|
|
 {العوانس} و {قطر} الحياة ياعواطف ادريس: الحقينى بموية
|
فوانيس
هل ترتبط خصوبة الحياة بأرحام النساء؟
محاولة لتعرية أقنعة الثقافة المنتجة { للعوانس}
تعج قواميس حياتنا اليومية بكثير من المفردات التي تحمل مضامين تعكس ثقافة مكرسة للنيل من إنسانية المرأة وبالتالي من إنسانية المجتمع ككل. فأي خلفية ثقافية ساهمت وتسهم في تعطيل المجتمع الإنساني المتحضر، الذي تقاس خصوبته بعطاء الإنسان لاستمرارية الحياة التي تحقق الكرامة لكل من الجنسين، امرأة كانت أم رجل. وانطلاقا من هذا الأفق يكون واجب تعرية هذه الثقافة ملقى على عاتقنا جميعا، تفتيت الذهنية المتحجرة التي تحصر خصوبة المرأة وعطائها في الحياة فقط بخصوبة أرحامهن.
الثقافة التي أنتجت { العنوسة} هي ذاتها التي أنتجت { ابعد البيضة من الحجر والانتاية من الضكر}، ذات الثقافة التي روجت لها وسائلنا التربوية والإعلامية والتي لخصت فائدتنا بالزواج فقط وكرست لهذا المفهوم منذ أن عادت أمل وعاد بدر من المدرسة، واضعي المناهج رسموا دور أمل بإتقان بان تساعد أمها وتلعب مع اخوتها الصغار بينما قام بدر بحل واجباته المدرسية وخرج للترفيه للعب كرة القدم.
ذات السياسة التي حرمت كثير من النساء من تلقى العلم ورمتهن على هامش الحياة يبحثن عن وسائل تسكت جوع أطفالهن، جلسن الساعات الطوال بلا ملل تعمل { مشاطة} ومع كل ضفيرة يغزلن الحلم بان تنال أمل مثل حظ بدر وأن لا تعيقها عراقيل الثقافة التي تعمل على ترويضها منذ الصغر ويتم إعدادها لتكون آلة تفريخ ويتم زواجها لاقرب صاحب {جلابية بيضاء مكوية}، فأين الحب في هذا الشعور الدفين بالاضطهاد؟ على حد قول آسيا قادرى الجزائري في كتابها { عندما تتحدث النساء}.
ذات الثقافة التي تحرم كثير من النساء من ممارسة حقهن السياسي وانخراطهن في كل مؤسسات اتخاذ القرار. إنها سياسة تغييب العقل وتخديره الناتجة عن تغييب مؤسسات الثقافة الإنسانية. غياب المسرح الجاد، الفلم الذي ينغمس بدرامته في أوجاعنا والأغنية التي تصدح للوطن وسواعد بناته وبنيه والكتاب الذي يصهل كفرسه تركض دون أن تكبو.
ثقافة الزواج من بنات الحور بعد أن حرقت الإنقاذ حشا الآف الأمهات حين زجت بضىء عيونهن في حرب ضروس مهزوم فيها الوطن، زوجتهم دون إرادتهم بنات الحور وتزوج مروجى الحرب صغيرات السن مثنى وثلاث ورباع. وهى ذات الثقافة التي تحاصر المرأة المطلقة وتحط من قدرها الفكري والإنساني.
تحت ظروف القهر الاقتصادي، الاجتماعي والسياسي لم تتوانى المرأة من أن تشق لها طريقا في قلب الغابة ووحوشها، ينهلن من العلم والمعرفة ، يسعين دون ملل لتطوير مقدرا تهن الفكرية ويحلمن برجل يروى معهن عطش المعرفة ويخطو معهن الدرب كتف بكتف وخطوة بخطوة دون أن يقلل من مقدرتهن ويثبط من عزيمتهن. الزواج وسيلة للتوافق والانسجام والتصالح مع الذات ومن ثم ضمان استمرارية الحياة، وحين لا تتوفر هذه الشروط فليس هناك ضرورة لترضية شهوة المجتمع ولمجرد أن هناك وصفات اجتماعية جاهزة أنتجتها ثقافة قهر الذات مثل { بايرة} { وفاتها القطار}، ولأدرى أي قطار هو المعنى الآن، هل هو الترام أم قطار الأنفاق أم قطارات{ ألا يرو سيتي}. أم شريحة نساء المهجر اللآتى نفدن بجلدهن من ثقافة الدفن بالحياة التى مازالت تلاحقهن وتقضى على مضاجعهن، غير معنيات بذلك.
كيف نفتت ثقافة{ التفريخ}:
حين ترسخ فينا القناعة بالانتماء إلى فجر إنساني، حيينها فقط يمكننا أن نهزم هذه الثقافة، هذه القناعة تزداد رسوخا حين نستمع لصوت الفكر فينا، قد تكون الثقافة السائدة الآن هي ثقافة ترتكز على { بنية الوعي التناسلي} وكانت ضمن الملاحظات التي تركت خدوشا في الروح حين زيارتي للسودان العام الفائت، ارتفاع معدل الزواج العرفي، عدد الأطفال {غير ا لشرعيين}، هواجس بعض من التقيتهن بالزواج، المدهش إنهن من الجيل الجديد الذي ساهمت سياسة الإنقاذ في تخريب بنية وعيه فالرجل الذي يدندن للوطن والنساء غائب عن خرائط أحلامهن وسيطرت صورة الجلاليب البيضاء المكوية وثقافة { حبيبي بسحروك لى} على حسب ما يسمى بأغاني البنات والتي هي في مجملها انعكاس واضح وصرخة دواية لما يفرزه المجتمع من مفاهيم تنال من حق الإنسان في الحياة الكريمة فى وطن يحترم إنسانيتهم.
هذه الخدوش التي غارت بعيدا في لحم الحلم رطبتها بعض المهمومات حتى من الجيل الجديد، نساء يافعات منخرطات في العديد من مؤسسات المجتمع المدني، ويؤكدن على الدوام أن خصوبة الحياة لا ترتبط فقط بأرحامهن لتفريخ عدد مهول من أطفال ليس هناك خطط مؤسساتية لتربيتهم معافيين، فالحياة تكون أكثر خصوبة حين يعج طمي الانتماء للإنسان دون تمييز لنوعه.
مسئولية تفتيت هذه الثقافة يقع على عاتقنا جميعا، تعريتها وغربلتها بحيث لا ندخل في دائرة الدجل من تكون البيضة ومن يكون الحجر. هناك دور كبير يقع على ممارسي/ت السلطة الرابعة، أي الصحفيين والصحفيات اللاتي لابد من أن يحملن معاول لهدم هذه المضامين وتعريتها ورفض كل أشكال سجون الثقافة الذكورية والتي ومع الأسف تبنتها بوعي أو دون وعى بعض النساء وصرن ينادين بتعدد الزوجات وتكريس لمفاهيم { البورة}، فهل{ تبور} المرأة لمجرد إنها لم تلتقي من يقاسمها خبز أحلامها، أم هي محاولة لبورة الفكر وانحطاطه وصرف أنظار النساء عن أهم قضايانا، فعدم الزواج يكون وسيلة لغمرنا في قضايا تناسلنا وصرفنا عن قضايا وطنية كبرى وهى ماينبغى أن تشغل فكرنا، قضايا الخبز والحرية، قضايا الحرب والسلام، فأين المرأة في مفاوضات السلام، هل انحصر دورها فقط في أن تسمعنا ذغروده أم أن دورنا الآن أن نركض وراء قطار الزواج وان لا نمشى الهوينى في تجاه قطار السلام.
هنا يأتي دور الصحافة، هنا ينبغي أن تنبري الصحفيات اللاتي يملكن أدوات معرفية لتفكيك بنية ثقافة لا تعمل إلا لانهزامنا المستمر في عالم يسحق فيه الضعيف.
الصحافة عمل انتماء، انتماء للوطن وانسانه، انتماء لذاتي وللنساء النظريات التي ينبغي حفظها عن ظهر قلب هي التي تمهد الطريق الوعر ليبنى الإنسان مجده.
.
هذا المجد يمكن فقط وصوله حين نعترف فعليا بكينونة المرأة لذاتها، امرأة تبحث عن رفيق أيامها وفقا لأهزوجة الوطن المعافى، وطن لاتهجسه لقمة العيش ولا ينهكه العطش والنيل يشقه دون أن يروينا. الصحافة التي لا تنحاز لهذه الهموم وتنصرف للنيل من النساء دون تحليل علمي لازدياد عدد الغير متزوجات، لعزوف بعضهن عن الزواج، حيرة الشاب السوداني الممزق بين نزف الحرب وهجرة الروح، ظاهر جديرة بالنقاش وإيجاد حلول ناجعة لأزماتنا الاقتصادية والاجتماعية والسياسية، فلا يمكن مناقشة هذه القضايا خارج المنظومة السياسة، خارج صورة أمل وبدر.
مناقشة هذه القضايا تبدأ من هناك، من معسكرات النازحين في جبرونه ومعسكر مانديلا، حيث تنوء جراحات كلتوشه التي تحن لجبال النوبه، لبت تامه المشردة الآن على أبواب تشاد، وميرى التي كل أحلامها تنحصر في كوب حليب لماجوك طفلها المحروم من ابسط مقومات الحياة. تبدأ من هناك في شرق السودان حيث تئن أوجاع فاطمة البجاوية وأخواتها وإخوانها من داء الظلم. ، من مدن وقرى بلعتها سدود السياسة الظالمة، من هناك نبدأ، ومن هناك نحارب نظرتنا المركزية للقضايا حينها فقط نحارب بوار الفكر وعلى ضفة نهر أغنية منحازة للوطن تبدأ خصوبة الحياة وحينها فقط ينبغى ان نفخر بخصوبة رحم المرأة الوطن
فانوس أخير:
خصوبة الحياة ترتبط برحم الوطن المعافى
|
|
 
|
|
|
|
|
|
|
 Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
Quote: تحريض
الله من دفقك
ووشائج صهيل حبرك
ومن قلبك المفعم بالنساء النبيات
وتحرضيني
أن أعيد كتابة تاريخ هزائم النساء
المعجونات من سهد وغسق ومطر
حرضيني أن ينتصب جسدي
لعنات ترقص سكري
تزلزل الكلمة المهابة
وتجرح صمت السؤال
وتعالى نغنى ملء الألم
نرقص ملء الفجيعة
ونعلن أناّ هنا
ويا ضلعنا المنقوص استقيم قافية ونشيد
ومزماراً يصدح للمتعبين
وللفارسات المتسربلات بالحلم الوطن
فيينا/ 13/1/2003
|
نص مهداة الى تماضر شيخ الدين اعاد الله غربتها لبيتنا الاسفيرى، نشر فى كم حتة كدى
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
الأشياء كلها يا إشراقة مقيدة ب "حتمية الدوران"
زيها وزى الكون كله، كل الحاجات معتمدة فى سريان حياتها على فلسفة المدار
عشان كده كلامك صحيح
النهاية شايله دائما معاها جينات البداية
تبدأ ولا تنتهى
وبشكل أو آخر
تتوارى قليلا مقولة "كل أول ليهو آخر"
وفى الحقيقة، الآخر ده هو نفسه حيكون بمثابة بداية
المهم
ده برضو فانوس أول
مصباح "ديوجين" الأعمى، البشوف بى بالبصيرة
وزيت مصباحة الممزوج بعصير الروح
قولى وواصلى
الدرب منور
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: أبوذر بابكر)
|
Quote: الأشياء كلها يا إشراقة مقيدة ب "حتمية الدوران"
زيها وزى الكون كله، كل الحاجات معتمدة فى سريان حياتها على فلسفة المدار
عشان كده كلامك صحيح
النهاية شايله دائما معاها جينات البداية
تبدأ ولا تنتهى |
ياصديق....
كلامك ده فلسفة عميقة
خلتنى اقيف تانى قدام فكرة الموت... لمن الحياة تقيف هنا ببقى خلاص؟ الروح بتكون حايمة فى حتة ما والجسد الكان لاميها بيتحلل وبينبت فى شجرة، عصفورة، تمساحة، حمامة... كدى تكون النهاية شايلة معاها جينات البداية...
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Dr. Ahmed Amin)
|
سلامات يا دكتور احمد...
مداخلتك دى ذكرتنى محلبية ميسو واعلانات التلفزيون البالية
ميسو شنو وحنة شنو والموية مغرقة البيوت
انا ماضد ميسو ولا الحنة او اى وسيلة طبيعية تحسس المرأة {بانوثتها} لكن كمان لمن تكون ميسو
وحنة التاج هى الغالبة فى ظروف كل شىء فيها مطين بتبقى ماغريبة الاستمرار فى تفريخ ثقافة بتشبه ثقافة {العنوسة}...
بعدين القطر ده ممكن ماعندو رغبة يقيف فى محطة فيها راجل يصلح لاى شىء الا يكون {عريس}
اها اخنق فطس تعرس...التحية لنساء هتفن بانسانهن
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
ابكاني مقالك و انا علي علم بما يدور حولي هنا في المنفي البعيد إذ يبدو ان هذا النوع من التفكير لا يفارق العقول حتي بعد معايشة من هم يقدرون للمرأة نجاحها و تقدمها،،
بل اظن ان هذا يدفعهم في مواصلة سلوكهم
بزيادة،،
متي يقف المجتمع الذكوري عن العنف الحسي و المعنوي تجاه المرأة؟
ومتي يقف تعمد المجتمع السوداني في الاصرار
من تقليل قيمة الانثي و حصر مهامها و بناء قيمتها دون الرجوع إلي
ما يمكنها من فعل لو توفر لها الجو و القليل من الاهتمام الايجابي،،
لا كما سمعت والد احدي صديقاتي و نحن في المرحلة الابتدائيه يقول لها
" المرة كان بقت فاس ما بتشق الراس"
كانت اول المرات التي اسمع فيها ذلك المثل الغبي..
فقد كانت من انجب التلميذات بصفي و دوماً ما تجد التشجيع من
و المعلمين في المواد المختلفة،،
لم انتبه لما قاله ابوها وقتها،،
لكن حين فهمت معني المثل رثيت حال عقلها الذكي،،
تري ما حالها الآن؟
هل ثابرت ام انها إنزوت لتلك المقولة؟
خالتو إشراقة..
هل تظنين ان ابداً مثلها اوجاع ستطيب؟
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
اختى الحبيبة اشراقه
تحيات ومودة لك بدون حدود وحواجز
موضوعك ده من المواضيع المهمة جدا والبتطلب الوضوح والصراحه والتجرد لمن نتكلم عنها
حقيقيه كلمه عانس وتعديل اللفظ الى بايركس والى اخر الوصفات البيطلوقوها على الماتزوجت
جارحة جدا وسماعا بيكون تقيل على السمع لكن الاغرب من اللفظ والكلمه هو انو اغلب البيستخدموها
هم السيدات كتير مانسمع انو فلانه العانس ديك الله فك ليها بورتا وجاب ليها ود حلال او يقولو ليك
هو بالله العانس دى هسة داير يتزوج ليها شنو ماقاعدة طول عمرها مافى زول سال فيهاوخلاص لمن كلو يكمل
عندهم يقولو والله العظيم الا الراجل ده فيهو عيب ليه بس داير يتزوجا كل الكلام بيجى من النساء هم البصفو بعضهم
وبفتكر انو التربيه لها اثر كبير فى طريقه تفكيرنا وتقبلنا للاشياء طبعا احنا مجتمعنا مجتمع ذكورى الى حد كبير وذى ماهو معروف للجميع بياسس لثقافه الرجل منذ الصغر و تضع الكثير من الفواصل والحدود بين الاناث والذكور وعلشان مايتفهم كلامى غلط من البعض انا بقصد فى المعامله من الاسرة فبنلقى الاهتمام بالولد اكتر من البنت و ترسيخ ثقافه انو الذكر هو الكل فى الكل والاولويه له فى كل شى من اصغرها الى اكبرها وان الرجل مهما فعل لايعيبه شى وعلى النقيض من كل ذلك بنلقى معامله الانثى وبرضو كلامى مامعمم لكن الاغلبيه تقوم بذلك .
لكن بالرغم من كل هذا انا ماقادرة افهم ولا اتقبل منطق انو التاخير فى الزواج اوعدمه يكون سبه للنساء فيكون من نصيبهاكل تلك الصفات والاوصاف التى لاحصر لها اما الرجل فله كل الاعذار وايجاد اسباب مقنعة لعدم زواجه وكالعادة هو لايفوته قطارالزواج فهو حتى وان بلغ من العمر المئه يستطيع ان ان يتزوج ست الستات والغريبة نجد من تقبله على كل علاته.
انا عن نفسى ماشايفه انو الزواج محدد او مربوط بعمر محدد وغير كده وده الاهم هو موضوع الزواج قسمة ونصيب وشايفه برضو انو االبيخلى الرجل مابيعيبة شئ برضو المراه مابيغيبا شئ هى برضو فى امكانا انها تتزوج فى السن البتريحا حتى وان وصلت برضو الميه مافى مايمنع حتى ولو وصلت الميه ذيها ذى الرجل تماماونفس الالف سبب الممكن يمنعو الرجل انو يتزوج هى نفسها
البتمنع المراه اوتاخر زواجها .
حبيبه الزواج ليس له عمر محدد سواء للمراه او الرجل انما يفضل زواج المراه فى سن مبكرة وذلك لاسباب تتعلق بالانجاب وان كان هذا ايضا لا ضمان فيه لان الامر يتعلق بهبه يهبها الله لمن يشاء خلاف هذا لا يوجود امر اللهى او قانون يحدد سن للزواج بالنسبه للمراه .
افتكر انو ان الاوان لتغير كتير من المفاهيم والاستعمال لبعض المفردات التى تقلل من شان المراه وحصرها فى اطار ضيق
ومحدود بالرغم من دورهاالمحورى الاساسى والكبير .
تحياتى لك وانشالله برجع ليك تانى
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: ماجدة عوض خوجلى)
|
ماجدة سلامات ومحبة
ولمداخلتك الرصينة وعلمية الف شكر
اتفق معك جملة وتفصيلا فى محتوى ماذكرتية واتفق معك اكثر ان الطريق طويل جدا لتتغير هذه المفاهيم
Quote: موضوعك ده من المواضيع المهمة جدا والبتطلب الوضوح والصراحه والتجرد لمن نتكلم عنها
حقيقيه كلمه عانس وتعديل اللفظ الى بايركس والى اخر الوصفات البيطلوقوها على الماتزوجت
جارحة جدا وسماعا بيكون تقيل على السمع لكن الاغرب من اللفظ والكلمه هو انو اغلب البيستخدموها
هم السيدات |
نقطة سلبمة مئة بالمائة، وللاسف يتم استلاب المرأة لتفكر بذات الطريقة الهدامة التى غرسها المجتمع الذكورى عشان كدى ومن بدرى عندى رأى وقد يبدو للبعض حادا هو انو مسألة نساء دى، بس عشان النوع بقت او اصلا هى مالافقه، النوع مهم وبيلعب دور اساسى لنتضامن لكن ماكافى، بمعنى ممكن نتفق مع رجل بيحمل نفس محتور رؤيتنا لمجتمع متسامح وتسوده العدالة الاجتماعية اكتر من امرأة لاتتنفق معنا فى الهم الانسانى، الهم النسوى لاينفصل من الهم العام وبالتالى بتتداخل عوامل كتيرة غير النوع وبنحتاج لمعاول كتيرة ترسخ لمفاهيم افضل. الدرب طويل ياماجدة ولمن بالرؤية المشتركة ممكن نصنع افق مزهر
فى انتظار عودتك ومداخلاتك المثمرة ومشرقه
ومحبتى
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
المرأة من تتولد بعلموها انه ما عندها قيمة من دون الرجل، هو الذي يمنحها الإذن لتكون... من صغار بحكوا لينا عن فاطمة السمحة، والزول البنقذها (نسيت اسمه، تتصوروا!!! بالغته موش!).. ولما نتفلسف شويه ونعمل فيها راقيين، يحكوا لينا سندريلا البنقذها الامير، والجميلة النائمة، النايمه عمرها كله، وما بتصحى إلا بقبلة من أمير برضه، وبياض الثلج البرضها بنقذوها... الشيء المشترك بين فتيات القصص ديل إنهن في منتهى الجمال، والرشاقة .. وشعورهم طويلة.. مواصفات كلها جسدية/ظاهرية، مافي قصة بتقول ليك انه البطله زولة مفكرة ومثقفة ...
لكن تعرفوا، الغط علينا احنا النسوان... بفصلوا لينا وبنلبس.. يمكن ده شي مغروس في اللاوعي بتاعنا.. الواحده فينا حياتها كلها ممكن تكون بدون معنى.. واحده تكون همها كله شكلها، اكتر من عقلها... في تيار جارف، والتيار ده نسائي بحت، بجرف الواحده ليه، حتى لو هي ما راغبة.. غصبا عنها بتصبح سطحية، واهتمامتها سطحية... الرجل ما وحده مذنب، في طابور خامس من النساء، (أتعس) من الرجال في تأثيرهم على المرأة.. والتقليل من قيمتها...
الرجل بحب المرة السطحية لما يكون عايز يعرس.. وبعد فترة، سطحيتها دي زاتها بتخليه ما يحترمها.. وفي نفس الوقت يحترم المرأة العالمة البتفرض عقلها وفهمها امامه.. سعي المرأة عشان ترضي الرجل ده، سواءا قبل او بعد الزواج بخليها تتمادى في السطحية.. في نساء بقضوا معظم حياتهم في الاستعداد للرجل ده.. حتى تحصيلهم العلمي، ما هو إلا استعداد لكي تحصل على رجل بمواصفات افضل.. فالحاصلة على شهادة جامعية، يمكنها ان تتزوج من شخص بمواصفات افضل.. الوصفة كلها سلطة.. والحب ما داخل خالص في الشغلانية.. والحياة بتبقى كلها مكرره .. وقصص ياها زاتها محل ما تقبلي...
لما الواحده تكون عايشه عشان اليوم ده، ومنتظره متين تلبس فستان الزفاف، طبيعي انه صبرها وصبر الحولها يضيق لنا اليوم ده يتأخر.. وتحس انها فشلت ويحسسوها الناس بالفشل ده.. او ما تتخرج من الجامعة بكون ده الموضوع التالي.. لو اتحقق، ببقى الهدف البعده الولاده.. وزي ما مره سمعتها بي اضاني بتكون (الله مرقها من البوره والعقر).. كأنه المراه دي كان ما ولدت المشكله منها هي وبس... وكأنه الدنيا ناقصة ناس جداد..
بكده الواحده ما بتكون اكتملت لو ما اتزوجت، وولدت.. وبتكون ناقصة.. ولو ما تمت النقص ده، مافي زول برحمها...
بسمه:
في الفترة الماضية، دخلت في حيرة شراء (التياب) عندي مشية للسودان قريب.. طبعا ما عندي اي فكرة عن شنو التياب وكيف بشتروهم.. نادر قال لي، انت المساحة المالياها ثقافة وتاريخ ومعلومات عامة هي البستغلوها النسوان في موضوع التياب ده.. اتوكلي على الله واسألي ليك واحده...
د.إشراقة، مشتاقة ليك شوق بحر.. ومهمومه بأخبارك.. كيفها امك ام الكل.. وكيفك انت يا ام واصل...
بجي تاني
محبتي
مريم
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: مريم بنت الحسين)
|
أستاذة / اشراقه
سؤال : ولماذا لا يكون هذا تقوقع من المراة ،، وحجه تستكين لها لعجزها
عن المواجهه ؟
وانا بقدم هذا السؤال ،، لاننى ما عاصرته وتعايشت معه يقول عكس ماذكرت
بموضوعك اعلاة ،،
المراة فى السودان لها كل الحقوق بل سبقت نظيراتها فى الدول العربيه بلعب
دور أساسى فى الحياة الاجتماعيه والسياسيه وتقلدن مناصب رائدة ،،،
فقط نقول أخرجن من هذا التوقوقع والاوهام ،، وسرن ولا ( يعتر ليكن حجر )
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: كمال مبارك)
|
الاخ كمال مبارك
تحباتى واحترامى
Quote: سؤال : ولماذا لا يكون هذا تقوقع من المراة ،، وحجه تستكين لها لعجزها
عن المواجهه ؟ |
عشان اقدر اخد وادى معاك بموضوعية عن اى مواجهة بتتكلم؟
Quote: وانا بقدم هذا السؤال ،، لاننى ما عاصرته وتعايشت معه يقول عكس ماذكرت
بموضوعك اعلاة ،،
|
شنو هو العاصرتو وعايشتو عشان نكون معاك فى الصورة وتسهل بالتالى المناقشة
Quote:
المراة فى السودان لها كل الحقوق بل سبقت نظيراتها فى الدول العربيه بلعب
دور أساسى فى الحياة الاجتماعيه والسياسيه وتقلدن مناصب رائدة ،،،
|
ممكن تذكر لى امثلة ونماذج مدعومة باحصائيات وركز لينا عليك الله على التعليم ووضعها الصحى
| Quote: فقط نقول أخرجن من هذا التوقوقع والاوهام ،، وسرن ولا ( يعتر ليكن حجر ) |
شكرا اخى كمال فقط انتبه حتى لاتقع فى التناقض هو ان المرأة التى حكيت عنها اعلاه وافرتاضك بانها نالت حقوقها واحسن من المرأة العربية ما اظن تقبل بفرض الوصايا.
* الحجر البعتر لينا بنشق منو نهرا
ولك احترامى وفى انتظار ردك حتى نثرى النثاش الهادف
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: مريم بنت الحسين)
|
يامريم ياصديقتى الواعية
فى البدء هو الشوق والله ولا غير يا ام محمود وفى الختام ايضا حسن الشوق
وبعد...
اظنو عريس فاطمة المرتقب ده اسمه محمد ولا اخضر عزاز {رغم انو الاسم ده فيهو رنين حنين والله}
التخويف بالغول واحدة من اسباب دفع البنات للتفكير فى العرس.
لاحظتى يامريم مركزية الجمال فى قصصنا واغانبنا ويقول ليك دخل الحب شنو بالسياسة
يعنى الشعرا طوال وبيضاء وخشمها ودعة ديل قلة فى السودان الاغلبية فيها ملامح جمال تانية مابنشوفها، عشان التلفزيون ماجاب لينا مرة مذيعة {شلوقتها} مقدوده وعاملة فيها خرزة انتماء
عشان التوب اللى {سموه} جورا وبهتانا بالسودانى مابشمل نساء الجنوب مثلا. عشان كدى العاوز يعرس بيكون ووفقا للمرجعية المركزية للجمال للبيضاء وشعرها طويل وبت عرب.
شوفى لاى مدى الثقافة دى بترسخ للفعل السالب للمرأة، يعنى هى مستكينة وقاعدة فى خدرها مستينة اخضر عزاز ينقذها لكن ماممكن ينقذها ملوال الا فى حالة يدخل الغابة وينشر ثقافة التعدد بعد الانتصار.
زى الحب والولع والسينما وافلام ميرفت امين وحسين فهمى ولا محمود يسن {ده كان معبودى فى ال 14 سنة}
تحليلك يامريم كالعادة رصين ومسئول ولسه الحفر عاوز مذيد من الوعى وفتح سيطان النار ونحولها لعنج ندق بيهو الجهل {شفتى ثقافة الدق دى كيف}
كونى بخير صديقتى الحلوة ومحبتى لمحمود وابو محمود
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
| Quote: هناك نبدأ، ومن هناك نحارب نظرتنا المركزية للقضايا حينها فقط نحارب بوار الفكر وعلى ضفة نهر أغنية منحازة للوطن |
اهو شايفه يا إشراقه ..
قاعده في طرف البحر وريقك نشف ..
المسيرة بدأها عمنا (أبو المعارف ) بابكر بدري طيب الله ثراه ..
وأجيال من بعده تسلمت الراية ..
غير أن مسيرتهن عرقلتها عراقيل ..
وعليكن أن ( تفتحن الأبواب والطاقة ) او كما قال المبدع المرحوم العميري .
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: عبدالله الشقليني)
|
سلامات يا استاذ عبدالله...
اها جيتك برواقه...
القصة المرافعة اللى اتحفتنا بيها قرءاتها مرتين، ووقفتنى كتير ولامست حتات كتيرة قينا بنسكت عنها
| Quote: إن الثورة على القيم هو المعول الأول ، ومن هنا يتعين الدخول في كيفية المعالجة |
الثورة على القيم واكيد تعنى البالية تحتاج فعلا لمعاولنا، تحتاج لوعى جبار وبسالة وتضحية
حسع تخيل لو اى زول عنده فكرة نيرة، اشرك فيها آخرين وأخريات ووضعوا خطة لتنفيذها مش كانت حاجات كتيرة حاتتغير؟ لكن نحنا وبحكم تربيتنا {نحنا الساس ونحنا الرأس} بنعرف كل شىء فى كل شىء لكن لمن يجىء الفعل بنقيف عاجزين وعاجزات. الثورة اللى قلت عليها واللى بتفق معاك فيها 100% محتاجة لوقفة فى كل شىء، بدء من انفسنا.
| Quote: الأمر يحتاج البدء ثم الدراسة الاجتماعية والنفسية والاقتصادية لأزمة المجتمع الذي ساهم كثير من أصحاب السلطان في تعميقها ، وإغلاق الذهن على اجتهاد القدماء ، ونهوض ذهن الإتباع ، وهجرة ونفي ذهن الإبداع .!!! |
وده بيحتاج لمراكز بحوث علمية وبدورها بتحتاج خطط واضحة وسند من المؤسسات الاكاديمية الواعية
دة بيحتاج لمساحة حرية والحرية فى يد السلطان والسلطان عاوز بترول ونحاس واورنيوم والاورانيوم عاوز امريكا وامريكا عاوزة تدعم برنامج اعادة التوطين...
اها شفت حجوة ام ضبيبينة دى؟
شكرا لاثرائك هذا الموضوع برؤيتك الواعية، كتر الله من امثالك
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
قبل عقد من الزمان وفي جزيرة صغيرة في اقصي الشرق وجدت قرية للكتب اثارني الاسم فذهبت ووجدت قرية تسكن بيوتها كتب وهناك وسط كتب كثيرة اثار انتباهي عنوان كتاب باللغة الانجليزيةThe Mismeasure
of Women
دار في خلدي وقبل ان اتصفحه ان الكتاب ربما ترجمة لكتاب عربي او من لغة اهل تلك البلاد الشرقية فالعنوان يوحي بان المراة يحط قدرها او تعطي اقل مما يجب اويخطئ في قياس قيمتها .. تصفحت الكتاب سريعا فوجدت الكاتبة استاذه علم اجتماع ونفس وكاتبة ومحاضرة وامريكية فاشتريته سريعا وخرجت وانا اقول لنفسي ان الامر عالمي اذن ..
الكاتبة كما يقول الناشر "
Travis explodes the conventional wisdom that women are more passive , more peaceful, or more emotional than men: that they are less logical, competent, and sexual than men; and that their hormones , brains, and psyches are fundamentally different from men's.She begins by showing how all these visions of women share a common frame of reference,a standard against which women are continuely judged and found lacking:the universal ,normal male
He is the standard everywhere: in law, which is based on what a "reasonable man" will do. In medicine which is based on the physiology of a "70-kilogram man " ."Even in notions of the ideal female shape, which are based on alternating visions of being like the male body or opposite from the male body, but not accepting of the female body itself
الكاتبة في مجمل ما كتبت واتت من امثلة تتناول كل علاقات المراة ودورها و تجاوزت جدليات نحن(المراة) وهم (الرجل) اي نحن ضدهم ولكن حضت علي تجديد الرؤي في تناول هذه العلاقة بحيث تتضامن المراة مع الرجل في خلق مجتمع افضل ...وهنا يجب ان تتغيير المفردات والمعايير التي اعطت الرجل مجتمعا خالصا له لا يحق له فاختل التوازن وكثرت اوجاع المراة فانصرفت اما تلعق جراحاتها راضية غصبا بحالها او تعطي عمرها كله او جله تعافر لتعدييل المفاهيم والمعايير وفي كلا الحالتيين ييبقي المجتمع هو الخاسر الاول...
وحيث ان الرجل تميز دون حق بمميزات المجتمع الذكوري فيجب ان يكون له دور اكبر في تعدييل ميزان المجتمع الذي خرب بمعايير متحيزة له...
في ذات الكتاب قرات قصتيين احدهما لمارك وزوجته الذين يتناولان شاي الصباح والافطار معا ولكن مارك يحب ان يستمع الي المذياع وجين تحب ان تقرء الجريدة ..كان مارك يرفع صوت المذياع فلا تقدر جين علي التركيز في القراءةوعانت من ذلك كثيرا وفي يوم اخذت صحفها لتذهب الي حجرة اخري لتقرء هي ويسمع مارك المذياع كما يريد ولكنه رفض قائلا انه لا داع لذلك فانه سيقفل المذياع ..فلو تواصلا من البداية لما عانت هي من صوت المذياع وعرفت ان زوجها يفضل قربها علي صوت المذياع..
وقصة اخري لمن استاصلت ورما من ثديها وبقيت منزعجةمن اثار العملية وعندما سالت صديقتها حكت الاخري عن تجربتها والامها وكيف تجاوزتها اما زوجها فاشار الي عملية تجميل فتضايقت حيث فهمت ان زوجها صار متقززا من شكلها وفي الحقيقة هو كان ينصح لحل المشكل ...هنا وفي القصتيين اشارة الي امر مهم وهو التواصل بين الزوجيين حديثا حميمياتحتاجه المراة كما قالت الكاتبة...المراة تريد من يستمع اليها فالرجل حين تقابله مشكلة يشغل نفسه بلعب ما او صوت مذياع اما هي فتبحث عمن يستمع اليها فتبحث عن صديق او صديقة تحكي لها ...
سالتني احدي صديقاتي " ابوبكر انت اصدقاءك كم (تقصد الرجال) " .. فاجاءني السؤال ..فكرت قليلا احاول ان اعدهم فوجدت ان الغالب صديقات وليس اصدقاء.. استغربت .. وجهرت بذلك لها (لم يخطر ببالي ذلك من قبل) مستفسرا "لماذا ؟ فانا لا اقصد من اي جنس يكون الصديق؟ .. قالت لي "لانك تستمع الينا كثيرا..وتحاول ان تشاركنا همومنا "...لم يدر بخلدي انني اقصد ذلك ولكنها طبيعتي واكيد هي عند غيري من الرجال ..اذن ما يضير الرجل ان استمع وشارك المراة همومها..اكيد لما عانت المراة من كونها غير متزوجة او مطلقة او علي اقل التقديرات لقلت تلك الحالات او قلت سلبياتها التي توجع المراة كثيرا ...
لا يكفي ان نعبر كلاما عن تضامننا مع المراة في سعيها لتعدييل ميزان المجتمع بل يجب ان نشارك فعلا في ذلك...التطمينات والتضامن الكلامي لم يغير كثيرا في حالة المجتمعات الذكورية ولزمن طويل ..الادوار الشكلية الهامشية التي تترك للمراة في قيادة وادارة البلاد والعباد هي تعقد وضع المراة ...
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: Ishraga Mustafa)
|
موش قلت ليك جايه تاني .. 
قبل اربعة سنوات من الآن.. كنت بتونس مع قريبة لي.. سألتني في اهتمام عن خططي بعد ما اتخرجته من الجامعة، كان ردّي بحماس.. طبعا عايزه اعمل ماجستير.. اهم حاجه بالنسبة لي اني اعمل ماجستير.. قامت القريبة اندهشت، وشهقت وقالت لي.. اوعك.. ما بعرسوك!
من الحوار الصغير ده طلعته بنقاط اساسية.. اهمها:
(1) لازم اخطط حياتي بحيث انها تناسب الرجل .. عشان "أعرّس"
(2) لازم "اعرس" لأجل خاطر العرس..
قريبتي دي كان عمرها في ذلك الوقت.. 15 سنة!!!
اكتر شي كان ولا زال بثير حفيظتي وبضايقني، لما اشوف اخو بت، يجي من بره، يغير هدومه ويديهم لاخته يقول ليها غسليهم واكويهم لي.. عشان عايز يمرق بيهم بكره.. !!! مرات بتكون يصورة استفزازية.. وفي كتير من الاحيان بشعر فيها نوع من الاستغلال والاتكالية.. مرات بتكون منطقية، وبكون الاخو فعلا تعبان.. وبتكون هي مرتاحه، لكن طريقة الطلب بتكون كأنه ده واجبها.. موش لانها هي متبرعة بيه عشان اخوها.. لو جا زول قال لي الحنان وما الحنان، حأقول، هو الحنان ده اتجاه واحده بس؟
الكلام القلته يا دكتوره عن انه الفتاه مواصفاتها بتحاكي الprofile بتاع بت العرب، ده كلام صحيح.. والحقيقة الاشمل انه كل النساء، بحاكوا الprofile بتاع البنت الغربية، الرشاقة اللون الابيض الشعر المنسدل اسود او اشقر او اي لون آخر.. العيون الكبار.. دي هيمنة القوي.. والعنده وسائل الإعلام.. الناس كلهم بتبعوه.. وبمشوا وراه.. وده طبعا حاصل بشكل مصغّر في السودان باعتبار همينة الفكر والثقافة العربية...
الرجل ده ترباية مرأه... لما امه تعلمه يحترم المرأة ويعزها بجي بحترم زوجته وزميلته واخته.. وبت الجيران... عشان كده قلت ليك ذنبنا اكبر من ذنب الرجل.. المرأة/الأم في يدّها تطلع رجل يحترم المرأة ويعزّها..
يبقى.. our mission is .. نعلّم المرأة.. عشان تنتج نساء عارفن حقوقهم.. ورجال يحترموا الآخر، رجل كان او امرأة
محبتي
مريم
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: مريم بنت الحسين)
|
يامدرسة يا ابابكر
لحدى ما جى لمداخلتك الاخيرة بدعو الجميع لتأمل الاقتباس ده
| Quote: لا يكفي ان نعبر كلاما عن تضامننا مع المراة في سعيها لتعدييل ميزان المجتمع بل يجب ان نشارك فعلا في ذلك...التطمينات والتضامن الكلامي لم يغير كثيرا في حالة المجتمعات الذكورية ولزمن طويل ..الادوار الشكلية الهامشية التي تترك للمراة في قيادة وادارة البلاد والعباد هي تعقد وضع المراة ... |
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: مريم بنت الحسين)
|
مريم مجدلية الوعى..
| Quote: اكتر شي كان ولا زال بثير حفيظتي وبضايقني، لما اشوف اخو بت، يجي من بره، يغير هدومه ويديهم لاخته يقول ليها غسليهم واكويهم لي.. عشان عايز يمرق بيهم بكره.. !!! مرات بتكون يصورة استفزازية.. وفي كتير من الاحيان بشعر فيها نوع من الاستغلال والاتكالية.. مرات بتكون منطقية، وبكون الاخو فعلا تعبان.. وبتكون هي مرتاحه، لكن طريقة الطلب بتكون كأنه ده واجبها.. موش لانها هي متبرعة بيه عشان اخوها.. لو جا زول قال لي الحنان وما الحنان، حأقول، هو الحنان ده اتجاه واحده بس؟ |
قريتى {بوستينى} ده: اقريهو ونرجع للنقطة الهامة اللى اثرتيها دى
| Quote: الكلام القلته يا دكتوره عن انه الفتاه مواصفاتها بتحاكي الprofile بتاع بت العرب، ده كلام صحيح.. والحقيقة الاشمل انه كل النساء، بحاكوا الprofile بتاع البنت الغربية، الرشاقة اللون الابيض الشعر المنسدل اسود او اشقر او اي لون آخر.. العيون الكبار.. دي هيمنة القوي.. والعنده وسائل الإعلام.. الناس كلهم بتبعوه.. وبمشوا وراه.. وده طبعا حاصل بشكل مصغّر في السودان باعتبار همينة الفكر والثقافة العربية... |
كلامك سليم مئة المئة، بمعنى هناك بروفايل محلى وآخر عالمى مرتبطين مع بعض، ارتباط فى اغلبه ارتباط هيمنة وتسلط وده بيدى من ضمن افرازاته الى كبت الجسد فى مونة الشركات الكبرى الصانعة للكيماويات السرطانية... دى اسميها يامريم سياسة الجسد الامبريالى
Quote: الرجل ده ترباية مرأه... لما امه تعلمه يحترم المرأة ويعزها بجي بحترم زوجته وزميلته واخته.. وبت الجيران... عشان كده قلت ليك ذنبنا اكبر من ذنب الرجل.. المرأة/الأم في يدّها تطلع رجل يحترم المرأة ويعزّها..
|
صحيح يامريم ولكن.... اجابتى حسع بسؤال وبجيك راجعة عشان نفككوا مع بعض...
منو البصنع السياسة فى السودان؟
Quote:
يبقى.. our mission is .. نعلّم المرأة.. عشان تنتج نساء عارفن حقوقهم.. ورجال يحترموا الآخر، رجل كان او امرأة |
ويالها من رسالة انسانية... ده حايبقى حلمنا المشترك لبكرة الاجمل
محبتى لانسانك البهى
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: الفاتح يوسف جبرا)
|
ياعزيزتى عواطف...
ياختى ليه ابيتى لى بالموية... ماكان العشم
استنيت تقول لى وجهة نظرك بوضوح فى الموضوع ده عشان فى مواضيع تانية نفسى اناقشها معاك من زمان وقلت ليك واحدة منها فى رسالة ليك فى بريدك الخاص ورسلت ليك اللنك فى الماسنجر ووعدتى بعد العوده للبيت تزينى الموضوع بحضورك البهى وجانى ردك لطيفا ومهذبا كالعادة وده الشجعنى اكتب هنا وجهة نظرى عشان ممكن نتفاكر فى الاسباب اللى ذكرتيها فى مسألة {العوانس} وبصراحة من الكلمات البتضرسنى
زى قصة {المسترجلات} وده موضوع تانى بجيك ليهو بروقة، امكن سنة لكن اعدك بانى حااتناوله برؤية تانية
يعنى لو قلت ليك الحقينى بكباية ليمون كان عملتى شنو ياصاحبتى؟ غايتو الليمون بتنازل عنو لكن مويتى وحاة شيخ سودانية اختنا مابحليها
ويبقى بيننا الود والاحترام
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: ابوبكر يوسف إبراهيم)
|
| Quote: هنا تختزل الإنسانة لتصبح شيء .. يختزل فكرها وكينونتها لتصبح ماعون للإتجاب بعد متعة .. جنس ولا حب ..جواري في حرم الرشيد .. أن تعيش الأنثى أرقى وأعلى مراتب الحب فهذا يأتي بعد سن النضوج .. فالزواج إختيار عاطفي وفكري وعقلي ووجداني .. سؤال يلح عليّ دوماً : هل كل المتزوجات سعيدات؟ أكاد أجزم بأن الغالبية العظمى لا تعلم إن كانت سعيدة أم تعيسة؟ .. فالعرف ، التقاليد والموروث الثقافي الذكوري هو مشكلة المشكلات!! |
اوفيت با ابن يوسف ولا مزيد
كل ودى وتقديرى
| |
|
|
|
|
|
|
|
|
 Re: {العوانس} و {قطر} الحياة ياعواطف ادريس: الحقينى بموية (Re: ابوبكر يوسف إبراهيم)
|
الحبيبة أشراقة !!!
مودتي وعميق أسفي لأني والله العظيم لم اقرأ هذا البوست سوى الآن فقط لأسباب سأذكرها لك على المسنجر
ولما قلت ليك حأشوف اللنك في البيت كنت جادة لكن حدثت تلك الظروف ومع ذلك أكرر أسفي وما عاش من
بمنعك عنك الماء يا نبع الحنان
عاد المطر يا حبيبة المطر ..
كالمجنونة أخرج إلى الشرفة لأستقبله
وكالمجنونة أتركه يبلل وجهي ..
وثيابي
ويحولني إلى إسفنجة بحرية
المطر ..
يعني عودة الضباب , والقراميد المبللة
والمواعيد المبللة ..
يعني عودتك .. وعودة الشعر ..
شوشو الحبيبة بوستك كالعادة يحمل بين ثنياه وجع أنثوي وظلم ذكوري موغل في أنسجة التاريخ ولكن من
غيرنا نحن يستطيع أن يدفع هذا الظلم ويتحسس الجرح الدفين ,, صحيح كما ذكرت تستطيع الصحافة أن تلعب
دورا كبيرا في جميع المناحي الاجتماعية ولكن لا تنسي يا شوشو أن المرأة في كثير من الأحيان تكون عدوة
لنفسها عندما لا تخرج من شرنقة الجهل بحقوقها وواجبتها وعندما تحصر نفسها في همومها الذاتية
وأحلامها المؤجلة ثم تأتي بعد ذلك لتلقي باللائمة على الرجل الذي لن يفكر في يوم ما أن يمنحها حقا
سلبه منها وهي بكامل وعيها وإرادتها ,, ولا تنسي يا شوشو أن معظم المتعلمات يعشن أزدواجية التفكير
والبحث عن الذات فيظهر التناقض واضحا وجليا بين الرغبة وواقع الحال الذي تفرزه مفاهيمهن الحضارية
الممهورة بولادة كائن جديد يعاني من مخلفات الماضي المعشعش في العقول ومن معطيات الحاضر الذي قد
يناسبها كمتعلمة ومثقفة بيد أنه لا يناسب الكثيرين الذين لا يزالون يتمسكون بتلابيب عصور مضت
ومعتقدات أكل الدهر عليها وشرب فتصبح المرأة كمن يبحث عن إبرة في كومة قش .. أما الفتيات أو
اللواتي فاتهن قطار الزواج فلن يفوتهن قطار الحياة طالما أن هناك قناعة بأن الزواج ليس نهاية
المطاف ولا غاية تبررها الوسيلة لكي تقبل الواحدة منهن بأي نصيب لتكون من ضمن القطيع .. ولا تنسي
يا شوشو أن هناك أيضا متعلمات يرغبن أن يكن لهن بيت وأسرة وليست لديهن أي تطلعات أكثر من ذلك فهل
نجري لهن عملية غسيل دماغ أم نناقش معهن مشكلتهن من منطلق حرية الرأي وصناعة الفرار ,, يعني
عندما تتصل بك فتاة جامعية وتقول لك خلصت دراسة واشتغلت وعايزة يكون عندي بيت وأطفال ولم يأت
النصيب هل ستقولي لهاأصبري فنصيبك سيأتي في يوم ما أم تقولي لها الزواج ليس غاية أو هدفا و لا
تصدقي أنه يسجلب لك السعادة بالضرورة ؟
إشراقة الحديث ذو شجون وحتى نلتقى في مداخلة أخرى لك حبي وودي وشوقي واعتذاري إلى ما لا نهاية ..
| |
|
|
|
|
|
|
|
|
|
Re: {العوانس} و {قطر} الحياة ياعواطف ادريس: الحقينى بموية (Re: عواطف ادريس اسماعيل)
|
العزيزة عواطف... شكرا يا اختى على الموية المنقعة { احلى والله من الموية المعدنية النمساوية البحبها}
نجى لقصة القطر دى...
| Quote: شوشو الحبيبة بوستك كالعادة يحمل بين ثنياه وجع أنثوي وظلم ذكوري موغل في أنسجة التاريخ ولكن من غيرنا نحن يستطيع أن يدفع هذا الظلم ويتحسس الجرح الدفين ,, صحيح كما ذكرت تستطيع الصحافة أن تلعب دورا كبيرا في جميع المناحي الاجتماعية ولكن لا تنسي يا شوشو أن المرأة في كثير من الأحيان تكون عدوة لنفسها عندما لا تخرج من شرنقة الجهل بحقوقها وواجبتها وعندما تحصر نفسها في همومها الذاتية وأحلامها المؤجلة ثم تأتي بعد ذلك لتلقي باللائمة على الرجل الذي لن يفكر في يوم ما أن يمنحها حقا سلبه منها وهي بكامل وعيها وإرادتها ,, |
كظاهرة ماقلتيهو سليما... واتفق معك 100% ان لانتحسس الجرح وفقط بل ننخرو من جوة ونطلع الدود اللى بيخرب حياتنا، والمرأة ليست دائما ضحية وكذلك الرجل ليس دوما ضحية واللوم لا ارميه على اى واحد منهما دون الرجوع الى الخلفيات الاقتصادية والاجتماعية، ليه ده بيحصل، ليه بتكون المرأة مسلوبة للعقلية الذكورية، ولمن اقول العقلية الذكورية ليس بالضرورة ان يكون حاملها رجل.. لان طامتنا الكبرى هو ان الكثيرات منا مستلبات لهذه الذاهنية ولمن اذكر الصحافة اللى انا بنتمى ليها قلبا وعقلا بكون انطلقت من ملاحظات محددة هو ان الوعى الجندرى عند كتير من الصحفيات يكاد يكون زيرو كبير.الخروج من شرنقة الجهل والتخلف ياعواطف ماممكن يكون بعيدا عن ثورة التغيير الاجتماعى اللى بى تستهدف المجتمع ككل، ريفه وحضره وهامشو... والمرأة جزء اساسى فى التركيبة دى.برضو مفروض ماننسى ان هناك رجال كتار مسلوبى ايضا الحقوق... خلينا نفكر فى عنف الدولة ومؤسستها ممكن الصورة تقرب لينا شوية... الموية النضيفة ولا التعليم والعمل كحق فى الحياة مكفول بالقوانين الدولية مابمييز بين الرجل والمرأة كحق بس الواقع بيقول غير كدى انو المرأة درجة تانية ورغم انها مسئولة مسئولية كاملة عن التنازل ده الا ان هناك اسبابا مرئية وغير مرئية ومفروض نقيف فيها ونحللها.
| Quote: أما الفتيات أو اللواتي فاتهن قطار الزواج فلن يفوتهن قطار الحياة طالما أن هناك قناعة بأن الزواج ليس نهاية المطاف ولا غاية تبررها الوسيلة لكي تقبل الواحدة منهن بأي نصيب لتكون من ضمن القطيع .. ولا تنسي يا شوشو أن هناك أيضا متعلمات يرغبن أن يكن لهن بيت وأسرة وليست لديهن أي تطلعات أكثر من ذلك فهل نجري لهن عملية غسيل دماغ أم نناقش معهن مشكلتهن من منطلق حرية الرأي وصناعة الفرار ,, يعني عندما تتصل بك فتاة جامعية وتقول لك خلصت دراسة واشتغلت وعايزة يكون عندي بيت وأطفال ولم يأت النصيب هل ستقولي لهاأصبري فنصيبك سيأتي في يوم ما أم تقولي لها الزواج ليس غاية أو هدفا و لا تصدقي أنه يسجلب لك السعادة بالضرورة ؟ |
اتحفظ وبشدة على قصة القطر فات دى، ياخى مايفوت كان فات، يعنى عشان المجتمع والقطر المصلوب لينا كمقصلة فى ثقافتنا المنهكة دى تقوم الواحدة تعرس وخلاص؟ الزواج ياعزيزتى خيار وخيار صعب جدا وحتى لمن يتم الاختيار بشكل سليم ويتم بين الاتنين توافق يادوبك تقدرى تدفرى نفسك فى اتجاه احلام الحياة العادية... ناهيك تعرس الواحدة لانو المجتمع عاوز كدى... النظرة دى لازم تتغير.وده دورى ودورك.. الفى يدهم القلم وده دور الاعلام والحقيقى المابنفصل من قضايا المجتمع وانت ست العارفات، الزولة اللى انتهت من دراستها ووصلت المرحلة دى بعتقد انها بتكون على الاقل قادرة تمييز منو البينفع تشاركو مسيرتها.
عارفة القطر ده بيزكرنى مايسمى بسن اليأس واللى مربوطة بالطمث، يعنى مرحلة من مراحل حياتنا... سن اليأس هى ان تنتظر الواحدة قدرها البيسوقها الى حتفها النهائى...يعنى الزولة الواعية مابتخد يدها على خدها وتقعد تستنى لمن يجى المغوار الراكب الفرس الابيض ولا تنتظر اخضر عزاز لمن يصحى من نومتو، اها اكان كدى انشاء الله مايصحى لانو لو صحى بتنخرب حياتو وحياتها...عليه الحب مانهايتو دائما زواج ولا الزواج البيجى بالهبر ده بتكون نهايتو حب... والحب ده ذاتو حكاية تانية مربوطة فى ثقافتنا بالوهم والخيال اللى فى الافلام، سبنا وافلام محمود يسن والبحر والنجم وال....الرمل البيشبه احلامنا فى ظل السياسة المصنوعة واللى بتصنع فى السودان...
ارجو ان تكون فكرتى وصلت بقطار الغرب... سليمة وغير مهمشة..
ولك مودتى
* عزرا لو فى اخطاء فى الطباعة بكتب وانا على عجلة من امرى
| |
|
|
|
|
|
|
| |
Ishraga Mustafa
أبوذر بابكر
طارق جبريل
Soumeta
ماجدة عوض خوجلى
samo
مريم بنت الحسين
كمال مبارك
الطيب شيقوق
عبدالله الشقليني
محمد على طه الملك
abubakr
adel alsaed
الفاتح يوسف جبرا
عواطف ادريس اسماعيل
فيس بوك
تويتر
انستقرام
يوتيوب
بنتيريست