|
|
 عاصم الطيب قرشى ..سمحة المقدرة
|
بعد التحية والاحترام ...
كانت الخطة أن يزورنى وأسرتى الصغيرة "اللخو" عاصم الطيب قرشى فى وقفة سريعة فى معية الابن العزيز "محمد ابو عركى" والشاب المشعث الشقيق تبارك شيخ الدين والشاب الرقيق ايهاب عكود ...
وبعدين يمشوا بوسطن لحضور زواج شقيقة الفنان التشكيلى الشافعى دفع الله ...
بس من غيرتى على الفن السودانى قلت ما بدس عاصم من السادة المستمعين الافاضل ولازم أعمل لمة حلوة ...
تحصلت على مكان قريب وصغير وقمت بدعوة كل من عرفتهم فى بلادنا الصغيرة المتقاربة
أفراد وأسر سودانيين
جماعة العقيدة البهائية
جماعة الصالون
جماعة "مجموعة ضد الكراهية"
زميلات وزملاء العمل "والعمل التانى برضو" ...
سيد البيت :):)
راديو محلى ، اذاعة محلية وتلفزيون محلى ...
وعست الكسرة ..وفركت البامية، ورجيت الرايدها الله ...
عندما وصل الركب فى العاشرة صباحا ....كان اللقاء ضاحكا وصاخبا ..والتعليقات الحلوة مع الشاى واللقيمات وكل شى يبدو سودانيا جدا وبيتنا جدا جدا جدا
عاصم الطيب لقى عودى متختخ ..وزنو ...قلنا دى ما مشكلة ..مسك جيتار يسرى جضمو قلنا عادى ..
الى ان فتح محمد عركى الاورقن وأخرج عاصم الكمنجة من تلافيفها ...وفجأة سمعنا "القباااااا...وانا وتبارك كأنه ضغطوا زر ...جررررررر بكينا ...
واتقالدنا وعرفنا أننا مقبلين على ما يشبه الحواف والهاويات فى أودية الانفعالات والذكرى ...ولا أكذبكم الامر كنت فى داخلى أقول: الببكينا أنا وتبارك سوا ده ما هين...
نام الجمع وصحوا عند الرابعة وختينا الغدا وبدت لخمة الودوا العدة وجيبوا الميكرفون وورونا المحل ومفتاح عربية ايهاب راح ....المهم لمن وصلنا ستة ونص
كان المكان شبه ملىء بالحضور من الاسر العراقية ...
المكان نفسه صالة تحتية لمطهم بيتزا ...دافئة أسرية اضاءتها مناسبة لحجمها وتحتضن الاصوات بهدوء دون تردد أو صدى ,,بها أنواع من الجلسات من كراسى وثيرة وطاولات مستديرة الى بنكات بكراسى طويلة
وضعنا الكأسات والاطارا المذهب الجائزة التى تحصل عليها من المناسبة الرسمية التى أتت به الى أمريكا وهو مهرجان الصفارة العالمى ..تحت اضاءة واضحة
وكان لحضور الشافعى وخالد كودى اثرا عميقا علينا وعلى العرض
وما أن قدم تبارك الرجل ...وبدأ الحوار بين آلته الدامعة الكمنجة" وحرفية ومهارة محمد عركى ولعب ايهاب المتقن ..حتى صمت الجمع ووالله ما طالبنى حليفة لمدة ساعتين متتاليتين "لم يرمش أحد"
عاصم قاد المستمعين المشاهدة الى سياحة رقيقة عميقة وواعية ..فى تاريخ الفن السودانى ..من المركز للهامش وبالعكس من البداوة الى ما بعد الحداثة ..
صوته يتلون بلون الارض والمناخ ..فلو سمعته يغنى لبيجاوى ..لن تصدق أنه نفس الصوت الذى يغنى توا لنوباوى انقسناوى دينكاوى حلفاوى أو احمد الجابرى ..
كان صوته وآلته "الدامعة" الكمنجة هما الراحلتين اللتين أقلنا بهما "نحن وغيرنا" فى هذا العبور الكثيف لمجاهل بلد لنسيجه الاجتماعى أعقد التركيبات، لحاضره السياسى ولتراثه التاريخى أسئلة لا تسهل الاجابة عليها ...كان يحمل الاسئلة والاجابات على قافلته الصوت ذو المرونة العالية والثقافة المدروسة والفن الاصيل ...ويطرحها للجمهور فيلتفون حوله مصدقين مصفقين راقصين ممتنين لخبرته الطويلة وسلاسته الواضحة ...
لقد أحبوك يا عاصم وقالوا عنك أجمل القول وتمنوا لو أن المناسبة كانت أكبر وكانت أكثر ولو أنك كنت ماكثا لفترة أطول وحدثوا عنك اصحابهم وطلبوا منك المزيد...
ياعاصم الطيب ...انا هنا، وعلى قلة حيلتى، أنصبك شعاعا أولا لشمس الغد التى ستشرق على سودان مسالم ...
أكتب هذا عنك يا عاصم ولا أتناسى دور الفرقة التى صاحبتك محمد عركى الذى رضع البن من الكيبورد وايهاب الصوفى الخجول الذى يجيد لغة واحدة "الايقاع" والفرصة الطيبة التى أهديتها لابنى "محمد ناصر الطيب الختام " ذو السابعة عشر كم...كان فخورا وهو يعزف على الايقاع خلفك وهذا شىء لا تستهين به فابناؤنا ينتقدون فننا بلا رحمة ويعرفونه "بالحتة" ...وقد شاركوا من خلال فرقة المدرسة فى اعمال ضخمة ويسمونهاهناك "عالمية"، أكد لى انك عبقريا ..
طبعا شهادته ليست بهذه الاهمية لانه صغير ولم يزور السودان فى حياته ومطنقع امريكى ..لكنها تعنى الكثير للشباب فى عمره ...
ياعاصم اعجبت الخواجات البيض ومعظمهم كانوا متخصصين بالفن وأعجبت المستمع العربى العراقى الذين لا يتذكرون من أإانى السودان غير ازيكم وأعجبت الباكستانيين والهنود البهائيين وهم يأكلون ويشربون الموسيقى فى عقيدتهم وطيرت الصداع من راس صاحبتى ماجدة محمد على الدكتورة ..وبكيتنا انا وتبارك الحالة هو ظلامى وانا مستنيرة .تانى شنو ...؟؟؟
بس نقول سمحة المقدرة
|
|
 
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
يااا طماضر يا المقداد يا اولاد شيخ الدين كلكم
سليتو روحنا .. كفاكم ما تججو مارقين !!
مش خلاس كملتوا الجرس ؟؟
اسمعى لو كان ولا بد ممكن تخلوا تبارك ..
وتعالوا كلكم ...
ـــــــــــــ
شكلى ح ابدلكم .. لمن ابقى على بكلمك ...
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: دينا خالد)
|
يادينا يختى قالوا يضع سرو فى "ارقص" خلقو ..
ترا أرقص خلقو ده تبارك ..حتاه للارض ومشى اهلو نضييييف ...ما بتخلى ..
زمان عثمان ودخالتى سعاد الله يرحمو كتلوهو ناس الامن ، الله لا كسبهم، كان فردة تبارك ده وقدرو فى العمر ، كان مسميهو "تبارك المعارض" بفتح الراء ...
وياحليلك ... نشكرك على سؤالك عنا وكان الله طلق بنجى ..
محبتى .
حسة انتى فى اولاد شيخ الدين ولا فى ود الطيب قرشى ده؟؟
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
منورة ياطمطم ومشتاغوون ياااخ
ودالطيب مو هين وهو عارف انا بحبو قدر شنو والحمدلله الجاكم
واستمتعتو بيهو واكيد من الحكى عشنا اللحظة معاكم وكدا
ــــــــــــ
دا الفيديو وعلى فكرة التسجيل من عندنا فى اوسلو فى واحد
من المهرجانات الصيفية ساتكلم عنها لاحقا ,,, لكن دحين ركزى
برضو فى الزول بتاع الساكسفون دا.. اللابس طاقية السعف ....
تحياتى
!OOOOOOBS
معليش
الريس عطل الاكواد مرة تانية
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: سمندلاوى)
|
يا سمندلاوى انت أهل مكة الذين هم أدرى بشعابها ...
وغير انه فنان ..الطيبة دى شنو؟؟؟ عاصم الطيب تاكل تقش ايدك فى طرفو ....
لاقيت نكتته العملها ..حاميانى انوم بالليل ..ألقى روحى مقنقشة بالضحك ...
لبس ليه جلابية بيضا مكوية سممممممحة ومعاها طاقية بيضا "ملوية" أسمح منها ..شكرت ليهو اللبسة وقلت ليه سارية عندو مركوب هنا خلينى أشوفو ليك المهم فى فتيش المركوب لقيت جزمة كشف شكلها زى المركوب وعلى أرقى كده
لقيت فرده قمت جبتها ليهو ..لبسها طق بقت قدرو ..وعجبتو شديد ..اها أنا داخلة ومارقة وملخومة ..جيت مارة بى عندو لقيتو لابس الفردة ديك وواقف ...قلت ليه: اها عجبتك؟ اجيب ليك التانية؟ قال لى لا ما مشكلة واحدة كفاية ....هههههه
وحسة حيلى مات من الضحك ...الكتابة دى غلبتنى ....هههههه
تسلم يا سمندلاوى ......
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
شكراً استاذة تماضر شيخ الدين
الاستاذ الصديق عاصم الطيب ، من اكثر المبدعين الذي قدموا مفهوم قضية الهامش والمركز عبر اعماله
الابداعية ، ولانه مثقف يجيد لغة الحوار الثقافي فانه يعمل بطريقته الفنية والابداعية ، وبتلك الكمنجة الساحرة
واستطاع ان يفرض على التلفزيون روائع اهلنا في الانقسنا من تلك التسجيلات الرائعة ، وانا واحد مع اخرين كنا
نتابع الاخ عاصم منذ ان كان طالباً في المعهد ، وهو من وقت باكر عزف مع الراحل مصطفى سيد احمد ، وعاصم
الله يديهو العافية ، كلام السودان الجديد وعلاقة الهامش والمركز وحوار الثقافات التي قدم الكثيرون التظير فيها
قدمها عملياً ...
حقيقة لا نعرف اقدار مبدعينا في داخل السودان ، وانت واحدة من ابداعات بلادي ، وربنا يديكم العافية
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: مصطفي سري)
|
Quote: شكراً استاذة تماضر شيخ الدين
الاستاذ الصديق عاصم الطيب ، من اكثر المبدعين الذي قدموا مفهوم قضية الهامش والمركز عبر اعماله
الابداعية ، ولانه مثقف يجيد لغة الحوار الثقافي فانه يعمل بطريقته الفنية والابداعية ، وبتلك الكمنجة الساحرة
واستطاع ان يفرض على التلفزيون روائع اهلنا في الانقسنا من تلك التسجيلات الرائعة ، وانا واحد مع اخرين كنا
نتابع الاخ عاصم منذ ان كان طالباً في المعهد ، وهو من وقت باكر عزف مع الراحل مصطفى سيد احمد ، وعاصم
الله يديهو العافية ، كلام السودان الجديد وعلاقة الهامش والمركز وحوار الثقافات التي قدم الكثيرون التظير فيها
قدمها عملياً ...
حقيقة لا نعرف اقدار مبدعينا في داخل السودان ، وانت واحدة من ابداعات بلادي ، وربنا يديكم العافية |
عشان نتأكد بس
شكرا مصطفى سرى على الاسهامة الضافية ..ولك التحيات الزاكيات
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
الاستاذة تماضر..
عاصم هذا انسان مسكون بالابداع الكلكي "عادانا الله" المتحدث بكل لغات السودان ومدمن لكل ترانيم القرى البعيدة وحتى اغاني الاطفال
حولها هذا المسكون لفن يستسيغه كل ذي اذان ويذوب فيه كل ذي قلب نابض..
دشكا دشكا دشكا--لم اسمعها منذ قرابة الثلات عقود وكانت من المحرمات - جعلنى هذا المسكون اتمايل طربا معها - كاني استمع لام كلثوم-
انا دا هين الخواجات كانو برددو وارهو لا الله الا الله محمد رسول الله..
تحياتي
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: حسين نوباتيا)
|
| Quote: دشكا دشكا دشكا--لم اسمعها منذ قرابة الثلات عقود وكانت من المحرمات - جعلنى هذا المسكون اتمايل طربا معها - كاني استمع لام كلثوم- |
وووالله ده الحصل لى مع انى ماااااا من ناس ام كلثوم شديد كده ...
مش حصل لى أنا حصل لى كل الحضور ...والخواجات على العرب على الافارقة الامريكان وبلاد السودان ..كانوا بيرددوا معاه "دشكا دشكا دشكا" ...مبالغة
ويا حسن نوباتيا ليك الشكر الجزيل على الحضور ...وتعليقك اللطيف.
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: ترهاقا)
|
| Quote: هذا العاصم إنسان فنان للنخاع ، وماشي في الخط الصحيح |
كلام زى ده منك ..انت ده أحمد ساطور الفنان للنخاع ده؟؟ طوالى نشيلو بكاملو ونعتمدو..
وماشاء الله الاولاد منتهى الحلاة .....
وووينك انت؟؟
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Safa Fagiri)
|
الله يفرحك ...فرحتينى ...
ولك المحبة كلها وزد عليها قليلا ....
انتى يا صفاء مش فى بوسطن؟؟
ممكن تدينى نمرتك فى المسينجر لانى عندى موضوع كده مع ناس بوسطن ديل هام وضرورى ..ولك منى كل التحيات والتهنئة بعيد الأم لك ولمن معك
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
يوم الخميس 7 مايو 2009
بوسطن - بدعوة من خالد كودي ..
فاصل مع المبدعة الفرنسية الاصل Veronique-Anne Epiter
و التى اسرت لي انها كانت ترتع خوفا في حضرة هذا الموسيقى المسكون..
خالد كودي كعادته - يُنظر-
مقطوعة بالViolin الذي تحول لطمبور بقدرة قادر
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: حسين نوباتيا)
|
عاصم الطيب دا من الناس البتخليك تفتخر انك سودانى
صيف 2006 منعمشوف وباقى الشفوت عملو لينا لمة معاهو فى امستردام لمن اتذكرها لمن جسمى يرجف
تحياتى ياعاصم يا اكتر من مبدع
شكرا ياتماضر على الكتابة الجميلة الخلتنا نعيش معاكم الجو الجميل
كمان تحية للشباب الشاركوا عاصم
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: معتز جعفر الحسن)
|
شكرا تماضر
عاصم الطيب قرشي انسان عميق عمق النيل الازرق
فنان لديه فكرة .. زاملته لعام واحد في معهد الموسيقى
كان خريج في خامسة وكنت برلوم في اولى ولكنه كان صديقا لي
ومحبا للمسرح بذات حبه للموسيقى ...
سجن سجن لاسوكا سجن سجن لاسوكا
تسلمي تماضر ويسلم عاصم
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: معتصم ود الجمام)
|
الأعزاء
تماضر و تبارك..
عبركم أرسل تحياتي للعزيز جدآ والمسكون بعشق الموسيقى
عاصم الطيب قرشي.. و بالمناسبة عاصم حلاويني وهو حفيد الشيخ
قرشي ود الزين السماني القادري..
بالمناسبة يا تماضر أرجو منك إرسال رقم هاتف عاصم و محمد عركي عبر
الماسنجر ولك الشكر.
عادل نجيلة/ أريزونا
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: malamih)
|
| Quote: عاصم الطيب قرشي.. و بالمناسبة عاصم حلاويني وهو حفيد الشيخ |
حلاوي
thanks Tamadur for this post about Asim Altyb Gurashi , he is full of love to sudan and speically the nile culture
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: الجندرية)
|
والله استمتعنا بى زيارة الموسيقار عاصم الطيب لى أمريكا متعة روحية وجمالية وموسيقية نادرة جداً ....
نفض غبار الوجدان - التافه - المتدسّى ورا الغلات والمجاملات والمعايش ... وبكّانا ... ورقّصنا بى قرون خيالية تتلفت للكِرَن!
و.... و ....
... المهم ....
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: الجندرية)
|
Quote: هي ياتماضر
مقدرة عصام الطيب دي دايرة ليها رتينة؟
ربي يزيدو جمال علي العليهو
الرتينة بدور ارفعها لعواسة كسرتك دي!!!
لووووووووووول
|
ويسألونك عن الكسرة .......هممممممممممم
الكسرة دى سوائل عديل كده ...زمان عندنا جارتنا ظريفة كده ..وقاعدة تتغدى معانا وكان فى ملاح رجلة "الله يكرم السامعين" قامت أمى فاطنة قالت والله الدكتور قال لى أكلى رجلة عشان فيها حديد ..قامت المرة المجاملة دى قالت بابتسامة الطيبة ديك البتجى للناس لمنيكونوا بتغدوا فى بيت ناس اها مستخدمة لتلك الابتسامة قالت موافقة: آى الرجلة دى سوائل ...وواصلت لقمتها ونحن الشباب نفتفت من الضحك ..ولمن أقول ليك شباب بقصد تلك الحالة التى كناها بين أهلينا لا نغسل عدة ولا نطبخ رجلة وبالطبع لا نعوس الكسرة البتة البتة ..امسكى يالدنيا دورى وعملت قراصة بملاح مفروكة لاولادى الخواجات ، وقالها محمد بالصوت الخواجة الواضح: آى ضونت لايك قراصة ..ايام أ كسرة مان ....
ترجمتها كالآتى:
I don't like Gurrasa, I am a Kisra man
ومن يومها أنا أعوس الكسرة واتملق بها أولادى لأقربهم نحو ثقافتنا وعاداتنا السودانية "الصعبة" ...فلك التحية ...وهههههه
أما تمبس فقد أصبح من ضمن "المسكوت عنه" ...ولا أزيد ...
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: عبدالرحمن الحلاوي)
|
Quote:
thanks Tamadur for this post about Asim Altyb Gurashi , he is full of love to sudan and speically the nile culture |
وصدقا لى كلامك ده ..غنا المناطق النيلية دة عندو طاعم طعامة ما عادية فعلا هو مشرب بيه ...كما يتشرب الاسفنج بماء الغسول ههههه
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: حسين نوباتيا)
|
شكرا حسن نوباتيا ..على الصور المعبرة ..والحقيقة حفلتكم دى جات غيرة من خالد كودى ..من حفلتنا طوالى عزمهم على بوسطن ...
نحن ناسنا كسلانين ياهم تبارك ومحمد عركى ..لى حسة ما دايرين ينزلوا الصور ...
شكرا تانى
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: خدر)
|
التحية لكِ أستاذة تماضر شيخ الدين وأنت تصحي فينا ذكرى حبيبنا عاصم الطيب
الذي مافتئنا نذكره في كل لحظة وحين ،،،
مررت هنا على سبيل التحية ،،، وتهنئة عزيزنا عاصم بهذا الفوز المستحق وهذه الحفاوة منكم أستاذة تماضر ،
وهذه اللونية المتفردة المتشربة بألحان النيل الأزرق الدفاق والصوفية المتجزرة بالجينات الوراثية من جده القرشي ود الزين
تمازج الوسط والنيل الأزرق أخرج هذا المتدفق عاصم ،،،
التحية للوالدة العزيزة جداَ كتيرة طه الشايب ، والتحية لزوجته الأخت منال وللأبناء محمد وتبو
ويقال أن وراء كل رجل عظيم إمرأة أعظم ،،،
التحية لكِ أستاذة / تماضر شيخ الدين ،، والتحية لأولئك الرقيقين أمثال عاصم الطيب ..
محبتي .....
وصال عالم
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: إيمان أحمد)
|
Quote:
( صوته يتلون بلون الارض والمناخ ..
فلو سمعته يغنى لبيجاوى ..
لن تصدق أنه نفس الصوت
الذى يغنى توا لنوباوى
انقسناوى
دينكاوى
حلفاوى
أو احمد الجابرى .. )
عليك الله مُش اتكيفتى !!
الله يديك ويديهو العافيه و يسيل .. سودانويتنا نهرا ً
نشدو بموجاته دوما ً ونسبِح بحمدِه
و
اختلاف القارات وفروقات الوقت
وانا قدر ما اتكيفت واتمليت مزيكا .. اتكيفت
من حكيك
وتقديمك الرائع
اجينا ولدنا عاصم .. من استراليا
إضرب .. كِرَنق .. وو
وازا
بالعود والكمنجه
!!
يضع سِرُه
فى أجمل خلقو
.
|
معليش يا تماضر .. كتبت جوه المستطيل
بتاع الاقتباس
فعزرا ً
يا رفيقه
.
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: مرتضى الكجم)
|
| Quote: وعست الكسرة ..وفركت البامية، ورجيت الرايدها الله ... |
تماضر كدى زحى بعد عواستك دى
الشغلة مشغلة
واغلب الحديث لا يقال
والقيامة قامت
واستوى الوجد والموسيقى
وجنونك الجميل
وبتنا هنا حطاما
براحة علينا
امشوا وتعالوا
ما قلنا لا
لكن
اولا ما تتاخرو
وتانيا
نوع القيامة والجمال ده
ما فى الاتفاق
بالطريقه دى انا
بصحى الديم كلو
وبعد سلام والمهم
كما تبارك الحبيب
لاعبين ورق حياة وشوف
ولا القصة
خلييك باالبيت
وبرضو مثلا
وصلنا الميس
ومشتاقين جدا
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: khatab)
|
ولا يهمك يا خطاب ..اصلو الزول لما يبقى جد ..بكتب جوه المربع ...
جدودنا زمان كتبوا جوه المربع .. الحصل لينا شنو؟؟ غير علمونا وربونا وخلونا نكتب برة المربع؟ الواحد بس يحمد الله على جدودو ...حتى لو كتبوا جوه المربع ..
وهاهاهاها .....حتى تستغيث ....
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: إيمان أحمد)
|
Quote: يا سلام عليك ياتماضر
إنتي بت الهنا المابتبخلي بي عاصم على الكل.
ويا بختكم كلكم باللمة والموسيقى. يا ريتني كنت معاكم.
ومبروك لعاصم الجائزة البتتشرف بيه.
ثم سلام علي جميع الأصحاب وعلى النغم الحلو دائما.
تحياتي ومحبتي
إيمان |
ياسلام عليك انتى دى ...
وتعلمين مدى احتفالى بحضورك هذا ..وبوجودك اصلا...
محبتى المتعارف عليها لديك
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: خدر)
|
Quote: ياسلام يا سلام يا سلام
لمة فنانيين جد .. بختكم بي بعضكم
إنجميتو 19 سنة لي قدام |
مالك كترتهم كده يا خدورى ..حسة مر اسبوع واحد وبدينا ننكرش ...جاتنا ام هلا هلا ..ودايرين البعدو ..نحن كان بنشبع مالو؟؟ هههههههه
أهلا بيك يا خدر وياريتك لو كنت معانا ....
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
Quote: عاصم قاد المستمعين المشاهدة الى سياحة رقيقة عميقة وواعية ..فى تاريخ الفن السودانى ..من المركز للهامش وبالعكس من البداوة الى ما بعد الحداثة ..
صوته يتلون بلون الارض والمناخ ..فلو سمعته يغنى لبيجاوى ..لن تصدق أنه نفس الصوت الذى يغنى توا لنوباوى انقسناوى دينكاوى حلفاوى أو احمد الجابرى ..
كان صوته وآلته "الدامعة" الكمنجة هما الراحلتين اللتين أقلنا بهما "نحن وغيرنا" فى هذا العبور الكثيف لمجاهل بلد لنسيجه الاجتماعى أعقد التركيبات، لحاضره السياسى ولتراثه التاريخى أسئلة لا تسهل الاجابة عليها ...كان يحمل الاسئلة والاجابات على قافلته الصوت ذو المرونة العالية والثقافة المدروسة والفن الاصيل ...ويطرحها للجمهور فيلتفون حوله مصدقين مصفقين راقصين ممتنين لخبرته الطويلة وسلاسته الواضحة ...
لقد أحبوك يا عاصم وقالوا عنك أجمل القول وتمنوا لو أن المناسبة كانت أكبر وكانت أكثر ولو أنك كنت ماكثا لفترة أطول وحدثوا عنك اصحابهم وطلبوا منك المزيد...
ياعاصم الطيب ...انا هنا، وعلى قلة حيلتى، أنصبك شعاعا أولا لشمس الغد التى ستشرق على سودان مسالم ... |
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: خدر)
|
* أرد يا ربي ولا اصبر شوية لمن ناس البيت ديل يجو
لكن كمان انا عندي وكت فاضي اسه و مالاقي بوست اتجدع فيهو غير ده
و عاصم زاتو ياربي وصل ولا لسه ؟
اسوي شنو انا اسه , المخ يودي و يجيب
وانا ماعندي صور
الله ينعل الشيطان , يا زول اقولك كلام
اخير اصبر شوية
__
* مقتطف من مسرحية إذاعية.
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
Quote: * أرد يا ربي ولا اصبر شوية لمن ناس البيت ديل يجو
لكن كمان انا عندي وكت فاضي اسه و مالاقي بوست اتجدع فيهو غير ده
و عاصم زاتو ياربي وصل ولا لسه ؟
اسوي شنو انا اسه , المخ يودي و يجيب
وانا ماعندي صور
الله ينعل الشيطان , يا زول اقولك كلام
اخير اصبر شوية |
"مقطع تانى من اذاعة تانية"
وهو مالو موسوس كدى
مايرد
البيت ما بيتو
هن تمادر وتبارك ديل غريبين عليه؟؟
والله عجيبة ..
الزول البوست قدامو واسياد البيت دمو ولحمو ...ما يرد على الضيوف ويستر عرضو ..بدل يقعد يودى ويجيب ..
والمخ زاتو من فضاه؟؟ المخ ملان دايبرات ولعبات ومعالق بمبيات وبطاطين صغااااار وبجامات وبزز ..تانى فى داعى يملوه بى بوست ...
الا الفهم قسمة ونصيب ...
"موسيقى النهاية"
يقفل الرادى ويندبل ينوم ...
هههههه
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
بس لان التعليق دة لذيذ وفي ( خطاب ) قلنا نكررو
(ولا يهمك يا خطاب ..اصلو الزول لما يبقى جد ..بكتب جوه المربع ...
جدودنا زمان كتبوا جوه المربع .. الحصل لينا شنو؟؟ غير علمونا وربونا وخلونا نكتب برة المربع؟ الواحد بس يحمد الله على جدودو ...حتى لو كتبوا جوه المربع ..
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: Tumadir)
|
والله ياتماضر -مع التحيات النواضر - وما طالبانى حليفة الزول الفنان المبدع عاصم الطيب قرشى كان معانا فى فيللى قبلكم بى يوم وعلى باليمين حيرنا مرة واحدة ..وكمل فهمنا جت ..عشان كدا ناسنا الفصاح العرفاهم ديلاك كل زول منتظر التانى يقوم يبدأ واهو كتر خيرك انتى فرعتيها ليهم ...
الجانى منو ..عاصم الطيب قرشى إنسان ملان احاسيس ومشاعر وفنون وعندوا مشروع ,فكرة, رؤية صادقة وعميقة لابعد الحدود , واعتقد اذا فى زول ممكن ينقل غنانا الى العالم والعالمية هو عاصم دا بقدرته المدهشة على التعامل مع اكثر من ألة موسيقية ..والغناء بصوت جميل متنوع الطبقات بفهم مش ساكت و ..( الصفارة ) شى عجيب, وان شاء الله يكون غنا ليكم بالامهرية , وعزة فى هواك على روح خليل فرح..ومن بف نفسك يا القطار والله الله ...الله .
والتحيات
| |
|
|
|
|
|
|
|
|
 Re: عاصم الطيب قرشى ..سمحة المقدرة (Re: عمر ادريس محمد)
|
0
0
دايما بتجى بالحاجات الجميلة يا فنانة
عاصم ود الطيب فنان مافى كلام وقالو ما بتدى حريف(كان زمان)
الحريف اليومين ديل بقلع حقو براهو بفنه البشوفوه الناس .
متابعين حاجاته من زمان بس ما لاقين فيه شوفه عينك عينك(حاسدنكم عديل)
أنا مبسوط وكديستى فى البروفايل دى ذاته مبسوطه .
تانى ما جايانا يا تماضر ؟؟
.
| |
|
|
|
|
|
|
|
|
|
Re: عاصم الطيب قرشى ..سمحة المقدرة (Re: حمد اسماعيل)
|
جانب من العرض ....
وعاصم ... يتقدّر ...
وتماضر ... ودكتورة ماجدة .... والخواجاية ... فى حالة طرب ...
وسوداناوية متمددة .... من أتيليه الفنان .... خالد كودى .....
عرقلة .... طبعاً بجى خاشى ساى ... ويجوط المداخلة ظاطا ...
... المهم ....
| |
|
|
|
|
|
|
| |
Tumadir
دينا خالد
سمندلاوى
مصطفي سري
حسين نوباتيا
ترهاقا
Safa Fagiri
معتز جعفر الحسن
معتصم ود الجمام
عبدالرحمن الحلاوي
الجندرية
تبارك شيخ الدين جبريل
Elmosley
خدر
وصال عالم
ابو جهينة
أبو ساندرا
إيمان أحمد
khatab
Rawia
مرتضى الكجم
عصام عبد الحفيظ
Bushra Elfadil
Adil Osman
عمر ادريس محمد
عليش
فيس بوك
تويتر
انستقرام
يوتيوب
بنتيريست