الذكرى السابعة لثورة ديسمبر المجيدة ديسمبر وجع الحقيقة في خاصرة الكيزان الكيزان ما بيكرهو ديسمبر عشان هي ثورة بيكرهوها عشان هي الحقيقة البتفضحهم كل يوم. ديسمبر ما كانت هبة ساكت كانت محكمة شعبية مفتوحة عرت مشروعهم قدام العيون الواسعة والعقول الفاهمة. الكيزان ديل ديل ناس اتغذوا على الخداع وعاشوا على القمع وكبروا على بيع الوهم باسم الدين. لمن الشعب فاق طلعوا يقولوا (الديمقراطية فوضى) وهم أول ناس دمروا الديمقراطية. ديسمبر كانت لحظة إهانة سياسية ليهم لحظة فقدوا فيها امتياز (القداسة المزيفة) اتكسرت الهالة واتفضح المستور وبقوا مجرد تنظيم بائس بدون بوصلة أخلاقية. والآن بيحاولوا يرجعوا ..؟ يرجعوا كيف ..؟ بأي وجه ..؟ وبأي تاريخ ..؟ الشعب البطلع مرة ما برجع زي أول والوعي البيتصنع ما بنتشال والذاكرة الجمعية ما بتغش. ديسمبر محفورة في الصدور ومعلقة في الضمائر وفي ضفائر الحرائر وفي ذاكرة الثوار ومربوطة بمستقبل البلد الكيزان ممكن يتحركوا ويهللوا ويكبروا ويصرخوا لكن الحقيقة بتلاحقهم زي ظلهم. وديسمبر باقية رغماً عنهم.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست