|
|
 منى عوض خوجلى.....( حبّوبه)
|
ألف مبرووووووك العزيزة منى عوض خوجلى....فلقد انتهت قبل قليل مراسم عقد قران ابنتها وابنتنا .... أية....نتمنى للابنة اية عشاً زوجياً سعيداً هانئاً.... ول ( حبّوبة ) منى كل الأمنيات الطيبة والتهانى موصولة لكل ال خوجلى داخل وخارج السودان
|
|
 
|
|
|
|
|
|
|
 Re: منى عوض خوجلى.....( حبّوبه) (Re: عاطف عمر)
|
شـفت ياعاطف أخـوي الحصل ?
آية فرحانة علشان عرست!
آية بتدرس صحافة..وبتدرس أولاد محمـد هارون علشان تعمل دخل..وكمان عرست!!
وبعـدين عبـد الرحيم زوجها عمره قـدرها..ومشغول زيها ..وانا مرات افكـر أمشي
أطـبخ ليهم.. تاني أقول لأ..خـليهم يتحملوا مسئولياتهم!!
عقبال بناتي وابني..نفرح بيهم كلهم..في رفاعة وفي دبي..
سلام لسعدية..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: نيازي مصطفى)
|
يسـعد أيامك أخي نيازي..
أعتـذر عن قفزي لمـداخلتك..لم أراها..
أنا نفسي بتكم آيه تجي تجكي ليكم بنفسهاا عن زواجها!
آيه قالت لون الجـدران عنـدها في البيت ممل (أبيض) ولون عجايز..
وقالت هم الإثنين صغار جـدا مالمفروض يعيشوا في أي شـكل ممل..
طـيب وانا مالي أنا?
خليك معانا وشـوف محن الشفع دي!
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Tumadir)
|
وعقبال مانفرح بنسرين واخـوانها طـمطم حبيبتي..
عارفة أبلة زينب اتصلت من أمريكا تسألني..
بكيتي سـاعة العقـد?
أبكي ليه?
أناعارفة.. مالناس كلها بتبكي!
لكن عارفة ياطـمطم..المأذون كان مصري وانا وهو آخر هظار..
اتصورت معاه وكـان شـرطـي إنه المنديل الأبيض يكـون ظاهر في الصورة..
تابعي معاي وانتي تعرفي قصة المنديل!
بحفظـك ويحفظ اولادك حبيبتي ..آمين
| |
|
|
|
|
|
|
|
|
|
Re: منى عوض خوجلى.....( حبّوبه) (Re: طارق جبريل)
|
إزيك يا طارق..
مصيره يجي الإمتداد ويزور بيت الخليفة ومحل الشهيـد ما اتربي..
ونحكي ليه عن طـفولة جميلة وأيام عمر فرحانة استكثرها علينا مجرمين الطـغمة
الحاكمة..
شـفت آية كبرت سـريع كيف?
أنا لسة بوست عيـد ميلادهاال18 ماخلصته..أقوم أكتب عن عرسها?
سـلم علي الأولاد وعلي الخصوص اسماء..
يخليكم لبعض..قول آمين
| |
|
|
|
|
|
|
|
|
|
Re: منى عوض خوجلى.....( حبّوبه) (Re: nourelhadi awad)
|
آيه يانور الهادي طـلعت عيونا عـديل في إختيار لبس مناسب للعقد..
مشيت معاها انا وماما جارة علشان تختار بعـد ما اخواتي حردوا المشي معاها وده كله بسبب عنادها..
المهم دخلنا محل واحـدة مغربية..كـل ماتجيب فسـتان آية تصر لينا وشها وتقول No way, I am not going to wear this!
تقوم الزولة مسكينه تجيب حاجات تانية..تقوم آية تقول..
are you serious? this is too much!
طـبعا ماما قاعـدة ومطـولة بالها شـديد..وانا أطلع الشارع احرق اعصابي بره وأرجـع..
آية مابتحب الحاجات الفيها لمعة..ومابتحب الزينة الكتيرة..ولا الألوان الصارخة..
بعدين دي بقت مشكـلة!
بعد شـوية آية جات شايلة حاجة كـده أصلها ماحقت مناسبة زي دي..قالت دي عجبتها..امرنا لله
قيسيها!
طـبعا آية متحجبة..والفسـتان شـوية قصـير..طـيب يا آيه..الحاجة دي طـولها ناقص..
عارف قالت شنو وكانت جـادة جـدا?
مامشكلة بلبس معاه بنطلون جـينز!
بكره عيالك يكبروا يانور الهادي ويتزوجـوا وتشـوف محن أكتر من كده وبس تضحك بعد ماتتغاظ!
| |
|
|
|
|
|
|
|
|
|
|
Re: منى عوض خوجلى.....( حبّوبه) (Re: Muna Khugali)
|
محمـد الحسن قريبي من الزومة..
عارف أنا الزومة دي قاتلاني عـديل كـده..أسه مرات اسرح كده واتخيل حفلة عرس كبيرة في
يشانهم الكبيرة دي..والطـنبور ونغماته الشجية..وصفقات الشباب ورقيص نساء يبدأ من اول
الحوش وفجأة يصل لطرفه الثاني في رشاقة وفن عجيب..ورجـال يبشروا فرحانين وزغاريد تصل
لكريمة!
زمان أي مناسبة خطـوبة او زواج في بيتنا لازم تبـدأ بفنان شـايقي حتي بعـد كـده أي فنان تاني..ياحليل أيام زمان وياحليل الخليفة..وأقول ليك كـلام..ياحليل الزومة.. بيوتها
أغلبها مقفل أصحابها بس خـلو البلد جـاريين ورا أرزاقهم..
تسلم أخـوي..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: نصار)
|
عارف انصار انا لغاية دلوقتي ماقادرة استوعب الفكرة..
شـوف ذاتها الجملة دي عجيبة كيف
"آية اتزوجت"!!!
قبل بومين فرمت ليها طـعمية..إتصلت تسألني..بيعملوها كيف!
زمان اقول ليها تعالي شـوفيني بأطـبخ كيف تقول لأ..أنا طالعة ..ولا ماشية الكلية..
ولا تعبانة لأني غسلت العدة!
بس كـده تمام ..موش عايزة تعملني حماه وبعدها حبوبة? يللا خليها تتعب في البيت الأول..
شكرا يا نصار وعقبال ماتفرح بأي حاجة بتحبها..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: علي عبد الرحيم)
|
الاخ الـحـبيــب الـحـبــــــــــــــوب،
عـلي عـبـد الـرحـيـم،
تـحــية طـيـبة،
والشـكــر لك علي إفادتنـا خـبـر السـرور
وافـرحتنــا، والـف تهـنـئـةلإبنتنــا آيــة،
وللأخـت مـنـي، وهـي فـي أسـعـد أيامـهـا، نقـول، ادام اللة الافـراح،
والــف الــف مـبـروك.
| |
|
|
|
|
|
|
|
|
|
Re: منى عوض خوجلى.....( حبّوبه) (Re: رأفت ميلاد)
|
رأفت اخـوي كدي حـدثني..
بنت الشهيد اتزوجت ولا لسه?
البنات ديل بيكبروا سـريع خلاص!
غايته أنا يادوب عرفت ماما كانت أول مره يعقدوا علي فيها مافرحانة شـديد ليه..كنت تقريبا
شهور أكبرمن آية ..وفي الجامعة ولسه المستقبل واسع وأكبر من العرس قدامي..لكن أنا كنت حبيت وخلاص!
دائما احنا عندنا أمنيات لأبناءنا تشبهنا نحن ولا تشبههم هم..والاستماع لخياراتهم ليس بالشئ السهل بالنسبة لنا..لكن في النهاية هي حياتهم ولا نملك حيالها الا النصح ثم الوقوف معهم..
الكريسماس وين يارأفت?
| |
|
|
|
|
|
|
|
|
|
Re: منى عوض خوجلى.....( حبّوبه) (Re: بكري الصايغ)
|
http://www.marinamool.com/pic/up/16441314420061125.gif
الله يبارك فيك أخي دكتور بكري الصايغ..
أنا سألت عبـدالرحيم زوج آية ..
هتناديني شنو?
نظر لي بخجل واستغراب ثم ابتسم..لكنه لم يرد بكلمة تشرح رأيه..
سألته
قلت شنو?
رد هو هذه المرة وابتسامته تتسع... رد بسؤال..
عايزاني أناديك بشنو?
أي حاجة تعجبك..
ثم استدركت
ممكن خالتو أو ماما..
آية سمعت كلمة ماما وقامت صرخت..
لأ مايقول ليك ماما!
قلت ليه ياعبـدالرحيم ناديني اي حاجة بس عيب تناديني بإسـمي..
إتعلم يقول خـالتو...وبيقولها حـلوة شـدييييييد ...
ربنا يسـعـدك
| |
|
|
|
|
|
|
|
|
|
Re: منى عوض خوجلى.....( حبّوبه) (Re: بكري الصايغ)
|
إزيك يادكتور بكري..
ماما جارة قامت الصباح بدري يوم العقـد..تسألنا واحـد واحد عن المنديل الأبيض..نسألها عن
سبب المنديل..تعاين لينا بدهشة وتقول..
إنتو جنيتو ولا شنو?
المنديل الأبيض علشان لحظة توقيع العقد!
طـبعا هي قاصـدة لحظة ماالعروسة والعريس بيسلموا علي بعض ..والمأذون يغطي ايديهم بالمنديل الأبيض ويقرا الفاتحة..
قلنا لماما الكلام ده موجـود في افلام يوسف وهبي وخلاص بقي ماينفع دلوقتي..
بس هي ما اقتنعت وما ارتاحت الا بعد ما جبنا المنديل الأبيض..
علي فكرة المأذون كان عنـده فعلا منديل ابيض تمم بيه العقد..
ربنا يسعدك أخي دكتور بكري..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: سارة حمزة)
|
إزيك سـرورة الغالية...
أم العريس كان شفتيها زولة صغيرة شـديـد..تفتكريها أخته..وكمان جميلة جـدا..
إحنا بقينا أصـحاب ..
وشفتي علي عبـد الرحيم قعد يعاكسها!
يباركوا ليك أي حاجة حـلوة يارب ...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: محمد مكى محمد)
|
محمـد مكي أنا بحاول أنشغل عن حياة آية بحياتي أنا..
لكن آخـر حاجة في اليوم أعملها تكون الكلام معاها في التلفون..وفي الصباح أقلق لغاية
مااتكلم معاها..
ولما أتكلم معاها مرات أشطح وأتحشر بأسئلة وتعليق..بعدين أقوم آخـد بالي وأتراجـع..
فحياة آية الآن بها جانب غريب اسمه الزواج..وواحد راجل غريب إسمه الزوج!
يسـعدك الخالق ويكرمك..آمين
مني
| |
|
|
|
|
|
|
|
|
|
Re: منى عوض خوجلى.....( حبّوبه) (Re: ديامي)
|
شـفت يا ديامي آية كبرت سـريع كيف?
الكويس في الموضوع إنها سـاكنة قريب..يعني الزيارات سـاهلة
وأنا أسه دي ماشية أكمل احتفال عيـد ميلادها التمنتاشر..
إنت مابتجي كتير النت ..لازم تجي كتير لأنه وجودك بيفرحني..ويفرح آيتنا كتير..
يحفظك المولي..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Ahmed Hamza)
|
ومن المدهش حقا كيف يختصر ابناءنا وبناتنا مشاوير طـويله من الإستعدادات لمظاهر يراها
أغلبنا في السودان أساسيات..ويراها هم أفعال لا معني لها علي الإطـلاق..
مهر ابنتي كـان جنيهات كما طلبت هي...مؤخـره كان أكبر من المقـدم ..بلغ ثلاثون جنيها
بالتمام..
نبارك ليك كل السمح أخي أحمـد حمزه..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Gaafar Ismail)
|
أنا علي قـدر مافرحانة بزواج آية لي قـدر ما أنا لسه بفكر فيها طـفلة شقية ولطـيفه
همها اللعب والأكـل وعمل واجب المدرسة!
شـكرا أخي جعـفر اسماعيل علي تمنياتك الجميلة..وان شاء الله نسمع بحاجات جميلة في حياتك
نفرح فيها معاك
| |
|
|
|
|
|
|
|
|
|
Re: منى عوض خوجلى.....( حبّوبه) (Re: نادر الفضلى)
|
شـكرا أخي نادر يباركوا ليك السمح..أي سمح..
آية الأيام دي عايشة شـخصية الزول المسئول شـديد ..الله قادر!
شفت آية دي كـان لما أقول ليها قومي اعملي حاجة ..تطـلع عيني علي بال ماتعملها.. دايما في أعـذار..او تلكع!
دلوقتي تقوم من الصباح تعمل الحاجات في بيتها..وكمان قبل يومين لقيتها بتعمل شـوبنج!
انا فرحانة فيها لكن بيني وبينك ..هي واحشـاني شـديد!
| |
|
|
|
|
|
|
|
|
|
Re: منى عوض خوجلى.....( حبّوبه) (Re: عواطف ادريس اسماعيل)
|
الجميلة القادمة بقوة ويقين عواطـف...
شـفتي مجـدي زوج مديحة أخـتي قال لي شنو?
قال لي انتي ماعايزة آيه تتزوج علشان ماتبقي حبوبة!
اسة شـفع البلد دي لا قاعـدين يقولوا حبوبة لا حاجة..بس ينادوك بإسمك..
ولما ربنا يكتب وآية تجيب طـفل يتلخموا بالانجليزي وأنا مابعلمهم كلمة حبوبة!
ربنا يخليك ويعز مقـدارك...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Muna Khugali)
|
شاذلي ...أسة آيه دي كان سمعت كلامي وجات عملنا ليها عرس هناك ما كان أخير?
كـان جينا رقصنا في حوشـكم الواسـع داك... وإنت طـبعا عارف رقيص بلدنا بدورلو حوشا كبير..
ولكن زي ماقلت ...أصلو أحسن وقوع البلا ولا انتظاره..
سـلم لي الجماعة ودايماطـاراكم وفي البال مشروع لقاء ربنا يقربه..قول آمين
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Adel Sameer Tawfiq)
|
تحلالك العافية أخـوي عادل سـمير..
انا مش قلتو علي حبوبة?
سـمح انتظروني..الحبوبات بيشـاكلوا م طـرف وآراءهم الصعبة مابيسمحوها..
وزول بيسـألهم مافي..
أها أرجـوني ولغاية ماأجيكم حبوبة..أقول لبك عقبال ولـدك وبنياتك يا ظـربف...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: إسماعيل وراق)
|
إزيك اسماعيل أخـوي..
شـكرا علي مباركتك..ربي يبارك في اي زول وأي حاجة في حياتك..
الأيام بتجري شـديـد..أرسل لي صـديق عبـد الرحمن أبو آية..وهو صـديق عزيز لي..رسـاله
فرحانة جـدا..مامصـدق إنه آية اتزوجت...لأنه مامعقول تشوف الزول طـفل... وفجأة تلقاه
كبر شـوية...وفجـأة تاني تلقاه كبر خالص وكمان عرس!
تسلم أخي اسماعيل
| |
|
|
|
|
|
|
|
|
|
Re: منى عوض خوجلى.....( حبّوبه) (Re: ابو جهينة)
|
أخي أستاذ أبو جهينة..
جـربت قبلي زواج الأبناء موش كـده?
شـعور بالإستغراب..يعقبه إنشغال..ثم يلي ذلك الحـدث وهو عقـد القران..
ثم يتبع ذلك شـعور الحمـد لله نرتاح شـويه من الزيطـة..
تنوم أول يوم وتاني يوم تســأل نفسـك..
ياربي آية عاملة كيف?
ثم تجلس تفكر في قلق..أتصل بيها ولا عيب?
ثـم يزيـد القلق ويكبر معه الإحساس بالوحـده..أنزل لغرفتها ويصـير دبدوبهاالذي تحتضنه أثناء
نومها آيتي التي اشتاقها..أرجـع لكم لأكتب عنها..
ثم يأتيني صوتها..
ماما كيفك?
تتلعثم الكلمات بعـد أن تتكاثر الأسئلة في رأسي..وأعجـز عن قول شـئ أكثر من قول..
وحشتيني حبيبتي..
فترد وانتي كمان ياماما..
تصبح علي مليون خـير أخي أستاذ أبو جهينه..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Ishraga Haimoura)
|
شـروقتي..
والله كان رغبتي آبه تعرس سـوداني..لكن القسـم!
مفهوم زواج سـوداني من سـودانية مع ابناءنا في الشتات غير موجـود بشـكل مأصل كما هو مأصل في أجـيالنا..حـتي وهم يصـرون علي اسلامهم!
عنـدما أخـبر العريس والـد آية برغبته في الزواج من آية ظـننت أنه سـيرفض..بل كنت أتمني ذلك..
لكنه ناقش الأمر معها ثم معي..وقبل هو فقبلت أنا وفرحنا وهيصنا..
والعروسـة للعريس والجـري للمتاعيس!
مشتاقين شـروقتي..وإن شاء الله نهيص ونفرح بفرح سـلمي
| |
|
|
|
|
|
|
|
|
|
Re: منى عوض خوجلى.....( حبّوبه) (Re: علي عبد الرحيم)
|
الحبيبة منى خوجلي
الامورة آية
الف مبرووووووووووووك ، وضربت امبارح لحظة العقد .... لكن يظهر ام العروس كانت مشغولة شديد ... تركت مسج للمباركة ....
الف ميروك آل خوجلي
الف مبروك علي عبد الرحيم
بيت مال وعيال آية ...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: انعام حيمورة)
|
نعومي..
اليوم داك أنا لا بشـوف لا بسمع..ضـيوف واستقبال وتباريك وحاجات كتيرة
أسة أنا يانعومي كان عايزة أزور نسابتي لازم احـدد معاهم من فترة مواعيـد الزيارة..
والونسة تكون بالإنجليزي وتكون عن شنو أنا ذاتي ماعارفة..بس عارفة حاجة واحـدة بس..
إنها لإنجـليز عامة كـده قطاعين..
يعني في أمل في شمارات!
سلامي الكتير لناس البيت ولناس المكتب..
وقبال ما أمشي..أقـول..تلقي الفي مرادك يارب..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Haytham Abdulaziz)
|
تسلم هيثم أخـوي...
شفت وليداتك الصغار ديل?
بكرة تلقاهم كبروا وفي الجامعات ولا كمان جاينك يقولوا ليك عايزين نعرس!
الخليفة وماما عاشة كانوا دايما بيقولو لينا أعـز من الولـد..ولد الولـد..
ياربي يكون الكلام ده صـح?
علي كـل حال أتمني ده مايحصل قبل كم سنه تكون هي خلصت قرايتها.. ويكون بالي أنا
طول شـوية!!
مبروك ليك ولينا كلنا...مش آيه بتنا كلنا?
| |
|
|
|
|
|
|
|
|
|
Re: الف مبروك (Re: فيصل محمد خليل)
|
الحبوبات كتيرات وانواع ...
زمان الحبوبات كانو كلهم مشلخات وممشطـات وعاملين 'نص أسـود شفايف'
وفي عيونهم في حـنية ظاااااهرة!
وبعـدين بقي في حبوبات من غير شـلوخ ومن غير مشاط ..بيتفننوا في الأكـل ...وحنينين
بس مازي أمهاتهم..يعني مابيحكوا ليك حكايات فاطمـة السمحة ولا حكايات بنات الشيخ الأغبش البيتقلبوا كـدايس..حبوبات بيحجـوا كويس حجاوي حـلوة..
ثم أتي علي الدهر حبوبات كـده بيمشوا الكوافير ويقروا جرايد وهم متحننات..وبياكلوا في المطاعم أحيانا بالشوكة والسكين... وبعدين الواحـدة فيهم تقول لبنتها وهي خارجة من البيت ومفتاح عربيتها عايز يقع من يدها بسبب استعجالها..
ماتنسي تدي فافي الوجبة قبل ماتطلعي..
أنا بقي لما أبقي حبوبة هاكون فرحانة شـديـد ..لأني هألقي عيل ألعب معاه وبيه..وبدل
ماأجـك في الشارع لزوم الرياضة..أجري ورا البيبي.. ولما هـو يصرخ ويضحك بعد ما أمسكه .. أقعـد أزغزغه لغاية مانموت من الضحك احنا الإتنين!!
الله يباركك يافيصل وربنا يجمعنا في السودان..زي ماجامعنا هنا..
| |
|
|
|
|
|
|
|
|
|
Re: الف مبروك (Re: محمد عمر الفكي)
|
ود الفكي أخـوي..
أم زوج آية قالت أسـلمت..آيه فرحـانة شـديـد..أنا قلت ليها كدي الننتظر شـوية نشوف فهما للإسلام..إن كان طلع فهم حب وسـلام نفرح ونسعد..إن كمان طلع فهم غلط ..عنيف وارهابي كمان مانفرح..ولا شنو?
هو الدين الإسـلامي ده ناقص ناس يشوهوه زي البلاوي العندنا دي?!
لما تحصل ليك أي حاجة حلوة يامحمد عمر الفكي تعال كلمنا..علشان نشاركك الفرح ونبارك ليك..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: حمد فتح الرحمن)
|
الله يبارك فيك حمد فتح الرحمن أخـوي..يسعـد أيامك..
آية دي بت واحـدة ماعندي غيرها..ولو علي نفسي..أبدا ما أخليها تعرس..
لكن دي رغبتها وأنا لازم احترمها..أصله في النهاية علاقتنا بأبناءنا مالمفروض تكون
علاقة تملك..نقول رأينا وننصح وبعد ده نبارك الإختاره ربنا...موش?
عشت...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: أبو الحسين)
|
يسمع منك المولي أبو الحسين أخـوي.. ويسعـدهم وينجح خطواتهم..
لكن أنا كـده عايزه لي شـهور حتي أتعـود علي غياب آية وسـكنها في بيت تاني..
زول يكون معاك 18 سنه.. بس يقـوم كـده يمشي مع زول غريب علشان اتزوجه?
بيني وبينك حارة علي الرغم من الفرح والهيصة!
ربنا يطـولك عمرك ويسعـدك محل ماتكون خطـواتك..قول آمين..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: خالدة البدوي)
|
شـوفتي ياخلودتي أولادنا ماشاء الله بيكبروا سـريع كيف?
الأجيال الجديـدة عنـدها عملية في التفكير تسبقنا كثير ..هم قطـعا أفضل مننا في
عمليتهم..
أسه عرس آيه كان في الـسودان.. كان احتمال كبير الأشياء تأخذ شكل آخر..بداية من طلب
اليـد الرجالي.. يليها طلب اليد النسائي وفتح الخشم ..ثم يلي ذلك خطـوبة.. وبعـدها
عقـد ثم زفاف ..
وبين كل اجراء وآخـر صرف في ملابس ودهب وأكـل.. وتعب ونقة في ده آيوه وده لأ..
وغايتو أختك ربنا ريحها جنس راحـة..لزومها شنو العوارة ووجـع القلب?
ربنا يسعـدك حبيبتي وتعيشي وتباركي ونفرح كلنا سـوا..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: رشا سالم)
|
رشا الحلوة شـدييييد
كـل ماتمر السنين أفكـر انه موضـوع الزواج ده بيتغير..وأقول الواحدة أصلها مالمفروض
تفكـر في الزواج قبل عمرها مايصل نهاية العشرينات..
لأنه يادوب في الوقت داك تكون الواحـدة قرت وعملت مكان في الشغل وعرفت الحياة أكثر..
لكن نظريتي ما مشت..بتي عرست وعمرها 18 ...وده سـن أنا في رأيي صـغير لكن دي رغبتها
وأنا عاينت ليها من زوايا أخري ودعمت رغبتها مع والدها..
تسلمي حبيبتي وربنا يحقق ليك أمانيك...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: عبد اللطيف بكري أحمد)
|
عارف ياعبـداللطـيف علي الرغم من إني بحب وكادات ماري منيب أشهر حماه
في تاريخ السينما المصرية..لكن غلبني خالص أبقي حماه..
كان نفسي أشخط وأنطر وأجي ماشية كـده بطـريقة يا أرض إحـفظي ما عليكي
أو يا ارض انهـدي.. ماعليك قـدي..
بس ياحسارة غلبني..عارف غلبني ليه?
خيبة كـده بعيـد عنـك..جايانا من ورا ..وعيب أقـول ليك زي منو لأنه الكلام بيمس الأهل..إ
حنا أصلو حماه ونسيبة دي ماعنـدنا..من دخل عنـدنا هـو في الحب مفقود الا من غضب عليه ربي!
فزوج البنت عنـدنا ابن وأخ وليس فقط زوج..والحمـد لله علي رزقنا بوالد في نقاء الخليفة
وأم في طـيبة وكرم أمي علمونا كيف نحب..
شـكرا عبـد اللطـيف ويارب أكـون ماما حـلوة لعبـد الرحيم زي ما أنا مامة آية..
يـديك الفي مرادك..آمين
| |
|
|
|
|
|
|
|
|
|
Re: منى عوض خوجلى.....( حبّوبه) (Re: hameem)
|
هميم انت قاطـع الحركـة كـده مالك?
سـافرت خلاص ولا شنو?
وبعـدين ولا يهمـك انت عليك الحفلة ..تجيب لنا فنان حـلو هنا
وأنا بعمل العشا علي طـريقة لقمة هنية بتكفي مية..ولا كمان لو عايزنا نتفشخر ممكن..
بس آية ماتعرف!
في انتظارك ياجميل..ولغاية ماتجي أقول ليك أفرح كتير وتعال..
أنا نفسـي أزغرد ليك..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: حمزاوي)
|
الاخت الغالية الاستاذة
منى عوض خوجلى
الاموره العروسة اية
الف مبروووووووووووووووك
الفين مبروووووووووووووك
مائة الف مبرووووووووووك
مليون مبروووووووووووووك
مليار مبروووووووووووووك
بليون مبروووووووووووووك
لنهاية الارقام مبرووووووك
وتستاهلى اكثر يا اختى منى وصغيرتنا العروسه اية
التهنئة موصوله للاسرة الخوجلية والعريس البهية واسرتة
وبيت مال وعياااااااااااااااااااااااااااااااااااااال
مبروووووووووووووووووووووووووووووووووووووووووووووووك
تحياتـــــــــــــــــــــــــــــــــــــــــــــــى
ســـــــيد
| |
|
|
|
|
|
|
|
|
|
Re: منى عوض خوجلى.....( حبّوبه) (Re: محمد العميري)
|
إزيك محمـد العميري..
أنا بس ماعايزة آية تجيب أطفال أسة لأنها لسة صغيرة شـديـد وقـدامها مشوار طـويل قدامها..
لكن آية علشان كانت طـفلة واحـدة عايزة تعوض بعيال كتار..وبعدين أنا علي الرغم من اني
قلت ليها رأيي واني ماهأقـدر اشيل عيالها..لكن طـبعا لو حصل ربنا أداها عيال ماهايكون
قدامي غير أربي معاها!!
أصلو الدنيا دي الزول مايعرف يرتاح فيها!
يباركوا ليك الفرح بالنجاح في اي حاجة انت تقصـدها..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: سيد محمد احمد سيدنا)
|
كيفك سيد محمد احمد سيدنا?
شـفت ولا عملنا عرس في الخرطـوم ولا حاجة..يعني لا انتو اهلنا في الإمتداد ولا أهل
آية حضـرتوه!
لكن مباركتك دي عنـدي كأننا قاعـدين في صوان واحـد في الفتحة الجنب الباب..
نتونس شـوبة ونقوم نـدخل البيت نتونس مع عجايزنا ونرجـع الصوان تاني انت تبشر
وأنا أدي الشبال!
يخليك لينا يارب...
| |
|
|
|
|
|
|
|
|
|
Re: منى عوض خوجلى.....( حبّوبه) (Re: حمزاوي)
|
تسلم حمزاوي خـال آية ..
شـفتوا انتو فعلا أهل آية..حضـرتوا وجـعي بولادتها في مايو1988 في بوست آيه عمرها 17 ..
لغاية ماوصلت 17 سـنة..طبعا فلاش باك..وبعدين لما آ يه كملت 18 سنه كلكم جيتو هنيتوها..
مش هي بتكم الكبرت بينكم?
حضـرتو حضانتها.. مدرستها..أسة زواجها..أصـله هو الأهل بيبقو أهل كيف لو ماعاشوا حياة
الطفل وتفاصيلها?
يخلي ليك أسرتك ويخليك ليهم..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: فاروق حامد محمد)
|
شكرا فاروق إن شـاء الله عنـدنا حـفلة..أحجز ليك طربيزة لكن قول لي عايز منو يقعـد
معاك فيها..ممكـن الطـربيزة نعملها كبيرة لو حـبيت..
اول مرة شـفت عريس آية قلت في نفسي..
ده شـنو لعب العيال ده?!
لأنه صـغير في عمره..
وبعـدين قلت..
طيب ديل هايتحمـلوا المسئولية كيف?
أحسن أوريهم لو عايزين يعرسـوا يتحملوا مسئوليتهم.. طـبعا اختبرتهم..
هاتسكنوا وين..سألتهم..
وقبل مايردوا... قلت لآيه اياك تكونوا مفكرين تسكنوا معاي?!
أتاري الولـد عنـده بيته!
هو شغال.. وماعايزين مهر ولا شبكة آية قالت..
قلت ليها ماعايزة ماعايزة..أصلو المهر حقها..وهي قرت عنه كتير وعارفة الغرض منه..وخلاص..
شـفت الحياة ممكـن تكون سـاهلة كيف مرات يافاروق?
تسـلم
| |
|
|
|
|
|
|
|
|
|
Re: منى عوض خوجلى.....( حبّوبه) (Re: انعام عبد الحفيظ)
|
شـوفتي يا نعومتي علي عبـد الرحيم جه فك الخبر وتاني ماجه..تلفون سـاكت ما عمله!
أها نجي لأهل العريس..ماشـاء الله عنـده أخـوان تيمان يعني احتمال في المستقبل آيه تجيب لينا تيمان..تيمان ولد وبنت..والباقيين بنات صغار..طبعا هو الكبير ..
انا غايتو ممكـن اعمل تنازل واساعـد أيه لو يوم ولدت تيمان..أنا كان نفسي يكون عنـدي تيمان آيدينتكال..كنت أجنن بيهم الناس ..وألخبط العالم كـله.. ألبسهم زي بعض وأسرح ليهم نفس التسريحة...واحتمال.. احتمال يعني..
أخليهم يمتحنوا لبعض لو كانوا في فصول مختلفة..و...و...
نبارك ليك كـل الحاجات البتتمنيها....
| |
|
|
|
|
|
|
|
|
|
Re: منى عوض خوجلى.....( حبّوبه) (Re: علي عبد الرحيم)
|
أسه الزول يضحك ولا يسـوي شـنو?
والله فيلم عـديل كـده..قال ايه.. آيـة اتزوجت!
نحنا غايتو اثناء النهار كان عنـدنا مصارعة انا وآية..كنا متشاكلين علي الحمام..
منو يستحمي الأول..وبعـدين آية قامت قالت خلاص نتصارع والبيغلب يدخل الأول..
أنا رضيت وكنت ناسية انها الأكثر طـولا..وقوة!
شـكرا ياعلي ويـديم عليك الصحة يارب..بس حبوبة دي انا بقيتا من زمان..
لما سحر بت مديحة أخـتي ولدت..بس ساعتها انا بقيت indirect haboba ..
ولما آية ربنايرزقها بعيال وأكـون direct haboba يحلها حلال ..ومن ضمن الحلول نشر
اشاعة في ويب سايت تاني ..نقول فيه ..
مبروك لمني خـوجلي زواج شـقيقتها آية!
ربنا يخليك يا أخـوي وفعلا آية بنتك وبنتهم..تسلم..
مني
| |
|
|
|
|
|
|
|
|
|
Re: منى عوض خوجلى.....( حبّوبه) (Re: doma)
|
أهلا أختي دومة عقبال أولادك يارب..قـولي لي..
مستعـدة تبقي نسيبة ولا لأ?
في ناس بيقولوا علي النسـيبة مصيبة..ياربي كلامهم ده كيف?
آية كانت معاي قبل شـوية لقيتها بتتكلم مع زوجها وبتحنس فيه مايجـوط ليها البيت..
عملت نفسي بريئة وسـألتها..
بيجوط البيت كيف يا آية?
قالت..ياماما بيقلع هـدومه ويرميها علي الأرض..ويسـيب باقي الأكـل في الصحن علشان
مايغسـله...فيها شنو يعني لوقلع هـدومه وختاها في الغسيل ولا علقها في الدولاب?
علقت لآية وأنا أبتسم في شماته..
ياربي أنا الكلام ده مر علي قبل كـده وين?
آيه فهمت طـوالي وقعـدت تضحك!
عارفة يادومة ده كـان كلامي لآية السنين الفاتت كـلها..اللهم لا شماته!
يخليك لينا يارب ولأسرتك..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: Adel Sameer Tawfiq)
|
يا مولانا للزمن داك أنا أكون بقيت (بترول) .. حلك لامن (ناجى ونشوى) يخلصوا (الروضة)
و(المدارس) و(الجامعة) والشنو ما بعرف داك ... كعبين إنتو يا ناس (منى خوجلى) و(عادل سمير) البقيتو حبوبات ويا عادل ما تفرح أنا عندى عريس جاهز لى (هبة) ومافى حاجة إسمها عاوزة أواصل دراستى !!!!
| |
|
|
|
|
|
|
|
|
|
Re: منى عوض خوجلى.....( حبّوبه) (Re: الفاتح يوسف جبرا)
|
أنا ذاتي إتغشيت الفاتح أخـوي..
أسـة أول أمس القريبة دي كنت بمسكها من إيـدها الصـغيرة وأوصلها المدرسة وأجيها راجـعة
نغشي البحيرة ..معانا عيش علشان نأكله للبط والوز!
فجـأة كـده لقيتها كبرت..أكـون اتغشيت ولا لأ?
لكن أنا أصـل ما ناوية أكـبر..وآية بطـريقتها!!
ربنا يكبر ليك عيـالك..وتعجـز إنت يارب..دعوتي حـلوة موش?
ربنا يسـعـدك ويسـعد اسرتك..
| |
|
|
|
|
|
|
|
|
|
Re: منى عوض خوجلى.....( حبّوبه) (Re: معتصم الطاهر)
|
معتصـم.. أنا أصلو ماكنت عايزه آيه تعرس زول غير سـوداني.. وكنت راسمة علي عريس منكم ..
ولما قلت لآية لازم تعرسي سـوداني..قالت علي عنصرية!
أكـون ياربي عنصرية وماجايبة خـبر?
أسة عريس آيه ده أمم متحـده عـديل ..أمه خلاسية..أبوها كاريبي وأمها انجليزية..
وبعـدين عرست هنـدي جـابو لينا عبـدالرحيم!!
شـفت الفيلم الطـويل ده كيف?
كمان آية لو جابت أطـفال هانزيـد علم سـوداني مع باقي الأعلام..
معتصـم.. أنا قلت ليك قبل كـده اني فرحـانة بيك شـديـد?
يسعـدك بأسرتك ويتمم عليك أفضاله..
| |
|
|
|
|
|
|
|
| |
عاطف عمر
Muna Khugali
نيازي مصطفى
الملك
Tumadir
طارق جبريل
mahmed alhassan
نصار
رأفت ميلاد
عثمان سيد أحمد
محمد مكى محمد
Gaafar Ismail
عبدالمنعم الرزوقي
عواطف ادريس اسماعيل
نادر الفضلى
shazaly gafar
Adel Sameer Tawfiq
Ishraga Haimoura
ابو جهينة
إسماعيل وراق
انعام حيمورة
Haytham Abdulaziz
محمد عمر الفكي
elham ahmed
فيصل محمد خليل
حمد فتح الرحمن
أبو الحسين
خالدة البدوي
رشا سالم
hameem
سيد محمد احمد سيدنا
محمد العميري
انعام عبد الحفيظ
فاروق حامد محمد
doma
الفاتح يوسف جبرا
معتصم الطاهر
فيس بوك
تويتر
انستقرام
يوتيوب
بنتيريست