|
|
|
 Re: ركن الدوبيت السودانى (Re: عبدالله وداعه الامين)
|
Quote: الطمعانين كتار يا نادية والمرتزقه
انملت البلد عدم الشريف الفرقه
يا اوسلي انكرب جيب السلاح والدرقه
قبال نمبرش و نروح شمار في مرقه |
يا ناديه البشر راحت شمار فى مرقه
زى عبد الله اخوى قاعد مكوزم حرقه
الناس فى الشرق ماتت بنار منحرقه
والكوز اللعين مشغول بحد السرقه
| |
 
|
|
|
|
|
|
|
|
Re: ركن الدوبيت السودانى (Re: عبدالله وداعه الامين)
|
العزيز عبد الله وداعة الامين
قلت :
الطمعانين كتار يا نادية والمرتزقه
انملت البلد عدم الشريف الفرقه
يا اوسلي انكرب جيب السلاح والدرقه
قبال نمبرش و نروح شمار في مرقه
وبقول انا :
محظوظ الوطن بالخيرين أولاودو
الولد الاصيل بيشيل طبائع أجدادو
فى التقى والورع مابيشبهوه أندادو
تفخربوا القبيلة وبتو أم أحفادو
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الأخت نادية
تحية للأخت الفهيمة
واسمحي لي أحي الدكتور / محمد عبد الرحمن صالح
وأقول ليه حمد الله على السلامة
منتظر أخبارك
Quote:
يا الماشي الخلا سلم علي القلدونا
الانقليز بالكنترات ملكونا
كل صبح جديد زي الغنم عدونا
يا رب يا كريم تبرد حشا الولدونا |
ما دام أخينا محمد رجعنا لي زمن الإنقليز
تحضرني هذه الأبيات من مسرحية على عبد اللطيف التي قمنا بتمثيلها في المدرسة الإبتدائية وقد حفظتها منذ ذلك التاريخ:
(( ياوطني العزيز أنا داير أداوي جروحك
وداير أشوفك فوق قمم المعالي صروحك
داير أبني مجدك داير أنعش روحك
يا وطني العزيز يعز علي يحكمك بريطاني
الحكم الثنائي فوق صدرك جسم كالسل والسرطاني
مرحب بالسجون والهانة والتشريد
مرحب بالسجون والذل والتجريد
لو كان لي عدوك يرد))
السجون والهانة والتشريد والذل والتجريد كانت من أدوات المستعمر التي مارسها على أبناء الوطن في ذلك الزمان..
ويظهر أن المستعمر ترك أدواته خلفه لما تم جلاءه من البلاد.
| |
|
|
|
|
|
|
|
|
|
Re: ركن الدوبيت السودانى (Re: Mohamed A. Salih)
|
يا جريعة العسل الشارقه لى رشافك
نهبتى قلوبنا بالعنجه وبروق كشافك
ربنا سمحك كيتا على من شافك
حرقتينا يا شافعه التحرق شافك
تطيب بيها النفوس من حيث خصالها طيبه
اخلاقا جميله ثم خلقا طيبه
بت ناسا عزاز بعد اللطافه رطيبه
اريده امى ات تعالى لى ماك طيبه؟
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
قلت :
يا جريعة العسل الشارقه لى رشافك
نهبتى قلوبنا بالعنجه وبروق كشافك
ربنا سمحك كيتا على من شافك
حرقتينا يا شافعه التحرق شافك
وبقول انا :
صافى يالدهب المجمر انت ياسر الخزانة
انت للمكلوم مواسى وفرحة الناس الحزانة
ابتهاجنا وريدنا أكبر يالقليبك اصطفانا
كلمة منك تسوى دنيا وبسمتك يازول كفانا !!
وتانى قلت:
تطيب بيها النفوس من حيث خصالها طيبه
اخلاقا جميله ثم خلقا طيبه
بت ناسا عزاز بعد اللطافه رطيبه
اريده امى ات تعالى لى ماك طيبه؟
وبقول انا :
طيبة طول ماانت طيب ياابو الغيداء الجميلة
غيداء بت العز حلاتها للحسب ونسب سليلة
نحنا فى الغربة التحرق نطرى اوطانا الاصيلة
اصلو ياانور بلادنا مهما تقسى نقول حليلها !!
| |
|
|
|
|
|
|
|
|
|
Re: ركن الدوبيت السودانى (Re: Mohamed A. Salih)
|
العزيز محمد صالح
قلت:
سياسة الجن شن غيرها عاد بندوبي
زمان الكان عدل الليله صار مقلوبي
تجار الدين بي هناكا قالبين هوبي
واطاتنا المن جدودنا..باعوها لي ناس بوبي
وبقول ليك:
ياقشاش دموعا هاملة ساعة المرّة
يابسيفا مهنّد مابعيد الكرّة
من النار الهشيم تطلع ومابتنضرا
تريدك وتفتخربك عازة بت السرّة !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
ياقشاش دموعا هاملة ساعة المرّة
يابسيفا مهنّد مابعيد الكرّة
من النار الهشيم تطلع ومابتنضرا
تريدك وتفتخربك عازة بت السرّة !!
عازه نحن حماها من الغشيم الجاني
نحن ولاد مهيرا وعزة السوداني
بنشيل البنادق ونقبل النيشاني
ونخلي الطير يحوم فوق الرمم شبعاني
| |
|
|
|
|
|
|
|
|
|
Re: ركن الدوبيت السودانى (Re: ناذر محمد الخليفة)
|
العزيز ناذر محمد الخليفة
قلت :
يانادية أنجدينا دوباك مالو مقصر؟
في أمور السياسة بس براها محصر
فينا فن وجمال ونخلاً طويل ما بقصر
بس ٌإنتي خلي السياسةونهارك براهو بعصر
وبقول انا :
يازول ارجع اقرأ وشوف كلامى وعيد
نوعت الحديث حب ونوع سياسة وصيد
الدوباى حلاوتو يكون غنا وتغريد
سياسة وفن ولوعة فرح وحزن شديد!!
| |
|
|
|
|
|
|
|
|
|
Re: ركن الدوبيت السودانى (Re: Nasr)
|
أفرحى خلى حزنك جمر البلاد باطاها
وكان هبلت هبيله الليله خابرو دواها
حاله الكان قبيل برجع سريع بضياها
وجنياتا الشموس عقبان بعدلو قفاها
شنو ليك مو صقع
منصور
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
منصور الغالى
قلت:
أفرحى خلى حزنك جمر البلاد باطاها
وكان هبلت هبيله الليله خابرو دواها
حاله الكان قبيل برجع سريع بضياها
وجنياتا الشموس عقبان بعدلو قفاها
وبقول انا :
البراق برق شلعن خيوط الضو
الحب انبهل دفّق سمعتلو شو
محروسين يقين ماقلنا كلمة لو
قوافلنا بتسير وكلابها تنبح هو !!!
| |
|
|
|
|
|
|
|
|
|
Re: ركن الدوبيت السودانى (Re: Nasr)
|
ناصر العزيز
نايس انت ونايس الزمن الجابك لينا
فعلا جميل انت والزمن الجابك مارى بهذا البوست لتزداد فرحتى ومن معى
كن مارا من هنا دوما ولك احلى الامنيات ..
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
نحنا فى زمن المصالح بالقولات والسواطة
وانت يازولى الشفيف أحلى مافيك البساطة
لامنافق لامخادع زى بشر زاد انحطاطها
الا بس حظك معاكس فى زمن سمتو الوساطة !!
وعجبى !!
| |
|
|
|
|
|
|
|
|
|
Re: ركن الدوبيت السودانى (Re: abookyassarra)
|
العزيز ابو قيثارة
قلت:
حباب الغالية بت عثمان حبابو غناها
حديثك زى غنا السارحة التنادى جناها
وزى غيما هطل أسقى البطانة رواها
عقبى يام زمام طرينا أخوات طه
وبقول ليك انا :
ابو القيثارة شدوك يستبيح الآهة
ياالزول الجسور الشينة اتحداها
جيتك ياالعزيز انا كنت بترجّاها
مرحب بيك تعال فرّح شقيقة طه!!
| |
|
|
|
|
|
|
|
|
 Re: ركن الدوبيت السودانى (Re: نادية عثمان)
|
يا نادية مدلول الكلام مرات بيجرّح ناسنا
وين الوطن الكان قبيل راسمنو في كراسنا
لقنونا ليهو من يفع حتي شيب راسنا
طعن الفؤاد يانادية أصلا ليهو دلالة
التهميش مرض عضال تدارية ما بدارا
عايزلو ولدا صنديد ماهر بيرفض الحقارا
كم إشتكي المظلوم وجرحوا زايد عوارا
ما شاف غير أنياب الذئآب بارزالو ما بتضارا
كانهوا قبيل بتحري ماعايز قولة المقالة
بس للصبر حدود لو فاتها تبقي بهدلا ومهانا
| |
|
|
|
|
|
|
|
|
|
Re: ركن الدوبيت السودانى (Re: Mohamed Adam)
|
العزيز محمد ادم
قلت:
يا نادية مدلول الكلام مرات بيجرّح ناسنا
وين الوطن الكان قبيل راسمنو في كراسنا
لقنونا ليهو من يفع حتي شيب راسنا
طعن الفؤاد يانادية أصلا ليهو دلالة
التهميش مرض عضال تدارية ما بدارا
عايزلو ولدا صنديد ماهر بيرفض الحقارا
كم إشتكي المظلوم وجرحوا زايد عوارا
ما شاف غير أنياب الذئآب بارزالو ما بتضارا
كانهوا قبيل بتحري ماعايز قولة المقالة
بس للصبر حدود لو فاتها تبقي بهدلا ومهانا
وتاااااانى بقول :
يابلدى القبايلك تشكى من تهميشك
ظالم ولاّ مظلوم من فعايل جيشك
اولادك بيقطعوّا فى منابت ريشك
قول ياوطنى حكمك الا بس ببشيشك!!
| |
|
|
|
|
|
|
|
|
|
Re: ركن الدوبيت السودانى (Re: حبيب نورة)
|
حبيب نورة الغالى
قلت:
البوست يا ام نفل سووهو قالو وقلنا
في سياسة السجم البيها نحن كملنا
نحن أهل مزاح ثابت تملِّي أصـلنا
في النضمي السمح مين البدوبي متلنا
واسمع ده:
الشعب الحنون يافردة جنو سياسة
بس قلبو العطوف مليان شعور وحساسة
بعشق بالعيون السمحة والمياسة
من طبعو الوفاء مافيهو اى خساسة !!
وعجبى!!
واى نعم القطر الشالنى انا يتكسر حتة حتة بس مااكون انا جواه لحظة التكسير ياحبيبو !!
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
الغالى منصور
قلت:
الباب انفتح زغرادتو تنده رو
اسدا مو هزيل بكرش ضباع البو
فارسا سمهرير بين الرجال الضو
وحفاظ للجميل من دون قبيح او سو
وبقول انا :
الرعد الضرب فى راسنا قولة دو
اسدا ماك كديس فى الحارة قال النو
يازولا هميم ماك العوير كشلو
ساعات الفرح جايكا تسرع فوو
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
ما دام ما اصريتو علي حرف الواو نجاريكم....
سودانيه نحن مافي واحدا فينا اضينه لخو
ما هامينا الضرب حت لو بي سلاح الجو
جاهزين للنضال ناس العجيل والنو
شايلين السلاح يا العدو الليله شن بتسو
| |
|
|
|
|
|
|
|
|
|
Re: ركن الدوبيت السودانى (Re: Mohamed A. Salih)
|
العزيز محمد صالح
قلت:
ما دام ما اصريتو علي حرف الواو نجاريكم....
سودانيه نحن مافي واحدا فينا اضينه لخو
ما هامينا الضرب حت لو بي سلاح الجو
جاهزين للنضال ناس العجيل والنو
شايلين السلاح يا العدو الليله شن بتسو
وبقول ليك انا :
جارينا وتعال قول واسمع الدوبيت
ياود الرجال فى عز ابوكا ربيت
فى الحارة القبيحة وقفت واتصديت
مكانك فوق اخوى يالاصلو مااتدليت !
| |
|
|
|
|
|
|
|
|
|
Re: ركن الدوبيت السودانى (Re: samwal ebrahiem)
|
العزيز سمؤل ابراهيم
قلت:
في الشرق الحبيبة ولعت نيران
ادروب الولوف والله ود فرسان
بورسودان الجميلة محميه بـ الشجعان
بتحدو البندقية بـ الخنجر المسنون
ما برضو المذلة لو الروح تهون
وبقول ليك:
ثروة وسلطة نقسمها بينا بالميزان
عدالة قسمة مابتقبل قوانين مذهب الحيتان
نبنى كنيسة جمب جامع وقرع أجراس مع الآذان
بلدنا الزيو مافى مثيل سماتو سماحة الاديان
| |
|
|
|
|
|
|
|
|
|
Re: ركن الدوبيت السودانى (Re: محمد حسن العمدة)
|
الغالى محمد حسن العمدة
قلت:
غطو ريسينكم من الفليق
يا نادية
البلد القبيل خيرا جوا وبرا
ساطوها اللئام جعلوها بلد الزله
الزول في حقو ديمة ضايق المرا
وباسم الدين كان نضم يتزلا
وبقول ليك :
مابنتغطى من فليق ومن جبخانة
نحنا العزة والبارود اكلنا عشانا
بنقول العديلة الحارة ماهمانا
ود العمدة مرحب جيت سكنت حدانا
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الأخت / نادية
محسوبك ( أبو السَارَه )
ومتل ما قالوا
زمنك كله تاكل باردة ما ضق حاره
أطـرى الليلة يا طه أم حمـد والساره
درق البازه جاك ذي سحابه الجاره
وحس أب جقره والقربين صواقعاً كاره
اكل حاره وما ضق بارده ماك داريني
وأســأل عني ربعاى البعرفو قريني
حس أبو قره والقـربين دوام باريني
أنا أخو الساره كان يبق الكلام عانيني
براق العشا الغرباني زادني علايل
وهفن لي بسسمات الظريف مو مايل
البي ذوقه فاق أم جمــالاً هايل
النقــرابي والشف في أم فنايد خايل
| |
|
|
|
|
|
|
|
|
|
Re: ركن الدوبيت السودانى (Re: Abdelrahman Elegeil)
|
بسم الله الكريم
البارح قلت اقول مساء الخير
وما تمتيتها؟
فاذا بنداء غيداء من تحت الدرج
تريد خدمات الاب
وقد لبيت ندائها
ولم البى نداءالدوبيت
فلكم العذر ان جاءت التحيه مبتوره يا بت كرام الناس
وكت عاوز اقول
قدر ما اقول انوم
من نومى اتب حاس تانى
وحبك يا جميل من الدمع حسانى
للاسى والنويح ريدك دوام حسانى
وحالف ما بسيبك حت كان ابوك حسانى
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
قلت:
قدر ما اقول انوم
من نومى اتب حاس تانى
وحبك يا جميل من الدمع حسانى
للاسى والنويح ريدك دوام حسانى
وحالف ما بسيبك حت كان ابوك حسانى
وبقول :
كده يازول تفارقنى وفى فد لحظة تنسانى
كت قايلانى فى جواك تبيع الدنيا علشانى
وعرفت حقيقة انى خيال مافى يقين بيغشانى
أمش يازول كفاى تعذيب وعيش فى بهجة أحزانى !!
| |
|
|
|
|
|
|
|
|
|
Re: ركن الدوبيت السودانى (Re: Abdelrahman Elegeil)
|
العزيز عبد الرحمن العجيل
اشكرك على المرور الجميل
وللحبيبة دارفور نقول:
فى بلد الزرق دار سلطنة وسلطان
بتلقى القاسية هينة والقساوة حنان
أهل حكمة المساليت والزغاوة كمان
أطفوا الفتنة يلا وكترّوا الكيمان!!
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
العزيز منصور
قلت:
قلت الليله أرقد بدري آخد راحه
علا الناديا هامها حال الوطن واتراحه
شغلت بالى حاله الما بتعجبو قباحه
وشديت الاعيسر لامتين تصد لى مراحه
وبقول انا :
كيف نرقد ننوم وبلدنا زايدة جراحها
قوم يااخوى نشوف حلا بكل صراحة
ياسلما يكون ياتنقلب كتاحة
الحق ضمة ظاهر مابدورلو فصاحة !!
| |
|
|
|
|
|
|
|
|
|
Re: ركن الدوبيت السودانى (Re: Balla Musa)
|
الغالى بلة موسى
جبت:
آخ أنامن لحظات نواعسو طعنت
ومن صحن الجمال الصافى خاتى القنته
العارض برز سايق فيالق سته
كل فيلق يقول لى الكان قبيل مين انت
إبراهيم العبادى
وبقول انا :
جبت الليلة قولا من عظيم الشآنى
ابو العبادى فخرا فى جبين سودانى
هدية عظيمة جبتها بالخصوص علشانى
اظنك يالعزيز بالعشق امدرمانى !!
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى الغالى
قلت
يابت اللهل شوفيهو قول الساسه
الجوع والحرب خلت ندوبي سياسه
والحريه تب ابطالنا من حراسه
واولاد البلد صادقين بيرفعو راسه
وبقول ليك انا :
ود خالى العزيز يلاك نغنى غرام
بالحب ياالكبير بيكون وطنا تمام
البلد البينزف فيه نربى حمام
ونعيش حرية حقة وخير وود وسلام!!
| |
|
|
|
|
|
|
|
|
|
Re: ركن الدوبيت السودانى (Re: Tumadir)
|
تماضر الحبيبة البلسم الشافى حزن القلوب
قلتى :
Quote: ياجماعه ما لاقاكم شيطان اضنينو طوال وعندو تلاته عيون جه طاير بى جاى؟؟
ده شيطان شعرى ....شارد منى ....قال بشتغل كتير... |
وهاك منى قول :
زى جمالك ياحبيبة أصلو ماقابلنى يوم
يالمشاعرك فيض مدفّق كم ازاح فينا الهموم
انتى الهامك ملائكة مابجيك شيطان يحوم
ياتماضر ابقى قاءاااعدة وكل من اتبل يعوم !!
وليك حبى الدافق حتى تستغيثى !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
هلالنا العظيم الليلة دور قمره
فى بلاد النجاشى حكر اسمه
ضرغامنا (هيثم)هاج وافترسه
ود الشريف قالوا اتبين فى شبكه
يا ود ادريس كراعك علينا بارده
مثل ناس ابوعبده الكانوا بجبوا الشارده
با رجال الهلال الليلة شبلو
وسط زغاريد البنات واعرضوا
تحياتى
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
قلت:
جعلى ودنقلاوى وشايقى ايه فايدانى
غير جعلت خلاف خلت اخوى عادانى
ويكفى النيل ابونا والجنس سودانى
وبقول انا :
شايقى ودنقلاوى اخّوّة فايتة الحد
فتيل ريحة وبخور عودين عبيرهم ند
ايد فوق ايد تمّلى بيبقوا ساعة الجد
لو تسأل عليهم تلقى عندى الرد !!
| |
|
|
|
|
|
|
|
|
|
Re: ركن الدوبيت السودانى (Re: بلدى يا حبوب)
|
بلدى ياحبوب العزيز
قلت:
هلالنا العظيم الليلة دور قمره
فى بلاد النجاشى حكر اسمه
ضرغامنا (هيثم)هاج وافترسه
ود الشريف قالوا اتبين فى شبكه
يا ود ادريس كراعك علينا بارده
مثل ناس ابوعبده الكانوا بجبوا الشارده
با رجال الهلال الليلة شبلو
وسط زغاريد البنات واعرضوا
وبقول ليك :
مبروك للهلال الديمة مرفوع رأس
هيثم زول لعيب وانسان كمان حساس
ماعرف الهزيمة ونصرو كالاناناس
بس مريخنا برضك ياما جاب الكأس!!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
حفيدة الـمك نحن الشعر ما لينا فيه نصيب
وبالحماسة ترانا بنجاريكم ونباريكم شخبطة وربريب
دبايوا أدروب الولوف ناس بورسودان وقفتم بتشرف
وإت زول معايش دخلوك السياسة بالضرورة ماك متزلف
أوهاج سيد المسقى الـ مابشبهنو سيوف
عاد واسي ضربك في الفقرة والقضروف
البشاري سيد العنافي للدواس مكلوف
بتا بالله كاسر خصمك إت خالي من الخوف
شايل درقة حاقب سيفك صقر البجا الرطانة
حفيد دقنة موت أوشيك والله ما سرانا
كيزان السواد لو جات بالمراد كان الدم ركب والدواس بالزانة
أف أبو عمار كرري تانية!! الشجاعة هزمتها الجبخانة
تب عليك علي عثمان كلمتك ضهبانة
بورتسودان الجريحة مستشفاها صار جبانة
برز شنقراي أخوك يا العنود تاجوج وكل الـ بزرقوا بصيدوا
وحالف تار أوشيك يجيب ويزيدوا
| |
|
|
|
|
|
|
|
|
|
Re: ركن الدوبيت السودانى (Re: Abdelrahman Elegeil)
|
العزيز عبد الرحمن العجيل
قلت:
حفيدة الـمك نحن الشعر ما لينا فيه نصيب
وبالحماسة ترانا بنجاريكم ونباريكم شخبطة وربريب
وبقول ليك:
قولك فى الشعر صادق ومن جواك
تعشق للوطن مابترضى ليهو هلاك
محزون يالعجيل شان انطفت افلاك
فى البلد الحبيب تب مابعيش اعداك !
| |
|
|
|
|
|
|
|
|
|
Re: ركن الدوبيت السودانى (Re: Abdelrahman Elegeil)
|
العزيز عبد الرحمن العجيل
قلت:
ســماحــتك خــلقة مـا مـكيـاج
نوارة دار جـعـل يـا الأميرة أم تـاج
أدبـك طـبعـة مـو تـلـقـين و مـدارس
بت الأرباب رافعـة رأس أبـوهـا الـفـارس
وبقول ليك انا :
ياود دار جعل اهلك عزاز بالحيل
تاريخهم مدوّن فى مصاحف الجيل
معروف فى الشديدة الحارة جمل الشيل
وحاشاك لاسفيه لا للخواجة عميل !
| |
|
|
|
|
|
|
|
|
|
Re: ركن الدوبيت السودانى (Re: Ahmed Al Bashir)
|
العزيز احمد البشير
قلت:
تعال يا القدل بشعره فينا مجاهر
ناديه بتنادى و روحها فايضه مشاعر
اسرع قبال ليلنا يطل صباحه الباكر
دوبيتك بدونه ما بطيب لنا خاطر
وبقول انا :
القدال تعال روّق مزاجنا العاكر
زولا جد نبيل فى نوعو قطعا نادر
حافظ للجميل ماهو اللئيم الناكر
ياود طه يحفظك الحفيظ القادر !!
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
تعال يا حبيبى النريك صفاتنا
ما عاشرنا زوول ضاق عسلنا وفاتنا
نحن رجال عمل نحن الخشن كفاتنا
نحن وفانا مع العاشرنا حدو وفاتنا
نحن المحسنين العالمين تعرفنا
نحن رجال عمل نحن الكتير طارفنا
نحن الضاق عسلنا اصلو ما بفارقنا
والغلا ان تفحل نحن بيطردو جرفنا
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
بحلف اقول الحوش الكبير بتهدأ
كترت الكلام بجيب لينا الفرجه
عزف القوانين حرم ما بتشيل الوجعه
لو ما الناس براه اتعدلت
وفى كتابة البوستات بأسم الله كتبت
بصراحة بقول تعالوا نتحزم
قبال ما نبدا الفكرة
نحلف يمين مافينى زولن ينسى
الحوش الكبير بسيده
وحلفاية الملوك كمان فى ايده
حرم كبيرنا ما برضى
زولن فى حوشه ما يلغى مودة
تحباتى
| |
|
|
|
|
|
|
|
|
|
Re: ركن الدوبيت السودانى (Re: Rawia)
|
راوية العباسى العزيزة
هديتك الحلوة مقبولة وهاك منى هدية :
يابت دار جعل انا عندى ليكى مقولة
فى الزوق ياالعزيزة طلعتى انتى الأولى
بت علوية تسلمى والورود مقبولة
ياراوية الجميلة فى عرضها وفى طولها !
| |
|
|
|
|
|
|
|
|
|
Re: ركن الدوبيت السودانى (Re: ناذر محمد الخليفة)
|
العزيز ناذر محمد الخليفة
قلت:
يانادية شن بقولك والله مفجوعين
في كتر الحرابةالمحت الحجر والطين
علا بس بقول دايرين ننسى مجبورين
مامابيها سياستك والله حالف يمين
وبقول انا:
ناذر يالعزيز حاشاك من الشين
من قول السياسة حقيقة زهجانيين
لكن للوطن فى الرقبة عهد ودين
نحميه بالفؤاد وبجبرة السكين !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الانسان رخيص تمنو لو قارنتو بالدولار
ولو قارنتو بالبترول يمين أرخص من السولار
مافيه غير لسان لاذع ومقدرة فايقة فى الشوبار
فى السودان فقير وغنى أهم صفاتهم البوبار !!
| |
|
|
|
|
|
|
|
|
|
Re: ركن الدوبيت السودانى (Re: عبود احمد النصيح)
|
الاخ عبود احمد النصيح
قلت:
نحنا اولاد بلد
نقعد نقوم علي كيفنا
في حدب الجبال نائمين
متوسدين ايدينا
اما رجعنا رجعة تفرح الراجينا
واما موتنا موتا لا كفن لا طينة
وبقول للبلد عبرك:
من بطنك ولدتى الشايقى والدينكاوى
ولدتى كمان جعل ودناقلة والغرباوى
دمّك يابلدنا الطاهرة ياما بيساوى
عنك ياما قلنا وماخلصنا حكاوى !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
عفارم عليك يا الغاليه
ابواتك قبيل بحلو للعوجات
ومطموراك تكيل للخاله والعمات
بابك ما انقفل وايديك دوام بارزات
يا اب قلبا حديد فى الحوبه مل بتنفات
وعينك يا الصقر فى الحاره ما بتنوم
صدرك للضعاف دايما بعرق العوم
لا بتتلام ولا بتعرف تجيب اللوم
وفى نص الفريق للفارغه ما بتحوم
ود ناسا كرام جمعو المكارم كوم
تفرح بيك بنات الباديه والخرتوم
ودقر يا عين؟
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
قلت كلام بديع ثم (ودقر يا عين)
وبقول انا :
دقر ياعين على وعليك على الباقين
دقر ياحوشنا محروس بى برا وياسين
دقراولادنابى سر الاله البارى محفوظين
ربنا يحفظك ياانور ابو غيداء قول امين !
| |
|
|
|
|
|
|
| |
osly2
المسافر
ناذر محمد الخليفة
Nasr
munswor almophtah
abookyassarra
Mohamed Adam
samwal ebrahiem
حبيب نورة
Balla Musa
Abdelrahman Elegeil
Elmosley
Tumadir
مجدي شبندر
Omayma Alfargony
؟
بلدى يا حبوب
Ahmed Al Bashir
Rawia
فيس بوك
تويتر
انستقرام
يوتيوب
بنتيريست