها إلى مكان مجهول هو بالضرورة معمل صغير أو جزارة متواضعة حيث يتم هنالك ذبح الكلاب وتحويلها إلى لحوم إستهلاكية ربما كان من بينها السجق والكبدة ولا استبعد الكوارع و (باسم) وهو رأس الخروف (ال######) لمن لا يعرفه ..
أخبرني من أثق به أن المشردين يتقاضون مبلغا عبارة عن خمس ألف جنيه لل###### الواحد (وهو مبلغ كبير لتلك الشريحة التي تحدثت عنها في بوست سابق) فكم ياتري يكون سعر الكيلو من ذلك اللحم واين يذهب فاقد اللحم والذي يرجع لعدم التسويق ؟!!
بكل تأكيد ان من يمتهن حرفة كهذه (جزار كلاب أو وسيط مبيعات) يخلو تماما من الاخلاق وحتما قد يكون تذوق في إحدى الأيام لحم ما يذبحه على الأقل بدافع الفضول ووجد لنفسه مبررا يبيح له تسويق الفائض في السوق العام بدلا من ان يفسد على الرغم من أن السعر لن يكون مجزيا في حالة شراءه من قبل غير الصينيين ولكنه على كل حال لم يخسر مليما ولم يجلب لبهائمه برسيما أو علفا ولم يسرح بها في الخلاء ..
القضية خطيرة جدا وعلينا ان نجد موازنة تتيح للأجنبي توافر إحتياجاته هنا بمشروعية وأمام اعين السلطات ورقابتها ، وبين صحة المواطن والذي لا يعلم ان ذات المعدات التي أستعملت في تحضير لحومه قد أستعملت قبلا في تحضير لحوم ذات نوعية اخرى ..
قد لا يعجبه ذلك إطلاقا خاصة إذا علم ان غير قليل من لحوم تلك الكلاب قد إختلط بما إشتراه من لحوم أبقار أو خراف !!..
الشي الأكيد الان ان الاجانب يتوافدون بكثرة على السودان وهم سيحصلون على احتياجاتهم سوى شئنا ام أبينا .. ورغم جميع قائمة المحظورات فقد رأيت بأم عيني عينة من الخمر البلدي الفاخر وتعبئتها المقنعة للأجانب تذهب لهم مباشرة ودون عناء حين الطلب ، فهل نحن مستعدون لتلك المرحلة ؟؟!!
هل سنتقبل وجود جزارة او مصنع لتجهيز لحوم الكلاب بمشروعية ؟؟!!
هل سنرضى وجود مطعما يبيع حساء وارجل الضفادع على العلن وهل سنشهد قريبا مطاردة المشردين للضفادع في البرك والاوحال لتسليمها للوسطاء وأصحاب المطاعم ؟؟!!
لا حظوا أننا في مرحلة تنفيذ إتفاقية سلام يتحول بموجبها السودان إلى بلد علماني كامل رغم محاولات مسئولينا نفي ذلك .. ولاحظوا أن الجنوبيين (الطرف الثاني من الإتفاقية) يحبون تناول لحوم القرود !! فهل سنمنعهم من ذلك إذا ما ارادوا إنشاء مصنع بقلب العاصمة لتجهيز تلكم اللحوم للجنوبيين بالخرطوم أم سنتعايش مع الفكرة ؟؟!!
|
والباقي من هنا :
تجهيز لحوم الكلاب في السودان للصينيين بين الحقيقة والخيال !!
| |
|
|
|
|
|
|
| |
اشرف السر
عاطف محمد أحمد زكريا
Munir
إدريس محمد إبراهيم
عبدالكريم أحمد الامين
محمد عبد الماجد الصايم
ناذر محمد الخليفة
عفاف الصادق بابكر
فدياس نجم الدين
النذير حجازي
omer osman
Fadl Karrar
OSMAN SAYED MOHAMED
اسماء الجنيد
محمد حيدر المشرف
داليا حافظ
محمد الامين احمد
فادية اليمني
معتز القريش
بشير أحمد
waleed dawash
عادل فضل المولى
بشير جبريل علي
قلقو
ابراهيم قناوي
د.امام الصديق عبد المعطى
طارق زروق
الصادق صديق سلمان
انور الطيب
هشام حسن
ابراهيم بقال سراج
الطيب العامرى
فيس بوك
تويتر
انستقرام
يوتيوب
بنتيريست