– الرياض 25 نُوفمبر 2018م قالُو وقالُو.. ينجِينَا الله شَرْ قُلْنَا وقالُو... في حِلِّي ساكْنَاتَنَّها الحيوانات والطيور الأليفة... بقَر، جُمَال، نِعاج، حمير، ماعز، كَدَسَة، كلاب، دجاج، دَبَاس، قِمْرِي، حِمِّير، قِينْقَرَد، كُعْلِجِّي، لا ود أبرَك وعشُوشة وطيور الجني في... والحياة الإجتماعية بيناتُن سمْنَة على عسل... متطايبيييين ومتزاورين في الله وفي الجيرة والرحمية القارناهُن من لا ورا... يعني عادي تلقاهُن في مناسبة طهُورة عتُود وعناق للمعزايي القَرعِي... ولَّة في خطوبة حمل وحمِيلِي للنعجِي المَلْحِي... ولَّة تلقاهُن في مُناسبة زواج غير متكافِيء (وفيهُو زمزغة) بين ود ابرَك ودباسة ليها غرغُور، مارقِي من قصَّة حُب وشاكُوش من ضَكَر حمام خانَها بعد خطوبة سنتييييييين!!! المُهم الحياة ماشي حلوة كدة بيناتُن... عندهم جارتُن في طرَف الحِلِّي أبُوها مات... الجارَة دي كُرَاعَة طويييييييييلي ولوَّامَة... مافي بيت من بيوت الحِلِّي دي إلا ودخَلتُو... وبالليل كمان!!! أها قالُو يمشُوا يعزُّوها في أبُوها دا باقي داخل عليها بالحيييييييل... عمنا الدِيكْ حلف بالتَدَخِّلُو الكنِيسَة ما يمشي العزاء دا... قامُوا فيهُو وُجَهاء البلَد... سوُّوهُو زي الواطة دي... المُوت مافيهُو شماتَة... والمُوت حق وواجب... والعزاء فيهُو اوجَب... وكُلَّنا لها... وإن بقَى عندك شي في نفسك من لا ورا، دحين أنساهُو... وان شاء الله الإمور تصفى من هِنِي وغادي... المُهِم اتحاوطُوهُو كلام كُبار كُبار كدي لامِن أقنعُوهُو... واجتمعت كل الحيوانات مَلَن التُكْتُك وعليك يا بيت بخِيتِي الصَبَرَة (الثعلب)!! أها هناك حلَقَة البكاء دوَّرت... البقرة تجي تاكِي رويسها كدي وتقالد وتقُول امْبُووووووح والله مُوت أبُوكي دا "يا بخيتي" كيف دخل علينا ومسَّخ علينا حياة الدنيي دي... وتجيها بي جاي المعزايي (مييييييييييغ) والله خبر السواد واللَّوَاد الوقع فوقنا زي الصاقعي... اتصبَّري آ اخيتي... ويجِي دُور النَعَجِي.. (بااااااااع)، فانيي الدُنيا ما دامت لي غيرُو... الله يبارك في وليداتُو ويخليهُن ليكي... الحيوانات ديل كلَّهِن جَنْ قالدَن وعزَّنْ... صاحبنا الدِّيك قاعِد بعييييييييد مراقِب الموقف وملاااااوِز من هجُوم مُباغِت يجيهُو من جاي ولَّة جاي... وأبَى تَبْ يهوِّب ناحية الصَبَرة... وهي تعاااااااااايِنْلُّو بي قعَر عينها... وعشان تطمِّنُو يقرِّب عليها ويعِد الحالة واحدي، فجَّت البُكَّايْ ديل كدي ومشَت عليهُو... وقالت ليهُو: *تعال قرِّب قرييييب.. النَبْكِي الحبيب*... قام الديك قال ليها: *خَلِّينِي بعييييد.. وانا مُوجُوعْ شديد*... قامت قالت ليهُو... *تعال قرِّب تعال.. النَبْكِي البلاَّل*... الدِيكْ قال ليها: *أبوكي أب ضَنباً طُوال.. حليلُو سيد الرجال*... قَشَطَت فيهُو إبتسامة رقيييييييقة مع غمزَة وجنَة، بعدها المسكين إطمأنَّ تَبْ.. وهي رجعت تطايِب في بُكَّايَا... وساعت الشمِس خلاص انتكَت، جاتها المِعزَانِي تِتْعَذَّر، والله يا خالتي الصَبَرة مفروض الليلي نبيِّت معاكي ونعصِر فُراشك دا لي سِبُوعُو... لكن عندِي عَنَابْلِيكاً (جمع عنْبَلُوكْ) مشن قبيل الرعِيِّي وكُشَر البيت معاي... وأبُوهُم في الجزيري ماب يرجع إلا بعد العِشِي... بعد شويِّي جاتَهَا النَعَجِي واعتذرتلها بطريقة لطيفة، إنُّو عندها حملاناً صُغار ماشي ترضِّعُن، وكمان خايْفِي عليهُن من الضِيبْ... دَحِينْ تدِّينَا الخاطِر... المُهم كل الحيوانات جات تِعتذِر وتودِّع... في الآخر صاحبنا الديك جاها بي علعُولُو الأحمَر المَتْكِي شِمَال وريشُو السمح المورَّد داك... يتْعَذَّر مع شويَّة تكسير تلِج كدي من نُوعية: والله يا خالتِي الصَبَرة، مُوت ابوكي دا... داااااااخل علينا... الليلي الجَدَادْ عندنا في البيت شِدَّة مُو حزنان علي أبُوك دا أصبح (كاااااااطْ) أبى يرمِي تبْ... وهُو يحكي كدي وهِي تعااااااايِنْلُو وخِشِيمَها يِتْمَطَّق... أها يا خالتي بخِيتِي أنا والله إعتذر مِنِّك، عشان عندنا سواسيواً كدي نمشي ندخِّلِن في أقفاصِن خايفين عليهِن من السِرْوُوجِي!!!! وكمَان قاعْ أنُوم بدري عشَان أذَّان صلاة الصُبُح وكدي... بس قَبُل يكَمِّل كلامُو دا وكَفْ قبضتُو من رقَبْتُو... قالتْلُو آيابة كان عَذَرْنَاكْ انت صدَقة أبوي دي بُكْرَة نضبحْلَها شنوو؟؟؟!!! . . . هذا المقال كما علمتُم بدون عنوان... يلَّة شِنُو؟؟ كل واحد يرَكِّبْلُو عُود طُورِيْةً يناسبُو... . . . شِن فايْدَة المقَوِّي اللَبَقَة وحُوضْ الراس حقُّو مبْعُوووووج... *# مجاهد _ عبد الرحيم _ ود الزُومة*... ثُمَّ، إهداء خاص للحبيب الغُوث فتح العليم الكَرَشَابِي وشباب الكَرَوَان قُرشي الحجير الأماجِدْ💝...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال أحمد الحسن
فيس بوك
تويتر
انستقرام
يوتيوب
بنتيريست