|
|
 الفلهمة العوره وشيل البطارية مع القمره
|
الفلهمة أو الفلقصة في المجتمع شئ مألوف والمتفلهم أو المتفلقص هو ذلك الشخص الفاكيها في روحو الذي ينظر إلى الناس من أعلى ويري الجميع تحته وغالباً ما يريد أن ينظر إليه الناس على أساس أنه الأفهم والملهم والظهور أمامهم بمظهر المثقف المتعلم ويحب رؤية الدهشة في وجوه الغبش وهم يستمعون فاغرين أفواههم لمفراداته وسكناته وحركاته ، حتى تنتفخ أوداجه من الخيلاء وتحاكي التامبيرا.
هذا الصنف من البشر عادة ما يجيد إستخدام لغة الجسم ناهيك عن إدخال بل حشر بعض المصطلحات والكلمات بلغة الفرنجة في حديثة ليدلل على عميق ثقافته ورفعة مصدرها.
مدثر صاحبي أجوف من الخور الكبير بل وعقله أجوف من صفيحة زيت فاضية - أيام أن كان العيش بالقبض وديوان النعيم ما بنسد - وربما أخوي من فؤاد أم موسي وفؤاد المهندس لديه بعض المصطلحات التي أصبحت لازمة من لوازم كلامه وقد إكتسب هذه الكلمات والعبارات من دور السينما وبعض أفلام السهرة المترجمة ، والأيام دي شابك في كلمة مينتالتي ، في بيت البكاء في صيون العرس في الخور في الكوتشينة في التمرين في أى مكان يقول ليك يا اخي هناي داك المينتالتي بتاعتو مش تمام ، أو المنتالتي بتاعت الشخصية السودانية هي السبب في ... ، وقد سبق إستخدامه لكلمة مينتالتي في سنوات قد خلت جملتين إثنتين فقط لا غير كان كثيراً ما يقول بمناسبة وغالباً بدون مناسبة يا أخي الأوفشور كومبانيز وبرضو الأوفرسيز .
بس في الغالب مدثر صاحبي أفضل من عباس ، فعباس هذا إنقلب إنقلابا كبير بعد أن دخل الجامعه وأصبح يخالط الجكس فأصابته عقدة البرجوازية وهو خريج الأسر الفقيرة بقشلاق السواري المكون عادة من أوضتين مضافاً إليهم كلب وغنماية فأنحرف في كلامه وحركاته وسكناته فأصبح يقطب جبينه ويرفع حاجبيه وتظهر تلك الحركات بصورة جلية وواضحة عند نطقة لكلمة دجاج أو جبنه فيعطش حرف الجيم حتى يلهث الحرف من شدة العطش ويحشر أخونا عباس عادة بين الجملة والتي تليها عبارة ok ناهيك عن عبارات مثل القروب بتاعي ، وأنا almost باقي لي ثلاثة سنوات في الجامعة وأغلب أوقاتي بقضيها مع القروب شاتنق في أى حاجة. وأنا بحب الميوزيك وبشوف برنامج ستار أكاديمي ، وبلقي نفسي في رياضة التنس والإسويمنج.
العلماء قالوا زي عباس ده عنده عقده وأنا بقول للعلماء وللعالم إنو عباس ده ما عندو عقدة ده عندو عقد أكثر من عناقيد العنب ورامياهو حماره وناطحاهو بقرة.
إتخيلو عباس بقي يقول بيرجر وشيبس وهو الذي أدمن موية الفول بموية الجبنة معانا من دكان عم علي وهو الذي بشوف البطاطس مرة في الأسبوع في حلة الملاح ونحن أصحابو الزمان بقينا ما ناسو بعد أن عمل قروب وخلانا نقول الروب.
ويا ركس مصير الكموش يبقي برطوش – وكراع البقر جيابه بس لو إتخرجت وباقي القروب بتاعك كشحها ليك عادي تعال لينا بنقبل بيك بس بدون دجاج أو مينتالتي. لأنو نحن في القروب بتاعنا جننا وجن الفلهمه العوره وشيل البطارية مع القمره - خاصة إذا كان قمر 14 أو قمر بوبا
|
|
 
|
|
|
|
|
|
|
|
Re: الفلهمة العوره وشيل البطارية مع القمره (Re: almulaomar)
|
والله يالملا في ناس في البورد دا فايتين صاحبك دا بملايين السنين "الضوئية".
معظمهم عاملين فيها الطيب صالح والواحد يكتب ليهو كلمتين ويقوم يحشر ليك "لم أكن أتوقع أن تصل الأمور إلى "هكذا" مش عارف إيه.
غايتو هكذا دي كرهوها حياتا ذاتو.
واحد زي زولك دا مرة قاعد بيلعب في كوشتينة قام فجأة نط وقال ماشي.
الجماعة قالوا ليهو ياخي ما بدري.
قام قال ليهم والله الحقيقة خالي بكرة عندو Dignity وماشين نحضر الخروف والسكاكين.
| |
|
|
|
|
|
|
|
|
|
Re: الفلهمة العوره وشيل البطارية مع القمره (Re: shammashi)
|
Quote: بدون مناسبة يا أخي الأوفشور كومبانيز وبرضو الأوفرسيز .
بس في الغالب مدثر صاحبي أفضل من عباس ، فعباس هذا إنقلب إنقلابا كبير بعد أن دخل الجامعه وأصبح يخالط الجكس فأصابته عقدة البرجوازية وهو خريج الأسر الفقيرة بقشلاق السواري المكون عادة من أوضتين مضافاً إليهم كلب وغنماية فأنحرف في كلامه وحركاته وسكناته فأصبح يقطب جبينه ويرفع حاجبيه وتظهر تلك الحركات بصورة جلية وواضحة عند نطقة لكلمة دجاج أو جبنه فيعطش حرف الجيم حتى يلهث الحرف من شدة العطش ويحشر أخونا عباس عادة بين الجملة والتي تليها عبارة ok ناهيك عن عبارات مثل القروب بتاعي |
سلام يا ملة
دا النوع البكرهني الدنيا.. البكون عامل برجوازي دا...
اول ما جينا المعهد.. في واحدة كدا كان مقابلاني بنات الاقاليم بنات الاقاليم..
ودائما عايزة تديني نصائح في الموضة..والمكياج..وعمل الاحمر شلاليف هذه الاشياء
التى لا اتعاطاها البتة..
اها جات سامية المعرابس سكنا سويا مع الزولة المفلهمة دي..
دخلتنا في انه كل يوم لازم نعمل فاصل معرابسي الصباح ولما نطلع الشارع نضحك ضحكا كثيرا..
اها بس يوم عرفنا البير وغطاها انها لا برجوازية لا الله قال..
واحدة تانية "بردو" بتعتش الجيم.. ولا تنتق الضاء..
نوع انا في اودتي ولما قاعدة في اودتي ولما ولما ولما..
المهم برضك اكتشفنا انها ما برجوازية ومدعية وقاطعة قلبنا بالفلهمة..
الحاجة دي زمنا بعملوها بس البنات لكن زمنكم
عجيب البقو الاولاد برضو يعملو فيها برجوازين
زميلنا عبد الحميد كان عامل مقطع ومسكين لما فترة كدا ما مشى اهلو وجو يفتشوه
في المعهد الساعة النعرف انه برجوازي كبير وداسيها..
فالفلهمة العورة دا كانت سلوك نسائي على ايامنا..حيث اي شاب كان
عايز يظهر شفت ولد لذينا..عشان ما يبقى مدعاة للسخرية..
وتحياتي..
| |
|
|
|
|
|
|
|
|
|
Re: الفلهمة العوره وشيل البطارية مع القمره (Re: shammashi)
|
شماشي
شكيتك على بسط الأمن الشامل، والأمم المتحدة زاتها، حتى لو يكون في شكيتي هذه مذلة
قلت لي خالو عندو Dignity دي ما جهجهتني بيها جهجهة عدوك ودخلتني مدرسة عديل فتحت كرتونتي القديمة وفتشت النيو ويرلد دكشنري ولمن فتحت صفحة الحرف D كمية بتاعت خيوط عنكبوت إتشربكت في يدي وجاني ليك تراب كده ناعم فعطست عطسة لخبطت الصفحة برزاز ما في داعي لي ذكر كثافته ، المهم بعد أن حمدت الله على العطسة لم أجد من يشمتني ، وبعد ده كلو لقيت الكلمة في أغنية لي فيل كولنز. المهم نوع الترجمة دي هي الترجمة الحرفية زي مثلا أم رقيقة نقول عليها mother of thin أو أب روف father of rouf أو شلعوها الخوالده destroyed by khoaldah
لكين لمن تقول لي واحد في حوار:
إنت بتعتقد في الكلام البتقولو ده يقوم يقول ليك oh yeah أو لمن يكون بتفرج معاك في مباراة كرة قدم ويقوم المهاجم الفلاني يشوت الكورة وهو منفرد بالمرمي خارج الملعب فيقول صاحبك بعد أن يضع يده على رأسه oh no
أو لمن يضرب تلفون لي واحد مرة ومرتين وتلاته وما يردوا عليهو ، يقوم يقول Come-on ويقولها بطريقة فيها الكثير من الإستجداء
أها زي ده تقول فيهو شنو
| |
|
|
|
|
|
|
|
|
|
Re: الفلهمة العوره وشيل البطارية مع القمره (Re: almulaomar)
|
أخي الملا عمر
سلامات وشكراً على البوست الإبتسامة .
ذكرني صاحبك عباس بالطرفة القديمة لبلدياتنا الإقليمي الذي ذهب للدراسة الجامعية في الخرطوم . هناك أعجبته جملة ( لو سمحت ) التي تقال مع كل طلب . في أول أجازة له في القرية ذهب لصاحب الكنتين ولمن لا يعرف الكنتين نقول أن ( الكنتين هو سيوبرماركت القرية ) للشراء فدار بينهم الحوار كالآتي
- ياعم ( ... ) عندك سجائر بنسون
- أيوا يا ولدي عندي
- لوسمحت أديني علبة (ناوله علبة البنسون وهو يردد في سره لوسمحت الجديدة على كلام الولد دا )
- وعندك كبريت ؟؟
- ( بضيق ) ايوا موجود
- لوسمحت أديني علبة كبريت ( ناوله الكبريت وهو يتأمله )
- و عندك مناديل ورق ؟؟
- ( بصبر نافذ ) ايوا عندي
- لو سمحت أديني .........
هنا ضاق الرجل وانفجر
- شنو ياود التوم شابكني لو سمحت لوسمحت إنت ما ناوي تدفع لى قروشي ولاً شنو ؟؟؟؟
| |
|
|
|
|
|
|
|
|
|
Re: الفلهمة العوره وشيل البطارية مع القمره (Re: عاطف عمر)
|
الملا عمر والله ضحكتني شديد خلاص تخيل نوعية عباس صاحبك ده كتيرة جداً , لكن والله العظيم أنا بلاقي
ليهم العذر , يعني عليك الله الواحد لو بدرس في الجامعة ولقي ليهو شيكس نظيف زي ده يعمل شنو ما
لازم يعوج لسانو عشان يكسب ود الجكس ؟؟ اللهم لا أعتراض في حكمك يا رب , يا خوي دي حسادة منك ساي
والظاهر ركس خرطك .
| |
|
|
|
|
|
|
|
|
|
Re: الفلهمة العوره وشيل البطارية مع القمره (Re: almulaomar)
|
هههههههههههههههههه
أها دي أنا حصلت لي عندما كنا طلبة في المعهد العالي للموسيقى والمسرح ونحن في الداخلية ومعي صديقي حاتم محمد صالح طل علينا الشاعر الكبير محمد محمد خير ويبدو أنه كان في ورطة حيث إلتزم لعريس يخصه بأنه سيحضر له فنان للحفلة وفشل في ذلك
أها قال لي حاتم ياخي أنا المسالة بالنسبة لي بقت مسألة Dignity فعايز بدرالدين دا يمشي معانا يغني لينا في الحفلة دي وطلبوا مني وبإلحاح بحجة أنا المسألة مسألة Dignity
أها قلت لي حاتم Dignity يعني شنو؟؟؟
قال لي كرامة
قلت الحمد لله الما إتعشيت هههههههههههههههههههههههه
| |
|
|
|
|
|
|
| |
almulaomar
bayan
عاطف عمر
هاشم أحمد خلف الله
بدرالدين شنا
محجوب البيلي
فيس بوك
تويتر
انستقرام
يوتيوب
بنتيريست