ربما سمعتم بحادث مقتل مواطن بسبب اطفائه كشافات دفار كان سائقه قد هبط منه في مهمة سريعة قبل ان يعود اليه فيجد صاحبنا قد أطفأ انوار العربة لانها قال (جهرته) فما كان من السائق الا ان اخرج طبنجته واطلق عليه رصاصة اردته قتيلا
وحكي لي احدهم ان سائق الحافلة سمح لحافلة اخري بالدخول امامه في شارع الظلط فقام الاخير بالوقوف تماما امام الحافلة الاولي لكي ينزل بعض الركاب فاغتاظ الاول وذهب للسائق وانزله ثم اخذ بتلابيبه وقال له: "انا عشان سمحت ليك تخش تقوم تقيف قدامي" الرجل لم يقاوم وانما كتم غيظه واخذ ينظر للرجل مليا واقتنع الاول وفكه وذهب بعد قليل حصله الآخر ووقف له مجددا امام عربته من يساره باتجاه السائق وقال له بتحدٍ وبصوت عالي "والله يا .... انت الليلة طلعت محظوظ لو كان جبتا معاي طبنجتي كان هسا تكون مجدوع جنب الظلط وراسك يشر دم تقبقبني انا يا ....."
انا شخصيا ركبت الحافلة مع احدهم اصلا كنا نزلنا من حافلة وركبنا حافلة تانية لان الاول طالب بي 100 جنيه زيادة فعشان جات مناسبة الطمع والجشع قال لي انه قبل قليل كان عايز يفطر طلب واحد فول واعطي بتاع الفول سبعمية جنيه قال لي الزول كبّا لي الفول في صحن شطة قلت ليو ليه ده بفطّر ليهو زول ده شافع بِحبَا ما بعمليه حاجة شيل فولك ده قال قالي ما بِرجع لانو اتكب فيهو الملح قال قلت ليو: اتكب فيهو الملح؟؟؟ يازول انت داير تموت ولا شنو وختيت يدي في جيبي (يعني محل المسدس) قال طوالي رجع لي قروشي والله لو كان اتاخر ربع دقيقة كان رصصتو
في الحلة عندنا هذه الايام ظاهرة غريبة طبعا في ليلة راس السنة لما تجي الساعة 12 بالضبط بتسمع صوت الالعاب النارية وبتستمر لي ساعة او ساعتين ده بقي حاصل يومي عندنا من الساعة 1 -3 صباحا كل مرة تسمع طاااخ ..طرااخ طاااخ ..طرااخ هي عبارة عن طلقات تحذيرية للحرامية الذين يحاولون السطو علي المنازل
اغرب حاجة وانا طالع من البيت سمعت اولاد اتنين بتكلمو يكونو تقريبا بقروا في سادس او سابع واحد قال للتاني: "لو لقيت المسدس ... الصِغيّر ده.. ستة ملي" !!
الكلام ده ذكرني افلام الكاوبوي ال كنا بنحضرها في السينما في بداية التمانينات ونحن اطفال بتذكر حتي الآن البطل بود سبنسر (ترنتي) الكاوبويات طبعا كانو بمتازو بالدقة والسرعة الشديدة في استخدام المسدسات اتذكر منظر بعضهم وهم يقامرون بلعب الكوتشينة وربما اراد احدهم ان يغش فيأتي بكرت من عنده ليدخله في اللعب لكن بحصل انو اول ما يبدأ يطلع الكرت من جيبه يعني لسة يكون طلع ربع الكرت تأت طلقة من الجهة المقابلة تصيب الكرت فقط وترميه بعيدا طبعا ده كلو بحصل تحت الطربيزة اما فوق الطربيزة الناس بتلاحظ فقط صوت طلقة وكرت كوتشينة سقط بعيدا فينظرون اليه بطرف اعينهم ثم يواصلون لعبهم كأن شيئا لم يكن
عناوين الاخبار بسودانيزاونلاينSudaneseOnline اليوم الموافق June, 14 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد الصادق
فيس بوك
تويتر
انستقرام
يوتيوب
بنتيريست