*الكنكشة في المناصب الزائلة لا محالة يعتبر من (أولويات) الإنتهازيين .. *أما التعفف والزهد والترفع وإعطاء الأمانة حقها كاملاً فهو فمن شيم الحريصين والخائفين من حساب يوم الدين .. *وما أدراك ما يوم الدين .. *يوم لا تملك نفس لنفس شيئا والأمر يومئذ لله .. *مافي حاجة يا جبريل إسمها انا عفيت لود اخوي رسوم جمارك عربيته وشلت من حق الشعب السوداني تمن الإعفاء عشان اللي سبقوني عملوا كدا !!.. *ولا تزر وازرة وزر أخرى .. *ومافي حاجة إسمها أنا قطعت من لحم الشعب السوداني عشان خاطر دفع مستحقات (ناسي) وناس الحركات (الجحمانة) الأخرى !!.. *مافي (درقة) إسمها البرهان تقيف وراها وتعمل اللي عاوزه !!.. *مافي أي تحريض لناسك ونحن عاوزين نحكم كل السودان وعمارات دي عاوزنها كدا وما عارف شنو !!.. *مافي أي كاني ماني !!.. *لكن .. *بعد كل هذه (المافي) .. *هل نتوقع من جبرين عصره أن يستحي ويدينا عرض اكتافه باختياره؟!.. *لن يفعل ذلك لأنه أعلن على رؤوس الأشهاد بأن لديهم (مشروعاً) محدداً لابد من إنجازه !!.. *الإستمرار في هذا النوع من العمل المدمر لبلد يعيش أسوأ وأخطر مرحلة في تأريخه الحديث لن يجد الإهتمام الكافي و(الحسم) اللازم مادام البرهان (عاوز كدا) !!.. *حكم طاغوتي فاشل .. وتدهور معيشي وأمني وتعليمي وصحي لم يحدث له مثيل .. وتجاوزات تزكم الأنوف .. وإخفاقات مزلزلة .. ووضع كارثي في شتى المرافق الخدمية .. *إضافة إلي أن (جبرين) شغال سلق بيض و(سلفقة) شمال ويمين !!.. *فى اليابان (بلد الكفار) عندما يحس المسؤول - أي مسؤول - بالخجل و(العار) لأنه ارتكب (غلطاً) أو تجاوزاً ما ربما يفكر أولاً في الإنتحار !!.. *لكن جبرين لا ولن يحس بأي خجل أو عار لأنه يرتكب المزيد من الموبقات (المدغلبة) كلما صفعنا بموبقة (صغيرة) لأنه يريد حكم كل السودان !!.. *موش هو قال كدا ؟!.. *خلاص لا احساس ولا عار ولا (يخجلون) !!.. *ولا ينتحرون !!.. *هذا (العبقري) لا يفكر أبداً في نظرية (المخارجة) بعد كل اللي عملوا و(طبقوا) في أهل السودان .. *لكن ساعة الخلاص آتية لا ريب فيها .. *و *الله في ..
عناوين الاخبار بسودانيزاونلاينSudaneseOnline اليوم الموافق September, 19 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة