|
Re: إبداعات موسيقية واعدة من جيل الثورة الرا� (Re: ترهاقا)
|
Quote: أولاً، اللحن دائري لا جديد فيه.
ثانيًا، كلمات الأغنية حزينة ولكن إيقاعها راقص. غريب أن يرقص الفنان ويبتسم وهو يغني ويصدر الكورس صيحات التعبير عن الفرح في مثل هذه الكلمات الحزينة في أغنية مصوَّرة. |
حبيبنا الاديب الاريب الاستاذ محمد صديق أخبارك؟، تعرف ذكرتني في بداية التحاقي بنادي الفنانين مشيت مع المرحوم احمد المصطفي في حفلة في كلية الطب، حفلة عاملنها معجبي أحمد المصطفى ، بدأ الحفل بأغنية سفري السبب لي أزاي وتعال شوف الجماعة هاك يا رقيص قام المرحوم وقف الغناء وأداهم درس ما حينسوهو، بالتأكيد الشباب دييل دايرين شوية خبرة ، ولكن المحمدة في غناهم الخاص وكمان الاهتمام بالتورزيع وجودة الهندسة الصوتية وأتفق معاك فعلا اللحن دائري لكن نقول شنو؟ العافية درجات . ولك الود
| |
|
|
|
|
|
|
Re: إبداعات موسيقية واعدة من جيل الثورة الرا� (Re: ترهاقا)
|
استاذنا الموسيقارالكبير ترهاقا لا يفتى وترهاقا في اي عمل موسيقى استمعت لكل الاعمال المصاحبة... الامتاع انها خاصة ومبتكرة العمل الاول" اهل العمار" حقيقة العمل رغم بساطته و"سرعته" فيهو ذكاء موسيقى لان المقطع: "اهل العمار... البدقو الطار.....البقيمو الليل .. قلبوهو نهار" حييي دا مديح. والشباب اذا اعتمدوا على ايقاع الدقلاشي او المخبوت والنوبة دون تغيير انو يكون سريع وخفيف كان طلع العمل مشابه لكثير من المسموع لكن هنا ايقاع سريع واداء متوازن وفيهو متعة
| |
|
|
|
|
|
|
Re: إبداعات موسيقية واعدة من جيل الثورة الرا� (Re: Ahmed Yassin)
|
اخونا الكريم استاذ ساطور كما يحلو لوردي أن يناديك يازول سلامات يا فنان. نحنا العجايز ديل لسع معشرقة لينا حلاوة القديم في حلقنا. لسع لمان نسمع مقدمة الأغنية الفارهة الحزن القديم بنقعد نبكي. تخيل بلد ينتج زي دي مقدمات موسيقية وما يقدر يطلع ليه وزير مالية زي باقي وزراء العالم. اكيد يوم من الأيام التأريخ حيذكر مجهود وردي في داك العمل الخالد . والله نحنا دايرنك انت زاتك تجي يوم وتعزف للأمة في قاعة الصداقة. لو جيت وسويت دا الشغل صدقني السودان كلو حيقيفليك على شباباتو ويصفق ليك . تحياتي
| |
|
|
|
|
|
|
Re: إبداعات موسيقية واعدة من جيل الثورة الرا� (Re: Ahmed Yassin)
|
المريود: انصاف فتحي جراري ضمن ايقاعات الحنجرة الاشتهرت بيهو مناطق غرب السودان..المنطقة الثرية المتنوعة الهسيس / الكرير / الحومبى/ الجرارى شاعر وملحن اغنية"المريود" اسمه سليمان عطية وبحكي فيها عن تفاصيل واحداث حقيقية وقت اتقدم لخطبة حرمه وام اولاده السيدة الفاضلة"امتثال" العمل خاص جميل وانصاف بصوتها الصافي والهادىء قدرت تطاوع الايقاع وتتفرد في الاداء الصوتي في نقطة اثناء استماع اي شخص ل" المريود " حيتذكر اغنية"اندريا" لنانسي عجاج
| |
|
|
|
|
|
|
Re: إبداعات موسيقية واعدة من جيل الثورة الرا� (Re: tabaldy)
|
Quote: لسع لمان نسمع مقدمة الأغنية الفارهة الحزن القديم بنقعد نبكي. تخيل بلد ينتج زي دي مقدمات موسيقية وما يقدر يطلع ليه وزير مالية زي باقي وزراء العالم. |
أديبنا الحبيب عثمان إنت كدة شجعتني أعمل موسيقى الحزن القديم ، على الاقل حتى ولو المقدمة أما المرحلة التي نمر بها الآن يا استاذي في السودان فإنشاء الله حتكون سحابة صيف وحتعدي . بس الحاجة الكويسة إنو كل البيض الفاسد بقى في سلة واحدة يعني حيتقشوا بضربة واحدة ولك الود
| |
|
|
|
|
|
|
Re: إبداعات موسيقية واعدة من جيل الثورة الرا� (Re: wedzayneb)
|
Quote: لبنت السودانية الجميلة: وئام رضوان دي صوتها فلتة. و أكاد أجزم أنها لو وجدت الرعاية الفنية الكافية لأصبحت فنانة من الدرجة الأولى هنا في أمريكا. |
حبيبنا ود زينب ، اخبارك حقيقة لم احظى بالاستماع إلى الفنانة وئام ، وطالما ما ده رأيك فيها اكيد بتكون في المستوى وبتغني أغانيها الخاصة ولك الود
| |
|
|
|
|
|
|
Re: إبداعات موسيقية واعدة من جيل الثورة الرا� (Re: ترهاقا)
|
تحياتي موسيقارنا السمح وكل المحبة
اكتر شي بغيظني ويكرهني الغناء هو التقليد
ياخ ببساطة كدا بس انا او اي زول عنده ذرة تذوق، شنو البخليني اسمع نسخة مقلدة وشنو الداعي لي كدا طالما اني ممكن بسهولة اسمعها عند صاحبها الأصلي؟
شي بليد وكعب والله
الشماعة الماسكين فيها النقاد وغيرهم هي انهم يقولو ليك
لا اي مغني مبتدئ لازم او حتميا يبدأ باغاني غيره ويسدد أعمال مطربين تانين
مافي اي منطق في الكلام دا من اي ناحية
طالما انت فعلا زول بتعرف وتقدر وعندك امكانات تغني يعني صوتك جميل وممكن يطرب وزمنك وايقاعك الداخلي وحسك الفني موجود ومتوفر يبقى شنو المانع، ومن البداية، انك تعمل ليك أغنيات حقتك ويغنيها؟
دا كوم، والكوم الاكعب كمان هو انه المدعين المالين البلد الان زي شجر المكسيت ديل
عادي جدا يغنو اغنيات ومجهودات وتعب غيرهم في الحفلات
وياخدو عليها قروش كمان
بالله في مرض واذى اكتر من كدا؟ معليش ياخ بعتذر والله عشان الكلام الكعب دا
لكن كلو من المغسة والله
واجدد التحية والتقدير والمحبة ليك
| |
|
|
|
|
|
|
Re: إبداعات موسيقية واعدة من جيل الثورة الرا� (Re: أبوذر بابكر)
|
تحياتي مرة تانية الاستاذ ابوذر بابكر
Quote: ياخ ببساطة كدا بس انا او اي زول عنده ذرة تذوق، شنو البخليني اسمع نسخة مقلدة وشنو الداعي لي كدا طالما اني ممكن بسهولة اسمعها عند صاحبها الأصلي؟
شي بليد وكعب والله
|
نفسك حااارــ وشايت ضفاري
ما من طبع ردودك
Quote: معليش ياخ بعتذر والله عشان الكلام الكعب دا
|
تفلق وتداوي
هبشني طرف السوط
تحياتي
| |
|
|
|
|
|
|
|