كتب الكاتب الفاتح جبرا المتوفرة بمعرض الدوحة
|
Re: حيدر المكاشفي:مبنى فندق أراك..اللغز المحي� (Re: محمد عبد السلام)
|
تحياتي اخانا م. ع. السلام
هي لعنة
نعم لعنة بكل محتوى ومعنى المفردة
نحن ومجايلونا عاصرنا وشهدنا قيام المبنى الذي استحال لاحقا وسمي ب فندق أراك كان موقعه الأول المكون من مبان عتيقة وكلها محلات تجارية - دكاكين-صغيرة المساحة يقع مباشرة غرب مدرستنا العظيمة والاولى في تاريخ تعليم السودان، مدرسة الخرطوم شرق الأولية والتي انتقلت من مكانها الأول الأصيل جنوب كبري المسلمية وجنوب خط السكة الحديد، في المكان الذي كانت تشغله رئاسة المطافئ كما كانت تسمى والي جنبها ادارة الغابات وقريب منها جامع شروتي، وهي المدرسة التي جاء واسسها رفاعة الطهطاوي في فترة الحكم الخديوي، وتم نقلها الي مكانها ذاك، شمال غرب ميدان ابو جنزير، ثم لاحقا تم هدمها بمعاول المتأسلمين أعداء الأصالة والتاريخ والمعرفة والانسانية ليقيموا في موضعها ما بات يعرف ب برج البركة
قام فندق أراك وكان يمثل أيقونة معمارية في وسط الخرطوم ويشكل الحد الفاصل بين السوقين العربي والافرنجي
وكان محط اهتمام ونظر كل القادمين إلى عاصمتنا حين كانت عاصمة بالفعل
وقعت الواقعة في ثمانينات القرن الماضي وهي مثل ما هو مذكور ومعروف حكاية وقصة مقتل تاجر العملة
واتهم فيها اخ اصدقائنا في مدينة ود مدني وتمت ادانته والحكم باعدامه
نادر يونس
ابن شيخ التعليم الوقور والمحترم شيخ يونس كما يعرف في ود مدني وشقيق الأصدقاء الاحباء عبد السلام ومامون وأمير واخواتهم الكريمات
نادر الإنسان الوديع الذي أجزم بأنه لا يقدر على أن يقتل نملة اتهموه بجريمة قتل انسان وتم اعمامه
لذلك قلت لك في بداية حديثي انها اللعنة
لعنة حلت بالمكان وربما بالزمان
| |
|
|
|
|
|
|
Re: حيدر المكاشفي:مبنى فندق أراك..اللغز المحي� (Re: محمد أبوجودة)
|
حياك الخالق يا أبا الجودة والاجادة حبينا محمد
قاتل الله نوستالجيتنا المريرة القدر ما نقول نتفك منها نلقاها متجبصة فينا كما اسمائنا
تجي ماش يا محمد وانت تتابط اشتهاءك ل كورة ايسكريم ابيض من غير سوء من لدن حلواني حمدتو، وتولي قلبك شطر الجامع الكبير ب لونه البني الوقور
لغاية ما تصل نواحي ال أراك فتراه عصي الزرقة شيمته الصبر والجبر
وما ان توافيق تشنف مسامعك أنغام منصفونية بطعم ذلك الزمان
شي حمد الريح وشي بلابل بشير عباس، كانو يا دااااب طالعين في كفر الوتر والنعم ولو ساعدك الحظ كمان، يمكن تصادف ليك شلال مزيكا يكون الود اب شارلستون القاعد في محل منصور منصفون تعطف بيها وخت ليه أسطوانة ل ايزاك هيز او ال تمبتيشنز او خالنا السمين الثمين باري وايت اليوم داك امك بتكون داعية ليك
الخرطوم كانت عاصمة الروح
وعود على بدء لغز الاراك
شي محير فعلا انه يظل متشبث ب غموضه وسحره المخيف من لحظة ألم الحادث الممعن في الألم والاسى لغاية اللحظة
الغريبة انه بنو كوز الما خلو شبر علي يابسة أرض السودان والا خمشوه واغتنو واكتنزو منه ما شاء لهم التحكم والقلع واللهط واللغف، انهم ما استغلو أراك لحاجة في جيوبهم الصدئة
عشان كدا انا مسميها لعنة أراك
لا أراك الله عزيزنا محمد لعنة انت واخانا محمد عبد السلام
ولكما كل ما في التحية من عطر
| |
|
|
|
|
|
|
Re: حيدر المكاشفي:مبنى فندق أراك..اللغز المحي� (Re: Biraima M Adam)
|
Quote: القصر الجمهوري الجابه شنو لفندق آراك ؟؟ |
يعنى لازم يكونوا الهيتة بالهيتــة يا باشمهندس بريمـة؟ تقطع شارع البلدية وشارع الجمهورية بس.. شارع الجامعة هو مدخل القصـر الجمهورى. وشكرا يا أباذر.. فقد أثرت أشجاناً.. بعد عودتى من أمريكا عام 1980عملت فى فندق أراك.. فى وظيفة Front office cashier مكتب الإستقبال على الجانب اليمين من المدخل.. وأول ما تتخطى البوابة الكافتيريا على يدك الشمال لكن بابها بعد تدخل المبنى. كان العشاق والحبايب يزوروا الكاف ويتناولوا الاسكريم والحاجات الظريفة.. مرة نزل فى الفندق فريق كورة سوفييتى وفى نفس الوقت كانوا نزلاء أمريكان برضو.. جاء واحد من الفريق الروسى وبدون ما يستأذن وضع شعار الإتحاد السوفييتى على أعلى يسار البدلة بتاعتى.. مع الجيب.. وثبتهتا بدبوس منها وفيها.. بعد فترة قصيرة جاء أمريكى وتفحصها بيده.. وأنا لا أفهم شيئا.. قلت ليه عندى واحدة من امريكا برضو وغيرتها بشعار I Love NY كنت جايبه معاى، نفس الحجم ونفس الدبوس.. المسجل الذى يذيع الموسيقى كان بالقرب من الإستقبال.. يوم أديتهم شريط كاست فيه السيمفونية الخامسـة لبيتهوفن، بس بعد اشتغل ب 10 دقائق المدير الألمانى جاء نازل وسأل ناس التسجيلات، وبعدها جاء وسألنى هل ممكن يأخذ الشريط ينسخه.. قلت ليه جدا تفضل.. مشى نسخه لكنه رجع لى النسخة واحتفظ باللى اديته ليه.. طبعا الإتنين نسخ لكن الأول نسخته من الشريط الأصلى وكان التسجيل ممتاز. المديـر كان المانى ونائبه بريطانى.. لحسن الحظ لم أحضر الحادث المحزن ولكن مثل كل الناس قرأت القصـة. مرة الزول المفروض يمسك منى الوردية تأخر، وأنا مافى طريقة لازم اواصل.. الناس يعملو شيك إن وشيك أوت بدون مواعيد.. لغاية قريب من العشاء وجاء نائب المدير البريطانى قال وين فلان.. قلت ليه ما جاء اصلا وانا مضطر اواصل .. بس مشى للكفتيريا قال ليهم ترسلوا عشاء vip لمحمد. بعد شوية اشوف ليك السفرجى شايل صينية بكل ما لذ وطاب.. ختاها وقال لى انت برضو توقع (على الشيك).. قلت ليه ادينى ليه.. ادانى الشيك بالملبغ ووقعته ليه.. قلت ليه الوجاهات دا ليوم الليلة بس. واللاى ذكريات ما ليها نهاية وكلها جميلة. شكرا تانى اباذر أتمنى أن تحسم الورثـة خلافاتهم ويعود هذا الصرح التأريخى مثلما كان وأجمل.
| |
|
|
|
|
|
|
|