Quote: القبانى ,, كيفك يا ذوق المرحوم بإذن الله الجابرى لو قلت ليك إنّو ده صوت ما ح يتكرّر قريب على مستوى العالم مع ميزة اختيار الكلمات و عبقرية التلحين و ما الرسايل براها حاجات تانية غصبن عنّك تدودر بى حالك كدى جيب اجعص فنّان و خليهو يلّحن كلمات زى دى الرهيف قلبو بعيش فى شكّو اكتر من يقينو تستبيهو آااااااخ انا من تستبيهو دى
آخ ساكت يا جلّي ...
يا خي بشفق على وليداتنا القاعدين في الغربة دي لما اسمع الجابري في الجريف و اللوبيا
و الله يا جلال اقرب ابكي لما الجابري يقول :
عندي شوق لي نيلنا .. و الأهل و الطيبة .. الجريف و اللوبيا و باقي ذكرى حبيبة ( و كم عندي ذكريات في الجريف غرب يا جلي ) ...
و البكا ببقى نشيج لما يصل :
يا سواقي بلدنا ... و ينو صوتك مالو .. وينو قارع مويتك ... غنى باسم حالو ... وين غسيل النيل ... و شر هدوم في رمالو ...
بالله عليك دينك ... صابونة بتعريفة مكعب كبير و ظهرة فوق البيعة ... و غسيل زي الورد ... وشر هدوم في القيفة فوق الرملة العجيبة ...
و الله يا جلال حنموت بالحسرة بس ...
ياخي شوف الأوثرتري في كلام الصادق الياس ...
عندي شوق لي ( نيلنا ) ...
نيلنا انحنا ديل ...
اها ...
الجابري وحده ... الذي يغنيها الجريف و ( اللوبيا )
كل المقلدين غلبتهم و بغنوها الجريف و ( اللوبا ) ...
و مع الجابري يا ما حنتوه ... و ياما نشوف دلايل ...
بالمناسبة ... رسايل هي اول لحن لأحمد الجابري ... اداها ليهو الصادق الياس سنة 1963 ...
الجابري لحن رسايل ( المعجزة ) في أسبوع واحد فقط ...
اغانيه القبلها ما من الحانو ... عبد الرحمن الريح معظمها ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة