|
|
|
 Re: الحكومة ترى في المنام أنها تذبحكم (Re: السيد المسلمي)
|
تحياتي يا مسلمي..
لكن هو يادوب صبر يا أبو السيد
يا اخ ده ذكرني بالراجل البحكي عن شجاعتو لما ضرب التمساح ، كان بوصف كيف بجي بحذر ويضرب التمساح في كراعو وينط لي وراء ،
وتاني يقرب ويضرب ويهرب ، في النهاية سألوه : طيب ليه ما ضربتو في رأسه فقال: المشكلة راسو لقيتو مقطوع .
| |
 
|
|
|
|
|
|
|
|
Re: الحكومة ترى في المنام أنها تذبحكم (Re: عمر التاج)
|
Quote: يا اخ ده ذكرني بالراجل البحكي عن شجاعتو لما ضرب التمساح ، كان بوصف كيف بجي بحذر ويضرب التمساح في كراعو وينط لي وراء ،
وتاني يقرب ويضرب ويهرب ، في النهاية سألوه : طيب ليه ما ضربتو في رأسه فقال: المشكلة راسو لقيتو مقطوع |
😂😂😂
ياحبيبنا عمر .. بالحاصل دا وبعد رد الفعل الميت من الشعب تجاه الازمات الحاصلة يبدو اننا راسنا مقطوع فعلا .. وبرضو الحكومة شغالة فينا تقطيع .. الله يقطع طاريهم ياخ 😁
| |
|
|
|
|
|
|
|
|
 Re: الحكومة ترى في المنام أنها تذبحكم (Re: السيد المسلمي)
|
والله يا مسلمي - وشكلك طالبني حليفة عشان تتاكد إني ماشبح -
الشعب ده مرات بذكرني السلخانة في عيد الضحية ..
تلقى الخراف واقفة صف (حزيه) ، والجزار يجر واحد واحد ويشلخه قدام رفاقتو
والبهائم ديل يعاينو وكأن الأمر ما بعنيهم
والواحد لما يجي دوره ياخدليهو باع قويه كده ويودع الفانية
تضحية من أمها لكن ياشعب
| |
|
|
|
|
|
|
|
|
|
Re: الحكومة ترى في المنام أنها تذبحكم (Re: عمر التاج)
|
الحكومة دي ومما هبت من أجل الإنقاذ ما قصرت معاكم ..
كل سنة بترفع الدعم عن سلعة ، والسلع بعد ما انتهت ما حتلقى غير ترفعكم انتو وتوديكم المقابر .
انتهت من كل المشاريع الإنتاجية عشان ماتحلموا بمستقبل زاهي، بدت بمشروع الجزيرة وكل المشاريع الزراعية
وبعدها قبلت على المشاريع اللي في الأرض والبحر والسماء، فدمرت السكك الحديدية وسودانير والمواني البحرية والنقل النهري
ومسكت الجنيه غطست حجرو لامن بقت قيمته أقل من تكلفة طباعتو ..
ومشت على السلع ، ماخلت سلعة تشترى إلا بعد صفوف طويلة ومتلتلة ، العيش صفوف ، الكهرباء صفوف
الغاز صفوووووف، القروش صفوووووووووووووووف، البنزين صفوف × صفووووووووووووووف
أها بلد زي دي بعد كدة في داعي تعيشوا فيها
قوموا لمذابحكم يرحمكم الله.
| |
|
|
|
|
|
|
|
|
|
Re: الحكومة ترى في المنام أنها تذبحكم (Re: عمر التاج)
|
فرحتنا قدر قروشنا
القراية ام داق
محمد عبدالماجد
(1)
> زمن مضى وولى كانت تشكل فيه الخرطوم لاءات (الصمود) العربي، أصبحت فيه الخرطوم الآن موزعة بين صفوف البنزين والجازولين.
> المواطن السوداني أصبح كائناً (صفياً) ، تبدأ حياته من صف الحصول على شهادة الميلاد وتنتهي في صف تحرير شهادة الوفاة.
> الصباح في صف العيش.
> النهار في صف الصرافات الآلية.
> المساء في صف محطات الوقود.
> في الماضي كانت دارفور تقدم كسوة الكعبة الشريفة، وكان السودان يدعم التعليم في دول الخليج، أصبحنا الآن ننتظر قرضاً خليجياً لشراء حاجة السودان من وقود اليوم.
> كان بعانخي يقود جيشه لمصر بسبب سوء معاملة (الخيول) في شمال الوادي، وكان الخليفة عبد الله التعايشي يخاطب فيكتوريا ملكة بريطانيا، مبشراً لها بالزواج من الأمير يونس ود الدكيم.
> الصفوف هدت حيل الشعب السوداني.
(2)
> تقلصت فرحتنا، والموظف الذي كان يفرح بحافز حصل عليه فجأة، أصبح الآن يفرح إذا حصل على مرتبه الشهري.
> أصبحنا نفرح إذا ذهبنا الى صراف آلي ووجدنا فيه (قروش)..مع إن تلك القروش التي سوف تحصل عليها من الصراف الآلي هي قروشك أنت.
> الصرافات الآلية لا تعطي حوافز من ديوان الزكاة.
> في الماضي كنت تغضب عندما تذهب الى المحكمة وتجد أن (الشيك) الذي حرر لك من غير رصيد.
> الآن يمكن أن تذهب الى البنك وتجد أن البنك نفسه ما عنده رصيد، وليس الشخص الذي حرر لك الشيك.
> في الماضي كان يحاسب الشخص الذي حرر لك شيكاً من غير رصيد، الآن لماذا لا تحاسب البنوك؟.
(3)
> في هذا الزمن، يمكن أن تقيف في صف البنزين 7 ساعات، وعندما (تكب) بنزين تتطلع وأنت فرحان وسعيد، وكأنك حققت كل طموحاتك في الحياة.
> نحن بقينا بنفرح بـ (كيس) العيش، وبنفرح عندما نجد (مقعد) في حافلة متجهة نحو أم درمان.
> أما أنبوبة الغاز فهي أقصى الآمال.
> نحن بنفرح بعودة الكهرباء التي كان تيارها خارج الخدمة لمدة 3 ساعات.
(4)
> تقلصت أهدافنا، وأصبحت كل مشاغلنا وكل طموحاتنا مكرسة نحو أهداف شخصية.
> انتفى عندنا الهم العام، والقضية الوطنية، وأصبحنا بسبب المعيشة (جاريين) وراء (لقمة العيش).
> في ظل هذه الأوضاع – من الصعب أن تحدث إنجازات على المستوى العام، من الصعب أن تشرق عبقريات جديدة في قامة عبد الله الطيب ومحمد المهدي المجذوب وخليل فرح وجكسا ومحمد وردي وأبوعركي.
> هذا السباق الذي نحن فيه الآن يسقط كل المبادئ والقيم، ويجعل المطامع الشخصية أكبر من أي شيء.
(5)
> صينية إفطار رمضان هذا العام، هل سوف يكون فيها (حلو مر) و (سلطة روب) و (عصيدة) ، زي كل عام؟، أم أن نظريات عبد الرحيم حمدي في (الخصخصة) اتعكست حتى على مائدة رمضان؟.
> تقلصت السفارات، وتقلصت أيضاً مسؤولية الشخص نحو أسرته، سقطت من ميزانية الشهر دعم الخالة والعمة، وقد تسقط كذلك في هذه الأوضاع ميزانية دعم الأخت والابن.
> سلبيات هذه الأوضاع ليس فقط في صفوف البنزين والغاز والرغيف والصرافات الآلية، سلبيات هذه الأوضاع سوف تنعكس على الأخلاق وعلى الأسر والأعراف!!.
(6)
> برنامج (أغاني وأغاني) في هذه النسخة يفترض أن يخصص لأغنية (المناحة).
> لا يوجد عندنا مساحة لفرح آخر.
| |
|
|
|
|
|
|
|
|
|
Re: الحكومة ترى في المنام أنها تذبحكم (Re: عمر التاج)
|
يا ناس هوي الدولار خلو ألحقوا العوض أمسكوا
قصة حصلت في القريه.. قال ليك ناس العوض عندهم تيس عاجباهو نفسه.. قال ليك مرة التيس العشا نطح باب الزريبه وطلع جا داخل على ابو العوض في القطية.. قام ابو العوض كورك للعوض تعال يا العوض أمسك التيس!!
قال ليك العوض جا جاري على التيس عفص صحن العشا ودفق العشا وعفص أبوه طلع ليهو في بطنه!!
وشات لمبة الجاز ... واللمبة اتكسرت والجاز اتدفق والنار ولعت في القطيه .. وابو العوض قاعد مخلوع وسط القطيه النار المولعة ... قام يكورك يا ناس الحقونا.... تعالوا أمسكوا العوض التيس خلوه!!
القصة دي نحن بقت علينا... الدولار نهاية 2017 اخد ليهو طلعه وقام عليهو العوض عفص الناس في بطونهم ومسك قروشهم وخلق ازمة في السيولة والناس فقدت الثقة في البنوك والصفوف طويلة قدام البنوك .. وقام العوض ساكي الدولار وقف الإستيراد نهائي وانعدمت السلع الاساسية بداية من الوقود والأدوية والبلد مهددة بالمجاعة لأن الموسم الزراعي ح يفشل بسبب إنعدام الجاز المطلوب لتجهيز وزراعة الأراضي وإنعدام السيولة ح بعطل الحصاد ويستحيل إستئجار عمالة لحصاد المحاصيل... و... و...
ويا ناس هوي الدولار خلو ألحقونا أمسكوا العوض قبل البلد ما تحرق!!😳
_____________________
| |
|
|
|
|
|
|
| |
عمر التاج
Hassan Makkawi
فيس بوك
تويتر
انستقرام
يوتيوب
بنتيريست