|
Re: حكومة مكونة من اربعة وسبعين وزير ووزير دو (Re: Osama Mohammed)
|
اكتر منظر بعجبني في شندي لما أشوف (حاج) قبطي لابس جلابية ولافي عمتو،وماشي لعزاء.. أو (حاجة) قبطية لابسة التوب وحايمة في السوق.. لكن الناس ديل للأمانة ماعندهم نهمة في السياسة،مائلين للبزنس اكتر والهندسة والطب.. ومادايرين حاجة كتيرة بس طالبين من الناس يخلوهم في حالهم.
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: عليش الريدة)
|
اكتر منظر بعجبني في شندي لما أشوف (حاج) قبطي لابس جلابية ولافي عمتو،وماشي لعزاء..
والله كلامك صحي يا عليش شفتو بعيني القبطي يجي ويرفع الفاتحة والناس الفي العزاء وبكل اريحية وطيبة قلب يقومو ويرفعو ايدينهم بالفاتحة جبر الله كسركم جبر الله كسركم,,السودان ده كان بلد جميل قبل تمكن الهوس منو كان بشكل كل القادمين ليهو,,في اثيوبيا وفي مرتفعات ارتريا لا المسلم بياكل لحوم جزارات المسيحيين ولا المسيحيين بقربو لحوم المسلمين..السودانيين الزايرين ما عندهم مشكلة أي لحمة بياكلوها وحتي المسيحيين الجو من هناك للسودان بقو عادي يشترو من الجزارات الاقباط مسالمين وامينين جدا ما عنم غرض في غلبة السياسة,فقط وكما قلت فلندعهم بسلام مع اعمالهم
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: زهير عثمان حمد)
|
زى ما ذكر احد الاخوة اهلنا الاقباط ليس لهم الرغبة فى التورط فى السياسة بل ناجحين فى البزنس ومروقين مالهم ومال سياسة ووجع الراس ولكن من يرغب فى السياسة المجال مفتوح له الدكتور موريس سدرة كان وزير صحة فى حكومة نميرى انا اتكلمت مع السيد الدكتور موريس سدرة فى عام 1996 عن اهتمامه فى السياسة خلاف اهله كلهم ناس بزنس قال لى هو كان ناشط سياسى منذ ايام الجامعة
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: بارودى مصطفى فاشر)
|
يا أبو الزوز
التجارة شطارة يا حبيب ...
فقط تذكر جوزيف مكين و ادوارد اسعد ... و اين مكانهم من اقتصاد السودان الآن ...
و تذكر آل بسطا في عطبره ... و عمك توما في الفاشر ... و غيرهم و غيرهم ...
هم قادرين لو أرادوا الخوض في السياسة ... و لكن الأجواء غير صحية في السودان ...
اما الأب فليثاوث ... فهو على وفاق شديد مع هذه الحكومة المجرمة ...
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Abdullah Idrees)
|
أولا: تقدير أعداد الأقباط ب3 ملايين مبالغة شوية ..
ثانياً : وكما قال الإخوة قبلي .. الأقباط أصلاً ما شغالين بالسياسة كتير .. إهتمامهم أكثر بالبزنس والأعمال الخاصة ..
ثالثاً : الأقباط يجدون معاملة كريمة جداً من السودانيين جميعاً .. معاملة أفضل بكثير من بعض السودانيين المسلمين .. عايزين شنو تاني؟
رابعاً : بكري الصايغ كان من الكتاب المميزين هنا في سودانيزأونلاين .. لكنه فجأة هاجر المنبر ومن غير عودة .. يا ريت تعرف السبب شنو؟
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Ali Abdalla Hassan)
|
سلامات المعروف عن الاخوه الاقباط انهم متميزين فى المجالات العمليه طب ..صيدله ..هندسه ..الاقتساد والمال...العلوم الاساسيه (رياضبات -فبزياء كيمياء -علوم حيويه). واذا عدنا الى التاريخ نجد ان المسيحيين واليهود فى المنطقه العربيه تحت ظل الدوله امويه او عباسيه او ...كانو اصحاب نبوغ نفس المجالات تقريبا وتميزهم فى مهنهم جعلهم اصحاب شهره فى مجالهم . لدرجه طبيب الحاكم واسرته ... او الوظائف الماليه (تقابل محافظ البنك المركزى او وزير الماليه بمسميات ايامنا هذه)
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Asim Ali)
|
التحية لبكري الصائغ
أهلنا الأقباط من أطيب الناس وأكثرهم تسامحا وطيبي المعشر
أتذكر في ليل أمدرماني ماطر أضرينا نقضي ليله في بيت الصديق ميخائيل في المسالمة .. صحينا الصباح حبوبته جات ختت لينا الإبريق والمصلاية عشان نصلي الفجر قبل الفطور .. ووقتها كنا ما بالحيل علي الصلاة(الله يغفر لينا) ووصفت لينا القبله بي وين .. المهم صلينا خجلة ساي ...
الأقباط مكون سوداني أصيل ...
قصة ثانية مشينا لي عزاء واحد من الشباب المهم دخلنا بيت العزاء ورفعنا الفاتحة , صاحبنا ميخائيل رفع معانا الفاتحة , سألته بعد ما خلصنا نحنا قرينا الفاتحة إنت قريت شنو ؟ قالي يا زوول أن صور القرآن الصغيرة دي كلها مجضمه وقالي انا زاتي قريت الفاتحة علي روحه ( شوف النس كانت سمحة كيف) قالي زمان كان بحفظوها لينا بالغصب في المدرسه , وأهلنا ما كان برفضوا
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: عبدالعظيم عثمان)
|
Quote: حكومة مكونة من اربعة وسبعين وزير ووزير دولة..مافيها ولا قبطي واحد!! |
عندما يعود معيار الاختيار لشغل مناصب "الوزارة" والوظيفة العامة الى السيرة الذاتية والمؤهلات والكفاءة بعدها ممكن ان تجد قبطيا او اي شخص آخر دون النظر الى خلفيته الطائفية او الاثنية او الجهوية
لكن حكومة يعينها "البشير" بالتشاور مع "بكري" ياهو كده
محاصصات وتوزيع غنائم بين حملة الكلاش الفعليين والمحتملين
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Hatim Alhwary)
|
ملاحظة دقيقة
يبدو ان من اعد امر الوزارة لم يتذكر موضوع الاقباط لكن له العذر فكم قبطي تولى الوزارة فى ال28 عام المضت
الجبهة الاسلامية القومية المستهبلة فى زمن الديمقراطية ضمت لمكتبها السياسي اقباط و ذلك لذر الرماد على العيون لما نجح انقلاب الانقاذ كان من اهم اولياته تهجير الاقباط و الاستيلاء على ممتلكاتهم وقد حدث لكن ليس بالنجاح التام و بفضل ذكاء الاقباط السياسي استاطاعو بعد السنين الاولى ان يتجنبو بطش الانقاذ و استطاعوا ان يحافظو على وجودهم فى السودان
لذلك الانقاذ لا تحتاج الان لمغازلتهم او ترضيتهم فالذين يعملون فى السوق منهم يعملون تحت بصر و سمع الانقاذ و موافقتها و اظنها كمان بتقسم معاهم بل اكيد بتاخد الاتاوة
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: هشام المجمر)
|
الأخ زهير وضيوفه الكرام
عمل في الخارجية السودانية الدبلوماسي المرموق الراحل ماريو اوتو انطون الذي توفي في اوائل التسعينات كما أن عمه كان احد الدبلوماسيين البارزين في الخارجية (نسيت اسمه) . من الأقباط البارزين البروف توماس توفيق جورج والذي كان يسافر بسيارته إلى مدني لإلقاء محاضرات في جامعة الجزيرة إضافة إلى اكثر من جامعة بالخرطوم وعمل مستشارا لوزير الثروة الحيوانية ورغم انه يعيش حاليا في كندا إلا انه يقضي معظم اوقاته في السودان ويشارك في الندوات والمحاضرات وهو خبير عالمي في تربية الأسماك .
تحياتي ووافر احترامي
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Gaafar Ismail)
|
العالم الوقور والأديب هنري رياض سكلا .. كان عالماً في القانون كتب في الأدب السوداني عدة مؤلفات .. ماذكر إسمه إلا وقرن معه إسم الجنيد علي عمر .... في مجال الترجمة حيث ترجما معاً العديد من الكتب. شقيق إدوارد الأستاذ هنري رياض سكلا .. أيضاً من علماء القانون المشهورين .. شغل العديد من المناصب العليا في (ديوان النائب العام) سابقاً وتدرج فيه حتى منصب المدعي العام .. كان محاضراً في القانون هاجر بعد إنقلاب الإنقاذ أعتقد إلى أستراليا. التحية لأهلنا وأصدقائنا الأقباط السودانيين أينما كانوا .... شكراً زهير ...
| |
|
|
|
|
|
|
Re: حكومة مكونة من اربعة وسبعين وزير ووزير دو (Re: Gaafar Ismail)
|
أنا لا أحب مثل هذه التصنيفات ....
خاصة وأن أقباط السودان هم سودانيون أصيلون وليس هناك سبب واضح يجعل أي من الحكومات الوطنية تستبعدهم بقصد عن التشكيلات الوزارية
كما أنهم لم ينغمسوا في العمل السياسي بشكل واضح أو بشكل طائفي ...
يعني كل من مارس السياسة منهم مارسها بشكل فردي ... ولم يعهد عنهم أنهم دعموا هذا الحزب أو عارضوا ذاك ...
ولولا أن الجنوبيين كانت هناك كيانات حزبية تضمهم لكان وضعهم مثل وضع الأقباط ...
لأنهم وبحكم ديانتهم لا يمكن أن يكونوا أعضاء في أي حزب "إسلامي" .... مثلاً ..
ولأنهم زاهدون في السياسة فلم يعملوا على تكوين كيان حزبي خاص بهم ..
بل ولم ينخرطوا في العمل في التنظيمات الحزبية الجنوبية كالأحزاب ذات الصفة المسيحية الظاهرة بالاسم حتى ...
الأقباط مكون سوداني جميل ..
تحياتي لزملائي سابقا بمدرسة شندي الابتدائية الشمالية : إميل برسوم صفة ويوحنا جورج وناجي راغب وفايز حبيب ...
والتحية والتجلة لاستاذي بذات المدرسة الأستاذ جورج نظير .. أستاذ اللغة العربية والذي ربطتني به علاقة مميزة
تحياتي له أينما كان ....
| |
|
|
|
|
|
|
|