|
|
|
 Re: الأعمدة السبعة (Re: حاتم إبراهيم)
|
تحياتي الأخ حاتم،
وبما أنك فلوتابي، فبلاشك أن هذه الأعمدة كل منها له طنين خاص بالنسبة لك ،
يصدره تناسق ثلاثي الأبعاد بصورة معينة مابين قوة النفخة ، وحركة الأصابع وجودة الكير.
عن نفسي أهتم بركوب أمواج المنبر،
فأبدأ بمنشوراتي الخاصة ، ومن هو آخر متداخل للتعقيب على رأيه.
ومن ثم ألوج و أميج ، ارتفاعا وهبوطا... بصورة عشوائية...
--------------
| |
  
|
|
|
|
|
|
|
|
Re: الأعمدة السبعة (Re: حاتم إبراهيم)
|
مرحب بيك يا قصي
الحركة الرأسية ضرورة
لكن أنا عايز أحلل توجهات القراء وأساليب اطلاعهم
يعني لما تنتقل رأسياً وتختار موضوع هل بيكون تركيزك على عمود معين وانت طالع أو نازل؟
| |
|
|
|
|
|
|
|
|
|
Re: الأعمدة السبعة (Re: حاتم إبراهيم)
|
فعن نفسي ببدأ الاستكشاف عادة بالعمود التالت (العنوان)
ومباشرة بعده بشوف العمود السابع (آخر مداخلة) لسبب بسيط
آخر مداخلة بعرف بيها أهمية من عدمها الموضوع (شخصياً عندي كم نفر كدة مشغلهم indicators)
العمود السادس (الكاتب) ما بيهمني كتير إلا في حالة ما تكون في مداخلات.
العمودين الأول والتاني ما شغال بيهم.
أما عدد الردود والقرآءات (العمودين الرابع والخامس) فالأهم عندي عدد الردود لقياس التجاوب.
عدد لقرءات يهمني فقط في مواضيعي الطويلة التعريفية فقط، مثال (الموسيقى، المال)
أها، الباقين كيف؟
| |
|
|
|
|
|
|
|
|
|
Re: الأعمدة السبعة (Re: حاتم إبراهيم)
|
أنا بصراحة بهتم شديد ، بالأسامي ، إن كان كاتب الموضوع أو المعلق ، خاصة إنت يا أستاذ حاتم أنا بهتم جدا بمواضيعك وبتابعها بشغف شديد، ومحد البشرى و دكتور سيف ، وأعضاء كثر ولكن الإشارة دي للمثال فقط .
والمبرر ، أنه في أعضاء مؤكد إنك بتستفيد من كتاباتهم .
| |
|
|
|
|
|
|
|
|
 Re: الأعمدة السبعة (Re: Yassir Ahmed)
|
السلام عليكم
اهتم اولا بالحث عن الموضو الجديد (العمود الثالث) ويلفت انتباهى المتداخل ومداخلته (العمود السابع)
ثم الكاتب (العمود السادس) - فى ناس تهتم لكتابتهم ومداخلاتهم- اهتم للغه البسيطه لغه والمجزء لو كان الوضوع طويل
عدد القراءات والمداخلات (العمودين الرابع والخامس) لايهمنى كثيرا لانو ممكن الاهتمام - قراءه ومداخله- يكون فى اشاعه اوشكله (قبقبه).
.
شكرا
| |
|
|
|
|
|
|
|
|
|
Re: الأعمدة السبعة (Re: حيدر حسن ميرغني)
|
أي بوست بالنسبة لي عبارة بطيخة مقفولة ..
مرات في ناس أرصدتهم من المواضيع ليست جيدة ..
لكن تجي تلقى واحد من الجماعة ديل فاتح موضوع ممتاز ..
فليه تحرم نفسك بالانطباعية بتاعة الاسماء ..
غايتو انا شخصيا ماشغال بي حكاية الأسماء دي كتير ..
ولا هي المعيار بتاعي لتقييم الموضوعات بالمنبر ..
لازم اخش وأشوف الموضوع ..
غض النظر عن الكاتب والعنوان ..
وحكايتة الجواب يكفيك عنوانه ما شغالة معاي ..
من زمان أنا بقرأ أي حاجة القاها قدامي .. جريدة قديمة ..
كتاب .. مجلة .. رواية .. مرات والله لمن ما القى حاجة اقراها في البيت ..
بقرا كتاب اولادي بتاعة مدارس الاساس ..
واقعد اضحك في تدهور التعليم وطرق التدريس ..
زول ما أدوهو الحروف و(أ) أسد و (ن) نمر .. وكيفية نطقها ..
واستهجاءها .. وادخالها في جملة ..
عايزنو لي قدام يقرا كويس كيف ما عارف ؟ ..
مرات الولد يقول لي ده شنو يابابا انتا قاعد تقرا في كتبي مالك .. هههههههه ..
| |
|
|
|
|
|
|
|
|
|
Re: الأعمدة السبعة (Re: جمال ود القوز)
|
(شيخ) حاتم..حبابك يا صديقي
وحباب الأصدقاء هنا..
مزاج قراءة مشاتر ..ينفع؟..
قاعد اطالع المنبر باستمرار.. وعندي أي جهد نشر في هذا المنبر يستحق القراءة والمتابعة..وعادة القراية عندي بتبدى بعمود القراءات..
اول ما افتح المنبر ..ابحث عن عمود فيه اقل القراءات (الكلكات) وببدأ بفتح العمود ده وبقراهو..حتى لو الكاتب فدوى الشريف..!
لو لقيت قصيدة لصديقنا بله الفاضل..ح ابدأ بيها القراية..وكذا قصيدة لصديقنا ابوذر بابكر..ثم لو في قصة قصيرة او فصل من رواية ..ح ابدأ بيها..كتابات عثمان محمد صالح الأبداعية بتهمني شديد ..كتابة شاهين راتبة للغاية وأي حضور ليها بتكون من البدايات..لأنو عم شاهين ده زول مو هين تب..!
الحيلة التانية..بعمل لأي خيط لفت انتباهي..قصة اقرا البوست في سلسلة..وبعاين لناس معينة..محمد على طه الملك ، محمد البشرى ، و(سطر ) منتصر، تعليقات حيدر حسن ميرغني..ديل بقرا ردودهم اول حاجة و بعد داك برجع للمساهمة الأساسية ..مرات (سطر) منتصر يكفيني شر المتابعة (صحيح هي مسألة انطباعية ولكن نقول الحاجات بصراحة)..!
اكتر زول قاعد يجهجه باكاتي ..هو صديقنا زهير..لمن يعمل كذا خيط وفي لحظة واحدة..وقاعد اطالع كل الخيوط دي..لأنو زهير زول (شواف) وقاعد يجيب اخبار وتحليلات جميلة ومهمة لمحبي القراءة..!
في الأخبار ..أي حاجة جابها صديقنا الراحل صلاح جادات..بتكون نقطة بداية للقراءة والمتابعة..!
في الفلسفة..كتابات صديقنا وحبيبنا سناري.. وصديقنا محمد عثمان الحاج ،وصديقنا عبد اللطيف حسن ..ولمن ظهر نبأ رحيل صديقنا صلاح جادات..(قبل تسويد المنبر بلحظات) بدون ما اشعر مشيت الأرشيف وكنت بقرا في خيط لصديقنا عبد اللطيف بعنوان (يا طلاب وخريجي جامعة جوبا)..ولقد امتص هذا الخيط كثير من حزني على رحيل جادات..!!..شكرا يا عبد اللطيف..!
عندي تصنيف قاطعو من راسي..واسمو (ناس الخيوط المبتكرة)..وده فيهو مجموعة من الناس..قاعد اقرا حاجاتهم باستمرار: اسامة الخواض ، مصطفى مدثر ، بريمة محمد ادم ، محمد الحسين عبد الله ، حاتم ابراهيم..وعبد المنعم سيد احمد لمن يجيب اخبار انشطة مجلة (المسرجة) وهي مجلة سودانية مهاجرة..!!
ناس الخيوط المبتكرة..ميزتهم..انو اي كلام يكتبوهو وينشروهو ..بيكون متعب ومكلف للغاية..يعني بيمرقك من المنبر (الحميمية والونسة والنقاش البرئ العابر) وبيخليك تمشى وتبحث في النت والمكتبات..عشان تعرف الخلق دي بتسوي في شنو..!!
في الحوارات..قاعد اهتم كثيرا بحاجات صديقنا الرومانسي الجميل ول ابا الفاتح ميرغني..!!
اخر حاجة بهتم بيها ..هي الخيوط التي اكتبها ، ودي برجع ليها وبقرا أي مداخلة فيها ، لأني ببساطة ملزم اخلاقيا ان اقرأ التداخل وارد عليهو..!!
لأ اقرا خيوط عن نقاش ديني..واكثر الخيوط التي تجبرني على متابعتها في هذه الناحية هي خيوط صديقنا هشام ادم ، وكل ما اقرأها احس باحساس عجيب..!!
في بعض الناس ، بتحس انك داير تنداح في خيوطهم ، مثل محمد المرتضى حامد ويحي قباني..ديل خيوطهم قاعد احس فيها بانمحاء الحدود معاي..يعني تشوت زي ما عايز..!!
اكتر الناس القاعد احس فيهم بالصنعة والتزييف لحد الإبتزال..هم صديقاتنا واصدقائنا الجمهوريين..في اول لفة يقولوا ليك الأستاذ محمود محمد طه قال..وكأنما كتب الأستاذ بعيدة عن متناول الناس..!!
من تقاليد القراءة..سعيد ان المنبر في اخر خمس سنوات تقريبا ..اختفت فيهو ظاهرة الأشباح الأسفيرية وكل زول/ة هويتو واضحة..!!
لمن ازهج ، وكتير ما يحدث ، برجع للمكتبات..ابراهيم كوجان ، محسن خالد ، محسن طه ، بشاشا..توما ..عالية عوض الكريم ، شيري ، سيجمان ..وناس كثر..!!
كل ما زول /ة يقول لي يا كبر عينك في راسك ، وياريت تبطل سياسة ، بقوم برجع لمكتبة محمد النور كبر واشوف الزول ده قبل كم سنة كان بيقول في شنو..!!
كل الحب والمحبة للناس البتابع كتابة عمكم محمد النور كبر..وكل المحبة للناس البتعاين لأخر متداخل في خيط في هذا المنبر..فلو كان كبر..بتقوم تتجشم جهد القراءة والمتابعة..!!
وأي جهد لنشر الكلمة ، ونشر الكلمة مسئولية كما حدثني صديقاتي واصدقائي ، في هذا المنبر هو جهد قمين بالمتابعة والقراءة..!!
والتحية لناس كتيرة بتكتب في هذا المنبر وبتكون عندنا رغبة المشاركة والنقاش ولكن الزمن يعصر علينا..!!
اتمنى يا (شيخ) حاتم ما نكون شرعنا كتير..وعارفك ح تقرا الخاطرة دي بدقة وصبر..!!
لا يهم من الكاتب ، ولا يهم العنوان الإثارة ، ولا يهم عدد المتفاعلين (سواءا كانوا قراء او مناقشين) وانما المهم وجود الكتابة في ذات نفسها..!!
الأجمل يا صاحب..الشللية والتكتل لا يمنعنا كيف نقرأ حاجات المنبر..!!
اخر خيط قاعد يستغرقني كثيرا ، خيط ول ابا دكتور السنوسي بدر (جابورة فجاغ السراريق) ، ومتابع الخيط ده من اول لحظة (انفعال الكتابة التلقائية والأخطاء الإملائية لغاية التصحيح والتعديل)..وهو من خيوط الإبتكار..!!
كتر خيرك يا حاتم..واعفى لينا من الأندياح السايب (المعلقات وكده)..!!
ودمت طيبا يا حاتم..
كبر
| |
|
|
|
|
|
|
|
|
|
Re: الأعمدة السبعة (Re: حاتم إبراهيم)
|
المعذرة للردود المجمعة لمحدودية مداخلاتي الست.
مشكور الأخ ياسر أحمد وشكراً للثقة الغالية
وبدون شك للاسم أهمية في الاستدلال على المحتوى لحد ما
لكن بالطبع هناك أسماء من الصعب التنبؤ بمحتوى مواضيعها
بالذات الأخبار المنقولة.
+++
مرحبا أخ عاصم علي
بالتأكيد هناك حركتين لاستكشاف محتوى المنبر
حركة رأسية ودي كلنا معنيين بيها والحركة الأفقية ود البتحدد أسلوب الشخص
أنا سعيد جداً بتطابق (حركاتنا) الأفقية
ههههه مرحب بيك
+++
مرحباً أستاذة صباح
العمود السادس الخاص بالكاتب مهم بالنسبة للأعضاء المتخصصين في مجالات معينة
لكن من الصعب تحديد نوع الكتابة لواحد زي زهير مثلاً
مالم يقرأ العمود الثالث (العنوان)
كدة في ناس هنا حيكلمونا عن الانطباعية
منورة البوست
+++
مرحب بيك أخ حيدر حسن
فعلاً آخر متداخل بيحدد ليك (حالة) البوست
من حيث السخونة والبرودة، عندك مثلاً أنا لي سنين بتلاقيني بوستات
بعاين لعنوانها كدة بقول خليها ليوم تاني، لكن أول ما أشوف متداخل من الإنديكيترز
معناها حصل (breakthroguh) يستدعي الدخول والشوفان
تتذكر البوست بتاع (عدت هذه المرة لأبشركم...) والله بعيني ما شفتو
لكن متأكد لو في ناس محددين دخلوا معناها يا دورت ولهبتا قامت
يا كمان اكتشفوا نبي جديد في جخنون بيجاي ولا بيجاي هههه
دي ما انطباعية بقدر ما إنها نوع من الاستدلال بالمعالم
فمرات بيكون في ضيق زمن يجبرك على تحديد الخيارات
+++
مرحبا أخ جمال القوز
من ناحية عامة أنا بتفق معاك تماماً في القيمة العالية للمكتوب كيفما جاء
ومن أي كاتب، دي نظرتي من ناحية تقنية، فالمحتوى عندي كنز ثر جداً لدراسة اللغة
ومن ناحية تانية مجال حيوي للاطلاع على أساليب التفكير لعينة مقدرة من الشعب السوداني
وفعلاً الاسم ليس معيار للحكم ولكنه مؤشر للتوجه (trend)
+++
مرحبا أخ كبر
طبعاً المدخل باعتبار عدد الكلكات أسلوب فريد في التصفح
وقد أخالفك في إنو مسألة التصنيف بالاسم انطباعية فهذا تصرف طبيعي
خاصة إذا كان العنوان لا يعطي فكرة كافية عن المحتوى
إضافة إلى أن نوع الموضوع ذاته لن يترك لك سوى الاحتكام للاسم
فمثلاً قصيدتين واحد لفلان والتانية لفلان العلاني من الواضح أنك ستميل لأحدهما
زهير يعامل المنبر كمدونة إخبارية لذلك يهتم أكثر بالكمية المنشورة
لكن للأسف هذا يكون على حساب المواضيع المهمة التي تذهب للقاع أو الصفحة التالتة
ويفوت على الكثيرين رؤيتها لهذا السبب.
ناس الفلسفة ديل المفروض يعملوا ليهم تصنيف لأنو من الظلم تضيع مجهوداتهم
في غمرة الشلليات والقبقبات هنا، هذا ما ظللت أنادي به هنا من أول شهر للعضوية
شكراً للمشاركة، وفعلاً قريت مداخلتك بدقة وصبر
تحسباً
| |
|
|
|
|
|
|
|
|
|
Re: الأعمدة السبعة (Re: حاتم إبراهيم)
|
الأخ حاتم إبراهيم
لك الود والتحايا الطيبات
سبحان الله .. كنت أفكر في نفس الموضوع على نية فتح بوست تحت
عنوان كيف تقرأ المنبر .. ما أدخلني في هذا البوست هو العنوان إذ
أن الرقم سبعة "معشش" في عقلي الباطن فبمجرد قراءته انتقل نظري
للكاتب.. فازداد فضولي عندما وجدت إسمك .. فقلت في نفسي ماذا
ياترى كتب حاتم عن الرقم سبعة .... قراءتي للمنبر مطابقة لقراءتي الكتب
في المكتبات بغرض اختيار كتاب .. تجد أمامك إسم الكتاب .. إسم المؤلف
ثم اللوحة المرسومة على الغلاف .. على تفصيل كل عنصر من هذه
العناصر .. نفس الطريقة اتبعها في قراءة المنبر .. فأول ماتقع عيناي على
العمود الثالث (العنوان) ثم العمود السادس (الكاتب) وقد بلغت في ذلك
شأواً بحيث استطيع أن أعرف الكاتب من خلال العنوان فقط واتدرب على
ذلك يومياً بحيث أقرأ العنوان واتعرف على الكاتب دون النظر إلى اسمه
لأتحول بعد ذلك للإسم للتأكد ومن النادر جداً أن أخطئ في تحديد ذلك ..
وعلى ذلك أقرأ معظم المواضيع التي تشدني .. أحياناً أحس أن المنبر خاوياً
بمقياسي وحدي .. فأقرأ معظم الموضوعات معتمداً أيضاً على العنوان والكاتب
مع تحياتي وتقديري ....
| |
|
|
|
|
|
|
|
|
|
Re: الأعمدة السبعة (Re: بابكر قدور)
|
التعامل الفطير مع الأشياء مشكلة
في ناس فهمت إنه صباح بتقصد باسم المؤلف
حروف اسمك جمال الفال وراحة البال وهجعة زول بعد ترحال
ونست الموقع الرابض تحت الإسم
ههههههههههههه
| |
|
|
|
|
|
|
|
|
|
Re: الأعمدة السبعة (Re: احمد الشيخ)
|
سلامات احمد الشيخ
اتفق معك في حتة الكاتب دي
اما العنوان احيانا قد يكون من شاكلة "هجم النمر" للفت الإنتباه لموضوع في غاية البساطة او مرات لا يُعبَر عن العنوان
او كما يقول علماء النفس Surprises in headlines work because human brains like novelty
| |
|
|
|
|
|
|
|
|
|
Re: الأعمدة السبعة (Re: احمد الشيخ)
|
الاعمدة دى وين يا حاتم؟
شايف البوستات كلها فى عمود واحد.. لو تقصد الصفحات فانا لا اتصفح سوى الصفحة الاولى (الوش).. ودى زاتها نادر ما أقرأ غير اللون الازرق.. يعنى متابعة
| |
|
|
|
|
|
|
| |
حاتم إبراهيم
Yassir Ahmed
Asim Ali
حيدر حسن ميرغني
جمال ود القوز
Kabar
بابكر قدور
هاشم احمد ادم
احمد الشيخ
Abureesh
فيس بوك
تويتر
انستقرام
يوتيوب
بنتيريست