بينما يعاني السودان من فجوة غذائية ويفشل في توفير الأمن الغذائي لشعب السودان بسبب الفساد المالي والإداري ،، تهب الحكومة ملايين الأفدنة والمياه المجانية لتوفير غذاء دول الخليج!!
فما هو المقابل إذاً ؟؟؟؟؟؟
10-20-2017, 07:56 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
المشكلة إنهم شايلين من الإتنين وبلا طايل! ياخي مجاملة ساي للمغتربين ماف :) الكمية الماشة لمصر دي اكتر حاجة حارقاني في الدنيا!! خليك من الحوجة للزراعة، فهناك حاجة ماسة لمياه الشرب في غرب السودان وشرقه وشماله !! هسي ليه احنا مثلاً حتى في الخرطوم نفسها نشرب من مياه آبار ملوثة بينما الدولة أكان وزارة ري ولا مياه تمنعنا نشرب من النيل وتحفر لينا آبار إرتوازية بدل مياه النيل الأنظف والاقل تكلفة عبر محطات تنقية مثل محطة المقرن؟ نحن دولة مصنفة عالمياً ضمن الدول البتعاني من فقر مائي لانوا خط الفقر المائي حسب المعايير الدولية هو 1000 م3 للفرد، ونصيب الفرد حالياً في السودان بحسب تقارير منشورة هو 787 م3!!
المؤسف يا ود البشرى أغلب الناس عندها إعتقاد خاطئ بأنوا نحن من دول الوفرة المائية او حتى من الدول المتوازنة مائياً !! بينما نحن فعلياً تحت خطر الفقر المائي وما قادرين نوفر القوت من إنتاجنا، وفواتير إستيراد القمح والغذاء تعتبر من اكبر فواتير الدولة!! مافي زول شغال بالقصة دي!! لا حكومة ولا معارضة، ولا منظمات مجتمع مدني، ولا حتى أكاديميين يقدموا دراسات تنور الدولة والمواطنين بالكارثة الحولنا دي والحلول الممكنة، بإستثناء مساهمات من خبراء يتحسبوا بالاصابع ومن بينهم الدكتور سلمان محمد احمد سلمان! ناس دول الخليج عديييل كدا بصرحوا في وسائل أعلامهم بأنهم أضافوا كميات كبيرة من المياه الإفتراضية من السودان وإثيوبيا ودول إفريقية أخرى!! السؤال المزعجني نحن مستفيدين شنوا من إهدار مياهنا الجوفية (حقوق الأجيال القادمة) وأستنزاف نصيبنا من مياه النيل؟؟ للأسف حالياً مشاريع العرب كلها علف!! وكميات قليلة من الغذاء تكفي حاجتهم فقط وغير ملزمين بأنهم يدخلوا كمية من منتجاتهم المزروعة في ارض السودان وبموية مجانية للسوق المحلي!! تصدق إنوا الأردن زماااااان إكتفت ذاتياً من الخضروات من ولاية نهر النيل وليها اكتر من 8 سنين بتصدر لإسرائيل ودول جوارها الاخرى!
10-20-2017, 08:43 PM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
اطلعت على عدد من التقارير والمقالات بشأن ندرة المياه بالخليج ونضوب احتياطيهم القليل من المياه الجوفية.. حقيقة ذهلت جداً من الأرقام!! دول الخليج بتنتج يومياً ما لا يقل عن 8.3 مليون متر مكعب من المياه المحلاة لتغطية حاجتهم اليومية! بمعنى آخر إنتاجهم السنوي يعادل 62.4% من جملة الإنتاج العالمي للمياه المحلاة!! ودا بيعني بلغة المال مليارات الدولارات سنوياً.. ولذلك اتجهوا لاستغلال المياه الافتراضية (Virtual Water) لإنتاجهم الزراعي في دول أخرى ومعظمها إفريقية ومن بينها السودان!
في ظني حتى الدول الإفريقية الدكتاتورية بتعمل حساب لمصالح بلدها العليا وما أعتقد أنها ممكن تسمح بنقل مياههم الجوفية أو السطحية نهائياً في شكل أعلاف طالما وضعهم المائي يعاني من العجز أو الندرة كحال السودان، ولا بتعفي "المستثمرين" من الضرائب لمدة خمسة سنوات!! السودان حالياً منح السعودية مليون فدان حول خزان الستيت، وأكثر من 50ألف فدان بشمال كردفان لزراعة الأعلاف، ومئات الألوف من الأفدنة الموزعة تقريبا في كل السودان ما عدا مناطق الحرب!!
10-21-2017, 10:59 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
النوريك خبرتي العملية، اول حاجة المياه الجوفية مابتنفع ربحيا للمشاريع الكبيرة، عشان كدا الناس بتنقل من البحر عن طريق الترع... مافي مستثمر عندو اكتر من 2 ألف فدان وشغال مياه جوفية..الكلام دا طبعا في ولاية نهر النيل.. ولو بقا في بكون سوداني،شق الترعة بكلف كتير طبعا ،لكن على المدي البعيد مربح جدا... وحفر البئر عكس الكلام دا ...مع أن البئر الواحد ة بتسقي حوالى 50فدان تزيد أو تنقص.. طيب، الملاحظة المؤلمة إنو لو إنت مواطن عادي دار تجر موية من البحر إن شاء الله لفدان واحد،ملزم إنك تتطلع تصديق حكومي... ولو دار تحفر ماشاء لك من الآبار فلن يعترضك احد.. وبالمقابل تجد أن مياهنا تذهب إلى مصر لعدم استيعابنا لها خدميا... ليه الكلام دا؟ غالبا لأنو دا قانون متوارث من زمن الاستعمار والحكومات التي تلته...مصر مكنكشة في النيل من زمن بعيد.. العرب مامنهم خوف،الخوف من مصر... مصر معتمدة تماما على النيل،عندهم دي مسالة حياة أو موت..
10-21-2017, 11:31 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
حبابك يا عليش ،، كلامك صحيح، فكل المشاريع العربية والصينية بتسقى من النيل بالاضافة للمياه الجوفية .. وكل سقاية النيل هي من حصة السودان فتأمل! يعني ناس الحكومة ما عندهم اي نية يستخدموا مويتنا الشوية حقت النيل دي في مشاريع زراعية وطنية أو يخلونا نشربها في بطنا دي :) .. طبعاً قصة السحب من النيل دي بتكون سرية للغاية لانوا مصر رافضة لأي إستخدم من جانبنا لأي ملمتر زيادة على 12 مليار متر مكعب بينما حصتنا في إتفاقية 59 هو 18.5 مليار متر مكعب .. برغم من دس موضوع سحب الموية من النيل دا لكن في فيديو منشور عن مشروع الراجحي بقولوا فيهوا عديل انهم بشيلوا من النيل هههههه .. مرفق الفديو .. لاحظ للتعليق من الدقيقة 10:03
وزي ما قلت لو داير تجر اي جدول من النيل داير كمية من التصاريح والرشاوى، ياخي خليك من الجدول او الترعة الكبيرة نحنا عندنا في أقصى الشمال لو داير تدق ماسورة 2 بوصة داير تصريح ومساككة ورشاوي ههههههههه. طبعاً الري المصري في السودان لازم يوافق على المشاريع العلى النيل مع وزارة الري والموية حقتنا الما فاهمة الحاصل شنوا :) .. على الرغم من تدمير مشروع الجزيرة ومشاريع الإعاشة والمشاريع الأهلية والتعاونية الزراعية الأخرى،، لسة المصريين ما عاجبهم الحال ومستخسرين علينا نشرب من النيل خليك من الزراعة.
10-21-2017, 11:01 AM
أيمن محمود أيمن محمود
تاريخ التسجيل: 01-14-2013
مجموع المشاركات: 4940
السودانيين طالما انهم ما بيرزرعو خلو البيزرع يزرع من ملاحظتي اغلب مزارع المستثمرين ما على البحر - مياه جوفية السؤال المهم: هل في خطر على المخزون المائي السوداني؟!
10-21-2017, 11:44 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
انا شخصياً اشجع الإستثمار لو كان فعلاً إستثمار حقيقي! براعي لمصالحنا العليا زي ما قال الاستاذ محمد عبدالله في المداخلة أدناه .. مخزوننا الجوفي في خطر مع الإستنزاف الحاصل دا!! مويتنا يادوب تكفينا أكل وشراب ونحن ما دولة عندها وفرة مائية .. فكل دارفور والشمالية من شمال الخرطوم لحدي حلفا وكل الشرق عطشان!
10-21-2017, 11:04 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
عشان أقرب الصورة اكتر، نأخذ المملكة العربية السعودية كمثال لأنها أكثر دول الخليج سكاناً واستشعاراً لخطورة وضعها المائي.. السعودية تعتبر أكبر منتج للمياه المحلاة في العالم، بواقع 1.6 بليون متر مكعب سنوياً وهي تعادل 18٪ من الإنتاج العالمي، ولإنتاج الكمية دي بتستهلك يومياً حوالي 300 ألف برميل نفط مكافئ من الغاز والزيوت التقيلة فتخيلوا الحجم الخرافي للصرف عشان تأمن حاجتها اليومية من المياه الاحنا بنديها لمستثمرين العلف مجاناً، ودا حسب كلام الحكومة ودعاياتهم لجلب الاستثمار!!
حالياً السعودية مستثمرة أكثر من 300 مليار ريال خلال العشرة سنين الجاية عشان ترفع إنتاجيتها اليومية من المياه المحلاة لـ 8.5 مليون متر مكعب أي أكثر من الكمية التي تنتجها الآن دول الخليج مجتمعة!!
10-21-2017, 11:26 AM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11588
الأخ أحمد كلامك أو تساؤلك صحيح..هناك خطر من نضوب المياه الجوفية في السودان... و قد كتبت عن نفس الموضوع من خلال موضوع عن الاستثمار غير المقنن و عن شروط الاستثمار غير المعلنة..و عن استنزاف مياهنا الجوفية مقابل دولارات تذهب فقط لمن يساعد المستثمرين في منحهم الاراضي. لو تلاحظ معظم الاراضي هي في ولاية النيل و الشمالية .و ذلك لقربهما من البحر في حالة الترع و لقلة عمق الآبار الارتوازية في تلكم المنطقتين. المفترض أن تكون هناك شروط واضحة و معروفة للاستثمار و بمقابل مادي يعادل المياه التي سيتم استنزافها..و بجزء من الانتاج و تشغيل العمالة المحلية و الفنيين المحليين..و بتعمير المناطق القريبة. كما يجب أن يكون الاستثمار في مناطق بعيدة عن الطرق الرئيسية على أن تساعد في البنيات الاساسية. كتب الناس و نبهوا لهذا الخطر.و لكن ليس هناك من وسائل ضغط كافي من منظمات أو مؤسسات او جمعيات أو اتحادات مهنية...كما أن الرأي العام منشغل بأشياء أكثر لحاحا. لك الشكر أخونا أحمد لطرح هذا الموضوع الهام.
10-21-2017, 12:02 PM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
شكراً أخي محمد لإضافتك القيمة .. المصيبة في إنوا الناس على المستويين الرسمي والشعبي مافي زول مهتم بالموضوع الخطير دا! ما يسمى بالإستثمار الاجنبي في السودان في ظل النظام القائم ماهو الا إهدار لمقدرات البلد!
إستثمار الأعلاف دا من أسوء أنواع الإستثمار لأنه بستهلك كم هائل من المياه ولا يقارن من المحاصيل الغذائية زي القمح والذرة وغيرهم من المحاصيل.
السعودية مثلاً تزرع أعلافها في السودان بأقل تكلفة وبمياه سعر تكلفتها الفعلي في السوق العالمي أكتر من البترول !! وترجع لينا مويتنا تاني في شكل البان مراعي أجبان سعودية بسعر يفوق عشرات اضعاف القيمة الفعلية للموية حقتنا!!
وحتى الأعلاف حقت استثمارهم دي ما بتخش السوق المحلي باسعار معقولة عشان تساهم في تنمية قطاع الثروة الحيوانية حقتنا!! ولا بتعود مشاريعهم دي في شكل تنمية حقيقية للمنطقة البستثمروا فيها!! أنا هسى بحاول اتذكر مشاريع تنموية سعودية في السودان غير المساجد ما قادر اتذكر شئ :)
السعودية كانت مكتفية ذاتياً من القمح وكانت تصدره أيضاً، ولما انتبهوا لخطورة وضعهم المائي أصدرو قرار رسمي لتقليل إنتاج القمح بشكل تدريجي خلال 5 سنوات، حتى تم إيقافه نهائياً السنة الفاتت 2016! وبعد من زراعة القمح تحول معظم مزارعيهم لزراعة الأعلاف برغم إنها بتستهلك من المياه اضعاف اضعاف ما يستخدمه محصول القمح!! وقبل سنتين قرر مجلس الوزراء السعودي تقليل إنتاج الأعلاف وإيقافها نهائياً في العام المقبل 2018.. لكي تسهل المقارنة، بينما استهلاك المويه لإنتاج فدان من القمح الموسمي تقدر بـ 6 ألف متر مكعب، يستهلك إنتاج فدان من الأعلاف من المياه حوالي 24 ألف متر مكعب إذا ما اكتر وانتاجه يستمر طوال العام!!
الاخوة الافاضل تحية وتقدير اول الشكر الجزيل لتطرقكم لهذا الموضوع الحيوي الهام . وثانيا سوف اسطر تجربة 3 سنوات جعلتنى احتك بااحد الاستثمارات العربية -أولا معظم هذه المشاريع لا تصدر انتاجها لأى بلد خارج السودان وحتى البرسيم يتم شراؤه بواسطة تجار سودانيين وهم من يقومون بتصدير البرسيم خارج السودان . - كل انتاج المشاريع ا من الحبوب يتم بيعة للمطاحن السودانية داخل البلد . - تم تقليص المساحة المزروعة برسيم بهذه المشاريع والان تم التركيز على زراعة الحبوب ( القمح ، الذرة الشامية ، زهرة عباد الشمس ) ومزروع منهم مساحات مقدرة الان بنهر النيل والولاية الشمالية علما بان اى مشروع في بدايته محتاج لاستصلاح الأرض وزراعة محاصيل مثل البرسيم لاستصلاح الأرض وكسب مواد عضوية . - القمح أنسب مكان لزراعته في السودان الولاية الشمالية شمال مدينة الغابة وهناك سهول منبسطة غرب الغابة تمتد شمالا وغربا وبالحفر اتضح ان الأرض قريرة على عمق اقل من متر تم الحفر غرب مدينة القولد بحوالي 80 كيلو وكانت المفاجأة انو الأرض قريرة وليست رملية .الحكومة لو جادة انها تحل مشكلة الغذاء في السودان وتصير سلة عذاء حقيقي ماليها الاحفر قناة ضخمة وزراعة السهول الممتدة من بعد مدينة الدبة غربا وشمالا حتى الحدود المصرية . وانتاجية الفدان عالية جدا حسب تجربة المشاريع التي تزرع القمح في تلك النواحى مع التقيد بالجداول الزمنية للزراعة والتسميد ومكافحة اى افات تظهر اثناء الزراعة . - هناك تجربة الصندوق القومى وهم لديهم مساحة مقدرة غرب القولد واعتقد انهم نجحوا نجاح كبير وهم حكومة طبعا - الزراعة باستخدام الابار لابد من استخدام مواد مميزة في الحفر وعمل اللازم للبير من تلبيس والحفر للعمق المناسب تفاديا لانهيار الابار . والتأكد من انتاح البئر يتعدى 1200 جالون في الدقيقة
- عموما الان هناك مشروع ضخم جدا يتم حفر قناة لة جنوب مدينة بربر وهذا المشروع لو استمر وتم متابعتة متابعة دقيقة وتمت اداراتة بواسطة ذوى الاختصاص سوف يغير كتير من حال البلد وهو مشروع حكومي يتبع لشركة زادنا وتقريبا فيهو اكثر من الف محور - الطاقة التشغيلية الزراعة باستخدام الجاز مكلفة وما أظن في السودان تغطى مع اى زول يستخدم الجاز والكهرباء غير متوفرة والان هناك مشروع ضخم يتم تركيب محاور بة لتعمل بالطاقة الشمسية .
نقطة أخيرة ليس هناك اى صادر برسيم من السودان للسعودية حتى الان لان سعر البرسيم في السعودية ارخص من السودان معظم الاعلاف تصدر للامارات .
هناك استثمار واحد ومعروف للكل هو من يقوم بزراعة مساحات واسعة من الاعلاف ويتم تصدير كل إنتاجه لاحد الدول العربية وهذا الاستثمار تمتلك جزء منة حكومة الولاية التي يقع في نطاقها وهو من خفير الباب الى اعلى مدير معظمهم غير سودانيين
_- هناك دراسات وافية وقيمة جدا قام بها خبراء سودانيين وأجانب واخرها الدراسات التي قامت بها شركة المانية لناس السدود حقوا الناس ترجع للدراسات دى وهى ماخلت شيء . المصريين زارعين في حدودهم الجنوبية واى شخص جاء عن طريق معبر ارقين يمكن يلاحظ المساحات الضخمة على يمين الشارع بعد مدينة أبو سمبل زائد مشروع العوينات والعوينات جزء كبير منها في السودان والبخلى ارضهم تصلح للزراعة ونحن ارضنا المقابلة ليها غير صالحة شنو .
10-23-2017, 11:50 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
أتفق معاك بانوا الشمالية هي أفضل مكان لإنتاج القمح، وشفت بأم عيني في شمال دنقلا الأرض البكر التي تحدثت عنها بعد تجريفها من الرمال السطحية .. وبتفق معاك برضوا بانوا زراعة البرسيم ضمن الدورة الزراعية قبل زراعة القمح بتكسب الأرض خصوبة زيادة، ولكن للأسف معظم المشاريع القائمة والقادمة من الخليج مستهدفة زراعة البرسيم في حد ذاته لأنه ذو عائد نقدي عالي سريع ومخاطره قليلة مقارنة مع زراعة حبوب الغذاء!
أبحث هنا في أمر زراعة البرسيم في مساحات ضخمة أكتر من الجهة المصدرة لكونه يبدد مياه السودان الجوفية الغير متجددة، وأيضاً لخصمه كميات من مياه النيل! لعل الخيط يلفت النظر للخطر القادم مع مستثمرين البرسيم! ولذات الهاجس المائي أوقفت دول الخليج زراعته ومعظم مزارعين البرسيم الخليجيين إتجهوا للسودان .. السنة الفاتت إشترت شركة المراعي السعودية أراضي زراعية ضخمة في ولايتي كليفورنيا وأريزونا وهم مستهدفين زراعة الأعلاف ولكن حالياً بواجهوا إعتراضات كبيرة وغالباً حيتم إيقافهم لانوا الولايتين ديل على وجه التحديد مياههم محدودة.
10-23-2017, 12:02 PM
Mohammed Ahmed Saeed Mohammed Ahmed Saeed
تاريخ التسجيل: 12-19-2005
مجموع المشاركات: 690
الأستاذ احمد تحية وتقدير لحسن الحظ شركات الالبان الخليجية الكبرى ليس لديها اى رغبة في الاستثمار بالسودان بدأ من المراعى مرورا بالصافى وانتهاء بشركات الامارات ( المراعى ) . الشركة الوحيدة الجادة هي نادك وهى زرعت في شمال كردفان . ربما الوضع يتغير الان بعد رفع العقوبات .
10-23-2017, 12:26 PM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
تحياتي وأحترامي أخ محمد وشكراً على مشاركاتك القيمة ..
وأتمنى مثلك أن لا يكون إنتاج الأعلاف هو المنتج الأساسي في اكتر من مليون ونصف فدان منحتها الحكومة أو باعتها بأسعار رمزية لمستثمرين أجانب أغلبهم خليجيين لمدة 99 سنة، ودا برضوا يعتبر من الحاجات المقلقة جداً كونها غير مشروطة بزراعة محاصيل معينة! طبعاً المرسوم الرئاسي 206\2005 والقاضي بمصادرة أراضي الشمالية وجعلها تحت تصرف وحدة تنفيذ السدود كان تمهيد لبيع الأراضي!
البرسيم بحسب تقارير خبراء زراعيين وتجارب أهلنا المزارعين يعتبر من أكتر المنتجات الزراعية إستهلاكاً للماء مقارنة مع الحبوب .. وتصديره بكميات كبيرة يعتبر تصدير غير مباشر للمياه Virtual Water .. أما لو تمت زراعته بكميات محدودة في المناطق المطرية للإستخدام المحلي ممكن يطور حجم الثروة الحيوانية، فلو كانت الحكومة جادة في أي إصلاح إقتصادي، كنا حنشوفها بتعمل على الإستفادة من قيمته المضافة عبر تصديره كلحوم جاهزة والبان وجلود وبقية المنتجات الحيوانية الأخرى!!
لكن الحكومة بتنظر للأمر بعين التاجر الذي يسعى للكسب المادي العالي والسريع وبدون مخاطر عالية!! فلوا كان بهمهم أمر الأمن الغذائي كان ركزو على زراعة القمح بدل إستيراده! ففاتورة القمح السنوية تزيد عن المليار دولار!! وكانوا عملوا على دعم المزارعين التقليديين والاستثمار الوطني عبر توفير التمويل اللازم للمزارعين، ووضع سياسات تساهم في تشجيع الزراعة من خلال توفير البنيات التحتية من طرق وترحيل ومدخلات الإنتاج ومعدات وتقنيات زراعية بأسعار معقولة. هسى الهيجة العاملنها باسم الإستثمار وقانون 2013 ما بتهدف لإخراج السودان من فجوته الغذائية أو لتحقيق أمننا الغذائي أنما فقط لجذب مستثمرين لجلب أموال ودفعيات مستمرة منهم وبدون شروط تراعي مصالح الدولة العليا! شعب السودان حيستفيد شنوا من تصدير الماء النادر عبر البرسيم؟
مودتي
10-23-2017, 12:56 PM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
Quote: لحسن الحظ شركات الالبان الخليجية الكبرى ليس لديها اى رغبة في الاستثمار بالسودان بدأ من المراعى مرورا بالصافى وانتهاء بشركات الامارات ( المراعى ) .
ياريت والله لكن بحسب تصريحات سفير السودان بالسعودية ووزراء الزراعة والإستثمار سواء الاتحاديين او الولائيين انوا ناس الأعلاف ديل هم الكل في الكل :) الإقتباسات التحت نماذج من نوع التصريحات الرسمية دي!
تصريح سفير السودان بالسعودية
Quote: قال سفير السودان لدي المملكة العربية السعودية عبدالحافظ إبراهيم "إنه تم تخصيص أراضي زراعية جديدة لعدد من الشركات الاستثمارية السعودية الكبري منها ( سليمان الراجحي، نادك، الصافي، وتبوك الزراعية)بالسودان مشيرا الى أن المشاريع الجديدة التي سيتم تنفيذها في القريب العاجل تركزت تراخيص استثماراتها في زراعة الأعلاف الخضراء
Quote: وتفقد سير العمل بمشروع "أمطار" الذي يبلغ رأس ماله 150 مليون دولار في زراعية 15 ألف فدان، ومشروع "الراجحي" الذي تبلغ المساحات المزروعة فيه من القمح والأعلاف والإنتاج الحيواني أكثر من 400 فدان. ووقف الوزير على سير العمل بمشروع "مسمع" السعودي برأس مال 10 مليون دولار ومشروع ألبان "الصافي" ومشروع "المراعي" ومشروع "حائل"،
تصريح وزير الزراعة والثروة الحيوانية بولاية الخرطوم محمد صالح جابر:
Quote: وتعهد وزير الزراعة والثروة الحيوانية، بولاية الخرطوم محمد صالح جابر، لدى لقائه مستثمرا سعوديا السبت بتوفير اراض زراعية خالية من الموانع والاعتراضات لمساعدة الاستثمارات السعودية على ” زراعة البرسيم والاعلاف وتربية الماشية وتصديرها الى هناك” واوضح الوزير ان الرئيس السوداني عمر البشير وجه بتسهيل اعمال المستثمرين السعوديين واضاف ” تمت الاستجابة لرغبة شركة سعودية لزراعة الاعلاف وتربية الماشية “..
Quote: لكن الخبير الاقتصادي صدقي كبلو ذهب مذهبا آخر بالقول إنه لا توجد في البلاد سياسة واضحة للاستثمار الزراعي، وأفاد بأن الحكومة تعتقد بأن مجرد وجود الأرض والماء الرخيصين يمثل عامل جذب.
فلو صح المقتبس المنسوب للاستاذ صدقي كبلو،، فدا بأكد زعمنا الفوق بأنوا أغلبية السودانيين سواء كانوا سياسيين في الحكومة أو المعارضة أو ناس زي ما بقولوا متنورين ومتعلمين في الواقع هم ما عارفين حقيقة وضعنا المائي! وعادي ممكن تسمع تصريحات من شاكلة ( وجود الأرض والماء الرخيصين ) وإعتقادات خاطئة مثل أننا بلد وفرة مائية أو الماء عندنا رخيص أو ما عنده قيمة فتأملوا! وعشان كدا د. سلمان محمد أحمد سلمان ليهوا حق في تحميل كل القوى السياسية والأحزاب السودانية مسؤولية الخسائر الضخمة على السودان وشعبه نتيجة لموافقتهم المبدئية وعدم إعتراضهم أو صمتهم على إتفاقية 1959 وملحقاتها والتي بدأت مناقشتها وتداولها في العهد الديمقراطي وتم توقيعها وتنفيذها في زمن عبود!
10-25-2017, 01:15 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
الاردن لديها إستثمارات ناجحة في زراعة الخضروات بولاية نهر النيل أشرت اليه سأبقاً، وهم يتطلعون الآن لزراعة القمح والشعير وإرسال عدد كبير من المزارعين والمهندسين والعمال الأردنييين!
وللأسف دا الحاصل الآن!! المصريين في مشاريعهم في شمال السودان نسبة العمالة السودانية لديهم في افضل تقدير لا تتجاوز 1% !! فكل مزارعيهم وعمالهم ومخدوميهم من الجنسية المصرية!!
ودا بيأكد بأنوا ما يسمى بالإستثمار الزراعي الاجنبي في السودان دا ما عندوا اي علاقة بإقتصاد البلد!! فمعظم منتوجاتهم ماشة لبلادهم وما ملزمين بأنه يبيعوا جزء منها في السوق المحلي!! ولا ملزمين بعمل اية برامج تنموية في المنطقة البشفطوا مويتها!!
ولابتشغيل العمالة السودانية!! وياخدو من مياهنا الجوفية مجاناً، وكمان معفيين من الضرائب لمدة 10 سنوات، يدخلوا اية معدات وآليات مجاناً طيب السؤال تاني بجي ناطي: شنوا فايدة القصة دي لإقتصاد البلد أو للمواطن السوداني؟؟
Quote:
الأردن يستورد من القمح والشعير سنويا بأكثر من مائتي مليون دينار، كم يمكن أن توفر لنا الأرض الزراعية في السودان من القمح والشعير؟ سوف تنتج على أقل تقدير مائتي ألف طن سنويا، وهذا يوفر 10% من احتياجات الأردن، ولكن بمرور الوقت والخبرة وإدخال التقنيات سيتضاعف الإنتاج، وبخاصة أن الأرض السودانية مروية، ويتوافر هناك الماء بكثرة، بحيث يمكن استخدام الأرض مرتين في السنة، وأقدر أن استثمارا بمائة مليون دينار ليس كبيرا بالنسبة للأردنيين وبالنسبة للإنتاج والإيراد المتوقع، ومن المخجل بحقنا مجتمعا وحكومة أن نقول بأن المانع من استخدام الأرض الزراعية في السودان هو نقص السيولة.
ومع أزمة المياه التي نواجهها، واحتمال تقليل التكاليف فإن الاستثمار الزراعي في السودان يمنحنا مزايا كبيرة جدا، فيمكن بالوفر المائي المتحقق أن نحل مشكلة مياه الشرب والري، ويمكن أيضا بتراتيب إدارية واستثمارية أخرى أن تكون الاستثمارات الزراعية في السودان مصدرا لاستثمارات غذائية وفي الثروة الحيوانية والأعلاف وتشغل عددا كبيرا من المزارعين والمهندسين والعمال الأردنيين في السودان، إننا نهدر فرصة ثمينة وهائلة للاستثمار ومواجهة نقص المياه بلا مبرر معقول، وفي الوقت نفسه فإننا نرى إنفاقا في استثمارات لا يفيد منها أحد سوى حفنة قليلة، وثمة أفكار لاستثناء بعض الاستثمارات من قانون الحد الأدنى للأجور لأجل مساعدة المستثمرين المساكين، فإذا كانت هذه الاستثمارات التي خصصت لها أراض واسعة ومياه وكهرباء وتسهيلات وطرق غير قادرة على دفع أجور العمال، فما جدواها وما فائدة بقائها واستمرارها؟
نحتاج إلى قدر كبير من الخيال وحسن النية أيضا، وأعتقد أن أزمتنا لم تكن في الموارد وتدبيرها، ولكن توزيع وإدارة الإنفاق على المستوى الرسمي والمجتمعي تحتاج إلى مراجعة وتساؤل عن جدواها وأهميتها وحسن توزيعها، فلا يعقل أن الأردنيين الذين ينفقون مليارات على الاتصالات غير قادرين على تدبير مائة مليون لأجل مشروع استراتيجي سيوفر في الماء والعجز في فاتورة الاستيراد والتصدير ويحقق الأمن الغذائي ويوفر فرصا هائلة في العمل للأردنيين والسودانيين.
سلامات احمد وزواره .. موضوع مهم جدا .. والمغصة مافي معاملة بالمثل.. اظن الأمور دي لو تركتها الحكومة لجهود الشركات السودانية يمكن كان تصل لاتفاقات افضل مع الراغبين في الاستثمار .. لكن ما دام لا قين حكومة منبرشة فسوف يصلوا لما يريدونه منهم الموضوع دا يشمل حتى التعدين .
10-27-2017, 01:44 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
بالجد حاجة تمغص! فطالما الـ End Goals حق ناس الحكومة هو جيوبهم بس فما بتوقع إنهم يعملوا أية إجراءات أو ضوابط بشأن إستخدامات المياه أو المشاريع حقت العرب ديل لكي تجني مكاسب تعود على الإقتصاد والمواطن! حقيقة مافي ولا 1 ملم من الامل بأنهم ممكن يعملوا شئ أيجابي! إبتلاءات بس
10-28-2017, 03:40 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3595
زي ما اشرت سابقاً ،، ليه ما نسأل نفسنا ليه نصدرها موية في شكل أعلاف، في حين انوا ممكن نصدرها كالبان ولحوم وجلود ... الخ ونستفيد من قيمتها المضافة؟ .. تحياتي
10-29-2017, 10:59 AM
Frankly Frankly
تاريخ التسجيل: 02-05-2002
مجموع المشاركات: 35211
Quote: معظم الأعلاف التي نصدرها للأمارات وقطر لا تستخدم في انتاج اللحوم والألبان بشكل استراتيجي.
عايز تقول لينا حيواناتم البشيلو ليها اعلاف من عندنا ساعنها للسياحة مش؟ سباق مثلا .. ولو ـ برضو السياحة قروش داخلا عليهم .. ايوه ما عندنا نقص حاليا لأننا عاجزين عن استخدامها .
10-29-2017, 01:57 PM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11588
فيما يتعلق بالاستثمار المشكلة إنه ضوابط الاستثمار مطاطة و تتمدد و تنكمش حسب قرار المسئول..يعني ما في أشياء واضحة .فكل مشروع أو مستثمر حسب مدخله للمسئول و حسب اهتمام المسئول وفق حجم المستثمر.. ما في بلد في الدنيا إلا بلد فاسدة و فاقدة للشفافية ييدخل المستثمر للوزير أو الرئيس..فإذا الأمور واضحة و تطبّق على أي مستثمر ما بيحتاج المستثمر يقابل المسئول.. برضه الشفافية غائبة في ما يتعلق بالاعفاءات و الامتيازات. فهي أشياء مخفية و غير واضحة.. و كم jستفيد البلد من المستثمر و كم يخسر فهذه معلومة غائبة... لا يوجد أحد ضد الاستثمار و لكن الاستثمار بأي ثمن و بأي عائد؟ أما موضوع المياه فهي ليست بالبساطة التي ننظر بها للأمور.. و كأننا نجر الشوك في جلد غيرن ( مصر) ...يعني عاملين أذكياء.. المشكلة في المياه الجوفية و ليست المياه السطحية ..و المياه السطحية نفسها لم يتضح مصيرها بعد قيام سد النهضة.. المستمرون سئموا من نغمة عندنا الموية و الأرض ..هذه النغمة السمجة...ناس الحكومة عايزين الجاهز و السريع و ليس هناك نظرة مستقبلية..
10-29-2017, 02:29 PM
Asim Fageary Asim Fageary
تاريخ التسجيل: 04-25-2010
مجموع المشاركات: 7810
ياريت لو المتخصصين في الزراعة وخبراء في المياه في البورد يشاركونا الرآي، لعل وعسى نفهم الحاصل شنوا!!
سلام مربع
غايتو يا أحمد عالم مسألة نفهم حاجة من الحاجات البتعمل فيها حكومة القشري القاعدة في الخرطوم دي يتخيل لي صعبة
كل شيء من موارد البلد بيتباع بالرخيص .. ديل عاوزين يبحبحوا أنفسهم لحدما يجيهم الموت وبس لكن مسألة وطن وتنمية مستدامة ومخزون موارد لأجيال قادمة لا أعتقد هؤولاء القشريين الكجر يفكرون فيها إطلاقاً
مع تحياتي،،،
عاصم فقيري
10-29-2017, 02:54 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3595
البرسيم السوداني هو أغلى برسيم بصل الامارات، السبب المخليهو منافس للبرسيم الأمريكي هو جودتة لابل السباق، صحي هناك مشكلة في عائد البرسيم من عملة صعبة لأنو جزء كبير من الانتاج مملوك لخليجيين المشكلة انو زمن تمويل الدولة للزراعة ولى العندهم تمويل هم بعض أثرياء السودان وكثير من أثرياء الخليج. مثلا: الدولة رحلت المناصير وعوضتهم أراضي زراعية ممتازة بالقرب من الدامر، الناس ديل باعو الأرض للمستطيعيين الراجحي أكبر منتج للقمح بالسودان
الزمن تغيّر وتوجد صعوبة كبيرة في انتاج أي شكل اشتراكي، ما عارفها موديانا وين؟ لكن بالتأكيد الأمل ضعيف جداً جداً كان عندي فكرة أقول الكلام دا في بوست عطبرة الحلوة وما سوف تكون عليه مستقبلا قولوا معاي: يا لطيف
10-29-2017, 04:41 PM
الطيب رحمه قريمان الطيب رحمه قريمان
تاريخ التسجيل: 03-21-2008
مجموع المشاركات: 12377
تحياتى اخى الاستاذ أحمد .. و ايضا تحياتى لضيوفك ..
هذا واحد من البوستات المهمة و الجادة .. اشكرك عليه ..
لدى ملاحظتين و ستكون لى عودة لمزيد من المشاركة .. اما الملاحظة الاولى .. هناك معلومات و احصاءات وردت فى البوست دون ذكر المصدر .. و حتى تكون المعلومة التى وردت صحيحة فلابد من ذكر المصدر .. الملاحظة الثانية .. ذكر البعض "البحر" و فى الحقيقة المقصود به النيل .. او احد افرعه .. و ليس المقصود البحر او مياه البحر .. !!
شكرا جزيلا
10-29-2017, 05:42 PM
احمد حمودى احمد حمودى
تاريخ التسجيل: 01-11-2013
مجموع المشاركات: 4364
Quote: الدولة رحلت المناصير وعوضتهم أراضي زراعية ممتازة بالقرب من الدامر، الناس ديل باعو الأرض للمستطيعيين
عارف يا المستنير دي هي النتيجة الطبيعية ما دام ما عندهم خيار تاني .. كان مفروض من ضمن خطة السد يعملوا ليهم ترعة .. خيارهم دا برضو كان بكون مصير أراضي حلفا الجديدة لو الحكومة سلمتم أرض قفر بدون خطة لكيفية استثمارها .. كان ممكن الدولة تعمل ليهم مؤسسة مدعومة أو تعاونيات كبيرة تخليهم قادرين على استثمار أرضهم .. والدي عليه الرحمة كان عمدة قريتنا سجل خمسة الف فدان لصالح أهالي القرية كلها على النيل .. وفعلا اجتهدوا الأهالي وعملوا ثلاثة مشاريع تعاونية قدر قدرتهم .. غطوا بيهن حوالي الف الف شوية وباقي الأرض فاضية .. زمن نميري قلعوا الأرض وأدوها لشركة أمريكية مشبوهة جابها مستثمر عملت تجارب لزراعة العنب .. المهم الأمركان فاتو بعد الانتفاضة والأهالي نجحوا في استرجاع الأرض لصالحهم .. ونحجوا بمساعدة حكومة الولاية ومساهمات المغتربين والجمعيات التعاونية الثلاثة .. في جلب مضخات كبيرة وعمل ترعة ضخمة غطت المساحة .. والآن تستثمر كلها في زراعة القمح .
10-30-2017, 07:21 AM
الطيب رحمه قريمان الطيب رحمه قريمان
تاريخ التسجيل: 03-21-2008
مجموع المشاركات: 12377
Quote: لدى ملاحظتين و ستكون لى عودة لمزيد من المشاركة .. اما الملاحظة الاولى .. هناك معلومات و احصاءات وردت فى البوست دون ذكر المصدر ..
أخونا الطيب سلامات .. كنت أتوقع دخولك للبوست لإني أعرف إهتمامك بأمر المياه. شكراً على ملاحظاتك القيمة، وكلامك صحيح ايراد مصادر المعلومات أمر مهم لانها بتسهل على المهتمين والباحثين جمع مزيد من المعلومات .. البوست طابعه حواري أكثر من كونه بحثي! انا اوردت كتير من الروابط والإقتباسات لذات الغرض. لكن لو عندك تسأول عن اي معلومة أو إحصائية معينة انا اوردته هنا ممكن اجيب ليك مصدرها .. تحياتي
10-31-2017, 10:37 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
Quote: الدولة رحلت المناصير وعوضتهم أراضي زراعية ممتازة بالقرب من الدامر، الناس ديل باعو الأرض للمستطيعيين
ما عندي فكرة عن الموضوع دا يا بكور، لكن معظم مشاريع التهجير كانت في اراضي صحراوية! والدولة ما إلتزمت بتوفير المياه لمزروعاتهم وكل مشاريعهم فشلت لانوا ما ادوهم موية الا في السنة الاولى بس!
في مجموعة من الفيدوهات بتحكي مأساة أهلنا المناصير والفيديو أدناه واحد منهم ..
10-31-2017, 09:47 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
Quote: [كل شيء من موارد البلد بيتباع بالرخيص .. ديل عاوزين يبحبحوا أنفسهم لحدما يجيهم الموت وبس لكن مسألة وطن وتنمية مستدامة ومخزون موارد لأجيال قادمة لا أعتقد هؤولاء القشريين الكجر يفكرون فيها إطلاق
عاصم سلامات ..
للأسف دا الحاصل! شغالين بيع في كل شئ .. غايتوا كم سنة كدا ما حتفضل واطة في السودان وكلها حتتباع لمستثمرين الأعلاف ديل :)
10-31-2017, 09:40 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
Quote: المشكلة في المياه الجوفية و ليست المياه السطحية ..و المياه السطحية نفسها لم يتضح مصيرها بعد قيام سد النهضة.. المستمرون سئموا من نغمة عندنا الموية و الأرض ..هذه النغمة السمجة...ناس الحكومة عايزين الجاهز و السريع و ليس هناك نظرة مستقبلية..
الغريب إنوا البرلمان حق الحكومة ذات نفسها أعلن بانوا نحن تحت خط الفقر المائي حسب المقتبس أدناه! وخط الفقر المائي حسب المعايير الدولية يكون فيه نصيب الفرد سنوياً 1000 متر مكعب .. نشر الخبر في 2016 في عدة صحف اليكترونية منها النيلين، السودان اليوم، والراكوبة.
Quote: اعلن البرلمان، عن تصنيف السودان ضمن الدول التي تعاني من شح في المياه، حيث يبلغ نصيب الفرد (787.5) متراً مكعباً في العام
Quote: معظم الأعلاف التي نصدرها للأمارات وقطر لا تستخدم في انتاج اللحوم والألبان بشكل استراتيجي.
هلا يا بكور،،
حالياً اكبر منتجين للالبان في السعودية عندهم مزارع برسيم ضخمة في السودان!! وحالياً داخلين بأستثمارات كبيرة لزراعة البرسيم في السودان لأنوا السعودية أوقفت رسمياً زراعة الاعلاف بقرار من مجلس وزرائهم من بداية العام القادم يعني بعد شهرين بسبب ندرة المياه!!
التحت دا كلام وزير الدولة للإستثمار أسامة فيصل ..
Quote: وتفقد سير العمل بمشروع "أمطار" الذي يبلغ رأس ماله 150 مليون دولار في زراعية 15 ألف فدان، ومشروع "الراجحي" الذي تبلغ المساحات المزروعة فيه من القمح والأعلاف والإنتاج الحيواني أكثر من 400 فدان. ووقف الوزير على سير العمل بمشروع "مسمع" السعودي برأس مال 10 مليون دولار ومشروع ألبان "الصافي" ومشروع "المراعي" ومشروع "حائل"،
بعدين نحن ما بلد وفرة مائية!! وحالياً نحن عند حد الفقر المائي بحسب تقارير الدولية، العندنا يادوب تكفينا .. السودان بالمناسبة من الدول المتوقعة ان تصل لحد العوز والندرة في العام 2030!! فكل المنطقة من شمال الخرطوم لحدي حلفا .. وكل شرق وغرب السودان يعاني حالياً من ندرة وعطشان!! فعدم إستخدامنا لحصتنا المائية لايعني بأي حال بأننا ما محتاجين ليها!!
نحن بلد فيه فجوة غذائية، واكبر فواتير السودان هي القمح! قلة الاستخدام بتعود لسوء الادارة! أكبر إستخدام لمياه السودان في السابق كان بمشروع الجزيرة الكان بستهلك قرابة الـ 7 مليار متر مكعب سنوياً من حصة السودان وتم تدميره ومشاريع الإعاشة الأخرى عشان كان بقى في رصيد يظنه الكثيرين خطاء بأنه فائض مائي!!
10-30-2017, 07:12 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
المشكلة ناسكم ديل بعاينوا للأمر بعين التاجر العاوز عائد مادي سريع! يا فرانكلي الدول المحترمة البتهتم بتنمية إقتصادها وبرفع الفقر بتسعى للحصول على كامل القيمة المضافة لكل منتجاتها، مش لأنو دخلها أعلى وبس، ولكن لأنها بتشكل دورة إقتصادية كاملة يستفيد منها الجميع .. بدل ما نصدر مياه إفتراضية (برسيم) لدول الخليج وبدل نصدر مواشي حية (وكمان إناث) ممكن نستفيد من أعلافنا لتشجيع تربية المواشي، ويعمل كل من الدولة والقطاع الخاص معاً (لو الدولة راغبة) على تطوير صناعة اللحوم، وتذبح المواشي في السودان وتصدر كلحوم، وكذلك تعمل على تطوير صناعة الألبان ومنتجاتها، وصناعة الجلود ومنتجاتها وووو .. ولك أن تتخيل حجم العائد المادي، دا بالاضافة لفرص العمالة الكبيرة الممكن تتيحها الصناعات دي! هسي شغال العكس نصدر موية وترجع لينا كالبان وجبن المراعي!!
10-30-2017, 08:09 AM
Frankly Frankly
تاريخ التسجيل: 02-05-2002
مجموع المشاركات: 35211
الفرق شنو أنك تصدر بطيخ وشمام وتصدر ألبان أو لحوم لأنّ العلة عندك هي أنها مياه في شكل أعلاف ودا فهم ساذج وبسيط جداً
بعدين القيمة المضافة دي لو ما عندك إمكانيات تتحصل عليها تقد في ظل شجرة وتنتظر الفرج ولا تصدر وتستثمر في البنية التجتية التي تؤهل لاستغلال القيمة المضافة؟
كلم الشويعيين بتاعنك ديل ما يتكلموا في نظريات بينما الناس شغالة في العملي.
10-30-2017, 09:31 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
الفرق شنو أنك تصدر بطيخ وشمام وتصدر ألبان أو لحوم لأنّ العلة عندك هي أنها مياه في شكل أعلاف ودا فهم ساذج وبسيط جداً
بعدين القيمة المضافة دي لو ما عندك إمكانيات تتحصل عليها تقد في ظل شجرة وتنتظر الفرج ولا تصدر وتستثمر في البنية التجتية التي تؤهل لاستغلال القيمة المضافة؟
كلم الشويعيين بتاعنك ديل ما يتكلموا في نظريات بينما الناس شغالة في العملي.
دا القدرت عليهوا؟؟ عموماً كتر خيرك على النصيحة الغالية!! وحنكلم ليك الشويعيين بتاعني :)
أي خدمة تانية؟؟
10-30-2017, 09:44 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
الاخ Ahmed Alim وضيوفه الكرام ..تحياتي نحكي لكم تجربة لاحد المواطنين التقيت به صدفة عن الاستثمار في الزراعة وما يجري في السودان .. خلال زيارتي الاخيرة للسودان التقيت بشاب يمتلك مغلق لبيع مواد البناء وتجاذبنا اطراف الحديث عن الاستثمار وافضل انواع الاستثمار في السودان .. ذكر لي بان افضل انواع الاشتثمار هو الزراعة ولكن هناك عقبة تعيق الزراعة وهي عدم توفر المياهـ (ضع مليون خط تحت كلمة المياه) فسألته كيف ذلك مع وجود النيل ! في حسرة بالغة قال بان له تجربتان الاولي في مشروع الجزيرة حيث استثمر امواله في ايجار 80 فدان لزراعتها بالقمح بالاضافة الي ديون السماد ...الخ . كان متوقع انتاج الفدان الواحد 10 شوالات من القمح تغطي كافة المصاريف + الربحية .. ما حدث بان هناك احد المسئولين الحكوميين ايضا مستثمر في المشروع فكانت تغلق مصارف المياه عن بقية المزارع الاخري ومن ضمنها مزرعة هذا الشاب لتروي المياه فقط مزرعة هذا المسئول مما ادي الي عطش القمح المزروع وعدم اعطاء انتاج وافر مما ادي الي خسارة فادحة والدخول في مشاكل تم تسويتها لاحقا .. فدان المسئول الحكومي انتج 30 شوال بينما 80 فدان مجتمعة انتجت 10 شوالات قمح !! ذهب مرة اخري لمشروع السليت واستأجر اراضي لزراعتها بالخضروات (بامية - طماطم) ولسوء حظه تكرر نفس المشهد وهذه المرة المياه تذهب لمزرعة البشير يحرسها رجال الشرطة وخسارة للمرة الثانية .. اذا كان هذا حال صغار المستثمرين السودانين وما يحدث لهم من مشاكل في الري وكلا المشروعين يتم السقي فيهما من النيل ! سألته وماذا الحل قال اذا كنت تريد الزراعة فيجب ان يكون لديك بئر جوفية تضمن منها المياه لمزرعتك .. يأس من الزراعة وفتح له مغلق في الفيحاء .. شاهدت الصور عن المشروعين ومدي تحسره علي الوقت والمجهود الذي ضاع هدر بسبب المحسوبية في الري واستغلال المسئولين لمناصبهم ..
10-31-2017, 10:21 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
أحمد أمبس .. مودتي .. عندنا شرق النيل شمال دنقلا فيها مياه ... وزراعة فيها ما مكلفة لأن الأرض مسطحة خلقة ربنا والانتاج كويس لمن يعمل بجد ..أقل إنتاج للفدان ( عشرين جوال ) وأنا أتحدث عن القمح .. عندنا في البرقيق وكرمة البلد واجهتنا مشكلة خطيرة جداً هو ( النز) المياه الجوفية بدأت تصعد إلى سطح الأرض وهدمت كثير من البيوت في مشروع البرقيق وشكلت خطورة وإنتشر الذعر بين السكان وقالوا أن السبب من توقف الطلمبات التي تعتمد على المياه الجوفية ( المترات ) وبذلك إرتفع مستوى المياه إلى فوق السطح .. ( يمكن أن تشاهد الصور في القوقل لمشروع البرقيق والنز ) أنا عندي مشروع في الدفوفة يمكن الوصول إلى المياه بماسورة ونص يعني تقريبا ( أقل من عشرين قدم ) وبإندفاع شديد والأرض مسطحة طبيعياً .. وهناك مشاريع إستثمارية لمن يستطيع ممكن من 100 فدان إلى أكثر من 1000 فدان ويتم نزع الأرض بعد ثلاث سنوات اذا لم تتم زراعتها .. المشكلة كانت في الحفارات لأن زادنا هي الشركة الوحيدة .. والحصول عليها كان صعباً أما اليوم هناك سوريون مستثمرون سهلوا الموضوع خالص يعني سبعين قدم حفر وتركيب ( 40) مليون ما يعادل ( 8 الف ريال سعودي) ولديهم حفارات في منطقة القولد والسليم والبرقيق .. بعدين ناس عمليين جداً جداً ( شغل صح ) مشكلتهم العمالة الملتزمة بالمواعيد والجدية وإنت عارف ناسنا ( سماية ، وعرس ، ومأتم ، وعزومة ... إلخ ) .. حالياً إختفى الطفح المائي ( النز ) .. سبحان الله يا أحمد تصدق عندنا شرق النيل من دنقلا إلى المحس تكلفة إستخراج المياه الحفر وتركيب الوابور فقط ( الف ريال سعودي ) تقريباً كمية المياه ونقاوتها في الخليج ما تطلع ولا 200 مليون دولار .. مشكلتنا فقط في العمالة الايدي العاملة والزراعة بالري ليست مثل الزراعة المطرية لا بد من معرفة وخبرة .. اليوم عندنا في البلد المزارعين الجادين والعمليين آخر راحة كل واحد ركب ( بوكس ) ومروق .. وأكثر المنتجين أهلنا في السليم ناس شغل وإنتاج ..
هذه الايام بداية الموسم الشتوي .. إذا لقينا فرصة إجازة ما بنقصر ( البلد على طول ) شكراً كثير .. معليش البوست علمي ولكن كلامنا كلام ترابلة .. هيروو أحمد أمبس
10-31-2017, 10:57 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
دائماً تعودنا على مداخلات مميزة منك .. شكراً كتير على المساهمة القيمة يا علي امبس.
الغريبة ياعلي أحنا بالضفة الغربية منكم ما عندنا مشكلة النز بنفس المقدار العندكم في البرقيق وكرمة البلد!! انا بالجد خايف من الظاهرة دي تعمل أضرار على جسم الدفوفة التاريخية! يقال ان بحيرة سد مروي ليها علاقة مع ظاهرة النز لإنوا بشتكوا منها تقريباً في كل القرى شمال السد ..
20 شوال في الفدان دي إنتاجية عالية جدا لمزارعين عاديين! ومشجعة خالص للاستثمار، زي ماعارف عندي رغبة شديدة في الشغلة دي .. بجيك في الخاص عشان اخد تفاصيل أكتر.
محبتي وتقديري ..
10-31-2017, 10:54 AM
Ahmed Alim Ahmed Alim
تاريخ التسجيل: 06-14-2007
مجموع المشاركات: 2762
Quote: اذا كان هذا حال صغار المستثمرين السودانين وما يحدث لهم من مشاكل في الري وكلا المشروعين يتم السقي فيهما من النيل !
أخونا عارف تحياتي،،
واشكرك كتير لإضافتك القيمة ..
المشكلة فعلاً في تضييق شديد على المزارعين في الحقول المعتمدة على الري من مياه النيل! لأنوا مصر مضيقة الخناق على الحكومة!
في إجتماع دول حوض النيل في شرم الشيخ قبل حوالي عشرة سنوات وزير الري المصري صرح بأنهم ما عندهم مشكلة مع سدود الشمال المقترحة طالما هي فقط لإستخراج الكهرباء باعتبار انوا المياه الحيتم تخزينها في بحيرات السدود المقترحة هي ملك لمصر!! فتجربة سد مروي أكدت كلام المصريين دا!! فكل مشاريع التهجير لاهلنا المناصير فشلت لانوا مافي موية لمشاريعهم!!
ياعارف برغم انوا ناس الحكومة تمكنوا من كل مرافق الدولة وقطاعاتها الإنتاجية لكنهم لسة شغالين في التمكين لصغار منسوبي حزبهم!! عشان كدا ما بستغرب لما يكون في خيار وفقوس في اي مشروع إنتاجي! يعني انت وحظك!! وصديقك حظه العاثر انه زرع في أراضي مشروع حكومي وما بقدر يتحكم في أمر الري!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Ahmed Alim
محمد البشرى الخضر
عليش الريدة
أيمن محمود
محمد عبد الله الحسين
Mohammed Ahmed Saeed
محمد على طه الملك
أبوبكر عباس
Frankly
Asim Fageary
الطيب رحمه قريمان
احمد حمودى
Arif Nashed
علي عبدالوهاب عثمان
فيس بوك
تويتر
انستقرام
يوتيوب
بنتيريست