|
Re: دوبيت - مرابيع حادقة (Re: عبدالمنعم الطيب حسن)
|
تحيات نواضر استاذ عبدالمنعم الطيب حسن وشكرآ علي المرور- وأزيدك بيت بطعم اللبن المقنن ..
بعد ماتبت عاودني الغرين ألْبارِح فكرو ضروري أصبح بي المعدّل سارِح سبب الحسرو مابدَّاوا من شان جارِح بعيدَن دونو عنقور السناف القارِح
| |
|
|
|
|
|
|
Re: دوبيت - مرابيع حادقة (Re: أحمد الشايقي)
|
مشكور الرفيع الاستاذ احمد الشايقي وهاك من باب الاستزادة : قمرية الفروع المن دوام بتطيري وماتخليني أهجع ماكفاكي تطيري ماتخليني لي ليلي ألوكو مريري وماتخليني لي جمري البقا لي سريري
| |
|
|
|
|
|
|
Re: دوبيت - مرابيع حادقة (Re: عبدالرازق يوسف الحاج)
|
. التحية لك أبو يوسف وضيوفك الكرام .. أهو قلنا نديك غشوه في راكوبتك الباااااارده دي . . الـرِّزِق مقســوم ،والمَقَـدَّر حاصِـل والداير الفلاح بي جِدُّو لابُد واصِل أعمل واجتهِد تلقى المَصَعَّب ساهِل رِزقَك في السَّما لا تكون غِشَيِّم وجاهِل . مطر الخير نزل ، رتع الحلال وروينا بـرِق عبــادي يقــدح والإلاه طـاريــنا مســايل الحَـدَب الباتـت تشَــخِّر فينــا ابو يوسـف اخوي وين المبيـت افتيـنا . الخبر الأكيد قالوا الشـقوق مطرانـه فارقنا السموم وصِبْحَ المـحَلْ بِقفانا يــارب يا كريـم بي رحمتـك تلفانـا ألْبِــل سَـفَّلت ، أدوا الخبـر لفلانــه . يوم جانا الخبر من الديــار هبينا سربنـا العِصـير ألْبِلنـا خَبَّت بينـا الشَّـم غَرَّبَـت زغـلل نظـر عينينا أبو يوسف اخوي سهرتنا عِندالزينه . رباعيات ود المكي
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
بت النَّاس عديلة وكَحْلِي وليكي المولي يا القالبِك جديّة مَحْلِي يا الضّارباني في جوّه الورايد النّحْرِي ويا أم فرّا بجاوزوبو القرض لي السَّحري
الغناء دا غناء البادية الغربية .. ناس شمال كردفان تحديداً.. ناس حمد ود الصغير وعلي ود قدال السراجابي والبخيت ود عبدالمولى وعبدالسيد الكاهلي والعيدوسي وود السيميتاوي
سنعود لأدب الكردافة .. البادية الغربية
وجهك والبدر قسمن سماهن وسهلن حقبك والفلو الحبكن سبايكو بصهلن نظرن خدك الريل من سماحك ذهلن شيومك عزل أب قنفة المحاجمو ببهلن ود الفكي حمد (الكبير)
| |
|
|
|
|
|
|
Re: دوبيت - مرابيع حادقة (Re: بدرالدين بابكر مصطفى)
|
يامراحب بدر الدين ومنور ياشفيف القادمني بي العبره ورجع مغبون مرطب جسمو من غيرشانبولاصابون بي طيبآ مدقق خالطو في المقرون بعركبو المرصع بي دهب شيبون
ونديك يابدر مقتطفات من روائع علي ود قدال :
سواحى الفريق يا ام دُغمةًَ مَحبوكه لا تجالسيهو لا تديه الامــانه يضوكا أنحنا خطرنا شاقين الجبــــال الروكه وحِس سيطانا خمجن بى قفا ام دبوكه
أردح دوب وأعمِل لعبة ام شَبالْ على المن تَيَه لا لابْ الفريق لا قال ياتْ من شافها اخَد اللَفه امِش وتعال وما تتهوَّل آ ابوى الحكاية جمال
وكتين السفبه حَرَسْ الهِناق والجاعر جلبنا مهربات دبوكه ما ها اباعر سَقَوه وزاد جمال نيّاب ونحنا كِزاعر نهارنا وليلنا شاقين السهل والواعِر
يومنا القُمنا من عِد راحة سوطنا يغنِّي فوق اللّي الحنين قَرواحة نحن التسعة دقاناً كُبار ترَّاحة ؤعريقنا إضّرَّا من الفي البنات بجَّاحة
يومنا القمنا نحن التسعة جندي معاكي وودقدال خبيرِك بي العدل بفدَاكي أعَدْلي مَشيكي داكْ شارع الملوَّح جاكي ؤطال شوقِك علي القش القبيل في مناكى
عكّينا وعدلنا وعيّط المخباط طبقنا المُرْحَلة وسَرْوَتها قُمنا نشاطْ الدّرب إنشحط وإترخرَخ الربّاط ؤهِن بتراهمِنْ بينا وخبيرهن عاط
بتين يا حالة الصحرا العلينا تزولى ويا نَفْسْ حاسْبِى ياروح لى جماعتِك طولى الخلا دايرلوا ولداً ما بتمسكوا الهولى سمتان كيف اخونا مُحُمَّد الجَلّولى
خالص الود
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
حباب ود المكي أستريح لأ قدااام البيت بيتك
ضَعَنِك مِن صَبَاح الكوع دِروبُو إتواطِن جَمَلِك ناسَف المَرْخِي وجِراسْتِك عاطِنْ الخَزْنة الفي المِدريَّات غفيرها براطِن نُور البيَّح البيهو البنادِر زاطِن
أم ربَش المَشبَّل في الوضيب خرَّاسِك جَمَلِك ناسَف المَرخِي ورَطَن جرَّاسِك الخزنة الدَّقُّو في نُص المدينة نِحاسِك والمِزْنِي المِشارفين لي خريفِك ناسِك
الخزنها السيدها شايل الرَّيف عَزلُّو ضرايب جلب 100 و80 من سديس لا نايب ديفة البُيض دراريعو وقِفيهو حقايب زعفتها ونقاقِيرها وسماحها عجايب
الخزنة السيدها شايل الريف عزل بي فاقة جلب 100 و80 من جمل لي ناقة ديفة البي السبيدر لوَّعو البنداقة لينا ولوف ولي عير البيوت طقَّاقة
ياود المكي حليل بوادي عربنا وحليل ناسآ بشيقونا وبزيدو طربنا حبيبي الفوقو لمحات ناس ديانا وسبنا قالوا الليلة في أم عشرين ورد وعقبنا
مع وافر مودتي
| |
|
|
|
|
|
|
Re: دوبيت - مرابيع حادقة (Re: عبدالرازق يوسف الحاج)
|
. ديانا الوصيفـة ، والراسيـه هيَّ المَلْكَـه ناعِم جيـده من صنف الحريـر والسِّلكـه وكْت النَّم حِـلا مفدوعـه جادعـه الفِركـه يا ستـار عليْ سطلتنـي الخُمَــر والدِّلكـه . طِريت الزول اللذيذ نضمو وحالي قصيدو طِريـت الضــامِر اب ديســاً بِكتِّـف سيـدو وكِت ليلي انقسم والسهراجه حَمَّــت ريـدو مكتــولاً جَفَـــل ، مجنـون وكاسِــر قيـــدو . ود المكي
| |
|
|
|
|
|
|
Re: دوبيت - مرابيع حادقة (Re: عادل ابراهيم احمد)
|
. غايتو يا عادل هاك القدرنا عليه .. إلا قافيته صعبه بلحيل . لي ضيف الهجعه بِتَمرُق المدسـوس نص الليـل بِكركِـب طاجِنـا وبتعوس إن قالت سـلام يبرُد حشــأ الممغوس بِت فارساً اصَمْ سيفو المِقبال الروس
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
. البــارِح طِريت ناســاً فُراقُم قاســي كاتِلني الغرام بحراً ما ليهو مراسي المواجِع صدَّت وصِبِحتَ ماسِك راسي يا لحاق بعيد عارْفَ الدَّرِب ولا ناسي . طِريت الزول اللابْسَ السماحه قلاده طِريت الحبيب الوسَّدني ديسو وِساده إن شاقني الغرام في الهجعه أنا نشّاده يـا لحّــاق بعيـد مَصَعيــكَ خَلُّـو زيــاده
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
لك خالص الود يا ود المكي لكن تاريك ممكون شديد خلااااص هههه :
ديفة الروبزن دخلن كويع الخشّة أجمل خلقة من صُل الدبيب الوشّة يا منهدا متوقر لا إنكسر لا إنفشّه لي البارح طريتك ودمعي ساساق بشّه
| |
|
|
|
|
|
|
Re: دوبيت - مرابيع حادقة (Re: عادل ابراهيم احمد)
|
يامراحب الأستاذ / عادل ابراهيم ياسلام عليك دي زوله وزنة دقون ونادرة جدآ : لى ضيف الهجعة بتمرق المدسوس نص الليل بكركب طاجنا وبتعوس بت قايد القبيلي الليهو رأي مابدوس تعزمك حارصي بت عز الرجال الروس
| |
|
|
|
|
|
|
Re: دوبيت - مرابيع حادقة (Re: عبدالرازق يوسف الحاج)
|
. وادي السيسبان رويان مِفرهِد قَشُّـو والطير ان رَحَل ما ظِن يفارق عِشو الجننـي يـوم هَمَـد الفريـق واتعَشُّــو جاني النســيم شايـل بخورو ورشُّـو . قومـاك يـا صديق قالوا الديـار اتْرَشَّـت وادينا القِبيل عطشــان عجايـفو اتعشَّـت السرّايه صِبحت والضحوي لاقى وشتَّت قِبيـل تلـقى ام سمــاح ادَّخـنت واتقتـت . ود المكي
| |
|
|
|
|
|
|
Re: دوبيت - مرابيع حادقة (Re: عبدالرازق يوسف الحاج)
|
. إن بَرَقـت بِـروق بشــتاق وازيــد تنهيـده بطرى النقرشوله درب الطير في خديده يوم فاض بِي الحنين والسهراجه حَمَّت ريده جفلتَ على الفريق صــياد وناشِد صيده . طال بينا المجال دوبيت ونَم وطِرِبنا والليـل انقسم وِدْرَت عقولنـا ضِهِــبنا يوم الحظ يقوم نصحى وننوم في لِعبنا ويوم الحظ ينوم نلقى العضُم في الجِبنه . .................................. ود المكي
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
مرحب بيك يا عبدالقادر ومرحب بمشاركاتك القيمة .... بعد ماقنا رقنا ومن سهرنا هجعنا كر ياقمري لاتسرب علينا وجعنا حبينا البوادي ومن اهلنا نجعنا ياريت كنا من اول ايامنا رجعنا .. ... اسمح لي اصحح الشطرتين الأخيرتين كالاتي: حلينا البوادي ومن اهلنا نجعنا ويا ريت كنا في اول شهورنا رجعنا
| |
|
|
|
|
|
|
Re: دوبيت - مرابيع حادقة (Re: الشامي الحبر عبدالوهاب)
|
Quote: بعد ماقنا رقنا ومن سهرنا هجعنا كر ياقمري لاتسرب علينا وجعنا حبينا البوادي ومن اهلنا نجعنا ياريت كنا من اول ايامنا رجعنا |
الرهد البقوقي دباسو ردتو جميعو قمريهو وبلومو وناسو على بلد البعيد أكتافو من خراساو دودي بي واندفقن محاجم راسو
| |
|
|
|
|
|
|
Re: دوبيت - مرابيع حادقة (Re: محمد التجاني عمر قش)
|
شكرا لك الأستاذ/ الباحث ود قش وأنت تتحفنا بهذه السياحة الرائعة من القوقاي : قمرية الرِّهيد ام طوق لقيتها الليلة فوق روب الفريعات فوق سألتها وين مشيتي يا عديمة الزوق قالت شلت دار موسي وبريت النوق من مسدار القمرية للأستاذ / علي الشيخ ود المر
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
الوادي ااب غديرا حابسو اديك بتعلو شقاقو وجروفو ويابسو الليلة اصبحت كاكك وبردلوبك لابسو علي البي خيط حرير سبل الزمام في حوابسو
اسمح لي أن أصحح ذلك أيضاً .. عندي تسجيل للبخيت ود عبدالمولى فيهو المربوع دا بقول: كسر الهربة والوادي أب عويشاً حابسو إيديك بتعلو شقاقو وخدارو ويابسو تراك اصبحت كاكك وبردلوبك لابسو على البي خيت حرير شابل الزمام في محابسو
ولك التحية مثنى وثلاث ورباع
| |
|
|
|
|
|
|
Re: دوبيت - مرابيع حادقة (Re: عبدالرازق يوسف الحاج)
|
. قالوا الصعيد رويان ، واتَرَّعَن وِديانو اطَّريت التقيـل الراجِـح دوام ميزانـو الزول القبيل ضوَّقني العذاب والوانو الجواب كتبتـو وعُقبـاً نِسيـت عنوانـو
................................. ود المكي
| |
|
|
|
|
|
|
Re: دوبيت - مرابيع حادقة (Re: محمد فضل الله المكى)
|
. قالوا الصَّبُر صبرين من حرُّو ما بِنتوب يوماً نسيم ودُعاش ، يوماً رِعود وهبوب أرحـم يـــا كـريــم مـن قســـوة المحبـــوب أنا لايكَ الصَّبُر مين ضــاق صبُر أيوب . ................................... ود المكي
| |
|
|
|
|
|
|
|