🔸عمك تنقو 🔸عزة زوجة عمك تنقو 🔸حمدية 🔸الزعيم رقم صفر 🔸الرجل 🔸الرجلان الضخمان 🔸القراد الخمس 🔸الكدايس الخمس 🔸الأفيال الخمس
الفصل الأول عزة وحمدية
المسرح: حوش كبير أرضه مغطاة بالرمل ؛ هناك زير على يسار الحوش وقريب قليلا من عنقريب (سرير خشبي شعبي) وسط الحوش.. وعلى يمين العنقريب ادبخانة (مرحاض)... يرقد عمك تنقو نائما ومستلق على ظهره فوق العنقريب...ينام فاتحا فمه ويهش ذبابة تحوم حول أنفه بشكل مستمر دون وعي منه... تحت السرير ابريق ماء بلاستيكي ذو فم طويل ومحنوف المقدمة. عمك تنقو: (يهذي أثناء النوم).. كذابة.. خالتك كذابة يا عزة... (يصمت لنصف دقيقة ثم يعاود الهذيان).. ما قلت داير اعرس تاني... علي الطلاق ما قلت... (يصمت لنصف دقيقة... يشخر ويدخل في نوم عميق...تظهر عزة وهي ترتدي عباءة منزلية قديمة ، ثم تبدأ في كنس الأرض الرملية بالمقشاشة).. ما بدور اعرس تاني صدقيني.. (تنتبه عزة وتترك الكنس وتقف بتحفز وتضع قبضتي يديها على خصرها..).. القالتلك كدة بدور تخرب بيتك آعزة...علي الطلاق آعزة...عرس شنو لي.. أنا حيل ما عندي للعرس..... (تظهر ملامح الغضب على وجه عزة.. تقترب أكثر وترخي سمعها).. قروش شنو الجاتني.. الكارو البعتو صرفت قروشو... (يصمت ويطلق شخيرا طويلا.. تظل عزة ساكنة تنتظر حديثه).. عزة...عليك الله ما تنكدي علي يومي...(يدخل في شخير عميق وينكفئ على جنبه في مواجهة الجمهور وهو يهش الذبابة عن أنفه)..قال عرس قال... هة!!.. (تغادر عزة المسرح ثم ترجع وهي حاملة لكرسي تضعه قرب العنقريب وترمي المقشاشة بغضب وتنظر في وجه عمك تنقو الغارق في النوم)..هو انتي تصدقي أنا ممكن أحب غير عزة... (ترتاح قليلا وتبتسم بخجل).. حمدية منو دي.. (تنتبه) حمدية جارتنا الشينة دي.... (يعود وينكفئ على جنبه معطيا الجمهور ظهره).. كدي استهدي بالله.... (تنهض عزة من كرسيها وتتجه إلى يمين المسرح) عزة: (تصيح) حمدية... هوي يا حمدية.... حمدية انا بناديك..أخير ليك تردي علي بالحسنى..(ترفع صوتها) حمديووووة... صوت حمدية: لوكي الصبر يا عزة بت البركات...خاتا حنتي ..أصبري علي بس وبجيك بالسكة عديل.. عزة: (تصيح).. شوفي يا ولية هوووي.. لا تجيني لا أجيك وتاني حسك عينك تتكلمي مع راجلي... حمدية: (بفزع) سجمي يا عزة.. مالك يختي..الحصل شنو ومتمرعفة علي فوق شنو... عزة: شوفي يا مرا هوي.. احترمي راجلك الما تم في قبرو سنة دة وجاريا تشلبي رجال الحلة... حمدية: (تشعر بالرعب) أشلب شنو ...ورجال شنو يا عزة وحاة الله ما قربت من راجلك ولا لساني خاطب لسانه... عزة: هو المرا محتاجة تخاطب باللسان يا عقربة... حمدية: (بمسكنة) نان بتخاطب بشنو يا عزة..؟ عزة: بتخاطب بي حاجات تانية بعرفنها الزيك ديل...وحاط اسم الله تاني تلبسي عبايتك الضيقة دي وتحومي بيها في الحلة إلا اكشف الاعيبك لي نسوان الحلة... حمدية: (يتهدج صوتها) وحات الله ما ضيقة ما تفتري علي يا عزة .. انا لسة بي وجعتي... عزة: وجعتك يا كضابة... المهم حسك عينك تمشي في الحلة بي عبايتك دي .. اخير ليك يا حمدية وحاط اسم الله النسوان لو عرفن كيدك حياكلنك اكل... حمدية: (تبكي) خلاص يا عزة تاني طلعة من البيت زاتو ما بطلع.. اكان دة برضيك آعزة.. عزة: ما بحن عليك وما بتغشيني.. نحن نسوان زي بعض وعارفين نفك البمبان في عيونا متين... وكلامي دة ما حكرروا مرتين... حمدية: (تستمر في البكاء وتنوح كمواء القطط الليلية) ..خلاص آعزة... من الفجرية سايبة الحلة...وكان في مواصلات حسي كان مشيت.. انا قايلاكم جيراني وستري وغتاي... عزة: السترة عند صاحبا ما عند الجيران.... (تستمر حمدية في النواح وتعود عزة لتجلس قرب عمك تنقو).. (يختفي صوت حمدية)... عزة: (تتحدث الى نفسها بصوت مسموع) .. بتوريني حركات النسوان .. دة مسجل في دفاترنا القديمة يا حمدية الوهمية... (يفتح عمك تنقو عينيه ويتثاءب ثم ينظر بدهشة لعزة). عمك تنقو: مالك يا مرا... قاعدة فوق راسي مالك...؟ عزة: (تهتاج) شوف يا تنقو...أنا حركات الرجال دي بعرفا كويس...وعينك الزايغة دي بقدقدا ليك... عمك تنقو: (يصلب ظهره وعيناه متسعتان) مالك يا مرا.. سيحتي ركبي الحاصل شنو... عزة: انت عارف الحاصل شنو يا تنقو.. وبطل اللف والدوران.. وعشان ما نصرف عربي كتير... حمدية جارتنا دي لو تاني عاينتا ليها بغزعز ليك أصابعيني دي في عيونك المقضيات ديل... عمك تنقو: دة كلام شنو.. بسم الله الرحمن الرحيم.. عزة مالك...الشيطان الراكبك دة استعيذي بالله واطرديهو.. عزة: الشيطان دا راكب مخك انت دة...وحمدية دي لو اشتكت منك تاني ما بخليك... عمك تنقو: (بفزع) حمدية اشتكت مني؟.. عزة: آآآي اشتكت منك..وقالت تاني ما تفتح خشمك دة معاها وعيونك ما تجي فيها والا ود عمها الخاطبا بجي يقطع ليك لسانك ويقلع ليك عيونك...ونبقى في فضايح مع ناس الحلة... عمك تنقو: والله لساني ما خاطب لسانا من يوم مات المرحوم...المرا دي دايرة تتبلا علي... عزة: تتبلى عليك ولا ما تتبلى المهم نحن ماعايزين فضايح في الحلة...كفاية العملتو زمان... عمك تنقو: (برعب) عملتا شنو زمان.. عزة: (تنهض وتغادر المسرح) عارف براك عملت شنو. (يجلس عمك تنقو على السرير) عمك تنقو: (يحدث نفسه) عملت شنو زمان.. يا ربي عملت شنو زمان...زمان....؟!!! زمان عملت شنو...؟!!! زمان... زمان عملت شنو؟!!!
(ستار)
****
الفصل الثاني المحاكمة
(يرفع الستار عن مكتب مستطيل به مكتب وثير على الجدار مقابل الجمهور صورة وجه مظلم وخلف المكتب مقعد جلدي أسود ضخم يجلس عليه رجل وهو يعطي ظهره للجمهور .. على الجانب الأيمن والأيسر للمسرح يقف رجلان ضخما الجثة.... يسمع صوت ضجيج في الخارج)... صوت حمدية: (تصيح).. لازم أدخل.. أنا مواطنة.. أنا لازم أقابل الزعيم رقم صفر... أصوات رجال متداخلة: ممنوع يا أخت... ما تجيبي لينا الهوا... صوت حمدية: لازم أخش... لازم أخش ... (تندفع داخل المكتب ومن خلفها رجلان ضخمان أيضا)... (يرفع الزعيم رقم صفر يده اليمنى ويلوح بأصبعين -على أحدهما خاتم ذهبي ضخم- دلالة على ترك المرأة وشأنها فينصرف الرجلان.. حمدية: (تلهث وهي تهتف).. حرية .. حرية .. حرية.. (يظل الزعيم رقم صفر معطيا ظهره للجمهور ثم يحرك أصبعيه فتشرع حمدية في الحديث)...عايزين يقوضوا الثورة يا زعيم.. عايزين يسرقوا الثورة يا زعيم... (يرخي الزعيم رقم صفر أصابعه).. العملاء والمندسين والمأجورين يا زعيم .. (يمد الزعيم رقم صفر يده خلف ظهره ويضغط على زر فيصدر رنين وعلى اثره يدخل رجل ذو شارب كث فيشير له الزعيم رقم صفر بالاقتراب بأصابعه .. يقترب الرجل من الزعيم وينحني على أذن الزعيم اليمنى)... الرجل: حسنا يا زعيم.. سأنقل كلامك للسيدة وأدون اجاباتها هنا في الكراس...(يوجه حديثه لحمدية).. نعم يا أخت.. الحاصل شنو... حمدية: الحاصل يا سعادتو.. اني شاكة في جارنا... جارنا دة ما مشى المظاهرات .. ولا أضرب اثناء العصيان ولا هتف باسم الحرية... (تهتف وهي ترفع يدها) حرية ..حرية .. حرية... الرجل:(يدون كلامها ثم ينحني على أذن الزعيم قبل أن يعتدل) .. كلام خطير ... وما هو اسم جارك هذا... حمدية: عمك تنقو يا زعيم .. عمك تنقو.. وانا يوميا بشوف ناس خاشين وطالعين منو.. واشك انهم شغالين ضد الثورة...والثورة دي نحن نفديها بقلوبنا (تهتف) حرية .. حرية .. حرية... الرجل: (ينحني على أذن الزعيم ثم يعتدل).. عندك حاجة ناقصاك في البيت يا أخت...؟ حمدية: بري .. نحن من خيراتكم ماكلين وشاربين يا زعيم... الرجل: (ينحني على أذن الزعيم ويعتدل) خلاص يا حمدية... امشي بيتك ونحن حنشوف القصة شنو... ما تقلقي...انتي انسانة وطنية وشجاعة والبلد بتفخر بيك .. حمدية: (تغطي وجهها بثوبها) حاضر.. فتكم بي عافية... (تغادر حمدية المسرح).. الرجل: (ينحني على أذن الزعيم رقم صفر ثم يعتدل) فعلا .. كلام خطير... واضح انه دة من الطابور الخامس.. الحلة دي ثارت من أجل الحرية ونحن لن نقبل أي مساس بحريتنا... (يرفع الرجل يده ويهتف) حرية.. حرية .. حرية.. (يضغط الزعيم رقم صفر على زر مكتبه وراء ظهره فيرن الجرس ويدخل شاب نحيل) الشاب النحيل: نعم يا زعيم رقم صفر... أوامر معاليك... الرجل: (ينحني على أذن الزعيم ثم يعتدل) يتم القبض على عمك تنقو وجلبه فورا للاستجواب. الشاب النحيل: علم سيادتك.. (يغادر الشاب).. الرجل: يا زعيم رقم صفر... المصاريف زادت يا سعادتو... (ينحني على أذن الزعيم ثم يعتدل).. حاجات كتيرة.. حسب الخطة لدعم الثورة (يقطع حديثه ويرفع يده) حرية حرية حرية... (يواصل) حسب الخطة لدعم الثورة.. عندنا مصاريف كتيرة... مصاريق القراد الرقمي (يخرج خمسة صبيان حالقي الرؤوس من يسار المسرح ويصوصون) الصبيان الخمسة: صو صو صو ... صو صو صو ... صو صو صو ... الرجل: ولدينا ايضا مصاريف الجرقاسات.. (يخرج خمس صبيان من يمين المسرح وينبحون) الصبيان الجرقاسات: هو هو هو ... هو هو هو ... هو هو هو .... الرجل: ولدينا مصاريف الكدايس البريئة .. (تخرج خمس فتيات من يسار المسرح ويمؤن) الكدايس البريئة: مياو مياو مياو .. مياو مياو مياو ... الرجل: ولدينا الأفيال تحتاج لطعام وشراب لتحمي الثورة... (يخرج خمس شبان ضخمي الجثة وهم يعوون) الأفيال الخمسة: عووووو .. عووووو ... عوووووو ...عووووو . الرجل: وأيضا نثريات مختلفة للقضاة والبرلمان وايضا نثريات للزعيم نفسه... (يرفع الزعيم يده ويشير بعلامة الاعجاب بأبهامه).. الرجل: (ينحني على أذن الزعيم ثم يعتدل)...يا جنود الثورة البواسل...يخاطبكم الزعيم رقم صفر بلساني قائلا: - عبر مسيرة النضال الطويلة من أجل اقتلاع نظام الدكتاتورية والقمع والفساد .. واجهت ثورتكم المارقين والمندسين والخونة والعملاء.. ثورتكم ثورة الشعب...ثورتكم الباسلة .. التي قدمنا لها شهداءنا وضحينا من أجلها بفلذات اكبادنا وواجهنا الرصاص والموت... ثورتكم لا زالت مستمرة..فالأعداء لا زالوا يتربصون بها الدوائر...الأعداء لا يموتون أبدا....أعداء الحرية (يرفع يده ويهتف) حرية .. حرية .. حرية... يهتف الجميع: حرية .. حرية .. حرية... الرجل: ولكن الشعب لهؤلاء العملاء والمندسين والفلول بالمرصاد... لقد تم اليوم وبناء على معلومات أكيدة الكشف عن خلية سرية تعمل على تقويض الثورة وانجاز ثورة مضادة...خلية الظلام التي يقودها الشيطان الأكبر المدعو عمك تنقو... (يصمت قليلا ويسترد أنفاسه).. في تمام الساعة السابعة وثلاث وعشرين دقيقة وخمس ثوان واربعة أجزاء من الثانية .. تقدمت المواطنة الباسلة المناضلة من أجل الثورة السيدة حمدية بالتبليغ عن خلية سرية يقودها المدعو عمك تنقو والتي تعمل بشكل سري على تقويض الثورة... وبعد التحقيقات والتحريات والاستعلامات والمواصلات والات... الجميع: آت.. آت... آت... الرجل: تأكد لدينا تماما أن المدعو عمك تنقو خائن اكبر وفاسد وقد تلقى دعما بلغ سبعة عشر مليون دولار من أجل تقويض الثورة عبر تجهيزه لخلايا نائمة وصاحية نشطة وساكنة ... هذا وسنوافيكم بالتفاصيل في حضور المتهم في محاكمة علنية شفافة ونزيهة...(يشير الى الرجل على يمين المسرح) أدخلوا المتهم... يدخل عمك تنقو مقيدا ومكمم الفاه ومغطى العينين... الخمس الجرقاسات: هو هو هو .. هو هو هو ... عميل ... عميل ... خائن .. خائن ... خائن ... فاسد..فاسد ..فاسد... (يشير الرجل الى الخمس من القراد الرقمي).. (يخرج القرادات الخمس هواتف محمولة ويصورون أحدهم).. القرادة الأول: يا جماعة .. أيها الثوار.. أيها المناضلون... أقسم بالله والله شهيد على الحقولو دة... المعلومات دي مؤكدة ..من مصادر موثوقة ... في تمام الساعة الحادية عشر ليلا... وصل عمك تنقو الى مطار دولة أجنبية... وهناك استقبله وفد حكومي .. وعقدوا اجتماعا مطولا .. انتهى بتلقي عمك تنقو لسبعطاشر مليون دولار.. أكرر يا جماعة..سبعطاشر مليون دولار بغرض تقويض الثورة... أقسم بالله وأحلف ليكم المصحف... عمك تنقو تلقى سبعطاااااشر مليون دولار ...يا جماعة هؤلاء هم الفاسدون...عمك تنقو عميل .. يصيح الجميع: عميل عميل عميل.. القرادة: عمك تنقو حرامي... يصيح الجميع: حرامي..حرامي ..حرامي... القرادة: عمك تنقو غواصة... يصيح الجميع: غواصة ...غواصة... غواصة... (يشير الرجل للقرادة الرقمي الثاني) القرادة الثاني: اسمعوا النكتة دي يا جماعة... وحدة قالت لي راجلا عايزة فستان العيد.. راجلا قال ليها : انتي قايلاني مليونير زي عمك تنقو... (يضحك القرادة فيتبعه الباقون بالضحك)... القرادة الثاني: هاكم النكتة دي كمان: قالو عزة طلبت الطلاق من عمك تنقو . قام طلع ليها شنطة السبعطاشر مليون.. قامت ضحكت وقالت ليهو: كدة انا طلقت الفقر ما طلقتك انت... (يقهقه ويضحك الباقون)... (يشير الرجل للقرادة الثالث).. القرادة الثالث: (يكتب ويقول) امبارح شوهد عمك تنقو مع مدير جهاز مخابرات النظام البائد وهو يتلقى تعليمات منه لتقويض الثورة... انظر للصورة: انشر لكشف العملاء والفاسدين والمندسين... القرادتان الرابع والخمس: أنشر.. انشر .. انشر... (يشير الرجل للكدايس البريئة)... الكدايس الخمسة: نحن الكديسات البريئات... نحن اللطيفات العفيفات... نحن التقيلات ما خفيفات... الكديسة الأولى: (تنخرط في البكاء) .. يا جماعة انتو ما عارفين حاجة... عمك تنقو اتحرش بي ... (تجهش بالبكاء) هبشني في حتات حساسة.. الكديسات بمافيهن الكديسة الأولى: حساسة..حساسة .. حساسة... القراد الأول: سجلوا الفديو وانشروا ... انشروا.. انشروا.. القراد الخمسة: نشرنا.. نشرنا ..نشرنا ... الكديسة الثانية: على فكرة انا كنت مفتكرة عمك تنقو انسان محترم..كنت بثق فيهو ... كنت منتظراهو يتزوجني... لكن خاني وخدعني.. عمك تنقو... طلب مني قروش دين يفك زنقتو.. انا اديتو خاتمي وغويشتي الدهب.. في الأول قال لي لا لا يا حبيبتي الكديسة..لا انا ما بقبل اشيل من كديسة حاجة... انا صدقت واصريت لانو اعجابي بيهو زاد... بعد كدة هو شالوم .. شالوم واختفي .. ولمن لاقيتو بالصدفة معاهو وحدة تانية نهرني وشاكلني....واداني كف... الكديسات الخمسة: أداها كف .. أداها كف ... أداها كف... القراد الخمس: انشر .. انشر .. انشر... الكديسة الثالثة: كويس إنو أداك كف بس ... أنا اغتصبني عديل... (تبكي).. صدقوني يا جماعة ... (أنا منهارة.. محطمة ... نفسياتي مشتتة وممزقة وواقعة في الواطة دي... الكديسات الخمسة: في الواطة دي ... في الواطة دي .. في الواطة دي.. الكديستان الرابعة والخامسة: انشروا .. انشروا .. انشروا ... القراد الخمس: انشروا انشروا انشروا.... (يشير الرجل إلى الأفيال الخمسة فيهجمون على عمك تنقو ويضربونه) الأفيال الخمسة: عميل.. مندس ...منحط ... فلول ...حرامي .. تافه.. حقير ... اضربو في صلعتو .... اردم اردم اردم... الرجل: الآن.. ومن أجل محاكمة عادلة... حنسمح لي عمك تنقو يتكلم... (الرجل على يسار المسرح يتقدم ويزيل غطاء الفم والعينين عن عمك تنقوا). الرجل: اعترف.. أوعك تنكر... كل الأدلة ضدك وبتدينك... عمك تنقو: (يبكي) انتو منو... انتو عاوزين مني شنو... الرجل: اسكت... الجرقاسات: هو هو هو ... هو هو هو ... الأفيال: عووووووو ... عووووووو ... عوووووو ... الكدايس: ميااااااو ... ميااااااو ... ميااااااو... عمك تنقو: كلو كضب كضب كضب (يبكي)... الرجل: اعترف.. انت غواصة للنظام البائد... انت عميل مندس .. متحرش ومغتصب وفاسد وحرامي ... كل الادلة عندنا وشهادات الشهود... عمك تنقو: كضب كلو تزوير في تزوير ... كلو كضب في كضب... انتو منو... الرجل: نحن شرطة الثورة... ونحن نيابة الثورة....ونحن حماة الثورة... ونحن الشعب كلو معانا...(يرفع يده) الجميع: حرية .. حرية حرية... عمك تنقو: أنا ما ضد الثورة .. انا قدمت ولدي الجعيدي شهيد... الرجل: كضاب... الجرقاسات: كضاب .. كضاب ... كضاب.. عمك تنقو: ولدي الجعيدي كان ضد النظام... اتعذب في بيوت الأشباح... كلنا كنا ضد النظام... الرجل: ولدك اتعذب قبل الثور ومات قبل الثورة... يبقى ولدك ما مناضل.. المناضلين هم ديل .. هم القدرو يسقطو النظام... عمك تنقو: صحي انا ما بعرف سياسة لكن بعرف العدالة.. بعرف الحق .. بعرف الصاح من الكضب.. بعرف المزيف من الأصلي... الرجل: أسكت يا متهم اسكت يا عميل... الأفيال الخمسة: (يبدؤون في ضرب عمك تنقو وصفعه) أردم الخائن..أردم العميل .. أردم .. أردم .. أردم... عمك تنقو: (يصرخ وهو يبكي) وين الحرية .. وين العدالة ... وين القانون... الرجل: حرية ... حرية .. حرية ... الجميع: حرية .. حرية ... حرية ... الرجل: اعترف احسن ليك... اعترف أفضل ما تتهان وتنضرب وتتردم... عمك تنقو: اعترف بي شنو لكن... الرجل: (يخرج ورقة وقلم.. يتتبع سطور الكتابة بالقلم) في يوم الخميس من شهر الثورة الاول.. اتلقيت سبعطاشر مليون دولار...الكلام دة صحيح ولا غير صحيح.. عمك تنقو: لو صحيح ويني القروش.. جيبو لي الدولارات دي... الرجل: في يوم الثلاثاء اتحرشت بالكديسة البريئة الأولى.. عمك تنقو: في ياتو مكان ولاقتني وين وبتعرفني من وين.. يا جماعة اتقوا الله ... الرجل: أمممممم.. وفي يوم الاحد سرقت دهب الكديسة البريئة الثانية؟ عمك تنقو: لاقتني وين وشافتني وين وبتعرفني من وين ولو سرقتو وينو الدهب بعتو ولا لبستو ولا هو وين... الرجل: في يوم الثورة الاربعطاشر...شكلت خلية لثورة مضادة... صاح ولا ما صاح... عمك تنقو: طيب ويني الخلية.. في زول بعمل خلية من نفسو بس... الرجل: اغتصبت الكديسة متين ووين ... عمك تنقو: (يصيح) كلو كذب كذب كذب (الكدايس الخمسة يجهشن بالبكاء) الرجل: يعني كدايسنا العفيفات البريئات ديل كضابات...(ينظر للأفيال) بيقول كضابات... الأفيال الخمسة: (يضربون ويصفعون عمك تنقو)... أردم .. أردم .. أردم ... الكديسات الخمس: يا متحرش ... يا متحرش ... يا متحرش... الجرقاسات: هو هو هو ... هو هو هو ... هو هو هو ... الرجل: عمك تنقو ... اخير ليك تعترف.. الانكار ما حيفيدك... عمك تنقو: كذابين.. ما عندكم ادلة... الرجل: الشعب كلو حسي متأكد انك فاسد وانك متحرش ومغتصب وعميل... ونحن الشعب معانا ... انت معاك منو.... الجميع: نحن الشعب.. نحن الشعب .. نحن الشعب ... الرجل: (يرفع يده).. حرية .. حرية ... حرية ... الجميع: حرية ... حرية ... حرية... عمك تنقو: انتو بتغشو الشعب وبتشتروا الماعندهم ذمة ... الرجل:(يشير للأفيال).. سكتوا العميل دة... (ينزل الأفيال في عمك تنقو ركلا وصفها فيصيح ويبكي ثم يتركونه)... عمك تنقو: برضو ما عندكم دليل... حتحاكموني من غير ادلة.. بي مجرد اكاذيب وشكوك... الرجل: ايوة.. اذا الشعب قال نحاكمك حنحاكمك... الجميع: عميل ... عميل ... عميل .. متحرش .. متحرش .. متحرش... عمك تنقو: حتحاكموني بي ياتو قانون... الرجل: بي قانون الشكوك والاتهامات... عمك تنقو: مافي قانون بالشكل دة... الرجل: (بدهشة) مافي قانون... كيف الكلام دة...؟!!! (يرفع الزعيم رقم صفر أصابع يديه فينحني الرجل على أذن الزعيم ثم يعتدل)... الرجل: أعلنا نحن رئاسة الحلة السيادية تقديم مقترح بقانون الشك والاتهام للبرلمان .. وسوف يجتمع البرلمان لمناقشة القانون واجازته... عمك تنقو: وين البرلمان؟ الرجل: (يترك مكانه ويتجه الى نقطة ابعد ثم يواجه عمك تنقو) نحن البرلمان... نحن اربعة وستين في المائة من نسبة البرلمان... وكلنا اجزنا القانون... عمك تنقو: كيف تكون انت الشرطة والنيابة والبرلمان... الرجل: بطل غلبة (يشير الى الأفيال) (ينزل الأفيال ضربا وركلا وصفعا في عمك تنقو الذي يبكي ثم يتركونه) عمك تنقو: وباقي البرلمان وين الستة وتلتين الباقين وين .. شوفوهم احتمال ينصفوني؟ الرجل: (يتحرك الى مكان اخر ويقول) نحن من تم تعييننا بالبرلمان كمعارضين للأغلبية... عمك تنقو: (يضع كفيه على صلعته) بس كيف الكلام دة... انتو الاغلبية وانتو البتعينو الاقلية المعارضة وانتو الاتهام ...وانتو البتختو القانون... أنا عايز امشي المحكمة... عايز القاضي ينصفني... الرجل:(يتحرك الى مكان مختلف) نحن القضاة ... تم تعييننا قضاة في المحكمة ... وستتم محاكمتك علنا امام الشعب... وستكون محاكمة عادلة جدا... عمك تنقو: (بغضب وحرقة) بس كيف الكلام دة... انتو البتتهمو وانتو البتختو القانون وانتو القضاة البتحاكمو ... يا جماعة دي ما عدالة .. دي ما عدالة ..دي ما عدااااالة (يجلس على الأرض ويغطي وجهه بساعديه ويبكي)... الرجل: (يخرج ورقة طويلة جدا .. يفردها ويقرأ منها)... بعد محاكمة عادلة ... استمرت لعشر دقائق متواصلة... توصلت المحكمة الى الحقائق التالية: تم الاشتباه في تخابر المتهم المدعو عمك تنقو بجهات أجنبية... وتم الاشتباه في أنه تلقى سبعطاشر مليون دولار من جهة أجنبية .. وأنه تحرش واغتصب وصفع الكدايس البريئة... وعليه... ووفقا لما سبق.. فقد أصدرنا الحكم الآتي نصه: يعاقب المدان عمك تنقو بالعقوبات التالية: - عمل وي وي له .. عمك تنقو: (يصرخ) لا لا ... إلا الوي وي ... الوي وي ... لا ... يهتف الجميع: وي وي وي ... وي وي وي ... وي وي وي ... الرجل: ثانيا: يعاقب عمك تنقو بالاعدام بالخازوق... عمك تنقو: (يصرخ) لا لا ... خازوق لا ... الا الخازوق ... اقتلوني بالرصاص ... اشنقوني ..لكن خازوق لا ... الرجل: هذا وقد صدر حكمنا هذا في الساعة واليوم والشهر والسنة ... (يتحرك الرجل الى نقطة أخرى ويصيح) محححححححح... كمة... (يقود الجميع عمك تنقو الى كواليس المسرح وهم يهتفون) حرية... حرية ... حرية ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أمل الكردفاني
فيس بوك
تويتر
انستقرام
يوتيوب
بنتيريست