في دولة المفروض تقوم على القانون والكفاءة، بقت التعيينات العليا شغل “بركة” و”رضا مشايخ” آخر الإنتاج الرسمي: سعادة السفير “خلا”، زول لا بيعرف لغة، لا فاهم سياسة، لكن داخل السلك الدبلوماسي من الباب الكبير… باب البَخَرة اختياره ما كان صدفة، ولا غلطة إدارية. ده نتاج طبيعي لدولة قررت تستبدل المؤسسات بالمشايخ، والخبرة بالمحاية، والدستور بالحجاب. أبوه الفكي الكبير حلال العهقد بقى أهم من وزارة كاملة، لأنو ببساطة: المسؤول ما بيثبت في الكرسي إلا بعد ما يمر عليه. اللغة؟ ترف للنخب سعادة السفير شايف إنو اللغة موضوع نخبوي فارغ. الإنجليزي في نظره مؤامرة استعمارية، والعربي حكاية سايبة ما محتاجة إعراب الزول ده مقتنع إنو العلاقات الدولية ما بتمشي بالخطابات والاتفاقيات، بتمشي بـ“نية صافية” وبَخَرة “تقيلة” ولما سمع إنو في خطاب رسمي لتقديم أوراق الاعتماد، انفجر وقالليهم ما تخافوا أنا أمثل دولة ما أمثل نفسي… الدولة دي ما عندها زول يقرأ ليها خطاب؟ وهنا السؤال الحقيقي إذا الدولة ما عندها زول يقرأ خطاب… عندها شنو أصلاً؟ شلليات ومحسوبيات ودفعات دارسة واخيرا كمان عضويات حركات مسلحة بس لازم تكون كنت لاجيء في الغرب الدبلوماسية كامتداد للجهل الرسمي السفير خلا ا حالة عجيبة جدا ما حالة فردية، ده نموذج. نموذج دولة بترسل جهلها للخارج في شنطة دبلوماسية مختومة. بدل ما نصدر رؤية سياسية، بنصدر خرافة. بدل ما نفاوض بالعقل، بنفاوض بالخوف والتمائم في الاجتماعات الدولية، بينما الدول بتتكلم عن المصالح، الاقتصاد، الحرب والسلام، سعادة السفير قاعد واثق إنو عقدة واحدة “مجرّبة” ممكن تربك كل ده. النتيجة؟ عزلة، سخرية مكتومة، ودولة بتفقد احترامها نقطة نقطة. المشكلة ما في “خلا”… المشكلة في النظام الزول ده ما طلع من فراغ. ده نتاج نظام سياسي كسلان، خاف من الكفاءة، وحارب المعرفة، وفضّل الولاء على العقل. نظام شايف إنو السفارة غنيمة، مش واجهة دولة طالما التعيين قائم على أبوك منو؟ وبتعرف الشيخ الفلاني؟ وبَخَرتك تقيلة ولا خفيفة؟ حتفضل الدولة تمشي لقدّام بالعكس، وتتكلم باسمها ألسنة ما قادرة تنطق، وتُمثَّل بوجوه ما فاهمة شنو يعني تمثيل الناس اهل والشيخ امر والخلافة للبركة فلان ود فلان الحقيقة المؤلمة جدا أنو الحارس الشخصي المعيين من جهاز الامن والمخابرات خريج جامعة وبيتكلم لغات كمان دي ما فضيحة سفير دي فضيحة دولة سلّمت السياسة للخرافة وللشلة الكاربة وللبندقية الماجورة والدبلوماسية للجهل، والمستقبل للبَخَرة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست