د. النور حمد لمحمد لطيف: نحن لا نختلف عن ارتريا وتشاد واثيوبيا في موقفنا من "العروبة"

Quote: سلام يا صباح شايفك كررتى المقتبس الفوق ده كثير يا ستى خلى الدولة السودانية التي نتمى اليها وجزء منها تهتم بلغاتنا وتعطيها الفرصة مثلما اعطت اللغة العربية الفرصة في مقاعد التعليم ودواويين الحكومة وبعد داك شوفينا لو ما كتنبنا بلغاتنا انت عايزانا نتعلم الكتابة والقراية بلغاتنا في بيوتنا والا الفهم شنو ؟ انا على سبيل المثال والكلام ده بكرره ليك تانى عندما ذهبت الى المدرسة لكى اتعلم ما كان عندى خيار اتعلم الا باللغة العربية وانا في الزمن داك او فى السن داك ما كان عندى اى علاقة باللغة العربية ولا اتحدث اللغة العربية بل كنت اتحدث لغتى النوبية ومع ذلك تعلمت العربية كتابة وقراية لانو ده كان المتاح وعلاقتى بديت مع اللغة العربية من المدرسة .. زيما انت عارفة عملية الكتابة لاى لغة في الدنيا دى من صنع الانسان ومافى لغة وجدت وهى مكتوبة وبالفهم ده اى لغة غير مكتوبة ممكن تتكتب واى لغة كانت مكتوبة وحرمت من الكتابة بفعل فاعل ممكن تعاد كتابتها .. وبعدين ما جاوبتى على سؤالى في المداخلة السابقة وخلينى اكرره ليك هنا تانى انت قلتى العرب اتزاوجوا ونتج عن هذا التزواج ملامح وشكل السودانى الحالي في شمال السودان واكتسب معها اللغة العربية نتيجة هذا التزاوج .. وانا قلت ليك ديل ( الشايقية ) على سبيل المثال . سؤالى ليك فرق المحسى او الدنقلاوى شنو من الشايقى والذى نتج عن هذا التزاوج العربى من حيث الملامح والشكل ؟ لو بتفتكر المحس والدناقلة أيضا نتيجة تزاوج عربى لماذا لم يكتسبوا العربية كما الشايقية على سبيل المثال وانت تقولى هذا التزاوج اكسب انسان شمال السودان اللغة العربية مع الملامح والشكل . ثانيا : ما الفرق بين الدناقلة والمحس والشايقية من جهة وبين مواطني دول شرق افريقيا من جهة أخرى ( اثيوبيين واريتريين وصوماليين ) من حيث الملامح والشكل ؟ ودى نقطة من النقاط التي يتحدث عنها اخونا كمال عباس